Soldaat voor oor moord op polisiehoof

Tirhani Maswanganyi
Tirhani Maswanganyi

‘n Weermaglid is een van die vier mans wat daarvan beskuldig word dat hulle die moord op die Johannesburgse polisiehoof maj. genl. Tirhani Maswanganyi beplan het, het die Pretoria-Noord-distrikhof Dinsdag gehoor.

Maswanganyi sou as getuie optree in ‘n belangrike korrupsiesaak en daar word vermoed dat dit die motief vir die moord was.

Ndaedzo Isaac Vele (29), Tshepo Mosai (30), Roger Godfrey Moseki (33), en Nditsheni Daniel Nefolohodwe (32), het vlugtig Dinsdag vlugtig in die hof verskyn voor hul borgtogaansoeke tot Donderdag uitgestel is.

Maswanganyi (51) se lyk is op 17 Junie naby Hammanskraal in ‘n veld, noord van Pretoria, gevind.

Sy hande en voete was vasgebind en sy verlate bakkie is langs die R101 gevind.

Lucas Moseki, staatsaanklaer, het gesê die staat sal borg vir die vier beskuldigdes teenstaan.

Die beskuldigdes staan tereg op aanklagte van moord, beplande moord, roof met verswarende omstandighede asook daarvan dat hulle ‘n voertuig sonder die eienaar se toestemming bestuur het.

Vele het in ‘n beëdigde verklaring wat aan die hof voorgelees is, gesê hy is ‘n soldaat. Hy vrees dat hy geskors kan word indien hy vir te lank in aanhouding is. Hy het verder gesê sy verloofde is swanger met hul eerste kind en sal in November kraam.

Vele het ook erken dat hy voorheen veroordeel is op aanklag van verkragting, waarvoor hy ‘n opgeskorte vonnis opgelê is.

Op die dag van die moord het hy sy bevelvoerder by die OR Tambo Internasionale Lughawe opgelaai en daarna ‘n paar goed vir haar gedoen.

Vele se bevelvoerder het in ‘n verklaring bevestig dat hy haar daardie dag by die lughawe gaan haal het.

Die bevelvoerder se verklaring is nie geverifieer nie en kan dus nie ingedien word as bewys nie.

Stander het gesê die borgaansoek kan nie voortgaan totdat dit nie gedoen is nie. – Sapa

Dodetal styg ná skietery by Grootvleimyn

Grootvleimyn
Grootvleimyn

Altesaam sewe onwettige mynwerkers het gesterf toe ‘n geveg in ‘n mynskag in Brakpan-Noord aan die Oos-Rand uitgebreek het. Nóg 12 is gewond.

Nooddienswerkers het aanvanklik op vier lyke afgekom by die Grootvleimyn.

Volgens berigte is skote die naweek afgevuur toe ‘n ondergrondse geveg tussen twee groepe onwettige mynwerkers uitgebreek het.

Sommige families beweer hul familielede is steeds vermis. Soek en reddingspanne sal later vandag besluit of hulle sal voortgaan met hul soektog na vasgekeerde onwettige mynwerkers.

Sewe liggame is sover gevind nadat skote gevuur is tydens ‘n ondergrondse botsing tussen twee strydende groepe werkers.

‘n Woordvoerder van die Ekurhuleni Nooddienste, Rogers Mamaila sê twee vlakke van die mynskag is deurgesoek sonder dat enige iemand gevind is en nog een vlak sal gefynkam word voordat ‘n besluit geneem word. – Sapa

ANC erken Zim-burgers se aandeel in SA

Zim-wynkelners slaag die toets
Zim-wynkelners slaag die toets

Gwede Mantashe, die ANC se sekretaris-generaal, het het toegegee dat pres. Robert Mugabese stelling dat Zimbabwiese burgers Suid-Afrika se ekonomie oorgeneem het, waar is.

