Nuus Archives - Page 295 of 1583

Twee vas vir Kuruman-plaasmoord

Twee swart mans is in hegtenis geneem in verband met die moord van ‘n 64-jarige boer van Kuruman in die Noord-Kaap.

Christo Kruger is in koele bloede vermoor op sy plaas Byron op 28 Mei vandeesjaar. Niks is tydens die aanval gesteel nie.

Kruger is deur die swart aanvallers in die bors geskiet deur die geslote sekuriteitshek van sy huis.

Kruger en sy 55-jarige vrou, Vera, was alleen by hul huis. Sy was fisies ongedeerd tydens die voorval.

Noord-Kaapse polisiewoordvoerder Sergio Kock sê die twee is Saterdagnag in die Bankara-lokasie gevang.

Die een is 19 en ander een 22.

Hulle sal vandag in die landdroshof in Kuruman verskyn.

Sedert die moord op Kruger is agt nuwe aanvalle aangeteken waarin drie mense gedood is.

■ Danie Robertse (43), van Buffelspoort in Noordwes, is steeds in die hospitaal aan nadat hy in sy skouer, linker- en regterbeen geskiet is.

■ In Ladybrand is Bill Clark (45) van die plaas Zuurbult met ‘n mes gesteek.

■ Andries Snyman (59) is in sy huis op ’n hoewe in Rashoop naby Brits met ’n mes doodgesteek.

■ Peter Johnston (56) van ’n suikerrietplaas in die Nyoni-omgewing by Eshowe in KwaZulu-Natal is dood nadat hy in die bors geskiet is. Sy broer Ian (54) is in die gesig geskiet.

■ Gewapende rowers het Erick Meiring (64), ’n plaasbestuurder in die Komatipoort-omgewing, oorval, vasgebind en aangehou.

■ ’n 57-jarige vrou van Bokfontein buite Brits is deur gewapende rowers oorval.

■ Rodger van Parys (71) van ’n plaas tussen Mooinooi en Rustenburg is in ’n kritieke toestand nadat sy aanvallers ’n swaard in sy keel afgedruk het.

Byna kwart van visprodukte verkeerd gemerk

‘n Navorser van die Universiteit van Stellenbosch, Donna Cawthorne, sê amper 20 persent van vars visprodukte in winkels in die land het verkeerde etikette op.

Volgens die SABC het Cawthorne die afgelope tyd DNS-monsters van vars visprodukte landwyd versamel.

Sy sê hulle narvorsing het tot die slotsom gekom dat goedkoper produkte verkeerd gemerk word om die verbruiker te probeer mislei.

Volgens Cawthorne het hulle egter hard gewerk saam met verspreiders en groothandelaars, en is daar reeds ‘n verbetering te sien vandat hulle die eerste navorsing in 2010 gedoen het.

Sestig werkers in hospitaal na ammoniaklek

Die meerderheid van die Sparta Foods-werknemers wat gister in Mediclinic Welkom opgeneem is, weens ammoniakdampe wat hulle ingeasem het, is reeds ontslaan.

Hospitaalwoordvoerder Marissa Pawson sê 25 van die 27 pasiënte is reeds huis toe.

Die drama het homself oor die naweek afgespeel. Die lekkasie het vermoedelik ontstaan in ’n pyp wat gas aan koelkamers verskaf.

Volgens Pawson is slegs twee werknemers oornag vir observasie opgeneem.

Ongeveer 60 werknemers is na verskeie plaaslike hospitale in die stad geneem – onder meer na die St. Helena-hospitaal.

Intussen het Sparta-woordvoerder, Niel Venter aan OFM-nuus gesê werksaamhede by die beesvleisverskaffer het weer hervat, hoewel sekere gedeeltes van die aanleg steeds afgesper is.

Cameron dreig anti-EU ministers

Die Britse Eerste Minister, David Cameron staar ‘n rebellie binne sy regerende Konserwatiewe Party in die gesig oor voortgesette lidmaatskap van die Europese Unie.

Cameron is deur ‘n groep van meer as vyftig parlementslede uitgedaag in ‘n veldtog om die EU te verlaat indien daar nie radikale verandering plaasvind nie.

Die anti-EU ministers het ‘n nuwe groep gestig, by name die Konserwatiewes vir Brittanje.

Cameron het die afvallige ministers gewaarsku om op te hou met die veldtog om die Verenigde Koninkryk uit die Europese Unie te wil kry.

Hy het by die G7-beraad in Beiere, gesê die VK sal nie “neutraal” wees tydens die in-uit referendum-veldtog nie.

Cameron is van plan om Europese leiers te oorreed om tot Brittanje se eise vir hervorming in te stem, voordat hy ‘n referendum oor lidmaatskap sal hou.

“Ons het ‘n duidelike beeld: heronderhandel, en kry ‘n ooreenkoms wat in belang van Brittanje is,” het hy gesê.

