Nuus Archives - Page 118 of 1583

Grondwetlike krisis dreig in Limpopo

‘n Grondwetlike krisis dreig in Limpopo nadat Vuwani-inwoners beloof het om die Verkiesingskommissie van Suid-Afrika (OVK) te verhoed om die 2016 munisipale verkiesings in die geweldgeteisterde gebied te hou.

Eindelose geheime vergaderings, wat daarop gemik was om ‘n oplossing vir die voortdurende krisis te vind, het in duie gestort met geen ooreenkoms wat nog bereik is nie.

Die regering het voorgestel dat Vuwani-inwoners die dreigemente moet staak en toelaat dat die verkiesingsproses plaasvind in geaffekteerde wyke.

Maar Vrydag het inwoners gewaarsku dat indien hul tradisionele leiers die ooreenkoms onderteken, hulle nie verteenwoordigend van die gemeenskappe optree nie.

Vuwani en omliggende gebiede is gesluit en regeringsaktiwiteite, insluitend skoling is sedert April ontwrig nadat hulle ‘n hoërhofaansoek om onder die Makhado-munisipaliteit te bly, verloor het.

Hulle het die hooggeregshof genader om die besluit van die Munisipale Afbakeningsraad om Malamulele by die nuwe Limpopo-distrik in te sluit, om te keer.

Meer as 24 skole is afgebrand en regeringseiendom beskadig tydens die protes.

Gemeenskapsleier Nsovo Sambo het gesê dit bly gemeenskap se besluit om nie deel te neem aan die komende verkiesing nie.

“Ons staan steeds by ons besluit, ons is nie van plan om te stem nie,” het Sambo gesê.

Die OVK se provinsiale voorsitter Nkaro Mateta het gesê die dreigement deur inwoners van Vuwani het potensiaal om ‘n grondwetlike krisis te veroorsaak en sal die vestiging van plaaslike distrikte beïnvloed.

“As hulle nie stem nie, dit sal beteken dat die nuwe entiteit nie vasgelê kon word nie as gevolg van uitstaande wyke,” het Mateta gesê.

Na 90 dae vir ‘n tussenverkiesing kan die parlement genader word vir grondwetlike wysiging, en dit kan ‘n grondwetlike krisis en vertraging veroorsaak.

Die nuwe entiteit het 27 wyke en 14 is deel van gebiede wat betwis word en nie wil deelneem aan die verkiesing nie.

Sommige bronne sê die ANC het dringend stemme nodig in al 14 wyke wat geraak word deur gewelddadige protes.

“Dit is ‘n dilemma want as die mense nie stem nie, kan ons dit nuwe entiteit verloor aan opposisiepartye,” het ‘n ANC-binnekringlid aan ANA gesê.

Solidariteit gebruik anti-Steve, anti-Afrikaanse advokaat in ‘SAUK-4’-saak

Solidariteit en Afriforum, wat tans die hofsaak namens die sogenaamde “SAUK-4” hanteer, maak gebruik van die advokaat Steven Budlender, wat voorheen deel van die veldtog was om Steve Hofmeyr te keer om “Die Stem” te sing en sy hele loopbaan te ruïneer. Budlender het pro bono teen Steve Hofmeyr opgetree namens Conrad Koch, die hatige buikspreker wat gedurig op Afrikaners vloek en skel (sien foto van Budlender hier bo).

Budlender is die seun van Geoff Budlender, SC, wat in die verlede terroriste van die ANC en SAKP verdedig het en ‘n uitgesproke linkse revolusionêr was.

‘n Woordvoerder van ‘n Afrikaanse organisasie wat nie sy naam genoem wil hê nie, het aan PRAAG gesê: “Dis ‘n uiters vreemde keuse van advokaat in dié saak rondom die SAUK. Terwyl Solidariteit en Afriforum voorgee om ‘vir Afrikaans’ te veg, voer hulle vir seker nie hul sake in die hof in Afrikaans aan nie, aangesien Steven Budlender nie Afrikaans magtig is nie. Boonop staan hy en Conrad Koch uiters vyandig teenoor Afrikaans en ‘n sanger soos Steve Hofmeyr.”

