Verenigde State – praag.co.za

Dan Roodt: Nuwe Kommando’s is al antwoord op Brendin Horner-tipe moorde

Soos duisende ander mense, is ek geskok en woedend oor die jongste plaasmoord, dié op Brendin Horner. Hy was maar een-en-twintig jaar oud, met sy hele voor lewe hom. Hy is op wreedaardige wyse vermoor. Sy lyk is teen ‘n paal vasgemaak waar sy pa Robby, tesame met sy vriendin, Lenize Taljaard, hom Vrydagoggend vroeg aangetref het. Hier bo is ‘n Facebook-foto van Brendin en Lenize waarop hulle dolgelukkig lyk, alvorens hy soos soveel ander deur volksmoordenaars neergevel is.

Mense sal my seker kwalik neem dat ek die term “volksmoord” gebruik, maar wat anders kan ‘n mens hierdie aanhoudende stroom grudade noem wat teen boere en landelike Afrikaners gepleeg word? Op sy minste is dit georganiseerde terrorisme.

Soos meeste mense weet, was die afskaffing van die Kommando’s in die vroeë 2000’s ‘n absolute ramp vir landelike veiligheid in Suid-Afrika. Op daardie stadium het ek kontak met heelwat kommandolede gehad, sowel in die Vrystaat as in die Noord-Transvaal en ek was beïndruk met hul erns, georganiseerdheid en gemeenskapsbetrokkenheid. Mosiuoa “Terror” Lekota, wat tussen 1999 en 2008 minister van verdediging was, het in sy wysheid besluit om die Kommando’s af te skaf.

Kort ná hierdie besluit het plaasmoorde die hoogte ingeskiet. Van die mense wat by die Kommando’s betrokke was, het hul eie plaaswagte begin, maar vanweë die gebrek aan openbare befondsing kon hulle nooit dieselfde vlak van paraatheid en organisasie as die ou Kommando’s bereik nie. Immers het die Kommando’s ‘n lang geskiedenis gehad wat terug te voer was na die ou Boererepublieke toe, as ‘n soort landelike gendarmerie.

Volgens die Afrikaanse Wikipedia is ‘n “gendarmerie (verbastering van die Franse gens d’ armes, krygsvolk, letterlik mense met wapens)… ‘n gewapende diens wat algemene polisietake uitvoer en (van oorsprong) ‘n onderdeel van die weermag is”. Hulle word ook “polisiesoldate” genoem. ‘n Aantal lande in Europa beskik oor sulke gendarmes of kommando’s onder verskillende name:

België: Rijkswacht/Gendarmerie (opgehef na eenwording van die polisiedienste in 2001)
Frankryk: Gendarmerie Nationale
Italië: Carabinieri
Spanje: Guardia Civil
Portugal: Guarda Nacional Republicana
Nederland: Koninklijke Marechaussee
Roemenië: Gendarmerie Romania
Oostenryk: Bundesgendarmerie (opgehef in 2005)
San Marino: Gendarmeria
Turkye: Jandarma

Die Kommando’s móét terugkom. ‘n Afvaardiging van boereverenigings, asook Afrikaners — want meesal is dit ons familie en vriende wat die slagoffers van hierdie moorde is — moet onmiddellik eis dat die Kommando’s herstel word, tesame met ‘n begroting wat deel kan uitmaak van die Weermagbegroting soos dit was.

Slegs tien persent van die ou Kommandolede is deur die staat besoldig. Die res was almal vrywilligers wat gemeenskapsdiens gedoen het. Dis ‘n goeie model, juis omdat dit gemeenskapsbetrokkenheid aanmoedig. Daarbenewens is dit baie kostedoeltreffend.

Destyds het die Kommando’s ‘n skamele begroting van R25 miljoen gehad. Dis minder as wat een kader in ‘n enkele korrupte tender opslurp. Duisende lewens, asook ons landbou, kan deur ‘n geringe bedrag geld gered word.

Indien die ANC-bewind soos gewoonlik alles teëgaan wat ons voorstel, moet ‘n ander plan gemaak word. Die Europese Unie of die Verenigde State moet dan instaan. As USAID ‘n paar honderd miljoen dollar per jaar kan skenk om gratis vigsmedisyne in ons land te verskaf, kan dié land sekerlik vyf of tien miljoen dollar verskaf om ons boerebevolking van uitdelging te red?

