Suider-Afrika Archives - Page 311 of 888

Aandagsoeker spyker homself op Rooiplein vas

’n Russiese politieke aandagsoeker wat Sondag sy genitalieë in die grond vasgespyker het buite Moskou se Rooi Plein, is Maandag vrygelaat.

Piotr Pawlenski het dit uit protes gedoen teen Rusland se “polisiestaat” op die land se nasionale polisiedag.

’n Video wys die naakte Pawlenski op Rusland se befaamde plein net buite die Kremlin nadat hy homself vasgespyker het. Die polisie het hom eers hospitaal toe geneem voordat hulle hom in hegtenis geneem het.

Hy is van “eenvoudige boewery” aangekla, maar ’n hof het die aanklagte afgewys.

Pawlenski is welbekend om sy selfskending. In 2012 het hy sy mond toegewerk uit protes teen die tronkstraf wat opgelê is aan drie lede van Pussy Riot. Dié punkgroep het sonder toestemming ’n katedraal gevandaliseer uit protes teen die Ortodokse Kerk se steun aan pres. Wladimir Poetin. – Sapa/AP

Maatskappye moet belasting betaal en politieke partye steun

Pravin Gordhan, minister van finansies, het maatskappye gewaarsku om nie geld uit Afrika te “smokkel” nie, het die SAUK Maandag berig.

Gordhan het groot korporasies wat baie wins maak, maar min belasting betaal, vir kritiek uitgesonder.

Hy het by die jaarlikse G20-Afrika-konferensie in Johannesburg gesê dit kos die vasteland miljarde en Afrika se ekonomieë sal die bykomende belastinggeld goed kan aanwend.

“Afrika sal merkbaar verbeter, met meer skole, infrastruktuur en ekonomiese bedrywighede.”

“Sonder die belasting wat van maatskappye kom, word regerings gedwing om die belasting op individue te verhoog óf besteding te besnoei.”

Die ANC se tesourier, Zweli Mkize, het gesê maatskappye moet politieke partye finansier en het voorgestel dat ’n trustfonds vir dié doel geskep word, berig die Sowetan.

“Maatskappye moet miljoene betaal, maar dit behoort hulle nie te stop om die partye van hul keuse te ondersteun nie,” het Mkize volgens die koerant gesê.

Hy het gesê dat maatskappye voordeel trek uit vrede en demokrasie.

“As daar onrus is of gemeenskapsprotes is, sal daar geen sakegeleenthede wees nie…”

Volgens die Sowetan is hy bereid om met groot ondernemings te vergader om die voorstel van ’n trustfonds te bespreek.

Die Speaker van die parlement kan die fonds administreer. Geld sal toegewys word volgens die proporsionele verteenwoordiging van partye.

“Ek glo daar is ondernemings wat floreer danksy die stabiliteit en vrede wat deur demokrasie geskep word, maar dat hulle nie wil bydra nie,” het hy aan die Sowetan gesê. – Sapa

Indiese beleggers na Lesotho

‘n Sake-afvaardiging van Indië het in Lesotho aangekom om beleggingsmoontlikhede te ondersoek.

Die ministerie van Buitelandse Sake sê die afvaardiging van 15-lede sal moontlike beleggings ondersoek in sektore soos landbou, die mynbedryf en toerisme.

Hulle sal met amptenare van die Lesotho Nasionale Ontwikkelingskorporasie vergader, asook die Lesotho Toerisme Ontwikkelingskorporasie en die Basotho Ondernemingsontwikkelingskorporasie.

Die afvaardiging sal Donderdag ‘n sakeforum in Mafeteng, suidwes van Lesotho bywoon. – RSG

Rotte vreet baba in Diepsloot

‘n Saak van moord word ondersoek nadat ’n sewe maande ou baba se verminkte liggaam in Diepsloot gevind is.

Inwoners het die babalyk Sondag alleen in ’n plakkershut gekry, het die Gautengse polisie Maandag gesê.

“Die polisie het met hul aankoms opgemerk dat een voet van die liggaam vermis is en ’n verdere ondersoek het getoon dat dit deur rotte afgebyt is,” het kapt. Tsekiso Mofokeng gesê.

Mofokeng het gesê die baba se ma is teen Maandagoggend nog nie opgespoor nie en het berigte dat die ma die baba as vermis aangemeld het, ontken.

