Kategorie: Nuus

Trump triomfeer as presidentskandidaat

Donald Trump is amptelik die presidentskandidaat vir die Republikeinse Party.

Die miljardêr is Dinsdagnag in Cleveland in die Amerikaanse deelstaat Ohio amptelik as dié party se kandidaat aangewys.

Hy het 16 teenstanders uitgestof en moes byna ‘n jaar lank ‘n uiters giftige mediaveldtog, selfs uit Republikeinse geledere, trotseer.

Hoofstroomontleders het ook week na week plegtig verklaar dat Trump nie ‘n kans staan om ooit benoem te word nie.

Kort voor die aankondiging het Rupert Murdoch, eienaar van die gewilde Fox News nog van sy stigter Roger Ailes probeer ontslae raak, om die Trump-golf te keer.

Ailes, wat te “regs” is na Murdoch se smaak, is ‘n Trump-ondersteuner en was voorheen die raadgewer van president Richard Nixon. Hy het Fox van niks af uitgebou tot ‘n magtige en uiters winsgewende media-organsisasie.

Donald Trump jr., Trump se oudste seun, het by die party se nasionale konvensie die deelstaat New York se steun aan die kandidaat toegesê wat aan hom 1 237 afgevaardigdes besorg het.

Die byeenkoms is die eerste dag ontwrig deur ‘n groep wat gedink het hulle kan die benoeming ontspoor, maar die teenstanders is gou uitgeboender en hul pogings het klaaglik misluk.

Die Amerikaanse presidentsverkiesing vind op 8 November plaas.

Mike Pence, goewerneur van Indiana, is reeds voor die benoeming as die Republikeinse Party se visepresidentskandidaat aangewys, in ‘n poging om die onderlinge geskille binne die party by te lê.

Afgevaardigdes het senator Ted Cruz uitgejou nadat hy nie in ‘n toespraak sy amptelike steun aan Trump as die party se presidentskandidaat toegesê het nie.

Cruz het vroeër teen Trump meegeding vir die party se benoeming, en het in die tweede plek geëindig. Hy het Trump gelukgewens, maar die swak verloorder het bygevoeg dat Amerikaners volgens hulle “gewetes” moet stem.

Trump-ondersteuners het ook striemende aanvalle teen Hillary Clinton geloods gedurende die Republikeinse Party se konvensie.

Sy het privaat e-posbedieners gebruik in haar ampstermyn as minister van buitelandse sake, vermoedelik om betalings te ontvang vir gunste, ook van buitelanders. Dit kom basies neer op hoogverraad.

Die federale speurdiens (FBI) het ná ‘n ondersoek bevind dat Clinton gelieg het oor haar hantering van geklassifiseerde inligting. Sy gaan egter nie strafregtelik daaroor vervolg word nie.

Clinton het haar fondsinsameling ongeërg voorgesit ná Trump se benoeming en getwiet: “Donald Trump is pas aangewys as die Republikeine se kandidaat. Begin nou geld bydra sodat hy nooit sy voet in die Ovaalkantoor sit nie.”

Vloede tref Beijing

Vloede wat veroorsaak is deur onafgebroke swaar reën het wydverspreide ontwrigting in die Chinese hoofstad, Beijing, veroorsaak.

Dit het tot gevol gehad dat honderde vlugte gekanselleer is en sommige moltreinstasies gesluit moes word.

Beijing se humiede somermaande word dikwels deur swaar reënstorms gekenmerk en in 2012 is 37 mense in die storms dood.

Die Beijing se stadsowerhede het ‘n oranje waarskuwing uitgereik, die tweede hoogste in China se viervlak-waarskuwingstelsel en het inwoners gemaan dat dit oornag kon voortduur met neerslae wat plek-plek tot 100 mm kan val.

Meer as 200 vlugte van Beijing se hooflughawe af is gekanselleer.

Groot dele van Sentraal- en Oos-China is vanjaar deur swaar reën getref met meer as 200 mense wat reeds gesterf het.

Sedert Maandag is 13 mense dood en word 62 vermis vanweë die reën in die noordelike en noordwestelike dele van die land, berig die nuusagentskap Xinhua.

Zimbabwe sukkel steeds met staatsdiensbetalings

Die Zimbabwiese regering sukkel steeds om sy horde staatsamptenare te betaal. Tagtig persent van staatsuitgawes bestaan uit salarisse wat maandeliks ‘n allamintige $260 miljoen opslurp. Ná jare van “bevryding” is Zimbabwe se ekonomie nie veel groter as ‘n middelgrootte SA stad soos Rustenburg s’n nie, dus kan die land kwalik dié reusebedrae aan salarisse bekostig.

