Kategorie: Nuus

DRK staak nadat verkiesing uitgestel word

Die Kongolese hoofstad Kinshasa is Woensdag lamgelê deur ‘n staking uit protes teen president Joseph Kabila wat aan bewind sal bly ofskoon sy termyn teen die einde van Desember verstryk.

Die opposisie het die stakings aangevra nadat die president ‘n ooreenkoms bereik het om tot April 2018 aan bewind te bly deur vanjaar se presidentsverkiesing uit te stel.

Kabila het in 2001 aan bewind gekom en in 2006 het ‘n nuwe grondwetlike bepaling in werking getree wat die president tot twee termyne beperk. Kabila se termyn verstryk op 20 Desember.

Die land se hoofopposisieparty, die UDPS, sê die ooreenkoms tussen die owerheid en rand-opposisiepartye is ‘n “flagrante skending van die grondwet” en sê die betoging wys vir Kabila ‘n “geel kaart.”

VSA wil ISIS uit Mosoel dryf na Sirië

Irakse en Koerdiese magte sê hulle het sowat 20 dorpies om Mosoel beveilig in die eerste dag van optrede om die terreurgroep ISIS uit die stad te dryf.

Dié stap deur die VSA word gedoen in die hoop dat ISIS na Sirië sal uitwyk, maar hul beweegrede word nie openbaar gemaak nie.

Die jongste aanval op ISIS is ‘n berekende skuif vir pres. Barack Obama omdat die VSA die stryd in Sirië verloor het, maar Amerikaanse amptenare erken daar is geen tasbare plan vir die regering van die gebied rondom Mosoel sodra ISIS oorwin is nie.

Die Internasionale Organisasie vir Migrasie (IOM) sê hy kry die gasmaskers gereed omdat ISIS vantevore sulke wapens teen Irakse en Koerdiese magte gebruik het, maar die kanse daarvoor is skraal aangesien die terreurgroep Amerikaanse wapentuig gebruik.

Mosoel is Irak se tweede grootste stad en die grootste stedelike gebied wat deur militante van die Islamitiese Staat (ISIS) beset word.

Die val van Mosoel sal ‘n belangrike oorwinning teen die Soenni-­djihadiste in Irak wees, maar kan ook lei tot grondgrype tussen groepe wat in ‘n stryd teen mekaar gewikkel is sedert die regering van Saddam Hoesein in 2003 omvergewerp is.

Die Irakse weermag en Pesjmerga-­magte van Irakse Koerdistan het Maandag met groot mediageskal na Mosoel begin beweeg. Meer as 25 000 soldate is vir die veldtog ontplooi wat na verwagting weke indien nie maande nie kan duur.

Hulle ontvang lugbystand van ‘n Amerikaans-geleide koalisie wat gestig is toe Isis in 2014 van Sirië na Irak beweeg het.

Hoshjijar Zebari, ‘n senior Koerdiese amptenaar, sê die eerste operasies het geslaag danksy noue samewerking tussen die Irakse regering en Koerdiese Pesjmerga-vegters­ en ISIS kon uit tien dorpies oos van Mosoel verdryf word.

“ISIS is verward. Hulle weet nie of hulle ‘n aanval uit die ooste of die weste of die noorde moet verwag nie,” sê hy.

“Daar sal nie ‘n skouspelagtige aanval op Mosoel self wees nie. Dit sal baie versigtig gedoen word. Dit is ‘n hoë risiko-operasie vir almal.”

Aboe Bakr al-Baghdadi, Isis-leier,­ en Fawzi Ali Noeimeh, plofstofdeskundige, is albei in Mosoel, sê Zebari.

Dit beteken ISIS sal sterk weerstand bied.

Sy vegters het die aanvalsmag met tien selfmoordbomme aangeval en die aanvalsmag het vyf dorpies omsingel, maar nie oorgeneem het.

Die bewerings kon nie onafhanklik bevestig word nie.

Die aanvalsmag is nog tussen 20 km en 50 km van Mosoel. Amptenare sê dit is ‘n “vormingsoperasie” om die aanvalsmag se posisie te verstewig.