Budlender jr is lid van die “Victoria Mxenge-groep van advokate”, wat vernoem is na ‘n marxistiese Xhosa-regsgeleerde wat voorheen ook deel van die terreuraanslag op Suid-Afrika was. Haar man Grifiths Mxenge, wat ‘n ANC-lid was en ook ‘n tydperk gevangenisstraf op Robbeneiland uitgedien het, is vermoedelik deur die Vlakplaas-eenheid gedood, waarvoor Dirk Coetzee, Almond Nofemela en David Tshikalanga kwytskelding van die Waarheids- en versoeningskommissie ontvang het.

Solidariteit werk ook nou saam met die FW de Klerk-stigting, wat mag verklaar waarom die vakbond deesdae linkse, anti-Afrikaanse advokate verkies om namens hom en sy lede te litigeer.

Uitspraak in die saak is voorbehou en word blykbaar môre tienuur in die Arbeidshof in Kaapstad gelewer. Die vier afgedankte SAUK-joernaliste wat poog om deur die hof heraangestel te raak, is: Jacques Steenkamp, Foeta Krige, Suna Venter en Krivani Pillay. Foeta Krige was tot onlangse uitvoerende regisseur van RSG-Monitor terwyl Jacques Steenkamp en Suna Venter as joernaliste by RSG werksaam was.

Bomontploffing in Ansbach, Duitsland: 12 beseer

Met mevrou Angela Merkel wat Duitsland se grense vir Moslemimmigrante uit die Midde-Ooste oopgegooi het, is terreur besig om in die land handuit te ruk. Die jongste voorval is ‘n man “van Siriese afkoms” wat by Ansbach, naby Nürnberg, ‘n bom aan sy lyf laat ontplof het en 12 mense beseer het, waarvan drie in ‘n ernstige toestand verkeer.

Die 27-jarige man is blykbaar toegang tot die Ansbach Ope-musiekfees geweier, volgens die Duitse minister van binnelandse sake, Joachim Herrmann. Die verdagte was bekend aan die polisie, het Hermann gesê, en woon reeds twee jaar in die land, maar is ‘n jaar gelede asiel geweier.

Die minister meen ook dit is “onduidelik” of die man ander wou doodmaak of bloot homself en dat hy reeds twee keer “selfmoord wou pleeg” en voorheen vir psigiatriese behandeling na die distrikshospitaal in Ansbach verwys is.

Foto’s is gepubliseer van gewapende polisie wat ‘n perseel in Ansbach deursoek, wat volgens die plaaslike media die woning van die selfmoordbommer is.

Dié voorval geskied kort op die hakke van ‘n ander voorval waarin ‘n swanger vrou op straat in Reutlingen deur ‘n Siriese asielsoeker met ‘n vleisbyl vermoor is.

Die Duitse owerheid sê die 18-jarige aanvaller wat Vrydag nege mense doodgeskiet en nog 27 in Munchen gewond het, het die aanval ‘n jaar lank beplan.

Die kantoor van staatsmisdaad sê David Sonboly het die onwettige pistool wat in die aanval gebruik is, aanlyn gekoop op die internet waar dié produkte slegs met die hulp van spesiale sagteware toeganklik is.

Volgens die Britse Uitsaaikorporasie was die slagoffers nie sy klasmaats nie en is hulle nie spesifiek geteiken nie.

Sonboly het vroeër die toneel van ‘n skoolskietery in die dorp Winnenden besoek en foto’s geneem.

Daar is ook bevestiging dat hy psigiatriese behandeling ontvang het.

Dit is die vyfde terreuraanslag in Europa binne ongeveer 10 dae, terwyl owerhede probeer voorgee dat dit “enkelgevalle” is wat “versteurd” is.

Die groot ironie: Max Price kanselleer meningsvryheid-lesing by UK

Die ironie kan nie groter wees nie. ‘n Spreker wat uitgenooi is om die jaarlikse akademiese meningsvryheidlesing aan die Universiteit van Kaapstad (UK) te lewer, is verhinder deur die Universiteit se Uitvoerende Raad.

In Maart 2015 het die die Universiteit van Kaapstad se komitee besluit om Flemming Rose (foto hierbo), ‘n prominente aktivis vir die vryheid van uitdrukking, uit te nooi om die 2016 T.B. Davie-gedenklesing op 11 Augustus aan te bied.

