Skrywer: Dan Roodt

Jonathan Jansen wens Mandela moet sterf

“Ek wens Madiba sterf nou.” Blykbaar het prof. Jonathan Jansen, rektor van die Universiteit van die Vrystaat (UV), genoeg gehad van die swart leier.

“Wens julle nie ook hy wil nou doodgaan nie?” het Jansen gesê. Hy het sowat 250 leerlinge by ‘n leiersberaad op die kampus toegespreek, het Volksblad berig.

Sy gehoor het glo geskok na hom gestaar. Jansen se oproep dat Mandela die tydelike met die ewige moet verwissel, was blykbaar nie weens enige ideologiese verskille wat Jansen koester nie, maar bloot ‘n skerp aanval op ouderdom. Hy was later nie vir kommentaar beskikbaar nie.

“Elke keer hoor ons hy is in die hospitaal en almal dink hy gaan dié keer sterf. ‘Big’ Mac (Mac Maharaj, die presidensiële woordvoerder) lieg as hy sê Madiba gaan vir roetine-ondersoeke.

“As jy 94 is, gaan jy hospitaal toe om dood te gaan; nie vir roetinetoetse nie,” het Jansen gesê.

Jansen het weereens verdere bewys gelewer van waarom hy nie by ‘n opvoedkundige instelling hoort nie. Hy het ook uitgevaar teen Qamran Tabo, studente-joernalis aan die Universiteit van Kaapstad (UK), wat ‘n meningspeiling oor die aantreklikste ras gedoen het.

“Wat de fok het die student gedink? Oh, my God! As sy een van mý studente was, het sy baie groot moeilikheid gehad.”

Hy het ook gesê hy verstaan nie waarom het die UK-bestuur verskoning gemaak nie.

“Hoekom verskoning vra omdat swart studente gesê het wit studente is aantrekliker?”

Jansen het die algehele gebrek aan leierskap in Suid-Afrika gekritiseer. “In die Katolieke Kerk word honderde seuns elke week gemolesteer deur priesters; daar is ‘n tekort aan leierskap in die kerk.”

Volgens die rektor is die slagting by Marikana en in die Sentraal-Afrikaanse Republiek die skuld van politici.

Al meer boodskappe van ondersteuning vir oudpres. Nelson Mandela was teen Sondag by sy huis in Houghton te sien.

Meer klippe met boodskappe van ondersteuning is voor die huis gepak waar Mandela aansterk ná hy uit ‘n hospitaal in Pretoria ontslaan is. Al die boodskappe was in Engels.

“As dit van ons afgehang het, sou ons jou vir altyd wou hou,” het ene Mally Mokoena geskryf.

“Jy is ons inspirasie,” het ‘n boodskap op ‘n ander klip gelui.

Mandela is Saterdag ontslaan ná hy nege dae behandel is vir ‘n longinfeksie.

‘n Wag op die straathoek het sake dopgehou terwyl joernaliste, kameramanne en fotograwe in die gebied rondgestaan het.

‘n Groep joernaliste het ‘n tent opgeslaan, met kameras reeds op die huis se oprit gerig.

‘n Paar motors was buite die Mandela-woning geparkeer, een van hulle met ‘n militêre nommerplaat.

Lede van die publiek het stadiger gery en foto’s geneem.

Mandela se kleinseun, Mandla, het gesê die familie is diep geraak deur die gebare van ondersteuning.

“Die afgelope paar dae, sedert Madiba in die hospitaal opgeneem is, is die familie diep geraak deur die uitstorting van gebede en die oorweldigende boodskappe van goeie wense van alle Suid-Afrikaners en ons internasionale vriende,” het hy in ‘n verklaring gesê.

Hysbak-ongeluk by Parlement ondersoek

‘n Ondersoek is van stapel gestuur ná sewe mense beseer is toe ‘n hysbak by ‘n parlementsgebou onklaar geraak het, het die departement van arbeid gesê.

“Ondersoekbeamptes van die [departement van] arbeid het met ‘n ondersoek begin na die ongeluk en sal binnekort aan die minister, Mildred Oliphant, verslag doen,” het Musa Zondi in ‘n verklaring gesê.

Sewe skoonmakers is beseer weens ‘n probleem met die hysbak Vrydagaand.

Luzuko Jacobs, woordvoerder vir die parlement, het aan die SABC gesê die kontrakwerkers is na ‘n hospitaal geneem ná die ongeluk in die Marks-gebou.

Die gebou, wat die SABC se ateljees en kantore vir opposisiepartye huisves, is afgekordon tot ingenieurs kon vasstel of die hysbakke veilig is vir gebruik.

Dit is steeds nie duidelik presies hoe die werkers beseer is nie.

Die geheime oorlog teen geloof

Daar is deesdae min mense wat sal twyfel dat daar op allerlei fronte ‘n oorlog gevoer word teen elke vorm van identiteit en kultuur, veral as jy toevallig wit en Protestants is. Dit geld vir sowel Afrikaners as Amerikaners, die twee volke wat tradisioneel die meeste haat en hoon vanuit links te verduur moet kry. En vanuit die linkse wêreldbeeld beskou is daar ‘n goeie rede waarom dit so is. Die rede is as volg: Die drie belangrikste steunpilare van enige beskawing is sy geloof, sy politiek en sy ekonomie.

