Kategorie: Nuus

Steve sing ‘Die Stem’ en sensors slyp hul messe

Die sanger Steve Hofmeyr het oor die naweek ‘Die Stem’ van CJ Langenhoven voor ‘n skare by die Innibos-kunstefees te Nelspruit gesing. Die skare van 45 000 mense het uit volle bors saamgesing. Volgens die dagblad Beeld, kon die feesorganiseerders ‘hom nie keer nie’.

Foto van die feesgangers by Innnibos op Hofmeyr se Facebook
Foto van die feesgangers by Innnibos op Hofmeyr se Facebook

Omdat Suid-Afrika in 1994 deur ‘n groep kommuniste vanuit die voormalige Sowjetunie en Oos-Duitsland oorgeneem is, word die sing van patriotiese liedere, veral deur Afrikaners, as uiters polities inkorrek, en selfs “fascisties” gesien.

Dr. Dan Roodt van PRAAG het ‘n parallel tussen die sing van ‘Die Stem’ en die sogenaamde “sangrevolusie” in Estland in die laat tagtigerjare getrek. “Steve, jy het geskiedenis gemaak! Dis ons Estiese oomblik, patriotisme teen kommissarisse/sensors,” het hy aan Hofmeyr en Adriaan Basson, redakteur van Beeld, getwiet.

Basson het voorheen aan Hofmeyr op Twitter gevra:

Intussen het Beeld ‘n hele reeks linkse “Afrikaanses” opgebel ten einde ‘n front teen Hofmeyr te monster. Dr. Piet Croucamp, die selfaangestelde nuwe-Suid-Afrika-sensor wat veral universiteitsdosente laat afdank indien hulle nie polities korrek bly nie, het sy “teleurstelling” uitgespreek “dat die feesorganiseerders hulle nie hiervan gedistansieer het nie”.

Hy het insgeslyks die feesorganiseerders van “lafhartigheid” beskuldig dat hulle Hofmeyr hoegenaamd toegelaat het om te sing.

Croucamp het verder gesê: “Die lied is ‘n teruggryping deur Hofmeyr na die verlede en ‘n romantisering van apartheid. Die fees is daardeur misbruik vir politieke doeleindes. Dit heg ‘n stigma aan die fees.”

By implikasie het Croucamp verder gedreig dat nie net Hofmeyr nie, maar selfs Afrikaans verbied mag word indien Afrikaners hul nie gedra nie. “As Afrikaans in Suid-Afrika behou wil word, moet dit juis nie met apartheid geassosieer word nie.”

Die sanger en skrywer Koos Kombuis het sarkasties oor Steve Hofmeyr opgemerk:  “Dis dan dalk tyd dat iemand vir hom (Hofmeyr) die woorde van die volkslied leer. Dis nie so moeilik nie.”

Suid-Afrika se suksesvolle linkse revolusie en voortgesette beheer deur die ANC en Suid-Afrikaanse Kommunisteparty hang af van die beheer oor inligting, media en kultuur. Tydens die Estiese “sangrevolusie” het die Russiese Kommunisteparty selfs tenks vanaf Rusland na Estland gestuur in ‘n poging om die bevolking te keer om verbode patriotiese liedere te sing.

Die oligargie wat Suid-Afrika beheer, is besig om ‘n ryk dwarsdeur Afrika te bou en wil daarom nie sien dat individuele volkere soos Afrikaners hul eie identiteit terugvind en die sentralisering van mag in die Party bedreig nie. Hul mag, asook selfverrykende kaderontplooiing, hang van die onderdrukking van Afrikaans af.

Eienaars van nagklub baie armer na ANC-Jeugliga-partytjie

Eienaars van ‘n Durbanse nagklub is R80 000 armer na ‘n ANC-Jeugliga-partytjie wat twee dae aangehou het.

Dit was glo ‘n amptelike ANC-geleentheid georganiseer deur die Jeugliga.

