FW prys Thatcher se positiewe rol

Oud-Premier Margaret Thatcher het ‘n beter begrip van Suid-Afrika se gekompliseerdheid en geo-strategiese realiteite gehad as die meeste van haar tydgenote, het oudpresident FW de Klerk Maandag in ‘n verklaring gesê.

“Thatcher het die behoefte verstaan om die bekommernisse en aspirasies van alle Suid-Afrikaners te oorweeg in hul soektog na ‘n konstitusionele konsensus.”

“Om hierdie rede was sy in staat om ‘n positiewe rol te speel in die ondersteuning van ons eie proses van transformasie in Suid-Afrika,” het De Klerk gesê.

“Sy sal nie net as een van Brittanje se grootste leiers beskou word nie, maar ook as ‘n leier wie se beleidspunte ‘n groot impak op wêreldpolitiek gehad het,” het hy gesê.

“Ons het verskeie kere in die Kaap en in Londen ontmoet nadat sy as premier uitgetree het en voor haar beroerte in 2002. Ek voel geëerd om Margaret Thatcher as ‘n vriend te kon hê,” het hy gesê.

Ystervrou oorlede

Margaret Thatcher, wat die Verenigde Koninkryk se langsdienende premier in die vorige eeu was, is ná ‘n beroerte oorlede. Sy was 87 jaar oud.

Thatcher se woordvoerder, Lord Bell, het haar as een van die groot premiers van alle tye beskryf. Hy het aan Sky News gesê: “Ons sal nooit weer iemand soos sy sien nie.”

Hy het gesê Thatcher het mense se lewens verander.

Hy het die voormalige premier, die dogter van ‘n kruidenier van Grantham, beskryf as die beste leier van die Konserwatiewe Party benewens Winston Churchill.

“Sy was net ‘n fantastiese mens – met uitsonderlike charisma, baie gefokus, lief vir haar land, mal daaroor om in die regering te dien en het haar lewe daaraan gewy om mense se lewens te verbeter… ek dink die geskiedenis sal haar met baie begrip onthou.”

David Cameron, die huidige premier, het ook sy medelye uitgespreek: “Ek het met groot hartseer uitgevind van Lady Thatcher se dood. Ons het ‘n groot leier, ‘n goeie premier en ‘n wonderlike Brit verloor.”

‘n Verklaring van Buckingham-paleis het gelui: “Die koningin is hartseer om die nuus te ontvang van Barones Thatcher se dood. Haar majesteit sal ‘n private boodskap van simpatie aan die familie uitreik.”

Downing-straat het aangekondig dat ‘n volle seremoniële begrafnis by die St Paulus-katedraal vir haar gehou sal word.

Thatcher, het tussen 1979 en 1990 as Britse leier gedien.

Geweld dreig oor waterprojek in Lesotho

Die Polihali-dam wat in Lesotho gebou gaan word om deel uit te maak van die Hoogland-waterprojek wat water aan Suid-Afrika sal voorsien, is in die gedrang nadat die jeugliga-forum van Lesotho gevra het dat die konstruksiewerk opgeskort word.

Talle koerante het berig dat die koalisie-regering se Basotho National Party, die hoof-opposisie, die Democratic Congress en die Lesotho Peoples Congress briewe aan die eerste minister Tom Thabane geskryf het waarin hulle dreig dat die jeug gemobiliseer sal word as deel van die voortslepende protes-aksie teen die dam.

Die dam sal nie net water aan Suid-Afrika verskaf nie, maar ook elektrisiteit vir Lesotho opwek. Bouwerk aan die dam van nege-miljard rand moet teen 2016 begin.

Ingeligte bronne sê die faksies veg want wie die Private Sector Foundation of Lesotho (PSFL) beheer sal goed geposisioneer wees om voordeel te trek uit winsgewende tenders in die Lesotho Hooglandwaterprojek se M7.3 miljard Polihali-damprojek in Mokhotlong.

Osman Moosa bly voorsitter en hy sal sy finansiële spierkrag gebruik om kontrakte te monopoliseer.