Die afgelope twintig jaar het ons duidelik gesien hoe politiek en ekonomie deur linkse invloede volledig van binneuit vernietig is en Suid-Afrika in ‘n staat van bandeloosheid en rigtingloosheid gewerp het. Egter, die kommuniste se belangrikste teiken is juis daardie pilaar waar min oor gepraat word, naamlik geloof. Omdat ‘n geloof se invloed eerder subtiel as direk is, is mense nie altyd bewus oor die uitwerkinge daarvan nie, en ook nie oor die skade wat kan ontstaat sodra dit in verval beland nie. Gelukkig kan ons vertrou op ‘n paar skerp ontleders wat ‘n goeie insig gehad het in hierdie sake.

As daar twee groot suksesverhale was in die moderne geskiedenis, was dit eerstens die ontstaan van die nasiestaat en tweedens die opkoms van die Protestantse Werksetiek gewees. Hierdie drywende kragte het die Westerse beskawing tot nuwe hoogtes gestuur en het – baie belangrik – ons herinner dat as jy werklik groot hoogtes vir jouself en jou naaste wil bereik, moet dit van binneuit kom. Die Protestantse tydsgees soos in Suid-Afrika en in die Verenigde State toegepas was, het mense enersyds saamgebind, maar desondanks genoeg ruimte gegee vir persoonlike ontwikkeling. Selfs die ateïs Abraham Maslow was meegesleep in die gees hiervan en sy gevleuelde woorde was: “Wat ‘n mens kan wees móét hy wees”. Die gelowige Hendrik Verwoerd aan die ander kant het ook gestel dat geen volk groter hoogtes vir homself kan bereik deur op die lyk van ‘n ander volk te trap nie. Hiermee wou Verwoerd ons herinner dat die ware krag om vooruit te gaan binne in ons lê. Die Boheems-Oostenrykse digter Reiner Maria Rilke het ons dieselfde les geleer in sy bekende Briewe aan ‘n jong digter dat jy moet jouself nie met ander vergelyk nie, maar fokus op die krag binne jouself. (kliek hier om Dennis Hopper se uitstekende voorlesing van Rilke te sien).

Dit is om hierdie rede waarom die Weste vooruitgang gemaak het…en om hierdie rede waarom die Kommuniste en hul meelopers ‘n fundamentele haat teenoor die Weste koester. Sodra mense vanuit hulself en die hoogste voorskrifte van moraliteit begin leef, maak hulle die politieke klas van intellektuele oorbodig. Hierdie volke laat hulself nie meesleep in die menings van ander nie. As jy jouself op geestelike vlak kan bevry en die hoogste binne jouself en daarbuite opsoek, is jy op die verste punt verwyder van slawerny.

In groot teenstelling tot wat links jarelank aan ons opdis, het Suid-Afrika en die Verenigde State hulself nie imperialisties verryk op ander nie, maar vanuit hulself die kennis en vaardighede benut en hulself op hul eie stoom verryk, en hulle hoop ook dat omliggende buurvolke dieselfde sal doen. Vandaar die ontwikkeling in die tuislande destyds, en die feit dat Amerikaanse inboorlinge deesdae meer sosiale en mediese voorregte geniet as wit Amerikaners.

Dit is juis die opkoms van diverse vorme van hedendaagse “kuns” en “kultuur” vanuit linkse strominge wat afbreuk doen aan hierdie hoër besef. ‘n Religieuse ingesteldheid het die ekstra voordeel dat dit die mens fyner stem, en maak van ‘n stapel bakstene en grond ‘n katedraal so majestieus soos die Segrada Familia of die Notre Dame. Kyk ook na Michelangelo, El Greco en ander om te sien hoe geloof aanleiding gegee het tot ‘n hoër spirituele besef.

As ‘n mens daarenteen kyk wat deesdae in die Guggenheim kunsgallery uitgestal word, naamlik ‘n ry bakstene op mekaar gestapel, ‘n leë kamer met ‘n lig wat voortdurend aan en uit flikker, of ‘n onopgemaakte bed, begin ‘n mens kopkrap of hier nou sprake is van ‘n dieper belewenis of dat banaliteit self opgehef is tot kuns. Dit is geen kuns nie, maar antikuns. Dit het as doel om die fyner ontwikkeling van hoër beskawings juis te ondermyn en af te breek. Dit is kulturele vandalisme.