As die kultuurredakteur van die Deense koerant, die Jyllands-Posten, het Rose in September 2005 ‘n paar tekeninge en spotprente gepubliseer wat die profeet Mohammed uitbeeld. Die doel van hierdie oefening was om die mate waarin kunstenaars self-sensuur toepas, te belig.

Max Price, die “progressiewe” visekanselier, verbete multikulturalis en nou sensor, het sy besluit verdedig en gesê Rose se teenwoordigheid sal die kampus “verdeel” en “geweld” veroorsaak.

Die kampus is reeds verdeel, oor allerlei kwessies, veral oor ras en meningsvryheid. Maar Price kan sulke sensuur met gemak toepas omdat die mense wat nie saamstem met hom oor hierdie aangeleentheid nie, onwaarskynlik ‘n verwoestende brand sal veroorsaak.

Die tweede rede wat Price aanvoer, naamlik “sekuriteit”, is sy eie maaksel.

Indien geweld uitbreek op die kampus van UK oor Rose se besoek, is dit Max Price wat self daarvoor verantwoordelik sal wees want hy het al die elemente ingenooi en aangemoedig om onverdraagsaam op te tree.

Maar dit het almal reeds geweet.

Universiteite gaan eersdaag tewens verplig wees om personeel af te dank en begrotings in te kort indien daar nie teen die einde van die jaar ‘n volhoubare oplossing is vir studente se eise vir gratis onderwys nie.

Universiteite Suid-Afrika, ‘n organisasie wat al 26 universiteite in die land verteenwoordig, sê al die instellings is onder geweldige finansiële druk.

Die uitvoerende hoof, Ahmed Bawa, het gewaarsku dat universiteite nie nog ‘n jaar só sal kan voortbestaan sonder om fooie te verhoog nie.

Hy het verwys na die Universiteit van Kaapstad wat sy personeelbegroting met 100 miljoen rand wil probeer besnoei, omdat hy wyses moet vind om volhoubaar te bly.

Die regering het geen verhoging vir vanjaar ingestel nie ná wydverspreide studentebetogings verlede jaar.

Universiteite SA sê die Universiteit van Rhodes, wat onlangs in die nuus was oor sy finansiële probleme, is nie die enigste universiteit nie.

‘n Polemiek woed intussen, aangesien die hoof van die Dept. Filosofie aan die UK, David Benatar, intussen skerp kritiek teen Price se besluit op Politicsweb uitgespreek het.

Twee IVP-lede geskiet In KZN

Twee IVP-lede is doodgeskiet in die Umtshezi-gebied naby Estcourt in KwaZulu-Natal.

Siyanda Mnguni en Thokozani Majola is Vrydagaand geskiet. Besonderhede is nog onduidelik.

Daar is gerugte dat die twee IVP-lede vir die munisipale verkiesing op 3 Augustus stemme gewerf het toe hulle gekonfronteer is deur mense wat na bewering dra ANC T-hemde gedra het, maar dit kon nie bevestig word nie.

Volgens die IVP se nasionale voorsitter Blessed Gwala, is die twee van naby geskiet.

“Ons is bekommerd as ons na aan die plaaslike regeringsverkiesings ons lede verloor. Hierdie dade van moord sal nie net die demokratiese regte van kiesers ondermyn nie, maar sulke dade is die omkeer van die winste wat ons in die stabilisering van die provinsie van KwaZulu-Natal gemaak het,” het hy gister gesê.

“Ek is ook ingelig dat ‘n leier van ‘n sekere politieke party een van ons vrywilligers raakgery en beseer het met sy motor en toe weggery het. Wat ons kwaad maak is dat die polisie nie ‘n saak van poging tot moord wil open nie […] maar van roekelose bestuur. Dit is belaglik. Aksie moet geneem word teen hierdie polisiebeamptes,” het Gwala gesê.

Die IVP het ‘n beroep op wetstoepassingsagentskappe gedoenom die jongste skietery vinnig te ondersoek.

Dit sal ‘n voorbeeld vir mense stel wat teen die demokratiese orde in die algemeen, en vrye en regverdige verkiesings in die besonder is, stel.

Die IVP ‘n beroep op sy lede gedoen om kalm te bly.

