Dan Roodt, Author at praag.co.za

WikiLeaks, Mbeki, Hani, Zille en Zuma

WikiLeaks se mees onlangse vrystelling, wat geen wette in die VSA oortree nie, sluit ook diplomatieke kabelgramme oor Suid-Afrika in. Dit werp lig op verskeie onderwerpe wat tans onder bespreking is, soos die verhouding tussen Chris Hani, Thabo Mbeki en die DA.

In 1991 was die spanning tussen Mbeki en Hani glo tasbaar. “As Mbeki en Hani (48) nog steeds ‘n hegte vriendskap het, sal ons verbaas wees,” sê een kabelgram. “Hani se hantering van die gewapende aksie-werkgroep, waarin hy was, het veel te wense oorgelaat – al het hy – toegegee – ‘n baie moeilike taak. Hani daag nie op vir gesamentlike werkgroepvergaderings nie, selfs nadat sy omstrede vrywaringstatus opgelos is. Sy ANC-kollegas kan nie sy afwesigheid aan ons verduidelik nie.”

Die kabel gaan voort om die twee mans se politieke style te kontrasteer: “Mbeki het ‘n onbewoë, beredeneerde benadering tot kwessies … Hani is meer ‘n man van die mense.” Die gewildheid van die laasgenoemde kan lei tot ‘n magstryd, waarsku die skrywer : “Baie waarnemers glo dat Hani Mbeki sal kan klop indien daar ‘n populêre stem onder ANC-ondersteuners gehou word.”

Tydens ‘n vergadering met die Amerikaanse ambassadeur in April 1993, enkele dae ná die sluipmoord op Hani, spreek Mbeki sy kommer uit “oor oordrewe mediafokus op die “woede” van die ANC ná Hani se moord. “Oliver Tambo en hy het na Hani se huis gegaan, na die moord en het nie mense kwaad gesien nie, net woedend en ontsteld,” lui die kabelgram.

In Mei 1995 word die State Department ingelig dat die man wat president sal word, se styl van leierskap kommer wek. “Mbeki kom nie afsprake na nie, en dokumente lê in sy in-mandjie vir weke,” lui dit. “Hy kan nie besluitneming delegeer nie, en put homself uit deur oormatig betrokke te raak in die fynste besonderhede oor ‘n verskeidenheid sake.” Die kabelgram neem ook kennis van meer persoonlike aspekte van Mbeki se karakter: “‘n Gerespekteerde vroulike joernalis en jarelange ambassadekontak het vertroulik vir ons gesê dat sy een-tot-een-sessies met Mbeki vermy, want hy soek seksuele toenadering.”

Die kabelgram gaan verder waar die opsteller sy verligting uitspreek dat niemand weet hiervan nie. “Maar sulke stories is relatief skaars [in die media], en Mbeki het die reputasie van ‘n ‘rokjagter’ nog vrygespring.”

Die opposisie in Suid-Afrika kom ook onder die loep. Bio-notas oor DA-leier, Helen Zille, wat in Oktober 2007 geskryf is, verwys na Zille se hoof van personeel Paul Boughey wat Zille beskryf as ‘n “impulsiewe besluitmaker, wat dit moeilik maak om haar te bestuur”. Ander bronne, sê die kabelgram, gebruik woorde soos “obsessief en kompulsief”.

Die opsteller in ‘n ander kabelgram dink duidelik niks van die Afrikanersteun wat Tony Leon vir die DA kon monster met sy ‘Fight Back’-veldtog nie. Die opsteller meen dat Zille aan die party ‘n “skoon lei” kan bied want na die leierskap van Leon het Suid-Afrikaners ‘n beeld van Leon in hul kop van iemand “kinders in ‘n dorp uit ‘n helikopter skiet, selfs al het dit nooit gebeur nie”. Die negatiewe konnotasie met Afrikaners is duidelik uit die kabelgram.

Julius Malema se naam verskyn gereeld in die kabelgramme van 2005 af. Sy opgang as katalisator word in Desember 2008 beskryf as “Die Einde van die ANC Intellektuele?”.

Die skrywer is bekommerd oor “die toekoms van die regerende party as ‘n plek van idees”. Die kabel kla dat die dae van Angelsaksiese invloed oor Sisulu, Tambo, Mandela, Mbeki, Slovo en Hani verby is. “Die ANC is steeds die standaard-draer van intellektuele denke vir bevrydingsbewegings, maar die party het gesukkel om in die afgelope jaar baie van sy tradisies in stand te hou.”

