Afrikaanse nuus Archives - Page 77 of 166

‘Afrikaans is ‘n kanker wat vernietig moet word’

Uitlatings van die rektor van die Universiteit van KwaZulu-Natal, prof. Malegapuru Makgoba, wat luidens ‘n mediaberig gesê het Afrikaans is ‘n ‘kanker wat vernietig moet word’, kan nie geduld word nie en die Vryheidsfront Plus gaan ‘n klag hieroor by die Menseregtekommissie indien, sê adv. Anton Alberts, die VF plus se parlementêre woordvoerder oor hoër onderwys.

Prof. Makgoba se uitlatings oor Afrikaans het verlede jaar ook opslae gemaak toe hy in die media gesê het dit is ‘n ‘sterwende taal’ by die universiteit en dat hy beplan om die departement vir Afrikaans-Nederlands te sluit.

Adv. Alberts sê prof. Makgoba se beweerde uitlatings is tekenend van die totale aanslag teen Afrikaans op alle vlakke van onderwys in Suid-Afrika. Onlangs het prof Jonathan Jansen, rektor van die Universiteit van die Vrystaat, in ‘n toespraak voorgestel dat Engels die enigste onderrigtaal op skoolvlak moet wees.

“Ironies genoeg het Afrikaans by die universiteit van Kwazulu-Natal vanaf 2011 tot 2012 gegroei wat bewys dis allermins ‘n sterwende taal soos wat prof. Makgoba sou aandui.

“Dit blyk verder dat Afrikaans inderwaarheid by ander universiteite in die land waar dit gedoseer word, besig is om te groei eerder as om te kwyn.

“Daar word berig hoe daar byvoorbeeld in 2006 by die Noordwes-Universiteit 50 eerstejaarstudente, 22 tweedejaars en 11 derdejaars was. Hierdie jaar is dit onderskeidelik 119, 45 en 27.

“Wat ons dus sien, is dat Afrikaans op hierdie vlak besig is om te groei ten spyte van die groot aanslag teen die taal.

“Indien Afrikaans mettertyd wel uit die hoër onderwys gedwing word om eentaligheid te bewerkstellig, sal ‘n geestelike verarming van die Afrikaanse gemeenskap plaasvind wat tot nadeel van die hele land se wees.

“Pogings om Afrikaans te vertrap is boonop in stryd met die Grondwet wat veeltaligheid en die gelykheid van al die amptelike landstale bepleit,” sê adv. Alberts.

Taal kan brûe bou in SA

Taal is van onskatbare belang om mense in Suid-Afrika te help om ‘n wedersydse begrip en respek vir mekaar te ontwikkel en om nasiebou te bevorder, sê dr. Corné Mulder, die Vryheidsfront Plus se hoofsweep.

Dr. Mulder het vandag met die tweede lesingsdebat van die Wetsontwerp op die Raad vir Suid-Afrikaanse Taalpraktisyns gesê die VF Plus sal daarom enige stap steun om veeltaligheid in die land te bevorder.

Hy het gesê dit sal die ideale situasie wees as jong mense mekaar se taal kan praat aangesien dit mense letterlik en figuurlik sal help om mekaar beter te verstaan.

“Hierdie mag dalk na ‘n baie gewone wet lyk, maar dit is nie. Hierdie wet is deel van ‘n sekere proses van taal in Suid-Afrika wat baie belangrik is,” het dr. Mulder gesê.

Op ‘n ligter noot het dr. Mulder aan mede-parlementslede gesê hy is nie bekommerd oor die oorlewing van Afrikaans nie. “Afrikaans het die aanslag van die Britse Ryk oorleef. Die ANC sal nie ‘n probleem wees nie…’

“Die meerderheid Afrikaanssprekendes in die land is nie wit nie. Miljoene mense praat Afrikaans. Dis ‘n doodgewone, amptelike Suid-Afrikaanse taal.

“Suid-Afrika is ‘n uiteenlopende gemeenskap, waarvan taal ‘n deel uitmaak. Maar taal kan ‘n fokuspunt wees op die gebied van sosiale kohesie en nasiebou.

