Nuus oor die wêreld buite Suider-Afrika
Brittanje se voorste geneesheer belas met openbare gesondheid het die gebrek aan ‘n entstof teen die Ebolavirus geblameer op die “morele bankrotskap” van die farmaseutiese bedryf.
Professor John Ashton sê hulle wil nie belê in die siekte nie, want dit het tot dusver net swart mense geraak in Afrika, ten spyte van honderde sterftes.
Lees verder.
Internasionale kenners sal probeer om Vrydag by die wrakstukke van vlug MH17 te begin werk, terwyl die Oekraïense magte alles in hul vermoë doen om die toneel onbegaanbaar te maak.
Kiëf het hul offensief teen selfverdedigingsgroepe hervat nadat ‘n een-dag-stilstand vroeër aangekondig is.
Die internasionale ondersoek na die ramp in Oos-Oekraïne het Donderdag hervat toe kundiges die ongelukstoneel bereik het vir die eerste keer in byna ‘n week na Kiëf ‘n einde aan sy militêre offensief aangekondig het.
‘n Klein span van Nederlandse en Australiese kenners vergesel deur internasionale monitors kon deurgang verkry.
Die hoof van die Nederlandse span wat die Maleisiese vliegtuigramp in die Oekraïene ondersoek, het bevestig dat sy groepe bykomende DNS-monsters geneem het van die 25 slagoffers wat nog in ‘n lykshuis in Donetsk is.
Pieter-Jaap Aalbersberg sê sy span het ook die persoonlike besittings van die slagoffers in die lykshuis opgespoor.
Die oorskot van sowat 200 slagoffers is verlede maand Nederland toe geneem om geïdentifiseer te word. Die oorskot van 80 ander slagoffers is steeds op die ramptoneel.
Gevegte tussen selfverdedigingsgroepe en soldate in die Donetsk en Luhansk gebied, maak die gebied steeds gevaarlik.
“Die veiligheidsituasie is nog steeds baie onstabiel,” het Aalbersberg aan joernaliste gesê in Kiëf.
‘n AFP-span wat ‘n paar minute agter die konvooi gery het, het harde ontploffings net ‘n paar kilometer weg van die rampterrein gehoor en swart rook sien opstyg uit ‘n dorp naby die plek waar ‘n paar van die vliegtuigwrakstukke lê.
Dié aanvalle kom ten spyte van die Oekraïense weermag se vroeëre aangekondig van ‘n “dag van rus” oor die hele oostelike gebied na ‘n pleidooi van VN-hoof Ban Ki-moon om op aanvalle te staak waar die oorblyfsels van ‘n paar van die 298 slagoffers steeds in die son lê.
Kiëf het selfverdigingsgroepe blameer vir die vertraging van die ondersoek, omdat “insurgente” steeds “in hul stellings” oor die hele streek is.
Hoe langer die ongelukstoneel egter onbereikbaar bly, hoe minder getuienis sal daar beskikbaar wees wat die oorsake van die ramp sal kan bevestig.
Kiëf het ‘n oorlog teen sy eie inwoners verklaar uit vrees dat hulle mbv ‘n vreedsame referendum kan afstig soos in die Krim. Meer as ‘n 1000 mense het reeds omgekom.
Die selfverdedigingsgroepe het in reaksie gesê dat die Oekraïne nie sy wapenstilstand eerbiedig nie.
Die VSA hou vol dat die vliegtuig per ongeluk afgeskiet is deur “rebelle” op 17 Julie, maar Rusland en selfverdedigingsgroepe het gesê dit kon uit die lug geskiet gewees het deur ‘n Oekraïense vliegtuig. Hulle het gevra dat die VSA, Kiëf se borge, alle beskikbare inligting vrystel om die kwessie te help besleg.
Den Haag en Canberra het beide ooreenkomste aangegaan met die junta in Kiëf om sowat 950 gewapende personeel te ontplooi, maar Australië het intussen teruggekrabbel en by monde van hul minister van buitelandse sake gesê dit was slegs ‘n “versekeringspolis” en hulle wil nie by die konflik betrokke raak nie.