Mugabe se einde: Etniese konflik wat oorspoel na SA

Vrees vir die Zimbabwiese president Robert Mugabe is besig om te verdamp nadat sy mees lojale ondersteuners, die veterane van die terreuroorlog, besluit het om hul steun te onttrek van sy party, die Zanu-PF.

‘n Groeiende aantal oorlogsveterane eis dat Mugabe, 92, ‘n “diktator”, uittree en sê hulle sal hom nie ondersteun in die volgende verkiesing in 2018 nie.

Mugabe het voorheen die veterane se lojaliteit gekoop deur wittes se eiendom aan hulle te oorhandig en Afrikanerboere te vermoor.

Nou staar Mugabe ‘n eindspel in die gesig, met Sjonas en Ndebeles wat vir mekaar tande wys omdat daar geen wit boere meer oor is om te blameer nie.

Ook in Suid-Afrika is die twee groepe selfs besig om mekaar in die middestad van Johannesburg die stryd aan te sê.

Die Ndebeles, die eerste aankomelinge uit Zim, word nou gemarginaliseer deur die ANC in Gauteng, terwyl Sjonas wat na Suid-Afrika stroom ter wille van oorlewing, ‘n anti-wit ideologiese voordeel het.

Die etniese spanning tussen Sjonas wat Mugabe-aanhangers is, en Ndebeles wat aanvoel dat hul onderdrukker nie meer lank het om te leef nie, het reeds tot herhaaldelike konflik tussen die twee groepe gelei.

“As die oorlogsveterane kragte saamsnoer met die nasionale versetbeweging gedryf deur burgerlike groepe en gerugsteun deur kerke en opposisiepartye, is Mugabe, wat reeds op die toue is en hang aan die krag van [sy] naels, dit binnekort sy Waterloo,” het The Independent, se redakteur Dumisani Muleya Vrydag gesê.

Groeiende protes teen die regering word aangevuur deur ‘n ernstige ekonomiese krisis, insluitend ‘n gebrek aan kontant, selfs om soldate te betaal. Hulle is gewoonlik die eerste wat betaal moet word.

Die regerende Zanu-PF het die oorlogsveterane skerp gekritiseer en hulle “verraderlikes” genoem wat “verraad pleeg”.

Vise-president Emmerson Mnangagwa, wat ook ‘n oudstryder is, het gesê die president is hul bevelvoerder en “egte” veterane moet lojaal wees en bly.

Die oorlogsveterane se leier Chris Mutsvangwa is in Maart geskors uit Zanu-PF omdat hy Mugabe se vrou Grace, wat ambisies het om Mugabe op te volg wanneer hy sterf, teëgegaan het.

‘n Voormalige vise-president Joice Mujuru, ook ‘n veteraan van die terreuroorlog, het oor die naweek gesê oorlogsveterane hoef nie dreigemente te vrees dat “hulle” plase sal teruggeneem word nie.

Mujuru, ‘n lewenslange lid van Zanu-PF, is gestroop van haar posisie en geskors uit die party in 2014, nadat sy haar belangstelling verklaar het om Mugabe op te volg. Die aanval op haar is gelei ook deur ondersteuners van Grace Mugabe.

Nog ‘n oorlogsveteraan Rugare Gumbo, ‘n voormalige Zanu-PF-woordvoerder is eweneens geskors uit Zanu-PF in 2014 en nou ‘n ondersteuner van Mujuru se party.

Gumbo het gister gesê: “Die verklaring is uitgereik deur egte oorlogsveterane. Hulle was in Mosambiek. Ons het geweet hulle is daar. Hulle het geveg in die oorlog, en die situasie in Zimbabwe is nou baie swak. So baie ly. Die kritiek was korrek. Jy sal sien al hoe meer van hulle kritiseer Mugabe.”

Die geld probleem is te groot vir hom [Mugabe] om te oorleef, want daar is ‘n volledige verlies aan lewensbestaan en die regering het geen beheer oor die geldeenheid wat hulle gebruik, die Amerikaanse dollar nie. Geen opbloei van nasionalistiese retoriek sal meer werk vir Mugabe nie.”

