Nuwe aanklagte teen Angola se Dos Santos

Nuwe bewyse dat die Angolese president Jose Eduardo dos Santos miljoene uit die staatskas in die laat 1990’s in sy eie sak gesteek het, het na vore gekom. Dit hou verband met die terugbetaling van skuld na ‘n ooreenkoms tussen Angola en Rusland.

Die Londense waghond Corruption Watch het Dinsdag ‘n verslag vrygestel waarin beweerd word dat Dos Santos, top-olie amptenare en politici uit terugbetalings na Rusland deur middel van ‘n middelman voordeel getrek het.

Hierdie nuwe bewyse is aan aanklaers in Berne, Switserland Vrydag oorhandig.

Die organisasie wil ‘n nuwe ondersoek ingestel hê na “skokkende gevalle van bedrog en misleiding deur senior politici, amptenare en twyfelagtige sakelui, aangehelp deur die internasionale finansiële instellings, om hul eie burgers te beroof vir persoonlike gewin”.

In 1996 het Rusland aan Dos Santos se MPLA-regering, wat betrokke was in ‘n bloedige burgeroorlog, ‘n reeks lenings ten bedrae van $5 miljard dollar toegestaan.

Dit was twee-derdes van Angola se hele jaarlikse ekonomiese uitset.

Die geld is via ‘n tussenganger Abalone Investments betaal, vir dié doel deur sakemanne Arcadi Gaydamak en Pierre Falcone opgerig.

Die maatskappy word daarvan beskuldig dat hulle so veel as $750,000,000 van die Angolese regering se skuldterugbetalings gesteel het terwyl sommige individue, insluitende Dos Santos, $36.250.000 ontvang het via frontmaatskappye.

Volgens die verslag, het Rusland uiteindelik baie minder as die ooreengekome bedrag aanvaar.

‘n Vorige ondersoek is in 2004 in Switserland laat vaar.

“Elke element van hierdie komplekse transaksie versterk net hoe korrup die transaksie was, ‘n afpersingskema van globale omvang, wat die middelman en elite in Angola en byna seker Rusland bevoordeel het, met die hulp van ‘n groot Switserse bank,” lui die verslag.

‘n Angolese regeringswoordvoerder kon nie dadelik reageer op die bewerings nie.

“Switserland se bankstelsel het toegelaat dat hierdie geld gesteel word uit een van die wêreld se armste lande,” sê David Mendes, ‘n Angolese prokureur en die opposisiefiguur.

Korrupsie is algemeen in Angola wat 157ste van 174 lande in Transparency International se korrupsie-persepsie-indeks verlede jaar gestaan het.

Ten spyte van hierdie massiewe olie-rykdom, met grootskaalse wanbesteding van openbare fondse, bly die land een van die heel armstes ter wêreld.

Vliegtuig stort in dam

‘n Vliegtuig het gisteraand in ‘n dam in Noordwes neergestort.

‘n Beeswagter het die vliegtuig naby die Modimoladam by Mmabatho gesien, het brig. Thulani Ngubane van die polisie in Noordwes gesê.

Die vliegtuig het tussen 17:30 en 18:00 in die water geval. Die polisie kon nie by die ongelukstoneel uitkom nie en het Dinsdagaand gewag op bote wat van Klerksdorp op pad was om te help met die soektog.

Weens die donker kon die polisie nie gisteraand ondersoek instel voordat die bote opgedaag het nie. Die dam is groot en diep, het Ngubane gesê.

Twee mense was vermoedelik in die vliegtuig – ‘n vlieënier en ‘n assistent.

Die polisie vermoed dit was ‘n opleidingsvliegtuig wat van die nabygeleë Mafikeng-lughawe opgestyg het.

News24 het berig dat dit moontlik ‘n Tiger Moth is, maar dit kon nie teen druktyd bevestig word nie.

Min belangstelling in wit meisie wat wreed deur bruines vermoor is

Haar dogter Kirsty is soos ‘n dier vermoor, sê die moeder van ‘n wit tiener wat deur bruin vriende glo op ‘n wreedaardige wyse vermoor is.

Sylvia Theologo was Dinsdag ontsteld toe die moordverhoor in die hooggeregshof in Palm Ridge aan die Oos-Rand uitgestel is.

Die familie het buite die hof met plakkate betoog.

Kirsty (18) en ‘n 14-jarige vriendin (nou 16) is op 21 Oktober 2011 saam met ses bruines na ‘n koppie tussen Rosettenville en Linmeyer in Johannesburg.

Die bruines het volgens die klagstaat die twee meisies met voorbedagte rade na die koppie gelok. Hulle het die twee niksvermoedende wit tieners begin aanrand en Kirsty teen die kop en in die gesig met ‘n klip geslaan.

Daarna het hulle petrol oor albei meisies gegooi en aan die brand gesteek.