Afgetrede weermagoffisiere en -lede behoort die voortou te neem om mense met organisasie en opleiding te help.

Om in die Kommando’s te dien, behoort vir elkeen ‘n saak van trots te wees. Stedelike jongmense kan vir drie of ses maande diens in die Kommando’s doen om ons mense op die platteland te gaan beveilig en sodoende gemeenskaps- en kultuurbande versterk.

Die Suid-Afrikaanse Polisiediens het al oor en oor bewys dat hy nie in staat is om landelike veiligheid te verseker nie. Daarom moet die Kommando’s in ‘n gemoderniseerde gedaante met voertuie, digitale kommunikasiemiddele, hommeltuie en alle tegnologie wat nodig is, herrys.

Dis ‘n saak van nasionale en internasionale belang. Daarsonder gaan Suid-Afrika net nog ‘n mislukte staat van die Afrika-tipe word, soos wat in Stephen Smith se boek Negrologie beskryf word. Watter verskil is daar tussen plaasmoordenaars en rebellegroepe wat ander Afrikabevolkings teister?

Alle Afrikaners moet nou hande vat en voorbrand maak vir die idee. Die ANC en die wêreld sal nie kan nee sê vir ‘n goeie plan om plaasmoorde vir eens en vir altyd te stuit nie.

Ons skuld dit aan almal wat reeds aangeval of vermoor is, asook hul geliefdes en gesinne. Soos aan my vriendin Annette Kennealy wat verlede jaar naby Louis Trichardt vermoor is.

Asook aan ‘n jongman soos Brendin, sy gesin en sy vriendin Lenize Taljaard wat vandag verpletter moet wees.

My innige meegevoel aan hulle. Maar dié afskuwelike moorde moet nou end kry.

Kyk ook Dan Roodt en Gustav Venter se YouTube-onderhoud oor die voorval.

Karel Combrinck: Voete van klei

Dit voel soos gister dat Colin Powell die buisie met ‘n monster van Irak se “wapen van massavernietiging ” aan die wêreld vertoon het. Hierdie foefie was ‘n genoegsame voorwendsel vir ‘n Amerikaanse militêre inval in Irak. Soos ons almal nou weet, was daar toe nooit enige wapens van massavernietiging in Irak nie.

En hier kom mnr Trump jou gedoriewaar weer met ‘n slenter van dieselfde aard: Iran is verantwoordelik vir die hommeltuigaanslag teen die olievelde van Saoedi-Arabië. Amerikaanse troepe en militêre toerusting is reeds onderweg na Saoedi-Arabië om te gaan help. In ‘n gesamentlike verklaring ondersteun mnr Johnson, mnr Macron en mev Merkel die Amerikaanse standpunt weer klakkeloos, soos gewoonlik. As rede vir hulle bevinding voer hulle aan dat Iran skuldig moet wees, aangesien daar geen ander bevredigende verduideliking is nie. Dis die presidente van die Weste se voorste moondhede wat só redeneer! Die Midde-Ooste wemel tog van terroriste van alle kleure en geure wat so’n aanval sou kon uitvoer. Die enigste belang wa Engeland, Frankryk en Duitsland in die geskil het, is om die Amerikaners na die mond te praat.

Maar laat ons mekaar mooi verstaan. Dit gaan hier nie om ‘n pleidooi ten gunste van Iran in die algemeen nie. Die Iranese regime is sekerlik nie iets moois nie, om by vroueregte maar te begin. Dit gaan om beskuldigings van bombardemente van die Saoedi-Arabiese olievelde. Vir vroueregte in Iran voel die Amerikaners in elk geval vere, net soos hulle vere voel vir vroueregte in Saoedi-Arabië of vir die verpletterde bevolking van Jemen.

Iran is dus “skuldig” aan die aanval in Saoedi-Arabië. Die vraag wat ontstaan is waarom die Saoedi’s dan nie self hulle verdediging kan waarneem nie. Amerika, Engeland en Frankryk lewer jare lank reeds die modernste wapentuig ten bedrae van miljarde dollars aan Saoedi-Arabië. Die Saoedis gebruik hierdie wapentuig wel om ‘n vernietigende oorlog te voer teen die bykans hulpelose staatjie van Jemen, sonder dat dit skynbaar die Amerikaners, Franse of Engelse enige slapelose nagte besorg. Maar om hulleself teen ‘n hommeltuigaanval te verdedig, moet die Amerikaners kom help.

