Kategorie: Nuus

Internetadverteerders gewaarsku oor koerierslenter

‘n Inwoner van George het adverteerders gewaarsku dat potensiële “kopers” op die internet wat maak asof hulle belangstel om iets aan te skaf, dalk doodgewone verneukers kan wees.

Johann Troskie sê verkopers moet versigtig wees wanneer hulle op die internet adverteer. Dit lok allerlei belangstelling van heinde en ver – en nie almal is betroubare kopers nie.

Troskie het sy Yamaha-motorfiets op OLX geadverteer waarna ‘n buitelandse swarte, daar word vermoed dat hy van Ghana of Nigerië is, belangstelling getoon het om die motorfiets te koop.

Troskie het in sy eie hoedanigheid navorsing gedoen en uitgevind dat die potensiële koper, nie regtig ‘n Fransman is soos wat sy paspoort sê nie en nie regtig die geld inbetaal het soos wat hy beweer het nie.

Troskie het met PayPal bevestig dat dit ook ‘n valse bewys van betaling is.

“Hy het gesê dat hy die koerier kostes gaan betaal, maar later het hy verwag dat ek dit moet betaal voor ek die geld van die motorfiets kry. Ek sou nooit die geld vir die motorfiets gekry het nie, maar hy kry die koerier kostes, ” het Troskie gesê.

Taliban ontken berigte dat VSA gebiede herower

Die polisiehoof van die Koendoez-provinsie in Afganistan, Mohammad Qasim Jangalbagh, het in die sentrale deel van die stad Koendoez die inwoners gevra om met hul normale lewe voort te gaan.

’n Inwoner van Koendoez het egter aan die nuusagentskap, Associated Press, gesê hewige gevegte woed nog in die Khoeja Mashhad-gebied van die stad, ongeveer 200 meter noord van die hoofplein in die stad.

Afgaanse regeringsmagte het onder aanvoering van Amerikaanse troepe teen vroeg Donderdag glo groot dele van die strategiese stad Koendoez in die noorde van Afganistan herower nadat die Taliban die stad drie dae tevore ingeneem het.

Die Taliban se suksesvolle aanslag was ’n vernederende nederlaag vir die regeringsmagte en hul Amerikaanse bondgenote.

Dit was die eerste keer sedert 2001 dat ’n provinsiale hoofstad in die Taliban se hande beland het.

Nadere besonderhede oor die regeringsmagte se “massiewe” teenoffensief oornag is nog nie bekend nie, ook nie watter dele van die stad na bewering weer onder regeringsbeheer is nie.

Afgaanse magte gerugsteun deur Amerikaanse lugaanvalle, het die afgelope twee dae gespook om die stad te herower. Amerika en sy koalisievennote het ook raadgewers na Koendoez gestuur om Afgaanse magte by te staan.

’n Taliban-woordvoerder het Donderdag gesê Amerikaanse magte is by die gevegte betrokke, maar hy het ontken dat die stad weer in re­geringsmagte se hande is.

Volgens hom bied die insypelaars weerstand in die middel van die stad en is hulle ook in beheer van omliggende dele.

EU-komitee vir minderhede kla oor ‘rassisme’

Europa se komitee vir minderhede het kommer oor toenemende “rassisme” in Duitsland uitgespreek.

Voorbeelde is genoem van “verregse, anti-Islam betogings”, wat strydig is met uitsprake deur die land se leierskap dat sy grense vir duisende migrante oop is.

“Daar is kommerwekkende verwikkelinge van openbare manifestasies van rassisme en xenofobie,” het die Raad van Europa se komitee oor nasionale minderhede gesê in ’n verklaring wat in Straatsburg uitgereik is.

“Manifestasies van anti-Semitisme, anti-Moslem- en anti-immigrant sentimente asook aanvalle op asielsoekers is aan die toeneem,” lui die verslag.

Die verslag verwys spesifiek na die sogenaamde Maandag-optogte wat verlede winter deur die anti-Islamitiese­ Pegida-beweging gereël is.

Tydens die hoogtepunt het meer as 25 000 mense in die oostelike stad Dresden aan optogte deel­geneem, het AFP berig.

Swart sakeman by Garstfontein-afrit doodgeskiet

Die polisie het niemand nog in hegtenis geneem in verband met die skietdood gister van ‘n swart sakeman van Noordwes nie.

Die SABC berig Wandile Bozwana is by die Garstfontein-afrit op die N1-noord in Pretoria geskiet en het kort daarna aan sy wonde beswyk.

Volgens die polisie het ‘n groep gewapende mans by die verkeerslig op Bozwana se voertuig begin skiet.

Bozwana se kollega, wat die motor bestuur het, het weggejaag en by ‘n motorhandelaar gestop. Sy is ook getref en is in ‘n ernstige toestand in die hospitaal.

Die polisie het die publiek gevra wat inligting het om na vore te kom.

