Windhoek – Bladsy 2 – praag.co.za

Lyke in Windhoekse hospitaalsaal gelaat

Die lyke van twee pasiënte wat tydens hul opname in Saal 4 Wes in die Windhoek Sentrale Hospitaal op dieselfde dag gesterf het, is glo vir ure daarna steeds in hul onderskeie kamers tussen ander pasiënte gelaat, voordat die liggame verwyder is.

Volgens ’n voormalige pasiënt is gordyne glo bloot rondom die oorledenes se beddens getrek om dit af te skort, het die Republikein berig.

Die swart personeel se verweer was dat daar eenvoudig geen ander of nog plek is waar die lyke tydelik gestoor kan word, totdat ’n dokter die doodsertifikate kan uitreik en dit verwyder kan word nie.

Die voormalige pasiënt moes self die eerste twee aande van haar opname in die saal saam met agt ander vroue in die gang slaap, omdat kamers tot oorlopens toe vol was. Ook hier het matrasse met pasiënte gelê.

Toe sy uiteindelik na ’n kamer oorgeplaas het, het sy dit gedeel met ’n pasiënt wat in ’n koma was.

“Ons was drie in die kamer, ek op die bed, nog een wat op die vloer gelê het en die pasiënt wat in ’n koma was”.
Later sou een van die personeel aan haar sê dat die pasiënt in die koma die middag beswyk het. Haar lyk was egter nie verwyder nie.

“Ons het gaan kyk en daar lê sy tussen die ander pasiënte, die gordyne is net om die bed toegetrek. Toe ek vra hoekom, toe sê ’n verpleegster ‘jy kan mos sien die hospitaal is vol, daar is geen ander plek om haar te sit nie’”.

Op dieselfde dag het ’n ander pasiënt gesterf wat ook in ’n koma in Saal 4 Wes was. Ook dié pasiënt het glo tot omstreeks 22:00 tussen ander pasiënte gelê totdat ’n dokter die doodsertifikate kon onderteken en die lyke verwyder kon word.

Volgens die voormalige pasiënt is die stank ook ondraaglik.

“Terwyl die koma-pasiënt nog by my in die kamer was, het sy al geruik. Elke keer as jy in die kamer instap, dan ruik jy dit. Ek kon nie eet nie, ons het maar met die vensters oop geslaap”.

Sy het gebid dat sy nooit weer hoef terug te gaan nie. Want hier, sê sy “gaan jy op jou twee voete in en kom jy op jou rug uit”.

“Ek het vir die Here gevra ek wil nooit weer soontoe gaan nie. Ek sterf eerder by die huis as om weer in daardie hospitaal te beland. Ek kry die volgende pasiënt wat daar moet lê, baie jammer.”

Volgens haar moes sy voor haar voorafgereëlde opname in Saal vier Wes eers vir toetse en X-strale na die Katutura-staatshospitaal gaan, voordat sy uiteindelik laat die aand in die Windhoek Sentrale Hospitaal opgeneem is. Sy sou ook eers drie dae wag om ’n dokter te sien, haar lêer was weg en is sy nooit amptelik opgeneem nie. Pasiënte moes mekaar maar help en ondersteun.

Wit toeriste neem foto’s ‘asof van bobbejane’

“Toeriste koop nie kapana nie. Hulle neem liewer net foto’s asof ons bobbejane is,” kla die 27-jarige mnr. Jonas Ndakolute wat vir die afgelope agt jaar vleis in Windhoek verkoop.

Kapana is gebraaide vleis van pasgeslagde beeste vir die swart mark.

Ndakolute en ’n ander paar vleissmouse koop hul vleis by plaasboere op naburige plase en verkoop dit dan by die Enkelkwartiere in Katutura in Windhoek, skryf die Republikein.

Volgens hom maak hy gewoonlik meer as N$300 wins per dag, maar gedurende die Kerstyd is hy gelukkig as hy N$100 ’n dag kan verdien.

“Buitelanders koop nie by ons nie, behalwe die Angolese wat reeds kapana ken. Die Europese toeriste kla gewoonlik dat die vleis ongesond is en trek hul neuse op. Namibiërs kla weer te veel oor pryse,” skerts hy en wys na ’n kliënt wat besig is om te kla dat drie stukke beesvleis te min is vir N$25.

’n Ander vleishandelaar, mnr. Alfons Shaalukeni (27), vertel voorts dat hulle groot skade tydens die warm vakansiemaande ly.

