Nuus Archives - Page 435 of 1583

Pakistan op ‘n mespunt

Die gewilde voormalige krieketspeler en nou politikus Imran Khan het vir wydverspreide burgerlike ongehoorsaamheid in Pakistan gevra.

Hy het ondersteuners aangemoedig om op te hou om belasting en dienste te betaal in ‘n poging om die regering van die Eerste Minister Nawaz Sharif omver te werp.

Die populistiese politikus is vasberade om sy uitdaging aan die magshebbers deur te voer. In ‘n toespraak na ‘n derde dag van protes in Islamabad, het hy gewaarsku dat hy binnekort nie langer in staat sal wees om sy ondersteuners te keer om die premier se huis te bestorm nie.

“Ons moet besluit wat om te doen met Nawaz Sharif, omdat hy al die wette ontduik, en hy die verkiesing gekook het,” het Khan aan ‘n skare van honderdeduisende gesê. “Ons kan nie toelaat dat hierdie onregverdige regime voortgaan nie.”

Die protes het die broosheid van Pakistan se demokrasie beklemtoon, en vrese van ingryping deur die land se weermag opnuut laat posvat. Volgens berigte het 300.000 betogers gehoor gegee aan Kahn se oproep.

In ‘n toespraak wat hy beskryf as die belangrikste toespraak van sy lewe, het Khan gesê geen belasting, insluitend BTW, en geen elektrisiteitsrekening moet aan ‘n “bedrieglike” regering betaal word nie.

Khan, wat voorheen ‘n veldtog gevoer het oor die “oppergesag van die reg”, het by vorige geleenthede die betaling van belasting aangemoedig.

Pakistan se lae belastinginsamelingskoers en ‘n onvermoë om verbruikers te kry om te betaal vir hul elektrisiteit is een van die land se mees dringende ekonomiese probleme.

Khan het ook gesê binnekort sal die “Rooi Sone” – ‘n gebied waar die Eerste Minister se huis en kantoor, die Parlement, ministeries, howe, ambassades, en veral die Amerikaanse ambassade is – nie meer veilig wees nie.

Die skare het by die vooruitsig van die afbreek van versperrings, die hardste gejuig. Sommiges het reeds hul gasmaskers aangehad, en sê hulle is gereed vir traangas.

Die Pakistanse regering moes Saterdag 30,000 veiligheidsmagte ontplooi teen die optog om Islamabad se sensitiewe gebiede te beskerm, in een van die grootste vredestydbetogings tot nog toe in Pakistan.

Intussen het Kahn ook die die CIA se stasiehoof ontmasker. Dit is die tweede CIA-hooggeplaasde wat deur Kahn uitgewys word.

In 2010 het hy Jonathan Banks ontmasker en onlangs vir Craig Peters Osth. Banks moes sy pos ontruim. Dié ongelukkigheid kom weens die VSA se aanhoudende aanvalle op burgerlikes mbv onbemande tuie in Pakistan.

Withuis probeer vasstel of Amerikaner onthoof is

Die Amerikaanse Withuis sê intellegensie dienste probeer vasstel of beeldmateriaal wat na bewering wys hoe ‘n Amerikaanse joernalis deur militante van die Islamitiese Kalifaat (ISIS) onthoof word, geloofwaardig is.

Die joernalis in die video is na bewering James Foley. Foley het twee jaar gelede in Sirië vermis geraak nadat hy deur gewapende mans ontvoer is oppad na die grens met Turkye, het RSG berig.

Nog ‘n Amerikaanse joernalis wat verlede jaar in Sirië vermis geraak het word in die video gewys, met ‘n boodskap dat sy lewe afhang van Amerika se optrede in Irak.

Amerika het die afgelope twee weke ‘n aantal lugaanvalle teen teikens van die Islamitiese Kalifaat uitgevoer, maar het tot dusver nie verder by die konflik betrokke geraak nie.

Foley se ma Diane het in ‘n boodskap op Facebook ‘n beroep op die militante gedoen om die lewens van die oorblywende gyselaars te spaar.

‘Rassisme’: Franse vrou in absentia gevonnis tot 9 mde tronkstraf en R750 000 boete

Die Franse munisipale kandidaat, Anne-Sophie Leclere, wat ‘n foto van die swart Franse minister van justisie Christiane Taubira tesame met dié van ‘n sjimpansee op haar Facebookblad geplaas het, is in Julie vanjaar tot 9 maande tronkstrof en € 50 000 (R750 000) boete gevonnis (sien praag-berig in Engels). Sy mag vir 5 jaar ook nie weer aan die politiek deelneem nie.