Volgens Zimbabwiese webblaaie was die Mugabe-bewind nie in staat om sy soldate op 14 Julie te betaal nie. Hulle word gewoonlik op die 14de van die maand betaal, maar banke het nie die geld vandeesmaand ontvang nie. Die lojaliteit van sy weermag is vir die Mugabe-bewind belangrik en daarom sou daar verwag kon word dat ten minste die soldate se soldy eerste betaal sou word.

Die staatsdiensminister, Prisca Mupfumira het gister aan die Daily News gesê dat die regering teen vandag “‘n duidelike padkaart” sal aankondig.

“Ons sal teen môre (vandag) in ‘n posisie wees,” het Mupfumira gesê sonder om enige verdere besonderhede te verskaf.

Vergaderings tussen die regering en staatsamptenare was tot dusver vrugteloos om die salarisprobleem te probeer oplos. Laat betalings van staatsdienssalarisse en pensioene vind reeds maande lank plaas. Veral pensioenarisse trek noustrop en betaaldatums word telkens verder en verder in die toekoms in verskuif.

Ook onderwysers is bekommerd oor hul salarisse, volgens die voorsitter van die onderwysersvakbond, Richard Gundani. Volgens hom wag hulle steeds op die regering om die betaaldatums aan te kondig.

Vroeër vandeesmaand het staatsdienspersoneel, waaronder onderwysers en mediese personeel begin staak wat hospitale en skole verlam het nadat die regering nie hul salarisse betyds kon betaal nie.

President Robert Mugabe, wat deur die toedoen van die Britse diplomaat Baron Robin Renwick die mag in die oud-Rhodesië verower het, is reeds 36 jaar aan bewind en het in dié tyd die eens veruitstrewende Rhodesië in die mislukte staat van Zimbabwe omskep.

Onlangs was daar ook ‘n wegbly-aksie wat deur pastoor Evan Mawarire georganiseer het, wat tot verspreide voorvalle van polisiegeweld teen inwoners gelei het.

 

Snerpende koue oor binneland verwag, swaar reën vir Kaap

Vrystaters en Gautengers kan van vroeg aanstaande week snerpende koue verwag.

‘n Weerstelsel gaan van Maandag af tot gevolg hê dat die kwik in die binneland skerp gaan daal en die kwik gaan net-net tot meer as 14 grade styg.

Die Weerdiens sê dit gaan van Maandag tot minstens Woensdag toe besonder koud in die Vrystaat en Gauteng wees en sneeu word oor dele van die Vrystaat verwag.

Kapenaars kan hulself al van vandag af op koue en nat weerstoestande voorberei.

Die Suid-Afrikaanse Weerdiens waarsku dat swaar reën en stormsterk winde vandag in gedeeltes van die Wes-Kaap sal voorkom.

Kaapstad, Paarl, Grabouw en Ceres kan swaar reën van vanmiddag tot laataand verwag. Oorstromings kan ook voorkom.

Sterk winde sal in Worcester, Laingsburg en Prins Albert waai, terwyl veldbrande in Prins Albert en George kan voorkom.

Die reën sal tot Saterdag voortduur.

Oproeriges in Riverlea Johannesburg gooi klip

Toegangsroetes na Riverlea in Johannesburg is gesluit na oproer wat glo oor elektrisiteitvoorsiening en behuising voorkom.

Mainreef- en Commandoweg in Riverlea is na openbare geweld gesluit en ‘n uitgebreide polisieteenwoordigheid is in die ontplooi.

Oproeriges bestook motoriste met klippe en brand motorbande.

Die inwoners van die Zamimpilo-plakkerskamp is ontevrede oor ‘n gebrek aan huise.

Hulle sê die Johannesburgse metroraad het belowe om hulle te skuif na ‘n behuisingsprojek, maar dit het nie gebeur nie.

Inwoners is ook ontsteld oor ‘n gebrek aan elektrisiteit.

Hillary Clinton se nalatenskap: ISIS

Rook borrel uit geboue nadat die Libiese lugmag, lojaal aan die eenheidsregering, vuurpyle op stellings van die ­Islamitiese Staat (ISIS) in Sirte, Libië, afgevuur het.

In ’n grootskaalse operasie om die jihadiste se kusvesting in te neem, moes ‘n hernude aanslag teen die terreurgroep geloods word. ­

ISIS is tans diep ingegrawe in Libië nadat president Obama met die hulp van Hillary Clinton gesorg het dat die Moeammar Ghadaffi vermoor word en die eers welvarende land in chaos verval sodat jihadiste kan oorneem.

Haar besluit was tot dusver Amerika se grootste buitelandse beleidsflater sedert Irak.