Haider al-Abadi, Irakse premier, het die aanval eergister bevestig, sowat twee jaar nadat Irak se naasgrootste stad in ISIS se beheer beland het.

Die operasie is al sedert Julie met die VSA beplan. Die Verenigde Nasies sê tot een miljoen mense kan uit Mosoel vlug.

Die eerste groep vlugtelinge word binne vyf of ses dae verwag.

Skelm Clinton-kamp se gekonkel met FBI gelek

Een van Hillary Clinton se senoir amptenare het haar van vervolging probeer beskerm deur die federale speurdiens (FBI) te probeer omkoop. Dit het duidelik geword uit die jongste WikiLeaks onthullings.

‘n Senior amptenaar in die departement van buitelandse sake het Clinton teen die FBI probeer beskerm oor haar onwettige gebruik van ‘n privaatepos­bediener toe sy minister van buitelandse sake was.

Patrick Kennedy, die mees senior bestuurder in die departement van buitelandse sake, se onverkwiklike rol is openbaar gemaak in die FBI se jaar lange ondersoek na die eposse.

Verlede jaar het amptenare die sowat 30 000 eposse ondersoek wat Clinton aan die departement oorhandig het. ‘n FBI-lid het ’n oproep van ’n amptenaar van die departement van buitelandse sake se regsafdeling gekry waarin die klassifikasie van die inligting in twyfel getrek is. Die FBI het voet by stuk gehou.

Kort daarna het Kennedy ’n ander FBI-lid gebel en gevra om die spesifieke e-pos se klassifikasie te verander as deel van ’n “ruiltransaksie”.

Die versoek is gerig sodat die inkriminerende epos geliaseer sou kon word buite bereik van nuuskierige ondersoekers.

Die lid het gesê dit het voorgekom asof Kennedy probeer om Clinton te beskerm deur dit te laat lyk of minder eposse vertroulike inligting bevat.

’n Ander FBI-lid het ook die bespreking van ’n “ruiltransaksie” bevestig. Die FBI-lid het ­gesê hy sal die epos se klassifikasie ondersoek op voorwaarde dat die departement van buitelandse sake meer FBI-agente oorsee ontplooi.

Die departement en die FBI het ’n gesprek oor die epos bevestig, maar ontken dat dit ’n ruiltransaksie was

Grondwetlike krisis dreig in Hongkong

Dosyne pro-Beijing wetgewers het dié week uit Hongkong se wetgewende raad gestap om die inswering van twee pro-onafhanklikheid aktiviste te verhinder. Dit lê die grondslag vir ‘n grondwetlike krisis in die Chinees-­beheerde stad.

Die onafhanklikheidsonderwerp is lank reeds taboe in die voormalige Britse kolonie wat ingevolge die een-land-twee-stelsels-beginsel regeer word sedert dit in 1997 onder China se bewind gekom het.

Pro-Beijing wetgewers sê hulle het geen keuse gehad as om uit te stap nie nadat die twee aktiviste geweier het om verskoning te vra nadat hulle “die moederland beledig het.”

Yau Wai Ching, pro-onafhanklikheidsaktivis, het op sy beurt gesê die pro-establishment kamp behoort om verskoning te vra omdat “hulle die mense van Hongkong verraai het”.

Gratis Telkom-data aan studente wat wil studeer

Telkom het bevestig dat hulle gratis data beskikbaar gaan stel aan studente wat weens die voortslepende betogings nie toegang tot hul studiemateriaal kan kry nie.

Die maatskappy sê hy is daartoe verbind om onderwys in Suid-Afrika te steun, het RSG berig.

Sommige universiteite het klas- en studiemateriaal aanlyn beskikbaar gemaak vir studente wat weens die betogings nie toegang tot die kampusse kan verkry nie.

Telkom se diens waarmee die ontvanger van die oproep die koste daarvan dra, sal studente toelaat om Telkom-simkaarte te gebruik om toegang tot ‘n universiteitswebwerf te verkry sonder dat hulle self vir die dataverbruik betaal.

Studente wat akademiese materiaal deur Telkom as internetdiensverskaffer verkry, sal ook by die gratis data baat vind.