Moosa het groot regeringstenders, selfs nadat sy reputasie as ‘n sakeman deur ‘n skuldigbevinding oor belastingontduiking in die gedrang gebring is.

Sommige PSFL lede vrees dat sy kriminele rekord die konsortium se kanse om groot kontrakte te kry, in gevaar kan stel.

Moosa en buitelandse beleggers sal baat vind by die Polihali-konstruksie,” sê ‘n PSFL lid. Moosa, sy seun Shameen Moosa en hul maatskappy Selkol 1983 (Edms) Bpk is skuldig bevind aan 198 aanklagte van belastingontduiking in Augustus verlede jaar.

Verlede jaar het Lesotho en Suid-Afrika ‘n ooreenkoms onderteken om te begin aan die LHWP Fase II. Die projek sal waarskynlik met Suid-Afrikaanse belastingeld betaal word, aangesien Lesotho besonder arm is.

Die projek sluit die konstruksie van die Polihali-dam en die uitbreiding van die Muela hidrokragstasie in Butha-Buthe in om meer elektrisiteit vir die twee lande te genereer.

 

Louis Trichardt-munisipaliteit ontvang ‘skokkende’ ouditverslag

‘n Ouditverslag oor die Makhado- plaaslike munisipaliteit wat verlede jaar deur die ouditeur-generaal aan die Limpopo-provinsie voorgelê is, is so pas deur die belastingbetalersvereniging van Louis Trichardt vrygestel.

Mnr. Jaap Kelder van die Nasionale Belastingbetalersunie het in ‘n verklaring die ouditverslag as “absoluut skokkend” bestempel. In ‘n boodskap van meegevoel met die plaaslike belastingbetalersunie onder leiding van mev. Inga Gilfillan, sê Kelder: “Dit skrei ten hemele! Ons is van mening dat julle nou behoort te sê: genoeg is genoeg! Dit sou makliker vir die ouditeur-generaal gewees het om te sê wat reg verloop het in die munisipaliteit. Dit sou net een woordjie gewees het: ‘NIKS!'”

Louis Trichardt se belastingbetalers, wat ook ‘n naamstryd teen die benaming “Makhado” voer, weerhou tans meer as R10 miljoen van die munisipaliteit omdat daar soveel wanbestuur plaasvind. Mnr. Jaap Kelder van die NBU het aan Louis Trichardt se inwoners verklaar: “Goddank het julle julle fondse van die munisipaliteit weerhou anders het die R10 miljoen ook nog in die bodemlose put verdwyn.”

In die verslag verklaar die ouditeur-generaal dat hy geen behoorlike rekords oor meer as R1,6 miljard se munisipale bates kon vind nie. Hy het reeds ‘n jaar gelede sulke syfers versoek, maar dit is nog nie beskikbaar nie.

Daar was ook nie gegewens beskikbaar oor meer as R300 miljoen se roerende bates nie.

Benewens probleme met die boekhouding wat BTW betref, het die munisipaliteit ongemagtigde besteding van R57 872 128 aangegaan.

Dié bedrag van byna R58 miljoen wat as ongemagtigde besteding aangegee word, is egter onderskat met meer as… R124 miljoen. Gesamentlik het die munisipaliteit dus ongemagtigde besteding van R182 miljoen aangegaan.

Foute van die vorige jaar wat deur die ouditeur-generaal uitgewys is, is nog nie reggestel nie.

R33 miljoen is aangewend vir ander doeleindes as waarvoor raadsbesluite geneem is.

Die ouditeur-generaal bevind dat die munisipaliteit nie oor die nodige kundigheid of bekwaamheid beskik om die wetlike vereistes vir die bestuur van ‘n plaaslike owerheid na te kom nie.

Ander elemente wat in die ouditverslag uitgelig word, is:

  • R200 miljoen se goedere en dienste is sonder pryskwotasies aangekoop, wat strydig met die toepaslike regulasies is.
  • Tenders is toegeken aan persone of entiteite sonder dat hulle verklaar het of hulle in diens van die staat of staatsinstellings is.
  • Die rekenkundige beampte het nie redelike stappe geneem om ongemagtigde besteding te voorkom soos deur artikel 63(2)(c) van die Wet op munisipale finansies en bestuur vereis word nie.

