Karin Roodt, Author at praag.co.za

‘Merkel moet meeluistering as ‘n kompliment beskou’

Woede oor die VSA se spioenasie op bondgenote is fel aan die toeneem. Meksiko en Brasilië het ook reeds beswaar daaroor aangeteken.

Kort op die hakke van Frankryk dié week, het Duitsland het die Amerikaanse ambassadeur, John B Emerson, ontbied oor die meeluisterskandaal wat dreig om verhoudinge tussen die twee lande te versuur.

Merkel se woordvoerder Steffen Seibert het gesê so iets is onaanvaarbaar en dit moet onmiddellik gestaak word. Die Duitse regering beskik glo oor klinkklare bewyse dat die kanselier se selfoon afgeluister word.

Duitse bronne beweer dat slegs Merkel se amptelike foon afegluister word en nie haar privaatfoon nie.

Die VSA het intussen die broeiende skandaal met vleitaal probeer besweer. ‘n Voormalige werknemer van die Amerikaanse geheimediens sê indien dit waar is behoort Duitsland dit as ‘n “kompliment” te sien.

Hy het gesê die tydskrif Forbes het Merkel as die wêreld se magtigste mens, naas Obama, aangewys. Die werknemer voer aan dat Veiligheidsagentskappe om dié rede haar kommunikasie sal wil monitor.

Hy het egter nie uitgebrei oor hoekom vorige slagoffers van meeluistering in sy eie land soos onder die huidige Demokratiese president of voormalige president Nixon, nie gewoonlik dié stap as ‘n kompliment beskou nie.

Onder Nixon was die Watergate-meeluisterskandaal ‘n politieke atoombom in die Verenigde State in die 1970’s as ‘n gevolg van inbraak op 17 Junie 1972 by die Demokratiese Nasionale Komitee se hoofkwartier by die Watergatekantoorkompleks in Washington, DC.

Die Republikeinse Nixon-administrasie se poging om sy betrokkenheid weg te steek, het uiteindelik gelei tot die bedanking van president Richard Nixon op 9 Augustus 1974.

Dit was die enigste bedanking van ‘n Amerikaanse president tot op datum. Die skandaal het ook daartoe gelei dat 43 persone tronkstraf gekry het, en dosyne van hulle was Nixon se top administrasie amptenare.

Die Duitse minister van Buitelandse Sake wil die bewerings oor meeluistering van kanselier Angela Merkel se selfoon met die Amerikaanse hoogste gesant bespreek.

Dit volg net ‘n dag nadat Merkel met die Amerikaanse president Barack Obama geskakel het om ‘n verduideliking oor die meeluistering te eis.

Volgens berigte het sy aan Obama gesê indien die bewerings waar is, sal dit tot ‘n ernstige vertrouensbreuk lei.

Obama het ontken dat Merkel se kommunikasie tans afgeluister word.

Frankryk het ook intussen hul weersin uitgespreek oor die VSA se spioenasie op bondgenootlande.

John Kerry, Amerikaanse sekretaris van Buitelandse Sake, het skaars in Frankryk Maandag geland, toe die koerant Le Monde hom verwelkom het met hoofopskrif oor die spioenasie op Franse burgers sowel as Franse diplomate.

Woedend oor die onthullings het die Franse die Verenigde State se ambassadeur, Charles H. Rivkin, ingeroep en hul “uiterste afkeur” oor die insameling van 70.000.000 digitale kommunikasiestukke vanaf 10 Desember 2012 tot 8 Januarie 2013 uitgespreek.

In ‘n verklaring aanlyn het James Clapper, die direkteur van nasionale intelligensie, Le Monde se verslaggewing in twyfel probeer trek en dit “misleidend en verkeerd” op ongespesifiseerde maniere genoem.

Bizos roskam Duncan Scott oor Marikana-slagting

Luitenant-kolonel Duncan Scott van die polisie is vanoggend geroskam deur advokaat George Bizos van die Regshulpsentrum tydens die Marikana Kommissie van Ondersoek se sitting in Centurion.

