{jathumbnail off}
Makliker kan dit nie! Rangskik ‘n paar lekker ryp perskes, kaalperskes, nektariens as jy wil, in wiggies gesny op ‘n mooi bord. Braai ewe veel dun snye Italiaanse ham, prosciutto, in hul eie vet tot bros, breek en strooi oor die kaalperskebord. Bedrup met goeie balsamiese asyn en geniet.
Die dodetal styg steeds nadat ‘n bomontploffing ‘n Russiese passasierstrein verlede Maandag laat ontspoor het.
“’n Vrou het Sondag in die hospitaal aan beserings beswyk. Dit bring die dodetal op 26,” het Tatyana Golikova, minister van gesondheid, gesê.
Owerhede in Petersburg sê die bomaanval wat ‘n trein laat ontspoor het, was ‘n terreuraanval.
Alexander Bortnikof, die hoof van Rusland se nasionale veiligheid, het Saterdag gesê kenners het stukke van ‘n ploftoestel op die toneel gevind. Die toestel het glo teen 21:20 Vrydagnag afgegaan nadat die trein daaroor gery het.
Bortnikov sê die bom het met ‘n sterkte wat vergelyk kan word met dié van 7kg se dinamiet, afgegaan. ‘n Gat van meer as 1m wyd is deur die ontploffing veroorsaak.
“Hierdie was ‘n terreuraanval,” het Vladimir Markin, ‘n woordvoerder, gesê.
In ‘n soortgelyke voorval het ‘n tweede ontploffing Rusland presies ‘n week later getref.
Dié ontploffing het vroeg Maandagoggend ‘n treinspoor in Rusland se Caucasiangebied van Dagestan verwoes.
Niemand is in die voorval beseer nie.
Interpol en Kenia se Nasionale Wildbewaringsorganisasie het ná ’n klopjag op winkels en voertuie, beslag gelê op sowat 1 768 kg onwettige olifantivoor.
Die operasie is oor ses lande uitgevoer en het nagenoeg drie maande geduur.
Owerhede het ook beslag gelê op ander onwettige diereprodukte soos die pels van luiperde én krokodil en- slagvelle, het Awad Dahia, die hoof van Interpol in Oos-Afrika gesê.
Dahai het aan die media gesê dat die operasie die internasionale polisie-organisasie, wildbewaringsorganisasies, die polisie en die departemente van doeane van Boeroendi, Ethiopië, Kenia, Rwanda, Tanzanië en Oeganda ingesluit het.
Kenia se wildbewaringsorganisasie het sowat 65 mense in hegtenis geneem wat drie Chinese, drie Tanzaniërs en 59 Keniane insluit.
Patrick Omondi, die hoof van Kenia se organisasie vir die bewaring en die bestuur van die land se dierespesies, het gesê die operasie is onderneem, omdat wildstropery drasties toegeneem het.
Meer as 216 olifante is vanjaar doodgemaak in vergelyking met slegs 47 wat in 2007 doodgemaak is.
Zwelinzima Vavi, hoofsekretaris van Cosatu, het Maandag gesê voormalige president Thabo Mbeki moet jammer sê oor sy hantering van die MIV/vigs-pandemie, het Beeld berig.
Hy het op die vooraand van Wêreldvigsdag in Johannesburg gesê Mbeki se optrede van die MIV/vigs-pandemie is ’n “baie ongelukkige bladsy” in die land se geskiedenis, maar “dié bladsy behoort tot die verlede”.
Vavi se uitspraak volg nadat die Young Communist League (YCL) gedereig het om Mbeki vir volksmoord aan te kla.
“Eintlik het 350 000 mense in daardie tydperk gesterf. Die Ellispark-stadion kan ses keer gevul word. Dit was die omvang van sy ontkenning en gebrek aan optrede deur die regering,” het Vavi gesê.
Cosatu het in 2006 en 2007 oorweeg om Mbeki van “volksmoord” aan te kla, maar het nou daarteen besluit.
Hy het gesê Cosatu is nie geïnteresseerd in ’n Nuerenberg-verhoor nie.
Hy meen egter Mbeki behoort “die eerbare ding te doen”, en te erken dat hy verkeerd was en om verskoning te vra.
