Kategorie: Nuus

Sanders lyk sterk teen Hillary

Bernie Sanders lyk sterk nadat hy as ideologiese wenner uit die stryd getree in die Demokratiese Party se voorverkiesingstryd in die deelstaat Iowa.

Hy kon Hillary Clinton van dieselfde party nie klop in die amptelike stemming oor wie die partykandidaat moet wees in die Amerikaanse presidentsverkiesings wat in November plaasvind nie, maar het sterker vertoon as wat voorheen geglo is.

Haar ver-linkse teenstander in die leierskapstryd van die Demokrate, Sanders, het alle verwagtinge oortref.

Demokratiese Sosialiste is die grootste sosialistiese organisasie in die Verenigde State van Amerika, en is sedert 1982 besig om “openlik ‘n demokratiese sosialistiese teenwoordigheid in Amerikaanse gemeenskappe en politiek te vestig”.

Dié organisasie is entoesiastiese ondersteuners van die Joodse Sanders.

Sanders het so te sê gelyk geëindig met sy teenstander wat nie daarin kon slaag om hom oortuigend te klop nie.

Clinton het in 2008 verloor in die Iowa-koukusse teen Barack Obama.

Wat die Republikeinse stryd betref, het die gewilde Donald Trump ‘n kortkop agter sy mededinger Ted Cruz geëindig.

Trump was die gunsteling in Iowa maar minder gewilde kandidate het die stem verdeel. Intussen het die hoofstroommedia internasionaal ‘n smeerveldtog teen Trump geloods.

Trump én Sanders geniet steun in die staat New Hampshire, waar die volgende voorverkiesing sal plaasvind.

Die partybenoemingstryd sal bepaal wie Amerika se presidentskandidate vir onderskeidelik die Republikeine en die Demokrate gaan wees.

Die koerant, die Des Moines Register het ‘n beroep op die Demokratiese Party gedoen om vinnig te beweeg om te bewys dat Maandag se resultate korrek is.

Die stuk getiteld “Redaksioneel: Iets ruik sleg in die Demokratiese Party,” begin met: “Weer eens lag die wêreld vir Iowa.”

Die klein oorwinning wat Clinton behaal het sal volgens die koerant slegs geloofwaardig wees “as ‘n volledige oudit van die resultate gedoen word”.

Die koerant se redaksie het ook gesê daar is te veel geleenthede vir foute in die proses en daarop gesinspeel dat Clinton nie die deelstaat se benoeming regverdig gewen het nie.

Vrese dat Zika-virus seksueel kan versprei

Die WGO het vrese uitgespreek oor die moontlike seksuele oordrag van die Zika-virus in Texas.

Dit is die eerste bevestigde geval van mens-tot-mens-oordrag van die Zika-virus in die VSA wat Dinsdag aangemeld is.

Dr. Tom Frieden, direkteur van die Amerikaanse sentrum vir siektebeheer en -voorkoming (CDC), het op Twitter gesê die nuutste geval is die eerste in die VSA waar iemand wat nié gedurende die huidige uitbreking oorsee gereis het nie, die virus opgedoen het.

Die WGO het lande ook aangeraai om bloedskenkings van mense wat na Zika-geaffekteerde streke gereis het, nie te aanvaar nie, het die AFP-nuusagentskap berig.

Die skakel tussen Zika-infeksie en mikrokefalie is nog nie bevestig nie en die risiko’s op verskillende stadiums van swangerskap is onbekend, maar die siekte het die WGO genoop om ‘n noodtoestand af te kondig.

Volgens Amerikaanse gesondheidsowerhede het die pasiënt die virus waarskynlik deur seksuele omgang eerder as deur ’n muskietbyt opgedoen.

Seksuele kontak as ‘n manier van oordrag is ‘n kommerwekkende verwikkeling met die virus wat benewens die Amerikas, dalk ook na Afrika en Asië kan uitbrei.

