Britse sokkerboewe in Rome (videogreep)
Gevegte tussen ondersteuners van Manchester United en die Italiaanse sokkerklub Roma het uitgebreek, met die toetrede van die Italiaanse polisie.
Etiket: Nuus
VSA wil Mugabe afsit
Eric Bost
Die VSA het gister vir die eerste maal openlik te kenne gegee dat hulle aktief daaraan werk om Robert Mugabe, president van Zimbabwe, te ondermyn.
Onlangs het berigte oor die aanranding van Zimbabwiese opposisieleier, Morgan Tvangirai, aan die hand van Mugabe se veiligheidsmagte opslae gemaak.
Alhoewel Washington nie regimeverandering steun nie, het die Amerikaanse departement vir Buitelandse Sake eergister in die verslag wat vrygestel is erken dat hulle die MDC-opposisie asook ander kritici van mnr Mugabe steun.
Eric Bost, huidige VSA-gesant in SA, het voorheen sy teleurstelling uitgespreek met die “gebrek aan aksie” uit Afrika om Mugabe se termyn tot ’n einde te dwing. Die VSA se verteenwoordiger In Harare het al by verskeie geleenthede kommentaar gelewer oor die rampspoedige gevolge van Mugabe se beleidsrigtings.
Die betrokke deel is vervat in die Departement se vyfde jaarlikse Supporting Human Rights and Democracy-verslag. Daarin is alle besonderhede vervat van Amerika se wêreldwye aksies om menseregte te bevorder. Lande soos Rusland en Iran word ook breedvoerig bespreek.
Die Amerikaners het bevestig dat hulle byeenkomste borg met die oog daarop om Mugabe se regering te “diskrediteer”.
Mnr Mugabe sal ongetwyfeld egter die bekendmaking verwelkom omdat hy reeds herhaaldelik Brittanje en die VSA van inmenging om sy bewind omver te werp, beskuldig het.
Die vrystelling van die jaarlikse verslag verloop nie altyd sonder kinkels nie. Drie jaar gelede moes dit vertraag word toe menseregteskendings deur Amerikaanse weermagpersoneel by die Abu Ghraib-gevangenis in Irak rugbaar geraak het.
Alhoewel die VSA getalm het met hul afkeur in die Mugabe-regering, was hulle verlede maand taamlik uitgesproke by die Menseregteraad (HRC) in Genève. Terwyl hulle erken het dat Zimbabwe ’n “nominale” demokraties-verkose regering het, is dit as “outoritêr” beskryf. Die verklaring lui voorts soos volg:
Om groter openbare debat oor die herstel van goeie regering [in Zimbabwe] aan te moedig, het die Verenigde State openbare byeenkomste geborg waar ekonomiese en sosiale ontledings aangebied is wat die regering se verskonings vir sy mislukte beleidsrigtings diskrediteer.
Om verder die pro-demokratiese elemente te versterk, het die VS-regering volgehou om die pogings van die politieke opposisie, die media en burgerlike samelewing te steun om demokratiese ruimte te skep en te verdedig en om persone wat die regering kritiseer te ondersteun.”
Barry Lowenkren, afgevaardigde, het volgens berigte gesê die doel van die verslag is nie noodwendig regimeverandering nie, maar moet as ’n manier om die speelveld meer gelyk te maak, gesien word. Hy het bygevoeg dat dit nodig is om aan die mense in Zimbabwe te toon dat hulle die ondersteuning van die VSA geniet.
Iran gee geld vir Zimbabwiese propagandastasie
Die waarheid kom…
Zimbabwe gaan die Westerse media se propaganda-aanslag teen die regime van Robert Mugabe op ’n nuwe manier beperk, het dié land se staatsmedia Vrydag bekend gemaak.
“Ons mense word omsingel en gebombardeer deur Westerse media,” het die minister van Inligting, Sikhanyiso Ndlovu, aan die Ziana-nuusagentskap gesê.