Wit ANC-LP bewusteloos na aanranding

‘n Top ANC-LP is aangerand en bewusteloos gelaat in ‘n wrede huisaanval in Kaapstad, het die polisie gister gesê. Sue van der Merwe is gered deur haar seun wat die twee indringers by haar Rondebosch huis onderbreek het.

Sy is Vrydagaand net voor 21:00 aangeval , het die polisiewoordvoerder kapt. Frederick van Wyk gesê.

“Twee mans het haar aangerand en verwurg totdat sy haar bewussyn verloor het. Die verdagtes het gevlug toe haar seun by die huis kom.”

Van Wyk het gesê die boewe het in ‘n silwer Hyundai gevlug. Bankkaarte word uit die huis vermis. Hy kon nie sê hoe ernstig Van der Merwe beseer is nie.

Die 58-jarige LP het vir die Black Sash in Kaapstad tussen 1988-1991 gewerk. Sy het ‘n LP in 1996 geword en het gedien as adjunk-minister van buitelandse sake tussen 2004-2009. Sy was ‘n parlementêre raadgewer vir die president tussen 2001-2004. Volgens die nuutste polisiemisdaadstatistieke, is huisbrake en diefstal die mees algemene misdaad in die woonbuurt.

Tussen April 2011 en Maart 2012, is daar 350 inbrake, 321 diefstalle van motors en 429 ander diefstalle by die Rondebosch-polisiekantoor aangemeld.

Jonathan Jansen wens Mandela moet sterf

“Ek wens Madiba sterf nou.” Blykbaar het prof. Jonathan Jansen, rektor van die Universiteit van die Vrystaat (UV), genoeg gehad van die swart leier.

“Wens julle nie ook hy wil nou doodgaan nie?” het Jansen gesê. Hy het sowat 250 leerlinge by ‘n leiersberaad op die kampus toegespreek, het Volksblad berig.

Sy gehoor het glo geskok na hom gestaar. Jansen se oproep dat Mandela die tydelike met die ewige moet verwissel, was blykbaar nie weens enige ideologiese verskille wat Jansen koester nie, maar bloot ‘n skerp aanval op ouderdom. Hy was later nie vir kommentaar beskikbaar nie.

“Elke keer hoor ons hy is in die hospitaal en almal dink hy gaan dié keer sterf. ‘Big’ Mac (Mac Maharaj, die presidensiële woordvoerder) lieg as hy sê Madiba gaan vir roetine-ondersoeke.

“As jy 94 is, gaan jy hospitaal toe om dood te gaan; nie vir roetinetoetse nie,” het Jansen gesê.

Jansen het weereens verdere bewys gelewer van waarom hy nie by ‘n opvoedkundige instelling hoort nie. Hy het ook uitgevaar teen Qamran Tabo, studente-joernalis aan die Universiteit van Kaapstad (UK), wat ‘n meningspeiling oor die aantreklikste ras gedoen het.

“Wat de fok het die student gedink? Oh, my God! As sy een van mý studente was, het sy baie groot moeilikheid gehad.”

Hy het ook gesê hy verstaan nie waarom het die UK-bestuur verskoning gemaak nie.

“Hoekom verskoning vra omdat swart studente gesê het wit studente is aantrekliker?”

Jansen het die algehele gebrek aan leierskap in Suid-Afrika gekritiseer. “In die Katolieke Kerk word honderde seuns elke week gemolesteer deur priesters; daar is ‘n tekort aan leierskap in die kerk.”

Volgens die rektor is die slagting by Marikana en in die Sentraal-Afrikaanse Republiek die skuld van politici.

Al meer boodskappe van ondersteuning vir oudpres. Nelson Mandela was teen Sondag by sy huis in Houghton te sien.

Meer klippe met boodskappe van ondersteuning is voor die huis gepak waar Mandela aansterk ná hy uit ‘n hospitaal in Pretoria ontslaan is. Al die boodskappe was in Engels.

“As dit van ons afgehang het, sou ons jou vir altyd wou hou,” het ene Mally Mokoena geskryf.