Intussen het wetgewers in Brittanje gewaarsku dat NAVO hul gereedheid vir ‘n militêre aanval teen Rusland verder moet opskerp.
Met die internasionale klimaat wat al swaarder op Israel en die VSA weeg weens hul voortgesette aanvalle in die besette Gasa-gebied, het die twee strydende partye ingestem tot ‘n “humanitêre” skietstilstand.
Israel en die VSA wou egter nie aan dieselfde tafel van aangesig tot aangesig teenoor Hamas sit nie. Die ooreenkoms is deur bemiddelaars gesluit.
Dié skietstaking van 72-uur sal om agtuur Vrydagoggend in werking tree. Gasa se water en elekrtisiteit sal tot ‘n minimum herstel word en familielede ‘n kans gun om hul dooies te begrawe.
Onderhandelaars aan beide kante sal steeds in Kaïro in Egipte vergader om glo ‘n langtermyn-oplossing vir die geweld te probeer vind, maar die kanse vir vrede lyk skraal.
Amerika het binne ure nadat Israel ‘n VN-skool aangeval het, nog wapens aan Irsael gelewer.
Kerry het voorts gesê dat Israelse magte intussen in Gasa sal aanbly en steeds sy “defensiewe” operasies mag voortsit ten opsigte van die vernietiging van tonnels waardeur wapens na Israel gesmokkel word.
Die Amerikaanse Minister van Buitelandse Sake, John Kerry en die sekretaris-generaal van die Verenigde Nasies, Ban Ki-Moon het die skietstaking in ‘n gesamentlike verklaring bekendgemaak.
Kort voordat die jongste skietstaking aangekondig is, is nog 14 Palestyne dood in ‘n grond- en lugaanval in die Gasagebied.
Die Israelse weermag sê vyf van sy soldate is ook dood in ‘n mortieraanval naby die grens met Gasa.
Brittanje het Donderdag skielik die ondersoek na die dood van die voormalige Russiese agent Alexander Litwinenko heropen. Dit kom agt jaar nadat hy vergiftig is met radioaktiewe polonium.
Die Britse minister van binnelandse sake, Theresa May, bevind haarself tans midde-in ‘n groot pedofilietoesmeerskandaal waarby top-leiers van haar Konserwatiewe Party en die koninklike gesin glo betrokke is.
Prins Philip se voormalige persoonlike assistent is Woensdag aangekla dat hy ‘n kind seksueel misbruik het terwyl hy in die 1970’s vir die koninklike familie gewerk het.
Volgens ‘n polisiewoordvoerder sal Benjamin Herman Maandag in ‘n hof in Londen verskyn. Hy staan tereg op drie aanklagte van onsedelike aanranding – tussen 1972 en 1974 – van ‘n 12-jarige meisie.
Rusland sê die ondersoek na hulle agent is heropen om politieke redes. Litwinenko, ‘n voormalige KGB-beampte, het in 2000 na Brittanje gereis om op Russiese oligarge in Londen en Israel te spioeneer. In November 2006 is Litwinenko aan polonium 210-vergiftiging dood. Die Russiese regering ontken betrokkenheid by sy dood.
Die staatsaanklaer het in reaksie op May se besluit gesê, daar is geen nuwe getuienis wat na vore gekom het nie. Die vorige ondersoek het getoon dat Rusland nie met sy dood verbind kan word nie.
Die belangrikste kinkel in hierdie geval egter het in 2012 na vore gekom ná onthullings deur Marina Litwinenko, sy weduwee se prokureur dat die voormalige Russiese spioen na bewering vir Brittanje se MI6, sowel as vir die Spaanse geheime diens gewerk het.
Tot dusver het die Britte hul saak gebou alleen op artikels, onderhoude en inligting uit die media,” sê Maksim, Litwinenko se broer. “Ons het nie ‘n enkele amptelike dokument gesien wat die oorsaak van die dood verklaar nie.”
Litwinenko se familie hoop dat ‘n openbare ondersoek sal toelaat dat geheime, sensitiewe regeringsmateriaal vrygestel sal word.