Dis duidelik dat Amerika oorlog soek in die Midde-Ooste. Hulle het nog steeds nie die situasie in Irak bevredigend bygelê nie en het nog altyd troepe daar. So ook in Sirië, Libië en Afghanistan waar hulle die afgelope 20 jaar reeds vasgeval sit en waar dit al hoe duideliker begin word dat hulle die stryd aan die verloor is. En dan praat ons nie eers van hulle jammerlike mislukkings in Viëtnam, Somalië en elders nie, maar dit is vir die Amerikaners natuurlik antieke geskiedenis.

Vraag is ook waarom Saoedi-Arabië ‘n bondgenoot van Amerika is en Iran ‘n vyand. Hulle is mos maar soos vinkel en koljander. In Saoedi-Arabië, Amerika se groot bondgenoot, is dit moontlik dat selfs minderjariges tot die dood deur kruisiging veroordeel kan word vir ‘n oortreding so gering as om aan ‘n betoging deel te neem.

Wat kan die beweegrede dan wees vir die Amerikaanse bemoeienis met die Midde-Ooste? ‘n Vanselfsprekende rede is natuurlik olie. Die Midde-Ooste beskik oor die wêreld se grootste oliebronne. Maar daar is ook die belange van Amerika se ” bondgenote” in die Midde-Ooste wat gedien moet word. Die Amerikaners probeer voorts om deur militêre optredes hulle ekonomie te stimuleer en terselfdertyd die aandag af te lei van die dreigende ekonomiese ramp wat hulle in die gesig staar. Maar die belangrikste rede is waarskynlik is dat die Amerikaners probeer om ‘n kordon te span rondom Rusland, wat in die pad staan van hulle strewe na wêreldoorheersing.

Al waarop die res van die mensdom kan hoop, is dat die Amerikaners ons nie almal saam met hulle oor die afgrond sleep nie.

As dít alles ‘n bietjie deumekaar en teenstrydig voorkom, is dit geen wonder nie. Die dae van pres De Gaulle, mnr Adenauer, mev Thatcher en dr Verwoerd is verby. Die Weste is in die hande van afkophoenders.

‘Vrees’ oor lys van linkse professore in Amerika

‘n Konserwatiewe organisasie, Turning Point USA, het ‘n webblad geskep waarop ‘n lys van meer as 200 professore aan universiteite regoor Amerika verskyn wat “teen konserwatiewe studente diskrimineer en linkse propaganda in die klaskamer bevorder”.

Die webblad, professorwatchlist.org, plaas nie sommer die naam van enige professor nie —bewyse word vereis.

“This watchlist is an aggregated list of pre-existing news stories that were published by a variety of news organizations,” verklaar die webblad. “While we accept tips for new additions on our website, we only publish profiles on incidents that have already been reported by a credible source.”

TPUSA poog nie om die professore op die lys stil te maak nie, maar stel wel “spesifieke voorvalle en name van professore wat ‘n radikale agenda in die lesingsaal bevorder,” aan die kaak.

Die reaksie van Links was voorspelbaar histeries, met sommige wat dit as “grotesk” uitkryt en ander wat sê dat dit “‘n voorraadagentskap vir foto’s van selftevrede witmense is”.

Die linkse webblad Slate beskou die lys as “deel van die vreesaanjaende nuwe politieke status quo” in Amerika:

“Of dit só bedoel is of nie, belyn die professorale naamlys hom met die vreesaanjaende nuwe politieke status quo. Dit is inderdaad ‘n keerpunt in ons land, ‘n vreesagtige tyd wat ongekend in die geskiedenis is sedert die tweede wêreldoorlog. Vrees om op ‘n lys geplaas te word, om as ongewens geteiken te word, en onderwerp te word aan wat ook al volgende gaan gebeur.”

Die TPUSA-lede en -organisasie word met ‘n woedende, gewelddadige gepeupel vergelyk, berig The Daily Caller, wat vermeld dat “die lys oor ons waak tydens ons land se donkerste keerpunt, op die punt om die kurkdroë, petroldeurweekte hooivurke van ‘n gepeupel aan die brand te steek wat onbeskaamd in die lig na vore getree het”.