Dit is ook die rede waarom die Russiese president Poetin so heftig kapsie gemaak het teen die punkgroep Pussy Riot met hul gespring en geskree in ‘n Russies Ortodokse kerk. In die Weste is ons onder die indruk dat ons hier te make het met gewone kattekwaad van hierdie jong talentlose dames en dat Poetin buitensporig hard opgetree het. In werklikheid is dit geen gewone kattekwaad nie. Daar is ‘n hele subkultuur in Rusland van sulke figure wat hulself graag “kunstenaar” noem, maar die enigste wat hulle kan vermag is om lawaai te maak en Rusland se ryk en tragiese erfenis uit te lag en te bespot, en Poetin het genoeg gehad daarvan. Rusland het nog baie onverwerkte leed en trauma as gevolg van kommunisme, en dit gaan nog generasies duur om te herstel. Die beste manier om weer te herrys is juis om mense te stuur in die rigting van daardie land se hoër beskawingsvorme. Van alle lande weet Rusland presies hoe gevaarlik dit is om van jou kernwaardes vervreem te word, en in die Weste begin ons dit ook nou langsamerhand te besef. Ons moet ook nie vergeet nie dat nog minder as ‘n honderd jaar gelede het Lenin 66 miljoen Christene uitgehonger en vermoor. Geen verantwoordelike staatshoof sal sulke vorme van minagting en vandalisme goedkeur nie.

‘n Ander interessante gegewe waaroor die esoteriese skrywer Jonathan Black melding gemaak het in sy publikasie The Secret History of the World, is dat ondanks die feit dat die vormgewers van kommunisme soos Weishaupt, Marx, Engels, Lenin, Trotski en ander hulself as ateïste voorgegee het, is die werklikheid dat hulle ‘n obsessie gehad het met die okkulte. Lenin het blykbaar geglo dat daar ‘n oorlog in die hemel was waarvan die goeies voorlopig die stryd gewen het, maar die beslissende stryd sou nog op aarde gevoer moet word. Lenin het geglo dat hy letterlik ‘n oorlog teen God gevoer het.

In ‘n min of meer soortgelyke trant het die New Yorkse Rabbi Marvin Antelman in To Eliminate the Opiate geskryf dat die doel van die Sabbateaanse Frankiese Jode – die stam van waaruit kommunisme ontstaan het – is om alle vorme van georganiseerde geloof te vernietig. Waar die gelowige Jode glo dat die Verlosser sal kom sodra al die Jode vroom is, glo die Sabbateaanse Frankiste dat die Verlosser slegs na vore sal tree sodra alle gelowe vernietig is. Interessant genoeg is die Sabbateane juis die mees vyandig teenoor die Joodse geloof, en bied ‘n verklaring waarom kommuniste so fel teen Sionisme gekant is, terwyl hulle self heimlik agter die ontstaan van Sionisme gesit het. Dit is ‘n uiting van ‘n stamoorlog teen die gelowige Jode. Daarbenewens glo hulle dat as die Joodse geloof eenmaal vernietig is sal sy twee dogtergelowe, Christendom en Islam, vanself instort omdat hulle geen spirituele “impuls” meer het nie, wat die Sabbateane nog ‘n verdere rede gee om die Jodendom te teiken.

Die “wapen” wat deur links ingesit word om die mensdom tot ‘n staat van slawerny te reduseer is juis om mense se aandag na buite te rig in plaas van na binne. Kommunisme, soos wat Churchill beskryf het is ‘n sisteem van onmoontlike gelykheid, gestremde ontwikkeling en jaloerse kwaadwilligheid. Dit ontken die groeipotensiaal binne die mens self en reduseer die mensdom tot kuddediere wat maklik vatbaar is vir propaganda. Dit verklaar ook waarom kommunisme teen indiwidualisme gekant is. Op hierdie manier bly hulle baas en kan hulle die “dom gepeupel” makliker in toom hou.

Soos Carl Jung gestel het: “Wie na buite kyk droom. Wie na binne kyk ontwaak”.

Dit moet eintlik die leuse wees van ons tyd.

SA-troepe in DRK ontplooi

Die Suid-Afrikaanse Nasionale Weermag (SANW) sal troepe na die Demokratiese Republiek van die Kongo stuur as deel van ‘n mag van die Verenigde Nasies, het die weermag Sondag bevestig.

“Ja, die Suid-Afrikaanse regering sal soldate stuur of sal soldate bydra tot die Verenigde Nasies se ingrypingsmag in die oostelike DRK,” het bgir.genl. Xolani Mabanga gesê.

“Die VN se Veiligheidsraad het verlede week ‘n resolusie aanvaar wat die ontplooiing van ‘n ingrypingsmag in die ooste van die DRK goedkeur. En die regering van Suid-Afrika het beloof om soldate vir daardie mag by te dra,” het hy gesê.

Mabanga het gesê daar is nog nie besonderhede oor wanneer en hoeveel soldate na die DRK gestuur sal word nie.

“Dit sal alles gesien word in die Verenigde Nasies se magstruktuur,” het hy gesê.

City Press en Rapport het Sondag berig dat Suid-Afrikaanse soldate in die ooste van die DRK ontplooi sal word, waar hulle teen die M23-rebellegroep sal veg.

Pasop vir Amerikaanse destabilisering van Suid-Afrika!