Groot polisieteenwoordigheid vir ‘studente-opmars’ in Pretoria

‘n Groot polisieteenwoordigheid is op Kerkplein in Pretoria ontplooi vir die opmars van swart jeugdiges oor sogenaamde “klasgelde” en “dekolonisering van onderrig” na die Uniegebou.

Volgens die Tshwane metro sal 3000 swartes wat gratis toegang tot universiteite eis, en reeds miljoene rande se skade aangerig het, aan die betoging deelneem.

By die Universiteit van Kaapstad, onder leiding van die onbekwame Max Price, het ‘n swart student intussen gevra dat wetenskap afgeskaf word.

In New York het die Kaapse student ondersteuning gehad van ‘n paar verdwaalde betogers wat ‘n brief aan amptenare van die Suid-Afrikaanse konsulaat in die Amerikaanse stad oorhandig het. Die groepie eis daarin gratis “gehalte” onderrig van “gedekoloniseerde tersiêre instellings” in Suid-Afrika.

Die groepie het hoofsaaklik bestaan uit voormalige Suid-Afrikaners wat tans in New York woon wat na die konsulaat opgeruk het in “solidariteit” met die openbare geweld, afbrand van biblioteke en beskadiging van eiendom by Suid-Afrikaanse universiteite.

Die akademiese jaar by die Universiteit van die Wes-Kaap is intussen tot niet nadat formele lesings opgeskort moes word omdat geweld opnuut losgebars het. Miljoene rande se skade is reeds op die kampus aangerig.

Oproeriges het begin geweld pleeg en op ‘n plundertog gegaan nadat die bestuur nie ‘n massavergadering wat deur die studente belê is, bygewoon het nie.

Groot skade is aan die universiteit se eiendom aangerig en meer as twintig studente is in hegtenis geneem.

Die woordvoerder van die UWK, Luthando Tyhalibongo, sê die toestand op die kampus is steeds plofbaar.

Reëlings is glo getref vir voorbereidings vir die eksamen. Hy sê studente kan hul eksamens of in November, of in Januarie volgende jaar skryf.

Die Oos-Kaapse polisie het meer as 30 studente by die Nelson Mandela Universiteit in Port Elizabeth in hegtenis geneem nadat gevegte tussen betogers en die polisie uitgebreek het.

Daar was Dinsdag ook voorvalle van geweld by die universiteit. Van die amokmakers wil nie teruggaan klas toe nie maar die universiteit is vasbeslote om met sy akademiese bedrywighede voort te gaan.

Die polisie sê die studente sal môre in die hof verskyn.

Polisiewoordvoerder, Sally de Beer, sê die studente se ouderdomme wissel tussen 19 en 30 jaar, en hulle is aangekeer in verband met openbare geweld nadat hulle die polisie met klippe bestook het.

Thuli Madonsela, die voormalige Openbare Beskermer die landwye opstand steun, het intussen gepleit dat geweld beëindig moet word, sodat die swart jeugdiges se “griewe” gehoor kan word.

Dit wil egter voorkom asof die amokmakers hulself nie veel steur daaraan nie omdat hulle onverpoos voortgaan om geweld te pleeg en eiendom te vernietig. Dat hul kriminele optrede hul griewe kanselleer het klaarblyklik nog net by ‘n bekommerde Madonsela ingesink.

Ontlastingsaaiers by UK vasgetrek

Die Universiteit van Kaapstad het bevestig dat die polisie vier oproeriges vasgetrek het wat met houers vol ontlasting na die kampus op pad was.

‘n Woordvoerder vir die universiteit, Elijah Moholola sê die amokmakers is by die ingang van een van die kampusse aangekeer.

Vroeër is nog twee studente in hegtenis geneem nadat betogende studente opnuut met veiligheidswagte op die kampus slaags geraak het.

Moholola sê onderrig gaan egter voort op elektroniese vlak. Hy sê elke fakulteit gebruik hul eie metode van onderrig en kommunikasie vir sy betrokke studente.

Die bestuur van die Universiteit van die Wes-Kaap het intussen onderneem om vandag te reageer op die 40 eise van amokmakers nadat hulle Maandag tydens ‘n massavergadering 48 uur tyd gegee om te reageer.