Julio C. Pino, ‘n mede-professor van geskiedenis by Kent State wat op die lys ingesluit is, glo dat dit “die vervolging, beskaming en belastering van professore verteenwoordig”.

Robert Jensen, ‘n professor aan die Universiteit van Texas te Austin, het ook sy gevoelens gelug oor die feit dat hy op die lys ingesluit is omdat hy studente leer dat “ons nie mans se geweld jeens vroue sal beëindig indien ons nie die giftige begrippe aangaande manlikheid in die patriargie verwyder… wat in beheer, verowering en aggressie gewortel is nie”.

“Dit sou makliker gewees het om dié ligsinnige projek te verwerp indien die Verenigde State nie so pas ‘n president verkies het wat pogings tot rasionele gesprek doodskree, asook reaksionêre meerderhede in beide huise van die Kongres nie,” skryf Jensen. “Ek is ‘n permanent aangestelde professor (en blank, manlik, asook ‘n VS-burger van geboorte) en is nie bekommerd nie. Maar, hoewel die groep agter die lys oor geen formele magte oor my of my universiteit beskik nie, mag die poging om professore te boelie – hoe swak dit ook al ondersteun mag wees – professore sonder my sekuriteit en bevoordeling wel inhibeer.”

Ondanks die kritiek wat die lys ontvang het, het die stigter en HUB van TPUSA, Charlie Kirk, Dinsdagaand die lys hartstogtelik verdedig op Fox News-kanaal se “O’Reilly Factor”.

“As die professore so bang is dat bekendgemaak word wat in hul lesingsale aangaan, dan is die probleem hulle s’n, nie ons s’n nie,” sê Kirk. “Ons probeer nie die dosente verhoed om enigiets te sê nie. Al wat ons hier wil hê, is om ‘n lig te skyn op wat in ons universiteite aangaan en die reaksie is ongelooflik gunstig.”

Trump trek voor Clinton in Ohio en Florida, twee sleutelstate

Met slegs agt weke oor voor die Amerikaanse presidentsverkiesing, trek Donald Trump voor Hillary Clinton in meningsopnames in beide Ohio en Florida, twee van die sleutelstate wat gewoonlik die wenner in die wedstryd om Withuis toe te gaan, bepaal.

‘n Meningsopname deur CNN/ORC in die twee state toon dat waarskynlike stemmers in Ohio met 46% vir Trum sal stem, teenoor 41% vir Clinton, terwyl 8% die Libertariese Party van Gary Johnson en 2% die Groen Party van mev. Jill Stein sal ondersteun. In Florida skaar 47% van waarskynlike stemmers hulle agter Trump, met 44% agter Clinton, teenoor 6% vir Johnson en 1% vir Stein.

Trump geniet meer steun onder mense wat vas van plan is om te stem. As louwarm kiesers in ag geneem word wat moontlik nie op stemdag by die stembus sal opdaag nie, wen Clinton met ‘n skrale 1% in Florida, met 45% teen 44% vir Trump, maar selfs in dié geval verloor sy met 43% teenoor 39% in Ohio, met Johnson wat 12% verkry.

Meerderheid blanke kiesers steun Trump

Iets wat ook uit die jongste meningsopnames blyk, is dat Trump by verre die meerderheid steun onder blanke kiesers geniet. In Ohio geniet Trump 22 persent meer steun onder blankes as onder nie-blankes, terwyl sy voordeel onder blankes in Florida so hoog soos 29 persentasiepunte is. Aan die ander kant steun nie-blankes in beide state oorwegend vir Clinton. Sy geniet 70 persent meer steun as Trump onder nie-blankes in Ohio.

Selfs onder opgevoede blankes wat deur Amerika se links-liberale universiteite gebreinspoel is om die blanke beskawing te haat, geniet Trump tans die meerderheid steun. Hoewel Clinton ook oor taamlik steun onder blankes met universiteitsgrade beskik, daal haar steun onder blankes sonder grade drasties tot minder as 30 persent omdat daardie blankes haar as antiwit beskou. In beide Ohio en Florida het Trump se steun onder blanke graduandi gestyg: in Ohio met 9 persentasiepunte en in Florida met 8 persent.

