Karin Roodt, Author at praag.co.za

Onwettige dobbelmasjiene vernietig

Meer as 400 onwettige dobbelmasjiene is in Mahikeng in Noordwes vernietig, nadat daarop beslag gelê is.

Die LUR vir Ekonomiese Ontwikkeling in die provinsie, Matlalepula Rosho, sê onwettige dobbelbedrywighede word deur hoogs gesofistikeerde sindikate uitgevoer.

Volgens die uitvoerende hoof van die provinsie se Dobbelraad, Themba Ngobese, is die wette oor die voorkoming van onwettige bedrywighede heeltemal voldoende, maar slenters verhoed behoorlike wetstoepassing.

Die onwettige operateurs het dikwels lasbriewe op ‘n tegniese punt betwis en kon daarin slaag om die deursoeking van die perseel te uit te stel.

Polisiebeampte gekaap

‘n Polisiebeampte is gewond nadat drie mans hom van sy dienspistool beroof en sy motor gekaap het, het die polisie in die Oos-Kaap Maandag gesê.

Die 45-jarige adjudant-offisier is Sondag in Mainstraat geskiet, waar hy stilgehou het, het kapt. Jackson Manatha gesê.

“Drie gewapende mans het die polisiebeampte en die ander insittende beveel om uit die motor te klim. Die beampte is van sy dienspistool beroof.”

Die mans het in die polisiebeampte se Toyota Corolla met die registrasienommer DWD 296 EC gevlug.

‘n Saak van poging tot moord en kaping word ondersoek. – Sapa

Carlton-juweeldiefstal beloop nou miljarde

Die organiseerder van ‘n diamantuitstalling en -verkope het die geraamde waarde van juwele wat tydens ‘n rooftog gesteel is, meer as verdubbel, het ‘n staatsaanklaer gesê.

Volgens die organiseerder is die juwele helderoordag in die Carlton-hotel, een van die deftigste hotelle in Cannes, gegryp. Die juwele is sowat R1,3 miljard werd.

Die polisie het vroeër gesê die rower het sowat R520 miljoen se juwele gebuit – wat dit selfs op dié vlak een van die grootste rooftogte in onlangse jare maak.

Philippe Vique, assistent-staatsaanklaer, het gesê die Doebai-gebaseerde organiseerder van die tentoonstelling het ná ‘n volle inventaris gesê die waarde van die gesteelde juwele is meer.

Vique het gesê owerhede is op soek na een verdagte wat te voet gevlug het.

Die tentoonstelling van die juwele was veronderstel om vir die publiek oop te wees tot aan die einde van Augustus.

Hotelle in Cannes lyk na ‘n gunstelingteiken hierdie jaar, met twee gewaagde juweelrooftogte wat reeds in Mei tydens die Cannes Filmfees gebeur het. Diewe het ‘n kluis uit die muur van ‘n hotelkamer gehaal met R11 miljoen se juwele.

In ‘n latere voorval, het diewe 80 hotelsekuriteitswagte uitoorlê en ‘n De Grisogono–halssnoer gegryp ter waarde van R30 miljoen sê die ontwerpers.

Die luukse Carltonhotel verskyn in die 1955 Alfred Hitchcock–film, met hartebreker Cary Grant as ‘n gereformeerde inbreker wat ‘n juweeldief met die hulp van mede-ster Grace Kelly jaag in To Catch a Thief.

Die hotel is geleë op die Promenade de la Croisette, wat 2,4 kilometer langs die see loop en ‘n vinnige wegkomkans vir diewe bied. – AP

Verhoor oor Amcu-erkenningsooreenkoms uitgestel

Die Kommissie vir Versoening, Bemiddelling en Arbitrasie het ‘n verhoor oor die erkenningsooreenkoms tussen vakbonde en die platinummynmaatskappy Lonmin, tot aanstaande maand uitgestel.

Die mynvakbond AMCU het in Mei met onderhandelinge oor ‘n erkenningsooreenkoms begin.