Die nuwe radiostasie sal van kortgolf gebruik maak en sal die vyfde stasie wees wat deur die regering bedryf word. Volgens Zania en die regeringspreekbuis, The Herald, sal die uitsendings op 18 April begin om die 27ste herdenking van swart onafhanklikheid van Brittanje te vier.
Nadat Ian Smith in 1970 as verkiesingsoorwinnaar uit die Gemenebes gestap het, ’n republiek uitgeroep en sodoende die laaste band met die Britse kroon verbreek het, het die Britte wat vroeër by monde van Harold Wilson verklaar het dat Brittanje dit nooit sal aanvaar indien daar nie swart regering in die eertydse Rhodesië kom nie, hewige druk op alle partye uitgeoefen om Mugabe se heerskappy te bewerkstellig.
Onder die wakende oog van Brittanje is alle moontlike eertydse swart opposisiekandidate ook uit die weg geruim en duisende Matabeles is in Mugabe se wrede veldtogte uitgemoor.
Oor die nuwe stasie het die minister bygevoeg dat daar “rewolusionêre nuwe ontwikkelinge in die media gaan kom. Ons gaan by magte wees om ons eie weergawe te gee.” Hy het toe pas Iranse diplomate wat in Harare verteenwoordig is, ontmoet.
Die nuwe stasie gaan die sukkelende staat, in die knelgreep van hongersnood en wegholinflasie, 8,9 miljard Zimbabwiese dollar kos oftewel 39,6 miljoen VS dollar teen die amptelike koers.
Mnr Ndlovu het ná sy ontmoeting met Iran se ambassadeur, Rasoul Momeni, die aankondiging oor die nuwe stasie gedoen nadat ooreengekom is om Bulawayo, die tweede grootste stad, se oudovisuele geriewe ook op te knap,
Iran het reeds toegesien dat die uitsendingsgeriewe in die hoofstad nuut oorgedoen word.
Mugabe het agv Westerse kritiek homself gewend tot lande in Asië asook Iran om sy bewind te bestendig.
Iran moet ook Fransman vrylaat
Nadat Iran die 15 Britse seesoldate wat aangehou was vrygelaat het, het die Franse regering ’n versoek gerig om die vrylating van navorser Stéphane Dudoignon. Die Fransman is op 30 Januarie verlede maand in die suid-ooste van die land aangekeer.
Die Quai d’Orsay, die Franse ministerie van Buitelandse Sake, het die Iranese ambassadeur op 29 Maart ingeroep om hul “bekommernis” oor Dudoingon uit te spreek in die lig van die Britse personeel se aanhouding.
Die navorser se paspoort is gekonfiskeer en hy bly tans by sy Iranese vrou se familie in Teheran. Hy is ook gelas om nie die stad te verlaat nie. Tydens sy inhegtenisname was hy besig om ’n Soennitiese straatoptog te verfilm in die dorpie Chah Bahar. Dudoignon doen navorsing in Parys by die CNRS (Nasionale Raad vir Wetenskaplike Navorsing) oor Islam se godsdiensvertakkinge en skole.
Die suid-ooste van Iran, in die besonder die provinsie Sistan-Baloetsjistan, word as ’n sensitiewe gebied beskou. In die afgelope aantal maande is ’n paar gewapende aanvalle geregistreer asook ’n bomaanval op ’n bus wat rewolusionêre wagte moes vervoer en 11 lewens geëis het. Die gebied word ook oorspoel deur dwelmhandelaars in die nabyheid van Pakistan en Afghanistan.
Iran beskuldig Brittanje en die VSA daarvan dat hulle onrus in die gebied probeer aanstook. Dudoignon is die tweede Franse burger wat aangehou word nadat Stéphane Lherbier 15 maande gelede op ’n vissersboot in die Golf gevang is. Hy is eers in Februarie vrygelaat te midde van internasionale spanning wat VN-spertye oor Iran se kernprogram betref.