The Witness berig dat die beplanners van die verkiesingspartytjie Emmanuel Bongumusa Gumede en Themba Dlomo, sowat R24 000 se whiskey en R10 000 se sjampanje uitgedrink het saam met hul vriende.

Die rekening nog nie vereffen nie, ten spyte daarvan dat Gumede twee maande gelede daarvoor geteken het.

Die African National Congress het hom gedistansieer van die twee.

Volgens die verslag, is die saak by die polisie aangemeld, maar die ondersoek het tot stilstand gekom.

Dlomo het aan The Witness gesê: “Ek het hierdie funksie gefasiliteer maar ek was nog nooit verantwoordelik vir die betaling daarvan nie.”

Gumede is gelys as die direkteur van vier maatskappye in verskeie fases van likwidasie, terwyl Dlomo glo met die ryk ANC-sakeman PG Mavundla verbind word.

Die ANC-Jeugliga se adjunk-provinsiale sekretaris Sboniso Duma kon nie onmiddellik vir kommentaar bereik word nie.

Joernaliste moet bedryfslisensies kry sê SAUK-hoof

Die SAUK se waarnemende bedryfshoof, Hlaudi Motsoeneng, wil hê ‘n bedryfslisensie moet aan joernaliste uitgereik word voor hulle kan werk.

Dit sal soortgelyk wees aan die lisensies vir mediese dokters en regslui het die uitsaaier Donderdag berig.

Motsoeneng sê joernaliste wat onprofessioneel optree se lisensies sal opgeskort kan word. Hy het by die jaarlikse Joburg Radio Days van die Universiteit van die Witwatersrand as spreker opgetree.

“Jy weet as jy ’n joernalis is, is jy ’n professionele joernalis. As jy nie etiese waardes en beginsels het nie berig jy op ’n misleidende wyse. Met prokureurs … as jy ‘n fout maak, vat hulle jou lisensie weg. Ons moet dieselfde ding met joernaliste doen. Dit is wat ons moet doen as ons Suid-Afrika wil bou.”

In Februarie het die Openbare Beskermer, Thuli Madonsela, ’n verslag uitgereik waarin sy Motsoeneng se aanstelling in sy pos as onreëlmatig uitgewys het.

Sy salaris het binne een jaar van R1,5 miljoen tot R2,4 miljoen toegeneem.

Inisiasiedodetal styg ten spyte van miljoene rande se veldtog

Ten spyte van miljoene rande wat bestee is om swart mans medies te laat besny, is drie-en-twintig inisiasie-kandidate sedert die begin van die winter-inisiasieseisoen dood.

Johns Hopkins Gesondheid en Onderwys in Suid-Afrika (JHHESA), met befondsing van USAID / PEPFAR, en in vennootskap met Sonke Gender Justice, Cell Life, CHAPS, ANOVA Gesondheid, onder die vaandel van Brothers for Life, saam met die Suid-Afrikaanse Nasionale Vigsraad en die Nasionale Departement van Gesondheid het vroeër ‘n “omvattende, innoverende strategie” in Suid-Afrika aangekondig.

Daarvan het dadels gekom en die aantal steftes het toegeneem.

Die nuwe sterftes is weereens weens foutiewe besnydings. Die duur Amerikaanse veldtog teen ritualitiese Afrikagebruike het dus geen indruk gemaak nie.

Daar is reeds 104 seuns is in hospitale opgeneem weens hul beserings, het Obed Bapela, adjunkminister van tradisionele sake, Donderdag gesê.

“Dit is hartseer om die toename in die dodetal van inisiasie-kandidate aan te kondig,” het hy in ’n verklaring gesê. “Dit gebeur ondanks al ons pogings.”

Negentien van die oorledenes was van die Oos-Kaap, drie van Mpumalanga en een van die Wes-Kaap.

Bapela sê die 104 kandidate wat in hospitale opgeneem is, word behandel vir ontwatering en beserings wat verband hou met foutiewe besnydings.