Samesprekings tussen Lonmin en AMCU het vasgeval en die vakbond het die geskil na die KVBA verwys.

Die NUM het vroeër die maand ook ‘n geskil oor sy erkenning by Lonmin na die KVBA verwys, nadat die vakbond sy meerderheid by die myn verloor het en sy kantore teen die 16de van die maand moes ontruim.

Die NUM het daarna ‘n dringende aansoek by die Arbeidshof ingedien om Lonmin te keer om sy erkenningsooreenkoms op te skort.

Die hof het dié aansoek verwerp op grond daarvan dat dit nie dringend is nie.

Die vakbond Amcu het ‘n beroep gedoen op sy lede wat by Xstrata se Steelpoortmyn in Limpopo afgedank is, om nie deel te neem aan gewelddadige betogings nie.

‘n Mynwerker is Vrydag in onrus by die myn dood. Drie werkers is ook in hegtenis geneem nadat ‘n bus en ‘n vragmotor aan die brand gesteek is.

Die Amcu-takleier, Zeb Mabilu se broer, Leon Mabilu is die mynwerker wat Vrydag dood is.

Mabilu sê Amcu veroordeel Vrydag se geweld. Hy sê Amcu-lede gaan aanhou betoog, maar dit moet op ‘n vreedsame wyse geskied. – RSG

Vakbonde druk myne

Die Kamer van Mynwese het ‘n dispuut met die vakbond Amcu verklaar oor salarisonderhandelinge in die goudsektor.

Dit sal waarskynlik beteken dat die Kommissie vir Versoening, Bemiddeling en Arbitrasie by salarisonderhandelinge vir die hele sektor betrokke moet wees.

Die Kamer sê Amcu het goudprodusente se gewysigde aanbod van ‘n vyf persent verhoging in salarisse en voordele verwerp.

Drie verskillende vakbonde het verlede week ‘n amptelike dispuut met goudprodusente verklaar. Die salarisonderhandelinge word bestempel as van die moeilikste arbeid onderhandelinge sedert die einde van apartheid.

Dit is as gevolg van toenemende strydlustigheid by vakbonde, sowel as stygende kostes en dalende goudpryse.

Intussen het die mynwerkersvakbond die NUM die Kamer van Mynwese daarvan beskuldig dat hy werkers uitlok om te staak.

Werkers van die NUM eis ‘n salarisverhoging van tot 100 persent, afhangend van senioriteit.

‘n Woordvoerder, Frans Baleni sê hulle is bekommerd oor die dispuut, maar hulle hoop dat ‘n oplossing gevind kan word sonder dat die situasie in ‘n staking eindig. – RSG

Vavi se klag van afpersing staan steeds

Die vrou wat ‘n klag van seksuele teistering teen Zwelinzima Vavi, hoofsekretaris van Cosatu, ingedien het, het die klag teruggetrek, maar Vavi oorweeg nogtans regstappe teen haar.

Die vrou het klag twee uur ná die begin van ‘n tugverhoor by Cosatu teruggetrek.

Vavi is bly dat die klag van seksuele teistering teen hom teruggetrek is, het hy Maandag gesê.

“Ek is bly die verhoor is gefinaliseer,” het Vavi in ‘n verklaring gesê.

“Ek hoop ons kan almal die sage agter ons sit sodat ons kan konsentreer op die werklike kwessies van die dag – om te verseker dat ons ‘n dinamiese vakbondfederasie het wat Suid-Afrika en die belange van werkers bevorder.”

Vavi het erken dat hy seks gehad het met die getroude vrou, wat ‘n werknemer is van Cosatu, en beweer sy het later probeer om R2 miljoen van hom te eis.

Hy het ontken dat hy haar verkrag het en gesê sy het ingestem om seks met hom te hê.

Sy het ‘n klag van seksuele teistering teen hom ingedien, maar Maandag tydens ‘n tugverhoor teruggetrek.

Hy het gesê hy sal met sy prokureur vergader om te sien of enige verdere stappe gedoen kan word oor die klag. Vavi sê sy aanklag van afpersing teen ‘n 26-jarige vrou wat hom van verkragting beskuldig het, staan steeds.