Teenoor die toestand in middel-Augustus toe die VSA se liberale media gepoog het om Clinton as die aangewese president aan te bied omdat Trump plek-plek besig was om in die die meningsopnames terug te sak, is die geveg nou voluit aan die gang met Trump wat as moontlike wenner uit die stryd mag tree. Oor die algemeen is kiesers meer geesdriftig oor Trump, teenoor Clinton wat as onbetroubaar en oneerlik gesien word.

Meer mense in beide state sien Clinton as iemand wat “gedeelde waardes” beliggaam (47% teenoor 41% vir Trump) en as iemand wat die verantwoordelikheid van opperbevelvoerder van die VSA sal kan hanteer, maar 47% beskou Trump as eerlik en betroubaar teenoor slegs 40% wat Clinton vertrou of as eerlik sien. Twaalf persent van kiesers vertrou nie enigeen van die twee nie.

Die CNN/ORC-meninsopnames is vanaf 7 tot 12 September per telefoon uitgevoer. Die uitslae in Florida is gegrond op ‘n ewekansige steekproef van 1 003 volwassenes wat in die deelstaat woon, waaronder 788 wat waarskynlik in November gaan stem. In Ohio is onderhoude met ‘n ewekansige steekproef van 1 006 volwasse inwoners van die deelstaat gevoer, waaronder 769 waarskynlike stemmers. In beide state is die moontlikheid vir ‘n statistiese fout 3,5 %.

Bendegeweld in Chicago het met 40% toegeneem sedert Obama verkies is

‘n Amerikaanse Kongreslid, Bobby Rush, is een van vele swart Ametrikaanse leiers wat dweep met Trayvon Martin, die swart tiener se dood. Martin is deur ‘n bruin buurtwaglid Gerorge Zimmerman geskiet nadat Martin vir Zimmerman aangerand het, en hy hom uit selfverdediging geskiet het.

Rush is ‘n kongreslid wat die mees gewelddadige stad in Amerika verteenwoordig. Chigaco is die stad waarin meer as 500 mense dood is verlede jaar, 74 persent van hulle Afro-Amerikaans, en 80 persent van die moorde verteenwoordig, volgens die polisie, bendemoorde.

Bendes het toegeneem in Chicago met 40 persent sedert die VSA se eerste swart president verkies is.

Daar is egter geen federale program om dit te stop nie en geen politieke wil nie. Niemand wil ‘n eerlike gesprek daaroor te hê nie, maar ‘n kongreslid wat se eie distrik in totale chaos verkeer, wat ‘n “hoodie” as ‘n simboliese daad dra, het geen raad met die bendes in sy eie distrik nie, behalwe om wittes daarvoor aanspreeklik te hou.

Detroit is nie die enigste Amerikaanse stad wat gaan vou nie

Philadelphia: next on the list of bankruptcies? — Philadelphia: volgende op die lys van bankrotskappe?

Verlede week, is die swart Amerikaanse stad Detroit bankrot verklaar, die grootste stad in die Amerikaanse geskiedenis om so ‘n drastiese stap te neem. Dit is eintlik ‘n manier vir die stad om van al die finansiële verpligtinge ontslae te raak en nie te betaal wat hulle skuld nie.

Wat is die grootste finansiële verpligting wat die stad in die gesig staar? Pensioene, $3,5 miljard se pensioene, om presies te wees.

Ja, Detroit skuld voormalige staatsamptenare – onderwysers, brandweer, polisie en meer – ‘n yslike $3,5 miljard. Behalwe dat Detroit nie geld het om die pensioene te betaal nie, is die stad in ‘n toestand van algehele ekonomiese ineenstorting nadat die Amerikaanse regering miljarde in belastingbetalers se geld aangewend het om te help dat General Motors sy produksie na die buiteland skuif, na lande soos China.

As ‘n gevolg hiervan en die daaropvolgende kriminele wanbestuur van ‘n swart kleptokrasie, is dit ‘n spookdorp van verlate geboue, verkrummelende infrastruktuur en finansiële nood.

Chicago, nog ‘n swart stad, skuld $19 miljard in pensioenuitbetalings wat hulle nie het nie, en die stad van Los Angeles is meer as $30 miljard in die rooi. Die storie is trouens baie dieselfde in elke groot Amerikaanse stad.