“Jy is ons inspirasie,” het ‘n boodskap op ‘n ander klip gelui.

Mandela is Saterdag ontslaan ná hy nege dae behandel is vir ‘n longinfeksie.

‘n Wag op die straathoek het sake dopgehou terwyl joernaliste, kameramanne en fotograwe in die gebied rondgestaan het.

‘n Groep joernaliste het ‘n tent opgeslaan, met kameras reeds op die huis se oprit gerig.

‘n Paar motors was buite die Mandela-woning geparkeer, een van hulle met ‘n militêre nommerplaat.

Lede van die publiek het stadiger gery en foto’s geneem.

Mandela se kleinseun, Mandla, het gesê die familie is diep geraak deur die gebare van ondersteuning.

“Die afgelope paar dae, sedert Madiba in die hospitaal opgeneem is, is die familie diep geraak deur die uitstorting van gebede en die oorweldigende boodskappe van goeie wense van alle Suid-Afrikaners en ons internasionale vriende,” het hy in ‘n verklaring gesê.

Hysbak-ongeluk by Parlement ondersoek

‘n Ondersoek is van stapel gestuur ná sewe mense beseer is toe ‘n hysbak by ‘n parlementsgebou onklaar geraak het, het die departement van arbeid gesê.

“Ondersoekbeamptes van die [departement van] arbeid het met ‘n ondersoek begin na die ongeluk en sal binnekort aan die minister, Mildred Oliphant, verslag doen,” het Musa Zondi in ‘n verklaring gesê.

Sewe skoonmakers is beseer weens ‘n probleem met die hysbak Vrydagaand.

Luzuko Jacobs, woordvoerder vir die parlement, het aan die SABC gesê die kontrakwerkers is na ‘n hospitaal geneem ná die ongeluk in die Marks-gebou.

Die gebou, wat die SABC se ateljees en kantore vir opposisiepartye huisves, is afgekordon tot ingenieurs kon vasstel of die hysbakke veilig is vir gebruik.

Dit is steeds nie duidelik presies hoe die werkers beseer is nie.

SA-troepe in DRK ontplooi

Die Suid-Afrikaanse Nasionale Weermag (SANW) sal troepe na die Demokratiese Republiek van die Kongo stuur as deel van ‘n mag van die Verenigde Nasies, het die weermag Sondag bevestig.

“Ja, die Suid-Afrikaanse regering sal soldate stuur of sal soldate bydra tot die Verenigde Nasies se ingrypingsmag in die oostelike DRK,” het bgir.genl. Xolani Mabanga gesê.

“Die VN se Veiligheidsraad het verlede week ‘n resolusie aanvaar wat die ontplooiing van ‘n ingrypingsmag in die ooste van die DRK goedkeur. En die regering van Suid-Afrika het beloof om soldate vir daardie mag by te dra,” het hy gesê.

Mabanga het gesê daar is nog nie besonderhede oor wanneer en hoeveel soldate na die DRK gestuur sal word nie.

“Dit sal alles gesien word in die Verenigde Nasies se magstruktuur,” het hy gesê.

City Press en Rapport het Sondag berig dat Suid-Afrikaanse soldate in die ooste van die DRK ontplooi sal word, waar hulle teen die M23-rebellegroep sal veg.

Duitse onderhoud met Poetin laat joernalis met rooi gesig

‘n Onderhoud met Vladimir Poetin onlangs het ‘n Duitse joernalis met ‘n rooi gesig gelaat.

In die onderhoud met die Duitse uitsaaier ARD, het Poetin gesê die onlangs goedgekeurde wet op buitelandse agente wat NRO’s in Rusland monitor, het parallelle in die internasionale praktyk.

Die Duitse onderhoudvoerder was salig onbewus hiervan, en wou Rusland uitsonder vir kritiek omdat hulle “inmeng” in NRO’s se bedrywighede.

Hy het ook kennis geneem van die ooraanbod van buitelandse nie-regeringsorganisasies se teenwoordigheid in Rusland.