“As dit so warm is soos nou in Desember, dan moet ons soms ons vleis weggooi, want die hitte maak dit gou sleg,” vertel hy.

‘Regstellende herposisionering van grond’

Julius Malema en sy hordes is nie alleen nie. Die Swapo Jeugliga se geskorste mnr. Job Amupanda het pas aangekondig hy wil grond gryp.

Amupanda wil volgende Vrydag 2 000 aansoeke vir erwe in “die elite buurt” Kleine Kuppe by die Windhoek munisipaliteit indien.

Hy het ‘n beroep op grondlose Namibiërs gedoen om by dié aksie betrokke te raak.

Die munisipaliteit sal agt maande tyd gegun word om die aansoeke af te handel.

Indien hulle nie gehoor gee nie, sal oorgegaan word tot “regstellende herposisionering” van grond in “ryk en gegoede” voorstede soos Kleine Kuppe, Avis, Eros, Auasblick en Klein-Windhoek, sê Amupanda in ‘n verklaring wat vanoggend uitgereik is.

Politieke ontleders is egter dit eens dat mnr. Job Amupanda se skielike bedanking uit die Swapo Jeugliga (SPYL) se nasionale uitvoerende komitee, nie die regerende party se politieke planne op die vooraand van die verkiesing gaan verongeluk nie, het die Republikein berig.

Amupanda, voorheen die jeugliga se sekretaris van inligting, publisiteit en mobilisasie, het bedank. Dié stap volg ná hy eergisteraand met mnr. Nangolo Mbumba, sekretaris-generaal van Swapo, en dr. Elijah Ngurare, leier van die SPYL, asook ander lede van die regerende party, vergader het.

Amupanda het sedert Sondag die tonge laat klap toe hy onwettig ‘n erf in Kleine Kuppe in Windhoek afgesteek het. Dié stap het hy “regstellende herposisionering” gedoop.

Hy gaan homself nie langer ten gunste van lede van die Swapo-party verloën nie, het Amupanda gisteroggend in ‘n verklaring gesê.

Hy het ook uitgevaar teen Swapo-lede wat volgens hom die kluts kwyt is. Amupanda sê hy is nie bereid om soos ’n eerbiedige dienskneg die vrede te bewaar met die hoop dat hy daarvoor vergoed sal word nie.

Pogings is aangewend om hom sover te kry om sy siel te verkoop en na ander se pype te dans, onreëlmatighede mis te kyk, net handjies te klap en liedjies te sing, sê hy.

“Dít kan ek nie toelaat nie. Ek weier om die ander wang te draai soos wat die Bybel ons geleer het. Die situasie het onuithoudbaar geword, soveel so dat die nasionale uitvoerende komitee (van SPYL) iets heeltemal anders geword het as wat ons gedink het,” sê hy.

Amupanda bly egter aan as lid van die sentrale komitee, maar gaan hom voortaan op aktivistiese veldtogte toespits en meer tyd in die nedersettings en landelike gebiede deurbring.

“Ek gaan nou hoofsaaklik op regstellende herposisionering konsentreer en die jeug mobiliseer sodat ons leiers besef hoe ernstig die grondkwessie is en dat oplossings gevind moet word voordat dit te laat is,” se Amupanda.

Op sosiale media het die nuus van Amupanda se bedanking soos ’n veldbrand versprei. Daar is kwaai gegis dat hy gedwing is om van sy posisie afstand te doen.

Mbumba het dit ten sterkste ontken. Slegs “Swapo-kwessies” is tydens Dinsdagaand se vergadering bespreek, het hy gesê.

Intussen meen die politieke ontleder, mnr. Graham Hopwood, dat Amupanda se bedanking geen impak op Swapo se ondersteuners gaan hê nie, aangesien hy steeds deel van die party bly.

“Miskien as hy uit die party bedank en ’n beroep op sy ondersteuners gedoen het om níé die party te steun nie, sou dit ietwat van ’n verskil gemaak het,” het Hopwood gesê.

Hopwood sê die lojaliteit teenoor Swapo lê baie diep en dat stemme nie maklik na ’n ander party geskuif kan word nie. Kiesers gaan ook nie sommer níé aan die verkiesing deelneem nie.

Prof. Bill Lindeke, nog ‘n politieke kenner, sê Amupanda se bedanking is buitengewoon, veral in Swapo. Dit het hom egter ook nie heeltemal verras nie.

“Amupanda het homself meer as een keer in konflik geplaas en is waarskynlik gevra om te bedank, aangesien hy die party onder verdenking geplaas het. Wat ons nou wil sien, is hoe ver is hy bereid om te gaan,” sê Lindeke.

