Internasionale nuus Archives - Page 171 of 465

Egipte: Sky-kameraman doodgeskiet in uitgebreide geweld

Oproer en gewelddadige skermutselinge is oornag en Donderdagoggend regoor Egipte aangemeld nadat ‘n noodtoestand in die land afgekondig is.

Ondersteuners van die afgesette pres. Mohamed Morsi het met woede gereageer nadat die weermag vroeër op ‘n groep Morsi-ondersteuners toegeslaan het.

Morsi se Moslem-Broederskap het op sy webwerf gesê opstande is in Alexandrië en twee ander noordelike provinsies aangemeld. Egiptiese polisie- en weermaglede is oornag in die hoofstad, Kaïro en ander stede en provinsies ontplooi om ‘n aandklokmaatreël af te dwing.

Die ministerie van gesondheid in die land sê 278 mense is dood en baie meer beseer in Woensdag se klopjagte in Kaïro om pro-Morsi-ondersteuners uiteen te jaag. Die Broederskap het egter gesê 2 600 mense is dood.

‘n Veteraan Sky News kameraman is doodgeskiet terwyl hy oor die geweld in Kaïro verslag gedoen het, het die uitsaaier gesê.

Mick Deane (61) het 15 jaar vir Sky gewerk. Hy was getroud met twee seuns. Deane – wat gebore is in Hannover, Duitsland – was deel van Sky News se span wat oor die opstande saam met die Midde-Ooste korrespondent Sam Kiley berig het. Nie een van die ander spanlede seergekry het, het die uitsaaier gesê.

Egipte se nasionale Midde-Ooste-Nuusagentskap berig dat duisende Morsi-ondersteuners ook buite ‘n moskee in oostelike Kaïro byeengekom het.

Morsi-ondersteuners het ook polisiekantore in verskeie dele van die land aangeval.

Vader Rafic Greiche, woordvoerder van die Egiptiese Katolieke kerk, het gesê 17 kerke is Woensdag aangeval en afgebrand.

Intussen het Egipte se tussentydse adjunkpresident, Mohamed el Baradei, Woensdag bedank.

In ‘n bedankingsbrief aan die tussentydse president, Adly Mansour, het el Baradei gesê “die bevoordeeldes van wat vandag gebeur het, is diegene wat vra vir geweld, terrorisme en die mees ekstreme groepe.

“Soos julle weet, het ek gesien daar is vreedsame maniere om die botsing in die samelewing te beëindig, daar was voorgestelde een aanvaarbare oplossings vir nuwe maniere wat ons tot ‘n nasionale konsensus sou neem,” het hy geskryf.

“Dit het moeilik geword vir my om die verantwoordelikheid te dra vir besluite waarmee ek nie saamstem nie en wat gevolge het wat ek vrees. Ek kan nie verantwoordelikheid aanvaar vir een druppel bloed nie.” – AFP/BBC

Kerry spook om vredesproses op koers te hou

Die Amerikaanse Minister van Buitelandse Sake, John Kerry sê hy het ‘n openhartige gesprek met die Israelse eerste minister, Benjamin Netanyahu gehad oor nuwe omstredenheid rakende Israelse vestings.

Kerry is werp alles in die stryd om sy inisiatief vir vrede in die Midde-Ooste op koers te hou.

Samesprekings word vandag in Jerusalem hervat. Kerry sê hy glo ook dat die Palestynse president, Mahmoud Abbas die samesprekings wil laat voortduur.

Sommige Palestyne het ‘n oproep gedoen om die onderhandelinge te boikot, nadat Israel planne bekendgemaak het om meer as 3 000 huise aan die Wesoewer en in Oos-Jerusalem te bou.

Kerry het benadruk dat Amerika dié planne as onwettig beskou. – RSG

Watergraf vir bemanning na duikboot ontplof

‘n Indiese vlootduikboot met sowat 18 bemanningslede aan boord het Woensdagoggend ná ‘n ontploffing aan die brand geslaan en gesink.

Die ontploffing het net ná middernag in die kilo-klas INS Sindhurakshak gebeur.

Die ongeluk kom in dieselfde week as wat Indië met ‘n plaaslik vervaardigde vliegdekskip se konstruksie begin. Dit word vir voltooiing in 2017 beplan.

Die land het ook pas aangekondig dat die reaktor op Indië se eerste tuisgeboude kernduikboot nou in werking is.