Videogreep oor Zuma-braaivleis
Dr. Dan Roodt van PRAAG verduidelik op die KykNET-program "Wat’s die storie" waarom die braaivleis met Jacob Zuma wat verlede week plaasgevind het hom opgewonde maak.
Dan Roodt gisteraand op KykNET
Afrikaners nie meer welkom by letterkundemuseum?
Sotho-bordjie by NALN
IS blanke Afrikaners nie meer welkom by die Nasionale Afrikaanse Letterkundige Museum en Navorsingsentrum (Naln), die hartklopvan die Afrikanerdom in Bloemfontein, nie?
Wat gaan hier aan, wil lede van twee Afrikaner-organisasies weet wat nie meer toegelaat word om vergaderings hier te hou nie: die Bloemfonteinse Skrywersvereniging en Dames Perspektief.
Die bestuur van Naln het vroeër besluit om ‘n Sotho-museum by Naln in te sluit.
‘n Paar vertrekke is reeds daarvoor ingerig. Daar is ook nou ‘n bord by die hek aangebring om te sê dat hier ‘n Sotho-museum vir die Sotho’s se taal en kultuur op die been gebring word.
Van die personeellede is glo bekommerd omdat hulle gehoor het dat sommige van hulle van Naln weggeskuif gaan word.
Mnr. Stoffel Cilliers, voorsitter van die Bloemfonteinse Skrywersvereniging, sê sy vereniging het 30 jaar by Nain vergader.
Die Vrystaat-skryfkompetisie word jaarliks sedert 1979 saam met Naln aangebied en die landwye skryfkompetisie sedert 1989. Hy sê in die verlede was dit nooit nodig vir die Bloemfonteinse Skrywersvereniging om aansoek te doen om hul twee kwartaallikse vergaderings (agt per jaar) hier te hou nie.
Mnr. Otto Liebenberg, kurator van Naln, het egter gesê dat skriftelik aansoek gedoen moet word en dat hy met die aansoek ‘n voorlegging aan sy hoofde moet gaan doen.
"Ons het einde Januarie ons aansoek ingedien. Later moes ons deur Liebenberg hoor dat daar nie ‘n beleid bestaan dat organisasies hier kan vergader nie en dat ons nie langer hier sal kan vergader terwyl die restourasiewerk by Naln aan die gang is nie, omdat daar ‘n ongeluk kan gebeur en iemand kan seerkry." Ons Stad verneem egter elders personeel werk daagliks in die gebou op die plek waar die Bloemfonteinse Skrywersvereniging sy vergadering gehou het en dat daar intussen ook al vir ander instansies kans gegee is om hier te vergader.
Cilliers sê die slegte nuus was onverwags en hulle moes skielik die tweede vergadering van die Bloemfonteinse Skrywersvereniging van vanjaar by die Noorderbloem-aftreeoord hou, omdat hulle nie ‘n heenkome gehad het nie.
Lede van Dames Perspektief het vroeër teenoor Ons Stad hulle misnoeë uitgespreek omdat hulle. nie meer by Naln vergadering mag hou nie.
Hulle moes ook na die Laerskool Universitas en Bains Game Lodge vir vergaderings uitwyk.
Hulle vergader ook al jare by Naln en dieselfde redes is ook vir hulle organisasie gegee oor hoekom hulle nie daar kan vergader nie. Hulle is skepties en ook ontsteld, omdat hulle Naln koester.
Ons Stad verneem die musiekgedeelte by Naln is reeds verskuif en ‘n verskraalde vorm daarvan is behou.
Allerhande vreemde skuiwe wat plaasvind, wek die indruk dat die Afrikaner se kultuurhistoriese skatte wat hier veilig bewaar word, nou bedreig word.
Diegene wat weet wat regtig aangaan, is bang om te praat.
Voorste Afrikaner-leiers van die stad het reeds glo al begin brief skryf.
Vrae word gevra.
Almal dink nog met heimwee aan wyle prof. Petrus Nienaber, dinamiese Afrikaner-leier en voormalige hoof van Museumdienste in die Vrystaat, onder wie se voortreflike leiding die kultuur-historiese skat tot stand gebring is.
