Kuns wat almal koud laat

Ekshibisionisme as kuns
Ekshibisionisme as kuns

Afrikaners en selfs Suid-Afrikaners kan daarvoor vergewe word dat hulle nie op hoogte is van die jongste internasionale kunswerk waarby een van hul landgenote betrokke is nie.

Nie baie mense ken die naam Steven Cohen nie, en met nadere kennismaking sal hulle waarskynlik ook nie lus voel om meer te wete te kom nie.

Cohen het dié week die internasionale nuus gehaal met sy kunswerk in Parys waar hy nakend, behalwe vir ‘n korset en ‘n paar vere, ‘n hoenderhaan aan sy ontblote geslagsdeel vasgemaak het op die Place du Trocadéro by die Eiffeltoring in Parys, Frankryk.

Franse, sowel as toeriste, moes tien minute lank sy kuns gadeslaan voordat die polisie opgedaag het om Cohen in hegtenis te neem. Hy is vir 10 ure aangehou, ondervra en psigiatries geëvalueer.

Cohen se regsverteenwoordiger Agnès Tricoire het aan die koerant, Le Parisien, gesê dis ‘n “skande dat Frankryk kunstenaars uit Suid-Afrika in die tronk smyt”.

Cohen het heel in sy noppies geklink toe hy aan die Sunday Times verduidelik het dat die klag teen hom ernstig is en op dieselfde vlak as kindermolestering asook ‘n belediging van Franse nasionale trots weens die simboliese gebruik van ‘n hoenderhaan.

Cohen se kunswerk is deur ‘n stigting, La Maison Rouge, befonds. Hy is glo woedend dat hy nie deur Suid-Afrikaners ondersteun word nie weens “magspolitiek”. Dit is nie duidelik of Cohen die term begryp nie.

Hy sê hy is wit, Joods en homoseksueel en het voorheen Suid-Afrikaners vervreem met sy kuns. Blykbaar het hy pas dieselfde gedoen in Frankryk, te oordeel aan die manier waarop die owerhede sy kunswerk behandel het.

Mevrou Tricoire het hom van ‘n tronksel gered, nadat sy vertoë aan die ministerie van kultuur gerig het om hom vry te laat tot sy verskyning op 16 Desember.

Rooihuiskraal: Inwoner met wapen gedreig by stortingsterrein

Beampte dreig wit inwoner met hand op sy wapen
Beampte dreig wit inwoner met hand op sy wapen

Die polisie moes ingryp na ‘n ongelukkigheid by die Rooihuiskraalse stortingsterrein.

Die metropolisie het Saterdagmiddag by die stortingsterrein in Rooihuiskraal die situasie onder beheer probeer dwing.

Die ingang tot die terrein is afgesper en geen voertuig word mee toegelaat nie.

Die metropolisie het die terrein offisieël as gesluit verklaar.

Persone wat tuinvullis wil verwyder word na stortingsterreine in Krugerlaan en Attridgeville verwys.

Talle mense het vroeër vandag in toue buite die terrein gestaan om hul vullis daar te stort.

Die vullis in die terrein het in een dag verdubbel en dit het veroorsaak dat daar nie spasie is vir die houers wat daar moet staan nie.

Diegene wat hul tuinvullis Saterdag by die Rooihuiskraal stortingsterrein wou aflaai is deur munisipale werkers weggewys.

“Dit is ‘n groot gemors. Die mense word geïntimideer,” het Steven Claasen gesê nadat hy probeer het om sy vullis te stort.

Die werkers het glo instruksies vanaf die Tshwane-metro ontvang om mense weg te wys.

Vullis is in die pad gegooi en die ingang is toegesper met boomstompe. Die wat dit wel waag om in die terrein te stort, word gedreig.

Foto’s van motors se registrasienommers word ook geneem, ook glo op die opdrag van die munisipaliteit.

Die rede waarom die terrein gesluit is, is onbekend.