Bozwana was ten tyde van sy dood gewikkel in ‘n Konstitusionele hofgeding teen die Noordwes-regering wat wou verhoed dat Bozwana op regeringsbates beslag lê om skuld te verhaal.

Bozwana het saam met sy vriendin Mpho Baloyi op die N1-snelweg na Pretoria gereis.

Bozwana, ‘n eiendomsmagnaat en voormalige Bophuthatswana-polisiebeampte onder die vorige bewind, is verskeie kere in die nek getref en het in die Unitas-hospitaal aan sy wonde beswyk.

Die sakeman sou glo eersdaags ‘n McDonald’s oktrooi in Vryburg open nadat hy ‘n stuk grond vir R3.2 miljoen gekoop het.

Valskerm- en sweeftuigongelukke laat een beseer, een dood

‘n Middeljarige vrou is die naweek na ‘n plaaslike hospitaal in Bloemfontein geneem nadat sy ernstige frakture opgedoen het in ‘n valskermongeluk by die Tempe-lughawe buite die stad.

Riana Burger het Saterdagoggend ’n tandemsprong uitgevoer. Alles het normaal verloop, maar met die landing het sy haar femur (bobeen) op twee plekke gebreek.

‘n Woordvoerder vir Netcare 911, Chris Botha, sê dit was haar eerste tandemsprong saam met ‘n instrukteur van ‘n plaaslike valskermklub.

Hy sê met paramedici se aankoms was Burger by haar volle bewussyn maar het erge pyn ervaar nadat hulle grondlangs so tussen meer as 30meter gesleep is.

Paramedici het haar gestabiliseer en na die Pelonomi-hospitaal se trauma-eenheid vervoer.

Volgens haar man het hulle die grond hard getref met die landing en is etlike meter ver gesleep weens ‘n fratswind.

In ‘n ander voorval is ‘n sweeftuigvlieënier Sondag buite Potchefstroom dood toe sy tuig neergestort het, het paramedici gesê.

Hy is op die toneel dood. Die ongeluk word ondersoek en verdere besonderhede oor die voorval is nog nie beskikbaar nie, het ER24 gesê.

Die man is dood aangetref midde in die wrak van die tuig, sowat 3km buite die dorp. Die Burgerlike Lugvaartondersoekeenheid is nie dadelik in kennis gestel nie.

Poetin wil ‘inligtingsaanvalle’ deur skakeling verhoed

Verslae van beweerde ongevalle onder burgerlikes wat veroorsaak is deur Russiese lugaanvalle in Sirië het na vore gekom, selfs voor Russiese vegvliegtuie vir hul eerste sending opgestyg het, het President Wladimir Poetin gesê en sulke disinformasie as “inligtingsaanvalle” beskryf.

“Ander lande voer bombardemente op Siriese grondgebied uit nou al vir meer as ‘n jaar,” het die Russiese president Donderdag gesê.

Hy het gewys daarop dat die VSA-geleide koalisie die Siriese lugruim telkens inval met geen mandaat van die VN of uitnodiging van Damaskus nie.

“Ons het so ‘n uitnodiging en ons beplan om teen terroriste-organisasies te veg en hulle alleen,” het Poetin bygevoeg.

Poetin het die wenslikheid van skakeling tussen die VSA en Rusland beklemtoon aangaande Sirië Hy het gesê ‘n meganisme moet geskep word vir die deel van inligting oor militêre optrede in Sirië.

Hy het gesê só ‘n skakeling sal vals verslae verhoed.

Intussen probeer die Angelsaksiese pers voorgee dat Rusland “gematigdes” aanval in Sirië, maar volgens dié media se eie verslae is daar nie gematigdes nie aangesien hulle byna almal oorloop na al-Qaeda.

Rusland val dus terroriste aan wat deur die VSA self as terroriste beskou word.

In ander Angelsaksiese mediaberigte word beweer dat die aanvalle nie op ISIS gemik is nie, maar vroeëre berigte maak melding van geweld teen homoseksuele deur ISIS op presies dié plekke waar daar beweer word ISIS is nie teenwoordig nie.

Om Russiese militêre mag in Sirië te projekteer deur lugaanvalle teen teenstanders van Bashar al-Assad te onderneem, het die Obama-administrasie in ‘n besonder slegte lig gestel.

Washington beskik tans oor geen goeie opsies om sake om te keer nie.

Teen die agtergrond van die Amerikaanse beleid wat die opkoms van die Islamitiese Staat vergemaklik het, het die Russiese leier ‘n geleentheid om met ‘n beperkte belegging maksimum opbrengste te lewer.

Intussen het senator John McCain, hoof van die Senaat Gewapende Magte-kommitee, aan CNN gesê dat CIA-opgeleide weermagrekrute getref is in die aanvalle.

“Ek kan absoluut bevestig dat hulle aanvalle teen ons Siriese weermagrekrute uitgevoer het wat gewapen en opgelei is deur die CIA, want ons het kommunikasie met mense daar.”