Vroeg vanjaar het die Pew Center ‘n opname vrygestel wat toon dat 61 van die land se grootste stede ‘n gaping van meer as $217 miljard in onbefondsde pensioen- en gesondheidsorglaste dra. Terwyl stede lank reeds gesondheidsorg, lewensversekering en ander voordele aan afgetrede werknemers belowe, het “min … begin spaar om die langtermyn koste te dek,” lui die verslag.

Lees die verslag hier:

Detroit het geen keuse gehad as om bankrotskap te verklaar in ‘n poging om te verhoed dat hulle vir die pensioene aanspreeklik gehou word nie. In effek, dit is ‘n konfiskering van alle pensioenfondse deur die regering, wat beteken dat afgetrede polisielede, brandweerlede, onderwysers en so aan nooit ‘n sent van die pensioene sal sien wat hulle gedink het hulle verdien het nie.

Die woord “onbevoeg” begin nie eens om Detroit se politieke leierskap te beskryf nie. Dit is meer soos politici met “breinskade” of “krimineel stapelgek”.

Is Detroit, soos die Amerikaanse banke, “Te groot om te misluk”?

Daar is reeds sprake dat Obama ‘n reddingsboei na Detroit gaan werp, wat beteken dat die federale regering die skuld van die wanbestuur in die stad asook sy pensioenfondse gaan dra, en uiteindelik belastingbetalers regoor die land, gaan melk. Dit sal gedoen word in die naam van “swart solidariteit”, natuurlik.

Gewone Amerikaners sal betaal om pensioene van ‘n paar oud-polisiemanne in Detroit te kan aanhou betaal, en die swart stadsleiers se magsposisies te bestendig Dit is alles deel van die federale regering se nuwe plan om korrupsie te beloon en fiskale verantwoordelikheid te straf.

Lonende roekelose besteding is in elk geval die nuwe sport in Washington, waar banke gereeld honderde miljarde dollars in belastingbetalers se geld ontvang weens blinde transaksies op afgeleide markte wat versuur.

In April het Moody’s gewaarsku dat die graderings van ander swart stede waaronder Chicago, Cincinnati, Minneapolis, Portland en 25 ander plaaslike regerings in die gedrang is, skryf Forbes.com.

Die top 10 grootste Amerikaanse stede op die rand van bankrotskap is:

Philadelphia
Chicago
Boston
Cincinnati
St Paul
Jacksonville
New York City
Baltimore
Detroit
Fort Worth

Die gevolge van die wanbestuur sal uiteindelik lei tot wydverspreide onluste, gevolg deur polisie-onderdrukking. Die federale regering se aankope van miljarde rondtes ammunisie, duisende gepantserde voertuie, outomatiese aanvalsgewere en ander toerusting, sal dalk gebruik word op die strate van Amerika.

Selfs die Wall Street Journal erken nou dat die militarisering van die Amerikaanse polisie buite beheer is.

“Wetstoepassingsagentskappe in die VSA, op elke vlak van die regering, vervaag die lyn tussen die polisiebeampte en soldaat. Gedryf deur oorlogsretoriek en die beskikbaarheid van die militêre-styl toerusting – van bajonette en M-16 gewere tot gepantserde personeeldraers – het Amerikaanse polisie dikwels ‘n ingesteldheid wat voorheen gereserveer was vir die slagveld.”

Die Trayvon-Martin-geval: meer as net ras

deur Joseph Secrève

Die afgelope week hou die uitspraak oor die Trayvon Martin-geval die Verenigde State besig. Oor die wêreldmedia word voortdurend benadruk hoe die “wit” half-Peruviaanse sekuriteitswag ‘n ongewapende swart tiener doodgeskiet het, en die media speel nou gevaarlik op hierdie sentimente. Aanvanklik het president Obama homself ten gunste van die vryspraak uitgelaat omdat dit sy werk is om die Grondwet van die Verenigde State te verdedig. Hy is immers nie bo die wet nie en moet homself ondergeskik stel aan die uitspraak van sy regters.

Die media weef egter ‘n hele ander prentjie en het ondertussen ‘n hele spektakel aan die gang gesit met bekende popsterre en ander figure wat die uitspraak ernstig betwis. Soos gewoonlik word daar gehamer oor armoede en diskriminasie.