Dit blyk nou egter dat die oudkandidate van die Front National, wat sedertdien uit die party geskors is, in haar afwesigheid en sonder enige regsverteenwoordiging gevonnis is, volgens ‘n berig op ‘n nasionalistiese webwerf, Bloc identitaire. Wat die vonnis nog vreemder maak, is dat sy nie in Frankryk aangekla is nie, maar in Frans-Guyana, ‘n Suid-Amerikaanse kolonie van Frankryk wat deesdae as ‘n “oorsese departement” bekendstaan.

Die linkse swart minister van wie die foto geplaas, Christiane Taubira, is van Guyana afskomstig en het toutjies getrek om Anne-Sophie daar in absentia te laat verhoor omdat die antiblanke sentiment daar sterker as in Frankryk is. Sy is van laster en “aanhitsing tot rassehaat” aangekla.

Die gewraakte fotomontage op Facebook met minister Christiane Taubira waarvoor Anne-Sophie Leclere nou 9 maande tronk toe gestuur word en R750 000 boete moet betaal.

Tans is dit onduidelik of Anne-Sophie Leclere haar vonnis in Frankryk of in Guyana sal moet uitdien. ‘n Facebookblad ter ondersteuning van die voormalige politieke kandidaat is intussen in die lewe geroep en het reeds 16 775 mense wat daarvan hou. Selfs diegene wat voel haar fotomontage was “in swak smaak”, meen dat die tronkstraf en besonder hoë boete heeltemal buitensporig is.

Die meeste publikasies wat aan laster teen byvoorbeeld mev. Marine Le Pen in Frankryk skuldig bevind word, ontvang gewoonlik ‘n boete van €1000 wat opgeskort word en geen tronkstraf nie.

Namibië se ekonomiese vryheidsvegters kry bestand

Namibië se Verkiesingskommissie het die registrasie van die Namibiese Ekonomiese Vryheidsvegters as ‘n politieke party goedgekeur.

Julius Malema se EFF het dus ‘n amptelike susterparty in Namibië. Die Namibië Ekonomiese Vryheidsvegters (NEFF) is ‘n “radikale linkse”, anti-kapitalistiese en anti-imperialistiese beweging, het die sakeman en politikus Epafras Mukwiilongo vroeër gesê.

Mukwiilongo, “bevelvoerder” van die NEFF het gesê die nuwe party sal meeding in die nasionale verkiesings in Desember.

Namibië se Mukwiilongo was voorheen ‘n lid van beide die regerende Swapo en die opposisie Congress of Democrats.

Hy en sy adjunk, voormalige opposisie-jeugleier Kalimbo Iipumbu, het reeds gesprekke met Malema gevoer.

Die twee mans dra ook rooi uitrustings en rooi barette soortgelyk aan dié van die EFF, maar met ‘n NEFF-logo.

Mukwiilongo het gesê die skepping van die NEFF is die “geboorte van ‘n reus” wat veg vir ekonomiese vryheid en het die Swapo-regering van “kapitalistiese belange” ten koste van sy burgers beskuldig.

“Ons regering is besig om deur die bemagtiging van die Chinese en Indiërs plaaslike sakelui te vernietig,” het Mukwiilongo vroeër aan AFP gesê.

“Ons is ‘n baie ryk land wat kan sorg vir homself as die regering industrialisering en die verwerking van ons minerale in Namibië verseker,” het Mukwiilongo gesê.

Mukwiilongo gesê sy party sal ook homoseksualiteit teiken met befondsing uit Uganda.

“Vandag manipuleer/beïnvloed die imperialiste ons nasie deur homoseksuele praktyke,” het Mukwiilongo gesê.

“Die NEFF is verbind tot die vereniging van alle Namibiërs om hierdie bose praktyk uit te roei.”

Die M&G het intussen berig dat net ‘n handjievol regeringsamptenare van Swapo wat saamwerk met onder meer Kanadese maatskappye uit die olievonds aan die kus baat.

Pous, Hezbollah waarsku teen ISIS

Pous Franciskus sowel as die sekretaris-generaal van Hezbollah, Hassan Nasrallah, het hul kommer oor die lot Christengroepe in Irak uitgespreek.

Die Pous het aangedui dat hy bereid is om na Irak te reis om ondersteuning te gee aan vlugtelinge en Christengroepe in Koerdistan indien nodig.

