Byna helfte van matrikulante ouer as 19

Vier-en-veertig persent van alle manlike matrikulante is 19 en ouer, het RSG berig.

Die Departement van Onderwys sê in sy jaarverslag dat die persentasie meisies ouer as 18 is 34 persent.

Die Departement het verlede jaar aangedui dat 30 persent van die matrikulante tussen die ouderdomme van 20 en 26 was.

Die provinsiale Onderwysdepartement sê hulle moedig leerlinge aan om te kyk na Kolleges vir Verdere Onderwys en Opleiding of sentrums vir Volwasse Onderwys om hulle studies te voltooi.

Nigerië sloer met kerkrampslagoffers se oorskot

Die Sinagogekerk van Alle Nasies het belowe dat die repatriasie van die liggame van Suid-Afrikaners wat verlede maand dood is toe ‘n gastehuis in Lagos ineengestort het, binnekort sal wees.

‘n Woordvoerder van die kerk, Bally Chuene, sê hulle was in verbinding met die Suid-Afrikaanse en Nigeriese regerings en Nigerië is in kennis gestel van die dringendheid van die kwessie.

Chuene het gesê die oorskot van die slagoffers sal eersdaags na Suid-Afrika teruggestuur word, maar hy het geen datum gegee nie.

Hy het gesê die regerings sal die datums aankondig. Die liggame van die slagoffers word nie in ‘n verkoelde lykshuis gehou nie.

Meer as 80 Suid-Afrikaners is in die tragedie dood, maar eindelose vertragings met die identifisering van die liggame verhoed dat die repatriasie afgehandel word.

Twee afsonderlike prosesse vir die uitkenning van slagoffers word deur Suid-Afrikaanse en Nigeriese amptenare bestuur.

Suid-Afrikaanse amptenare is egter nie bereid om hulle tot ‘n datum vir die terugbring van die liggame te verbind nie.

Die Suid-Afrikaanse Hoëkommissaris in Nigerië, Lulu Mnguni, het belowe dat dit binnekort sal wees.

Die Lugmag sal die oorskot glo in Lagos gaan haal en terugbring na Suid-Afrika.

Families van die slagoffers het ‘n beroep op die Suid-Afrikaanse en Nigeriese owerhede gedoen om die repatriasie van die liggame te bespoedig, aangesien hulle reeds begin het om vir die begrafnisse voor te berei.

Die vertraging het die begrafniskostes laat styg wat tot ontvredenheid onder familielede gelei het.

Nigerië, sowel as die Suid-Afrikaanse regering het gesê hulle hoop dat dit in die nabye toekoms sal plaasvind.

Sadistiese aanval op Afrikaner-egpaar in Noord-Kaap

Tydens ‘n sadistiese aanval op Windsorton in die Noord-Kaap is ‘n bejaarde egpaar in hul huis vasgebind en herhaaldelik met ‘n koevoet aangerand. Hennie en Beulah Nel is ongeveer 3:00 Saterdagoggend in hul huis deur drie misdadigers oorval, die vierde keer in 12 jaar.

Beulah Nel, 60, is intussen in die Mediclinic Kimberley opgeneem waar sy vir ernstige wonde aan haar kop en lyf behandel word. Haar regterlong is ook tydens die aanval beskadig. Daar heers kommer dat sy breinskade opgedoen het aangesien sy die heel tyd naar voel en voortdurend hoofpyn het. Sy sal vandag ‘n breindskandering ondergaan.

Op ‘n stadium tydens die aanval het mev. Nel voorgegee dat sy reeds dood is, ten einde die gekleurde huisrowers, wat Engels gepraat het, te flous. Mnr. Hennie Nel, 76, het net een been, wat moontlik veroorsaak het dat hy nie so erg verniel is nie, hoewel hy ook met die koevoet geslaan is.

Omdat sy deur die aanvallers vasgebind en gemuilband is, het mev. Nel gedink dat sy ook verkrag gaan word.

“Ek het heeltyd gebid dat ek nie verkrag word nie,” het sy gister aan die media gesê.

“Ek het gemaak of ek dood is, al het ek in ’n dun nagrok op die vloer gelê.”

“By tye voel ek pap, moeg en siek. Ander kere voel ek beter.”

Mnr. Hennie Nel vertel: “Die aanvallers het aangedring op die kluis se sleutels. Hulle is na ons kantoor waar hulle alles uitgedra en op die slaapkamervloer uitgegooi het. Hulle het Beulah se selfoon, kontant, wapens en waardevolle juwele gesteel. Hulle het my toe met ’n skroewedraaier gedreig om die klein kluis oop te maak. Ek kon nie die kode onthou nie. Genadiglik het hulle my nie gesteek nie. Die mans het van ‘boiling water’ gepraat. Hulle wou ons dalk martel. Hulle kon nie deur die veiligheidshekke kom om na die kombuis te gaan nie.”