Die eise sluit in gratis tersiêre onderrig en dat alle skuld afgeskryf word. Klasse by die UWK is steeds opgeskort.

Die universiteit se bestuur sê hulle sal ook vandag ook duidelikheid gee oor die voltooiing van die akademiese jaar en eksamendatums.

‘n Massavergadering, die jongste poging om ‘n vreedsame oplossing vir die universiteitskrisis te vind, word vandag by die Holy Trinity Katolieke Kerk langs Wits gehou.

Daar sal gefokus word op die stryd om universiteite se deure oop te hou en te befonds. Enigeen wat hoop dat die geweld en onrus by universiteite gestaak word, is gevra om die massavergadering by te woon.

Die Katolieke priester, Graham Pugin, wat betrokke was by studente vandat die protesoptrede begin het, sal by die byeenkoms praat.

Nog hooggeplaastes wat verwag word is ‘n stigterslid van Cosatu en voormalige minister in Nelson Mandela se regering, Jay Naidoo, asook die voormalige Openbare Beskermer, Thuli Madonsela.

Oproer tref Windhoek se kampus

Universiteit van Namibië het die eksamens wat Dinsdag moes begin, uitgestel nadat oproeriges amok gemaak het omdat hulle daarvan weerhou word om te skryf tensy hul studiegelde betaal word, het die Republikein berig.

Die registrateur, Sifiso Nyati, het vroeër aangedui dat studente wat sukkel, gehelp sal word met registrasiegelde. Maar volgens Nyati het nie een van die groep van sowat 40 studente wat gister voor die administratiewe gebou gevra het dat “eksamens moet val”, om geldelike hulp aansoek gedoen nie.

“Daar is mini-beurse in die Stigting-afdeling, sowel as die registrateur en dekaan se kantoor waar finansiële hulp beskikbaar is vir studente met uiters desperate finansiële beperkinge en wat akademies goed vaar.”

“Ons kon nie een opspoor wat dié kantore genader het nie.”

Die universiteit het Maandagaand laat weet eksamens vir Dinsdag en Woensdag is uitgestel.

Oproeriges het Maandag chaos in verskeie lesinglokale gesaai toe hulle studente se eksamenroosters summier begin opskeur het. Die Republikein beskryf die situasie as volg:

Duisende studente het Maandagoggend via Unam se webportaal kennis gekry dat elke student sy eksamenrooster by aangewese lokale op die kampus moes gaan afhaal. Studente wie se studentegelde nie vereffen was nie, sou nie toegelaat word om hul eksamens af te lê nie. Eksamenroosters is voorheen op die webportaal geplaas waar studente dit self kon aflaai.

Volgens Nyati is dit om te verhoed dat studente die roosters van hul eie webportaal uitdruk, nadat die verskuldigde bedrag aan die universiteit verander is om ’n balans van nul te wys.

“Die universiteit het besluit om self die roosters te druk en persoonlik aan studente te oorhandig. Dié wat nie gelde verskuldig is nie, kry ’n amptelike stempel wat dit bevestig.”

Hy het beklemtoon dat studente toestemming het om te betoog.

“Ons het egter gevind daar is dié wat hul frustrasie uitwoed, omdat hulle blykbaar nie eens vir die eksamen kon kwalifiseer nie. Dis hulle wat die vrede bedreig. Ons het daarom besluit om die dienste van ‘vredesbeamptes’ (polisie) te bekom.”

Uitstaande studiegelde van internasionale studente wat by Unam studeer, beloop volgens Nyati sowat N$10 miljoen.

“Ongelukkig het hulle nou ook by die betogers aangesluit.”

’n Tweedejaarstudent het die uitdeel van eksamenroosters aan studente op kampus as “chaoties” beskryf.

“Elke fakulteit is toegewys aan ’n sekere lokaal. By een lokaal was daar tot 800 studente met vier tot ses mense wat almal moes help.” Volgens hom het studente later ongeduldig begin raak en selfs deur ’n deur gebreek. Eksamenroosters wat in stapels gereed was om aan studente uitgedeel te word, is opgeskeur.

