Suider-Afrika Archives - Page 148 of 888

Staat en vakbonde kom ooreen oor verhogings

Staatsdiensvakbonde en die regering het ‘n ooreenkoms bereik om salarisse met sewe persent te verhoog.

Reuters berig dat die ooreenkoms ‘n staking deur sowat 1,3 miljoen staatsamptenare afgeweer het.

Vakbonde wat by Cosatu ingelyf is, het aanvanklik ‘n verhoging van 15% geëis, maar dit later gedurende uitgerekte samesprekings na tien persent verminder.

Staatsamptenare sal ook verbeterde behuising- en mediese toelae ontvang.

Die Staat het vroeër aangedui dat hy nie ‘n algemene verhoging van tien persent vir staatsamptenare kan bekostig nie en by sy aanbod van 5,8% gehou.

Daar word reeds 400 miljard rand aan die salarisse van staatsamptenare uitgegee.

Duisende lede van sewe Cosatu-geaffilieerde staatsdiensvakbonde het vroeër die week in Pretoria betoog en gedreig met ’n landwye staking as daar nie aan hul eise gehoor gegee word nie.

Die hoofsekretaris van die staatsdiens se koördinerende bedingingsraad, Frikkie de Bruin sê die samesprekings was moeilik en dat dit die beste uitslag is waarvoor gehoop kon word.

Suid-Afrika val uit die Wiskunde-skoolbus

Dit blyk dat die meeste skoolkinders in Suid-Afrika steeds nie die mas opkom wanneer dit kom by wiskunde en wetenskap nie.

Die organisasie vir ekonomiese samewerking en ontwikkeling sê in ‘n verslag dat 90% van leerlinge nie die basiese vaardighede geleer word nie.

Die organisasie sê verder dat slegs sowat 70% van tieners in die land sekondêre skoolonderrig ontvang.

Intussen sê ‘n woordvoerder vir die departement vir basiese onderrig Elijah Mhalanga dat die verslag die departement help om vas te stel wat in die onderrigsektor moet verbeter.

Hy sê om ‘n ideale onderrigsituasie in die land te bereik, moet ouers, leerlinge, onderwysers, skoolbeheerliggame en die privaatsektor almal saamwerk.

Die verslag getiteld World Economic Forum’s Global Information Technology Report 2015 plaas Suid-Afrika laaste wat wiskunde en wetenskap betref.

Die afgelope 20 jaar is reuse bedrae geld aan onderwys gegee om die “foute van die verlede” reg te stel, sonder dat enige vooruitgang klaarblyklik gemaak is.

Die Oos-Kaap, Limpopo en KwaZulu-Natal word glo die meeste geraak deur die agterstand in infrastruktuur volgens ‘n verslag wat die SAMRK in 2004 vrygestel het.

Onderwysprobleme word tans op infrastruktuuragterstand blameer wat glo ook aan “foute van die verlede” gekoppel word. Volgens de verslag is talle toilette verstop.

Sedertdien het Equal Education en Section 27 begin met litigasie. Die litigasie steun op ‘n beëdigde verklaring van Ursula Hoadley van die Universiteit van Kaapstad se Skool vir Opvoedkunde navorsing waar sy ‘n skakel tussen die fisiese omgewing, onderrig en leerdoeltreffendheid, asook leeruitkomste as nou verwant stel.

Moedertaalonderrig speel egter ‘n baie groter rol in prestasie, maar pas nie die litigeerders se ideologiese projek om “gelykheid” te bevorder nie.

DA se etniese planne in PE ontbloot

Die ANC se sekretaris-generaal, Gwede Mantashe, het bewerings ontken dat hulle Danny Jordaan in Port Elizabeth gekies het om bruin kiesers te lok.

Jordaan se aanwysing as burgemeester van die Nelson Mandelabaai metropool is verdoem as ‘n politieke taktiek om bruin steun te werf.