Jong ma ernstig deur G4S-wag aangerand

’n Ma van twee jong kinders moes weens angs gehospitaliseer word ná sy verlede week na bewering voor FNB se tak in Windhoek-Wes deur ’n sekuriteitswag van G4S aangerand is.

Me. Esté Swarts (35) het gister aan Republikein vertel sy is ná ’n stryery oor parkering met vier wagte van dié sekuriteitsmaatskappy deur die een wag met die vuis in die gesig geslaan. Sy het op die grond geval en vir ’n oomblik haar bewussyn verloor.

Sy beweer ook die wag wat agter die stuur van G4S se voertuig was wat ’n kontantaflewering by dié tak moes doen, het probeer om haar om te ry.

Volgens Swarts het ’n polisieman in siviele drag die vermeende aanval aanskou en dit selfs met sy selfoon op video vasgelê. Sy en haar man, Pieter, het daarna ’n klag van poging tot moord, alternatiewelik aanranding met die opset om ernstig te beseer, by die polisie ingedien.

Die Swarts-egpaar, wat as sendelinge in Suid-Afrika gewerk het en onlangs na Namibië teruggekeer het, het intussen met die hulp van FNB die CCTV-videomateriaal bekom waarin dele van die onderonsie gesien kan word.

Sy vertel sy het verlede Maandagoggend drie keer om die blok gery om parkering te kry sodat sy vinnig ’n dokument by dié tak kon aflewer. Uiteindelik het ’n kombi uit ’n parkeerplek reg voor die tak gery en sy het haar voertuig daar geparkeer.

Die volgende oomblik het ’n afleweringsvoertuig van G4S reg agter haar stilgehou met twee sekuriteitswagte daarin. “Hulle het vir my geskree ek parkeer op ’n laaisone Ek het gesê ek wil net inhardloop en die dokument afgee. Hulle het vir my gesê hulle sal seker maak ek sal nie vandag hier wegry nie. Ek het toe gesê hulle moet my wiele klamp of ander protokol volg, maar hulle moet my net nie dreig nie.”

Uiteindelik is sy na binne, waar twee ander wagte van dieselfde maatskappy glo die dreigemente voortgesit het. Swarts sê sy het weer verduidelik sy kom net iets afgee.

Hulle het haar aangesê om die aanmeldingsregister te teken en sy het toe net haar naam neergeskryf omdat sy bang was om haar selfoonnommer en ander besonderhede te gee.

Uiteindelik het die FNB-werknemer by wie sy die dokument moes afgee, sy opwagting gemaak. “Ek was getraumatiseer. Ek het vir hom gevra om saam met my uit te stap.”

Die voertuig was steeds reg agter haar voertuig geparkeer. Die bestuurder het bly sit toe sy uitkom, maar sy passasier het uitgeklim. Swarts sê sy het in haar voertuig geklim om weg te ry toe die G4S-voertuig agteruit gery het om vir haar plek te maak, toe sy sien die ander wag neem foto’s van haar en haar voertuig.

Sy het stilgehou en weer uitgeklim om hom te vra waarom hy dit doen. Die volgende oomblik het die bestuurder van die G4S-voertuig probeer om haar om te ry, maar sy kon gelukkig vinnig genoeg uit sy pad spring.

Swarts sê sy het die ander man gevra wat sy naam is. “Ek het nader gestap om ’n foto van sy identiteitskaart op sy lapel te neem en het vir hom gesê ek is nie hul slaansak nie.”

Die volgende oomblik het die man haar aan beide skouers gegryp. “Ek het hom twee keer teen sy skouer geslaan en toe ek my arms laat sak, het die vuishou my teen die gesig getref.”

Mnr. Dries Kannemeyer, besturende direkteur van G4S, het die voorval by navraag bevestig en gesê mnr. Henock Ananias, die wag, het op sy beurt ’n klag van aanranding teen Swarts ingedien.

Op ’n vraag of die wag steeds in diens is en of G4S ’n tugondersoek teen hom aanhangig gemaak het, het hy geantwoord: “Natuurlik is hy in diens. Wat het hy verkeerd gedoen?”

Kannemeyer sê Swarts het die wagte wat geld moes gaan aflewer, verhinder om hul werk te doen. “Hulle sit met geld wat afgelewer moet word en pleks dat sy net wegry, neem sy foto’s van ons wagte in uniform.”