“Die Rubicon oorsteek” is spreekwoordelik ‘n onomkeerbare daad. Die Rubicon is ‘n 29 kilometer rivier in Italië. Hierdie idioom is ontleen aan Julius Caesar wat die Rubiconrivier in 49 vC oorgesteek het, ten spyte van ‘n Romeinsregtelike verbod om so te doen. Die Rubicon was die grens tussen Noord en Suid Italië en om die Rubicon oor te steek was gesien as ‘n rewolusionêre daad van aggressie.
Binne die Suid-Afrikaanse konteks is die verwagting, deur minister “Pik” Botha – ten minste aan ons amptenare verbonde aan buitelandse missies geskep – dat president P.W. Botha by die Natalse kongres van die Nasionale Party verrykende beleidsveranderinge sou aankondig. Op daardie stadium was die skrywer hiervan die Saakgelastigde van Suid-Afrika by die SA Ambassade in Den Haag, Nederland. In ‘n spesiale communiqué van die Minister is ons daarop bedag gemaak om die toespraak van die President onmiddelik by vrystelling aan belangrike meningsvormers uit te stuur.
Die presidensiële beleidstoespraak sou vooraf aan Missies gestuur word. Daar was ‘n gees van afwagting. Die teleksmasjiene is dopgehou, maar die toespraak het nie gekom nie. Die aand van die lewering van die toespraak het ons Nederlandse politici en joernaliste na die Ambassade uitgenooi. Die bedoeling was om die toespraak stuk vir stuk tot hulle beskikking te stel. Die antiklimaks kon nie groter gewees het nie. In teenstelling tot die geskepte verwagting het mnr. P.W. Botha ‘n uitdagende toespraak gemaak. Sy wysvinger het ten hemele gewys. Hy was nie bereid om die wit Suid-Afrikaners op ‘n pad van “abdikasie en selfmoord” te lei nie. Sonder wit Suid-Afrikaners, het die President gesê, sal die land deur “faksiegeweld en armoede” in chaos gedompel word. Hy het geen respek vir rewolusionêre anargiste wat Afrika in ‘n sterwende vasteland verander het nie. Mandela en “sy vriende” was in die tronk, het Botha bygevoeg, omdat hulle “’n rewolusie beplan het”. Hy sal hulle net vrylaat as hulle geweld afsweer.
Jare later, ja, kort voor die dood van president Botha, het ek ‘n gesprek van twee Nederlandse joernaliste met hom gereël. Die bejaarde president het ingewillig en was bereid om kwart oor tien een oggend met hulle te praat. Die gesprek het tot 15h00 die middag voortgeduur. Die gesprek met Botha is op band opgeneem.
Een van die vrae wat ek aan die joernaliste voorgestel het om met die president op te neem was wat die waarheid aangaande die Rubicon toespraak was. Die gryse Botha het onomwonde verklaar dat hy verskillende insette van sy ministers gekry het. So het hy advies gekry oor wat hy moes sê om verhoudinge met die buiteland te normaliseer. Botha het egter onomwonde verklaar dat hy op geen gegewe stadium laat blyk het dat hy wel verrykende politieke stappe sou aankondig nie. Hy het ook geen suggestie gemaak dat mnr. Nelson Mandela vrygelaat sou word nie. Dit was dus aannames wat sonder sy medewete en toestemming gemaak is.
Hierdie storie het my onwillekeurig laat dink aan ‘n gebeurtenis in New York. Dit was die bewindsfase van president J.B. Vorster. Die betrokke minister het ‘n toespraak voorberei wat ‘n tipe Rubicon was. Hy het sy privaatsekretaris in my teenwoordigheid opdrag gegee om die toespraak, vergesel van ‘n dekbrief aan “die baas” (dus mnr. Vorster) te stuur. Indien mnr. Vorster nie teen 15h00 terugkom nie, sal aanvaar word dat hy akkoord gaan, is in die dekbrief geskryf. Die brief is aan die privaatsekretaris gegee en toe ons wegstap het die minister bygevoeg: “Teleks dit en trek dan die prop van die teleksmasjien uit!”.
‘n Minister en ander politici in Italië het gister die uitslag van ‘n Switserse referendum ten gunste van ‘n verbod op die konstruksie van nuwe minarette verwelkom en dit ‘n les in demokrasie genoem.