Mantashe het in reaksie gesê Jordaan, ook president van die Suid-Afrikaanse Sokkervereniging, is ‘n bewese administrateur en bedrewe politikus.

Die DA het voorheen staatgemaak op bruines se antipatie teenoor swartes om stemme te trek. Die party is woedend oor Jordaan se aanstelling wat hulle eie ondermaanse etniese strategie ontbloot.

Die leier van die DA in die Oos-Kaap, Athol Trollip het uitgevaar teen die ANC in Port Elizabeth en gesê hulle bly dieselfde party wat die stad tot op sy knieë gedwing het.

Trollip het gesê die ANC is bang om politieke beheer te verloor en het misluk om ‘n gepaste kandidaat onder sy eie raadslede in Port Elizabeth te kry.

Bob Hewitt gaan ses jaar agter tralies deurbring

Die voormalige Grand Slam-tenniskampioen, Bob Hewitt (75), gaan ses jaar agter tralies deurbring vir seksuele misdade.

Die oud-tennisster is skuldig bevind aan verkragting en onsedelike aanranding wat hy dertig jaar gelede gepleeg het.

Op die eerste aanklag van verkragting is sy vonnis van agt jaar vir twee jaar opgeskort indien hy R50 000 aan die Departement van Justisie betaal vir bewusmakingsveldtogte.

Regter Bam het in sy uitspraak gesê Hewitt het net homself te blameer vir sy optrede en hy sou langer gesit het, minstens 20 jaar, as hy vroeër aangekla was.

Hewitt is in Maart vanjaar skuldig bevind aan twee verkragtings sowel as onsedelike aanranding van ‘n derde vrou. Hy het die vroue aangerand terwyl hy aan hulle tennislesse gegee het.

Drukgroepe en aktiviste het gekla dat Hewitt te lig daarvan afgekom het, maar die regter het sy swak gesondheidstoestand glo ook oorweeg. Hewitt het vroeër beroerte gehad.

Vrou herhaaldelik verkrag by weermagbasis

‘n Soldaat van die Tempe-weermagbasis in Bloemfontein sal na verwagting eerskomende Maandag in die plaaslike landdroshof om borgtog aansoek doen nadat hy glo ‘n jong meisie die afgelope naweek herhaaldelik verkrag het.

Die soldaat was vermoedelik swart.

Polisiewoordvoerder, Chaka Marope, sê die verdagte het Sondag in die vroeë oggendure glo ‘n 22-jarige meisie, wat ‘n geleentheid gesoek het, langs die pad in Nelson Mandelarylaan met sy motor opgelaai.

Volgens Marope het die verdagte na bewering die meisie na sy huis op die basis geneem en herhaaldelik verkrag.

Sy het daarin geslaag om weg te kom waarna die verdagte haar agternagesit het en weer verkrag het.

‘n Buurman het die meisie hoor skree en ondersoek gaan instel. Marope sê die verdagte is op die toneel in hegtenis geneem.

Hy bly in aanhouding nadat hy vandag vlugtig in die hof op ‘n aanklag van verkragting verskyn het.

Kovsies moet kampuskleuterskool sluit

Die private kleuterskool op die Universiteit van die Vrystaat se Bloemfontein-kampus, Tiny Professors, gaan volgende maand sy deure sluit.

Dit kom nadat die skool vroeër die maand ‘n brief, wat in OFM-nuus se besit is, aan ouers gestuur het waarin aangekondig word dat die skool op 5 Junie weens geldelike probleme gaan sluit.

In die brief word dit aan ouers gestel dat hulle hul kinders by die eienaar van die kleuterskool, Ricka van Kerkhof se dogter se skool in die stad kan inskryf.

Volgens die UV se Lacea Loader speel die skool ‘n belangrike rol by die universiteit en gaan nie sy deure sluit nie.

Die kleuterskool sien om na kleuters sedert 2012 nadat werknemers toenemende vir ‘n kleuterskool op kampus gevra het.