Die beskuldigdes het gemaak dat hulle wegkom, maar die erg beseerde Kirsty met brandwonde oor haar hele lyf, het nogtans ‘n hele kilometer na haar huis teruggestrompel. Sy is enkele dae later in die hospitaal aan haar beserings oorlede.

Haar vriendin het die aanval oorleef, maar het ernstige letsels van die aanval oorgehou.

Isha Harvey (24), Robin Harwood (19), Lindon Wagner (23) en Courtney Daniels (18) staan tereg op aanklagte van moord, poging tot moord en aanranding met die opset om ernstig te beseer. Twee ander bruin verdagtes Jeremy King en ­Lester Moody (albei 19) het verlede jaar skuld beken en ‘n pleitooreenkoms met die staat bereik.

Hulle is elk tot 17 jaar tronkstraf gevonnis weens die moord waarvan vyf jaar opgeskort is.

King en Moody sal na verwagting albei as staatsgetuies optree as die verhoor weer hervat.

Dit wil voorkom asof die aanval uitsluitlik weens rasvooroordele plaasgevind het. Kirsty Theologo se moord geniet egter feitlik geen aandag in die media nie.

FW voel geëerd om Thatcher-begrafnis by te woon

Oudpres. FW de Klerk het Dinsdag gesê hy voel geëerd om uitgenooi te word om die voormalige Britse premier Margaret Thatcher se begrafnis in Londen by te woon.

“Ek is geëerd om Margaret Thatcher as ‘n vriendin te kon hê,” het De Klerk in ‘n verklaring gesê.

“Ek voel geëerd om deur die Britse regering en die Thatcher-familie Londen toe genooi kon word om die begrafnis van barones Thatcher by te woon.”

Thatcher se begrafnis word Woensdag gehou.

Koningin Elizabeth II en verskeie ander hoëprofiel-gaste sal die begrafnis bywoon.

Thatcher het op 8 April in die ouderdom van 87 gesterf nadat sy ‘n beroerte gehad het.

De Klerk het gesê Thatcher sal onthou word as ‘n leier wie se beleidsrigtings en benadering ‘n aansienlike invloed gehad op politiek regoor die wêreld.

WikiLeaks, Mbeki, Hani, Zille en Zuma

WikiLeaks se mees onlangse vrystelling, wat geen wette in die VSA oortree nie, sluit ook diplomatieke kabelgramme oor Suid-Afrika in. Dit werp lig op verskeie onderwerpe wat tans onder bespreking is, soos die verhouding tussen Chris Hani, Thabo Mbeki en die DA.

In 1991 was die spanning tussen Mbeki en Hani glo tasbaar. “As Mbeki en Hani (48) nog steeds ‘n hegte vriendskap het, sal ons verbaas wees,” sê een kabelgram. “Hani se hantering van die gewapende aksie-werkgroep, waarin hy was, het veel te wense oorgelaat – al het hy – toegegee – ‘n baie moeilike taak. Hani daag nie op vir gesamentlike werkgroepvergaderings nie, selfs nadat sy omstrede vrywaringstatus opgelos is. Sy ANC-kollegas kan nie sy afwesigheid aan ons verduidelik nie.”

Die kabel gaan voort om die twee mans se politieke style te kontrasteer: “Mbeki het ‘n onbewoë, beredeneerde benadering tot kwessies … Hani is meer ‘n man van die mense.” Die gewildheid van die laasgenoemde kan lei tot ‘n magstryd, waarsku die skrywer : “Baie waarnemers glo dat Hani Mbeki sal kan klop indien daar ‘n populêre stem onder ANC-ondersteuners gehou word.”

Tydens ‘n vergadering met die Amerikaanse ambassadeur in April 1993, enkele dae ná die sluipmoord op Hani, spreek Mbeki sy kommer uit “oor oordrewe mediafokus op die “woede” van die ANC ná Hani se moord. “Oliver Tambo en hy het na Hani se huis gegaan, na die moord en het nie mense kwaad gesien nie, net woedend en ontsteld,” lui die kabelgram.

In Mei 1995 word die State Department ingelig dat die man wat president sal word, se styl van leierskap kommer wek. “Mbeki kom nie afsprake na nie, en dokumente lê in sy in-mandjie vir weke,” lui dit. “Hy kan nie besluitneming delegeer nie, en put homself uit deur oormatig betrokke te raak in die fynste besonderhede oor ‘n verskeidenheid sake.” Die kabelgram neem ook kennis van meer persoonlike aspekte van Mbeki se karakter: “‘n Gerespekteerde vroulike joernalis en jarelange ambassadekontak het vertroulik vir ons gesê dat sy een-tot-een-sessies met Mbeki vermy, want hy soek seksuele toenadering.”