Telkens as ek die hoofstroom- liberale webwerwe op my rekenaarskerm oopmaak, moet ek eers my lagbuie tot bedaring bring voor ek verder kan lees. Dieselfde koerante en joernaliste wat tot enkele maande gelede nog “ons wonderlike demokrasie” met “die beste grondwet ter wêreld” besing het, is tans besig om die ANC-bewind fel te kritiseer. Die 13 soldate wat in die Sentraal-Afrikaanse Republiek omgekom het, is die jongste voorwendsel om president Jacob Zuma so sleg te sê dat die see hom nie kan afwas nie.

Ek wil vra: maar is dit nie julle alwetende mediamense wat so graag wou gehad het die ANC moet Suid-Afrika regeer nie? Wat het geword van al die lofsange aan Madiba, transformasie, versoening, grondhervorming en ander grondslae van liberale sikofansie in dié land?

Dis seker erg dat dertien SA soldate weens ‘n gebrek aan ammunisie in die SAR moes sterf. Maar dis vir my erger dat tienduisende plaas- en stadsmoorde al gepleeg is en geen dooieboomnuusorgaan soos Rapport of Beeld het al ooit geskryf nie: “Dis ‘n krisis. Só kan dit nie aangaan nie!”

Wat is nou eintlik aan die gang met “die media” soos hulle genoem word? Hoe op aarde het dit gebeur dat hulle al weer ‘n regsomkeer gemaak het, “sonder om ‘n paradepas te mis”, soos Breyten Breytenbach dit eenkeer gestel het?

Eens is regering deur die ANC en veral die halfgod Mandela as die wonderkuur vir al Suid-Afrika se etniese en politieke probleme beskou. Nou wil dit lyk asof ons twintig jaar van transformasie in trurat moet gooi, van Zuma en sy Zoeloe-magsbasis moet ontslae raak en ‘n ander regering kry. Wie sal daardie regering wees? wonder ek so by my selwers? Mev. Zille en haar ondersteuners onder die minderheidsgroepe?

Die DA wat die ANC kort-kort as “immoreel” en “korrup” tipeer, laat my insgelyks glimlag. In Midvaal het die DA ook korrupsie gepleeg en in Kaapstad is “pienk” sekstoerisme bevorder, wat tot ‘n toename in kinderprostitusie in die Moederstad gelei het. Is Kaapstad regtig ‘n meer morele plek as Nkandla?

Op PRAAG skryf ons al maande en jare oor die geostrategiese herskikking in die wêreld, asook die nuwe “stormloop na Afrika” deur die groot moondhede soos China, die VSA, Frankryk en Rusland. Soos almal weet, gaan dit om grondstowwe soos goud, diamante en veral olie. My vrou Karin het reeds ‘n spioenasieverhaal, Duiwelsasem, oor die stryd in die Meregebied naby die SAR geskryf, wat einde verlede jaar gepubliseer is. By PRAAG is ons hiperbewus van die stormloop na Afrika en hoe Afrikaners uiteindelik daarby betrek gaan word, hetsy willekeurig, hetsy onwillekeurig.

Die groot stryd is egter tussen China en die VSA. As lid van BRICS, bevind Suid-Afrika hom reeds in die China-kamp. Eintlik is dit ‘n ongelooflike geostrategiese verskuiwing wat plaasgevind het toe die ANC hom uit die omhelsing van Londen en Washington losgemaak en sy heil in Moskou en Beijing gaan soek het!

Soos ek al soveel kere gesê het, is die ANC ‘n maaksel van Groot Brittanje. Dis waarom daar ‘n standbeeld vir Nelson Mandela langs die Westminster-parlementsgebou op hul Parlementsplein in Londen opgerig is. Ook die Swart Koukus in die VSA het ‘n sleutelrol in die opkoms en magsoorname van die ANC gespeel deur president Ronald Reagan se vetoreg in 1986 te laat ophef en sodoende sanksies teen die destydse Afrikanerregering van Suid-Afrika ingestel te kry.

Veral onder Mandela, maar ook daarna, het die ANC streng in die Anglo-Amerikaanse invloedsfeer verkeer. Feitlik onmiddellik ná 1994 het ons insgelyks weer ‘n Statebondland geword en Mbeki het saam met die Britse koningin in ‘n oop koets deur Londen se strate gery.

Dat ons nou onder Zuma ‘n BRICS-land geword het, is op sy minste merkwaardig. Net soos Brittanje en Amerika die Afrikanerregering van destyds, wat gedurende die hele twintigste eeu hul bondgenoot was, weggesmyt het om die ANC te omhels, wil dit voorkom asof die ANC nou op sy beurt opsy gestoot is! Net soos Libië, Egipte, Sirië, noem maar op. Die Anglo-Amerikaanse Ryk verander maklik van bondgenote; eendag is jy nog ‘n vriend, en die volgende dag steun hulle die rebelle in jou land en stuur hul spesmagte om jou bewind omver te werp.