“In die lig van die skade wat my reputasie berokken is, sal ek met my prokureurs vergader om enige verdere stappe oor die kwessie te oorweeg.” – Sapa

Blair laat terroris vry vir wapens, wys e-pos

‘n E-pos gestuur deur die destydse Britse ambassadeur na Tony Blair vanuit Tripoli gee besonderhede oor hoe ‘n gevangene-oordragooreenkoms onderteken sou word sodra Libië “sy belofte nakom” om Britse wapentuig aan te koop.

Die onthulling is ‘n yslike verleentheid vir lede van die Arbeidersregering, wat altyd daarop aangedring het dat Abdelbaset al-Megrahi se vrylating is nie gekoppel is aan die kommersiële handel in wapens nie.

Die e-pos is gestuur op 8 Junie 2008 deur Sir Vincent Fean, die destydse Britse ambassadeur, na Tony Blair se privaatkantoor, voor ‘n besoek kort nadat hy uitgetree het as eerste minister.

Emeritus aartsbiskop Desmond Tutu het intussen na Blair as ‘n oorlogmisdadiger verwys en geëis dat hy aangekla word by die Internasionale Strafhof vir sy aandeel in die inval in Irak.

Blair het na Tripoli gevlieg om Gaddafi te ontmoet op 10 Junie in ‘n privaatstraler wat deur die Libiese leier gestuur is, een van minstens ses besoeke van Blair na Libië.

Die inligting, wat 1300 woorde bevat, onthul besonderhede oor hoe gretig Brittanje was om sake te doen met Gaddafi.

Die Verenigde Koninkryk het dit as ‘n belangrike doelwit beskou om Libië se £80 miljard van sy soewereine welvaartfonds te belê deur die Stad van Londen in die lig van die bankkrisis wat die finansiële sektor in dieselfde jaar geskud het.

Die Verenigde Koninkryk was privaat krities oor President George Bush se voortsetting van ‘n bevriesing van Libiese bates in Amerika, wat in die proses saketransaksies gekniehalter het.

Die Departement vir Internasionale Ontwikkeling was gretig om ‘n ander Libiese fonds te gebruik om te betaal vir skemas in Sierra Leone en ander armoede-geteisterde lande in Afrika.

Die vrylating van Megrahi in Augustus 2009 het ‘n groot bohaai veroorsaak, met die Britse regering wat volgehou het hy is vrygelaat uit meegevoel, want hy ly aan terminale kanker, en dat die besluit geneem is uitsluitlik deur die Skotse regering.

Megrahi is skuldig bevind in 2001 van die moord op 270 mense toe die PanAm vlug 103 van Londen na New York opgeblaas is oor Lockerbie in Skotland in 1988.

Dit bly Brittanje se enkele ergste terroriste-aanslag.

Libië het deurentyd druk op die VK geplaas om Megrahi vry te laat, en net voordat hy weg is uit Downingstraat, het Blair na Sirte gereis om Gaddafi en Al-Bagdadi Ali al-Mahmoudi, Libië se destydse eerste minister te ontmoet.

Op dié vergadering, volgens Sir Vincent se e-pos, het Blair en met die Libiese leiers ooreengekom dat Libië die missielafweerstelsel sal koop van MBDA, ‘n wapenvervaardiger in besit van BAE Systems.

Tydens die ontmoeting is ‘n memorandum van verstandhouding ook onderteken vir ‘n gevangene-oordrag wat die weg gebaan het vir Megrahi se vrylating. – The Telegraph

Zim-verkiesing deur duisende waarnemers toegesak

Minstens 20 000 plaaslike en buitelandse verkiesingswaarnemers sal vandag in verskeie gebiede in Zimbabwe ontplooi word in aanloop tot Woensdag se verkiesing.

Die land het meer as ses-komma-vier-miljoen geregistreerde kiesers, wat na verwagting hul kruisies sal trek om die beleërde koalisieregering te beëndig.