’n Saak van kinderverwaarlosing is in September teen die ma aanhangig gemaak en twee van haar kinders is toe in hul ouma se sorg geplaas, het hy gesê.

Die ma het die sewe maande oue seuntjie glo Saterdag by sy ouma gaan haal.

Vroeër het honderde inwoners die strate ingevaar nadat twee gevalle van kinderverkragting en -moord gemoedere opgejaag het. – Sapa

‘Stem of die Boere is terug!’

Cyril is deesdae bang vir sy ou vriend Roelf (links)

Die ANC se adjunk-president Cyril Ramaphosa het Limpopo se inwoners gewaarsku om te stem of anders sal die “Boere” terug aan bewind kom.

“As jy nie stem nie sal die Boere weer kom om ons te beheer,” het Ramaphosa glo gesê in Seshego .

The Star het Maandag berig dat hy gepraat het met ‘n ontevrede inwoner Johanna Phala, 49, wat sê sy gaan nie te stem in volgende jaar se verkiesings nie, want die ANC het haar teleurgestel.

Die werklose enkelma van drie blameer die hoë werkloosheidsyfer op die ANC en het gesê sy hoop die party verloor.

Ramaphosa het haar gevra om haar woede teenoor die ANC-regering te heroorweeg.

Hy was in Seshego, tuisdorp van die EFF-leier Julius Malema.

“As alle Suid-Afrikaners nie stem nie, sal ons agteruitgaan. Die Boere sal terugkom om ons te beheer.”

Vroeër het ‘n studie bevind dat 46% van die jeug van alle rasse glo dat die DA apartheid sal terugbring as hulle aanstaande jaar se verkiesing wen.

Die onophoudelike ge-Nkandla

Die Openbare Beskermer, Thuli Madonsela gaan vandag ‘n omvattende verklaring uitreik waarin kwessies uitgespel word wat gelei het tot hofoptrede oor haar voorlopige verslag oor die president se privaatwoning op Nkandla.

Die staat het die kantoor van die Openbare Beskermer verlede Vrydag deur middel van ‘n interdik probeer verhoed om die verslag oor sekerheidsopgraderings aan die huis bekend te maak.

Die Minister van Justisie het Saterdag gesê die enigste rede waarom aansoek om ‘n interdik gedoen is, is om die veiligheidsgroepering binne die staat meer tyd te gee om op die verslag kommentaar te lewer.

Die minister van Polisie, Nathi Mthethwa, het dit op sy beurt duidelik gestel dat die bekendmaking van die verslag sonder sekerheidsklaring onwettig en strafbaar is.

Die Noord-Gautengse hooggeregshof in Pretoria het die aansoek tot 15 November uitgestel nadat Madonsela vir meer tyd gevra het om dokumente in te dien. – RSG

Jonges registreer om te stem

Suid-Afrika sal teen Woensdag weet hoeveel nuwe kiesers vir die 2014 algemene verkiesing geregistreer het.

Die Onafhanklike Verkiesingskommissie sê meer as ‘n miljoen mense het Saterdag die 22.000 kieserregistrasiesentrums besoek.

Die naweek se registrasieveldtog het gisteraand ten einde geloop en volgens aanduidings is sowat 75 persent van diegene wat geregistreer het jonger as 30.

Die OVK het intussen gesê mense wat kwalifiseer om te kan stem, sal steeds voor die verkiesing kan registreer.

Die OVK se kiesbeampte in die Wes-Kaap, Trevor Davids, sê die kommissie sal voortgaan om geleenthede vir mense te bied om hulle name op die algemene kieserslys te laat insluit tot en met die datum van die proklamasie van die verkiesing.

Registrasie kan intussen tydens normale werksure by kantore van die OVK gedoen word. – RSG

Gautrein kan baat by e-tol

Die Gautengse regering moet R700 miljoen aan die Gautrein se operateurs oorbetaal. Die Gautrein-bestuursagentskap (GMA) verwag egter ’n toename van sowat 10% – sowat 5 000 passasiers – wanneer die e-tolstelsel ingestel word.

Die GMA beplan voorts om die bestaande Gautrein-stelsel met nuwe roetes na Soweto en die Oos-Rand uit te brei.

Die GMA moet glo bykomende onvoorsiene koste, soos die finalisering van grondeise, regskoste weens voortslepende arbitrasie en beplanningskoste vir toekomstige uitbreidings aan die Gautreinstelsel dek.