Dink ook hieraan, liewe leser. Die meeste Amerikaanse toeriste wat die land binnekom – of hulle nou blank, swart of van gemengde afkoms is – gaan besoek die Hector-Peterson-monument in Soweto of die plek waar die Freedom Charter aangeneem is, Kliptown. Dit strook met hul siening van Suid-Afrika, as ‘n rassestryd tussen swart en wit, soortgelyk aan hul burgerregtebeweging, wat op die triomf van swart uitgeloop het. Amerika se swart president, Barack Obama, word allerweë met sowel Martin Luther King as Nelson Mandela vergelyk.

Miskien weet u reeds waarheen die meeste Chinese toeriste in Suid-Afrika gaan? Na die Voortrekkermonument! Net gister tydens die viering van Stigtingsdag by die Voortrekkermonument loop ek ‘n toeristegids raak, ‘n vrou wat gewoonlik Duitssprekende toeriste vanuit Duitsland, Switserland en Oostenryk by die monument vergesel.

“Is daar nog heelwat Chinese wat die monument besoek?” vra ek haar.

Haar blou oë rek groot. “Hordes!” roep sy uit. “Elke dag hou hier ‘n stroom toerbusse stil. Dan klim skares Chinese uit. Hulle het hul eie toergidse wat hulle rondneem en in Mandaryns oor die monument uitwei.”

Die hoeveelheid Chinese wat die Voortrekkermonument besoek oortref die aantal Afrikanerbesoekers by verre. Wat sien die Chinese in die Voortrekkermonument raak? wonder ek. Vir seker gaan ek dit navors en moontlik een of ander tyd daaroor berig.

Suid-Afrika het radikaal verander. Maar so ook die wêreld. Binnekort gaan China oor ‘n groter ekonomie as dié van die VSA beskik. China is ‘n handelsland wat sy produkte aan almal wil verkoop. Amerika, aan die ander kant, is ‘n hegemoon wat die wêreld militêr en ideologies wil oorheers. Hy destabiliseer en vernietig kleiner lande, veral in die Midde-Ooste. Libië, Egipte, Sirië, Irak en Afganistan sal moontlik nooit van Amerikaanse politieke en militêre inmenging herstel nie.

Wee die dag as Amerika sy vliegdekskepe na ons land stuur om hier te lande ‘n “regimeverandering” te bewerkstellig! As ek so na ons histeriese media luister en sien hoe Rapport, Beeld, Business Day, die Mail & Guardian, die Sunday Times en die res ‘n intense propagandaveldtog teen die Zuma-ANC voer, dan wonder ek: Wat presies wil hulle hê? Die gedagte dat Helen Botoxilla vir die charismatiese Zuma by die stembus gaan kafdraf, is gewoon vergesog. Die LGBT-gemeenskap van Kaapstad is groot, maar daar is meer as tien miljoen Zoeloes wat sal aanhou om Zuma getrou te ondersteun.

En as die stembusopsie nie werk nie, wat dan? ‘n Sluipmoord op Zuma soos destyds op Verwoerd? Toe die presidensiële vliegtuig in Rwanda in 1994 afgeskiet is, het ‘n volksmoord daar uitgebreek. ‘n Multietniese samelewing soos dié van Suid-Afrika verkeer maar altyd op ‘n mespunt, met gevoelens wat na weerskante toe hoog kan loop.

Kragdadige Anglo-Amerikaanse inmenging in Suid-Afrika kan maklik op burgeroorlog uitloop, soos in soveel ander lande. En watter model kan Amerika ons bied? Slegs multikulturalisme wat geensins rassekonflik besweer nie, maar dit eerder aanblaas. Lees hierdie artikel vir insig oor die vrese van blanke Amerikaners wat tot 1960 ‘n meerderheid van 90% in hul land geniet het, maar wat tans ‘n ongekende demografiese afgang en toenemende diskriminasie en geweld beleef.

Soos voor die tweede wêreldoorlog, sal Afrikaners moet kies: óf Engeland óf Duitsland. Smuts was ‘n groot bewonderaar van die Duitsers maar het ter wille van realpolitik die kant van Engeland gekies. Vele Afrikaners het hom egter nie hierin gevolg nie, wat tot groot verdeeldheid onder ons mense gelei het.

Smuts het ook gesê dat “die lot van Suid-Afrika altyd buite die land se grense beslis sal word”. Dit is al oor en oor bewys. Die ANC het feitlik sonder enige bewese steunbasis in Suid-Afrika self die land in 1994 verower, bloot vanweë grootskaalse buitelandse steun.

Die afgelope week se gebeure toe ‘n skermutseling in die Sentraal-Afrikaanse Republiek plaasgevind het, verteenwoordig ‘n baie kort hoofstuk in ‘n veel groter verhaal. Dit is die geopolitieke wedstryd tussen China en die Anglo-Amerikaanse Ryk in Afrika wat van nou af aan sal woed.