Bizos het tydens Scott se kruisverhoor hom gevra hoe die polisie daarin geslaag het om 34 mynwerkers dood te skiet en self ongedeerd daaruit te kom.

Die plan wat deur die polisie uitgevoer is om die oproeriges op Marikana te bedwing, was Scott se idee.

Dit het behels om die mynwerkers uiteen te jaag, te omsingel en te ontwapen op 16 Augustus verlede jaar.

Bizos voer aan dat almal wat die plan uitgedink, aanvaar en uitgevoer het, vir die sterftes verantwoordelik is. – RSG

Misdaadintelligensie-eenheid in ‘disfunksionele krisis’

Die skorsing van genl.maj. Chris Ngcobo, waarnemende hoof van die polisie se misdaadintelligensie-eenheid oor ‘teenstrydighede met sy kwalifikasies’, is alreeds ‘n ernstige vingerwysing na die staat van disfunksionaliteit waarin die eenheid verval het, het die Vryheidsfront Plus se hoofwoordvoerder oor die polisie gesê.

Daar is ernstige vrae moet gevra word oor waarom die ongerymdhede rondom Ngcobo nou eers op die lappe kom nadat hy reeds in Junie verlede jaar in die pos aangestel is.

Die eenheid is ironies genoeg juis veronderstel om die spesialis op die gebied van hierdie tipe inligting te wees.

Die eenheid spesialiseer onder meer in koverte optredes en meeluistering en is die regering se ‘oë en ore’ om inligting te bekom wat as ‘n bedreiging vir die staat beskou kan word.

Dit is alom bekend, en is reeds wyd in die media gerapporteer, dat Ngcobo ‘n voormalige lyfwag en vertroueling is van pres. Jacob Zuma.

“Hierdie eenheid is werklik die ‘Big Brother’ wat oor alle landsburgers se skouers loer en toegang kan kry tot die mees sensitiewe inligting oor enige persoon.

“Uit hoofde van sy amp sou Ngcobo op internasionale vlak met ampsgenote gepraat en inligting uitgeruil het. Daarvoor moes hy oor die hoogste sekerheidsklaring beskik. Dis moeilik om te aanvaar dat daar nou eers met sy kwalifikasies fout gevind word.

“Dit is werklik skrikwekkend dat ‘n eenheid met soveel mag so totaal disfunksioneel kon raak. Dit maak Suid-Afrika ‘n bespotting van die internasionale intelligensie-gemeenskap en behoort elke Suid-Afrikaner tot onrustigheid te stem,” lui die VF+ se verklaring.

Moord op Bekkersdal-inwoner nie gekoppel aan oproer sê polisie

Die moord van ‘n 20-jarige swart man in Bekkersdal, wes van Johannesburg, is nie gekoppel aan gewelddadige betogings in die gebied nie, het die polisie Donderdag gesê.

Woordvoerder konst Elsie Tshonte het gesê: ” Die voorval kan nie gekoppel word aan die protes nie want twee mans was buite hul krot Woensdagnag toe ‘n voertuig met vier insittendes hulle genader het.”

Volgens ‘n ooggetuie , het die motor met die vier insittendes aangekom om 23:00 .

Twee passasiers het uitgeklim en die twee mans wat buite die hut gesit het beledig, waarna vier skote afgevuur is wat een van die mans noodlottig gewond het.

Die aanvallers het terug in die motor gespring en weggejaag .

Die man wat geskiet is, is op die toneel dood.

Die vermoorde man, Themba Khumalo en sy vriend het na bewering gebots met die ondersteuners van ‘n plaaslike raadslid wat inwoners afgedank wil hê.

Die area is getref deur oproer oor dienslewering oor die afgelope week. Inwoners eis dat die Westonaria munisipaliteit ontbind en onder administrasie geplaas word.

Woensdag is ‘n buitelandse winkel eienaar in hegtenis geneem nadat hy na bewering op ‘n ander man geskiet het. Hy staan tereg op ‘n aanklag van poging tot moord .

Verlede week is 35 mense in hegtenis geneem en aangekla van openbare geweld nadat ‘n petrolbom en klippe gegooi is na die polisiestasie .