“Die Sindhurakshak vandag is miskien die ergste ongeluk wat ‘n Indiese vlootduikboot nog ooit gehad het,” sê die verdedigingsdeskundige en voormalige kommodoor Uday Bhaskar.

Narendra Vispute, woordvoerder van die vloot, het gesê pogings word aangewend om vas te stel of die bemanningslede veilig is.

Die Indiese nuuskanaal NDTV het gesê ‘n harde ontploffing is aangemeld. Sowat 12 brandweerwaens het na die hawe in Moembai gehaas en brandbestryders het sowat twee uur lank gespook om die brand te blus.

Vispute het gesê die oorsaak van die ontploffing word ondersoek. Geen verdere inligting is bekend gemaak nie.

Onderhoudswerk aan die 16 jaar oue Russies-vervaardigde duikboot is onlangs gedoen. – AFP

Hospitaal moet opdok ná ‘rassisme’-klag

‘n Federale jurie het die Ogden Regional Medical Center daaraan skuldig bevind dat hy wederregtelik opgetree het teen ‘n werknemer wat ‘n rassisme-klag aanhangig gemaak het.

Hofrekords toon dat die Amerikaanse distrikshofjurie in Salt Lake City, Utah, op 2 Augustus 2013 bevind het dat Raymond Zisumbo op $7 500 (ongeveer R75 000) aan vergoeding geregtig is.

Hoewel dié bedrag nie buitensporig is nie, het Zisumbo se prokureur, April Hollingsworth aan die koerant, die Standard-Examiner, gesê dat sy aansoek gaan doen om $200 000 (R2 miljoen) van haar kliënt se teruggedateerde salaris.

Jurielede het bevind dat die hospitaal die voormalige rekenaartopografietegnikus uit weerwraak ontslaan het, maar dat die hospitaal nie aan diskriminasie skuldig was nie.

Zisumbo is ‘n Spaanssprekende kleurling (“Hispanic”). Hy het oor ‘n graad en vyf jaar se werkservaring beskik toe hy in 2004 vir die hospitaal begin werk het.

Hy het as tussentydse departementshoof gedien alvorens hy die diskriminasieklag aanhangig gemaak het omdat hy nie bevorder is nie. Tydens die daaropvolgende maand is hy afgedank. – AP

Israel loods onbemande aanval in Egipte

Vyf militante is dood in ‘n Israelse lugaanval in die Sinai Skiereiland in Egipte.

Die aanval volg nadat Israel intelligensie-waarskuwings van hul Egiptiese ampsgenote ontvang het.

Israelse intelligensie het gewaarsku dat Islamitiese militante, wat bande het met al Kaida, hulle nou in baie dele van noord-Afrika en die Midde-Ooste bevind.

Vrydag is vyf Jihadi-ekstremiste dood in ‘n onbemande vliegtuigaanval in Rafah aan die Egiptiese kant van die grens met Gasa.

Dit was die eerste Israelse militêre aanval op Egipte sedert die 1979 vredesverdrag tussen die twee lande.

Die aanval is uitgevoer na Israel se sluiting van die Elat lughawe Donderdagaand ure ná waarskuwings van Egipte oor ‘n moontlike aanval.

Brandbestryders steel terwyl lughawe verswelg in vlamme

Terwyl die verwoestende vuur besig was om die internasionale lughawe in Kenia te verswelg, was brandbestryders te besig om te steel om aandag daaraan te gee.

Die owerhede in Kenia het terrorisme uitgeskakel as ‘n moontlike oorsaak van die brand wat woensdag by die Jomo Kenyatta-lughawe in Nairobi uitgebreek het.

Die land se intelligensielede word bygestaan deur die Amerikaanse speurdiens om die oorsaak van die brand te bepaal.

Hulle probeer in dié stadium vasstel of dit brandstigting of ‘n ongeluk was. Alle internasionale vlugte is intussen hervat.

Groot skade is aan die lughawe aangerig toe brandbestryders traag gereageer het.

Intussen is het dit aan die lig gekom dat die eerste mense op die toneel van die lughawebrand banke en kitsbanke beroof het.

Polisie-amptenare het aan Assoiciated Press gesê dat polisielede wat die toneel bewaak het, probeer het om ‘n brandkluis van ‘n bank met buitelandse valuta daarin, weg te dra.

Die ondersoek is nog aan die gang. ‘n Polisie-woordvoerder sê geen formele klagtes van diefstal is tot dusver gelê nie. – RSG/praag

Stamselburger ‘nie so sappig nie’

Koskritici het hul uitspraak oor die stamselburger se smaak en tekstuur gegee.