Waar staan ons Afrikaners in dié konflik? By die mense wat Soweto besoek of dié wat die Voortrekkermonument aandoen? Anders as Amerika, is China ‘n land met ‘n baie ou geskiedenis wat nie aan sy eie identiteit twyfel nie. Die president is ‘n Chinees, met ‘n Chinese vrou wat blykbaar oulike Mandarynse liedjies sing. Hy is nie ‘n halwe Keniaan met ‘n Arabiese voornaam wie se geboortesertifikaat uit Hawai in sy eie land omstrede is nie.

Ek het nêrens nog gehoor dat Chinese kritiek lewer op die taal of identiteit van Afrikaners, soos die Amerikaners en Britte maak, nie. Chinese is versigtig, diplomaties. Hulle wil ons nie verander om soos hulle te word, hulle taal te praat en hulle onsinnige multikulturele idees aan te hang nie.

Dít alles laat my dink dat Afrikaners ten eerste in hul eie belang moet optree en versigtig die nuwe gegewe in Afrika en in die wêreld moet opweeg. Dalk bied China en BRICS ons veel meer as die Anglo-Amerikaanse Ryk aan wie ons vir so lank lojaal was, maar wat ons soveel kere reeds in die rug gesteek het.

En Zuma? Toegegee, daar is baie dinge in Suid-Afrika wat verkeerd loop. Maar ons kan nie alles sonder meer aan die ANC toeskryf nie. Myns insiens het blanke Engelse en die Afrikanerverraaiers – ons kan hulle gerus “Verraaierkaners” doop – sedert 1994 veel meer gedoen om ons volk te benadeel as die ANC self. Wie het ons Afrikaanse skole begin aanval? Meesal wit Engelse of Indiërs in die provinsiale onderwysdepartemente. Die eerste skoot in die hof teen Afrikaanse skole was daardie aaklige ou Sap-regter Johan Kriegler se absurde uitspraak in Johannesburg dat swart kinders in die taal van hul keuse by ‘n Afrikaanse skool onderrig behoort te ontvang, “selfs al is dit Yslands”. Yslands? Kriegler se kop het geraas. En wie het die Afrikaanse universiteite begin “transformeer” en verengels? Oorwegend Verraaierkaners wat sodoende ‘n geleentheid gesien het om bevordering te kry of om hul universiteite internasionaal as Anglo-Amerikaanse universiteite te posisioneer. Kovsies sou nou nog ‘n voortreflike Afrikaanse universiteit gewees het as Verraaierkaners op die raad nie besluit het om Jonathan Jansen daar in te voer nie.

Wat van grondhervorming? Weereens is dit Britse NRO’s en veral twee wit Engelse vrouens, Cheryl Walker en Ruth Hall, wat die meeste doen om Afrikanerboere van hul grond te beroof. Hulle beïnvloed die ANC téén Afrikaners, pleks van andersom.

Sedert Zuma as ANC-leier oorgeneem het, het hy die party geheel en al omvorm. Onder andere het hy van Malema ontslae geraak. Hy het Afrikaners in die openbaar erken as ‘n “inheemse wit stam van Afrika”.

Etnies het die ANC vir alle praktiese doeleindes ‘n Zoeloe-party geword. Ek verstout my om te sê dat die ANC vandag baie nader aan die Inkatha van die 1970s is as aan die soort kommunistiese terroristebeweging wat die Britse Arbeidersparty, die Anglikaanse Kerk, asook Swede, Noorweë en Nederland in ballingskap befonds het.

Destyds was Buthelezi een van ons getrouste bondgenote en ‘n groot voorstander van etniese federalisme, totdat Roelf Meyer, nog ‘n Verraaierkaner, hom met militêre geweld gedreig het indien Kwazulu sou probeer afstig. Soos die Amerikaners en Engelse, het ook ons Afrikaners ons bondgenote in die rug gesteek: Buthelezi, Ian Smith, Jonas Savimbi en baie ander.

Dis tyd dat ons die groter prentjie begin raaksien. Hier is ‘n paar opsies om te oorweeg:

  1. Ons doen eenvoudig niks nie en besoek maar die winkelsentrums en kyk rugby. Om Gods water oor Gods akker te laat loop, is beter as om deur die media opgesweep te raak en saam met die Amerikaanse faksie, waaronder die DA, die Zuma-ANC te probeer ontsetel.
  2. Ons hergroepeer as ‘n volk en begin iets doen aan ons veiligheid, die plattelandse munisipaliteite waar alles verval, asook ons ekonomiese situasie waar werkskepping vir Afrikaners prioriteit behoort te geniet. Soos die Jode, Grieke of Portugese, moet ons ‘n eie netwerk vorm en begin saamwerk.
  3. As ons oor die moed en visie beskik, sluit ons as volk informele bondgenootskappe met die Zuma-ANC, asook Rusland en China binne die BRICS-verband. Ons vertaal Russiese en Afrikaanse boeke oor en weer, stuur ons skrywers en sangers Moskou en Beijing toe, en word volwaardig deel van die post-Amerikaanse wêreld wat besig is om tot stand te kom. Ons onderhandel met Zuma oor grond, onderwys, veiligheid, gesondheid en selfs buitelandse kulturele verhoudinge sodat ons so selfstandig as moontlik kan begin optree. Omdat daar steeds Afrikaners by die Suid-Afrikaanse Nasionale Weermag betrokke is en Zuma van ons Afrikanerwapens (bv. die Rooivalk) gebruik maak, kan die versterking van die SANW een van die kwessies wees waaroor ons met Zuma kan onderhandel en waartoe Afrikanerkundigheid ‘n bydrae kan lewer.