In ‘n snaakse wending het Obama enkele dae later ewe skielik van narratief verander deur te meen dat “dit kon ek gewees het ses en dertig jaar gelede”. Obama, met ander woorde, maak die kwessie persoonlik. Hy kies kant, dié van die media en speel verder op die sentimente van die publiek, waarmee hy die geregtelike gesag in ‘n hoek dryf. Hy doen wat linkse bewegings altyd doen, naamlik om emosie op te jaag wat die politieke klimaat sal verander. Selfs al bevind ‘n regter en jurie iemand onskuldig, word die werklike skuldvraag buite die howe besleg: As almal jou desondanks soos ‘n skurk gaan behandel, is die sielkundige impak ewe skadelik, of moontlik selfs skadeliker as ‘n geregtelike skuldigbevinding.

Ofskoon ras die belangrikste rede is vir die misnoë van die protesteerders, is daar stilletjies ‘n ander motivering agter hierdie proteste, naamlik ‘n persepsie van aanspraak op sekere regte, of “entitlement” soos die Engelsman sou sê.

Die belangrikste verskil tussen Republikeine en Demokrate is dat Republikeine glo dat jy jou eie potjie moet krap en jouself hoër op moet werk in die samelewing. Die Demokrate glo dat dit die plig is van die regering om geskenke uit te deel aan die armes, verkieslik sonder teenprestasie. Dit het ook ‘n politieke opvangsentrum geword vir almal wat nie aan die tradisionele WASP-ideaal voldoen nie.

Hierdie genoemde aanspraak is waarskynlik die werklike rede agter die protes. Die dader Zimmerman was immers nie heeltemaal wit nie en dit lyk asof die bakens verskuif het van wie nou werklik wit is of nie. Die antwoord vermoed ek kan gevind word omdat die Amerikaanse onderklas ontevrede is dat hulle nie genoeg deur die staat gepamperlang word nie. Egter, hoe meer die staat hulle gaan pamperlang, hoe meer gaan hulle aggressiewe protes as ‘n regverdige middel beskou. ‘n Mens hoef dus geen Churchill te wees om te besef dat hierdie benadering die gesonde funksionering van die staat ernstig kan knou nie.

Wie onthou nog die vorige president George Bush? Twee van sy belangrikste raadgewers, Colin Powell en Condoleeza Rice was ook nie wit nie. Hulle was egter te “wit” vir die protesteerders, en ras was op daardie stadium nie naastenby so omstrede soos tans onder Obama nie, wat weereens bewys dat hierdie proteste nie ‘n suiwer rassekwessie is nie. Dit is mutasie tussen swart-wees wat gepaard gaan met die onderklas-mentaliteit.

Die ironie is natuurlik dat een dag voor Obama se “dit kon ek gewees het” – toespraak het die stad Detroit bankrotskapbeskerming aangevra. Hierdie stad wat eens op ‘n stadium die motor (letterlik en figuurlik) agter die Amerikaanse ekonomie was, is tans een groot ghetto, volledig verarm deur dieselfde klas wat voortdurend op hul “regte” aanspraak maak.

Ek is nuuskierig om te sien waar al hierdie verrigtinge heen gaan lei in die afsienbare toekoms, maar ek vermoed dit kan dieselfde gedrag toon as wat ons tydens die Rodney King-opstande gesien het, naamlik ‘n paar dae van intense protes en grootskaalse plundery en vandalisme, maar volgende week as die welsyntjeks uitgedeel word, is die vrede terug. Die amoksaaiers het eerste in die ry gestaan om hul uitkerings te gaan opeis, die protes lankal vergete.

Vermoedelik sal ons ook niks verneem van Antonio West nie, die dertien maande-oue wit baba wat vanjaar op 21 Maart deur twee swart tieners doodgeskiet is omdat sy ma geen geld gehad het nie. Maar natuurlik was sy ma geen aanspraakmaker nie, synde wit, dus word hierdie saak gerieflik uit die media geweer. Van Obama sal ons waarskynlik ook niks hieroor hoor nie, selfs nie sy “dit kon ek gewees het” toespraak nie.

Immers, ‘n afgedankte prokureur met ‘n twyfelagtige verlede pas eerder in die prentjie van ‘n Trayvon Martin as ‘n Antonio West.