Dallas se gesondheidsdepartement het op Twitter gesê die besmette persoon het seksuele kontak gehad met ‘n persoon wat na Venezuela in Suid-Amerika gereis het.

Die gesondheidsdepartement in Texas sê in ’n verklaring: “Die besonderhede van die geval word geëvalueer, maar die moontlikheid van seksuele oordrag van ’n geïnfekteerde persoon na ’n nie-geïnfekteerde persoon is waarskynlik in dié geval.”

Die goewerneur van Texas, Rick Scott, het ‘n gesondheidsnoodtoestand in vier distrikte afgekondig.

Grondgrypwet goedgekeur

Die parlementêre portefeuljekomitee oor openbare werke het Dinsdag die gevreesde Wetsontwerp op Onteiening goedgekeur.

Die owerhede sal voortaan eienaars en belanghebbendes skriftelik in kennis stel van die voorneme om te onteien en net ‘n uitgerekte, duur hofgeding sal die staat kan keer om grond te vat.

Met die voorbeeld van grondgryp in Zimbabwe, is dit ook nie seker of die Afrikahowe meer vertrou kan word om eiendomsreg te beskerm nie.

Die eienaar en belanghebbendes het die reg om binne 30 dae geskrewe voorleggings in te dien om beswaar aan te teken teen die onteiening maar as die eiser nie regstappe teen die owerheid instel nie, sal daar aanvaar word dat die aanbod aanvaar is.

Die wetsontwerp maak voorsiening dat die hof oor ‘n dispuut oor die onteiening asook die vergoeding wat die staat aanbied, kan beslis.

Die eienaar moet binne 20 dae nadat die kennisgewing ontvang is, aandui of die staat se aanbod vir vergoeding verwerp word. Dié tydperk sal met nog 20 dae deur die staat verleng word, as die eienaar die aanbod van die hand wys.

Alhoewel die kennisgewing die eienaar sal raadpleeg oor wat as billike vergoeding beskou sal word, is hulle steeds onder geen verpligting om markverwante pryse te betaal nie.

Bejaarde in Lady Grey doodgeslaan

‘n Klag van moord word ondersoek nadat die liggaam van ‘n bejaarde man Dinsdagmiddag in sy huis in Lady Grey ontdek is.

John Bradish (80) het twee dae lank nie sy verskyning in die openbaar gemaak nie, wat ‘n buurman en vriend se agterdog gewek het.

Die buurman het daarna die polisie in kennis gestel en hulle het op sy lyk in sy woning afgekom.

Die laaste keer dat hy lewend gesien is was toe hy by sy buurman gekuier het.

Bradish was jare lank ‘n inwoner van die dorp.

Kapt. Ursula Roelofse, polisiewoordvoerder, sê Bradish is vermoedelik met ‘n onbekende voorwerp aan die regterkant van sy kop geslaan.

Slegs Bradish se selfoon word vermis.

Stropers in Namibië voer skrikbewind

Die eienaar van Emanya Lodge tussen die Etosha Nasionale Park en Oshivelo, sê sy “wil weghardloop” uit moedeloosheid omdat stropers ’n skrikbewind voer en dit lyk of die polisie nie veel daaraan gaan doen nie.

Dertien van haar 18 swartwitpense van etlike miljoene Namibiese dollar is al deur die stropers doodgeskiet, terwyl sy in die afgelope agt maande ook 35 beeste verloor het, vertel me. Nelie Lewies, wat benewens die lodge ook ’n boerdery bedryf.

Sondagnag het ’n span wat vermoedelik Maandag ook vyf beeste geslag het op die gasteplaas Sachsenheim van haar bure, mnr. en me. Gerd en Maria Sachse, by die lodge ingebreek en die rekenaarbediener asook al die sekuriteitskameras gesteel.

“Ek het by my kamervenster uitgekyk en die vier mans gewaar. Toe ek vir hulle skree ‘haai, wat maak julle hier’, het hulle nie eens weggehardloop nie,” vertel Lewies.