Adv. Jan Heunis bedank uit US-raad uit protes teen voortgaande verengelsing

Die voorsitter van die konvokasie aan die Universiteit van Stellenbosch, adv. Jan Heunis, het uit sy posisie as raadslid van die universiteit bedank omdat hy glo dat “die vertrouensbreuk tussen die Konvokasie en die Raad… en die Bestuur… nou so groot geword het dat ek nie meer met ‘n rein gewete ‘n lid van die Raad kan bly nie.”

Heunis het dit veral oor die versluierde bevordering van Engels as verhewe taal aan die universiteit, en dat die konvokasie se besluite dat Afrikaans gelyke status met Engels moet hê, nie deur die raad en die bestuur uitgevoer word nie. Sy volledige bedankingsbrief word hier onder weergegee.

Irannese skieter in München dood 9 en homself

‘n Agtienjarige Moslemman het selfmoord gepleeg nadat hy 9 ander mense om die lewe gebring het in ‘n moordtog in München, die hoofstad van die Duitse deelstaat Beiere. Die Duitse minister van binnelandse sake, Thomas de Maizière sal om 11-uur vanoggend met die veiligheidsdienste in Berlyn vergader.

Die amptelike dodetal staan tans op 10, waarby die Moslemmoordenaar ingesluit is. Sestien mense is beseer, waarvan drie in ‘n ernstige toestand verkeer. Die polisie het bevestig dat verskeie kinders onder die oorledenes getel kan word.

Die hele München was gister in ‘n toestand van paniek toe die man van Irannese afkoms wat volgens verskeie berigte “Alluha akbar” (Allah is groot) geskree het, op onskuldige mense by ‘n McDonalds naby die Olympia-winkelsentrum begin vuur het. Daarna het hy na die winkelsentrum self beweeg waar nog mense gedood en beseer is.

Blykbaar het die moordenaar kinders na die McDonalds gelok deur te adverteer dat daar gratis kos beskikbaar gaan wees.

‘n “Akute terroristesituasie” is deur die provinsiale hoofstad afgekondig en alle openbare vervoer is etlike ure lank opgeskort. Reisigers wat nie huis toe kon gaan nie is deur inwoners van die stad onderdak gebied met ‘n “oopdeur”-veldtog wat op Twitter onder die hutsteken #OffeneTür georganiseer is.

Die polisie het die anti-terrorisme-eenheid GSG 9, asook die federale en spesiale magte van verskeie ander deelstate ingeroep.

Volgens die Münchense polisiehoof Hubertus Andrae, was die tienderjarige massamoordenaar “nie voorheen aan die polisie bekend nie”.

'n Volkswagen Passat-stasiewa uit 2006 waarop die polisie beslag gelê het, en wat vermoedelik deur die skieter gebruik is. — ‘n Volkswagen Passat-stasiewa uit 2006 waarop die polisie beslag gelê het, en wat vermoedelik deur die skieter gebruik is.

Swaar gewapende beamptes het ‘n klopjag in die buurt van Maxvorstadt waar die woonstel van die moordenaar geleë is, uitgevoer. Die polise het ook op ‘n 2006 Volkswagen Passat-stasiewa beslag gelê (sien foto hiernaas), wat in die omgewing van die Olympia-winkelsentrum gevind is.

Tydens die klopjag gisteraand het die polisie van nagsigbrille en honde gebruik gemaak. Die hele straat is afgekordon, met noodvoertuie wat gereed gestaan het.

Duitse polisie naby die Olympia-winkelsentrum

Volgens die Duitse media is ‘n robot ook deur plofstofdeskundiges aangewend om die skieter se liggaam te deursoek, aangesien daar gevrees is dat hy ook ‘n bom in ‘n rooi rugsak gedra het. Geen inligting is intussen bekendgemaak oor die inhoud van die rugsak nie.

Die Duitse owerheid was tot dusver versigtig om enige gevolgtrekkings oor die motief van die aanval te maak of selfs om dit ‘n “terreuraanval” te noem.

Die kanselaryminister Peter Altmaier het egter aan ARD gesê dat “‘n terreurdaad nie uitgesluit kan word nie”.

‘n Verder “verdagte geval” is by Münchenlughawe aangemeld, maar die polisie wag nog vir besonderhede.