Respek vir mekaar se taal en kultuur is eintlik wat nodig is. Liebenberg (kurator) is om kommentaar gevra, maar hy het Ons Stad na mev. Rachel Sempe, hoof van die departement sport-, kuns- en kultuur waaronder die museumdienste val, verwys.
Sempe sê sy was gister die hele oggend by die LUR en het nie genoeg tyd gehad om die drie e-posse en faks met twee vrae van Ons Stad te bestudeer nie.
Sy is besig met ‘n herstruktureringsproses en het teen druktyd steeds die LUR in haar kantoor gehad. Sy sal later vir Ons Stad presies sê wat hier aan die gang is.
Sy wou ook weet waar Ons Stad aan al die inligting kom: Hoekom praat mense met die koerant en nie eers met haar nie?
Europa oortref VSA in beurswaarde
New Yorkse beurs
Vir die eerste keer sedert die Eerste Wêreldoorlog, het Europa se aandelebeurse dié van die VSA in waarde verbygesteek. Hiermee verloor die VSA sy globale oorheersing in die kapitaalmarkte wat byna ’n eeu geduur het.
Die gesamentlike waarde van Europa se 24 aandelebeurse, wat Rusland en die ontluikende Oos-Europese markte insluit, het einde verlede week tot $15 720 miljard (€11 819 miljard) gestyg, volgens Thomson Financial-data. Dit is meer as die $15 640 van die VSA.
Die styging van die euro teen die dollar, asook die groei van Oos-Europese markte soos Rusland en die groter prestasie van maatskappye in Europa sover dit winsgewendheid betref, het hierdie dekadelange gaping met die VSA laat verdwyn. Ian Hernett van Absolute Strategy Research, wat dit eerste raakgesien het, meen ons is besig om ’n “seismiese verskuiwing” in markte gade te slaan.
Die vorige keer toe Europa die VSA in terme van markkapitalisering oorheers het, was waarskynlik voor die Eerste Wêreldoorlog, sê Mike Staunton, ’n aandelebeurshistorikus by die Londense Sakeskool. Die verskuiwing vind ook in die skuldmark plaas, waar Europese aktiwiteit dié van Amerika ingehaal en in sommige gevalle verbygesteek het.
Europese aandele het beter as dié van Amerika presteer, met hul markkapitalisering wat sedert 2003 met 160 persent in dollar-terme toegeneem het, sê Thomson Financial. Dit vergelyk met ’n styging van 70,5 persent in die Amerikaanse aandelemark. Terselfdertyd het die euro 26 persent teen die dollar toegeneem.
Europa loop agter Amerika as dit kom by die indekse van markkapitalisering wat deur die FTSE en MSCI opgestel word en deur batebesturders as maatstawwe gebruik word.
Hierdie indekse ken egter ’n verminderde of geen gewig toe aan aandele wat nie vrylik verhandel nie soos die aandeelhoudings van regerings of beherende familie-aandeelhouers. Europa beskik oor meer maatskappye met dié tipe aandeelhoudings.
Hoetoe-rebelle verhoog aanvalle in die Kongo
Hoetoe-rebelle van die FDLR
Rwandese Hoetoe-rebelle het hulle aanvalle in die oostelike Demokratiese Republiek van die Kongo verhoog en het drie mense gedood en dosyne ontvoer oor die afgelope dae, volgens die VN-afvaardiging in Kinshasa.
Veertien aanvalle het verlede week in die Walungu- en Kabare-gebiede plaasgevind in strooptogte deur die FDLR (Demokratiese Magte vir die Bevryding van Rwanda), het Kemal Saiki, segsman vir die VN-afvaardiging in die DRK, gesê.
Nog 72 mense is ontvoer en verskeie gevalle van verkragting is aangemeld.
Inwoners van daardie gebiede, waar die DRK-militêre magte voorheen ontplooi is, het AFP per telefoon vertel dat die aanvalle vandeesweek voortgegaan het.