Onder Zuma, spreek die skrywer sy vrees uit oor hierdie afname van invloed. “Sonder ‘n sterk intellektuele sentrum, sal die party waarskynlik sukkel en kwesbaar word vir die verskynsel van persoonlikheidskultus en toegang tot staatsbegunstiging,” kom die skrywer tot die gevolgtrekking. Kennelik nie ‘n toestand wat die VSA graag wil sien gebeur nie, aangesien dit hulle invloed verder sal verminder.

Zim kry amper miljard van SA

Suid-Afrika gaan nagenoeg R900 miljoen se begrotingshulp aan Zimbabwe leen om ‘n te help in die komende algemene verkiesing.

So het Tendai Biti, Zimbabwe se minister van finansies, gesê.

Volgens Biti het Zimbabwe Suid-Afrika en Angola verlede jaar genader om finansiële steun van R1,3 miljard.

“Na aanleiding van gesprekke sedert September 2012 het die Suid-Afrikaanse kabinet tot ‘n besluit gekom – ‘n positiewe besluit,” het Biti gister op ‘n mediakonferensie gesê.

Hy het ook bevestig dat hy Suid-Afrika nog sowat R400 miljoen gevra het om die algemene verkiesing, wat later vanjaar plaasvind, te finansier.

“Dit is duidelik dat die tesourie die verkiesing nie kan bekostig nie.

“Ons gaan nie weer voor die verkiesing geld leen nie,” het Biti gesê.

‘n Woordvoerder van die Suid-Afrikaanse tesourie het gister gesê die twee regerings “voer gesprekke” oor die lening en die voorwaardes, maar wou niks meer sê nie.

Zimbabwe het ook by die Verenigde Nasies (VN) aangeklop om geldhulp.

Biti het gesê Zimbabwe sukkel steeds finansieel weens die resessie, al het pres. Robert Mugabe en Morgan Tsvangirai, premier, in 2008 besluit om regeringsmag te deel.

‘Skiet die boer’ het terreur aangemoedig

Die aanhoudende gesing van die liedjie “Skiet die Boer” deur die geskorste leier van die ANC-jeugliga, Julius Malema, het die optrede van ‘n veroordeelde terroris beïnvloed, het die rondgaande hof op Phalaborwa Maandag gehoor.

Die kliniese sielkundige Franco Visser het volgens die SABC in die vonnisverrigtinge van Georgios Kiratzidis, Martinus Vorster en Ruan Louw getuig.

Visser het gesê die herhaling van dié liedjie deur Malema, sowel as die moord op die AWB-leier Eugene Terre’Blanche, het Kiratzidis se emosionele toestand geweldig beïnvloed.

Dié drie het beplan om die huise van ANC-leiers, sowel as busse en townships, met bomme te teiken. Hulle is skuldig bevind op aanklagte van onder meer sameswering om terroriste-aanvalle uit te voer, die onwettige vervaardiging en besit van plofstof, en die onwettige besit van vuurwapens en ammunisie.

Bomontploffings by Boston-marathon eis 2

Minstens twee mense is dood en tot soveel as 100 ander beseer toe twee bomme Maandag naby die wenstreep van die Boston-marathon ontplof het, het die polisie gesê.

Bronne het aan die media gesê dat ‘n derde bom naby die John F. Kennedy Presidensiële Biblioteek ontplof het, maar die polisie het later gesê dié voorval het met ‘n brand verband gehou, en was nie ‘n aanval nie.

Paramedici het kort na die ontploffings op die toneel aangekom.

“Daar was twee bomme wat ontplof het naby die wenstreep in vandag se Boston-marathon,” het die wedloop se organiseerders kort na die aanvalle op Facebook gesê.

“Ons werk saam met wetstoepassers om uit te vind wat presies gebeur het,” het die organisasie gesê.

NBC News het later berig dat die polisie “verskeie ploftoestelle” in Boston gevind het.

“Ons het iemand gesien wie se bene afgeruk is,” het Mark Hagopian, eienaar van die Charlesmark-hotel, aan die nuusagentskap AFP gesê. Hy het in ‘n restaurant skuiling gevind.

“Iemand langs my se bene was afgeruk by die knieë – hy het steeds gelewe.”