Rusland se ambassadeur na die Verenigde Koninkryk, Alexander Yakowenko, het verlede week gesê dat die Britse owerhede die getuienis in hulle besit in die openbaar moet vrystel, en dat Rusland nie enige uitspraak deur ‘n geheime hof sal aanvaar nie.
Israel het 16 000 bykomende reserviste in die Gasastrook ontplooi.
“Die weermag het bykomende reserviste opgeroep om die soldate op die grond ‘n blaaskans te gee. Die totale aantal reserviste in die Gasastrook staan nou op 86 000,” het ‘n woordvoerder vir die Israelse weermag Donderdag gesê.
Die dodetal in die Gasastrook het Donderdag tot 1 363 gestyg.
Meer as 100 Palestyne is Woensdag dood in aanvalle wat onder meer dié op ‘n mark en op ‘n skool van die Verenigde Nasies ingesluit het.
Hamas sê hy het uit selfverdediging verskeie vuurpyle op Israelse gebied afgevuur.
Joodse teenstanders in die land self sê hulle durf nie Israel se optrede meer in die openbaar kritiseer nie. Daar is feitlik ‘n algehele konsensus dat Israel se optrede geregverdig is.
Die Israel Democracy Institute , het in ‘n peiling bevind dat 95% van alle Joodse inwoners die uitwissing van Palestyne voorstaan. Ander peilings het effens minder, maar nog steeds baie hoog, naamlik 86% gemeet.
Israel blyk onbewus te wees van die geweldige negatiewe persepsie wat wêreldwyd heers weens hulle aanvalle. Hul optrede word binne hul eie eggokamer regverdig.
Die invloedryke Britse groep Massive Attack het in Byblos in Lebanon opgetree om geld vir Palestyne in vlugtelingkampe in te samel.
Dit was hul enigste optrede in die Midde-Ooste opgedra aan die kinders van Gasa. Massive Attack het Israel se slagting van die Palestyne openlik veroordeel.
Die groep het Dinsdagaand opgetree terwyl hul aanhangers Palestynse vlaggies in die lug gehou het.
Robert Del Naja van Massive Attack sê dat een van die digs bevolkte gebiede op aarde gebombardeer word met burgerlikes wat “ongelooflik” verbied word om die gebied te mag verlaat. Hy het Israel se bomaanvalle as ‘n “slagting” beskryf.
Del Naja het in ‘n eksklusiewe onderhoud met AFP gesê Palestyne in vlugtelingkampe in Lebanon leef swaar. Hy het die wêreld se ongeërgdheid gekritiseer. Politici wat stilbly is die heel ergste, het hy gesê. Dit wys dat hulle nie geskik is vir die poste wat hulle beklee nie.
“Wil jy regtig ander mense uitmoor om jouself te beskerm? Dis tog die twintigste eeu waarin ons leef,” het hy gesê.
Die dokter aan die voorpunt van die stryd teen die Ebola-virus in Sierra Leone, is oorlede aan die siekte.
Net enkele dae nadat hy self die virus opgedoen het, is Sheik Umar Khan dood in die hospitaal waar hy opgeneem is in kwarantyn.
Hy het voor hy siek geword het, gsê hy vrees dat hy die siekte kan opdoen.
Die viroloog het voor sy dood meer as 100 pasiënte by die hospitaal in Kenema, een van die wêreld se voorste Ebola diagnosefasiliteite, behandel.
Die hospitaal word deur Dokters Sonder Grense bedryf.
Kahn was die enigste spesialis die land wat tropiese koorssiektes kon behandel. Die ministerie van gesondheid in Sierra Leone het hom as ‘n nasionale held geprys.
Die uitbreking van ebola in Wes-Afrika het vroeër vanjaar in die buurland, Guinee begin. Dit is die ergste uitbreking sedert die siekte die eerste keer in 1976 waargeneem is.
So ver is meer as 672 mense in Wes-Afrika dood. Dit sluit Sierra Leone, Liberië, Guinee en Nigerië in.