Alhoewel hy meen dat ingryping deur die internasionale gemeenskap wenslik is om Islamitiese militante in Irak te stuit, moet die besluit nie van ‘n “enkele land” afhang oor hoe om in die konflik in te gryp nie.

Die Pous se oproep het wenkbroue laat lig aangesien hy homself tot dusver vir vrede uitgespreek het.

Nasrallah het Vrydag gesê lande soos Libanon moet nie glo dat die VN-resolusie 1701 hulle sal beskerm nie. Die kwessie is nie meer ‘n bron van gevaar vir ‘n enkele groep soos die Sjia, Soennies, Christene of Druze nie, maar ‘n gevaar vir almal, het hy gemaan.

Hy het gesê ISIS is besig met ‘n veldtog van totale vernietiging van alle godsdiensgroepe se kulturele erfenis van duisende jare. Die pluralistiese erfenis van Irak, Libanon, Sirië en Iran waar verdraagsaamheid eers geheers het, word deur ISIS bedreig. Hy het gesê Moslems kan hulself nie daarmee vereenselwig nie.

Die krisis vir Christene in die Levant is egter baie kleiner as die etniese uitwissing wat Westers-gesteunde faksies van die junta in die Oekraïene teen Russiese Christene voer.

Kiëf het doelbewus in Lugansk gedoen wat hulle reeds gedoen het in Slaviansk: Hulle het die stad se watertoevoer vernietig. In die tussentyd, het Kiëf se magte ‘n kolom van vlugtelinge uit die gevegsgebied aangeval met vuurpyle.

Meer as 2000 mense het reeds in die konflik omgekom wat deur NAVO en die VSA gedryf word.

Dit is ook noodsaaklik om te verstaan dat aanvalle op burgerlikes deel vorm van NAVO se aanvaarde aanvalsdoktrine waar lande na die “Steentydperk” teruggeneem word.

Die Amerikaanse Sekretaris Baker het in 1991 reeds aan Tarek Aziz van Irak belowe: “Ons sal jou land verwoes en dit na die Steentydperk terugneem.” Sedertdien het die VSA met die hulp van NAVO streng by die doktrine gehou.

Die “skok en verwondering” is in werklikheid ‘n manier om die burgerlike bevolking te teiken en te terroriseer. Dit is waarmee die VSA se militêre magte hulself besig hou en steun ook ver-linkse groepe om hul doelwitte te bereik.

Pous Franciskus het nie aangedui watter land hy bedoel by die “enkele land” nie. Hy sal glo Amerika aanstaande jaar besoek.

Hy het voorts gesê hy is gereed om enige tyd na China te reis.

Verdagte ontsnap in polisie-uniform

‘n Verdagte wat uit die polisieselle by Thohoyandou in Limpopo ontsnap het, is weer aangekeer.

Tshilidzi Nelson Masindi het twee weke gelede ontsnap en is tans onder polisiebewaking in die hospitaal, het RSG berig.

Hy het ernstige beserings opgedoen toe hy deur lede van die gemeenskap aangerand is oor die beweerde poging tot verkragting van twee vroue in Muledane Saterdag.

Masindi het daarna ontsnap vermom in ‘n polisie-uniform. ‘n Interne proses is aan die gang om vas te stel hoe hy die uniform bekom het.

Bouramp in Alberton eis 7

Die soektog na vermiste slagoffers onder die puin van ‘n betonblok by ‘n huis in Alberton, suid van Johannesburg, sal Dinsdag voortgaan.

Volgens Sapa is die dodetal minder as wat voorheen vermoed is. Sewe mense is dood met talle mense wat beseer is.

Daar is aanvanklik gedink dat nege mense dood is, omdat twee van die oorledenes klaarblyklik in twee gesny is.

Die voorval het gebeur tydens opgraderingswerk aan ‘n meenthuis in ‘n landgoed.

Inspekteurs het reeds die toneel besoek om die oorsaak van die ongeluk vas te stel.

Die departement van arbeid het gesê streng optrede sal teen die skuldiges geneem word.

Eskom ‘n tydbom weens swak instandhouding

Groot skade is aan die Duvha-kragsentrale aangerig ná ’n hewige ontploffing in die drukketel op 30 Maart vanjaar. Eskom swyg soos die graf oor die oorsake vir dié ontploffing wat ’n eerste in Eskom se geskiedenis is.

Kenners sê dit is ongetwyfeld omdat die eenheid nie onderhou word nie.

Eskom is so ver agter met instandhoudingswerk dat al hoe groter onstabiliteit van sy kragstasies ’n ernstige bedreiging vir die land se kragnetwerk begin inhou, het Beeld berig.