“Dit was erg, dit was vinnig” het hy gesê. “Daar was ‘n groot ontploffing… ons het ‘n windvlaag in ons gesigte gevoel… Die polisie het gesê: ‘Kom uit, kom uit, loop, kom weg, daar kan meer bomme wees.'”

Zara Bielkus, ‘n 30-jarige toeskouer van Boston, het gesê sy het twee bomme enkele sekondes uitmekaar gehoor.

“Toe ons dit hoor, het almal na mekaar gekyk en alles het baie stil geword, en die polisie was binne ‘n minuut daar,” het sy gesê.

Olifant keer toeriste se kar om

‘n Paartjie is Maandagoggend ernstig beseer toe ‘n olifant hul motor in die Kruger Nasionale Park omgegooi het. Die man is ‘n Pool en sy vriendin Chinees.

Slegs die man het sigbare beserings opgedoen, het William Mabasa, woordvoerder van die park, gesê. ‘n Helikopter, plaaslike dokter en paramedici is na die toneel ontbied.

“Dit is onduidelik hoekom die olifant aggressief geraak het. Ons wil die publiek egter versoek om altyd op die uitkyk te wees vir hierdie groot diere en om te probeer om nie te naby te kom wanneer een op die pad aankom nie,” het Mabasa in ‘n verklaring gesê.

“Ons is in kennis gestel dat die man ‘n paar gebreekte ribbes en interne bloeding het. Toetse op hom is nog nie afgehandel nie. Die vrou kla van rugpyn en ons wag vir haar X-strale.”

Hulle is na die Clinix Phalaborwa-staatshospitaal geneem. Die park se bestuur sal die man se besonderhede bevestig en die ambassade in kennis stel.

Kanadese student (22) in Vereeniging verkrag

‘n Kanadese student (22) wat as deel van haar kursus maatskaplike werk in Suid-Afrika doen, is oor die naweek naby Vereeniging verkrag. Die voorval word beskryf as ‘n “huisroof wat skeefgeloop het”.

Die student en haar huismaats, wat almal uit Westerse lande afkomstig is en welsynswerk in Suid-Afrika doen, is Saterdagnag deur rowers oorval. Die presiese rede waarom sy die enigste is wat verkrag is, is nie duidelik nie.

Om die identiteit van die meisie te beskerm, word die presiese ligging van die voorval tans vertroulik gehou. ‘n Woordvoerder het egter gesê: “Dit is sleg, baie sleg, ook vir ons land. Al hierdie meisies kom na Suid-Afrika om welsynswerk te doen, in kinderhuise en arm gebiede. Almal is baie geskok. Die nuus versprei reeds dat jong vroue wat Suid-Afrikaners kom help, goedsmoeds verkrag word.”

Blykbaar het die meisie die nodige behandeling by die trouma-eenheid van die plaaslike polisiestasie ontvang. Die polisiestasie, wat onder die bevel van ‘n Afrikanervrouekolonel staan, is goed toegerus om verkragtingslagoffers te hanteer.

Suid-Afrika is by verre die wêreld se swaargewigkampioen as dit by verkragting kom. Volgens statistieke van die polisie en ondersoeke deur die Mediese Navorsingsraad, word tot 1,3 miljoen vroue jaarliks in die land verkrag. Dit is meer as in die oorloggeteisterde Demokratiese Republiek van die Kongo wat deur die Verenigde Nasies as ‘n “menseregteramp” verklaar is. Volgens VN-syfers word ongeveer ‘n miljoen vroue per jaar in die DRK verkrag.

Tot 75% van Suid-Afrikaanse vroue sal ten minste een keer in hul lewens verkrag word. ‘n Vrou se kanse om verkrag te word, is groter as om matriek deur te kom.

Woolworths en ander supermarkte verkoop vleis met verkeerde etikette

Gewilde supermarkte soos Pick n Pay, Shoprite, Fruit and Veg City, Woolworths en Spar tel onder die winkelgroepe wat vleisprodukte verkoop waar die vleis nie met etikette ooreenstem nie, het City Press Sondag berig.

Dié winkelgroepe het volgens die koerant egter gesê die probleem word geskep deur vleisborde, sae, hande en toerusting wat gebruik word om een vleissoort te hanteer, wat dan in kontak kom met ander vleis.

Whitey Basson, uitvoerende hoof van Shoprite, het aan die koerant gesê daar is “geen opsetlike vermenging om klante te mislei nie”.