Inwoners wat onder kwarantyn geplaas word is in opstand daarteen en probeer siekes ontset met geweld. In Sierra Leone het ‘n vrou ontsnap en na die besige Freetown gevlug voor sy drie dae gelede dood is.
Twee Amerikaners, ‘n dokter en sendelinge het ook die siekte onderlede.
Pres. Jacob Zuma en ander Afrika-leiers sal volgende week met pres. Barack Obama van Amerika vergader te midde van aanduidings dat Amerikaanse invloed op die vasteland onder druk verkeer.
Die VSA se ondersteuning – die enigste waarop Israel kan staatmaak – vir die aanval op Gasa het Amerika heelwat kritiek op die hals gehaal.
Zuma sal ‘n Suid-Afrikaanse afvaardiging lei na die eerste Amerika-Afrika-leiersberaad (USALS) wat aan die begin van Augustus in Washington plaasvind.
Rob Davies, minister van handel en nywerheid, het Maandag in Pretoria gesê “handelsooreenkomste” tussen Suid-Afrika en Amerika sal bespreek word, asook “politiek”.
Dié byeenkoms kom nadat Obama verlede jaar met sy besoek aan Suid-Afrika en Afrika verskeie staatshoofde daarheen genooi het.
Davies het gesê die “politiek van vrede, sekuriteit en demokrasie” sal bespreek word.
“En daar is ‘n aantal bekommernisse wat ons deel. Veral die kwessie van ekstremistiese groepe regoor Afrika, soos Boko Haram in Nigerië.
“‘n Aantal van ons het daarom besluit om die Wêreld Ekonomiese Forum in Abudja [Nigerië] by te woon, as ‘n teken dat ons sake- en ekonomiese kwessies as fundamenteel beskou.
“Ons wou wys dat ons nie afgesit of geïntimideer sal word deur ekstremistiese groepe nie.”
Boko Haram het na bewering skoolmeisies ontvoer wat deur die Amerikaanse mediamonopolie as ‘n dringende kwessie aangegryp is. Dit het later geblyk dat die video vervals is.
Of die ontvoering wel plaasgevind het, is deur sommige mediabronne bevraagteken.
“Ten spyte van al die dringende nuus en voorspraak [vir die meisies wat verdwyn het], egter, is dit die basiese feite wat steeds vermis word. Dit is onduidelik hoeveel meisies ontvoer is, wie hulle is, wie dit gedoen het, op watter tydstip, en presies hoe,” het die Christian Science Monitor vroeër berig.
Intussen is ‘n motorbomaanvaller wat ‘n populêre politieke leier wou vermoor verlede week noord van Abuja aangekeer. Die man wat soos ‘n vrou vermom was, het uit die plofstofbelaaide motor gerol net voordat dit ontplof het en talle lewens geëis het. Die politieke leier was ongedeerd na die aanslag.
Inwoners van die gebied is ontstoke en ontleders meen sy dood sou tot groter geweld kon gelei het, aangesien inwoners president Goodluck Jonathan aanspreeklik sou gehou het.
Die bomaanvaller is deur die owerhede in hegtenis geneem wat gesê het die man was baie professioneel vermom, met ‘n gesig wat ook vir die van ‘n vrou aangesien kan word en allerlei bykomstighede wat besonder goed uitgekies is om te mislei.
Maleisië probeer ‘n skietstilstand tussen pro-Russiese seperatiste en die Oekraïense regering bemiddel in die gebied waar ‘n Maleisiese passasiersvliegtuig op 17 Julie afgeskiet is, het RSG berig.
Die hoof van die Maleisiese ondersoekspan sê hulle wil verseker dat die oorskot van passasiers teruggekry word en dat die ondersoek by die ongelukstoneel afgehandel word.
‘n Regeringsbron in Kuala Lumpur sê hy hoop ‘n ooreenkoms kan bereik word voor die eerste minister, Najib Razak Woensdag na Nederland vertrek.
Najib het gister ‘n ooreenkoms aangekondig waarvolgens die seperatiste die internasionale polisie toegang tot die ongelukstoneel gee.