En as ‘n waarskuwing het Cameron bygevoeg: “As jy wil deel wees van die Regering, moet jy die siening huldig dat ons besig is met ‘n oefening van heronderhandeling vir ‘n referendum wat sal lei tot ‘n suksesvolle uitkoms.”

Brittanje hoop om ‘n veto-reg oor die EU te kan uitoefen, as ‘n Amerikaanse bondgenoot, maar die kanse daarvoor is besonder skraal.

Oproer in Soweto nadat Eskom krag sny

Die situasie in Soweto, suid van Johannesburg is weer normaal nadat ‘n groep inwoners van Meadowlands gisteraand op ‘n plundertog gegaan het.

‘n Kitskosrestourant, ‘n drankwinkel en twee kitsbanke is geplunder, het RSG berig.

Die inwoners is ontevrede omdat Eskom die kragtoevoer na die gebied afsny.

Die Gautengse Metropolisie sê die situasie het na normaal teruggekeer, maar hulle monitor steeds die gebied.

Een inwoner, wat as ‘n misdadiger bestempel word, is in hegtenis geneem.

Jeugliga-kongres deur geweld gekenmerk

Die eerste dag van die KwaZulu-Natalase ANC-jeugliga in Port Shepstone is gekenmerk deur geweld, ontwrigtings en vertragings.

Die tweedaagse kongres was geskeduleer om gistermiddag om eenuur te begin, maar dit het eers vandag in die vroeë oggendure begin nadat ontevrede lede by die hekke deur die polisie voorgekeer is omdat hulle ontwrigtings veroorsaak het.

Die kongres het twaalf ure laat begin.

Die polisie het ook rubberkoeëls en traanrook gebruik om hulle uiteen te jaag.

Die oproer het uitgebreek toe diegene wat nie geregistreer het nie te laat probeer het om dit te doen. Die verkiesingskonferensie duur voort.

Die liga in die provinsie het intussen gedreig om die EFF kort te vat.

Die pasaangewese voorsitter van die jeugliga, Thami Ngubane het die EFF as politieke kleuters beskryf sonder enige geskiedenis of toekoms. Hy sê die party aap ANC-resolusies na en hou dit dan as hul eie voor.

Hy sê dit is omdat hulle nie vir hulself kan dink nie.

Die vurige nuwe leier het sy teenstander, Sipho Hlomuka in die verkiesing geklop. Die kongres het twaalf ure laat begin.

Twee mense, vermoedelik lede van die Hlomuka-faksie, is met rubberkoeëls geskiet in ‘n onderonsie met die polisie.

Clive Derby-Lewis gemuilband deur paroolvoorwaardes

Die lewenslange politieke gevangene en voormalige KP-parlementslid, Clive Derby-Lewis, is vir alle praktiese doeleindes die swye opgelê deur die strengste paroolvoorwaardes wat enige oudgevangene in die land nóg ontvang het. Die paroolvoorwaardes is so streng dat ‘n biografie oor die oudpolitikus deur die aktrise en skryfster Elma Potgieter, en wat in beginsel vir publikasie deur Uitgewery Praag goedgekeur is, dalk in die gedrang mag kom.

Dr. Dan Roodt van Praag sê: “Ek het aan die begin van die week met mev. Gaye Derby-Lewis gesels, maar toe het sy nog nie geweet wat die voorwaardes vir Clive se mediese parool gaan wees nie. Sedertdien het ek nog nie weer met haar gepraat nie, maar die feit dat hy glad nie met die media mag praat nie en verbied word om onderhoude te voer, mag die publikasie van Elma Potgieter se boek oor hom in die gedrang bring. In weerwil van sy ander gebreke en dubbelsinnighede, waarborg die huidige grondwet van Suid-Afrika spraakvryheid aan elkeen, selfs ‘n oudgevangene soos mnr. Derby-Lewis. Hy behoort tog oor die Suid-Afrikaanse geskiedenis en sy lewe in die politiek te mag praat? Terroriste soos Robert McBride wat veel erger misdade as Derby-Lewis gepleeg het, word geensins die swye opgelê nie.”

Volgens berigte elders, verkeer Derby-Lewis onder ‘n soort huisarres omdat hy nie eens sonder toestemming in die straat mag loop of kerk toe gaan nie, nóg ‘n glas wyn of bier of ander alkohol drink nie. Hy word streng dopgehou en sy paroolbeampte is die departement van korrektiewe dienste se waarnemende streekkommissaris in Gauteng.

Mev. Clive Derby-Lewis het aan Rapport gesê dat haar man “’n werk as ‘administratiewe beampte’ aangebied (is) wat hy uit sy slaapkamer sal kan doen”.

Volgens haar is “hy baie moeg van al die opwinding en moet hy homself dwing om te eet omdat hy vanweë die chemoterapie nie ’n aptyt het nie.