Koerde loods aanvalle op ISIS in Irak

Koerdiese magte het die Islamitiese Staat-groep (ISIS) in die noorde van Irak aangeval in die jongste offensief wat daarop gemik is om jihadiste uit die olieryke stad Kirkoek te verdryf.

Koerdiese militêre bronne sê die aanslag het vroeg die oggend wes van Kirkoek in die rigting van die ISIS-bastion, Hawijah, begin om die al-Gurra-hooglande in te neem.

ISIS het verlede somer volle beheer van Kirkoek oorgeneem nadat Irakse soldate uit hul basisse gevlug het toe militante ongeveer ‘n derde van die land verower het.

Die Koerdiese pesjmerga het sedertdien ‘n buffer rondom die stad in ‘n reeks offensiewe verbreed en die afgelope ses maande beheer oor ongeveer 530 vierkante kilometer oorgeneem.

Benewens vordering rondom Kirkoek, het die frontlinie tussen die pesjmerga en ISIS byna glad nie in die afgelope maande ver­skuif nie.

ISIS kon nie daarin slaag om enige grondgebied van die pesjmerga af te neem sedert die Amerikaans-geleide koalisie begin het om die insurgente te bombardeer nie.

Die Koerde beheer reeds die grootste deel van die grondgebied wat hulle as hul eie eien, en het min aansporing om dieper in oorwegend Arabiese dorpe en nedersettings in te beweeg, behalwe waar dit ‘n regstreekse bedreiging vir hul streek bied.

Voortvlugtende verkeershoof nog soek

Die voortvlugtende verkeershoof van die Maquassi Hills-munisipaliteit is steeds nie aangekeer nie.

Die Padverkeerbestuurskorporasie se woordvoerder, Simon Zwane, sê ‘n lasbrief is uitgereik vir die inhegtenisneming van Judas Mahlangu wat Woensdag versuim het om in die landdroshof op Wolmaransstad in Noordwes weens bedrog en korrupsie te verskyn.

Zwane sê die korporasie sal egter seker maak dat Zwane weer op 16 November in die hof verskyn.

Daar word vermoed dat hy steeds in Suid-Afrika is en nie uit die land gevlug het nie.

Mahlangu het na bewering die Maquassi Hills-munisipaliteit uit meer as R540 000 bedrieg deur vervalste lisensies aan vragmotors uit te reik.

Obama kla wapeneienaars aan vir jongste skietery

Amerikaanse president Barack Obama blameer wettige wapeneienaars en ondersteuners van wapeneienaarskap vir die jongste slagting in die Verenigde State, waar 10 mense doodgeskiet is by ‘n landelike noordwestelike gemeenskapskollege.

Obama het ‘n beroep op Amerikaners gedoen om hul “gesonde verstand” te gebruik om nuwe wapenwette van die Kongres te eis.

“Dit is ‘n politieke keuse wat ons maak, om toe te laat dat dit elke paar maande gebeur in Amerika,” het hy gesê.

‘n Sigbaar woedende Obama het wetgewers berispe vir die versuim om wette te maak om wapens uit die hande van gewone burgers te neem.

Hy het gesê die idee dat die Amerikaanse grondwet enige regulering van wapens verbied “maak nie sin nie”.

Die aanvaller in ‘n skietvoorval by ‘n kollege in die Amerikaanse staat, Oregon, is kort na die voorval deur die polisie doodgeskiet.

Volgens die plaaslike polisie is tien mense in die skietery dood, insluitend die aanvaller.

Daar is vroeër berig dat minstens 15 mense dood is. ‘n Polisiewoordvoerder van die stad Roseburg sê die 26-jarige aanvaller het lukraak by die Umpqua gemeenskapskollege losgebrand.

Hy kon nie bevestig of die man ‘n student by die kollege was nie. Volgens plaaslike media het hy van klas tot klas in die wetenskapgebou beweeg, en skote afgevuur.

Chris Harper Mercer is as die skieter geïdentifiseer.

Dit was die 142ste skietery by ‘n skool in Amerika sedert 2012.

Sakeman aangekeer vir onwettige handel in diesel

‘n Sakeman van Bloemfontein, wat glo duisende liters diesel in groot tenks by sy huis in Langenhovenpark onwettig geberg het, verskyn na verwagting vandag in die plaaslike landdroshof.

Die 27-jarige man is Woensdagaand by sy huis op ‘n onderverdeelde erf met twee ander huise daarop, in hegtenis geneem.

Polisiewoordvoerder, Wendy Nkabi, sê die polisie het op meer as 8 000 liter diesel ter waarde van meer R46 000 in agt groot houers beslag gelê.

Sy sê die man kon nie ‘n lisensie verskaf wat hom in staat stel om wettig met diesel handel te dryf nie. Hy word aangekla ingevolge die Wet op Petroleum.