“Dit het van die een lokaal na die ander oorgespoel. Ek dink die opstokers voel hulle kan met hul optrede Unam sover kry dat hulle wél kan skryf en hul uitslae kry wanneer die skuld vereffen is.”

Unam het op 27 Julie vanjaar ’n amptelike kennisgewing op sy webtuiste geplaas waarin duidelik gemaak word dat uitstaande gelde vóór of op 30 September betaalbaar is. Volgens die kennisgewing het studenteskuld by die universiteit vanjaar beduidend gestyg as gevolg van ’n besluit om studente te registreer, sonder dat die normale betalingsvereistes by registrasie geld. Die gevolg is dat die universiteit nou beduidende tekorte in sy 2016-begroting het.

Die kennisgewing in Julie beklemtoon dat studente met uitstaande studentegelde nié toegelaat sal word om die Oktober 2016-eksamens af te lê nie.

Die bestuur het aangedui dat eksamens op al die universiteit se kampusse afgestel is vir Dinsdag en Woensdag. Die nuwe datums sal mettertyd bekend gemaak word.

Eksamens wat soos oorspronklik Donderdag sou plaasvind, gaan soos normaal voort.

Maar studente wat reeds betaal het kla die uitstel van eksamens raak alle studente, insluitend dié wat soos sy reeds haar rekening ten volle vereffen het.

Hulle bevraagteken Unam se tydsberekening om op die dag vóór ’n eksamen vir studente te laat weet skuld sluit vir hulle die deur tot eksamenlokale.

“Dit is onregverdig en moes voor die tyd gekommunikeer en uitgeklaar gewees het,” het een gesê.

Klagtes oor droogte stroom in by MRK

Klagtes dat die gebrek aan water skendings van menseregte is, stroom in by die SA-Menseregtekommissie in die Vrystaat.

Die kwaai droogte het damme se watervlakke tot krisisafmetings laat daal.

Die Vrystaat is een van die eerste provinsies wat as droogtegebied verklaar is. Inwoners in verskeie dorpe in die provinsie se krane het intussen drooggeloop.

Die Kommissie se Buang Jones sê hoewel die provinsiale kantoor in Bloemfontein gedurende die vorige boekjaar meestal klagtes oor onwettige inhegtenisneminsg en ongelykheid ontvang het, is klagtes oor menseregteskendings wat met die wydverspreide droogte verband hou, aan die instroom.

Jones sê die klagtes wat by hulle kantore ingehandig word, gaan meestal oor ernstige watertekorte.

Toeareg-vegters blok djihadistiese smokkelroete

Ondanks Franse militêre optrede in 2013 om militante Islamitiese groepe in die noorde van Mali onder beheer te bring, is die gebied steeds polities onstabiel.

‘n Aantal uitgedorde brode is al wat in die hoofbakkery van Mali se noordelike woestyndorp, Kidal, oor is.

Die eienaars het die bakkery verlaat toe meelpryse verdubbel het nadat gewapende vegters van ‘n meestal Toeareg-groep verlede maand die dorp geblokkeer het, wat op ‘n hoofsmokkelroete geleë is.

Die blokkade is deel van ‘n bitter stryd tussen opposisie Toeareg-stamme, wat pogings om ‘n 2015-vredesooreenkoms te implementeer om die noordelike deel van Mali en die Sahel te stabiliseer, in die wiele te ry.

Tien miljoene dollar in Westerse hulp, wat aangebied is om die oorsake van die voortdurende Toeareg-opstande in die noorde die hoof te bied, is vir eers opsy geskuif totdat spanning tussen die gewapende groepe, soos die Kidal-blokkade toon, verlig word.

Die afwesigheid van ‘n wettige weermag in die noorde het ‘n leemte gelaat wat bendes Islamitiese militante, toegelaat het om toenemend uitdagend te raak. Hulle is eers verjaag gedurende die Franse militêre operasie van 2013, maar nie verslaan nie.

Om griewe van die sekulêre gewapende Toeareg-groepe op te los, wat uit duisende gewapende vegters bestaan, word gesien as noodsaaklike stap om teenstand te bied teen rondtrekkende djihadiste in die gebied.