Die wêreld se eerste laboratorium-gekweekte beesvleiskoekie is gaargemaak en beproef op ‘n nuuskonferensie in Londen.

Wetenskaplikes het selle van ‘n koei, by ‘n instituut in Nederland gekweek, en in repies wat hulle gekombineer het om ‘n vleiskoekie te maak, bekendgestel.

Een koskenner het gesê dit is “naby aan vleis, maar nie so sappig nie,” en ‘n ander het gesê dit het geproe soos ‘n ware burger.

Navorsers sê die tegnologie kan ‘n volhoubare manier wees om te voorsien in ‘n groeiende vraag na vleis.

Die sjef Richard McGeown, vanaf Cornwall, het die burger gaargemaak en dis geproe deur voedselkritici Hanni Ruetzler en Josh Schonwald.

Prof Tara Garnett, hoof van die Food Policy Research Network aan die Universiteit van Oxford, het gesê besluitnemers moet kyk na tegnologiese oplossings.

“Ons het ‘n situasie waar 1,4 miljard mense in die wêreld oorgewig en vetsugtig is, en terselftertyd ‘n miljard mense wêreldwyd wat honger gaan slaap,” het sy gesê.

Terreur-oproep uit Jemen laat VSA ambassades sluit

Besonderhede het aan die lig gekom oor die Al Kaida bedreiging wat gelei het tot die tydelike sluiting van sowat 20 Amerikaanse ambassades in die Midde-Ooste en in Afrika.

Volgens berigte het Amerika gesprekke onderskep tussen die Al Kaida-leier, Ayman al-Zawahri en die organisasie se hoof in Jemen.

Die Obama-administrasie beskryf dit as een van die ernstigste sameswerings teen die VSA.

Geen teikens is uitgesonder nie, maar dit was duidelik dat ‘n terreuraanval binnekort sou plaasvind.

Die onderskepte oproep van al-Zawahri, wat die leisels by Osama bin Laden oorgeneem het, het Amerika genoop om sy ambassases van Mauritanië aan die weskus van Afrika regdeur tot in die Midde-Ooste te sluit.

Kritici van die Obama-administrasie meen egter die bedreiging word oorspeel om fokus van die Bengazi-skandaal af te haal.

Dit het aan die lig gekom dat die VSA wapens aan Islamistiese terreurgroepe beskikbaar gestel het wat gelei het tot die aanval op die Amerikaanse ambassade en die dood van ‘n gesant en ander diplomatieke personeel.

Ambassades in Kaboel, Afghanistan en Baghdad, wat goeie veiligheidsmaatreëls het, is gister heropen.

Noorweë sluit sendings vir publiek

Noorweë het sy ambassades in Saoedi-Arabië en Jordanië gesluit vir die publiek weens kommer oor terreurdreigemente, het dié land se ministerie vir buitelandse sake Maandag gesê.

Dié Skandinawiese land het ook veiligheid by ander diplomatieke sendings in die Midde-Ooste en Noord-Afrika opgeskerp sowel as in sensitiewe punte soos Nairobi, het die ministerie gesê.

“Ons het openbare toegang beperk deur byvoorbeeld die konsulêre afdelings in Riyaad en Amman te sluit,” het Frode Andersen, ‘n woordvoerder vir die minister, aan AFP gesê.

Die VSA het Sondag 25 diplomatieke sendings gesluit nadat Al-Kaïda-inligting oor ‘n aanval deur intelligensieoprateurs onderskep is.

Die Amerikaanse departement van buitelandse sake het Amerikaanse toeriste wêreldwyd gewaarsku dat Al-Kaïda dalk ’n wraakaanval in Augustus in veral die Midde-Ooste en Noord-Afrika beplan. – Sapa/AFP

VSA verskerp pogings om Egipte-krisis op te los

Internasionale diplomatieke pogings word verskerp om die politieke krisis in Egipte op te los.

Die Amerikaanse adjunkminister van Buitelandse Sake, William Burns het weer sy besoek aan Egipte verleng sodat hy verdere samesprekings met albei kante in die konflik kan hou.

Die Moslem Broederskap hou vol dat die afgesette president Mohamed Morsi weer aangestel word.

Nog twee Amerikaanse senators is na Egipte oppad. Een van die senators, die Republikein, Lindsey Graham sê die weermag moet vinniger die beheer aan die burgers oorgee en ‘n demokratiese verkiesing moet gehou word. – RSG