Op die vraag of hy bewus is daarvan dat Swarts geval en haar bewussyn verloor het, het hy geantwoord: “Not te dêm . . . ek dra geen kennis daarvan nie.”

Volgens hom het hy wel foto’s gesien van hoe sy ná die beweerde aanranding gelyk het, “want sy het dit oral op Facebook geplaas”.

Klaar met Afrika

Dit was hul tweede besoek aan Namibië, ’n wonderlike land wat hulle vertrou het. Maar nou is hulle klaar met Afrika. Hulle gaan ook hul vriende aanraai om weg te bly.

So het die egpaar Josef en Johanna Stapfler Vrydag aan die Republikein gesê voordat hulle drie dae ná hul aankoms in Namibië weer op ’n vliegtuig terug na Frankfurt was. Die Stapflers was die vorige middag by Omaruru se Franke-toring die slagoffers van ’n man wat asof van nêrens verskyn het, hulle afgedreig en hulle toe liederlik aangerand het.

Ná hul aankoms in Windhoek het die egpaar in hul gehuurde motor een aand in ’n lodge net suid van Karibib geslaap. Donderdagaand het hulle soos bespreek in ’n bergherberg wes van Omaruru geslaap nadat hulle die vorige dag aangerand is. Vrydag was dit vir hulle terug Windhoek en huis toe. Hul Namibiese toer van 18 dae wat hulle ook na Damaraland en die Zambezistreek sou bring, het net drie dae geduur.

Die egpaar in hul vroeë veertigerjare was ontnugter en teleurgesteld.
Na behandeling in die staatshospitaal op Omaruru het die Stapflers self vertel wat Donderdagmiddag net voor die etensuur by Omaruru se Franke-toring met hulle gebeur het. Hulle wou die Franke-toring as ’n historiese erfenisbaken besoek. Daar gekom, was die deur gesluit.

Hulle was reeds terug by hul gehuurde voertuig toe hul aanvaller langs hul kar uitgeslaan het.

Die man het beduie dat hy honger was en geld of enigiets anders soek. In daardie stadium was Johanna se sak met hul kosbare reisgoed nog om haar nek. Sonder enige argument het die man haar sak gegryp en het ’n struweling ontstaan. Die volgende oomblik het die man haar met ’n harde voorwerp oor die kop geslaan. In sy een hand was ’n kannetjie. Johanna het gemeen dit kon die een of ander spreimiddel bevat en het vir haar oë gekeer. Toe Josef bygekom het, het hy ’n hou in sy ribbes gekry. Hy was nogtans sterk genoeg om op straat hulp te soek terwyl sy bebloed by hul voertuig gestaan het.

Oor hul skielike huis toe gaan was die egpaar dit eens: “Ons wil nie meer hier wees nie”.

In die sak waarmee hul aanvaller die hasepad gekies het, was allerlei kaarte van die egpaar, sowat tweehonderd euro en ’n klompie Namibiese dollars. Behalwe die sak en die inhoud daarvan is ander goed nie uit die gehuurde motor gesteel nie.

Namibië binnekort stembus toe

Namibiërs gaan op 28 November vanjaar stembus toe om vir lede van die Nasionale Vergadering en ’n nuwe president te stem.

Anders as in vorige jare, sal die verkiesings vanjaar net op een dag plaasvind en nie soos in die verlede oor twee dae nie. Die kwessie van twee stemdae was in die verlede ’n steen des aanstoots vir opposisiepartye wat aangevoer het dat dit ’n skuiwergat vir verkiesingskullery geskep het.

Die proklamasie van die verkiesingsdatum sal op 13 Oktober plaasvind wanneer dit deur pres. Hifikepunye Pohamba in die Staatskoerant gepubliseer sal word.

Namibiërs wat hulle in die buiteland bevind, kan op 14 November by Namibië se ambassades en hoë kommissariate stem. Dieselfde datum is geoormerk vir seevarende personeel wat dan op Lüderitz en Walvisbaai hul stemme kan uitbring.

Aanvanklik is voorstelle deur hoofsaaklik die Rally for Democracy and Progress (RDP) gemaak dat die verkiesings eerder in Februarie aanstaande jaar moes plaasvind.

Die RDP voer aan die eerste demokratiese verkiesing wat in Namibië gehou is, het in November 1989 plaasgevind. Dit was voor ’n datum vir onafhanklikwording vasgestel is. Destyds moes ’n grondwet geskryf word, nasionale simbole soos die landsvlag en volkslied aanvaar word en voorbereidings vir onafhanklikwording getref word.