“Switserland stuur daarmee vir ons ‘n helder sein: Ja vir kloktorings, nee vir minarette,” het Roberto Calderoli, die minister van administratiewe vereenvoudiging en ‘n lid van die anti-immigrant Noordelike Liga-party gesê.
“Wat uit die keuse van die Switserse mense se keuse blyk te vloei, is respek vir die vryheid van godsdiens aan die een kant en die behoefte om die politieke en propaganda-aspekte verbonde aan Islam te vertraag aan die ander kant.”
Die referendumuitslag “moet ons weer laat dink,” sê Calderoli.
Riccardo De Corato, ‘n wetgewer van Eerste Minister Silvio Berlusconi se Mense van Vryheidparty, en die onderburgemeester van Milaan, het die referendum gebruik om die linkse vleuel in sy eie land te kritiseer.
“‘n Baie demokratiese Switserland het Italië vandag ‘n les geleer, veral aan linksgesinde militantes wat versperrings sou opgerig en ‘skande’ geskree het indien dié soort inisiatief in Italië plaastevind het,” sê hy.
Nog ‘n Noordelike Liga-politikus, ‘n adjunk in die Europese Parlement, het die stemmery “‘n grootse les in demokrasie van Switserland” genoem. “Ongelukkig konsulteer ons nie die mense in Italië om uit te vind wat hulle van moskees en Islamitiese sentra dink nie,” het Matteo Salvini gesê.
Giancarlo Galan, die president van die noordelike Veneto-streek wat Venesië insluit, sê hy is in sy noppies met die uitslag van die referendum en hy “sou honderdmaal nee (vir minarette) gestem het.”
Sowat 57,5 persent van die Switserse kiesers het gekies om die konstruksie van nuwe minarette te verbied.
Iran het gister planne om tien industriëlegrootte uraanverrykingsaanlegte te bou, goedgekeur, ‘n dramatiese uitbreiding van die program wat die VN se eise dat die land verryking moet staak trotseer, en ‘n skuif wat waarskynlik spanning in die Weste gaan verhoog.
Die besluit kom enkele dae nadat die VN se kernwaghondagentskap Iran betig het oor hulle program en aangedring het dat die konstruksie van ‘n nuutonthulde verrykingsaanleg gestaak word. Die weste het gesein dat hulle uit geduld uit raak met Iran se voortgaande verryking en hulle onbereidwilligheid om ‘n VN-ooreenkoms te aanvaar. Die VSA en hulle bondgenote het aangedui dat nuwe VN-sanksies ingestel sal word indien Iran nie reageer nie.
Die Withuis sê die skuif “sal nog ‘n ernstige oortreding van Iran se duidelike verpligtinge onder talle VN Veiligheidsraadresolusies wees en nog ‘n voorbeeld van Iran wat verkies om hulleself te isoleer.”
“Tyd loop uit vir Iran om die internasionale gemeenskap se groeiende kommer oor hulle kernprogram aan te spreek,” sê die Withuis se perssekretaris, Robert Gibbs.
“Dit is ‘n toonbeeld van die grondliggende probleem wat ons in die gesig staar met Iran,” sê hy. “Ons het oor en oor verklaar dat ons Iran se reg tot ‘n siviele kernprogram erken, maar hulle moet eers internasionale vertroue in hulle bedoelings herstel. In plaas daarvan om met ons in gesprek te tree, verkies Iran om uit te lok en te mislei.”
Die VN se Internasionale Atoom Energie Agentskap het Vrydag ‘n skerp teregwysing aan Iran oor verryking uitgevaardig, en dit het Teheran woedend gemaak.
“Sou die Weste aanhou om druk op ons te plaas, kan die wetgewer Iran se vlak van samewerking met die IAEA heroorweeg,” het die parlement se speaker, Ali Larijani gister in ‘n toespraak oor die staatsradio gesê.
Egipte se Moefti, Ali Gomaa, het uitgevaar teen ‘n referendumuitslag in Switserland wat nuwe minarette verbied, en het dit ‘n “belediging” teen Moslems regoor genoem terwyl hy ‘n oproep op Moslems gedoen het om nie deur die skuif uitgelok te word nie.