Die kabelgram gaan verder waar die opsteller sy verligting uitspreek dat niemand weet hiervan nie. “Maar sulke stories is relatief skaars [in die media], en Mbeki het die reputasie van ‘n ‘rokjagter’ nog vrygespring.”

Die opposisie in Suid-Afrika kom ook onder die loep. Bio-notas oor DA-leier, Helen Zille, wat in Oktober 2007 geskryf is, verwys na Zille se hoof van personeel Paul Boughey wat Zille beskryf as ‘n “impulsiewe besluitmaker, wat dit moeilik maak om haar te bestuur”. Ander bronne, sê die kabelgram, gebruik woorde soos “obsessief en kompulsief”.

Die opsteller in ‘n ander kabelgram dink duidelik niks van die Afrikanersteun wat Tony Leon vir die DA kon monster met sy ‘Fight Back’-veldtog nie.  Die opsteller meen dat Zille aan die party ‘n “skoon lei” kan bied want na die leierskap van Leon het Suid-Afrikaners ‘n beeld van Leon in hul kop van iemand “kinders in ‘n dorp uit ‘n helikopter skiet, selfs al het dit nooit gebeur nie”. Die negatiewe konnotasie met Afrikaners is duidelik uit die kabelgram.

Julius Malema se naam verskyn gereeld in die kabelgramme van 2005 af. Sy opgang as katalisator word in Desember 2008 beskryf as “Die Einde van die ANC Intellektuele?”.

Die skrywer is bekommerd oor “die toekoms van die regerende party as ‘n plek van idees”. Die kabel kla dat die dae van Angelsaksiese invloed oor Sisulu, Tambo, Mandela, Mbeki, Slovo en Hani verby is. “Die ANC is steeds die standaard-draer van intellektuele denke vir bevrydingsbewegings, maar die party het gesukkel om in die afgelope jaar baie van sy tradisies in stand te hou.”

Onder Zuma, spreek die skrywer sy vrees uit oor hierdie afname van invloed. “Sonder ‘n sterk intellektuele sentrum, sal die party waarskynlik sukkel en kwesbaar word vir die verskynsel van persoonlikheidskultus en toegang tot staatsbegunstiging,” kom die skrywer tot die gevolgtrekking. Kennelik nie ‘n toestand wat die VSA graag wil sien gebeur nie, aangesien dit hulle invloed verder sal verminder.

Zim kry amper miljard van SA

Suid-Afrika gaan nagenoeg R900 miljoen se begrotingshulp aan Zimbabwe leen om ‘n te help in die komende algemene verkiesing.

So het Tendai Biti, Zimbabwe se minister van finansies, gesê.

Volgens Biti het Zimbabwe Suid-Afrika en Angola verlede jaar genader om finansiële steun van R1,3 miljard.

“Na aanleiding van gesprekke sedert September 2012 het die Suid-Afrikaanse kabinet tot ‘n besluit gekom – ‘n positiewe besluit,” het Biti gister op ‘n mediakonferensie gesê.

Hy het ook bevestig dat hy Suid-Afrika nog sowat R400 miljoen gevra het om die algemene verkiesing, wat later vanjaar plaasvind, te finansier.

“Dit is duidelik dat die tesourie die verkiesing nie kan bekostig nie.

“Ons gaan nie weer voor die verkiesing geld leen nie,” het Biti gesê.

‘n Woordvoerder van die Suid-Afrikaanse tesourie het gister gesê die twee regerings “voer gesprekke” oor die lening en die voorwaardes, maar wou niks meer sê nie.

Zimbabwe het ook by die Verenigde Nasies (VN) aangeklop om geldhulp.

Biti het gesê Zimbabwe sukkel steeds finansieel weens die resessie, al het pres. Robert Mugabe en Morgan Tsvangirai, premier, in 2008 besluit om regeringsmag te deel.

‘Skiet die boer’ het terreur aangemoedig

Die aanhoudende gesing van die liedjie “Skiet die Boer” deur die geskorste leier van die ANC-jeugliga, Julius Malema, het die optrede van ‘n veroordeelde terroris beïnvloed, het die rondgaande hof op Phalaborwa Maandag gehoor.

Die kliniese sielkundige Franco Visser het volgens die SABC in die vonnisverrigtinge van Georgios Kiratzidis, Martinus Vorster en Ruan Louw getuig.

Visser het gesê die herhaling van dié liedjie deur Malema, sowel as die moord op die AWB-leier Eugene Terre’Blanche, het Kiratzidis se emosionele toestand geweldig beïnvloed.

Dié drie het beplan om die huise van ANC-leiers, sowel as busse en townships, met bomme te teiken. Hulle is skuldig bevind op aanklagte van onder meer sameswering om terroriste-aanvalle uit te voer, die onwettige vervaardiging en besit van plofstof, en die onwettige besit van vuurwapens en ammunisie.