Sedertdien is verkiesings tradisioneel altyd in November gehou, met die nuwe Nasionale Vergadering wat eers op 21 Maart die daaropvolgende jaar diens aanvaar en ingesweer word.

Dit bring volgens die RDP mee dat die land vir byna vier maande lamgelê word omdat ampstermyne voortsleep, maar almal weet nuwe NV-lede en ’n nuwe president is reeds verkies.

Die nominasieproses vir presidentskandidate en die indien van partylyste begin op 13 Oktober en duur tot 29 Oktober.

Op Woensdag 29 Oktober sal die voorsitter van die verkiesingskommissie ’n openbare sitting by die ECN se hoofkantoor in Van Rhijnstraat, Windhoek-Noord, hou waar die nominasies ontvang sal word. Die sitting sal van 09:00 tot 11:00 duur.

Nóg nuus van die verkiesingskommissie is dat tussenverkiesings vir die Endola-kiesafdeling op 7 November sal plaasvind en dié in Windhoek-Wes op 14 November.

Die verkiesingskommissie is ook besig met reëlings vir die akkreditasie van buitelandse en plaaslike verkiesingswaarnemers.

Ná afloop van die bykomende registrasieproses is die voorlopige kiesersregister na al 121 kiesafdelings gestuur waar dit van 1 tot 3 Oktober vir inspeksie en besigtiging beskikbaar sal wees. Die finale kiesersregister sal op 7 November in die Staatskoerant gepubliseer word.

Bron: Die Republikein

‘Struggle kids’ oorval polisiestasie om gevangene te bevry

Sowat 20 “struggle kids” het Vrydagaand by die Katutura-polisiekantoor in Windhoek ingebreek en een van hul lede uit die selle bevry, het Die Republikein berig.

Dít volg nadat dié jeugdiges wat agter die tralies gesit het, vroeër deur die polisie in hegtenis geneem was omdat hy glo iemand se voertuigruit uitgeslaan het.

Die voorval het om 00:00 plaasgevind toe die strydjeugdiges by die kantoor aangekom het, die diefwering wat die beamptes van die publiek skei, afgebreek het en ingegaan en die gevangene vrygelaat het.

Nampol se spesiale veldmag het Saterdag om 08:00 die ‘struggle kids’ se kamp binnegegaan en vyf van hulle, insluitend die gevangene, in hegtenis geneem.

Die woordvoerder van die polisie, adj.komm. Edwin Kanguatjivi, het die voorvalle Maandag tydens die weeklikse misdaadkonferensie bevestig.

Kanguatjivi sê in die uur wat die strydjeugdiges by die polisiekantoor ingebreek het, is daar gewoonlik sowat twee tot drie polisiebeamptes wat elke kantoor beman.

“Die beamptes was moontlik deur die groot groep oorweldig. Dit kan wees dat die beamptes hul samewerking moes gee om die gevangene te bevry, weens die gevaar waarin hulle en die publiek in daardie stadium kon verkeer het,” het hy gesê.

Aardbewing skud Windhoek

Die skudding en vibrasies wat Dinsdag omstreeks 03:52 deur Namibiërs gevoel is, is niks meer as ’n gewone geologiese gebeurtenis nie.

Volgens ’n mediaverklaring wat gister deur die direktoraat van geologiese opname uitgereik is, is ’n lesing van die skudding slegs by sy stasie op Windhoek geneem.

“’n Aardskudding van onbekende grootte is by die direktoraat se Windhoek-stasie aangeteken. Die skudding is slegs deur hierdie stasie opgeneem en ontleding van die beskikbare inligting dui daarop dat dit tussen 15 en 20 sekondes geduur het,” het dr. Gabi Schneider van die direktoraat in die verklaring gesê.

Volgens haar kon die grootte van die skudding nie vasgestel word nie, omdat dit slegs deur een stasie opgeneem is.

“’n Minimum van drie stasies is nodig om die ligging, diepte en grootte van ’n skudding te bepaal. Die seismiese aktiwiteit wat op ander stasies in die land aangeteken is, stem nie ooreen met die lesing wat deur die stasie in Windhoek geneem is nie. Dít maak dit moeilik om die voorval te ontleed. In hierdie stadium is dit dus ons afleiding dat die gebeurtenis slegs plaaslik was,” lui die verklaring.

Schneider het Dinsdagmiddag reeds teenoor Republikein bevestig die direktoraat se seismometers het die gebeurtenis opgeneem. Volgens haar was geofisici toe al besig om die ligging van die episentrum en die omvang van die skudding te probeer bepaal.