Hewige gevegte tussen die rebelle en Oekraïense regeringsmagte het verhoed dat Nederlandse en Australiese polisiebeamptes toegang tot die toneel kry.
In Libië is meer as 97 mense dood en 400 beseer in wekelange gevegte, maar die dodetal mag aansienlik hoër wees.
Die konflik wat twee weke gelede dramaties toegeneem het, gaan tans om beheer oor die Tripoli internasionale lughawe waar strydende faksies poog om dit oor te neem.
Die land se ministerie van gesondheid sê die jongste syfers van die groeiende dodetal is gegrond op verslae van agt openbare hospitale in die hoofstad. Dit sluit nie mediese sentrums buite die stad in nie.
Amerika, Frankryk, Duitsland, Brittanje en Nederland het vroeër hul diplomatieke personeel gevra om die land so spoedig as moontlik te verlaat uit vrees vir hul veiligheid.
Dié lande het vroeër aan die NAVO-geleide aanval op Libië deelgeneem, om wat president Obama genoem het “universele waardes” te vestig.
Libië beskik nie meer oor ‘n weermag nie en die land het na drie jaar sedert NAVO se “humanitêre” ingryping in chaos verval met verskeie militante groepe wat meeding om beheer in die land oor te neem.
Al Kaida, een van die groepe, is deur die VSA befonds.
Intussen berig Algeriese bronne dat die gebied steeds wemel van jihadiste wat benewens wapens ook ‘n BUK-missielstelsel gebuit het.
Die gebuite Libiese toerusting is glo na Mali geneem waar Air Algerie 5017 verlede week neergestort het. Die Amerikaanse Federal Aviation Administration verwys na die gebied as ‘n “hoë-risiko vlugsone”.
Met die ongeluk naby Gao, Mali van Air Algerie is 110 passasiers en bemanning dood, net enkele dae nadat die Oekraïne ‘n Maleisiese vliegtuig, vlug MH17 met meestal Nederlandse passasiers aan boord glo met dieselfde soort missiel afgeskiet het.
Die Air Algerie-vlug was op pad van Ougadougou, Burkina Faso, na Algiers, en die moontlikheid dat BUK-missiele uit Libië is gebruik is om die vliegtuig neer te skiet, kan nie uitgesluit word nie.
In 2013 is so ‘n BUK aangewend in ‘n terreuraanval op die Ain Amena-aardgasaanleg in die Algerynse Sahara. Die jihadiste het 40 Westerlinge en ander gyselaars vermoor.
Een-en-vyftig van die 110 passasiers aan boord Air Algerie 5017 was Franse burgers.
Dertien minute nadat die vlug om 09:17 opgestyg het van Ouagadougou-lughawe, het die Air Algerie vlieënier toestemming van lugverkeerbeheer in Niger versoek om ‘n “vliegtuig” in die gebied te vermy. Die ander “vliegtuig” kon ‘n grond-missiel gewees het.
Die Verenigde State van Amerika bedryf ‘n program met die kodenaam CREEKsand vanaf die militêre kant van Ouagadougou-lughawe sê Franse ontleders. Hulle stuur onbemande tuie vandaar oor die gebied.
Obama en Hillary Clinton se steun vir Libiese jihadistiese groepe in die omverwerping van Moeammar Gadaffi het gelei tot die verspreiding van wapens dwarsdeur die Sahara-streek.
Dié twee en ander lede van die Obama-administrasie dra die volle verantwoordelikheid vir die verspreiding van sulke wapentuig aan radikale groepe, aangesien hulle herhaaldelike waarskuwings daaroor geïgnoreer het.
Dit sluit ‘n paar 480 SA-24 “Grinch” draagbare stelsels, sowel as die BUK-missielstelsel in. Op 22 September 2011, het ‘n senior intelligensie-amptenaar aan The Daily Telegraph gesê: “As die SA-24 missiele in die verkeerde hande kom, sal geen burgerlike vliegtuie in die streek meer veilig teen ‘n aanval wees nie.”