‘n Studie deur die Universiteit Stellenbosch (US) het getoon dat bykans 60% van 139 produkte wat getoets is, bestanddele bevat het wat nie op die etikette aangedui is nie, insluitend donkie en waterbuffel, sowel as bok- en varkvleis.

Altesaam 20 van die 32 Shoprite-produkte wat getoets is, se etikette was nie akkuraat nie.

Basson het ook gesê party van die bevindings maak nie sin nie.

“Geen slagter wat by sy volle verstand is, sal opsetlik ‘n klein persentasie lamsvleis, wat meer per kilogram kos, by wors van bees, wat goedkoper is, voeg nie.”

Peter Arnold, direkteur van voedselprodukte vir Pick n Pay, het op sy beurt gesê die hoeveelheid onverklaarde produkte wat in die studie deur US gevind is, is “baie klein”.

Louw Hoffman, die wetenskaplike agter die studie, het gesê verkeerde etikette is “algemeen” in Suid-Afrika.

‘Mense voel baie veiliger nou as onder apartheid’

Bewerings deur emeritus-aartsbiskop Desmond Tutu dat Suid-Afrika een van die gewelddadigste samelewings is, is Saterdag deur Phumla Williams, waarnemende woordvoerder vir die kabinet, verwerp.

“Navorsing het bevestig dat die mense van Suid-Afrika nou veiliger voel as gedurende die apartheidsdae,” het Williams in ‘n verklaring gesê.

“Dit is ‘n direkte gevolg van die implementering van die beleid en strategieë van die Suid-Afrikaanse Polisiediens. Dit sluit hoë polisiesigbaarheid en vinnige reaksie op kriminele aktiwiteite in.”

Tutu het Donderdag gesê Suid-Afrika het sy sin van selfwaarde verloor.

“Ons is daarvan bewus dat ons, baie eenvoudig, een van die mees gewelddadige samelewings geword het. Dis nie wat ons was nie, selfs nie onder apartheid nie,” het hy Donderdag by ‘n seremonie gesê.

Williams het gesê polisiestatistieke dui daarop dat vlakke van geweldsmisdaad in die land aansienlik gedaal het.

“Aartsbiskop Tutu behoort die vooruitgang te erken wat die regering gemaak het sedert die begin van demokrasie, en godsdienstige leiers en ander belanghebbendes aan te moedig om met die regering saam te werk om misdaad te beveg,” het sy gesê.

Ons kán en móét Zuma nie teëgaan nie

Hoe lyk ons toekoms onder Jacob Zuma en behoort Afrikaners regeringsverandering na te streef? Dié vraag het Donderdag ná ‘n lang vergadering hier in Johannesburg skielik opgeduik en indringende debat ontketen.

Die geleentheid was een van die gereelde byeenkomste van die Afrikaner- Strategiese Komitee, kortweg SK. Die komitee is in September 2011 gestig en het aanvanklik uit slegs 5 mense bestaan, maar is sedertdien na die huidige 20 lede uitgebrei. Saam verteenwoordig ons 69 Afrikanerorganisasies en ‘n mens kan dit as ‘n soort Afrikanerraad- of -kabinet-in-wording beskou. Met die ineenstorting van Afrikanerstrukture sedert 1994 is daar sedertdien geen oorkoepelende liggaam wat met die Afrikaner se probleme en toekoms in Suid-Afrika gemoeid is nie.

Uiteraard doen elke Afrikaanse organisasie wat hy kan om die verval en agteruitgang van ons volk te stuit, maar dis dringend noodsaaklik dat al ons pogings gekoördineer word en dat daar gereelde kommunikasie en gesprek tussen Afrikanerleiers plaasvind. Vandaar dus die bestaan van die SK wat oor alle politieke en gosdienstige verdelings uit die verlede onder Afrikaners tot stand gekom het. Toenemend heers daar konsensus onder ons mense oor vele kwessies en ‘n breë strategie is oor die afgelope twee jaar uitgehamer. Ek hoop dat ons binnekort ook beleidstukke kan opstel wat ons met alle Afrikaners, asook die buiteland, ambassades en die ANC-bewind self, kan deel.