Kovsies appelleer teen pro-Afrikaanse uitspraak

Die Universiteit van die Vrystaat het besluit om teen die pro-Afrikaanse uitspraak van die Vrystaatse Hooggeregshof in Bloemfontein te appelleer. Dié besluit is binne 24 uur nadat die uitspraak gelewer is deur die universiteit bekendgemaak.

In ‘n verklaring deur Lacea Loader (Direkteur: Kommunikasie en Handelsmerkbestuur) van die universiteit, word die volgende gesê:

Die uitspraak van die Vrystaatse Hooggeregshof op 21 Julie 2016, wat ’n aansoek van AfriForum en Solidariteit handhaaf om die besluite van die Raad en Senaat van die Universiteit van die Vrystaat (UV) oor die nuwe Taalbeleid te hersien, is in opdrag van die universiteit se prokureurs vir eksterne advies deur senior en junior advokate verwys.

Die advies is dat die uitspraak van die Hoë Hof, met respek, foutief is met betrekking tot regsbeginsels en feitelike kwessies, wat albei grondliggend en verreikend is.

Die UV sal volgens hierdie omstandighede aansoek doen om in die Hoogste Hof van Appèl teen die uitspraak te appelleer.

Die swart studenteraadsvoorsitter van Kovsies het na afloop van die uitspraak Donderdag gesê dat hy “verwag dat die universiteit alles in sy vermoë moet doen om van Afrikaans ontslae te raak”.

Ted Cruz maak ‘n gek van homself by Trump se benoeming

‘n Voormalige aanspraakmaker op die Republikeinse Party in Amerika se nominasie as presidentskandidaat, Ted Cruz, het hom Woensdag die argwaan van afgevaardigdes na die nasionale konvensie op die hals gehaal, toe hy verseg het om Donald Trump te ondersteun.

Die afloop van die gejou was egter ‘n hoogtepunt van die aand nadat die visepresidentskandidaat, Mike Pence, daarna as ‘n versoenende faktor in die kollig getree het.

Cruz het midde ’n staande applous op die verhoog in Cleveland opgestap en die gehoor verveel met gemeenplase totdat hy afgevaardigdes aangeraai het om “met hul gewete” te stem sonder om Trump se naam te noem.

“Stem vir kandidate op die stembrief wat jy vertrou om ons vryheid te verdedig en wat getrou aan die grondwet sal wees,” het hy gesê.

Die gehoor het hierop begin om hom luidkeels uit te jou en gedreunsing “Endorse Trump!” Cruz het daarmee finaal sy politieke loopbaan beëindig en hy en sy vrou, Heidi, ‘n werknemer van Goldman Sachs, moes haastig die saal verlaat.

Goewerneur Chris Christie het by die Konvensie gesê Cruz het vroeër in sy teenwoordigheid plegtig belowe om Trump te steun deur ‘n onderneming te teken.

Christie sê hy is geskok dat iemand hul woord so maklik kan breek en dat sulke optrede politici ‘n slegte naam gee.

Trump het Cruz tydens veldtogvoering “Lyin’ Ted” genoem.

Kort daarna het Pence die gehoor onder luide toejuiging verenig. “Wat ons verenig, is baie meer as enige iets wat ons skei,” het hy gesê.

Melania Trump se toespraak Maandag, waarin dele uit Michelle Obama se toespraak agt jaar gelede aangehaal is, was weer in die kalklig.

‘n Toespraakskrywer het om verskoning gevra en aangebied om te bedank, maar Trump wou haar bedanking nie aanvaar nie.

Trump het die benoeming van die Republikeinse party tydens die party se nasionale konvensie in Cleveland Ohio Donderdagaand aanvaar.

Trump is nou amptelik die party se kandidaat vir die presidentsverkiesing op 8 November.

In sy aanvaardingstoespraak het Trump homself verklaar as ‘n vriend van die werkersklas.

Hy het sy Demokratiese teenstaander, Hillary Clinton daarvan beskuldig dat sy ‘n spoor van dood, vernietiging en terreur agtergelaat het toe sy minister van buitelandse sake was.

Trump se toespraak het die vierdaagse konvensie afgesluit. Hy het uit die vuis gepraat en herhaal dat hy die muur gaan bou om Meksikaanse dwelmbendes en ongewensde immigrante uit die VSA te hou.

Hy het die gehoor aan sy voete gehad.