Kategorie: Nuus

Hamas val Israelse grenspos aan

Die Palestynse groep Hamas het aanspreeklikheid aanvaar vir ‘n aanval waarin ‘n Israelse grensbeampte dood en nege voetgangers beseer is.

Hamas sê die aanval is uit weerwraak vir Israel se aanvalle op die Al-Aqsa moskee.

Israel het onlangs alle toegang tot die dié simboliese moskee in Jerusalem versper wat tot grootskaalse ontevredenheid en oproer gelei het.

Die Palestynse man wat tussen die groep soldate in die besette Wesoewer ingejaag het, het gebeur slegs ure nadat ‘n soortgelyke voorval in Jerusalem plaasgevind het.

Die Israelse weermag sê drie soldate is beseer waarvan een se toestand kritiek is.

Volgens die polisie het ‘n voertuig met Palestynse nommerplate tussen die soldate ingejaag waar hulle waggestaan het by die El-Arub Palestynse vlugtelingkamp, suid van Bethlehem.

Die bestuurder van die voertuig het gevlug.

Dit het gebeur ‘n paar uur nadat ‘n Palestynse man tussen voetgangers in Jerusalem ingejaag het, wat tot die dood van die grensbeampte gelei het.

Die aanvaller het daarna omstanders met ‘n ysterstaaf aangeval in ‘n poging om te ontsnap en is deur die polisie doodgeskiet.

Frankryk het dié week ingestem om onder meer nege Gazelle-helikopters aan Lebanon te lewer gewapen met hoë subsoniese opties-geleide buismissiele.

Hamas hoop dat Hezbollah ‘n nuwe front in Libanon teen Israel sal beman.

Die Franse wapentuig is met ‘n geskenk van $3 miljard van Saoedi-Arabië betaal en is deur die Franse minister van Buitelandse Sake, Laurent Fabius onderhandel.

Alhoewel Frankryk skerm dat hulle wapentuig nie dadelik sal inskakel by die Amerikaanse toerusting wat die Libanese weermag gebruik nie, het kenners die bewerings as politiekery afgemaak.

Intussen het  die Hezbollah-leier Hassan Nasrallah “Israel se dreigemente van oorlog teen Libanon,” verwerp en gesê hulle is ten volle bereid om die land te verdedig.

Sy opmerkings volg nadat ‘n Israeliese parlementslid gedreig het dat die Israelse weermag Libanon “na die Steentydperk” sal terugneem.

Nasrallah het in die suidelike voorstede van Beiroet gepraat en Israel gewaarsku oor die gevolge van ‘n oorlog met Libanon.

 

Cosatu staar groter krisis in die gesig

Die vakbondfederasie Cosatu is in ‘n krisis gedompel nadat nege vakbonde wat by Cosatu geaffilieer is hul sentrale uitvoerende komitee as wetteloos bestempel het.

Die vakbonde het ‘n gesamentlike mediakonferensie gehou om die krisis wat voor die algemene verkiesing in Mei vir eers bygelê is, en nou weer opgevlam het, uit te stippel.

Die vakbonde, waaronder die beleërde Numsa, het gesê dat hulle alles in die stryd sal werp om te keer dat die vakbond Numsa Vrydag tydens ‘n vergadering van die sentrale uitvoerende komitee uit Cosatu geskors word.

Die dissiplinêre verhoor teen voormalige hoofsekretaris Zwelinzima Vavi sal volgens bronne ook Vrydag op die agenda wees.

Agt vakbonde sê hulle steun Numsa se pogings vir ‘n hofinterdik om die vergadering te keer.

Hulle het ook gedreig dat hulle pogings gaan laat herleef om Cosatu deur regstappe te dwing om ‘n spesiale nasionale kongres te hou.

Vier met wapens, handgranate vas

Vier mense is in hegtenis geneem nadat vuurwapens by hulle op ʼn kleinhoewe in Bronkhorstspruit, oos van Pretoria gekry is.

Johannes Jafta, woordvoerder van die polisie, het aan die SABC gesê die polisie het op ‘n wenk gereageer toe bure in die nag geweerskote gehoor het.

Die polisie het onder meer op nege jaggewere, twee handwapens en meer as 4000 patrone gekry. Hulle het ook op handgranate en dagga beslag gelê.

Jafta het gesê die oorsprong van die vuurwapens en ammunisie word ondersoek.

EFF skuldig aan wangedrag

Die Ekonomiese Vryheidsvegters (EFF) se 20 LP’s, insluitend partyleier Julius Malema, is skuldig bevind aan wangedrag.

Dié aanklagte is teen hulle aanhangig gemaak nadat hulle president Jacob Zuma verhoed het om sy spreukbeurt te benut.