Intussen volgens ‘n ingeligte bron, wat verkies om anoniem te bly, is daar reeds vir ‘n geruime tyd probleme by die skool. Dit sluit glo onder meer swak versorging van die kinders in.

Tientalle kinders is al sedert die begin van die jaar deur hul ouers in ander kleuterskole geplaas.

Welkom woedend oor naamsveranderinge

Inwoners van Welkom is ontevrede oor die voorgestelde plek- en straatnaamsveranderinge in die Matjhabeng Plaaslike Munisipaliteit.

Van die voorgestelde veranderinge sluit onder andere Constantia-straat na Govan Mbeki-weg, Jan Hofmeyer-straat na Ahmed Kathrada-weg en Volksweg na Andrew Mlangeni in.

Inwoners kla dat sulke veranderinge nie versoenend is nie maar sal eerder verdeeldheid aanhelp.

Intussen het sakeondernemings van Welkom gesê hulle is ontevrede met die finansiële implikasies wat sulke naamsveranderinge tot gevolg sal hê, en dat daar belangriker sake is om op te fokus.

Daar sal hierdie Vrydag om 16:00 ’n openbare vergadering by die TS Du Plessis-saal wees waar inwoners hul menings kan lug.

Suid-Kaap: Voëls toets negatief vir voëlgriep

Talle dooie voëls in die Suid-Kaap is negatief vir voëlgriep getoets, het RSG berig.

Die staatsveearts is ontbied nadat dooie trekvoëls in die Wildernis-gebied ontdek is.

‘n Woordvoerder van SanParke, Nandi Mgwadlamba sê daar is geen teken van voëlgriep of Newcastle-siekte by die voëls opgespoor nie.

Dit blyk dat die voëls gevrek het van ‘n bakteriële infeksie wat in die grond voorkom.

Warm temperature is nodig om dit te versprei. Dit hou geen gevaar vir mense in nie.

Tshwane ignoreer omgedolwe oprit

‘n Montanapark-inwoner van Pretoria is warm onder die kraag na die plaveisel van haar oprit deur die Tshwane-metro in Desember opgegrawe is om ‘n gebarste waterpyp te herstel net so gelaat het.

Volgens Charmaine van der Walt is die plaveisel van haar eiendom in Besembiesiestraat sedert Desember opgegrawe.

“Die probleem het ontstaan nadat ‘n waterpyp gebars het. Na byna sewe dae het die metro die gebarste pyp herstel, maar die plaveisel net so omgedolwe gelaat. Na verskeie oproepe en e-posse het die metro belowe om iemand in Januarie te stuur om dit te herstel en ek wag nou nog,” het ‘n gefrustreerde Van der Walt gesê.

Van der Walt het gesê sy probeer haar huis verkoop, maar geen kopers wil die huis hê met plaveisel voor die oprit wat omgedolwe is nie.

Sy versoek die metro om die plaveisel so spoedig as moontlik te herstel om enige verdere ongerief te vermy.

Die metro het op verskeie navrae van Rekord Noord wat aan hulle gerig is nie gereageer nie.

Liggaam van vrou in motor gevind

Die liggaam van 34-jarige vrou is Maandagoggend in haar motor by Boardwalk Office Park in Faerie Glen, Pretoria gevind, het die polisie se woordvoerder ao Dave Miller gesê.

Miller het gesê die motor is gevind in die parkeerterrein van die kantoorpark.

‘n Ooggetuie, wat anoniem wil bly, het gesê die vrou is glo by ‘n kafeerestaurant regoor die kantoorpark Sondagnag opgemerk.

“Ek het by die kantoor opgedaag teen 07:50 en polisie op die toneel aangetref. Die liggaam is verwyder omstreeks 10:00. Van wat ons kon sien, was sy ‘n wit vrou.”

Miller het gesê hy kan nog nie die tyd en die oorsaak van die onbekende vrou se dood bevestig nie.

Hy het gesê ‘n nadoodse ondersoek sal gedoen word.