Suider-Afrika Archives - Page 89 of 888

ANC-ampsdraers verdink van ernstige aanranding, seksuele teistering

‘n Swart ANC-raadslid het ‘n minderjarige meisie so erg aangerand dat sy inwendig gebloei het, het die hof gehoor.

Dilahlwane Njodina, het in Bultfontein in die Vrystaat in die streekhof verskyn op ‘n aanklag dat sy ‘n 14-jarige meisie ernstig aangerand het.

Die aanval het gevolg op ‘n stryery tussen die meisie en die raadslid se dogter.

‘n Groot groep polisie-lede moes ‘n oproerige skare buite die hof in toom hou.

Lede van opposisiepartye, wat die verhoor wou bywoon, is nie in die hof toegelaat nie.

Die verhoor is tot 18 Februarie uitgestel.

Intussen is die Wes-Kaapse provinsiale leier, Marius Fransman uit sy pos verwyder hangende ‘n ondersoek na die klag van seksuele teistering teen hom.

Die ANC sê hy glo hy het die regte besluit geneem om hul provinsiale leier te skors.

Die party se Nasionale Werkskomitee en die Wes-Kaapse leiers hou Maandag ‘n vergadering om die skorsing te bespreek.

Fransman is oor die besluit ingelig. Die Hoof van die ANC se Wes-Kaapse uitvoerende komitee, Jabu Mfusi sê hulle wag vir die werkskomitee om die redes vir die besluit te verskaf.

Die klagte teen Fransman is sowat drie weke gelede deur ‘n twintigjarige vrou naby Rustenburg in Noordwes gelê.

SA het die vier mees gewelddadige stede in Afrika

Suid-Afrika het vier van die gewelddadigste stede ter wêreld met Kaapstad as dié misdaadvoorloper.

Suid-Amerika het die meeste stede op die lys maar Afrika het net vier.

Die stad Caracas in Venezuela is as die gewelddadigste in die wêreld uitgewys.

Die Instituut vir Sekerheidstudies het die bevindings van ‘n Meksikaanse navorsingsorganisasie egter verwerp.

Die vier Suid-Afrikaanse stede wat glo volgens dié navorsing onder die 50 gewelddadigste stede ter wêreld is, is Kaapstad, Durban, Port Elizabeth en Johannesburg.

Die organisasie het Kaapstad negende in die wêreld geplaas vir geweldsmisdade. Die ander is onderskeidelik 41ste, 42ste en 47ste geplaas.

‘n Woordvoerder van die Instituut, Lizette Lancaster, sê hulle het ‘n probleem met die organisasie se navorsingmetodologie.

Die Council for Public Security and Criminal Justice in Mexiko het die lys saamgestel, wat aantoon dat 2 451 moorde verlede jaar in Kaapstad gepleeg is.

Die stad is wyd bekend vir sy dwelmverwante bendebedrywighede.

Van die gewelddadigste en gevaarlikste stede in Afrika waar konflik tans woed, het egter nie hulpbronne om betroubare statistiek te publiseer nie.

Die ranglys is gegrond op die getal moorde per 100 000 inwoners verlede jaar in stede met bevolkings van meer as 300 000 mense.

Vier stede in die VSA is ook op die lys.

Bejaarde in aftree-oord aangeval

‘n Bejaarde vrou van Bloemfontein is na ‘n plaaslike hospitaal gehaas nadat sy vermoedelik Donderdag in die vroeë oggendure in haar wooneenheid in die Westerbloem-aftreeoord aangeval is.

Polisiewoordvoerder, Chaka Marope, se ‘n inwoner wat langs die 86-jarige slagoffer bly, het omstreeks 07:00 onraad vermoed. Die slagoffer se agterdeur is oopgebreek.

Marope sê nadat die slagoffer nie haar telefoon geantwoord het nie, het die besorgde inwoner haar dogter gebel. Die dogter het daarna haar bewustelose ma op die grond gevind.

Marope sê dit wil voorkom of die bejaarde vrou met ‘n stomp voorwerp aangerand is.

Hy sê dit is nog nie duidelik wat vermis word of hoeveel booswigte betrokke was nie. Die polisie het die gebied gefynkam op soek na die aanvallers.

Marope sê toegang is tot die slagoffer se kluis verkry. Dit is nie bekend wat vermis word nie.

Een sterf na 7 gevalle van maagkoors in Gauteng

In Gauteng is sewe gevalle van maagkoors die afgelope dae aangemeld. Een persoon is reeds weens die siekte dood.