Floyd Shivambu, EFF-hoofsweep, en sy kollega Mpho Ramakatsa is albei op sewe aanklagte skuldig bevind terwyl Malema en Mbuyiseni Ndlozi, woordvoerder van die party, op vier aanklagte elk skuldig bevind is.

Die res van die LP’s wat saam “betaal terug die geld” gedreunsing het, is skuldig bevind op tussen een en ses aanklagte, het Lemias Mashile, voorsitter van die parlement se komitee oor regte en voorregte, gesê.

“Uiteindelik het die komitee tot die gevolgtrekking gekom dat die aanklagte waarop die 20 lede van die Nasionale Vergadering tereg gestaan het, bewys is en dat hulle skuldig is aan die aanklagte,” het Mashile aan verslaggewers gesê.

Die aanklagte was onder meer dat LP’s geweier het om gehoor te gee aan ‘n bevel deur die Speaker om te sit en dat hulle ingemeng het met die funksies van die wetgewer.

Mashile het gesê die EFF se LP’s sal Vrydag die geleentheid kry om redes ter versagting aan te voer.

Volgens die parlementêre reëls kan die LP’s vir 14 werksdae geskors word. Geen strawwe is egter nog geformuleer nie

PRAAG staan Steve Hofmeyr by om hofbevel teen linkse teisteraar te verkry

Die buikspreker Conrad Koch van Seepunt, Kaapstad is vandag deur die Randburgse landdroshof verbied om Steve Hofmeyr enigsins verder te teister, sy borge of vennote te kontak of bykomende lasterlike of kwetsende aamerkings oor hom te publiseer. Die tussentydse hofbevel geld vanaf 13:00 vandag tot 27 November om 08:30 wanneer Koch in dieselfde hof sal moet verskyn om te verduidelik waarom die bevel nie ‘n finale bevel gemaak behoort te word nie.

‘n Lasbrief vir Koch se inhegtenisname is reeds uitgereik en sal uitgevoer word indien hy die bevel, wat oral in die Republiek van Suid-Afrika van krag is, sou verontagsaam. Intussen het Koch, wat op Twitter as Chester Missing gespog het dat hy Steve Hofmeyr gaan ruïneer deur druk op sy borge, asook dié van Afrikaans is Groot te plaas, geweier om sy adres per telefoon aan ‘n polisiekaptein van Douglasdale, Johannesburg te verstrek. Dr. Dan Roodt, wat die bevel aan die polisiekantoor vir betekening op Conrad Koch gaan oorhandig het, was teenwoordig toe Koch versuim het om sy woon- of werksadres aan die polisie te verstrek.

PRAAG, wat oor die afgelope 48 uur vir Steve Hofmeyr bygestaan het om die aansoek te bring, was egter nie bekommerd oor Conrad Koch wat intussen vir die gereg probeer wegkruip nie. “Dis eenvoudig lagwekkend,” sê Dr. Dan Roodt. “Eers dreig hy vir Steve in gekruide taal en hou hom voor as die magtigste man in Suid-Afrika, maar nou kruip hy vir die polisie weg. Ons gaan in elk geval die hofbevel en dagvaarding aan hom per e-pos stuur en uiteindelik sal ons en die polisie hom wel opspoor.”

Indien die tussentydse interdik op 27 November in ‘n finale bevel omskep word, sal Conrad Koch voortaan oor ‘n misdaadrekord as teisteraar beskik. “Ons kon eenvoudig nie langer stilsit om te sien hoe Steve Hofmeyr, wat steeds die gewildste sanger in Afrikaans is en met wie ons al meer as ‘n dekade saam vir Afrikaans en Afrikanerregte stry, op kwaadwillige wyse en deur teistering benadeel word nie.”

Steve Hofmeyr was vanmiddag hoogs in sy noppies en het die goeie uitslag met ‘n ete in ‘n Sandtonse restaurant saam met Roodt gevier.

Die tussentydse bevel is kragtens die Wet op die voorkoming van teistering, 2011, toegestaan. Aanvanklik was daar ‘n probleem omdat dr. Dan Roodt die verklarings in Afrikaans ingedien het terwyl die landdros nie Afrikaans magtig was nie. Die verklarings is egter goedgunstiglik en inderhaas deur hom in sy eie handskrif vertaal, waarna die bevel toegestaan is.

“Ons sal ander dag weer oor Afrikaans as hoftaal baklei,” het hy gesê. “Intussen moes ons die proses stuit waardeur Steve Hofmeyr en Afrikaanse musiek deur kwaadwillige ekstremiste aangeval en verguis word.”

PRAAG en Hofmeyr oorweeg ook die moontlikheid om Conrad Koch vir laster te dagvaar weens onwelvoeglike uitlatings oor die sanger wat hy op Twitter gepubliseer het.

Zuma maan Burkina Faso se junta

President Jacob Zuma het die bedanking van Burkina Faso se president, Blaise Compaore verwelkom en gesê dit is ‘n duidelike teken dat die dae van diktatorskap en militêre staatsgrepe in Afrika verby is.