Drie polisievoertuie en ‘n rampbestuurvoertuig is beskadig in die aanval.

Die onrus het Donderdag na die naburige township, Simunye oorgespoel.

Gemeenskapslede sê dit sal ‘n sterk boodskap stuur aan die regering om spoedig op te tree en skole sal ook geteiken word.

Vanoggend moes ‘n polisiebeampte vir sy lewe vlug nadat ‘n groep woedende inwoners hom wou aanval. Hulle glo dat die polisie verantwoordelik is vir die dood van die 20-jarige man.

Vroeër is bespiegel dat die onrus na omliggende gebiede soos Simunye en Thusanang kan uitbrei, maar die polisie het die intussen die orde herstel. – Sapa

VSA ontken Merkel word afgeluister

Die Duitse regering het inligting bekom dat die kanselier, Angela Merkel, se selfoon deur Amerikaanse spioenasie-agentskappe gemonitor kan word.

Merkel het volgens haar woordvoerder met die Amerikaanse president, Barack Obama, in verbinding getree om die bewerings te toets.

Sy het in ‘n sterk bewoorde verklaring gesê dat dié optrede totaal onaanvaarbaar is en indien die bewerings waar is, sal betrekkinge tussen die twee lande ernstige skade ly.

‘n Woordvoerder van die Wit Huis, Jay Carney, het gesê Obama het Merkel die versekering gegee dat haar kommunikasie nie gemonitor word nie en dat dit nie gemonitor sal word nie. – Sapa

Twee wat apteker in PE aanhou verskyn

Twee mans wat in hegtenis geneem is omdat hulle na bewering ‘n apteker en sy twee assistente in Seaview buite Port Elizabeth as gyselaars aangehou het, verskyn vandag in die hof.

Die polisie is nog besig om die aanklagte teen die pa en seun te formuleer. Die 53-jarige pa en sy 19-jarige seun het reeds mediese en sielkundige toetse ondergaan en word in die selle by die Kabegapark-polisiestasie aangehou.

Die twee het geëis dat die apteker dodelike inspuitings aan hulle toedien en gedreig om almal met plofstof en ‘n vuurwapen te vermoor.

Dit het later aan die lig gekom dat die twee slegs ‘n speelgoedgeweer en ‘n brandbom by hulle gehad het.

Die beleg van sewe uur is beëindig toe die polisie ‘n skokgranaat gebruik en die twee in hegtenis geneem het. Die twee mans het in ‘n tent op die strand gebly. – RSG

Sewe vas vir veediefstal

Die polisie in KwaZulu-Natal het minstens sewe verdagtes in hegtenis geneem wat in besit betrap is van vee wat vermoedelik op Vryheid in die noorde van die provinsie gesteel is.

Die verdagtes is tydens ‘n polisie-padblokkade aangekeer. ‘n Polisiewoordvoerder, Thulani Zwane, sê minstens 57 stuks vee is teruggekry.

Hy sê dit is moelik om van die vee te identifiseer omdat hulle nie gebrandmerk is nie.

Hy het ‘n beroep op vee-eienaars gedoen om met die veediefstaleenheid op Vryheid in verbinding te tree, sodat hulle die beeste wat by die eenheid geskut word, kan probeer identifiseer. – Sapa

Luukshede vir regeringslui was nooit bekostigbaar nie

Die vraag is waarom dit bykans 20 jaar vanaf 1994 geneem het vir die regering om te besef dat die vermorsing van geld op luukse ministershuise en op kredietkaarte die verkeerde boodskap aan die publiek stuur en nie bekostigbaar is nie.

Die VF Plus verwelkom wel hierdie besparingsmaatreëls en beperkinge op luukse staatsuitgawes wat minister Pravin Gordhan as deel van sy mediumtermynbegrotingsrede aangekondig het.

Die redes vir die strenger maatreëls is die verminderde belastinginkomste wat die staat ontvang het en beslis die naderende verkiesing.