Vier hooggeplaasde Amerikaanse amptenare is deur die jihadiste in Libië vermoor, klaarblyklik omdat Clinton bang was dat ‘n wapenoordrag aan jihadiste op die lappe sal kom en sy dus niks gedoen het om die moorde te keer nie.

ISIS onderneem vanuit Libië ook die aanslag op Sirië wat Obama- en Clinton-simpatiseerders as ‘n “burgeroorlog” probeer voorhou, maar wat in werklikheid ‘n inval deur internasionale terroriste is.

Daar is reeds 400 000 mense dood in die Siriese konflik wat nou ontaard het in ‘n vlugteling-dilemma vir die EU.

Volgens ’n vertroulike verslag van die Verenigde Nasies is tussen 2 000 en 5 000 ISIS-terroriste van Libië, Tunisië, ­Algerië, Egipte, Mali, Marokko en Mauritanië in Sirte, Tripoli en Derna ontplooi.

Die goewerneur van New Jersey, Chris Christie, het Hillary Clinton Dinsdag by die Republikeinse Konvensie geroskam omdat sy toegelaat het dat ISIS ‘n vastrapplek in Libië verkry.

Christie het gesê dat Clinton ook hard baklei het om die radikale Islamitiese groep Boko Haram van die State Departement se terreurlys af te hou voordat sy die regering verlaat het in 2012.

In 2014 het die groep honderde jong vroue en meisies ontvoer. Christie se mees plofbare bewering is dat Clinton niks anders is as ‘n “apologeet vir ‘n Al-Qaeda-affiliaat in Nigerië nie”.

Nog een van die sprekers by gisteraand se Republikeinse geleentheid was Pat Smith, die moeder van ‘n konsultant wat in die Libiese aanval gesterf het in Benghazi.

Die moeder het Hillary Clinton beskuldig van leuens oor haar seun se dood.

Clinton verdedig steeds die ramp in Libië as “slim mag”, selfs al het Noord-Afrika se chaos ‘n vesting vir ISIS geskep.

ISIS het onlangs verantwoordelikheid aanvaar vir die al die dodelike aanvalle Parys, Nice en Wuerzburg.

Trevor Noah vaar teen Donald Trump uit

Die kleurlingkomediant Trevor Noah, wat aanvanklik in Suid-Afrika opgang gemaak het maar tans in die VSA woon waar hy die Daily Show-program vanuit New York aanbied, het so pas teen Donald Trump uitgevaar. Hy noem die Republikeinse presidentskandidaat ‘n “baie gevaarlike nar wat hulle party gekaap het”.

Noah, ‘n groot ondersteunder van radikale swart groepe soos Black Lives Matter en die New Black Panthers, het voorheen gesê dat hy “bang is dat Trump immigrante soos hy die land uitsit”. Oor die afgelope weke het ondersteuners van Black Lives Matter gewapende aanvalle teen polisiebeamptes geloods, waaronder in Dallas, Texas en Baton Rouge, Louisiana.

Hier is ‘n video wat op die Times Live-kanaal gelaai is waarin Noah vir Trump as “erger as ‘n malmens” beskryf.

Die Daily Show is bekend daarvoor dat dit van oneerlike maniere gebruik maak om veral behoudende mense te belaster, belaglik te maak of hulle letterlik woorde in die mond te lê. Filmmateriaal word gemanipuleer of oorgeklank en agterna as “TV-nuus” aangebied. In antwoord op kritiek teen hul oneerlikheid, sê die vervaardigers van die Daily Show dat hulle “snaaks wil wees” en dat hulle nie “‘n nuusprogram is nie”. Nietemin neem baie kykers hul “berigte” ernstig op en is onbewus daarvan dat dit gemanipuleer en vervals word.

Griekse hof sal beslis oor Turkse offisiere

’n Griekse hof sal Donderdag uitspraak lewer oor die lot van agt Turkse militêre offisiere wat met ’n helikopter land uit gevlug het ná die mislukte staatsgreep in Turkye.

Die agt staan tereg op klagte dat hulle die land onwettig binnegekom het en die Griekse lugruim geskend het, het AFP berig.

Die agt weermaglede het om asiel in Griekeland aansoek gedoen en hou vol dat hulle nie deel van die komplot was om die Turkse regering omver te werp nie. Hulle sê die polisie het op hulle geskiet en hulle het gevlug om hul lewens te red.

Nagenoeg 7 500 mense onder wie baie militêre personeel word in Turkye aangehou. Byna 9 000 offisiere is die naweek sedert die mislukte komplot ontslaan.