Die werkers het egter aan Rekord vertel dat die voertuie buitewerking is en daarom is die vullis nie verwyder nie.

Dit het veroorsaak dat die gemors by die stortingsterrein opgehoop het en dit nou te vol is.

Inwoners voel egter dat hulle vir hierdie dienste betaal en dring daarop aan om dit te gebruik.

“Dis hulle reg om te staak, maar hulle kan ons nie dwing om iewers anders te stort nie,” het Ben Kriegler gese.

‘n Man en sy werkers is Vrydagmiddag by ‘n stortingsterrein in Rooihuiskraal met ‘n vuurwapen gedreig toe hulle tuinvullis daar wou weggooi.

‘n Werkgewer en sy werkers is deur die sekuriteit by die stortingsterrein weggewys en ‘n sekuriteitswag het sy hand op sy pistool gesit en gedreig om hulle te skiet indien hulle hul vullis daar sou stort.

Volgens die wit man het die werkers by die terrein hulle ingelig dat die trokdrywers van Tshwane Metro besig is om te staak en daarom is die stortingsterrein gesluit.

Hy het gesê dat hy vroeër in die week ook probleme ervaar het om sy vullis daar te stort, maar was nog nooit gedreig nie.

“Ek werk al vir 13 jaar saam met hierdie mense, maar nou dreig hulle ons sommer,” het hy gesê.

Hy is geskok dat so iets by ‘n plek so eenvoudig soos ‘n stortingsterrein kan gebeur. – looklocal.co.za

 

 

Staatsinmenging kan selfoontariewe verlaag

selfoonGoeie nuus vir Suid-Afrikaanse selfoongebruikers is dat die staat besig is met stappe wat daartoe kan lei dat selfoontariewe in die afsienbare toekoms kan daal, sê adv. Anton Alberts, die Vryheidsfront Plus se parlementêre woordvoerder oor kommunikasie.

Adv. Alberts het in ‘n geskrewe vraag aan die minister van kommunikasie gevra of sy sal toesien dat hoë selfoontariewe verlaag gaan word.

Die minister het geantwoord dat die department van kommunikasie besig is met ‘n ‘aantal beleidsingrypings’ om toe te sien dat tariewe afgebring word.

Luidens die antwoord werk die department nou saam met die Onafhanklike Kommunikasie-owerheid (Okosa) wat tans omvattende marknavorsing doen om vas te stel of regulasies wat in 2010 ingestel is, die gewenste uitwerking gehad het.

Okosa het hom onlangs ook sterk uitgespreek teen die hoë kostes en het gesê selfoongebruikers word ‘uitgebuit’.

Die minister se antwoord lui voorts dat ‘n stelsel op die been gebring word waardeur inligting rondom alle diensverskaffers se tariewe gemonitor en ontleed word sodat daar ‘betyds ingegryp kan word’ om probleme in die selfoonmark te behandel.

Navorsing word ook gedoen om ‘ingeligte besluite oor beleidsingrypings’ te kan doen wat mededinging tussen netwerke sal stimuleer by alle vorme van elektroniese kommunikasie om tariewe te verminder.

Daar gaan ook in gesprek getree word met al die diensverskaffers en belanghebbendes in die selfoonbedryf rondom die kostestruktuur van die bedryf, lui die antwoord.

Adv. Alberts sê die nuus is verblydend, maar dat die staat te lank gesloer het om daadwerklik op te tree.

“Die VF Plus is nogtans bly dat die minister daadwerklike stappe neem om selfoontariewe af te bring en ons hoop die studies sal binnekort klaar wees sodat verdere stappe geneem kan word om monopolieë in die bedryf te breek,” sê adv. Alberts.

Suid-Afrika se selfoonkostes is van die hoogste in die wêreld. Uit 140 wêreldlande, betaal verbruikers in net 23 lande meer as in Suid-Afrika om ‘n oproep te maak.  Uit 34 Afrikalande betaal Suid-Afrikaners op drie na die hoogste tariewe.

