Kategorie: Nuus

Rubberkoeëls, skokgranate om swart opmars by PUK te stuit

‘n Protesoptog deur beswaarde swart studente op die Potchefstroom-kampus van die Noordwes-Universiteit, het Donderdag hande uitgeruk.

Prof. Dan Kgwadi, die visekanselier, het glo toestemming verleen dat die optog gehou kon word.

Sowat 180 swart studente van al drie NWU-kampusse het Donderdag opgeruk na die administrasiekantoor, maar optoggangers is glo nie deur die staalhekke op die kampus toegelaat nie.

Die polisie moes rubberkoeëls en skokgranate gebruik om die skare onder bedwang te bring.

Kgwadi het glo toestemming gegee vir die opmars om die swart studente se beswaarskrif in ontvangs te kan neem.

Intussen is bewerings dat swart personeel van die Noordwes-Universiteit glo verhinder is om gebruik te maak van ‘n hysbak in die Over-de-Voor-manskoshuis op die Potchefstroomkampus, as versinsels veroordeel.

Kampuswoordvoerder, Johan van Zyl sê die koshuis het nie eens ‘n hysbak nie.

Van Zyl het gereageer op bewerings deur swart ondersteuners van ‘n derdejaarstudent Lerato Phoofolo, ‘n inwoner van Over-de-Voor, wat na bewering medestudent Hendri van Dyk met ‘n skêr aangeval het en steeds in aanhouding is.

Phoofolo beweer nou dat hy baie “rassistiese dade” by die universiteit opgemerk het.

Van Zyl sê iemand wat kennis dra oor sulke rassisme moet dit rapporteer.

Intussen sal Phoofolo, wat veronderstel was om Donderdag in die Potchefstroom-landdroshof te verskyn, eers Maandag verskyn.

‘n Administratiewe fout het daartoe gelei dat hy nie vervoer kon word na die hof nie.

Zuma vergader met regbank

President Jacob Zuma het die onderneming gegee dat die regering voortaan hofbevele sal respekteer en daaraan gehoor sal gee.

Zuma het Donderdag ‘n vergadering tussen die regbank en die regering – die heel eerste in die demokratiese bestel – gelei ná klagtes oor beweerde onregverdige aanvalle op die land se howe.

Zuma het gesê die vergadering het positiewe resultate opgelewer. Hy het gepraat ná die spesiale vergadering wat met Hoofregter Mogoeng Mogoeng, adjunkpresident Cyril Ramaphosa en verskeie ministers in Pretoria gehou is.

Mogoeng het die vergadering in Julie aangevra nadat aanvalle en openbare kritiek op die regbank uit veral ANC- en SAKP-geledere ’n hoogtepunt ná die Omar al-Basjir-sage bereik het.

Mogoeng het ontken dat daar ‘n konstitusionele krisis op hande is. Hy sê “diep nadenke” en “harde institusionele selfondersoek” is al wat nodig is.

Hy het ander partye aangeraai om te luister na vrae wat moontlik die waarheid kan bevat en kan lei tot selfkritiek.

Mogoeng sê die regbank het nie sy verpligtinge oorskry nie.

Die sekretaris-generaal van die ANC, Gwede Mantashe het vroeër vanjaar gekla dat die regbank se betrokkenheid soms te ver strek, met verwysing na verskeie beslissings wat teen die staat gemaak is.

Koekemoer-moord: Verdagte verskyn

Die swartman wat verdink word van die moord op en verkragting van die 15-jarige Noeline Koekemoer van Bainsvlei, verskyn na verwagting vandag in die Bloemfontein-landdroshof.

Koekemoer se ma, Natasha, het op 7 April op haar bebloede lyk in hul woonstel op ‘n hoewe in Bainsvlei afgekom.

Die aangeklaagde, in sy dertigs, is vantevore in Delportshoop in die Noord-Kaap aan gewapende roof skuldig bevind en ‘n vonnis van 12 jaar opgelê.