Die Turkse mans wat tereg staan in Griekeland, het Saterdag met ’n militêre helikopter in die noordelike stad, Alexandroupolis, 300 kilometer van Istanboel, aangekom nadat hulle ’n noodsein uitgestuur het.

Die agt mans het Maandag in die hof verskyn en bly in aanhouding.

Turkye se kommerwekkende suiwering van amptenare in die lig van Vrydag se mislukte staatsgreep het nou ook na die onderwysterrein uitgebrei.

Die ministerie van onderwys het meer as 15.000 werknemers geskors, en volgens die staatsnuusagentskap het die Hoër Onderwysraad opdrag gegee dat meer as 1500 Dekane by privaat en staatsuniversiteite afgedank word.

Die VN se hoof van menseregte, Zeid Ra’ad Al Hussein, sê hy is baie bekommerd oor Turkye se massaskorsing van regters en aanklaers na die staatsgreeppoging.

Hy het ook die moontlike herinstelling van die doodstraf as ‘n stap agteruit bestempel.

Intussen het die VSA nog nie ‘n formele aansoek ontvang vir die uitlewering van die uitgeweke Moslemkerkleier, Fethullah Gulen nie.

Die Turkse president Tayyip Erdogan hou vol dat Gulem die baasbrein agter die naweek se mislukte staatsgreep is. Meer as 200 mense is in die geweld dood.

Veediefstal kos boere ten minste R1,5 miljard per jaar

Skaapboere in die Vrystaat ly verliese van sowat R1,5 miljard per jaar as gevolg van veediefstal.

Dit is volgens navorsing deur WA Lombard, ‘n student in landbou-ekonomie wat aan sy Meestersgraad aan die Universiteit van die Vrystaat werk.

Die ysingwekkende bedrag het aan die lig gekom in ‘n verklaring wat uitgereik is deur Vrystaat Landbou se Veiligheidstruktuur.

Lombard se navorsing het net gefokus op direkte verliese, wat daarop dui dat indien die verlies van teeldiere of beter gene in ag geneem word, die werklike syfer soveel as R2 miljard per jaar kan beloop.

VL het beklemtoon dat ‘n ernstige toename in veediefstal sedert die begin van 2016 waargeneem is.

Een voorbeeld is in die Steynsrus-gebied, wat drie keer tussen April en 20 Junie getref is en waar tot 31 skape geslag is per voorval.

In ‘n ander geval in die Oos-Vrystaat is hoëgehalte stoetbulle van R450 000 gesteel en later geslag in die veld gekry.

Die navorsing het ook beklemtoon dat in die verslagdoening van veediefstal, daar tussen 60% en 70% gevalle nie eers aangemeld word nie.

Veediefstal se probleemareas sluit in Bethlehem, Ficksburg, Bloemspruit, Harrismith, Phuthaditjaba, Selosesha, Zastron, Heilbron, Vrede en Bothaville.

Plaasaanvallers van Clocolan vlug na Lesotho

Die polisie in die Vrystaat soek steeds na sewe swart aanvallers wat ‘n boer van die Clocolan-distrik en sy gesin in hul plaashuis vasgebind en beroof het.

Vier rowers, waarvan twee gewapen was, het Carl du Randt, sy vrou, Lydia, en hul agtjarige seun, Carl, Sondag omstreeks 18:00 in hul motorhuis ingewag, het OFM berig.

Die aanvallers het ’n wapen op Du Randt gerig en sy hande met polisieboeie agter sy rug vasgemaak. Die swart booswigte, waarvan drie klapmusse aangehad het, het geld geëis. Du Rant is gedwing om die kluis in die egpaar se slaapkamer oop te maak.

Geld en ‘n jaggeweer is gebuit. Die gesin is in die studeerkamer vasgebind, waarna die vier aanvallers en drie van hul makkers wat buite gewag het, huisware op Du Rant se bakkie gelaai en weggejaag het.

Du Randt sê hy het die hele tyd kalm gebly en gedoen wat hulle van hom vra.

“‘n Mens word onkant gevang en kan nie 24-uur per dag daarop voorbereid wees nie, maar dit is belangrik om kalm te bly,” sê Du Randt.

Carl Jr. kon homself loswikkel en het op ‘n tweerigtingradio hulp ontbied. Van die Du Randt’s se bure het die aanvallers agternagesit.

Du Randt sê die boere was kort op die gespuis se hakke, waarna hulle van die bakkie afgespring het en weggehardloop het.

Die aanvallers het vermoedelik deur ‘n leë Caledonrivier na Lesotho ontsnap. Al die gesteelde goedere is teruggevind behalwe die geld.

Die polisie werk glo nou saam met owerhede in Lesotho om die aanvallers te soek.