Volgens Maria Sachse het haar man Maandag omstreeks twaalfuur op vier vermeende stropers in die veld afgekom nadat hulle vyf beeste geslag het.

“Die stropers het gelê en slaap en hy het stilletjies terugbeweeg en my gebel sodat ek die polisie kan ontbied.”

Sy sê die polisie van Oshivelo het eers vieruur die middag daar aangekom en die stropers het toe al spore gemaak.

“Een van die polisiemanne het een van die spore geëien as dieselfde spoor wat hulle gewaar het toe hulle vroeër die dag die inbraak by Emanya ondersoek het.

“Hy het vir ons gesê die mans is gewapen.”

Volgens haar het die polisie die spore gevolg en in ’n stadium drie mans met vleis by hulle gewaar, maar die mans het hulle glo ontglip.

Sachse vertel verder dat een van die plaaswerkers verlede jaar deur ’n vermeende stroper met ’n mes in die rug gesteek is. “Ons het die saak by die polisie aangegee, want die man het gedreig om ons dood te maak, maar daar het niks van die ondersoek gekom nie.”

Lewies sê hulle het verlede jaar een aand in die restaurant by die Emanya Lodge gesit toe stropers lostrek en van die swartwitpense doodskiet. “Die werkers was vreesbevange en het in die wynkelder gaan wegkruip.”
Ook dié ondersoek het op niks uitgeloop nie, sê sy.

“Ons voel die weermag moet ingestuur word en die plase skoonmaak. Ons kan dit nie meer hou nie. Ek voel ek wil weghardloop. Aan die een kant baklei ons teen die droogte, want ons het nog nie eens 100 mm vir die seisoen gehad het. En aan die ander kant ly ons onder die strooptogte,” sê ’n moedelose Lewies.

Dit het haar N$100 000 gekos om haar rekenaarbediener en sekuriteitskameras te vervang. “Ons besoekers is meestal oorsese toeriste. Ons het nou al die inligting verloor van besprekings wat reeds gedoen is. Ek moes dadelik weer hierdie toerusting aanskaf.”

Bron: Die Republikein

Miljoene in transitoroof gebuit

Die polisie in Noordwes soek steeds na ses gewapende rowers in verband met ‘n transito-rooftoog naby Setlagoli waarin miljoene rande Dinsdag uit ‘n geldwa gebuit is.

Polisiewoordvoerder, Paul Ramaloko, sê die transito-rowers het twee wagte van ‘n sekuriteitsmaatskappy vasgebind en brandstof oor hulle uitgegooi.

Hy sê die wagte, wat onderweg was in die rigting van Vryburg, het omstreeks 13:00 van die pad af getrek nadat hulle geld by ‘n myn by Setlagoli afgehaal het.

Hulle was besig om ‘n pap band van die geldwa om te ruil toe die booswigte toegeslaan het.

Ramaloko sê die wagte is vasgebind en gedreig dat hulle aan die brand gesteek gaan word as hulle nie hul samewerking gee nie. Die booswigte het op die vlug geslaan met meer as R5 miljoen, twee vuurwapens en selfone.

Ramaloko sê die sekuriteitswagte het geen ernstige beserings opgedoen nie. Ramaloko wil nie die sekuriteitsmaatskappy se naam in die media bekendmaak nie om veiligheidsredes.

Polisiebeampte wat verkragtingdossiere glo laat verdwyn, kry borg

‘n Bloemfonteinse polisiebeampte, wat na bewering dossiere uit die hof gesteel het, en ‘n plaaslike swart sakeman verskyn na verwagting vandag weer in die plaaslike landdroshof.

Patricia Pitt, van die Parkweg-polisiekantoor, is vroeër op borgtog van R3 000 vrygelaat terwyl Thulani Qhiti in aanhouding bly.