Die akkreditasieproses in Harare het deurgeloop onder logistieke probleme met duisende plaaslike waarnemers wat die naweek by akkreditasiesentrums opgedaag het.

Dit laat kommer ontstaan dat sommige nie betyds vir die verkiesing ontplooi sal kan word nie.

Die Zimbabwiese Verkiesingsondersteuningsnetwerk het die grootste groep waarnemers van meer as seweduisend. Die nasionale direkteur van die organisasie, Rindai Chipfunde Vava, het die Zimbabwiese verkiesingskommissie die skuld gegee vir die chaos.

Hy sê die organisasie moet nou bykomende dae meer betaal vir vervoer en akkommodasie vir hul waarnemers.

Die hoof van die Afrika Ontwikkelingsbank, Donald Kaberuka het sy hoop uitgespreek dat die komende verkiesing deur die kiesers en buurlande as geloofwaardig beskou sal word.

Die voormalige Rwandese Minister van Finansies sê Zimbabwe kan dit nie bekostig om nog ‘n tydperk van chaos en onsekerheid deur te maak nie. Kaberuka sê ‘n geloofwaardige verkiesing sal sakevertroue en beleggings aanhelp.

Dit sal Zimbabwe ook in aanmerking laat kom vir skuldverligting deur internasionale finansiële instellings soos die Internasionale Monetêre Fonds en die Wêreldbank.

Die voorsitter van die Afrika-unie kommissie, Nkosazana Dlamini-Zuma sê hulle is tevrede met Zimbabwe se voorbereidings vir die verkiesing op 31 Julie. Dlamini-Zuma het met Zimbabwe se kieskommissie en politieke partye vergader.

Die AU het ‘n span van 60 mense na Zimbabwe ontplooi om die verkiesing waar te neem. Die polisie in Zimbabwe het egter vroeër bevestig dat die MDC se verkiesings-organiseerder in hegtenis geneem is.

Dit volg nadat hy aangemeld het dat hy gemerkte stembriewe in ‘n asblik gekry het na vroeë stemmery.

Dlamini-Zuma sê die enigste kwessies wat by haar geopper is, is operasionale en logistieke bekommernisse.

Die organisasie Human Rights Watch betwyfel egter of die verkiesing geloofwaardig gaan wees. Die groep se Suid-Afrikaans direkteur, Tiseke Kasambala sê hulle is bekommerd oor die hoogs partydige aard van veiligheidsmagte in Zimbabwe en hulle vermoë om kiesers te intimideer.

Kasambala sê daar is al ‘n aantal voorbeelde van opruiende uitsprake deur die hoofde van veiligheidsmagte in die aanloop tot die verkiesing.

President Zuma is as bemiddellaar in die verkiesing aangewys.

Adjunkpresident Kgalema Motlanthe sê Suid-Afrika is vasbeslote dat aanstaande week se verkiesing in Zimbabwe ‘n regverdige weerspieëling van die wense van dié land se mense sal wees.

Duisende vlugtelinge het na Suid-Afrika gevlug na die geweld in die 2008-verkiesing wat ‘n duur humanitêre krisis vir die land geskep het. Sedert die eenheidsregering op die been gebring is, het die ekonomie begin herstel.

Voorbereidings vir die verkiesing het tot dusver nie glad verloop nie, terwyl die MDC beweer dat Zanu PF probeer om dit vir kiesers moeilik maak om te registreer.

Motlanthe het in ‘n onderhoud met Reuters gesê politieke bestendigheid is ‘n voorvereiste vir ekonomiese ontwikkeling en Suid-Afrika het ‘n gevestigde belang om te verseker dat daar vrede en bestendigheid in Zimbabwe is. – RSG

Midvaal-burgemeester ‘vat die pad’ onder wolk van korrupsie

Hermène Koorts van COPE sê alhoewel Timothy Nast, Midvaal se DA-burgemeester wat pas bedank het, ‘n briljante man is, kon hy nie staande bly teen diegene wat hom aan die mag geplaas het nie.