Ten minste sal die soldate se ammnunisie dan nie sommer opraak nie.

Duitse onderhoud met Poetin laat joernalis met rooi gesig

‘n Onderhoud met Vladimir Poetin onlangs het ‘n Duitse joernalis met ‘n rooi gesig gelaat.

In die onderhoud met die Duitse uitsaaier ARD, het Poetin gesê die onlangs goedgekeurde wet op buitelandse agente wat NRO’s in Rusland monitor, het parallelle in die internasionale praktyk.

Die Duitse onderhoudvoerder was salig onbewus hiervan, en wou Rusland uitsonder vir kritiek omdat hulle “inmeng” in NRO’s se bedrywighede.

Hy het ook kennis geneem van die ooraanbod van buitelandse nie-regeringsorganisasies se teenwoordigheid in Rusland.

In Suid-Afrika is dieselfe ooraanbod van buitelandse NRO’s teenwoordig wat ‘n enorme invloed op die regering se beleidsbesluite uitoefen.

In die begin van die onderhoud, het die Russiese president opgemerk dat die doel van NRO-inspeksies die publiek sowel as aktiviste sal bystaan om groter deursigtigheid van sulke organisasies se werklike bedywighede te bevorder.

Poetin het bygevoeg dat die Verenigde State ‘n baie soortgelyke wet reeds in 1938 in werking gestel het om buitelandse agentskappe se werksaamhede dop te hou.

Poetin het opgemerk dat die Amerikaanse wet afgedwing word deur die Departement van Justisie. Buitelandse groepe wat in die VSA werk, moet gereeld inligting oor hul aktiwiteite deurgee en hierdie inligting word dan deur die Amerikaanse teenspioenasieafdeling hersien.

Die Duitse verslaggewer het erken hy was nie bewus was van sulke praktyke in die Verenigde State nie.

Poetin het uitgewys dat daar 654 groepe in Rusland is wat deur die buiteland befonds word, terwyl Rusland slegs twee buitelandse NRO’s het – een in Frankryk en een in die Verenigde State.

Hy het ook bekendgemaak dat buitelandse diplomatieke missies binne vier maande $1 miljard na Rusland oorgeplaas het, waarvan byna 90% in die rekeninge van NRO’s beland het nadat Rusland die wet op buitelandse agente ingestel het.

Poetin het gesê die Russiese volk het die volste reg om te weet waarmee die uitgebreide netwerk van organisasies hulself mee besig hou.

Die Russiese leier het weer beklemtoon dat die Russiese owerhede nie van plan is om enige sulke organisasies te sluit nie.

“Ons het net gevra dat hulle erken: ‘Ja, ons is besig met politieke aktiwiteite, en ons word befonds uit die buiteland'”, het Poetin gesê. “Die publiek het die reg om dit te weet.”

“Daar moet orde wees. Dit is ‘n bekende reël. Dit is ‘n universele beginsel in enige land,” het hy gesê, en gewys op die onlangse gebeure in Noord-Afrika as ‘n duidelike voorbeeld van wat kan gebeur as hierdie beginsel is verwaarloos word.

Pedofiele kry die wind van voor

Brittanje se beroemde Tate Gallery het Donderdag tientalle beelde, sommiges wat naakte jong meisies uitbeeld van die bekende kunstenaar Graham Ovenden, van sy webwerf verwyder nadat die kunstenaar aan seksuele misdrywe teen kinders skuldig bevind is.

Ovenden, 70, is Dinsdag  skuldig bevind aan ses aanklagte van onsedelikheid teen minderjariges en een van onsedelike aanranding.

Skilderye en foto’s deur die kunstenaar is reeds in galerye oor die hele wêreld tentoongestel.

‘n Tate-woordvoerder het gesê die gallery sal sy beleid oor 34 afdrukke deur Ovenden wat in 1975 aan sy versameling geskenk is, hersien.

“Totdat hierdie oorsig voltooi is, sal die beelde nie aanlyn beskikbaar wees nie en die werke sal slegs per afspraak besigtig kan word.”

Die woordvoerder het bygevoeg: “Graham Ovenden is ‘n kunstenaar van formaat, wie se werk oor meer as 40 jaar uitgestal is.”

Intussen het Pous Fransikus aangekondig dat die Katolieke Kerk “met vasberadenheid” teen die plaag van pedofiele priesters gaan optree.

Vrydag het Monsignor Gerhard Ludwig Mueller, die hoof van die Vatikaan se departement van dissipline, belowe dat sulke priesters wat jag maak op kinders, vervolg sal word.