Die gelykbreekpunt vir die Gautrein is 110 000 passasiers per dag, maar die Gautrein vervoer tans net sowat 51 000 passasiers per dag.

In 2006 het die Gautengse regering ’n waarborg gegee dat die Gautrein-uitgawes gedek sal word indien hulle nie die vereiste aantal passasiers vervoer nie.

Die Gautengse regering subsidieer dié vervoerstelsel met sowat R1,5 miljard met 50 000 mense wat daagliks pendel.

Errol Braithwaite, woordvoerder van Bombela, het gesê die Gautrein se winsgewendheid en afhanklikheid van dat staatsubsidies, verteenwoordig nie ‘n krisis nie.

“Die Gautrein is ’n openbare vervoerdiensstelsel soos die metrobusstelsel en werk in baie opsigte soos rioolaanlegte en staatshospitale. Dié stelsels word nie bedryf om wins te maak nie, maar eerder om te verseker dat die samelewing behoorlik funksioneer.”

Braithwaite sê groot stede kan nie sonder doeltreffende vervoerstelsels uitbrei nie.

Hy sê in soortgelyke treinstelsels oorsee maak net 10% van die treinstelsels genoeg omset om bedryfskoste te dek. “Nêrens maak enige stelsel genoeg geld om kapitaalkoste ook te dek nie. Dit sal naïef wees om te glo die Gautrein moet anders wees.”

Die provinsie sal in 2013 sowat R820 miljoen aan waarborge betaal om te verseker die operateur sy koste verhaal.

Numsa KZN onttrek aan Cosatu se massa-optrede

Die KwaZulu-Natalse tak van die vakbond, Numsa het aan Cosatu se beplande nasionale massa-optrede onttrek.

‘n Woordvoerder vir Numsa, Mbuso Ngubane sê dit is onmoontlik om binne ‘n week optrede op dié groot skaal te reël.

Cosatu is van voornemens om vanaf môre, drie dae lank met massa-optrede vol te hou teen die e-tolstelsel en arbeidmakelaars.

Hy het gesê Numsa het aansoek gedoen vir ‘n Artikel 77 permit om ‘n protes te hou op ‘n latere datum.

Die massa-aksie sal vroeg volgende jaar plaasvind as die vakbond oorleg gepleeg het met sy lede, het Ngubane gesê.

Artikel 77 van die Wet op Arbeidsverhoudinge gee werkers die reg om deel te neem aan protesaksie om hul sosio -ekonomiese belange te bevorder of te beskerm.

Ngubane het ook voorgestel dat ‘n spesiale kongres gehou word om interne kwessies aan te spreek in Cosatu .

Hy het gesê op die oomblik gee “nasionale leiers van Cosatu en sy vennote indrukke aan die media wat verskil van wat werklik aangaan.”

Ngubane het gesê hy vind dit vreemd dat die president van Cosatu S’dumo Dlamini by verskeie provinsiale vergaderings gesê het dat daar nie geld is om die spesiale kongres te finansier nie.

“Dit is ‘n feit dat Cosatu nie betaal vir die reis -en verblyfkoste van affiliasies nie. Dus, wat is die uitgawes waarna die president van Cosatu verwys? ” het Ngubane gevra.

Numsa het gesê hulle is nie meer gemaklik met Dlamini as voorsitter nie.

“Ons raad aan die huidige president van Cosatu [ is dat hy ] [ sy ] tasse moet pak en gaan, want hy het versuim om Cosatu en die leierskap te verenig,” het Ngubane gesê. – Sapa

Twintig kinders deur huismoeder vergiftig

‘n Swart vrou van Mamelodi sal vandag in die plaaslike landdroshof in Pretoria verskyn nadat sy na bewering 20 kinders by ‘n kinderhuis buite die stad vergiftig het.

Die 35-jarige huismoeder is Vrydag in hegtenis geneem. Die polisie sê die motief moet nog vasgestel word.

Volgens RSG het die kinders die gif in ‘n poeiervorm tydens hulle middagete ingekry. Hulle het daarna oor diarree gekla en naar geword.

Twee van die kinders was in ‘n kritieke toestand en altwee is per helikopter na ‘n Johannesburgse hospitaal en die Steve Bikohospitaal in Pretoria gehaas.

Nog agtien is in verskillende plaaslike hospitale opgeneem. Agt van hulle is intussen weer ontslaan.

Die vrou staan tereg op aanklagte van aanranding met die doel om ernstig te beseer.