Zuma sê Afrika moet aanvaar dat sy leiers demokraties verkies moet word.

Die Franse president Francois Hollande het die weermag in Burkina Faso vroeër gemaan om so gou moontlik die mag oor te gee aan ‘n burgerlike owerheid wat verkiesings in die land kan reël.

Die militêre leiers wat beheer van die land oorgeneem het ná die gedwonge bedanking van Compaore het vroeër onderneem om ‘n oorgangsleier aan te stel totdat ‘n nuwe regering aangewys word.

Compaore moes noodgedwonge bedank ná gewelddadige betogings toe hy probeer het om sy bewind van 27 jaar te verleng.

Frankryk het intussen gehelp het om Compaore uit die land te neem.

Dit was eers onduidelik hoe Compaore die land kon verlaat het. Hy het na die Ivoorkus uitgewyk.

Die Afrika Unie het Togo se voormalige eerste-minister, Edem Kodjo aangewys as spesiale gesant na Burkina Faso om die “demokratiese proses” te help bewerkstellig.

In 2013 was Burkina Faso nommer 129 uit 192 armste lande. Dit is egter ‘n ligpunt in Wes-Afrika, met sowat agt nuwe goudmyne in die ontwikkelingsfase, sowel as ‘n paar eksplorasieteikens.

Die Houndé-myn bevat klaarblyklik sowat 25 miljoen ton, met ‘n gemiddelde graad van 1,95 g / t goud.

Endeavour Mining verwag dat die huidige politieke onrus sy skedule vir sy Houndé projek sal vertraag tot ten minste ná verkiesings gehou is, wat na verwagting binne die volgende 90 dae gehou sal word.

Die land is tans onder militêre bewind en die grondwet is opgeskort.

 

 

Gauteng-ANC wil Zuma met e-tol troef

Die e-tolhersieningspaneel het Dinsdag in Pretoria gehoor die Gautengse regering het van plan verander nadat hulle die e-tolstelsel goedgekeur het.

“Die Gautengse regering het my nie in kennis gestel wat tot die verandering gelei het nie,” het Dipuo Peters, minister van vervoer, gesê.

Peters het egter gesê Mashatile was teenwoordig toe die Gauteng-hoofwegverbeteringsprojek (GFIP) goedgekeur is deur die regering.

Paul Mashatile, voorsitter van die ANC in die provinsie, het onlangs aan die paneel gesê alternatiewe planne is nodig om die GFIP te finansier.

Mashatile lei ‘n faksie teen die Zoeloes en Jacob Zuma in die ANC.

Die ANC in Gauteng was een van die groepe wat e-tol verwerp het tydens sy aanbieding aan die e-tolkomitee.

David Makhura, premier van Gauteng, het in Julie die paneel saamgestel om die ekonomiese en maatskaplike impak van die GFIP en e-tol te ondersoek.

Die paneel sal na verwagting teen die einde van die maand sy bevindings aan Makhura voorhou.

Die departement van vervoer het gewaarsku dat instandhoudingswerk aan ou paaie vertraag sal word, en die opgradering van paaie opgeskort sal moet word, indien die regering die e-tolstelsel in Gauteng afskaf.

Die waarnemende direkteur-generaal, Mawethu Vilana het aan die e-tolhersieningspaneel in Pretoria gesê dat dit ‘n ramp vir padgebruikers regdeur Suid-Afrika, sowel as die ekonomie sal wees.

Vilana sê al die geld wat deur die Suid-Afrikaanse Nasionale Padagentskap, Sanral ingewin word, word aan paaie bestee.

Hy het beklemtoon dat Sanral nie ‘n wins uit tolgeld maak nie.

Hy sê die beginsel dat die gebruiker betaal, word doeltreffend regdeur die wêreld gebruik.

Die Nasionale Tesourie sal intussen vandag ‘n voorlegging doen oor waarom regstreekse betaling deur padgebruikers die beste opsie vir die provinsie is.

Teenkanting teen die e-tol-projek in Gauteng het die astronomiese inkomste vir Kapsch Trafficom, die Oostenrykse vervaardiger van die stelsel, intussen geknou.

Die ongewilde stelsel in Suid-Afrika is die hoofoorsaak van die middelmatige maatskappyresultate, het die maatskappy gesê in sy onlangs jaarverslag.

Die maatskappy se aandeleprys het reeds skerp gedaal, nadat hulle in die derde kwartaal van verlede jaar R128 miljoen moes afskryf.

 

 

Zambië se wit president verander besluit na oproer

Zambië se eerste wit president moes vinnig ‘n ongewilde besluit omkeer nadat sy swart kiesers openlik in opstand gekom het.