Pitt het glo dossiere by die Bloemfonteinse landdroshof gesteel. Qhiti word in een van die gesteelde dossiere weens beweerde verkragting ondersoek.

Albei staan tereg op aanklagte van diefstal en dwarsboming van die gereg.

Airbus doen noodlanding na bom glo op vlug ontplof

‘n Airbus A321 moes Dinsdag ‘n noodlanding op die Mogadisjoe-lughawe doen nadat ‘n bom vermoedelik ‘n gat bo die regtervlerk geruk het.

Die vliegtuig het op daardie stadium ‘n hoogte van sowat 14 000 voet bereik.

‘n Passasier is uit die vliegtuig gesuig en die verkoolde lyk is sowat 25 km van die Mogadisjoe-lughawe af gevind.

Die Somaliese owerheid het bevestig ‘n lyk is naby Mogadisjoe gevind wat vermoedelik van vlug D3159 kom.

“Die passasiersvliegtuig het Dinsdag kort ná opstyging ‘n noodlanding gedoen.

“Daar is skade aan die Airbus A321 bokant die regtervlerk,” het die Somaliese polisie gesê.

Sowat 74 mense was op die vlug na Djiboeti en twee het klein beserings opgedoen.

Hoewel die amptelike oorsaak van die ontploffing onbekend is, is oorblyfsels van ‘n plofstof gevind, het ‘n bron aan die media gesê.

Drie kom om in vliegongeluk

Drie mense het omgekom toe ‘n ligte vliegtuig Woensdagoggend in ‘n park in Wattville in Benoni neergestort het.

Die nooddienspersoneel van ER24 het die drie insittendes binne die verbrande wrak aangetref met hul aankoms op die gru-toneel.

Hulle is op die toneel dood verklaar.

Die vliegtuig het op sy dak gelê.

Die oorsaak van die ongeluk is nog onbekend.

De Klerk, Vlok staar strafregtelike aanklagte oor apartheidsmisdade in die gesig

Die kollektiewe skuld wat Afrikaners moet verduur oor apartheid, het uiteindelik ‘n gesig of twee gekry.

Die Anti-Racism Action Forum (ARAF) sal Woensdag tot die logiese stap oorgaan om die apartheidspresident FW de Klerk van verskeie apartheidsmisdade aan te kla.

Die oud-president en Nobelvredespryswenner het voorheen klaarblyklik geglo sy eie veroordelings van “rassiste” en “apartheidsapologete” sal hom kwytskeld van sulke aanklagte.

De Klerk het reeds by herhaling aangedui dat hy hyself gekant was teen apartheid en dit by talle geleenthede ten sterkste veroordeel.

Hy het tewens om daardie rede die hele land aan die ANC se meerderheidstirannie oorhandig sonder slag of stoot.

Dit is daarom net logies dat ten minste 22 strafregtelike aanklagte teen die voormalige staatspresident asook die voormalige minister van polisie, Adrian Vlok ingedien is, aangesien hulle self die verantwoordelik aanvaar het vir wat beskou word as ‘n bose stelsel.

Die Forum, wat homself met dié optrede bekendstel, sê die aanklagte gaan by Hillbrow-polisiekantoor ingedien word.

Die organisasie sê die aanklagte handel oor misdade waarvoor die twee nie amnestie ontvang het nie.

‘n Woordvoerder, Zandi Radebe sê daar is steeds mense wat nie verantwoordbaar gehou word vir die ongeregtighede van die verlede nie.

De Klerk het vroeër gesê diegene wat hom van menseregteskendings wil aankla, moet voortgaan om dit te doen.

Hy sê hy is twee keer deur elemente in, of lede van die Waarheid- en Versoeningskommissie voor die hof gedaag oor beweerde skending van menseregte.

De Klerk sê hy het een van die sake gewen, terwyl die tweede saak teruggetrek is.

Hy sê egter hy kan nie namens voetewasser Vlok oor die organisasie se planne praat nie.