Hy gesê Suid-Afrika kan by Mugabe gaan kers opsteek wat betref beleggings in onderwys en opleiding.
Hoewel “dit erg is om by Mugabe te hoor”, is dit nie onwaar nie, het Mantashe by ‘n inligtingsessie erken.
“In die landbou en gasvryheidsbedryf is daar orals Zimbabwiërs omdat ons jongmense blykbaar dink sulke tipe werk is benede hulle.”
Hy het ook Zanu-PF daarvan beskuldig dat hy die ANC wil destabiliseer met Julius Malema se Ekonomiese Vryheidsvegters (EFF), maar nie meer besonderhede gegee oor dié poging nie.
Mantashe het verklaar dat Malema se nuwe politieke beweging deur Zanu-PF gedryf word en daarom afwyk van die Vryheidshandves “en baie meer met Mugabe en Zanu-PF” te make het.
“Nêrens in die Vryheidshandves sê dit grond moet sonder vergoeding gevat word nie. Malema gaan te kere oor die besitreg van minerale onder die grond. Besit die staat dit nie reeds danksy wetgewing nie?”

Die ANC bekommer nie dat Malema die jeugstem gaan afrokkel nie. “Die jeug identifiseer met die EFF, akademici met (dr.) Mamphele (Ramphela) se Agang . . . die ANC is vir almal.”

Tsvangirai betwis vry en regverdige verkiesing

Morgan Tsvangirai
Morgan Tsvangirai

Die Zimbabwiese eerste minister, Morgan Tsvangirai, sê hy glo nie dat die land se verkiesingskommissie môre ‘n vry en regverdige verkiesing in die land kan hou nie, en het gevra dat die lede bedank.

Tsvangirai het aan meer as 50 000 ondersteuners in Harare gesê hy vrees dieselfde stemknoeiery wat die vorige verkiesings in 2008 ontsier het, sal weer voorkom.

Hy sê die land se Verkiesingskommissie het getoon dat hy nie gereed is nie, nadat chaos voorgekom het tydens die vroeë stemmery op 14 en 15 Julie vir lede van die polisie en weermag wat op stemdag aan diens sal wees.

Hy het gewaarsku dat politieke onrus kan voorkom indien mense van stemlokale weggewys word en daar vermoedens is dat daar met die stemme geknoei is.

Die hoof van die Verkiesingskommissie, Rita Makarau, het die kommissie verdedig en gesê hulle is gereed om toesig oor ‘n geloofwaardige verkiesing te hou.

Met die ongenaakbaarheid wat sy politieke loopbaan reeds dekades lank kenmerk, het president Robert Mugabe gewaarsku Tsvangirai nie moet probeer om nie-amptelike uitslae aan te kondig indien die Zimbabwe Verkiesingskommissie (ZEC) versuim om hulle betyds vry te stel nie.

“[Mnr Tsvangirai] weet wat nie toegelaat word deur die wet nie. Die ZEC is die enigste organisasie watverkiesingsuitslae mag aankondig. Ek by voorbaat sê dat as jy ‘n wetbreker is, sal die polisie jou in hegtenis neem,” het Mugabe gesê. – RSG/Business Day

Onwettige dobbelmasjiene vernietig

slotmachineMeer as 400 onwettige dobbelmasjiene is in Mahikeng in Noordwes vernietig, nadat daarop beslag gelê is.

Die LUR vir Ekonomiese Ontwikkeling in die provinsie, Matlalepula Rosho, sê onwettige dobbelbedrywighede word deur hoogs gesofistikeerde sindikate uitgevoer.

Volgens die uitvoerende hoof van die provinsie se Dobbelraad, Themba Ngobese, is die wette oor die voorkoming van onwettige bedrywighede heeltemal voldoende, maar slenters verhoed behoorlike wetstoepassing.

Die onwettige operateurs het dikwels lasbriewe op ‘n tegniese punt betwis en kon daarin slaag om die deursoeking van die perseel te uit te stel.

Polisiebeampte gekaap

sapd2‘n Polisiebeampte is gewond nadat drie mans hom van sy dienspistool beroof en sy motor gekaap het, het die polisie in die Oos-Kaap Maandag gesê.