Midvaal se burgemeester het intussen “die pad gevat” terwyl ‘n wolk van beweerde korrupsie oor die party hang.

Die Congress of the People (Cope) se verteenwoordiger by die Gautengse Provinsiale Wetgewer sê sy is nie verras deur die bedanking van Midvaal–burgemeester, mnr Timothy Nast nie. Hy het glo intussen ‘n pos by die Gautengse Beplanningskommissie aanvaar.

COPE se woordvoerder, LPW Hermène Koorts sê die nuus het nie gekom as ‘n skok vir haar nie, want gerugte dat hy onder kwaai druk verkeer weens die beweerde korrupsie in Midvaal, sirkuleer al maande lank.

“Die rede vir die bedanking is duidelik. Midvaal–munisipaliteit word deur verskeie bewerings van korrupte amptenare in die verlede geteister, en die Openbare Beskermer het ook verwys na korrupte optrede binne die munisipaliteit van die Demokratiese Alliansie (DA), in beheer in Midvaal. Hoewel dienslewering in Midvaal aanvaarbaar is, het die DA nie opgetree toe DA–lede die beweerde korrupsie jare gelede aan beide die provinsiale en nasionale leiers onthul het nie. In werklikheid, het hulle probeer om die feite weg te steek, wat nooit wou gaan lê nie,” sê LPW Koorts.

Koorts, wat ook woonagtig is in die groter gebied, het bygevoeg dat mnr Nast ‘n briljante man is, maar hy kon nie opstaan teen die mense wat hom an die mag geplaas het nie.

“Die feit dat die burgemeester bedank het laat die DA–raad verdeel en sal ‘n uitwerking hê op hoe die bestuur hanteer sal word in die toekoms,” het sy geëindig.

Amor na hospitaal gehaas ná val van trappe

Amor Vittone, die sangeres en vrou van die gewese Springbok kaptein, Joost van der Westhuizen, is kort voor middagete na die Midmed Hospitaal gehaas, waar sy op aarvoeding geplaas is, nadat sy flou geval het tydens ‘n optrede by Eskom se bestuursprysuitdeling by Riverside.

Sy het tydens die glansgeleentheid opgetree as gasheer en is na haar floute, en kort behandeling in Midmed, reguit huistoe vir rus het haar ma, Delyse Vittone, Donderdag aan die Observer gesê.

Amor het Maandag nog op haar Facebook-blad geskerts dat sy Middelburg toe kom vir die Eskom funksie en hoop “daar is nie ‘n blackout nie”.

Talle van haar aanhangers, soos Isabel Pretorius, het ewe tong in die kies gesê: “Eskom moet jou net nie uitshort nie”.

Terwyl Ray Harris haar herinner het “dat 10:00 lights out is”.

Sy het omstreeks 12:00 van drie verhoogtrappies afgetuimel en paramedici is dadelik deur haar klankman ontbied om Amor hospitaal toe te vat.

Haar goeie vriend en vertroueling van Middelburg, Andries du Preez, sê hy ken min mense met die energievlakke van Amor.

Hulle het Maandagaand voor haar optrede weer soos ou vriende om die koffiepot gekuier “want as Amor gesels is daar geen einde aan haar nie,” sê Andries.

‘n Besorgde Du Preez het Donderdag tydens navrae gesê dat “Amor gesond en opgewek” gelyk het tydens hul kuiertjie.

Andries sê dat die hele Suid-Afrika se oë nou op Amor is na haar versoening met Joost wat ‘n stryd met motorneuron siekte voer.

“Die stres op my vriendin is groot, sy moet sterk staan vir haarself en haar kinders deur Joost se beproewing en brood op die tafel sit,” sê Andries.

Sy was Donderdag weer oudergewoonte volstoom aan die skitter by ‘n modeparade by haar kinders se skool, en kon nie op Observer navrae reageer voor druktyd nie.

Volgens Andries was die voorval te wyte aan uitputting en kan Amor se aanhangers gerus wees dat sy gesond is. – looklocal.co.za