OVK gee onafhanklike kandidate gelyk

gwede
Mantashe

Die sekretaris-generaal van die ANC, Gwede Mantashe, sê die ANC is gereed om vandag se tussenverkiesings in die Tlokwe-munisipaliteit in Portchefstroom in Noordwes te wen.

Hy het gepraat nadat die Kieshof in Bloemfontein ses van die nege tussenverkiesings wat vandag gehou moes word, op die nippertjie uitgestel het.

Die ses tussenverkiesings is uitgestel nadat die hof ten gunste van gediskwalifiseerde kandidate beslis het.

Hulle het die Onafhanklike Verkiesingskommissie voor die hof gedaag nadat hulle nominasies om as onafhanklike kandidate te staan, deur die OVK afgewys is.

Mantashe sê die party sal nou op wyke 6, 18 en 26 konsentreer om te verseker dat die ANC dié wyke wen.

Twee munispale tussenverkiesings word ook vandag in die Wes-Kaap gehou.

Wyke in die Drakenstein-munisipaliteit in die Paarl en Mosselbaai sal betwis word. In Mosselbaai word wyk 8 deur die DA, ANC en ‘n onafhanklike kandidaat betwis, nadat die lidmaatskap van die DA-raadslid deur die party be-eindig is.

In die Paarl is die ANC-raadslid geskors en word wyk ses deur die DA, die ANC en ‘n onafhanklike kandidaat betwis. – RSG

Drie pleit skuldig op Muldersdrift-moorde

Drie swart mans wat daarvan beskuldig word dat hulle ’n 13-jarige meisie en ’n 50-jarige man verlede jaar in Muldersdrift vermoor het, het skuldig gepleit.

Die drie het ook skuldig gepleit op ’n reeks ander misdade, het The Star berig.

Alfred Zwane (27), Samson Mandlezi (23) en Manir Lubisi (27) het Maandag in die Suid-Gautengse hooggeregshof skuldig gepleit op nege van die tien aanklagte teen hulle.

Die drie het skuldig gepleit op aanklag van die moord op die 13-jarige Alyssa Botha op 5 September verlede jaar en ook op die moord op André Jordaan (50) op 13 September.

Alyssa is ten aanskoue van haar 17-jarige suster Meghan doodgeskiet en hul pa, Anton, is in die aanval gewond.

Die mans het ook skuldig gepleit op aanklagte van roof, diefstal, poging tot moord, aanranding en inbraak.

In elk van die aanvalle het die mans hul slagoffers oorval terwyl hulle by die huis was, of net by die huis aangekom het.

Zwane, Mandlezi en  Lubisi is op 14 September in hegtenis geneem.

Die verhoor duur voort. – Sapa

BBP-soldaat dood in motorfietsongeluk

Blouligkonvooi
Blouligkonvooi

’n Lid van die weermag is in ’n motorfietsongeluk dood toe hy ’n BBP in Kempton Park in Gauteng vergesel het, het die Suid-Afrikaanse weermag gesê.

Brig.genl. Xolani Mabanga, woordvoerder, sê die soldaat het beheer oor sy motorfiets verloor terwyl hy die BBP vanaf OR Tambo- internasionale lughawe vergesel het.

“Die oorledene was ’n lid van die militêre polisie se begeleiding wat aangewys word om BBP’s vanaf die lughawe te vergesel. Hy was amptelik aan diens.”

Mabanga sê die soldaat se naam sal verskaf word nadat sy familie van sy dood in kennis gestel is.

Die woordvoerder wou nie die BBP se naam bekend maak nie. – Sapa

Ma ondersoek na vier kinders doodbrand

fire‘n Ondersoek is aan die gang na die branddood van vier kinders van dieselfde gesin in die Gedleza-gebied op Jozini in Kwa Zulu-Natal.

Die swart ma het na bewering die kinders Sondagaand met ‘n brandende kers in die huis toegesluit.