“Ons vra die owerhede om die militêre teenwoordigheid in daardie sones te versterk waar massamoorde en ontvoerings oor die afgelope dae toegeneem het,” het Oscar Zihalirwa van Walungu gesê.
Rwandese Hoetoe-vegters is sedert die middel-negentigerjare in die woud en berge van die oostelike DRK teenwoordig.
Sekere van die rebelle word daarvan beskuldig dat hulle aan die Rwandese volksmoord in 1994 deelgeneem het. Ongeveer 800 000 mense, meesal etniese Toetsi’s, is binne ses weke in Rwanda deur lede van die Hoetoe-groep in 1994 gedood.
Die internasionale gemeenskap beskou hul teenwoordigheid in die Demokratiese Republiek van die Kongo as een van die vernaamste bedreigings vir stabiliteit in die streek, hoewel hulle oor die afgelope jare deur onenigheid en drostery verswak is.
Fidelity-geldwa in Norwood beroof
’n Fidelity-geldwa is gistermiddag Woensdag 4 Maart deur ’n bende gewapende mans in Norwood, Johannesburg, van ’n onbekende som geld beroof.
Direkteur Govindsamy Mariemuthoo van die SA Polisie het gesê die bende het op die voertuig begin skiet nadat ’n Mercedes-Benz daarin vasgejaag het.
“Nog ’n gewapende groep het uit ’n BMW geklim, het ook begin skiet en het kontanthouers uit die geldwa geneem.”
Die bende het daarna in twee bakkies gevlug en hulle twee voertuie op die toneel gelos.
“Maar vier van hulle is later in hegtenis geneem, drie in Sandringham en een in die Norwood-gebied.”
Mariemuthoo wou nie sê of enige wagte in die skietery beseer is nie. Hy kon nie bevestig of die wagte die geld afgehaal of sou gaan aflewer het nie.
“Ons stel nog ondersoek in,” het hy gesê.
Derde Centurion-rower sterf
Die oorlog in die strate van Suid-Afrika het gister weer in volle geweld gewoed. In Centurion (voorheen Verwoerdburg) het sewe swaar gewapende rowers ’n Eerste Nasionale Bank in die Centurion Mall beroof, waarna ’n skietery met die polisie uitgebreek het.
Strate is op verskeie plekke afgesper en verkeersopeenhopings het tot laat geduur.
Twee van die rowers is aanvanklik doodgeskiet en ’n derde het later op pad na die Pretoriase Akademiese Hospitaal (voorheen die H.F. Verwoerd-hospitaal) beswyk. Vier ander rowers bevind hulle tans onder polisiebewaking in die hospitaal. Hulle is insgelyks gewond tydens die skietery met die polisie nie lank nadat hulle van die bank af in ’n wit Mercedes-Benz weggevlug het nie.
“Lede van die nasionale intervensie-eenheid en spesiale taakmag het ’n wit Mercedes-Benz raakgesien wat as jaagmotor gebruik is, maar toe hulle naderkom het die bende losgebrand terwyl hulle wegry,” het kaptein Dennis Adriao, nasionale segsman van die polisie, gesê.
’n Hoëspoedjaagtog deur Markstraat het gevolg, met die polisie en bende wat mekaar se vuur beantwoord.
“Maar die bende se motor is tot stilstand gebring… twee mans is doodgeskiet, die ander het op pad hospitaal toe gesterf en vier ander is gewond.”
Volgens Adriao het die polisie beslag gelê op ’n AK47 en ses ander wapens toe die rowers se motor deursoek is.
Geen van die ENB-werknemers of kliënte is in die rooftog beseer nie.Komm. André Pruis, nasionale adjunk-polisiehoof, wat die toneel van die skietery besoek het, het verklaar dat “alle suksesse uitstekend is”. Hy het die lede persoonlik geluk gewens met hul vangs.