Ná ‘n taamlike lang tyd het die aanvallers te voet ontvlug. Hulle het duur juweliersware, kontant, pistole en ‘n selfoon gebuit. Die egpaar het daarin geslaag om by die studeerkamer net langs die slaapkamer te kom waar hulle hulself bevry het. Mnr. Hennie Nel het sy plaasvoorman en kinders geskakel, wat op hul beurt die polisie en ambulans in kennis gestel het.

Maar die polisie was onwillig om hulle te help.

“Die plaaslike polisiemanne was nie baie lus om uit die voertuig te klim toe hulle daar aankom nie,” sê mnr. Hennie Nel. “Ek moes uit die huis fluit en skreeu voordat hulle reageer het. Iemand het toe die polisie in Kimberley gebel. Die Valke ondersoek nou die saak.”

Mev. Nel se suster, mev. Doreen McLaren, het noodhulp toegepas terwyl sy instruksies vanaf ER24 per telefoon ontvang het. Sy het daarna haar suster inderhaas na die Mediclinic Kimberley vervoer.

Die gesteelde pistole is ‘n vorige keer ook geroof, maar is later deur die polisie op Jan Kempdorp teruggevind.

Oor daardie rooftog sê mnr. Hennie Nel: “Dit was die eerste keer dat ek ’n pistool teen my kop gevoel het.”

“Dit is hoekom ons twee heinings om die huis het en vyf veiligheidshekke in die huis. Die boewe het die heinings gebreek, die hond vergiftig en by die sonkamer ingekom nadat hulle die diefwering met die koevoet afgebreek het.”

Die Nels boer met hoenders op ‘n ander stuk grond. Hulle voel egter nou onseker oor die toekoms en wil graag saam met hul familie beraadslaag, ná die vierde aanval.

Warmste September sedert 1880

Die warmste September sedert rekordhouding in 1880 begin het, is verlede maand as ‘n wêreldgemiddelde temperatuur aangeteken.

Dit was ook die 38ste agtereenvolgende Septembermaand met ‘n wêreldtemperatuur wat hoër was as die gemiddeld vir die 20ste eeu.

Die Amerikaanse federale agentskap vir oseaniese en atmosferiese bestuur, die National Oceanic and Atmospheric Administration (NOAA) sê met die uitsondering van Februarie, was elke maand tot dusver onder die vier warmste maande op rekord.

Mei, Junie en Augustus was net so warm vandeesjaar.

Die nasionale klimaatdatasentrum in Asheville, N.C. meen dit is baie waarskynlik dat 2014 die rekord vir die warmste jaar sal breek.

Die agentskap sê die rekordhitte was in baie dele van die noordwestelike deel van Afrika voelbaar.

In die suidooste van Suid-Amerika, suidwestelike dele van Australië, dele van die Midde-Ooste en suidoostelike deel van Asië is dit ook warmer.

Oscar vandag gevonnis

Die vonnisoplegging van die paralimpiese atleet, Oscar Pistorius, sal Dinsdag in Pretoria geskied.

Na ‘n verhoor van sewe maande in die Noord-Gautengse Hooggeregshof sal die gestremde atleet uiteindelik sy straf is vir die dood van Reeva Steenkamp kry.

Regter Thokozile Masipa sal Pistorius na verwagting om halfelf haar vonnis uitspreek nadat sy hom verlede maand skuldig bevind het aan strafbare manslag.

Die Departement van Korrektiewe Dienste het intussen berigte ontken dat hulle ‘n tronksel vir Pistorius reggemaak het.

In slotbetoë voor die naweek het die staatsaanklaer, Gerrie Nel, aangevoer dat die graad van nalatigheid waaraan Pistorius skuldig bevind is, so ernstig is dat gevangenisstraf alleen gepas sal wees.

Hy het gesê Pistorius behoort nie weens sy gestremdheid tronkstraf vry te spring nie.

Barry Roux het namens Pistorius gesê hy behoort gemeenskapsdiens te verrig vir die oortreding.

Rooi Oktober is toe ‘n Bruinvis

Die herrie herinner aan die spanning uit die laaste jare van die Koue Oorlog, toe die Sweedse vloot gereeld jag gemaak het op verdagte duikbote in hul territoriale waters en kennelik het Swede vasgehaak op die tema.

Die afgelope drie dae al gons dit oor ‘n beweerde Russiese duikboot wat glo ‘n noodsein uitgestuur het in Sweedse waters, kompleet soos in ‘n nuwe Rooi Oktober-fiksie.