Dit was die eerste amptelike woord oor die kwessie van die nuwe pous. Hy is op Maart 13 verkies om Benedictus XVI op te volg nadat die vorige pousdom gekenmerk is deur onophoudelike pedofilie skandale met tien duisende slagoffers oor ‘n paar dekades.

Francis het gevra vir “verskerpte maatreëls om minderjariges te beskerm asook diegene wat blootgestel is aan sodanige geweld in die verlede.”

Grondeise in Junie heropen

Die Minister van Landelike Ontwikkeling en Grondhervorming, Gugile Nkwinti, sê van die meer as 81000 grondeise wat landwyd ingedien is, is slegs 8 700 nog uitstaande.

Nkwinti sê hoewel die oorblywende eise ingewikkeld is, is die gebrek aan vaardighede by staatsamptenare ook ‘n bydraende faktor tot die vertraging om die eise af te handel.

Nkwinti het ook gesê die indiening van grondeise sal in Junie heropen word, wanneer dit die 100 jarige herdenking is van die wet op Naturellegrond, wat mense hulle grond ontneem het.

Die ANC het op sy konferensie in Mangaung besluit dat die indiening van grondeise heropen sal word vir diegene wat die spertyd in 1998 misgeloop het.

McBride mag ‘n moordenaar en misdadiger genoem word

Die Grondwethof het beslis dat Robert McBride wel ‘n moordenaar en misdadiger genoem mag word. Dit is ‘n slag vir nasionale eenheid, het die ANC in reaksie gesê.

“Die beslissing deur die Grondwethof heropen die wonde van so baie mense wat hul families verloor het, verhoor, verban, aangehou, vermink en doodgemaak is,” het mnr. Gwede Mantashe, sekretaris-generaal van die ANC, in ‘n verklaring gesê.

Die hof het beslis dat The Citizen McBride ‘n moordenaar en misdadiger mag noem, ten spyte daarvan dat die Waarheid-en-versoeningskommissie (WVK) aan McBride amnestie vir die Magoo’s Bar-bomontploffing in Durban gegee het.

Mantashe het gesê: “Die spraakvryheid-oorwinning waarop The Citizen aanspraak maak, is van verbygaande aard, wat nie die saak van versoening en nasionale eenheid bevorder wat die Waarheid-en-versoeningskommissie wou teweegbring nie.”

Mantashe het gesê die verlede kan nie ongedaan gemaak word nie, en die kommissie het mense hoop gegee.

“In die geval van kameraad McBride het hy voor die WVK verskyn, ‘n volle blootlegging gedoen en om verskoning gevra en amnestie is vir hom aangebied.

“Die besluit van die konstitusionele hof suggereer die edele proses het tragies verlore gegaan wat ons land deur die WVK aan individue soos kameraad Mc­Bride, asook mense wat apartheidgruwels gepleeg het, gebied het.”

Die ANC het ‘n beroep op Suid-Afrikaners gedoen om die bevindings van die hof te respekteer en in gelyke mate die “traumatiese WVK-proses” waarin amnestie aan McBride en ander toegestaan is, te respekteer.

“Ons moet ons daarvan weerhou om die uitkoms van die WVK-proses te ontken deur dié wat daarvoor verskyn en kwytskelding gekry het, moordenaars te noem sonder rede of besorgdheid oor nasionale eenheid en nasiebou.

“Laat ons nie die proses van vrede en versoening wat aan ons gegun is, ondermyn nie,” het Mantashe gesê.

Die hof het verlede week beslis dat die Versoeningswet nie die feit dat McBride moord gepleeg het, onwaar maak nie. Die wet verbied nie openlike openbare bespreking van sy daad nie en keer ook nie dat hy as ‘n “misdadiger” beskryf kan word nie.

Woede omdat ‘aantreklikste ras’ wit is

Die Universiteit van Kaapstad se studentekoerant, Varsity News, is in die sop oor ‘n grafiek wat die “aantreklikste ras” as wit aandui.

Die sirkeldiagram getiteld “UCT stem vir die aantreklikste ras”, gee ‘n keuse van wit, Indiër, bruin, Afrikaan, Asiaties en gemengde herkoms.

Volgens die peiling dink die meeste studente (38%) dat wittes die mooiste is, terwyl die minderheid (8%) vir swartes gestem het.

Die grafiek verskyn saam met ‘n artikel deur ‘n student, Oamran Tabo, wat onderhoude met sestig mense (tien uit elke rassegroep), gevoer het.

Volgens die Varsity News-redakteur, Alex Nagel, het die artikel die invloed van ras op sosiale strukture in die era ná apartheid blootgelê.

Nagel het die besluit om die artikel te publiseer, verdedig: “Dit was ‘n opiniestuk wat uit konteks gehaal is.Varsity News is ‘n platform vir mense om kwessies en die gemeenskap te bespreek,” het sy aan News24 gesê.

“Baie studente by die universiteit het egter negatief gereageer oor die artikel en voel aangeval en beledig,” het Nagel bygevoeg.

Die koerant het Donderdag ‘n verskoning uitgereik.