In Suid-Afrika is dieselfe ooraanbod van buitelandse NRO’s teenwoordig wat ‘n enorme invloed op die regering se beleidsbesluite uitoefen.

In die begin van die onderhoud, het die Russiese president opgemerk dat die doel van NRO-inspeksies die publiek sowel as aktiviste sal bystaan om groter deursigtigheid van sulke organisasies se werklike bedywighede te bevorder.

Poetin het bygevoeg dat die Verenigde State ‘n baie soortgelyke wet reeds in 1938 in werking gestel het om buitelandse agentskappe se werksaamhede dop te hou.

Poetin het opgemerk dat die Amerikaanse wet afgedwing word deur die Departement van Justisie. Buitelandse groepe wat in die VSA werk, moet gereeld inligting oor hul aktiwiteite deurgee en hierdie inligting word dan deur die Amerikaanse teenspioenasieafdeling hersien.

Die Duitse verslaggewer het erken hy was nie bewus was van sulke praktyke in die Verenigde State nie.

Poetin het uitgewys dat daar 654 groepe in Rusland is wat deur die buiteland befonds word, terwyl Rusland slegs twee buitelandse NRO’s het – een in Frankryk en een in die Verenigde State.

Hy het ook bekendgemaak dat buitelandse diplomatieke missies binne vier maande $1 miljard na Rusland oorgeplaas het, waarvan byna 90% in die rekeninge van NRO’s beland het nadat Rusland die wet op buitelandse agente ingestel het.

Poetin het gesê die Russiese volk het die volste reg om te weet waarmee die uitgebreide netwerk van organisasies hulself mee besig hou.

Die Russiese leier het weer beklemtoon dat die Russiese owerhede nie van plan is om enige sulke organisasies te sluit nie.

“Ons het net gevra dat hulle erken: ‘Ja, ons is besig met politieke aktiwiteite, en ons word befonds uit die buiteland'”, het Poetin gesê. “Die publiek het die reg om dit te weet.”

“Daar moet orde wees. Dit is ‘n bekende reël. Dit is ‘n universele beginsel in enige land,” het hy gesê, en gewys op die onlangse gebeure in Noord-Afrika as ‘n duidelike voorbeeld van wat kan gebeur as hierdie beginsel is verwaarloos word.

Pedofiele kry die wind van voor

Brittanje se beroemde Tate Gallery het Donderdag tientalle beelde, sommiges wat naakte jong meisies uitbeeld van die bekende kunstenaar Graham Ovenden, van sy webwerf verwyder nadat die kunstenaar aan seksuele misdrywe teen kinders skuldig bevind is.

Ovenden, 70, is Dinsdag  skuldig bevind aan ses aanklagte van onsedelikheid teen minderjariges en een van onsedelike aanranding.

Skilderye en foto’s deur die kunstenaar is reeds in galerye oor die hele wêreld tentoongestel.

‘n Tate-woordvoerder het gesê die gallery sal sy beleid oor 34 afdrukke deur Ovenden wat in 1975 aan sy versameling geskenk is, hersien.

“Totdat hierdie oorsig voltooi is, sal die beelde nie aanlyn beskikbaar wees nie en die werke sal slegs per afspraak besigtig kan word.”

Die woordvoerder het bygevoeg: “Graham Ovenden is ‘n kunstenaar van formaat, wie se werk oor meer as 40 jaar uitgestal is.”

Intussen het Pous Fransikus aangekondig dat die Katolieke Kerk “met vasberadenheid” teen die plaag van pedofiele priesters gaan optree.

Vrydag het Monsignor Gerhard Ludwig Mueller, die hoof van die Vatikaan se departement van dissipline, belowe dat sulke priesters wat jag maak op kinders, vervolg sal word.

Dit was die eerste amptelike woord oor die kwessie van die nuwe pous. Hy is op Maart 13 verkies om Benedictus XVI op te volg nadat die vorige pousdom gekenmerk is deur onophoudelike pedofilie skandale met tien duisende slagoffers oor ‘n paar dekades.

Francis het gevra vir “verskerpte maatreëls om minderjariges te beskerm asook diegene wat blootgestel is aan sodanige geweld in die verlede.”