Die Wes-Kaapse Departement van Gesondheid het ook intussen drie gevalle van ingewandskoors in die provinsie bevestig.

Twee meisies, onderskeidelik nege en tien jaar oud van Kaapstad en ‘n 52-jarige man van die Kaapse Wynland-distrik is met die siekte gediagnoseer.

Die adjunkdirekteur van kommunikasie, Mark van den Heever sê daar is elke jaar gevalle van ingewandskoors.

Die meeste pasiënte is mense wat na Zimbabwe of ander lande soos Indië gereis het.

Volgens Van den Heever is daar deurlopend ‘n risiko vir ingewandskoors waar waterkwaliteit en sanitasie nie aan standaarde voldoen nie.

Hy sê daar is egter geen rede tot kommer nie.

Maagkoors of tifoied word veroorsaak deur die bakterie Salmonella typhi wat gewoonlik oorgedra word deur besmette water of kos.

Water word besmet as mense wat tifoied koors het se stoelgang in die water beland.

Kos word besmet as ‘n siek persoon nie sy hande was nie, en met kos werk of die besmette water oor groente gebruik word.

Swart verkeershoof weer voor vir bedrog

Die swart hoofverkeersbeampte van die Maquassi Hills munisipaliteit op Wolmaransstad in Noordwes, wat tereg staan op verskeie aanklagte van bedrog, verskyn na verwagting vandag weer in die hof.

Judas Mahlangu is aanvanklik in Julie in hegtenis geneem nadat hy na bewering die munisipaliteit uit meer as R540 000 bedrieg het.

Hy is toe weer in September aangekeer nadat dit aan die lig gekom het dat hy by nog misdrywe in Mpumalanga betrokke is.

Mahlangu is toe op R5 000 borgtog vrygelaat, maar het nie opgedaag vir sy verskyning in September nie.

Hy word sedertdien by die Kgosi Mampuru gevangenis in Pretoria aangehou.

DA ruk op na Johannesburgse middestad

Duisende DA-kiesers sal Woensdagoggend opruk na die Johannesburgse middestad om te betoog oor die gebrek aan werksgeleenthede.

Motoriste word intussen afgeraai om vanaf tienuur vanoggend na die middestad te reis.

‘n Woordvoerder van die party, Mabine Seabe sê die optog sal by die Westgate-vervoerpunt begin.

Die DA-leier, Mmusi Maimane het in ‘n verklaring gesê byna tweemiljoen meer Suid-Afrikaners is sedert 2009 werkloos.

‘n Woordvoerder van die Johannesburgse Metropolisie, Edna Mamonyane sê van die paaie wat geraak word sluit in Marshallstraat, Rissikstraat, Jeppestraat en Sauerstraat.

Volgens Mamonyane sal die optog na verwagting teen twee-uur vanmiddag verby wees.

Waterpype lek en geld vloei

Waterlekkasies in pype, nog voor dit gemeenskappe se krane bereik, sal as prioriteit vir die regering beskou word.

Mlimandlela Ndamase, woordvoerder van die minister van Water en Sanitasie, Novula Mokonyane, sê ‘n interne ministeriële komitee vir droogte beskou dit as ‘n kritieke aangeleentheid waarna munisipaliteite moet omsien.

Hy sê die regering het die verantwoordelikheid op hom geneem om dié probleem op te los in ‘n poging om water te bespaar.

Die regering het ook onderneem om fondse beskikbaar te stel om swart loodgieters op te lei om werksgeleenthede te skep.

Gemeenskappe se samewerking is egter van groot belang. Ndamase sê mense moet waterlekkasies aanmeld.

Hy sê mense moet nie aanneem dat iemand anders ‘n lekkasie sal aanmeld nie. Hulle moet dit self doen en voortdurend opvolg hoe lank dit ‘n munisipaliteit geneem het om herstelwerk te doen.

Hy vra mense om munisipaliteite aan te gee wat versuim of tydsaam is om die lekkasies, wat ‘n vermorsing van water veroorsaak, te herstel.

Hy beklemtoon die noodsaaklikheid van samewerking onder alle belanghebbendes en gee sy versekering dat die regering toegewyd is tot waterbesparing in die land.

Inisiatiewe is reeds van stapel gestuur om water aan droogtegeteisterde gebiede te versprei.

Organisasies wil steun werf om veral swart gemeenskappe wat hulp nodig het, by te staan.

