Kategorie: Suider-Afrika

Suid-Afrikaanse nuus, d.w.s. sowel nuus uit Suid-Afrika én Suider-Afrika.

Jansen wil verswarting van universiteite bespoedig

Prof. Jonathan Jansen, rektor van die Universiteit van die Vrystaat, Donderdag op ’n vergadering van die Kaapstadse Kamer van Koophandel en Nywerheid gesê die verswarting van universiteite moet bespoedig word.

Hy sê die “swart woede” by universiteite is aangevuur omdat daar nie genoeg swart professors op kampusse is nie, en veral geen swart vroueprofessors nie.

Die verlinkse Jansen is besig om steun te verloor onder Afrikaners weens sy idees oor transformasie. Hy het tydens sy toespraak ‘n powere poging aangewend om die middelgrond te probeer beset en gesê hy word “van links én regs geklap” en dis waarom hy “staande bly”.

Hy het die gehoor probeer heuning om die mond smeer met stellings soos “sommige postkoloniale universiteite wat nou leë doppe is” veroordeel en gesê hy sal klem lê op “gehalte”. Jansen het waarskynlik na Zimbabwe verwys.

PRAAG, by monde van dr Dan Roodt, het al meermale voorgestel dat diegene wat aan ‘n hoë transformasiekoors ly gerus by die universiteit van Zimbabwe kan gaan inskryf aangesien hulle transformasie volvoer het.

Daar is ook druk op universiteite van die ANC om meer swart studente op te lei ten spyte van hul swak prestasie en Jansen het gesê hy kan 39 000 teen 2019 inneem, “maar nie ten koste van die gehalte nie”.

“Jy vra my om die samelewing te help ineenstort. Ter wille van die land se arbeidsmag sal ek dit nie doen nie.”

Jansen het reeds aangedui dat Afrikaans in die slag sal bly om sy doelwit te bereik. Hy het ‘n dwarsklap uitgedeel na dosente wat in die Afrikaanse Landbouweekblad publiseer en nie in “gehalte” publikasies nie.

Drankreus onttrek wyne met glasstukkies

Die drankreus, Distell, is besig om 45 wyne wat van Augustus verlede jaar by sy Bergkelder-aanleg gebotteleer is, weens die gevaar van glasstukkies aan die Suid-Afrikaanse mark te onttrek.

Van sy wyn in sewe ander lande, waaronder twee van Suid-Afrika se belangrike wynmarkte, Brittanje en Swede, word ook onttrek.

Agente in Japan het Distell in kennis gestel dat glasstukkies tydens ’n gehaltetoets in van die wyn gekry is.

Swart studente weet nie van Vigs

Wat is MIV/Vigs? Swart studente en personeel in hoër onderwysinstellings beweer hulle weet nie van die virus nie.

Hierdie openbaring blyk uit ‘n studie oor MIV/TB gedrag. Die bevindings is voorgelê by die Suid-Afrikaanse Vigs-konferensie by die Internasionale Konferensiesentrum in Durban.

Sewe en twintig persent van die studente en 10 persent van die personeel by Tegniese, Beroepsopleiding, Onderwys en Opleiding (TVET) kolleges in die land het gesê hulle het nog nooit gehoor van die siekte nie.

Sommige van die ander bevindinge toon ‘n roekelose benadering tot die gebruik van kondome, met byna die helfte van die studente wat aangedui het dat hulle dit alleen sal gebruik vir beskerming indien hul maat wil.

Die ander helfte maak nie gebruik daarvan nie.

Die president van TVET-kolleges, Helen Ntlatleng sê sy was geskok dat 500 van die 800 studente by een van die kolleges positief getoets het vir MIV, maar hulle is blykbaar nie bewus van hul status nie.

Hoër Onderwys en Opleiding Minister, Blade Nzimande, sê die oorwinning oor MIV/Vigs sal ‘n gesamentlike poging verg.

Groot polisieteenwoordigheid na skietery by Medupi

Die polisie moes in groot getalle by die Marapong-lokasie in Ellisras (Lephalale) in Limpopo ontplooi word na ‘n skietvoorval.