Gasbottels wat in die huis was het ontplof.

Die bure het die rook gesien en hulle na die huis gehaas, maar die kinders was reeds dood.

Die gemeenskap eis dat die kinders se 30-jarige ma in hegtenis geneem word. – RSG

Diarree eis 100 in Mosambiek

mozwaterDie owerhede in Mosambiek het bekend gemaak dat sowat 100 mense dood is weens die uitbreek van diarree in ‘n sentrale provinsie in die land.

Die siekte het twee weke gelede in die Zambezia provinsie uitgebreek, maar is nou onder beheer.

Die bestuur by die Gurue-distrikshospitaal sê swak higiëne was die oorsaak van die siekte, agv mense wat nie hul hande was nie en eet en kos hanteer in die markte.

Riviere en waterbronne word ook besoedel weens onwettige mynbedrywighede.

Daar is geen nuwe gevalle sedert Sondag aangemeld nie. – Sapa

Burgersfort-myners saamgetrek op koppie

Vorige optog by Twickenhammyn
Vorige optog by Twickenhammyn

Die polisie en veiligheidsbeamptes van ‘n private maatskappy hou die situasie dop by die Twickenham Platinummyn naby Burgersfort in Limpopo waar ‘n groep plaaslike inwoners op ‘n koppie saamgetrek het.

Inwoners in die gemeenskap het gister op ‘n plundertog gegaan en die pad na die myn versper en geëis om die bestuur te sien.

Hulle eis dat die herontplooiing van myners vanaf Rustenburg en ander gebiede na die Twickenham-myn gestaak word.

Hulle beskuldig die myn daarvan dat plaaslike mense se werk van hulle weggeneem word.

Vyf-en-veertig mense wat gister in verband met openbare geweld en kwaadwillige saakbeskadiging in hegtenis geneem is, sal môre in die Mecklenburg rondgaande hof verskyn. – RSG

Washington-skieter het geheime klaring gehad

alexis2Aaron Alexis, die 34-jarige swart verdagte in Maandag se skietery op die Washington Navy Yard, het ‘n “geheime” klaring gehad en moes begin werk as ‘n burgerlike kontrakteur met ‘n militêreID-kaart, het sy firma se uitvoerende hoof, aan Reuters gesê.

“Hy het ‘n geheime klaring gehad en hy het ‘n CAC gehad (algemene toegangskaart),” het Thomas Hoshko, uitvoerende hoof van die maatskappy wat die Vloot se spesmagte van Intranet as ‘n subkontrakteur vir HP Enterprise Services – wat deel uitmaak van Hewlett-Packard – moes voorsien.

Alexis, van Forth Worth, Texas, word daarvan verdink dat hy by die Naval Sea Systems Command se gebou in Washington 13 mense is dood veroorsaak het.

Hoshko het in ‘n telefoniese onderhoud gesê hy weet nie wanneer Alexis veronderstel was om te begin werk nie: “Dit is wat ek nog moet uitvind, indien hy veronderstel was om vandag te begin … Dit is nie vir my duidelik nie.“

Hoshko het gesê hy is nie bewus van enige probleme met wangedrag deur Alexis of enige moontlike griewe wat tot die skietery kon gelei het nie.

Alexis het voorheen in Japan van September 2012 tot Januarie 2013 gewerk het hy gesê. Hy was glo ‘n toegewyde, vredeliewende Boedhhis wat gereeld die tempel besoek het.

“Ons het hom net onlangs weer gehuur. Nog ‘n agtergrondondersoek is weer op hom uitgevoer en hy is as skoon deur die verdedigingssekuriteitsdiens in Julie 2013 verklaar,“ het Hoshko gesê.

Hoshko het gesê hy dink dat Alexis se geheime sekerheidsklaring terugdateer van 2007.

Die vloot het gesê Alexis is ingeroep as ‘n voltydse reservis in Mei 2007. – Reuters