Olifant keer toeriste se kar om

‘n Paartjie is Maandagoggend ernstig beseer toe ‘n olifant hul motor in die Kruger Nasionale Park omgegooi het. Die man is ‘n Pool en sy vriendin Chinees.

Slegs die man het sigbare beserings opgedoen, het William Mabasa, woordvoerder van die park, gesê. ‘n Helikopter, plaaslike dokter en paramedici is na die toneel ontbied.

“Dit is onduidelik hoekom die olifant aggressief geraak het. Ons wil die publiek egter versoek om altyd op die uitkyk te wees vir hierdie groot diere en om te probeer om nie te naby te kom wanneer een op die pad aankom nie,” het Mabasa in ‘n verklaring gesê.

“Ons is in kennis gestel dat die man ‘n paar gebreekte ribbes en interne bloeding het. Toetse op hom is nog nie afgehandel nie. Die vrou kla van rugpyn en ons wag vir haar X-strale.”

Hulle is na die Clinix Phalaborwa-staatshospitaal geneem. Die park se bestuur sal die man se besonderhede bevestig en die ambassade in kennis stel.

Kanadese student (22) in Vereeniging verkrag

‘n Kanadese student (22) wat as deel van haar kursus maatskaplike werk in Suid-Afrika doen, is oor die naweek naby Vereeniging verkrag. Die voorval word beskryf as ‘n “huisroof wat skeefgeloop het”.

Die student en haar huismaats, wat almal uit Westerse lande afkomstig is en welsynswerk in Suid-Afrika doen, is Saterdagnag deur rowers oorval. Die presiese rede waarom sy die enigste is wat verkrag is, is nie duidelik nie.

Om die identiteit van die meisie te beskerm, word die presiese ligging van die voorval tans vertroulik gehou. ‘n Woordvoerder het egter gesê: “Dit is sleg, baie sleg, ook vir ons land. Al hierdie meisies kom na Suid-Afrika om welsynswerk te doen, in kinderhuise en arm gebiede. Almal is baie geskok. Die nuus versprei reeds dat jong vroue wat Suid-Afrikaners kom help, goedsmoeds verkrag word.”

Blykbaar het die meisie die nodige behandeling by die trouma-eenheid van die plaaslike polisiestasie ontvang. Die polisiestasie, wat onder die bevel van ‘n Afrikanervrouekolonel staan, is goed toegerus om verkragtingslagoffers te hanteer.

Suid-Afrika is by verre die wêreld se swaargewigkampioen as dit by verkragting kom. Volgens statistieke van die polisie en ondersoeke deur die Mediese Navorsingsraad, word tot 1,3 miljoen vroue jaarliks in die land verkrag. Dit is meer as in die oorloggeteisterde Demokratiese Republiek van die Kongo wat deur die Verenigde Nasies as ‘n “menseregteramp” verklaar is. Volgens VN-syfers word ongeveer ‘n miljoen vroue per jaar in die DRK verkrag.

Tot 75% van Suid-Afrikaanse vroue sal ten minste een keer in hul lewens verkrag word. ‘n Vrou se kanse om verkrag te word, is groter as om matriek deur te kom.

Woolworths en ander supermarkte verkoop vleis met verkeerde etikette

Gewilde supermarkte soos Pick n Pay, Shoprite, Fruit and Veg City, Woolworths en Spar tel onder die winkelgroepe wat vleisprodukte verkoop waar die vleis nie met etikette ooreenstem nie, het City Press Sondag berig.

Dié winkelgroepe het volgens die koerant egter gesê die probleem word geskep deur vleisborde, sae, hande en toerusting wat gebruik word om een vleissoort te hanteer, wat dan in kontak kom met ander vleis.

Whitey Basson, uitvoerende hoof van Shoprite, het aan die koerant gesê daar is “geen opsetlike vermenging om klante te mislei nie”.

‘n Studie deur die Universiteit Stellenbosch (US) het getoon dat bykans 60% van 139 produkte wat getoets is, bestanddele bevat het wat nie op die etikette aangedui is nie, insluitend donkie en waterbuffel, sowel as bok- en varkvleis.

Altesaam 20 van die 32 Shoprite-produkte wat getoets is, se etikette was nie akkuraat nie.

Basson het ook gesê party van die bevindings maak nie sin nie.

“Geen slagter wat by sy volle verstand is, sal opsetlik ‘n klein persentasie lamsvleis, wat meer per kilogram kos, by wors van bees, wat goedkoper is, voeg nie.”

Peter Arnold, direkteur van voedselprodukte vir Pick n Pay, het op sy beurt gesê die hoeveelheid onverklaarde produkte wat in die studie deur US gevind is, is “baie klein”.

Louw Hoffman, die wetenskaplike agter die studie, het gesê verkeerde etikette is “algemeen” in Suid-Afrika.