Hy is in Maart 2013 op parool vrygelaat, maar sal egter nou die res van sy vonnis in die Grootvlei-gevangenis buite Bloemfontein uitdien. Hy het ook ‘n saak van huisbraak hangende teen hom.

Die aangeklaagde se naam kan eers bekend gemaak word wanneer hy op die aanklagte, wat ook huisbraak en diefstal insluit, pleit.

Spanning tussen Koreas ontlont

Noord- en Suid-Korea het vandeesweek ooreengekom om die onlangse spanning op die Koreaanse skier­eiland te ontlont ná insidente by die grens.

Albei lande se weermagte was op ’n gereedheidsgrondslag geplaas nadat verlede Donderdag se oor-en-weer skietery.

Die krisis het Donderdag breekpunt bereik nadat Noord-Korea vier grofgeskutrondes op Suid-Korea afgevuur het. Die Suide het die grofgeskut met 29 rondes beantwoord.

Propaganda-uitsendings deur Suid-Korea is ná 11 jaar hervat nadat ‘n landmynontploffing in die gedemilitariseerde sone tussen die twee landes Suid-Koreaanse soldate beseer het.

Die uitsendings het enkele dae ná die ontploffings begin. Propaganda en harde popmusiek is oor luidsprekers in die rigting van die Noorde uitgesaai.

Volgens die Suid-Koreaanse nuusagentskap Yonhap kon die Noorde en Suide Maandag ‘n ooreenkoms bereik na onderhandelinge wat sedert Saterdag duur.

Volgens die ooreenkoms sal Noord-Korea om verskoning vra vir die landmynontploffings en Suid-Korea sal die propaganda-uitsendings staak.

Die twee Koreas verkeer tegnies steeds in ’n staat van oorlog sedert die Koreaanse Oorlog in 1953 met ’n wapenstilstand geëindig het.

Die twee lande het nooit ‘n vredesverdrag onderteken nie.

Noord-Korea dreig egter voortdurend met militêre optrede in reaksie op die jaarlikse weermagoefeninge tussen die VSA en Suid-Korea.

Ramaphosa vol vertroue dat Chinese ekonomie sal herstel

Adjunkpresident Cyril Ramaphosa sê hy is vol vertroue dat China se ekonomie van sy huidige insinking sal herstel.

China is die grootste verbruiker van grondstowwe en kommoditeite en Suid-Afrika se grootste enkele handelsvennoot maar ‘n verlangsaming in die Chinese ekonomie kan daartoe lei dat minder grondstowwe uit Suid-Afrika ingevoer word.

Chinese aandele het verder teruggesak ten spyte van die sentrale bank se jongste pogings om beleggers te paai.

Die verliese en onstuimigheid op wêreldmarkte, gedryf deur paniek-verkope het die afgelope paar dae tot ‘n skerp daling in die rand en ander ontluikende geldeenhede gelei.

Ramaphosa sê die Chinese ekonomie word grootliks deur die regering bestuur en alle nodige stappe word gedoen om dit te stabiliseer.

Hy sê hoewel die Suid-Afrikaanse ekonomie ook nou ly, sal dit weer herstel en verbeter soos in die verlede.

Ramaphosa was vroeër uitgesonder vir kritiek omdat hy ‘n vliegtuig van die Gupta-familie gebruik het vir sy amptelike besoek aan Japan.

Die adjunkpresident wou glo Suid-Afrika as beleggingsbestemming bemark met ‘n hoëvlak afvaardiging van sakelui en ministers na Japan.

Volgens die berigte het die departement die Bombardier Aerospace-straler wat aan die Gupta-familie en president Jacob Zuma se seun, Duduzane behoort, vir die besoek gehuur.

Opposisiepartye wil die minister van finansies oor die aangeleentheid nader.

Swartman skiet twee wit joernaliste ‘oor kerkslagting’

Die swart man wat ‘n TV-joernalis en kameraman in Virginia doodgeskiet het, Vester Flanagan, is in ‘n hospitaal aan ‘n skietwond oorlede.