Nie-amptelike ingeligte bronne waarsku die gevaar van ’n algehele ineenstorting van kragsentrales word al hoe groter.

Die beskikbaarheid van kragsentrales wat krag kan lewer is veronderstel om meer as 85% te wees om veilig te wees, maar tot dusver vanjaar is net 75% beskikbaar weens onbeplande foute.

Eskom hoop hy kan dit vir die res van die jaar tot 77% verhoog, het dr. Steve Lennon, uitvoerende hoof vir volhoubaarheid, gesê.

Die nasionale beheersentrum wat ’n volskaalse ineenstorting moet afweer met laer kragverbruik en met beurtkrag indien nodig, moet bontstaan weens die swak beplanning.

Die sentrum moet ’n frekwensie van 50 Hz in al die verskillende onderdele van die netwerk handhaaf, anders stort die netwerk ineen. Daarvoor moet die vraag na en aanbod van beskikbare elektrisiteit presies dieselfde gehou word.

Dit sal ’n nasionale ramp wees en dit gaan baie moeiliker wees om die Suid-Afrikaanse netwerk ná ’n algehele ineenstorting aan die gang te kry as in ander lande omdat geeneen van die buurstate genoeg krag het om die Suid-Afrikaanse netwerk weer aan die gang te help kry nie, het ‘n bestuurder van die nasionale beheersentrum in Germiston gesê.

Die gevaar is dat die 13 steenkoolkragsentrales oud is en boonop harder moet werk as hul ontwerpvermoë en nie genoeg vir noodsaaklike instandhouding afgeskakel kan word nie. Die sentrales moet nog minstens 15 jaar voluit werk, “maar heeltemal inmekaar kan stort voor dan” het ’n topamptenaar in die organisasie gesê.

Tot dusver het Eskom sy duur dieselopwekkingseenhede gebruik om tekorte tydens instandhoudingswerk te verlig, maar dit hom in sy jongste boekjaar R11,3 miljard aan diesel gekos, terwyl hy veronderstel was om net R2,5 miljard aan dié energiebron te bestee.

’n Ingenieurskonsultant wat sedert begin vanjaar ondersoeke by verskeie van die 13 steenkoolkragstasies gedoen het, het gesê die erns van die instandhoudingsagterstand is skokkend en word hopeloos onderskat.

Swarte wat staatsgrond verkoop gevonnis

‘n Swartman wat op 94 aanklagtes van bedrog skuldig bevind is nadat hy staatsgrond verkoop het, is met vyf jaar tronkstraf gevonnis.

“Richard Zikhali kon 10 jaar tronkstraf gekry het vir sy misdaad, maar die landdros het in ag geneem dat hy reeds vier jaar in die tronk gesit het, omdat hy sedert sy inhegtenisname in 2010 borgtog geweier is,” het Motsamai Motlhaolwa, woordvoerder van die departement, gesê.

Zikhali se vrou, Hlengiwe Ximba, het ook op korrupsieaanklagte skuldig gepleit en is tot ses jaar in die tronk gevonnis, waarvan drie opgeskort is.

Jacob Mamabolo, LUK in die Gautengse departement van menslike nedersettings, het die vonnisse verwelkom en gesê hy hoop dit wys mense dat misdaad nie winsgewend is nie. “Die man het by die staat en by arm mense – wat baie geld verloor het – gesteel.”

Hy het mense gewaarsku om nie slagoffers van bedrog te word nie, veral nie as misdadigers voorgee dat hulle vir die regering werk nie. “As enigiemand grond koop, moet hulle by die departement of hul plaaslike regeringsverteenwoordiger aanklop, om te hoor of die transaksie wettig is. As ‘n transaksie uit die kattebak van ‘n kar geskied, moet rooi ligte begin flikker.”

Prins se motorkade aangeval

Rowers met Kalashnikov-aanvalsgewere het ‘n Saoedi-Arabiese prins van €250 000 in kontant en ‘sensitiewe dokumente’ beroof toe hulle sy motorkade van die Saoudi-ambassade in Parys aangeval het.

‘n Gesteelde voertuig waarin die agt gereis het om die aanval uit te voer, is later uitgebrand gevind.

Volgens die Franse polisie was die motorkade van die Saoediese ambassade in die noorde van Parys by Port de la Chapelle op pad na die lughawe by Le Bourget, toe die voorval plaasgevind het.

Niemand is in die aanval beseer nie.

Die owerhede ondersoek die saak. Hulle glo die aanvallers moes baie goeie inligting gehad het.