Die 45-jarige adjudant-offisier is Sondag in Mainstraat geskiet, waar hy stilgehou het, het kapt. Jackson Manatha gesê.

“Drie gewapende mans het die polisiebeampte en die ander insittende beveel om uit die motor te klim. Die beampte is van sy dienspistool beroof.”

Die mans het in die polisiebeampte se Toyota Corolla met die registrasienommer DWD 296 EC gevlug.

‘n Saak van poging tot moord en kaping word ondersoek. – Sapa

Verhoor oor Amcu-erkenningsooreenkoms uitgestel

Amcu-lede
Amcu-lede

Die Kommissie vir Versoening, Bemiddelling en Arbitrasie het ‘n verhoor oor die erkenningsooreenkoms tussen vakbonde en die platinummynmaatskappy Lonmin, tot aanstaande maand uitgestel.

Die mynvakbond AMCU het in Mei met onderhandelinge oor ‘n erkenningsooreenkoms begin.

Samesprekings tussen Lonmin en AMCU het vasgeval en die vakbond het die geskil na die KVBA verwys.

Die NUM het vroeër die maand ook ‘n geskil oor sy erkenning by Lonmin na die KVBA verwys, nadat die vakbond sy meerderheid by die myn verloor het en sy kantore teen die 16de van die maand moes ontruim.

Die NUM het daarna ‘n dringende aansoek by die Arbeidshof ingedien om Lonmin te keer om sy erkenningsooreenkoms op te skort.

Die hof het dié aansoek verwerp op grond daarvan dat dit nie dringend is nie.

Die vakbond Amcu het ‘n beroep gedoen op sy lede wat by Xstrata se Steelpoortmyn in Limpopo afgedank is, om nie deel te neem aan gewelddadige betogings nie.

‘n Mynwerker is Vrydag in onrus by die myn dood. Drie werkers is ook in hegtenis geneem nadat ‘n bus en ‘n vragmotor aan die brand gesteek is.

Die Amcu-takleier, Zeb Mabilu se broer, Leon Mabilu is die mynwerker wat Vrydag dood is.

Mabilu sê Amcu veroordeel Vrydag se geweld. Hy sê Amcu-lede gaan aanhou betoog, maar dit moet op ‘n vreedsame wyse geskied. – RSG

Vavi se klag van afpersing staan steeds

Vavi slaan terug
Vavi slaan terug

Die vrou wat ‘n klag van seksuele teistering teen Zwelinzima Vavi, hoofsekretaris van Cosatu, ingedien het, het die klag teruggetrek, maar Vavi oorweeg nogtans regstappe teen haar.

Die vrou het klag twee uur ná die begin van ‘n tugverhoor by Cosatu teruggetrek.

Vavi is bly dat die klag van seksuele teistering teen hom teruggetrek is, het hy Maandag gesê.

“Ek is bly die verhoor is gefinaliseer,” het Vavi in ‘n verklaring gesê.

“Ek hoop ons kan almal die sage agter ons sit sodat ons kan konsentreer op die werklike kwessies van die dag – om te verseker dat ons ‘n dinamiese vakbondfederasie het wat Suid-Afrika en die belange van werkers bevorder.”

Vavi het erken dat hy seks gehad het met die getroude vrou, wat ‘n werknemer is van Cosatu, en beweer sy het later probeer om R2 miljoen van hom te eis.

Hy het ontken dat hy haar verkrag het en gesê sy het ingestem om seks met hom te hê.

Sy het ‘n klag van seksuele teistering teen hom ingedien, maar Maandag tydens ‘n tugverhoor teruggetrek.

Hy het gesê hy sal met sy prokureur vergader om te sien of enige verdere stappe gedoen kan word oor die klag. Vavi sê sy aanklag van afpersing teen ‘n 26-jarige vrou wat hom van verkragting beskuldig het, staan steeds.