Hy het sy medelye met hul families uitgespreek en gesê die regering veroordeel onwettige inisiasieskole.

‘Alles wat ek gebou het gaan tot niet’

Onbehandelde riool stroom by Kroonstad in die Valsrivier in, alhoewel daar so onlangs as in 2008 R8 miljoen aan die rioolaanleg bestee is.

‘n Opposisieraadslid het tydens die Moqhaka-raadsvergadering die munisipaliteit gewaarsku oor die skokkende verval van die waterinfrastruktuur.

Die raadslid, ‘n voormalige stadsingenieur, het gesê die Kroonstad-rioolsuiweringsaanleg het heeltemal tot stilstand gekom.

Thys Vermeulen het aan die Volksblad gesê: “Die water staan stil. Dit stroom net so onbehandel die rivier in.”

Ongesuiwerde rioolwater het ook die netwerk van ondergrondse waterpype besmet wat gebruik kan word om parke, skole en sportterreine nat te lei.

Hy het ook gesê die rekenpligtige amptenaar van die munisipaliteit moet vir die storting van riool in die rivier vervolg word.

“Dit is nie vir my lekker as ek sien hoe alles wat ek gebou het, tot niet gaan nie.”

Brug in Wêreldbekersokkerstad stort ineen

‘n Oorbrug wat inmekaargetuimel het, het die dood van twee mense in Brasilië veroorsaak. Die oorbrug is nagenoeg vyf kilometer vanaf die stad se wêreldbekerstadion geleë.

Die brug het op ‘n bus se voorkant en ‘n motor ineengestort. Dit is onduidelik hoeveel insittendes daar was.

Twee is dood en 19 beseer in die ongeluk in een van die stede waar Wêreldbekerwedstryde gespeel word, te wete Belo Horizonte.

Dié land bied die Sokkerwêreldbeker aan waar versillende uitspeelwedstyde in verskillende stede gespeel word.

Die oorbrug moes teen einde Julie voltooi gewees het vir ‘n snelbusdiens. Die brug het ineengestort toe konstruksiewerkers besig was om die steierwerk te verwyder.

Daar is reeds vier sokkerwedstryde in die stad se Mineirao stadion gespeel.

Die halfeindstryd tussen die wenners van Brasilië/Colombia en Frankryk/Duitsland word aanstaande Dinsdag in dié stadion gespeel.

Woolworths-transaksie in Australië lyk verdag

Die Australiese reguleerder is bekommerd oor die hoë prys wat Woolworths vir die kleinhandelbates van mnr. Solomon Lew betaal. Die Suid-Afrikaanse groep is besig om die kleinhandelgroepe Country Road en David Jones uit te koop teen pryse wat Lew uitermate gaan bevoordeel.

Woolworths bied $2 miljard (R21 miljard) vir die afdelingswinkel David Jones aan, ‘n bod wat gevolg is deur A$213m (R2,15 miljard) vir Solomon Lew se 11,88%-aandeel in die klerewinkelketting Country Road. Woolworths verkoop reeds Country Road-klere in Suid-Afrika.

Country Road se aandele verhandel teen omtrent 30 keer die verdienste van die afgelope 12 maande en David Jones teen 23 keer die jaarlikste verdienste. Hierteenoor verhandel hul Australiese mededinger, Myer Holdings, teen ‘n prysverdiensteverhouding van slegs 12. Waarom sou Woolworths so duur vir Solomon Lew se bates wou betaal?

Volgens die Australiese Sekuriteite- en Beleggingskommissie behoort daar ‘n “deskundige waardasie” van die David Jones-aandele by hul bod ingesluit te word sodat beleggers ‘n ingeligte besluit kan neem.

“Ondanks ‘n periode van 17 jaar wat hy gehad het om die aandele uit te koop, het Woolworths besluit om slegs die oornamebod vir Country Road te maak toe mnr. Lew ‘n materiële belang in David Jones verkry het,” sê die Australiese reguleerder in hofstukke rondom die saak.