Hoe verder ons van 1994 af staan, hoe duideliker raak dit dat mnr. F.W. de Klerk heeltemal ‘n mislukking van die onderhandelings gemaak het. Ná Vrydag se persverklaring deur die F.W.-de-Klerk-stigting, het ek gister die volgende vrae aan mnr. De Klerk gestuur en hoop dat hy hulle vir ons sal beantwoord:

Van die lesers reageer op u jongste verklaring deur te sê dat die 1992-referendumvraag “dubbelsinnig” was en dat hulle daarom om die bos gelei is oor die plan om uiteindelik alle politieke en militêre mag aan die ANC binne ‘n eenheidstaat oor te dra. Volgens u, was die referendumvraag dubbelsinnig?
Het u voorsien dat die ANC met sy oorname van die weermag ook die kommando’s sou afskaf en daarmee die plattelandse gebiede en boere weerloos teen misdadigers sou laat?
In amptelike korrespondensie tussen mev. Thatcher en mnr. P.W. Botha wat onlangs deur die Britse argiewe vrygestel is, blyk dit dat Brittanje destyds die oorname van mnr. Mugabe in Zimbabwe as negatief ervaar het. Moes die oorname van radikale regerings in sowel Zimbabwe as die twee Portugese kolonies u nie tot versigtigheid gemaan het dat Suid-Afrika dieselfde pad kon loop nie?
U is reeds deur die Britse media aangeval toe u tydens u onderhoud met Christiane Amanpour verklaar het dat die begrip van selfbeskikking as sodanig soos dit deur die NP-regering voorgestaan is, nie “moreel aanstootlik was” nie. Onlangs het die Londense Guardian ook geskryf dat baie min swartmense ooit voor 1994 universiteitsopleiding ontvang het. Hoe voel u oor wanvoorstellings van Afrikaners en die SA verlede in die Britse media?
Is daar steeds ‘n 1994-skikking of was die grondwet maar ‘n “sonsondergangklousule” soos mnr. Joe Slovo dit genoem het en kan die ANC tans min of meer die land na goeddunke inrig, selfs radikale sosialisme as dit moet?
‘n Meerderheid gewone Afrikaners beskuldig u vandag daarvan dat u destyds dislojaal teenoor u eie mense en u eie kiesers opgetree het. Hoe voel u oor sulke beskuldigings?
Wat staan Afrikaners tans te doen? Moet hulle vir lief neem met etniese oorheersing, daarteen protesteer of op ‘n volkstaat begin aandring? Of dalk emigreer na ander Statebondslande?
Is daar enige selfkritiek wat u kan uitspreek? Het u tydens die onderhandelinge van destyds foute begaan, te maklik op sekere punte toegegee of is u steeds baie tevrede met die uitkoms?
Stem Suid-Afrika vandag ooreen met hoe die NP die toekoms onder ‘n swart meerderheidsregering voorgestel het of meer met die sombere voorspellings van die NP-kritici van destyds?

Blykbaar is mnr. De Klerk tans in die buiteland en tot dusver het ons slegs ‘n ontvangserkenning ontvang.

Terwyl F.W. de Klerk kennelik “te min, te laat” probeer doen om die ANC-stoomroller te stuit, ervaar die meeste gewone Afrikaners sy huidige rol glad nie as positief nie. Trouens, op sosiale media het daar gister en eergister woede losgebars en die meerderheid van ons mense vaar teen mnr. De Klerk uit omdat hy die land “op ‘n silwer skinkbord weggegee het”.

Soos Donderdag se debat oor ons toekoms by die SK, is dit die punt waarby ons moet begin: Die land is weggegee en ons is van alle mag en die meeste van ons instellings gestroop. Terloops, een van my voorstelle is dat ons dringend die verdere aftakeling en verengelsing van Afrikaanse staatskole moet stuit en tot my groot vreugde het die SK dit ‘n prioriteit gemaak. As alle Afrikaanse organisasies net kan saamwerk om ons skole te red, sal ons vir die eerste keer sedert 1994 ‘n klein oorwinninkie behaal. Of selfs: ‘n groot oorwinning. Want die probleem is dat ons ons oor die afgelope twintig jaar op feitlik geen gebied kon laat geld nie.

Dit bring my egter by die eintlike punt wat ek hier wil stel: Vanweë die skerp kritiek wat daar tans teen mnr. Jacob Zuma in die Engelse pers (waarby ek Fleet Street of die pers in die Moederland insluit) uitgespreek word, is daar ‘n algemene stemming téén Zuma onder Afrikaners aan’t oplaai. Omdat die Nasperskoerante soos Beeld en Rapport gewoonlik die Britse pers volg, is dieselfde soort veldtog teen Zuma in die hoofstroom- Afrikaanse media aan die gang.