Die Telegraph in Brittanje het probeer om die gerugte as feite aan te bied deur verdere spekulasie oor ‘n komende “kernoorlog” wat kan uitbreek, in die jongste kwalik bedekte anti-Russiese koors.

In Oktober 1981 het ‘n Russiese duikboot in die buurt van Karlskrona, nie ver van ‘n belangrike vlootbasis nie gestrand, wat ‘n diplomatieke voorval veroorsaak het.

Maar die geheimsinnige duikboot waarna al drie dae gesoek word in Sweedse waters is moontlik die Nederlandse duikboot, Zr. Ms. Bruinvis, volgens Ria Novosti.

Die Ministerie van Verdediging in Den Haag het bevestig dat die Nederlandse duikboot wél in die betrokke gebied is.

“Ten einde die spanning in die Oossee te verminder en nie langer geld te vermors van die Sweedse belastingbetalers nie [met die soektogte], beveel ons aan dat die Nederlandse marine om opheldering gevra word,” het ‘n bron binne die Ministerie van Verdediging in Moskou gesê.

Vrydag het die Sweedse koerant die Aftonbladet ook berig dat die geheimsinnige duikboot een van die Nederlandse vloot sou wees.

Volgens die Ministerie van Verdediging in Den Haag is die Zr. Ms. Bruinvis sedert 11 Oktober uit op ‘n oefening in die gebied, saam met ander Nederlandse vlootvaartuie en dié van die Sweedse vloot.

Die Sweedse vloot soek al sedert Vrydag met helikopters en oorlogskepe na “buitelandse onderwateraktiwiteit” nadat ‘n noodoproep in Russies gerig was aan ‘n basis in Kaliningrad, het die Svenska Dagbladet berig. Meer as 200 troepe neem aan die operasie deel.

Maar ‘n woordvoerder van die Sweedse vloot wou nie bevestig of ontken dat daar na ‘n Russiese duikboot gesoek word in die eilandgebied van die kus van Stockholm nie.

Die Kremlin het die spekulasie met afwysing begroet. “Daar was geen enkele buitengewone situasie gewees nie, laat staan nog ​​’n noodgeval, waarby Russiese militêre vaartuie betrokke was.”

ANC se nasionale woordvoerder geskiet

Die hoofsweep van die ANC se kantoor het Maandag sy skok uitgespreek nadat Jackson Mthembu tydens ‘n gewapende roof geskiet is.

Hy verkeer in ‘n ernstige maar stabiele toestand. Drie selfone is op die toneel gekry en ‘n bedrag kontant is gesteel.

Mthembu was die ANC se nasionale woordvoerder vir die verkiesing wat vandeesjaar gehou is.

“Ons is ontsteld en woedend deur hierdie sinnelose en wrede daad van misdadigheid en smeek die polisie om geen steen onaangeroer te laat nie om te verseker dat dié wrede boewe die volle mag van die wet in die gesig staar,” het Moloto Mothapo, woordvoerder, in ‘n verklaring gesê.

“Ons doen weer ‘n beroep op alle gemeenskappe om saam met die polisie te werk om kriminele elemente uit ons samelewing te roei as deel van ‘n gesamentlike poging om ‘n misdaad-vrye samelewing te skep.”

In Mpumalanga het die polisie gesê Mthembu is in die gesig geskiet terwyl geld by ‘n OTM in Mandelastraat in Witbank getrek het.

Die ANC het egter gesê hy is van baie naby in die skouer geskiet en is in die Emalahleni privaathospitaal waar hy in die intensiewe sorgeenheid opgeneem is.

“Gelukkig was hy in staat om self na die nabygeleë hospitaal te jaag, waar hy onder mediese toesig verkeer,” het Mothapo gesê.

‘n Saak van gewapende roof is geopen.

‘n Familielid het aan die Citizen-koerant gesê die skietery was ‘n politieke daad: “Ons weet nie presies wat gebeur het nie, maar Jackson is inderdaad geskiet, en ons is diep geskok en bekommerd.

“Dit is nie duidelik hoeveel keer hy geskiet is nie, maar hy is in die hospitaal soos ons praat. Ek dink die skietery was polities gemotiveerd.”

Keith Khoza, huidige ANC-woordvoerder het Maandagoggend gesê hy het ‘n gemiste oproep van een van Mthembu se familielede ontvang.

“Ek het ‘n gemiste oproep van een van sy broers vanoggend gekry. Miskien het dit iets te doen daarmee, maar ek sal uitvind,” het Khoza gesê.

Onderhoud van Griekse joernalis oor ebola

‘n Griekse joernalis het ‘n Amerikaanse regskenner gevra waar die ebolavirus vandaan kom en hoekom dit so vinnig versprei.

Aggeliki Dimopoulou het vir die Griekse nuuswebwerf tvxs.gr met internasionale regskenner professor Francis A. Boyle gesels oor die oorsprong en gevolge van die ebolavirus.