Sy het in die verklaring gevra lede van die publiek moet die direktoraat by 061 284 8142 of 061 284 8144 kontak, sodat die direktoraat so gou as moontlik ’n verduideliking van die skudding kan kry.

“Ons het volledige inligting nodig oor die plekke en tyd waar die publiek die skudding ervaar het. Dit sal die direktoraat in staat stel om die gebeurtenis verder te bestudeer en mettertyd ’n redelike verduideliking oor die oorsaak van die skudding te gee,” lui die verklaring.

Volgens Schneider is die voorkoms van aardbewings in Namibië nie algemeen nie en is die land se seismiese aktiwiteite laag.

“Effe en ligte skuddings is normaal en dit dui aan dat energie deur die aarde se kors vrygelaat word. Die sterkte van hierdie skuddings is egter baie laag en sal veel hoër moet wees om enige skade aan strukture aan te rig,” het sy gesê.

Nampol skiet ‘struggle kid’ dood

Een van die slagoffers van die skermutseling tussen die polisie en die ‘Struggle Kids’ by Swapo se hoofkantoor in Windhoek, het dood onder ‘n goue kombers langs die pad gelê Woensdagoggend.

Die jong vrou is tydens ‘n skermutseling tussen die polisie en betogers in Windhoek in Namibië doodgeskiet, waar politieke geweld nie dikwels voorkom nie.

Twee polisiebeamptes is glo ernstig beseer tydens die betoging voor die hoofkwartier van die land se regerende party, volgens sekere bronne. Die Republikein het egter berig dat drie lede van die polisie, Nampol, gewond is.

Die 26-jarige Frieda Ndatipo was een van die sogenaamde kinders van vryheidsvegters wat werkgeleenthede van die regering eis.

Polisiebeamptes sê die betogers het stokke, klippe en vuurwapens by hulle gehad, maar die betogers ontken dit.

Die eerste minister Hage Geinob het Ndatipo se dood as ‘n tragiese en ongelukkige gebeurtenis bestempel.

Volgens inligting het die ‘Struggle Kids’ die een kant van die pad beset, terwyl die polisie die ander kant bewaak het.

Die ‘Struggle Kids’ het eers die aftog by Swapo se hoofkantoor geblaas nadat die weermag se hulp ook ingeroep is.

Namibië se ekonomiese vryheidsvegters kry bestand

Namibië se Verkiesingskommissie het die registrasie van die Namibiese Ekonomiese Vryheidsvegters as ‘n politieke party goedgekeur.

Julius Malema se EFF het dus ‘n amptelike susterparty in Namibië. Die Namibië Ekonomiese Vryheidsvegters (NEFF) is ‘n “radikale linkse”, anti-kapitalistiese en anti-imperialistiese beweging, het die sakeman en politikus Epafras Mukwiilongo vroeër gesê.

Mukwiilongo, “bevelvoerder” van die NEFF het gesê die nuwe party sal meeding in die nasionale verkiesings in Desember.

Namibië se Mukwiilongo was voorheen ‘n lid van beide die regerende Swapo en die opposisie Congress of Democrats.

Hy en sy adjunk, voormalige opposisie-jeugleier Kalimbo Iipumbu, het reeds gesprekke met Malema gevoer.

Die twee mans dra ook rooi uitrustings en rooi barette soortgelyk aan dié van die EFF, maar met ‘n NEFF-logo.

Mukwiilongo het gesê die skepping van die NEFF is die “geboorte van ‘n reus” wat veg vir ekonomiese vryheid en het die Swapo-regering van “kapitalistiese belange” ten koste van sy burgers beskuldig.

“Ons regering is besig om deur die bemagtiging van die Chinese en Indiërs plaaslike sakelui te vernietig,” het Mukwiilongo vroeër aan AFP gesê.

“Ons is ‘n baie ryk land wat kan sorg vir homself as die regering industrialisering en die verwerking van ons minerale in Namibië verseker,” het Mukwiilongo gesê.

Mukwiilongo gesê sy party sal ook homoseksualiteit teiken met befondsing uit Uganda.

“Vandag manipuleer/beïnvloed die imperialiste ons nasie deur homoseksuele praktyke,” het Mukwiilongo gesê.

“Die NEFF is verbind tot die vereniging van alle Namibiërs om hierdie bose praktyk uit te roei.”

Die M&G het intussen berig dat net ‘n handjievol regeringsamptenare van Swapo wat saamwerk met onder meer Kanadese maatskappye uit die olievonds aan die kus baat.