President Guy Scott se aangekondiging dat hy Edgar Lungu, wat ook as die minister van verdediging en justisie waargeneem het, se afdanking gekanselleer het, het gemoedere weer kalmeer.

Scott is Dinsdag daarvan beskuldig dat hy nie die Zambiese kultuur respekteer nie, nadat hy die leier van die regerende party afgedank het terwyl die land nog rou oor die afsterwe van president Michael Sata.

Sata het Lungu as die opsigter-president aangewys terwyl hy in Londen vir mediese behandeling was. Scott, sy amptelike adjunk, is egter op 28 Oktober as die president aangestel ná Sata se afsterwe.

Talle lede van die Patriotic Front (PF) het deur die nag in Lusaka in opstand gekom, bande aan die brand gesteek en gedreig om voertuie te beskadig.

Sata se begrafnis vind op 11 November plaas.

Scott kan egter nie oor drie maande aan die presidensiële verkiesing deelneem nie, aangesien sy ouers nie in Zambië gebore is nie, maar ontleders meen die afdanking van Lungu sonder redes, is ‘n aanduiding dat Scott wel sal staan as kandidaat.

Hy is in 1944 gebore in die destydse Noord-Rhodesië nadat sy pa geëmigreer uit Glasgow as ‘n dokter om op die spoorweë te werk.

As ekonoom wat aan Cambridge gestudeer het, het hy die politiek betree in 1990.

Sommige Zambiërs het aangedui dat hulle nie omgee om ʼn wit president te hê nie, maar ander meen Scott sal kolonialisme laat herleef.

Zambië, die destydse Noord-Rhodesië, het in 1964 onafhanklikheid verkry van Brittanje. Die land se eerste president was Kenneth Kaunda.

Polisie in hul eie vangwa toegesluit deur rowers

Drie verdagtes is Dinsdag in hegtenis geneem nadat twee polisiebeamptes in Rabierif in Midrand, Gauteng van hul vuurwapens beroof is en agter in hul eie vangwa opgeland het.

“Die drie verdagtes, tussen 25 en 30 jaar oud, sal binnekort in die Tembisa landdroshof verskyn,” het brig. Neville Malila, woordvoerder van die polisie, in ʼn verklaring gesê.

Hulle sal teregstaan op aanklagte van gewapende roof, kaping, poging tot moord en die onwettige besit van vuurwapens en ammunisie.

“Die verdagtes het twee polisiebeamptes oor middagete genader terwyl hulle by ʼn kosstalletjie gesit het,” het Malila verduidelik. “Die verdagtes het ʼn vuurwapen op die beamptes gerig en hulle wapens afgeneem. Hulle het die beamptes daarna in hul patrollievoertuig toegesluit en met die vuurwapens gevlug.”

Malila sê nog drie verdagtes het opgedaag en hulle het ʼn voertuig gekaap en daarmee gevlug.

“Lede van die gemeenskap het die vangwa oopgemaak en die polisiebeamptes bevry,” het hy gesê. “Die lede het bystand ontbied en die verdagtes is agternagesit.” Die verdagtes het verskeie skote op die polisiebeamptes gevuur voordat hulle beheer verloor het oor hul voertuig. Geen beserings is aangemeld nie.

“Die polisie het drie verdagtes in hegtenis geneem en drie vuurwapens gekonfiskeer,” het Malila bygevoeg. “ʼn Derde vuurwapen word verbind aan ʼn voorval in September 2014 waar daar op Johannesburgse metropolisiebeamptes geskiet is voordat hulle van hul wapens ontneem is.”

Nog verdagtes is op vrye voet.

Numsa vra interdik om nie uit Cosatu geskors te word nie

Die politieke skaakspel in Cosatu gaan voort, nadat die staatsdiens-vakbond, Nehawu ‘n beroep op die vakbondfederasie gedoen het om die metaalwerkersvakbond, Numsa uit die federasie te skors.

Nehawu sê as Numsa nie goeie redes kan verskaf hoekom hy deel van Cosatu moet bly nie, moet hy uit.

Nehawu sê hoewel hy nie naïef is oor die gevolge daarvan as Numsa uit Cosatu geskors word nie, sal dit deel van die uitdagings wees wat hanteer moet word.

Numsa en Cosatu is lank reeds haaks oor verskeie beleidskwessies.

Numsa moet Vrydag voor Cosatu se nasionale uitvoerende komitee verskyn om redes te verskaf hoekom hy nie geskors moet word nie.

Numsa het intussen ‘n dringende interdik by die Suid-Gautengse hooggeregshof geliasseer om die belangrike Vrydagvergadering waartydens hulle verwag word om geskors te word, te stop.

Dit is bevestig deur Numsa se Irvin Jim, hoofsekretaris in ‘n onderhoud met die Mail & Guardian.

Numsa het voorheen gevra dat Numsa “chirurgies verwyder” word van Cosatu.