“In die lig van die skade wat my reputasie berokken is, sal ek met my prokureurs vergader om enige verdere stappe oor die kwessie te oorweeg.” – Sapa

 

Zim-verkiesing deur duisende waarnemers toegesak

zimsadcMinstens 20 000 plaaslike en buitelandse verkiesingswaarnemers sal vandag in verskeie gebiede in Zimbabwe ontplooi word in aanloop tot Woensdag se verkiesing.

Die land het meer as ses-komma-vier-miljoen geregistreerde kiesers, wat na verwagting hul kruisies sal trek om die beleërde koalisieregering te beëndig.

Die akkreditasieproses in Harare het deurgeloop onder logistieke probleme met duisende plaaslike waarnemers wat die naweek by akkreditasiesentrums opgedaag het.

Dit laat kommer ontstaan dat sommige nie betyds vir die verkiesing ontplooi sal kan word nie.

Die Zimbabwiese Verkiesingsondersteuningsnetwerk het die grootste groep waarnemers van meer as seweduisend. Die nasionale direkteur van die organisasie, Rindai Chipfunde Vava, het die Zimbabwiese verkiesingskommissie die skuld gegee vir die chaos.

Hy sê die organisasie moet nou bykomende dae meer betaal vir vervoer en akkommodasie vir hul waarnemers.

Die hoof van die Afrika Ontwikkelingsbank, Donald Kaberuka het sy hoop uitgespreek dat die komende verkiesing deur die kiesers en buurlande as geloofwaardig beskou sal word.

Die voormalige Rwandese Minister van Finansies sê Zimbabwe kan dit nie bekostig om nog ‘n tydperk van chaos en onsekerheid deur te maak nie. Kaberuka sê ‘n geloofwaardige verkiesing sal sakevertroue en beleggings aanhelp.

Dit sal Zimbabwe ook in aanmerking laat kom vir skuldverligting deur internasionale finansiële instellings soos die Internasionale Monetêre Fonds en die Wêreldbank.

Die voorsitter van die Afrika-unie kommissie, Nkosazana Dlamini-Zuma sê hulle is tevrede met Zimbabwe se voorbereidings vir die verkiesing op 31 Julie. Dlamini-Zuma het met Zimbabwe se kieskommissie en politieke partye vergader.

Die AU het ‘n span van 60 mense na Zimbabwe ontplooi om die verkiesing waar te neem. Die polisie in Zimbabwe het egter vroeër bevestig dat die MDC se verkiesings-organiseerder in hegtenis geneem is.

Dit volg nadat hy aangemeld het dat hy gemerkte stembriewe in ‘n asblik gekry het na vroeë stemmery.

Dlamini-Zuma sê die enigste kwessies wat by haar geopper is, is operasionale en logistieke bekommernisse.

Die organisasie Human Rights Watch betwyfel egter of die verkiesing geloofwaardig gaan wees. Die groep se Suid-Afrikaans direkteur, Tiseke Kasambala sê hulle is bekommerd oor die hoogs partydige aard van veiligheidsmagte in Zimbabwe en hulle vermoë om kiesers te intimideer.

Kasambala sê daar is al ‘n aantal voorbeelde van opruiende uitsprake deur die hoofde van veiligheidsmagte in die aanloop tot die verkiesing.

President Zuma is as bemiddellaar in die verkiesing aangewys.

Adjunkpresident Kgalema Motlanthe sê Suid-Afrika is vasbeslote dat aanstaande week se verkiesing in Zimbabwe ‘n regverdige weerspieëling van die wense van dié land se mense sal wees.

Duisende vlugtelinge het na Suid-Afrika gevlug na die geweld in die 2008-verkiesing wat ‘n duur humanitêre krisis vir die land geskep het. Sedert die eenheidsregering op die been gebring is, het die ekonomie begin herstel.

Voorbereidings vir die verkiesing het tot dusver nie glad verloop nie, terwyl die MDC beweer dat Zanu PF probeer om dit vir kiesers moeilik maak om te registreer.