Lede van die polisie se taktiese-reaksie-eenheid en ander polisiebeamptes patrolleer tans die gebied.

Twee konstruksiewerkers van Eskom se Medupi-kragstasie is gewond in die skietery.

Van die werkers by die kragaanlegkonstruksie het Donderdag weggebly uit vrees vir hul veiligheid, nadat ‘n onbekende skieter losgebrand het op ‘n groep werkers wat gewag het vir vervoer na die bouperseel.

Twee weke gelede is daar op twee busse geskiet, en een van die bestuurders is in die skietery gewond.

Honderde busse het egter Vrydag werkers weer aangery sonder enige ontwrigting.

‘n Span ondersoekbeamptes is intussen ingeroep om die skietvoorvalle te ondersoek.

Suid-Afrika se ekonomiese groeivooruitsigte is afwaarts aangepas weens vertragings in die vordering van die konstruksie van nuwe kragaanlegte.

Na verwagting sal die ekonomie met twee persent groei. Sonder die kragonderbrekings sou die koers tussen 2,5 en 3 persent gewees het.

Die graderingsmaatskappy, Fitch, het vroeër die maand sy kredietgradering van trippel-B bevestig en gesê ‘n onbestendige kragtoevoer het daartoe gelei dat hy sy ekonomiese groeivooruitsigte vir vanjaar en aanstaande jaar afgeskaal het.

Die Minister van Finansies, Nhlanhla Nene, sê die regering is op koers om teen 2017 sy tekort tot 2,5 persent van die Bruto Binnelandse Produk te verlaag vanaf 3,9 persent in die huidige geldjaar.

Eskom het ‘n uur gelede weer begin om Fase Een beurtkrag toe te pas.

Kragonderbrekings sal tot vanaand tienuur toe toegepas word. Die kragverskaffer sê dit is weens ‘n hoër vraag en gebrekkige opwekkingskapasiteit.

Sterwende Shaik dreig wit joernalis met geweld

The Times het Woensdag berig dat die departement van korrektiewe dienste Schabir Shaik se versoek om ’n verslapping van sy paroolvoorwaardes toegestaan het op grond van “goeie gedrag”.

Maar president Jacob Zuma se voormalige finansiële adviseur, wat in 2005 tot effektief 15 jaar tronkstraf gevonnis op aanklagte van korrupsie en bedrog, is reg vir geweld en aanranding.

“Ek kon jou met die kop gestamp het. Ek sal jou breek, wit laaitie (white boy). Ek sal jou in jou p**s skop,” het Shaik Woensdagoggend volgens die News24-verslaggewer Giordano Stolley gesê toe dié hom telefonies gekontak het oor sy paroolvoorwaardes.

Shaik het gesê die verslaggewer kan nie die feit aanvaar dat “Suid-Afrika nie meer deur ’n wit regering geregeer word nie”.

Shaik het die joernalis uitgedaag om hom in persoon te konfronteer. Stolley, met 26 jaar ervaring, het geantwoord hy het aan die begin van die oproep gesê hy is ’n verslaggewer.

Shaik is in Februarie 2011 daarvan beskuldig dat hy ’n vrouejoernalis by ’n gholfbaan in Durban aangerand het. Hy het haar glo gewurg en geklap.

Shaik het die volgende maand na bewering ’n man buite ’n moskee geslaan.

Hy het glo in September verlede jaar ’n gholfjoggie by dieselfde gholfbaan aangerand.

Net ná sy vrylating op mediese parool kon Shaik vir een uur per dag uitgaan vir persoonlike take. Nou het hy agt uur per dag tot sy beskikking.

Die veglustige misdadiger beweer nogtans dat hy “sterwend” is.

Oproeriges gooi menslike ontlasting op N2

Munisipale werkers van Kaapstad was vroeër besig met opruimingswerk op die N2-hoofweg nadat oproeriges dit afgesper het.

Die hoofweg tussen Borchards Quarry en die Lughawe is intussen weer oopgestel vir verkeer.

‘n Verkeerswoordvoerder van die Kaapse Metro sê die hoofweg is om halfvier vanoggend gesluit weens oproeriges wat menslike afval op die pad gegooi het en buitebande aan die brand gesteek het.