‘n Soliede meerderheid Switserse kiesers het in ‘n referendum gestem om die oprigting van nuwe minarette, die torings wat teenaan moskees gebou word vanwaar die oproep tot gebed gemaak word, te verbied
“Hierdie voorstel word nie net as ‘n aanval op die vryheid van opvattings beskou nie, maar is ook ‘n poging om die gevoelens van die Moslem-gemeenskap in en buite Switserland te beledig,” het Gomaa, die Egiptiese regering se amptelike vertolker van Islamitiese wet aan die staatsnuusagentskap MENA gesê.
Hy het Switserland se 400,000-sterk Moslemgemeenskap aangemoedig om dialoog en wettige metodes te gebruik om die verbod, wat hy as uitlokkende gedrag beskryf het, te beveg.
Die regse Switserse Volksparty, Switserland se grootste party, het die referendum afgedwing nadat hulle die verpligte honderdduisend stemme binne 18 maande ingesamel het.
Volgende jaar se toetswedstryd tussen Suid-Afrika en Frankryk op die 12de Junie, kan nie in Suid-Afrika aangebied word nie, weens die Sokkerwêreldbekertoernooi wat dan reeds begin het. Die wedstryd, wat deel van die Franse se seisoeneindetoer uitmaak, sal na Europa verskuif word. Dit blyk dat die Wembley-stadion in Engeland die aangewese plek is.
Benewens die Springbokke, sal die Franse ook teen ‘n Suid-Afrikaanse A-span speel voordat hulle die toer teen Argentinië afsluit. Die toer is deel van Frankryk se voorbereidings vir die Wêreldbekertoernooi in Nieu-Seeland in 2011. Hulle sal ook teen Ierland in Augustus en Ierland speel.
Frankryk is geskeduleer om teen die All Blacks in die groepwedstryde van die Wêreldbeker te speel. Hulle het Saterdag ‘n loesing van 39-12 teen dié span op die lyf geloop.
Sou daar ‘n wedstryd op St. George’s Park in Port Elizabeth wees, sal dit die kaptein betaam om te luister na kenners wat dié blad en die omstandighede ken, iemand soos, sê nou maar, Keppler Wessels. Hy het ‘n vrag wedstryde daar gespeel, meeste as kaptein. En hy sal vir die kaptein sê, in die woorde wat hy tydens gister se televisie-uitsending gebruik het, dat as die wind waai, en dis bewolk en dis bedompig, moet jy nie, as jy die loot wen, besluit om te kolf nie.
Smith hét die loot gewen, hy hét nie na Keppler geluister nie en hy hét besluit om te kolf. Fout. Die eerste uur van die wedstryd het die bal weggekaats van die naat en was daar ‘n angel in die blad. Daarna het die wind en die son die blad uitgedroog en was dit so mak soos Roelf Meyer se politiek. Maar na ‘n uur was die Proteas se doppie reeds geklap want die toporde het toe reeds energiedrankies in die paviljoen gesuig.
Nie dat die blad sonder medepligtiges was nie. Die Proteas het gekolf asof hierdie beurt ‘n voortsetting van Vrydag se lopievloed op Nuweland was. Dit was nie en dit was asof dit die Suid-Afrikaanse kolwers so nukkerig gemaak het dat hulle geweier het om vas te byt en te konsentreer. Smith het self ‘n hele twee lopies tot sy span se fortuin bygedra en Amla 11. De Villiers het 99 lopies minder as Vrydag se 121 gekry en Duminy het nóg ‘n rondte teen die kortbal verloor om agter die penne deur Prior van Anderson uitgevang te word.
Die enigste kolwer wat enige toewyding getoon het, was die onbesonge Alviro Petersen met sy derde agtereenvolgende vyftigtal. Hy was laaste uit op 51 met Suid-Afrika op ‘n skandalige 119.
Die verloopte Suid-Afrikaners, Jonathan Trott en Andrew Strauss het 80 persent van die lopies aangeteken voordat Morgan by Trott aangesluit het om die taak af te handel.
Jimmy Anderson was die Man van die Wedstryd met sy beste ontleding ooit van vyf vir 23.
Engeland is nou 2-1 voor in die reeks met nog net een wedstryd, Vrydag, in Durban oor.
