“Ons kan nie op hierdie stadium oor sukses of mislukking praat nie. Die belangrikste is dat die proses begin het,” het Noureddine Mezni, woordvoerder van die Afrika-unie, gesê. Daar word steeds gehoop dat die afwesige rebellegroepe oorreed kan word om wel deel te neem. Net ses kleiner rebellefaksies neem tans aan die onderhandelinge deel en selfs hulle het junior verteenwoordigers gestuur. Die ses groepe het hierdie naweek ’n gesamentlike verklaring uitgereik waarin hulle ’n beroep op die bemiddelaars in die proses doen om ’n tydskedule uit te werk met betrekking tot onderhandelinge met die groepe wat tans die proses boikot. Hulle dring daarop aan dat niemand in die proses uitgelaat moet word nie en wil graag ’n herhaling verhoed van die Abuja-ooreenkoms in 2006 toe een rebellegroep ingestem het tot ’n ooreenkoms met die regering maar die ander groepe geweier het om die dokument te teken.
Kadhafi, wat die gesprek Saterdag geopen het, het gesê dat die afwesige Soedanese Bevrydingsbeweging en die Beweging vir Geregtigheid en Gelykheid van kardinale belang vir die vredesproses in Darfoer is. “Ek beskou hulle leiers soos my seuns, selfs al is hulle ongehoorsaam, maar sonder hulle kan ons nie vrede bereik nie.” Hy het voorgestel dat die beraad beëindig word en het selfs klappe uitgedeel na die AU en VN, wat volgens hom nie bevoeg is om “’n etniese konflik” te besleg nie.
Sowat 200 000 mense is die afgelope vier jaar in die konflik dood en twee miljoen is haweloos gelaat.
Sedert 8 Oktober word daar ’n reklameveldtog op busse en in die Londense moltrein gevoer met die tema: “Islam is vrede.” Honderde plakkate is aangebring met slagspreuke soos: “Ek is trots om ’n Britse Moslem te wees.” Op een plakkaat verskyn daar selfs ’n Britse polisievrou wat ’n sluier dra en sê: “Ek dink dis my plig om my land te beskerm, my mede-onderdane en om ons buurt ’n veiliger plek vir almal te maak.” Op ’n ander advertensie veskyn Michael Barry, ’n voormalige TV-aanbieder van kookprogramme met ’n tamatieslaai en ’n pepermeul in die hand. Hy is insgelyks trots daarop om ’n “Britse Moslem” te wees. Hul gesigte is in ’n wa van die Londense moltrein te siene.