Motlanthe het in ‘n onderhoud met Reuters gesê politieke bestendigheid is ‘n voorvereiste vir ekonomiese ontwikkeling en Suid-Afrika het ‘n gevestigde belang om te verseker dat daar vrede en bestendigheid in Zimbabwe is. – RSG

Vavi: SMS’se onthul joviale verhouding met ‘verkragte’ vrou

Vavi
Vavi

Die vrou wat Cosatu se hoofsekretaris, Zwelinzima Vavi van verkragting beskuldig sal haar storie vertel by die federasie se interne proses oor die aangeleentheid.

Die jongste verwikkeling is deel van ‘n reeks kwessies wat die druk op Vavi verhoog om af te sien van sy amp.

Verlede week is Vavi weer deur sy vyande in die vakbondfederasie daarvan beskuldig dat hy nie die belange van die werkersklas op die hart dra nie, dat hy hulle in die steek laat sy deur sy samewerking met die ANC-leierskap en dat hy die Suid-Afrikaanse Kommunistiese Party wil kalmeer.

In ‘n voorlegging aan die kommissie van ondersoek ingestel sedert verskeie aantygings teen Vavi gebring is deur die leiers van Cosatu-affiliasies – onder andere sy president, Sdumo Dlamini, sy adjunk-president, Zingisa Losi, die sekretaris-generaal van die Nasionale onderwys, gesondheid en Allied Workers’ Union, Fikile Majola, en die sekretaris-generaal van die Nasionale Unie van Mynwerkers, Frans Baleni – wys hulle op sy “regse neigings” deur af te wyk van Cosatu-resolusies.

Die 26-jarige werknemer van Cosatu het Vavi intussen daarvan beskuldig dat hy haar verkrag het in Januarie vanjaar.

Die vrou het ‘n klag by Cosatu gelê en daarna R2 miljoen van Vavi en sy vrou geëis in ruil daarvoor om nie ‘n kriminele klag te lê nie. Vavi het sedertdien ‘n klag van afpersing teen die vrou gelê.

Die Nasionale Unie van Metaalwerkers van Suid-Afrika (Numsa) se KwaZulu-Natal-tak was die eerste organisasie om uit te kom ter ondersteuning van Vavi. Numsa het gesê dat die verkragtingbewering teen Vavi polities gemotiveer is.

“Hierdie jongste verkragtingbewering kan nie losgemaak van die giftige, kwaadwillige en goed berekende politieke offensief gemik op die vernietiging van kameraad Vavi se politieke integriteit en aansien in die samelewing nie,” het Numsa se plaaslike sekretaris Mbuso Ngubane in ‘n verklaring gesê. Hy het gesê die unie is “ten volle agter” Vavi.

Die Azanian People’s Organisation het ook hul kommer uitgespreek oor of die bewerings binne die regerende alliansie as ‘n wapen gebruik word om Vavi te verswak in sy standpunte teen knoeiery en wanadministrasie in die land.

Vavi, in ‘n verklaring Saterdag, het erken dat hy ‘n verhouding met die vrou gehad het. Hy het daarop aangedring dat die seks met haar instemming plaasgevind het. In ‘n reeks SMS-boodskappe tussen Vavi en die vrou, was daar geen tekens van woede teenoor Vavi ná die beweerde voorval in Januarie nie.

Die SMS’e onthul tewens ‘n joviale verhouding tussen die twee. In Junie, het onbekende mense haar genader en probeer dwing om te beweer dat Vavi haar seergemaak het.

Die vrou beweer sy is R1-miljoen aangebied om so ‘n verklaring te maak en die gerusstelling gegee dat sy beskerm sal word. Op 11 Junie het sy aan Vavi ge-SMS: “Ek het slapelose nagte as gevolg hiervan, mense wat my wil dwing om sê dat jy my seergemaak het, wat inligting wil hê van my, ek dink nie ek wil meer werk by Cosatu nie … dit is alles te veel vir my. Ek kan nie, dit is ‘n siek wêreld van politiek.”

Op dieselfde dag, het haar man egter getwiet, “Zwelinzima jy is ‘n fokken hond” en Vavi later as ‘n verkragter beskryf.