“Wanneer ons met hierdie bouproses begin, soos met hierdie wet, sal ons besef dat ons die wet nie in isolasie kan sien nie. Taal is ‘n belangrike proses in nasiebou. Wanneer ons almal gemaklik ons eie taal met mekaar kan praat, dan sal ons ware vooruitgang maak na sosiale kohesie en nasiebou.

“Dit is waarna ons moet streef en waarheen ons moet mik. En indien ons daarmee erns het, is ‘n wet soos hierdie belangrik om amptelike taalpraktisyns deel te maak van die samebindende weg na veeltaligheid wat allerbelangrik vir die land is,” het dr. Mulder gesê.

Plaasaanvalle neem toe sê ISS en TLU

Die verwarring rondom plaasaanvalle en –moorde word deur die staat self veroorsaak aangesien daar sedert 2007 nie statistiek hieroor gehou word nie, het die Vryheidsfront Plus se hoofwoordvoerder oor polisie gesê.

Hierdie verwarring lei tot kritiek dat mense wat daaroor praat, vrees en rasseverdeeldheid aanblaas.

“Hierdie kritiek moet voor die staat se deur gelê word en nie voor die deur van mense wat met reg bekommerd is oor die aanvalle en almal wat daardeur geraak word nie.”

Syfers van die SA Instituut vir Sekerheidstudies (ISS) en Transvaalse Landbou-Unie (TLU) wat vandag gepubliseer is, dui daarop dat plaasaanvalle toegeneem het en dat daar meer voorvalle landwyd was as in 2012.

Daar word ook gereeld berig oor die buitengewone wreedheid en sadisme wat met die aanvalle gepaard gaan.

Volgens die ISS word 120 uit elke 100 000 boere vermoor, teenoor die sowat 31 uit 100 000 gewone landsburgers en 54 uit 100 000 polisielede. In die laaste tien jaar is meer as 800 mense op plase vermoor, luidens mediaberigte.

Indien iemand van die syfers verskil, moet daar druk op die regering geplaas word om die ware omvang daarvan bekend te maak, aangesien die regering die hulpbronne en middele het om dié navorsing van stapel te stuur.

“Die VF Plus is lank reeds besig om by die regering daarop aan te dring om landelike misdaad tot prioriteitsmisdaad te laat verklaar. Tot dit nie gebeur nie, sal onsekerheid en raaiwerk daaroor voortduur en moet die regering die blaam daarvoor dra.

“Niemand kan betwis dat ons landbou-gemeenskap swaar deur misdaad geraak word nie. Die VF Plus sal nie daaroor swyg nie.”

Volgens die party het verskeie organisasies hul eie statistiek wat hulle oor plaasaanvalle byhou, maar dit word hoofsaaklik verkry van mediaberigte.

Hy sê dit is ‘n onakkurate manier om statistiek te versamel aangesien die media nie oor elke misdaad in Suid-Afrika berig nie en hulle inligting vanaf die polisie nie altyd aantoon dat die voorval op ‘n plaas plaasgevind het nie.

Die SA Instituut vir Rasseverhoudinge het al by monde van dr. Frans Cronjé gesê dat daar tot sewe plaasaanvalle plaasvind vir elkeen waaroor berig word en dat wit boere tot dertien keer meer blootgestel is aan aanvalle as stads- of kleinhoewebewoners.

“Ons by die VF Plus is bekommerd oor alle misdaad, maar veral oor landelike misdaad en onverantwoordelike uitsprake oor grondhervorming wat daarmee gepaard gaan.

“Ons kan nie genoeg klem daarop lê dat druk vanuit alle oorde op die regering geplaas moet word om die situasie as hoogste prioriteit te beskou en dienooreenkomstig op te tree nie,” lui die verklaring.

Boer in Vryheid doodgeskiet

’n Boer is op sy plaas in Vryheid in KwaZulu-Natal doodgeskiet, het die polisie Woensdag gesê.

Die 78-jarige Willem Weites is Maandagoggend op sy plaas doodgeskiet, het kapt. Thulani Zwane, polisiewoordvoerder, gesê.