Die afgelope 19 jaar het die regering daaraan gewoond geraak dat die belastinginkomste elke jaar meer is as wat voorspel is. Die minister van Finansies het nou aangekondig dat minder belasting as wat verwag is, ingevorder is. Waar die mynbousektor in die verlede tot R22 miljard ingebring het, het dit vanjaar slegs ongeveer R12 miljard ingebring. Die mynstakings doen die ekonomie en die belastinginkomste dus baie skade.

Die voorgestelde besparingsmaatreëls, soos minder luukse behuising en verversings, sal nie soveel belastinggeld spaar nie as wat dit ‘n sterk boodskap na buite stuur oor die krisis waarin die ekonomie en die staatsfinansies hulle bevind. Selfsugtige vakbonde wat slegs aan hulle eie lede dink deur tot 60% verhogings te eis, is van die ernstigste Suid-Afrikaanse ekonomiese probleme. As die regering nie gaan slaag om die groot tekort op die begroting vinnig te verminder nie, kan Suid-Afrika se kredietgraderings weer laer aangepas word.

“As adjunkminister maak ek nie gebruik van ‘n ministershuis in Kaapstad of in Pretoria nie en het ek ook nie ’n kredietkaart nie. Met die ampsmotor wat die departement in 2009 aangekoop het, is die riglyn van 50% gevolg en nie die ministeriële handboek se 70% nie,” het dr. Pieter Mulder, leier van die VF Plus gesê.

Boer in Vryheid doodgeskiet

’n Boer is op sy plaas in Vryheid in KwaZulu-Natal doodgeskiet, het die polisie Woensdag gesê.

Die 78-jarige Willem Weites is Maandagoggend op sy plaas doodgeskiet, het kapt. Thulani Zwane, polisiewoordvoerder, gesê.

“Hy was besig om ’n waterpomp reg te maak toe drie onbekende mans uit ’n voertuig spring en ’n vuurwapen uitpluk. Hulle het geld van die oorledene geëis en hom twee keer in die kop en bors geskiet.”

Die mans het toe by Weites se huis ingegaan en ’n onbekende bedrag geld uit sy kluis gesteel.

Niemand is al in hegtenis geneem nie. – Sapa

Gemeenskap woedend oor jongste plaasaanval

Die hof op Barkly-Oos moes hoor dat die vermeende moordenaar talle vorige veroordelings en sake wat steeds hangend teen hom is, het. Lede die gemeenskap het Dinsdag voor die vervalle hofgebou gedreungsing in woede oor die jongste plaasmoorde.

Die gemeenskap het voor die hof rooi ballonne vasgehou. Die De Villiers-egpaar word vandag om 14:00 uit die NG kerk begrawe.

“Wys die f****r se gesig vir ons!” het omstanders gegil toe die 22-jarige beweerde moordenaar uit die landdroshof gekom het en na die polisievangwa begelei is.

“Jy’s ’n satan! Jy sal vrot in die tronk,” het Maggie Thethekwa, gemeenskapsleier op die dorp, vir Thulani Khetane, die vermeende moordenaar van David (87) en Ralie (86) de Villiers, geskree.

“Voertsek hond!” het weerklink. Khetane is selfs deur landdros P. Ngindo afgejak toe hy sy regterhand opgesteek het om iets te sê.

Die aanklaer, Zipho Sobekwa, het gesê die staat sal borgtog teenstaan wanneer Khetane volgende Dinsdag om borgtog sal aansoek doen.

“Hy is ’n bekende gesig op die dorp. Hy was totdat hy 16 jaar oud was, in ’n plaaslike kinderhuis,” het Thethekwa gesê.

Khetane staan tereg op twee aanklagte van moord, een van poging tot moord en huisbraak met die doel om te vermoor.

Die vermoorde egpaar se seun, Dawie (53), is ernstig in die aanval beseer. Hy het ook verskeie meswonde opgedoen.

Amanda Appelgryn, woordvoerder van die Mediclinic Bloemfontein waar hy behandel word, sê Dawie is steeds in ’n stabiele toestand in die intensiewesorg-eenheid. Hy is steeds aan ’n ventilator gekoppel en onder swaar verdowing, het Beeld berig.