“Ons het gesê ons gaan konsentreer op rowers en dit is presies wat ons hier gedoen het. As hulle wil roof, dan moet hulle wag en sien wat gebeur,” het hy voortgegaan.
Cholera in Vaalrivier
Cholera-bakterie?
Laboratoriumtoetse op watermonsters vanuit verskeie dele van die Vaalrivier het cholerabesmetting aangedui, het die Noordkaapse gesondheidsdepartement Dinsdag gesê.
Volgens ’n departementele segsvrou, Shelley Fielding, is cholerabesmetting gevind, “spesifiek te Barkly-wes, Spitskop, Schmidtsdrif, die Vaalhartswal in Warrenton en die Vaalhartskanaalstelsel”.
Behandelde water is egter veilig vir alle doeleindes aangesien toetse hierop se uitslag negatief vir cholera was.
“Omgewingstoestande is dus gunstig vir cholera en ander watergevoerde siektes en die publiek word gewaarsku om nie enige onbehandelde of natuurlike water van enige bron te drink nie,” het die departement verklaar.
Fielding het gesê dat mense wat langs die laer Vaalrivierstelsel woon nie in die riviere, damme en kanale behoort te swem nie, daarin vis te vang of vir watersport te gebruik nie.
Alle natuurlike water moet gesuiwer en veilig gemaak word voordat dit vir huishoudelike doeleindes en bad of swem gebruik kan word.
Cholera is ’n potensieel dodelike siekte en word oorgedra deur water uit besmette riviere, putte, tenks en kanale te drink.
Die siekte kan opgeoden word as ongesuiwerde water gebruik word om eetgerei te was, deur kos te eet wat met besmette water gewas of voorberei is, deur klere of beddegoed in besmette riviere te was, of deur swak sanitasie en persoonlike higiëne.
Volgens Fielding is dit belangrik dat mense met waterige diarree – ’n sleutelsimptoom van cholera – onmiddellik vir mediese behandeling gaan.
Argentyne vra eilande terug
Scioli en Kirchner
Argentinië het met die vyf-en-twintigste herdenking van die Falklandeilande-inval hul aanspraak daarop herbevestig. “Die Malvinas behoort aan Argentinië en sal altyd ons s’n wees”, het vise-president Daniel Scioli by die geleentheid gesê, terwyl hy die eilandgroep se Spaanse naam gebruik het.
Mnr. Scioli het in die suidelike stad Ushuaia gepraat by een van die geleenthede ter herdenking van die uitbreek van die oorlog. Hy het Brittanje gevra om samesprekinge oor die soewereiniteit van die eilande te hervat. Argentinië se aanspraak dateer van 1833.
In die Verenigde Koninkryk het Tony Blair egter oud-stryders van die Scots Guards en Royal Navy met kentekens en sertifikate beloon vir hul “moed en professionalisme”.
Meer as 900 mense is gedood in die oorlog wat 74 dae geduur het, waaronder drie eilandbewoners, 255 Britte en 655 Argentyne. Die Britte het, ná seegevegte, weer die beheer van Stanley, die hoofstad, op 14 Junie kon oorneem.
President Nestor Kirchner het nie die vieringe in die suide bygewoon nie. Een inwoner het tydens die verrrigtinge op ’n heuwel geklim met ’n Argentynse vlag en nadat hy die eilande in die grond geteken het met die woorde “Ons sal terugkom” daarby.
Jorge Chevalier, hoof van die Staande Mag, het die vise-president se belofte dat die terugname sonder geweld sal geskied, beaam. “Daar het al reeds te veel bloed gevloei en dit moet nie herhaal word nie,” het hy aan veterane gesê.
Margaret Thatcher, wat verantwoordelik was vir die besluit om Britse troepe te stuur, het ’n private seremonie in die Sint Paulus-katedraal bygewoon om die oorwinning oor Argentinië te herdenk.
Argentinië het verlede week ’n olie- en gaseksplorasieverdrag met Brittanje eensydig as nietig verklaar. Dié uitsprake kom te midde van hernieude spanning tussen die twee lande.