Flanagan, geklee is swart, het twee wit joernaliste, Alison Parker en Adam Ward tydens ‘n regstreekse televisie-onderhoud geskiet.

Die moordenaar, ook bekend as Bryce Williams, het ‘n geskiedenis van dreigemente van geweld teen sy mede-werkers, alhoewel hy dan voorgegee het dat hy die slagoffer van “rassisme” was.

Vester Lee Flanagan sê in ‘n selfmoordbrief dat Junie se slagting van swart gemeentelede by ‘n kerk in Suid-Carolina die “kantelpunt” was wat hom gestuur het om twee wit joernaliste Woensdag op televisie te gaan vermoor.

Maar in hofstukke en onderhoude met The Daily Beast, het voormalige kollegas hom beskryf as ‘n problematiese werknemer wat herhaaldelik tereggewys is vir sy harde behandeling van kollegas en sy slordige werk.

Hulle sê sy klagtes oor rassisme was om die werklike evaluering van sy werk te verbloem.

“Hy het net ‘n geskiedenis van die rassekaart speel,” het die voormalige WTWC-anker Dave Leval aan The Daily Beast gesê. “Ek weet hy het dit in Tallahassee ‘n paar keer gedoen….”

Die dag toe Flanagan afgedank is by ‘n TV-stasie in Virginia in 2013, moes sy base die polisie laat kom as gevolg van sy gewelddadige gedrag.

Dié voorval is op kamera vasgelê deur Adam Ward, die man wat Woensdag een van sy slagoffers sou word.

Voordat Ward Woensdag dood is, het hy sy kamera ‘n laaste keer gelig om ‘n duidelike skoot van sy moordenaar te kry.

Die Amerikaanse polisie sê Flanagan het homself gewond na ‘n jaagtog op ‘n snelweg en is onder bewaking in die hospitaal oorlede.

Die gas met wie die onderhoud gevoer is, is in die rug geskiet en na die hospitaal gehaas.

Polisiebrutaliteit skok wit Suid-Afrikaners opnuut

Die minister van Polisie, Nathi Nhleko het onthul dat meer as eenduisend-eenhonderd polisielede tussen April en Junie vanjaar alleen, van wangedrag aangekla is, het RSG berig.

Dit is gemiddeld 350 polisielede per maand wat aangekla is. Die minister het die inligting in ‘n geskrewe reaksie op ‘n parlementêre vraag bekendgemaak.

Nhleko sê die polisiediens probeer om die tugverhore binne die voorgeskrewe twee maande af te handel.

Hy sê bykans 140 van die sake is nog nie afgehandel nie vanweê die komplekse aard daarvan en getuies wat nie beskikbaar is nie.

Dié onthulling is gemaak te midde van skerp reaksie op ‘n internet-video oor vermeende polisiewreedheid teen wit mans by die Douglasdale-polisiestasie in Johannesburg.

Die getuienis van hernude polisiebrutaliteit, is verfilm toe ‘n wit man, ene Anton, die swart polisiebeamptes gesmeek het om nie sy vriend Shane verdere kwaad aan te doen nie.

Shane is bewusteloos gelaat toe die swart polisiebeampte hom om die keel beetgekry het en verwurg het. Tonele van Shane se slap, klaarblyklik lewelose liggaam het kykers geskok.

Die voorval het verlede week plaasgevind in Fourways en volg kort na ‘n vroeëre voorval van ‘n woede-uitbarsting deur die SAPD in die Edenvale area.

Die video is byna 100 000 keer reeds op YouTube in die afgelope 24 uur gekyk.

Die bewerings word deur die Onafhanklike Polisieondersoekdirektoraat ondersoek.

Wit fotograaf beseer in TUT-onluste

‘n Wit vrouefotograaf is beseer toe sy deur ‘n klipgooier aangeval is tydens geweld wat Woensdag by die Tshwane universiteit van Tegnologie (TUT) in Pretoria uitgebreek het.