Drie miljoen liter water is reeds versprei in die Vrystaat, Noordwes en die Oos-Kaap.

Twintig tenkwaens sal water na die Tswaing plaaslike munisipaliteit aanry. Die munisipaliteit is die afgelope tyd swaar getref deur watertekorte en die droogte.

Die Departement van Water en Sanitasie het R350 miljoen bewillig vir die Ngaka Modiri Molemadistrik in Noordwes om sanitasie en droogteverwante probleme te probeer verlig.

Die gebied word geteister deur watertekorte en swak bestuur wat afvalwater-behandeling in die wiele ry.

Die uitvoerende hoof van Sedibeng Water het onderneem om te verseker dat die water-infrastruktuur in die gebied verbeter word.

Rembuluwani Takalani sê hulle het ‘n sakeplan van R2 miljard ontwikkel wat al die droogtegebiede sal insluit.

TUT steeds gesluit na oproer

Die Tshwane Universiteit van Tegnologie is steeds weens oproer gesluit.

Die TUT-bestuur sê die Pretoria-Wes kampus sal gesluit bly omdat protes by die kampus voortduur.

Samesprekings tussen die Universiteit en verteenwoordigers van die sogenaamde Outsourcing Must Fall-beweging het weer ‘n dooiepunt bereik.

‘n Verteenwoordiger van die skoonmakers, Vusi Mahlangu beskuldig die universiteitsbestuur daarvan dat hy nie hulle griewe nie ernstig wil oorweeg nie.

Die skoonmakers is ontevrede oor die insluiting van die vakbond Nehawu in die universiteit se taakspan.

‘n Woordvoerder van die Universiteit, Willa de Ruyter sê die Universiteit het die skoonmakers versoek om na die onderhandelingstafel terug te keer.

De Ruyter het studente aangeraai om aanlyn te registreer as hulle deur die oproer verhoed word om dit by die kampus te doen.

Die vakbond Nehawu het intussen ‘n beroep op sy lede gedoen om nie uit hulle werk te bedank as gevolg van die nuwe belastingwysigings wat pensioenfondse raak nie.

Talle onderwysers het reeds bedank.

Die wetgewing, wat vanaf 1 Maart van krag is, beteken dat werkers slegs ‘n derde van hul pensioen as ‘n kontantuitbetaling mag neem. Die res moet in annuïteite belê word.

Nehawu het hom by Cosatu geskaar en eis dat die wetgewing herroep word. Die hoofsekretaris van Nehawu, Bereng Soke sê werkers moenie bedank nie, maar moet eerder hulle vakbonde vertrou om die stryd teen die nuwe wetgewing te wen.

Voorleggings oor alternatiewe e-tol-finansiering

RSG berig dat die Bondgenootskap teen Stedelike Tol Dinsdag voorleggings aan die parlementêre portefeuljekomitee oor vervoer sal doen, oor alternatiewe vir die finansiering van die e-tolstelsel.

Die Bondgenootskap is gevra om die komitee in te lig oor die moontlike gevolge van wysigings aan e-tolregulasies, kommer oor invordering van e-tolgeld en moontlike samespanning in die Gautengse Hoofwegverbeteringsprojek.

In Desember is voorgestelde wysigings aan die Aarto-wetgewing in die Staatskoerant gepubliseer.

Die Bondgenootskap hou vol dat dit ‘n poging van Sanral is om die betaling van e-tolgeld af te dwing.

Die Bondgenootskap het meer as 100 000 bydraes van die publiek ontvang oor redes waarom die voorgestelde wetswysigings nie deurgevoer moet word nie.

Brand by platinummyn eis vier

Vier mynwerkers is dood toe ’n ondergrondse brand in ’n platinummyn uitgebreek het, het die Impala-groep in ’n verklaring gesê.

Die brand het Vrydag in ’n myn naby Rustenburg ontstaan en die vier werkers is deur rook en dampe oorweldig toe hulle probeer het om hul weg na veiligheid te vind, het AFP berig.

Die Suid-Afrikaanse minister van mynwese, Mosebenzi Zwani, het gister gesê hy is “hartseer oor die tragiese voorval”.

Hy het bygevoeg dat die gesondheid en veiligheid van werkers van die uiterste belang is en dat dit moet voortgaan om ’n prioriteit in alle mynbouaktiwiteite te wees.

Die nasionale unie van mynwerkers het gister gesê die unie is diep bekommerd oor die noodlottige voorvalle by Impala Platinum.