Die oproermakers het op die vlug geslaan toe wetstoepassers op die toneel aangekom het.

‘n Polisieteenwoordigheid is in die gebied ontplooi en monitor die hoofweg.

Motorfietsdiefstalsindikaat in Noord-Kaap bedrywig

Die polisie in die Noord-Kaap ondersoek die moontlikheid dat twee verdagtes wat Woensdagaand in Cassandra in Kimberley in hegtenis geneem is, deel is van ‘n sindikaat wat motorfietse steel.

Polisiewoordvoerder, Sergio Kock, sê die gemeenskapspolisiërings (GPF)-eenheid in dié buurt het gister omstreeks 22:00 ‘n verdagte Toyota-bussie in die gebied gewaar en tot in die stad agtervolg.

Buurtwaglede het die bussie daarna afgetrek.

Kock sê die bromponie is vroeër in Belgravia as gesteel aangemeld.

Volgens hom sal die verdagtes binnekort in die plaaslike landdroshof op ‘n aanklag van die besit van ‘n gesteelde motorfiets verskyn.

Die polisie soek nog na die twee mans wat van die toneel gevlug het.

Suid-Afrika blink uit in natuurbewaring danksy boere

Die wêreld verloor sy biodiversiteit teen ’n onrusbarende tempo, maar Suid-Afrika neem die leiding om teen die verwoestende gety wal te gooi.

Dit is volgens Peet van der Merwe van die NWU se Potchefstroomkampus.

Volgens die Wêreldnatuurfonds is die huidige spesie-uitwissingkoers tussen 1 000 en 10 000 hoër as die natuurlike uitwissingskoers – dit is gelykstaande aan tussen 200 en 2 000 uitwissings elke jaar.

Van der Merwe sê dat die wêreld kyk met afguns na die wyse waarop die Suid-Afrikaanse privaatsektor en die regering ten opsigte van natuurbewaring saamwerk.

Hy sê die goeie samewerking en groei is te wyte aan die feit dat wild vir boere waarde inhou in terme van ekotoerisme, jag en herverkope met veilings.

Die Gouritzreservaat wat gedeeltelik in die Oos-en Wes-Kaap geleë is, isintussen deur UNESCO as ‘n Internasionale Biosfeerreservaat verklaar.

Die Gouritz Biosfeer is een van 22 nuwe terreine wat by UNESCO se bestaande Wêreldnetwerk van Biosfeerreservate in 120 lande gevoeg is.

Die Magaliesberg ekostelsel is ook goedgekeur, wat die totaal in Suid-Afrika op ses bring.

Die Gouritzreservaat sê hulle is verheug oor die aankondiging.

MRK oorval met rassisme-klagtes

Die meeste klagte wat by die menseregtekommissie gelê word, is in verband met rassisme, veral in die Vrystaat.

Kommissaris Mohamed Ameermia, verantwoordelik vir dié provinsie asook Noordwes, sê dit is kommerwekkend dat daar na 21 jaar van demokrasie nog steeds soveel klagte oor rassisme instroom.

Hy sê die MRK kan egter nie die stryd alleen stry nie en dit het tyd geword dat almal hande vat en mekaar respekteer.

Hy sê die kommissie het vanjaar saam met die onderwysdepartement ‘n massiewe opvoedingsprogram onder matrikulante van stapel gestuur. Dié veldtog moet nou glo verder uitgebrei word.

Indiërs in SA oorverteenwoordig in senior bestuursposte

Die Suid-Afrikaanse Instituut vir Rasseverhoudinge sê die armes en gemarginaliseerdes kry nie die hulp van die regering wat bedoel is vir hulle met die implementering van SEB ( Swart Ekonomiese Bemagtiging) nie.

Die Instituut se hoof van beleidsnavorsing, Anthea Jeffery, sê die regering het lank gesukkel om die Wet op Diensbillikheid van 1998 te verander wat werkgewers dwing om die nasionale demografie op senior, middel- en junior bestuursvlakke met rasseteikens te implementeer.
 
In terme van die nasionale demografie, is Indiërs slegs drie persent van die ekonomies aktiewe bevolking, maar 10 persent is in senior bestuursposte ontplooi.