“Dié aanbod bied ‘n bykomende voordeel (wat nie aan ander aandeelhouers van David Jones beskikbaar is nie) aan mnr. Lew en sou in analoë omstandighede van ‘n oorname nie toelaatbaar wees nie.”

Die kommissie se beswaar is egter deur die hof van die hand gewys en sal na verwagting nie Woolworths se aanbod van R20 miljard vir David Jones, Australië se naasgrootste kleinhandelaar, laat ontspoor nie.

Woolworths meen die Country Road-transaksie word om handelsredes gedoen en maak deel uit van sy langdurige begeerte om minderhede in die luuksekleinhandelaar uit te koop.

“Daar is geen ooreenkoms met Solomon Lew rakende die bod vir Country Road nie. Dit word om goeie handelsredes gedoen en Country Road sal hul eie deskundige mening oor die waardasie bekom,” sê die woordvoerder vir Woolworths, Nic Bennett.

SA Menseregtekommissie gaan verhoor oor plaasgeweld hou

Ná 20 jaar van gruweldade op plase in die vorm van moorde en martelings, het die Suid-Afrikaanse Menseregtekommissie vandeesweek te kenne gegee dat hy ‘n verhoor oor menseregteskendings gaan hou.

Dié verhoor sal egter “plaaswerkers se diensvoorwaardes insluit”. Volgens Isaac Mangena, die woordvoerder van die Menseregtekommissie, het die MRK “nog altyd menseregteskendings op plase veroordeel”.

Tydens ondersoeke in 2003 en 2008 het die kommissie “heelwat klagtes” oor menseregteskendings op plase ontvang en het daarom besluit om ‘n openbare verhoor daaroor te hou.

‘Mangena is aangehaal as sou hy gesê het:

“Al hierdie punte dui daarop dat veiligheid en sekuriteit, asook die beskerming van menseregte, insluitend die diensvoorwaardes in die boerderygemeenskappe, steeds noemenswaardige uitdagings bly.

“Daar is ’n sterk grondslag vir ’n ondersoek.”

Daar word verwag dat slagoffers van plaasaanvalle en Afrikaanse organisasies ook geleentheid sal kry om voor die kommissie te getuig.

Die kommissie het reeds meer as ‘n jaar gelede ‘n versoek ontvang om so ‘n verhoor te reël en het nou eers gereageer.

’n Span is reeds saamgestel om die verhoor te reël.

Indringer-vrugtevliegplaag is terug

Die uitheemse indringer-vrugtevlieg het weer sy kop uitgesteek. Die Bactocera invadens het sy oorsprong in Sri Lanka.

Die plaag kom in ten minste vyf provinsies voor waaronder Limpopo, Mpumalanga, Noordwes, Kwa Zulu-Natal en die Noord-Kaap.

Die Departement van Landbou, Bosbou en Visserye het boere gewaarsku dat indien die plaag nie behoorlik beheer word nie dit tot produksie- en werkverliese kan lei.

Die vrugtevlieg het ‘n groot verskeidenheid gashere, dit beskadig nie net gewasse nie, maar kan ook ernstige uitvoer-implikasies vir die varsproduktebedrywe inhou.

Onder die gasheerplante tel kommersiële gewasse, soos mango’s, sitrus, koejawels, papajas en piesangs, wilde vrugte soos maroelas en wildevye asook groentes soos soetrissies, pampoene en tamaties.

Die vlieë lê eiers op vrugte wat beteken dat die vrugte sleg word.

Die departement het boere versoek om voorkomend op te tree om die plaag die hoof te bied.

In 2012 is verskeie waarnemings van dié indringer-vrugtevlieg gemaak in Limpopo en Mpumalanga. In die meeste van die gevalle is die pes suksesvol uitgeroei.