Meer moeilikheid in Mogadisjoe (met videogreep)
Rook oor Mogadisjoe
Honderde Ethiopiese soldate het gister Mogadisjoe, hoofstad van Somalië, binnegestroom. Dit volg op vier dae van hewige gevegte met Moslem-rebelle waarin honderde mense dood is en duisende ander gevlug het. Water- en kostekorte dra tot die burgerlike bevolking se ellende by.
Die afgelope paar dae se konflik was die ergste wat Mogadisjoe die afgelope vyftien jaar beleef het. ’n Ethiopiese aanslag verlede week teen vegters van die Moslem-beweging (wat in Desember verdryf is) het tot die hernieude geweld aanleiding gegee.
Volgens ooggetuies is die strate in die Somaliese hoofstad vol ontbindende lyke en baie inwoners het hulle huise inderhaas ontruim. Die Verenigde Nasies se vlugtelingagentskap meen dat sowat 10 000 mense Mogadisjoe die afgelope paar dae verlaat het, wat die aantal vlugtelinge sedert Februarie vanjaar op 100 000 te staan bring.
Ethiopiese troepe staan die Somaliese regering tans by om van Moslem-vegters uit die suide en sentrale gedeeltes van Somalië ontslae te raak. Daar word vermoed dat die Moslem-rebelle bande met Al-Kaida het. Die Ethiopiese soldate is veronderstel om met ’n vredesmag van die Afrika-unie (AU)vervang te word. Tot dusver het die AU egter net daarin geslaag om sowat 1 500 Oegandese soldate na Somalië te stuur. Suid-Afrika het aangekondig dat die land weens beperkte kapasiteit nie tot die vredesmag kan bydra nie.
Ethiopië se aartsvyand, Eritrea, het Oeganda intussen gewaarsku om sy vredestroepe aan Somalië te onttrek en gewaarsku dat daar ”ernstige gevolge“ gaan wees as Oegandese soldate nie onmiddellik die land verlaat nie.
Nadine Gordimer deur die Franse vereer
Gordimer
Die Nobelpryswenner, Nadine Gordimer, het Saterdag die Legioen van Eer-toekenning van die Franse regering ontvang. Dit het plaasgevind tydens ’n funksie by die Pretoria-woning van Denis Pietton, die Franse ambassadeur in Suid-Afrika.
Volgens Pietton wou die Franse regering op hierdie manier ”’n groot skrywer vereer.“
”Deur u ’n Offisier van die Legioen van Eer te maak, wil ons ook hulde bring aan ’n simboliese figuur van die stryd teen apartheid, daardie absurde en verskriklike stelsel wat op ’n onrealistiese wyse gepoog het om rasse te skei.“ Volgens hom is Gordimer se werk ’n bewys van ”die triomf van menslike emosies oor wettige segregasie.“
Gordimer is tans 83 jaar oud. Sy het in 1991 die Nobelprys vir letterkunde ontvang. Verskeie van haar boeke is destyds deur die Nasionale Party-regering verban.
Volgens die skrywer is sy ”oorweldig“ deur die eer. Sy het oor haar voorliefde vir Franse letterkunde gepraat en Marcel Proust en Jean-Paul Sartre in hierdie verband uitgesonder. ”Ek ontvang die toekenning met dankbaarheid en nederigheid,“ het sy gesê.
André Brink, Miriam Makeba, Desmond Tutu en Kader Asmal is ander Suid-Afrikaners aan wie die Legioen van Eer al toegeken is.
Gordimer is bekend vir romans soos July’s People en The Conservationist. Haar jongste boek, Get a Life, is verlede jaar met gemengde reaksie begroet. Later vanjaar verskyn ’n kortverhaalbundel van haar getiteld Beethoven was One Sixteenth Black.
Sy was in Oktober 2006 in die nuus toe sy in haar Johannesburg-woning deur rowers oorval, beroof en in ’n besemkas toegesluit is.