“Ek dwing hom om te eet anders sal hy te swak wees om die longkanker te probeer beveg. Dokters het hom net ses maande gegee om te leef, maar ons glo net die almagtige God sal besluit wanneer dit sy tyd is om te gaan,” sê sy.

Derby-Lewis word verder “vir hipertensie en hartversaking behandel. Die prostaatkanker wat vroeër by hom gediagnoseer is, verkeer in remissie”. Sy meen dat dit “fantasties” is om haar man, met wie sy sedert 1986 getroud is, tuis te hê, ná ‘n jare lange hofstryd teen die staat wat deur die Kommunistiese Party voorgesê is.

Vyf gewapende plaasaanvallers breek veiligheidshekke oop

Twee mans is beseer in ‘n plaasaanval by Rustenburg nadat vyf swartes toegang verkry het tot die woning deur ‘n veiligheidshek.

Die gewapende aanvallers het veiligheidsdeure oopgebreek, het ‘n polisiewoordvoerder gesê.

Een van die huurders is in die bobeen geskiet en die eienaar is ook beseer.

Volgens berigte moes hy ‘n swaard sluk, maar die polisie kon nie bevestig of dit wel gebeur het nie.

Die eienaar se bakkie is steeds soek. Die aanvallers het met gesteelde items in die bakkie gevlug.

Geen van die vermeende aanvallers is nog in hegtenis geneem nie.

Die mark groei, maar Afrika is nie eens ‘n piesangrepubliek nie

Die wêreldwye mark vir piesangs is besig om toe te neem, maar Afrikalande is ver agter by Latyns-Amerika om in dié behoefte te voorsien. Volgens die VN se Voedsel- en landbou-organisasie het die produksie van piesangs sedert 1990 verdubbel. Die gemiddelde, globale verbruik van piesangs het van 10 kg per kop per jaar met 50% gestyg tot 15 kg per kop (sien onderstaande grafiek). Tans voer ontwikkelde lande ongeveer 10 kg per kop piesangs per jaar in, terwyl die res van die mark uit eie bronne voorsien word. Frankryk beskik byvoorbeeld oor kolonies buite Europa wat gedeeltelik in sy behoeftes voorsien, terwyl piesangs ook in die VSA verbou word.

Een van die lande waar die verbruik van piesangs die skerpste gestyg het, is in Rusland. In die ou Sowjetunie was piesangs vir baie Russe ‘n groot luukse en het die vraag na piesangs sedertdien toegeneem, hoewel dit nog onder die vlak van die meeste Wes-Europese lande verkeer. Nog ‘n kenmerk van die Wes-Europese mark vir piesangs is dat verbruikers “organiese” piesangs verkies wat teen ‘n premie vergeleke met gewone piesangs verkoop word. Veral in Denemarke en Switserland is die vraag na organiese piesangs baie hoog, met Duitsland, Brittanje en Frankryk ‘n kortkop agter dié twee lande.

Piesanverbruik wêreldwyd. Bron: Voedsel- en landbou-organisasie — Piesangverbruik wêreldwyd. Bron: Voedsel- en landbou-organisasie

Hoewel Ecuador se markaandeel oor die afgelope paar jaar gedaal het, het dié land tot redelik onlangs een derde van die wêreld se uitvoermark in piesangs oorheers, ‘n ware “pieasangrepubliek”. In Afrika is dit slegs twee voormalige Franse kolonies in Wes-Afrika, Kameroen en die Ivoorkus, wat hoegenaamd piesangs uitvoer en dan veel minder as Ecuador en ander Latyns-Amerikaanse lande (sien onderstaande grafiek).

Hoewel Suid-Afrika die grootste produsent van pomelo’s ter wêreld is, asook ‘n vername speler in ander sitrusvrugte, voer die land feitlik geen piesangs uit nie, terwyl ‘n klein hoeveelheid wel ingevoer word.

Nog ‘n land waar piesangverbruik groei toon, is Japan en ‘n Japanse miljoenêr het onlangs aangekondig dat hy saam met ‘n Kambodjaan gaan werk om piesangs in Kambodja gaan kweek om na Japan in te voer.

Khoisan wag op erkenning

Die nasionale KhoiSanraad het begin om die verskillende gemeenskappe, wat wag op inheemse erkenning van die nasionale regering, in die Vrystaat te verenig.

Dit volg nadat van dié gemeenskappe in die provinsie glo nie ingesluit word tydens samespreking met die provinsiale regering nie.

Hoofman van die Griekwa-leierskap in die provinsie en lid van die nasionale KhoiSanraad, Frans Kraalshoek, sê terwyl die gemeenskappe wag op wetgewing wat gemeenskappe as inheemse volke gaan erken is dit belangrik dat hulle uit een mond praat.