Christine Vermooten, ‘n fotograaf by die Citizen, is glo deur swart oproermakers met klippe beseer en na die hospitaal gehaas. Volgens onbevestigde berigte is haar enkel gebreek.

‘n Aantal swart studente is ook in skermutselings tussen twee swart groepe beseer. Die geweld het uitgebreek tydens ‘n besoek van die leier van die EFF, Julius Malema aan die TUT.

Skermutselings tussen lede van SASCO en die ANC Jeugliga aan die een kant en EFF-lede wat na Malema geluister het, het buite beheer geraak toe albei kante mekaar met klippe begin bestook het.

Malema het studente Woensdag toegespreek voor Donderdag se studenteraad-verkiesing. Hy is egter onderbreek deur SASCO-ondersteuners.

“Vegters, val aan, val aan!,” het die EFF-leier sy ondersteuners aangemoedig teen SASCO. Malema het by die kampus opgetree om EFF-ondersteuners te motiveer om deel te neem in die verkiesings SASCO uit te stem.

Terwyl hy besig was met sy impromptu-toespraak, het ‘n groep SASCO-lede opgeruk na die stadion terwyl hulle anti-Malema liedjies gesing het.

Selfs voor Malema opgedaag het, het vuisgevegte tussen strydende groepe uitgebreek.

Die polisie moes uiteindelik die strydendes met traanrook verwilder.

Ná die chaos by die TUT-hoofkampus, is Malema na twee ander universiteitskampusse in Ga-Rankuwa en Soshanguve waar hy ook studente toegespreek het, blykbaar ook sonder die nodige toestemming.

Die EFF het Woensdag voorts ‘n mosie sonder kennisgewing ingedien by dien Parlement. Die party se hoofsweep, Floyd Shivambu is daarna gevra om die parlement te verlaat.

Dit is die eerste keer dat ‘n parlementslid gevra is om die vergadering te verlaat sedert nuwe tussentydse maatreëls in werking gestel is. Volgens die reëls kan ‘n lid verwyder word as hy of sy verrigtinge ontwrig.

Shivambu het geweier om ‘n vorige opdrag uit te voer om die parlement te verlaat nadat die mosie buite orde verklaar is.

Al die party se verteenwoordigers het die parlement verlaat voordat Shivambu verwyder kon word.

Prasa ‘stel teleur’ sê OB

Die openbare beskermer sê die voormalige hoof uitvoerende beampte van Prasa se onlangse optrede en uitsprake oor haar verslag het haar verras en teleurgestel.

Thuli Madonsela het haar verslag oor die spooragentskap vroeër vandeesweek vrygestel waarin Lucky Montana keer op keer uitgewys word as die persoon wat toegelaat het dat wanadministrasie van honderde miljoene rand plaasvind.

Madonsela sê Montana het die voorlopige verslag onder oë gehad en was oor die algemeen heel tevrede met haar bevindings. Hy het egter nou sy deuntjie verander.

Montana het Dinsdag gesê hy gaan die OB se bevindings in die hof beveg. Prasa het hom verlede maand die trekpas gegee.

R115 by Brits weer oop na oproer

Die R511 naby Brits in Noordwes het heropen vir verkeer na gewelddadige oproer.

Die oproer is glo teen misdaad in die streek. Die inwoners van twee plakkersgebiede, sowel as dié van lokasies by die Hartebeespoortdamgebied, versper sedert Sondag paaie.

Sowat 20 betogers is reeds in hegtenis geneem.

Die ANC se taksekretaris in die gebied, Victor Mathedimusa sê misdadigers terroriseer die gemeenskappe en die polisie doen nie genoeg om die probleem op te los nie.

Inwoners van die plakkersgemeenskappe Mothutlung en Letlhabile en plakkersgebiede by die dam het die pad met brandende bande onbegaanbaar gemaak.

Polisiewoordvoerder Sabata Mokgwabone het bevestig dat betogers in hegtenis geneem is en Donderdag in die Hartebeespoortdam-landdroshof sal verskyn.