Die virus het vermoedelik al duisende mense bereik uit Wes-Afrika en groot afstande gereis met vlugte wat steeds nie gestaak is uit besmette lande nie.

Volgens Boyle word Amerikaanse bio-oorlogvoeringlaboratoriums in Wes-Afrika bedryf omrede streng wetgewing in die VSA sulke navorsing bemoeilik.

Hy sê die VSA kan met behulp van Wes-Afrika die Konvensie oor Biologiese Wapens makliker omseil.

Hy het Griekeland aangeraai om hul eie mediese spesialiste te gebruik om vas te stel of die virus kenmerke van manipulsie deur die Amerikaanse Sentrum vir Siektebeheer of die Britse biologiese oorlogvoeringlaboratoriums in Porton Down bevat.

Boyle sê dis belangrik om Amerikaanse en Britse spesialiste te vermy of enige ander nasionaliteite wat saamwerk met dié twee lande, aangesien hulle nie betroubaar is nie.

Hy het die Grieke aangeraai om ‘n klag teen die VSA by die Veiligheidsraad van die VN te lê vir die skending van die Biologiese Wapens Konvensie, soortgelyk aan die een wat Nicaragua in 1985 gelê het nadat knokkelkoors skielik in die land uitgebreek het, indien die ondersoeke iets oplewer.

Paryse opera weier om verder te sing weens versluierde Moslemvrou in gehoor

‘n Vrou in ‘n nikab, ‘n tradisionele Moslemsluier wat die hele hoof bedek, is vroeër vandeesmaand gevra om die Bastille-operahuis in Parys te verlaat omdat die geselskap weier om verder voor haar te sing. Die dra van ‘n sluier wat die gesig heeltemal bedek, word deur wetgewing in Frankryk verbied.

Die voorval het op 3 Oktober tydens ‘n aanbieding van Verdi se La Traviata plaasgevind, volgends die operahuis se adjunkdirekteur, Jean-Philippe Thiellay, maar het eers oor die pas afgelope naweek in die Franse media rugbaar geraak.

'n Nikab
‘n Nikab

Die vrou en haar metgesel was toeriste van een van die Golfstate en het reg agter die dirigent gesit waar hulle vir opsigters sigbaar was. Die sitplekke kos €231 (ongeveer R3 400) elk.

Die vrou het ‘n nikab aangehad, ‘n sluier wat sowel die gesig as die hare bedek en slegs die oë en ‘n deel van die voorkop sigbaar laat.

Die operahuis se personeel het haar nie aanvanklik opgemerk toe sy die ouditorium binnekom nie. Maar volgens Thiellay is hy tydens die tweede bedryf van die opera “deur ‘n sanger in kennis gestel”, wat haar in die voorste ry raakgesien het.

Die Bastille-opera in Parys
Die Bastille-opera in Parys

“Sommige kunstenaars wou nie langer sing nie,” het hy bygevoeg. Volgens ‘n koerantberig wou die geselskap nie langer voor ‘n gesiglose gehoorlid optree nie.

Tydens die pouse is die vrou en haar metgesel deur ‘n inspekteur gekonfronteer, wat haar gevra het om óf haar sluier af te haal, óf die vertoning te verlaat.

“Hy (die inspekteur) het dit aan haar oorgedra dat daar in Frankryk ‘n verbod op dié soort kleredrag geld, en haar gevra om óf haar gesig te ontbloot óf die vertrek te verlaat. Die man het die vrou gevra om op te staan en hulle het vertrek,” sê Thiellay. Volgens hom “was dit onaangenaam om iemand te vra om te gaan”.

“Maar daar was ‘n misverstand oor die aard van die wet en die dame is gevra om dit te eerbiedig of te gaan,” sê hy.

Volgens ‘n bron van die Bastille-opera, het die paartjie nie op terugbetaling aangedring nie.

Frankryk het in 2011 ‘n wet gemaak wat wesentlik die dra van die nikab in die openbaar verbied. Dit sluit openbare strate, winkels, museums, openbare vervoer en parke in. Die verbod geld ook op die boerka, ‘n volledige liggaamsbedekking, indien dit die gesig bedek. Die enigste uitsondering vir ‘n vrou in ‘n nikab of boerka is as sy in ‘n private motor reis of ‘n Moslem-erediens bywoon.

Diegene wat verseg om hul sluiers te verwyder, moet ‘n boete van €150 (R2  250) betaal.

Die wetgewing het egter nie die dra van die hijabhoofbedekking verbied nie.

Ná die operavoorval het die Franse kultuurministerie aangekondig dat hulle ‘n nuwe stel reëls optrek aangaande sluiers in teaters, museums en ander openbare instellings.