Aanvanklik by Donderdag se SK-vergadering was daar ook ‘n reaksie van: Afrikaners moet deel wees van die anti-Zuma-front wat tans besig is om te ontstaan, waaronder die DA, die Engelse pers, selfs die groot maatskappye. Binne die groter geostrategiese prentjie, is Brittanje en Amerika waarskynlik ook anti-Zuma, in reaksie op ons land se insluiting in die BRICS-groepering.

Van al die nie-Afrikaners wat Suid-Afrika nog ooit geregeer het, is Jacob Zuma ons seker die beste gesind. Hy het al in verskeie openbare verklarings ons status as inheemse blanke volk bevestig. Daar was die braaivleis met Afrikaners in Houghton, die ete by Libertas, die konferensie in die Sandtonse Hilton, ens. My persoonlike mening is dat, indien dit net van Zuma afgehang het, sou hy lankal ‘n rits toegewings aan Afrikaners gemaak het. Hy is egter ook die gevangene van sy eie party, wat sukkel met ‘n oorgeërfde linkse tradisie wat deur Engelse, Jode, Russe, Kubane, Swede en wie nog gevorm is. Daar is egter allerlei woelinge in die ANC aan die gang en ons kan maar net hoop dat die radikale elemente nie die oorhand kry nie.

By Donderdag se vergadering het ek my aanvanklik, soos die pas oorlede mev. Thatcher sou gesê het, “in ‘n minderheid van een” oor Zuma bevind. Namate die gesprek gevorder het, het die hele vergadering egter erken dat geen regeringsverandering in Suid-Afrika binne die volgende ses of sewe jaar moontlik is nie. Dis nou ongeag wat die Engelse pers kwytraak. Soos altyd, is hulle besig met propaganda, nie met ontleding nie. Hul voorspelling dat die ANC onder die woorde-aanslag in duie gaan stort soos die NP van destyds, is wensdenkery. Selfs al gebeur ‘n wonderwerk en ontvang ‘n alliansie van die DA, Mamphela Ramphele se Agang en COPE saam net-net ‘n meerderheid by die stembus in 2014, is die kanse maar skraal dat die ANC die Uniegebou sal ontruim.

As ons eerlik is, sal ons erken dat die huidige Suid-Afrika kwalik ‘n Westerse demokrasie is en dat verkiesings soos elders op die vasteland deels vir vertoon gehou word. Die ware magspel word elders beslis, in die onderhandelings tussen etniese groepe of selfs met brute mag soos ons nou in die Sentraal-Afrikaanse Republiek gesien het. Zimbabwe is ook ‘n leersame voorbeeld. In weerwil van ‘n histeriese Engelse pers, sowel hier as in Brittanje, het Robert Mugabe nog nie ‘n sentimeter beweeg nie.

Dus moet ons verstaan dat mnr. Jacob Zuma nog tot in 2019 gaan regeer. Meer nog, hy kan selfs as éminence grise, soortgelyk aan Mandela, vir ‘n tyd lank ná 2019 nog politieke invloed uitoefen. Lees gerus ook my brief wat Donderdag in Beeld verskyn het en elders op dié webwerf beskikbaar is.

Anders as mev. Zille en haar Kaapse Engelse wat hulle verbeel dat die son nog op die Britse Ryk skyn as hulle op die seiljagte van die Royal Yacht Club in Tafelbaai uitkyk, het ons Afrikaners geen illusies meer oor nie. Daarvoor het ons seker te veel Franse bloed en Franse vanne. Trouens, dis vir my verblydend om te sien dat die soort kinderkransdiskoers onder Afrikaners oor politiek besig is om te wyk voor die bytende, sarkastiese kommentaar wat ons die afgelope twee dae oor F.W. de Klerk gesien het. Ons volk begin nou dink en dis nooit ‘n maklike proses nie. Eers gryp ‘n mens na strooihalms en dan raak jy realisties.

Goddank die DA voer sy politiek in Engels, al stem Afrikaners in groot getalle vir die party. Daarom word die party nie as ‘n Afrikanerparty gesien nie en bederf dit nie ons verhouding met mnr. Zuma nie.