“Hy was besig om ’n waterpomp reg te maak toe drie onbekende mans uit ’n voertuig spring en ’n vuurwapen uitpluk. Hulle het geld van die oorledene geëis en hom twee keer in die kop en bors geskiet.”

Die mans het toe by Weites se huis ingegaan en ’n onbekende bedrag geld uit sy kluis gesteel.

Niemand is al in hegtenis geneem nie. – Sapa

Gemeenskap woedend oor jongste plaasaanval

Die hof op Barkly-Oos moes hoor dat die vermeende moordenaar talle vorige veroordelings en sake wat steeds hangend teen hom is, het. Lede die gemeenskap het Dinsdag voor die vervalle hofgebou gedreungsing in woede oor die jongste plaasmoorde.

Die gemeenskap het voor die hof rooi ballonne vasgehou. Die De Villiers-egpaar word vandag om 14:00 uit die NG kerk begrawe.

“Wys die f****r se gesig vir ons!” het omstanders gegil toe die 22-jarige beweerde moordenaar uit die landdroshof gekom het en na die polisievangwa begelei is.

“Jy’s ’n satan! Jy sal vrot in die tronk,” het Maggie Thethekwa, gemeenskapsleier op die dorp, vir Thulani Khetane, die vermeende moordenaar van David (87) en Ralie (86) de Villiers, geskree.

“Voertsek hond!” het weerklink. Khetane is selfs deur landdros P. Ngindo afgejak toe hy sy regterhand opgesteek het om iets te sê.

Die aanklaer, Zipho Sobekwa, het gesê die staat sal borgtog teenstaan wanneer Khetane volgende Dinsdag om borgtog sal aansoek doen.

“Hy is ’n bekende gesig op die dorp. Hy was totdat hy 16 jaar oud was, in ’n plaaslike kinderhuis,” het Thethekwa gesê.

Khetane staan tereg op twee aanklagte van moord, een van poging tot moord en huisbraak met die doel om te vermoor.

Die vermoorde egpaar se seun, Dawie (53), is ernstig in die aanval beseer. Hy het ook verskeie meswonde opgedoen.

Amanda Appelgryn, woordvoerder van die Mediclinic Bloemfontein waar hy behandel word, sê Dawie is steeds in ’n stabiele toestand in die intensiewesorg-eenheid. Hy is steeds aan ’n ventilator gekoppel en onder swaar verdowing, het Beeld berig.

Kleurling vol lof vir ‘goedbeplande’ sluipmoord

‘n Versoek om die grafte van dr. Hendrik Verwoerd en sy sluipmoordenaar, Dimitri Tsafendas, tot nasionale erfenisterreine te verklaar, is ingedien.

Christian Martins, ANC-MPL, het dié versoek in ‘n brief aan die Nasionale Erfenisraad gemaak. Die brief is Maandag aan die media vrygestel.

Martins, ‘n Kleurling, het in die brief gesê Suid-Afrika se geskiedenis sal onvoltooid wees sonder Verwoerd, die sogenaamde argitek van apartheid.

Verwoerd het vanaf 2 September 1958 tot 6 September 1966 as Suid-Afrika se eerste minister gedien, toe hy in die destydse Volksraad deur Tsafendas aangeval is.

“Dimitri Tsafendas en Hendrik Verwoerd het dalk die verloop van die Suid-Afrikaanse geskiedenis ná die oorlog meer as enigiets verander toe Tsafendas die ‘argitek van apartheid’ doodgesteek het,” het Martins gesê.

Martins het gesê hoewel Tsafendas ongeskik verklaar is om verhoor te word, toon navorsing dat hy presies geweet het wat hy doen en die sluipmoord vooraf beplan het. – Sapa

Anonieme marxistiese groep intimideer adverteerders op praag

‘n Anonieme ekstreemlinkse, waarskynlik marxistiese, groep is sedert Donderdag besig om adverteerders op die praag-webblad te intimideer om hul advertensies te verwyder omdat die blad kwansuis “regs en rassisties” sou wees. Die veldtog word vanaf ‘n Facebook-blad geloop met die naam, “Stop right wing website Praag” met as onderskrif “Stop the right wing website www.praag.co.za earning revenue from companies who advertise on the site”.