Ek hou nog altyd vol dat die Afrikaner se stryd nie teen die ANC is nie, maar in eie geledere. Daar is Afrikaners wat reeds só Engels geword het dat hulle geen sin meer sien in ons voortgesette bestaan as ‘n afsonderlike groep in die land nie. Hulle is “Suid-Afrikaners” soos al die ander en Afrikaans ‘n blote toevalligheid of oorblyfsel wat ons met die bruines deel. Dan kry mens die “soewereine individue” wat sy en sy gesin se heil bo alles stel en ewe maklik Australië toe sal emigreer indien dinge hier moeilik raak. Vir die Afrikanernasie voel die soewereine individu net mooi niks; dit kan hom ook nie skeel of sy kind uiteindelik Die Stem of die Australiese volkslied sing nie.

Die oomblik wat Afrikaners hul identiteitskrisis en lamheid oorkom het, sal ‘n see van moontlikhede voor ons uitgestrek lê. Dan sal ons georganiseerd onder behoorlike leierskap staan wat namens ons met mnr. Jacob Zuma kan gaan onderhandel. Lank voor daardie tyd sal ons reeds ‘n ekonomiese en politieke invloed in die land begin uitoefen wat ons mense weer sal ophef en welvarend sal maak. Afrikaans sal op skool en akademies weer sterk staan, want ons gaan die onderduimse Engelse en Indiërs wat in die skadu van ANC-mag ons instellings verengels, lóóp!

Die middele om Zuma teen te gaan, bestaan egter nie. In ‘n klein gedeelte van Natal bly daar meer stemgeregtigde Zoeloes as al die Afrikaners in die land saam. Testosteroondrome van gewapende opstand sal telkens op een of ander vernederende hofsaak en tronkstraf stuit.

Die ANC is hiperbewus van die media se vyandigheid jeens hom. Volgens ‘n rubriekskrywer van die Daily Maverick het die regering reeds planne om die media in die bek te ruk. Dan verval Helen Zille en die DA se magtigste wapen. In elk geval lees Zuma se ondersteuners nie koerante of webwerwe nie, dus beïnvloed die media slegs die elite wat in elk geval DA stem.

Zille belowe ons ‘n Bloedrivier in 2014 by die stembus. Dit mag egter ‘n tweede Slag van Insandlwana raak, wat finaal die Quijotiese magsvertoon van Suid-Afrikaanse Engelse aan die kaak mag stel.

Ons moet ons situasie in die oë kyk en met ons magteloosheid vir lief neem.

Maar soos die Palestynse ambassadeur op ‘n slag aan ‘n groepie Afrikaners in Pretoria-Oos op sy gebroke Engels gesê het: “You have no power. But you have your beautiful minds!”

Onder “beautiful minds” het hy ons graad van opleiding en insig verstaan. Met die nodige insig in die ingewikkelde Suid-Afrikaanse politieke situasie, kan ons weer ons eie heil en toekoms bepaal.

Al is ons tans net ‘n pion op die skaakbord, lewe ons nog steeds. En pionne het ook al ‘n skaakspel gewen, dít weet ons almal. Eers moet ons dóér aan die ander kant van die bord kom.

Hoewel die ANC vir ons te sterk is, kan ons intussen in die skadu van die magtige Zuma teen ‘n paar van ons tradisionele vyande boks, soos die liberale Engelse en Verraaierkaners. En dit moenie skaduboks wees nie.

VSA dryf homoseksuele agenda, sê aartsbiskop

Die Katolieke Aartsbiskop van Durban, Wilfred Napier, het dié week Amerikaanse voorwaardes vir hulp aan ontwikkelende lande, insluitend die verspreiding van kondome en die bevordering van die regte van homoseksuele mense, veroordeel.

Napier was vroeër in die spervuur, nadat hy pedofiele as siek mense beskryf het en nie misdadigers nie.

Hy het Amerikaanse inmenging as ‘n nuwe vorm van slawerny bestempel.

Hy het ook ontken dat hy homofobies is, deur te sê dit is onmoontlik aangesien hy geen homoseksuele mense ken nie.

Gerugte wil dit hê dat ‘n nuwe Pous gekies is omdat die vorige Katolieke kerkleier nie kans gesien het vir die groeiende skandaal oor kindermolestering in sy gemeentes wêreldwyd nie.

Napier was een van die 115 kardinale wat Pous Franciscus in Maart as die nuwe hoof van die Katolieke kerk verkies het.

Hy sê Suid-Afrika is besig om Amerika se agenda uit te voer met betrekking tot huwelike tussen mense van dieselfde geslag.

Sy opmerkings het woede uitgelok, slegs weke nadat hy moes verskoning vra omdat hy gesê het pedofilie is ‘n siekte en nie ‘n misdaad nie.