Volgens dr. Dan Roodt van praag het die aksiegroep Saterdagoggend daarvan bewus geraak dat iets fout is. “Ons het skielik agtergekom dat ons netwerkadverrtensies nie meer op die blad vertoon nie, maar het aanvanklik gedink dat daar ‘n fout met die stelsel kon wees. Min het ons vermoed dat ‘n groep kwaadwilliges besig was om leuenagtige, onverdraagsame en lasterlike boodskappe aan groot maatskappye in Suid-Afrika te stuur waarin ons as ‘regs en rassisties’ voorgestel word. Eers teen Sondagaand het van ons ondersteuners en lesers ons van die bestaan van die ‘Stop praag”-blad verwittig.”

praag het onmiddellik geëis dat individue agter die Facebook-blad hul name, asook ‘n adres waar stukke op hul beteken kan word, bekend moet maak. “Ons beskou hierdie veldtog in ‘n baie ernstige lig,” sê dr. Roodt. “Nie net word ons grondwetlike regte op vrye media, spraakvryheid en reg om handel te dryf aangetas nie, maar die groep stel hom ook aan strafregtelike vervolging bloot.”

Die pro-afrikaanse aksiegroep vermoed dat die veldtog deur sy deelname aan die Rooi-Oktober-veldtog teen geweldsmisdaad ontketen is. Op die voorblad van die Facebook-groep verskyn insgelyks ‘n foto wat by die Rooi-Oktober-betoging voor die Uniegebou geneem is en waarop dr. Dan Roodt met ‘n praag-T-hemp en swart hoed sigbaar is. “Ons voorspel reeds geruime tyd dat Suid-Afrika, nes Duitsland tydens die Weimar-republiek van die 1920s in twee of meer politieke en ideologiese kampe gaan polariseer. Marxistiese groepe wat voorheen stedelike terreur in Suid-Afrika gepleeg het of voorstanders van terreuraanvalle op burgerlikes was, wil hê dat Afrikaners, Afrikaans en Afrikaanse instellings soos skole en universiteite moet verdwyn en neem daarom aanstoot aan ons pro-Afrikaanse standpunte,” meen dr. Roodt.

Die blote publikasie van nuusberigte oor geweldsmisdaad, korrupsie en taaldiskriminasie word deur ekstremistiese linkse groepe in die land as “regs en rassisties” beskou omdat sulke misdade merendeels deur swart mans gepleeg word. “Dis ‘n geval van ‘skiet die boodskapper’,” sê Dan Roodt. “Ook het linkse ekstremiste daaraan gewoond geraak dat hul ideologiese sienings klakkeloos in die media en aan die universiteite herhaal word en staan onverdraagsaam teenoor politieke of intellektuele kritiek. In vele opsigte het Suid-Afrika ‘n tipiese kommunistiese land geraak, wat onverdraagsaamheid teenoor konserwatiewe, vryehandels- of patriotiese standpunte insluit.”

VF Plus sal bewyse oor SEB-verarming aan regering voorlê

Die ANC-regering se verstommende uitsprake dat Swart Ekonomiese Bemagtiging (SEB) nie ‘n enkele wit mens in Suid-Afrika verarm het nie, kan nie langer geduld word nie en die Vryheidsfront Plus het met ‘n aksie begin om bewyse hieroor in te samel en aan die regering voor te lê, sê adv. Anton Alberts, die VF Plus se parlementêre woordvoerder oor handel en nywerheid.

Adv. Alberts sê die minister van handel en nywerheid, Rob Davies, se erkenning dat geen navorsing gedoen is oor die onvoorsiene gevolge van SEB soos die moontlike verarming van wittes en bruinmense nie, is ‘skokkend’ gesien in die lig van sy ontkenning dat dit mense nadelig geraak het.

“Dit spreek vanself dat die minister nie gronde het om die uitlatings te maak as geen navorsing daaroor gedoen is nie. Dis duimsuiery en maak ‘n bespotting van die totale wit- en bruingemeenskap van Suid-Afrika wat swaar deur SEB en regstellende aksie getref is.

“Dit is egter nie net Davies wat dit ontken nie. Ook pres. Jacob Zuma het enkele maande gelede in die parlement presies dieselfde stelling gemaak.

“Intussen sien ons daagliks ‘n verarming van wit en bruin wat al op ‘n nasionale krisis afstuur. Tog sluit die ANC steeds sy oë daarvoor.

“Die VF Plus se inligting is dat daar al meer as 460 nedersettings vir hulpbehoewende wittes in die land is waar mense in die grootste ellende leef. Net in die Pretoria-omgewing is sowat 90 daarvan,” sê adv. Alberts.

Volgens adv. Alberts het die VF Plus ‘n webwerf geloods met die naam www.diskriminasie.org.za (www.discrimination.org.za) waar wit en bruin hul wedervarings oor die effek van SEB en regstellende aksie kan deel en ‘n petisie teen transformasie kan teken.

“Ons gaan ook na mense in die nedersettings om hul verhale op te teken. Dié inligting gaan aan die president en die minister voorgelê word, asook aan die parlementêre portefeuljekomitees oor handel en nywerheid, en arbeid. Ons gaan hulle dwing om nou aandag te gee aan die probleem sodat almal geleenthede in die ekonomie kan kry.

“Dis ook al wyse waarop die ekonomie sal kan groei. Uitsluiting van minderhede op rasse-grondslag sal daartoe lei dat die ekonomie uiteindelik inplof aangesien die mees geskoolde persone tans steeds uit die groepe kom weens die ANC-regering se swak onderwys.

“Die VF Plus wil hiermee die mite ontbloot dat SEB alle swart mense bemagtig en niemand anders benadeel nie.

“Die teendeel is waar. En dit is dat net ‘n handjievol reeds welvarende swartes op hierdie wyse toegang kry tot die staatskas en die ekonomie en dat dit selfs tot nadeel van die breë swart bevolking strek omdat die ekonomie in geheel daardeur geknou word,” sê adv. Alberts.

Radio Pretoria verloor aansoek om wyer uit te saai

Radio Pretoria het sy hofsaak in die Noord-Gautengse hooggeregshof teen Okasa verloor.

Regter Neil Tuchten het die stasie se aansoek om na gebiede in KwaZulu-Natal, Limpopo, Noordwes en Mpumalanga uit te saai, om tegniese redes van die hand gewys.

Okasa het in 2010 en 2011 drie lisensies aan Radio Pretoria toegestaan om voort te gaan met uitsendings wyer as Pretoria.

Dié vergunning is verlede jaar teruggetrek en Radio Pretoria het 14 dae tyd gekry om sy uitsendings na dié gebiede te staak. – RSG

Minister Davies sien nie wit plakkerskampe raak

Wit Suid-Afrikaners word nie verarm deur die beleid van breë swart ekonomiese bemagtiging (BSEB) nie, sê dr. Rob Davies, minister van handel en nywerheid.

In ’n geskrewe vraag op ’n parlementêre vraag het hy Donderdag gesê: “BSEB se doelwit is nie die verarming van wit mense nie – dis ’n sake-imperatief wat daarop bemik is om maatskappye aan BSEB te laat voldoen ten einde die ekonomie te transformeer.”

Sowel swart as wit maatskappye moet tot die transformasie van die ekonomie bydra, sê hy.

“Bowendien is daar nie een wit mens wat verwarm is weens die bekendstelling en uitwerking van BSEB nie.”

Die vraag is deur Anton Alberts van die Vryheidsfront gestel. Hy het ook gevra of die minister navorsing tot sy beskikking het oor enige “onbedoelde gevolge” wat voortgevloei het uit of steeds voortvloei uit bemagtigingsbeleid.

Davies sê hieroor: “Daar was nog geen navorsing oor die onbedoelde gevolge van BSEB met betrekking tot die verarming van wit mense nie; die departement sal enige studie vanaf die agbare lid verwelkom.” – Sapa