Die Noordwes-Universiteit sê hulle sal alles in hul vermoë doen om te verseker studente en personeel is veilig wanneer hulle volgende week na die instansie terugkeer.
NWU-woordvoerder, Louis Jacobs, sê die universiteit het reeds gebeurlikheidsplanne in plek vir die hervatting van klasse Maandag.
Die Ekonomiese Vryheidsvegters het egter Donderdag tydens ‘n toespraak gesê hulle sal verseker alle universiteite landwyd bly gesluit, totdat gratis hoër onderwys ‘n realiteit is.
Jacobs sê al die NWU se planne beskou die veiligheid van studente en personeel as primêre prioriteit.
Jacobs sê hulle sal nie huiwer om reeds bestaande interdikte af te dwing nie.
Intussen sê studente aan die Universiteit van die Vrystaat hulle beplan om eers dié naweek te vergader en dan te besluit of hulle sal toelaat dat die UV Maandag heropen.
‘n Navorsingstudent aan die Universiteit van Kalifornië se departement plantbiologie, is in Ethiopië dood toe die voertuig waarin sy gery het, tydens oproer aan die buitewyke van die hoofstad, Addis Abeba, met klippe bestook is.
Volgens die universiteit was Sharon Gray in die Oos-Afrikaland vir ‘n vergadering oor haar navorsing toe sy gedood is.
Die Amerikaanse ambassade in Addis Abeba het haar dood in ‘n gebied wat die afgelope maande die toneel van dodelike betogings was, bevestig.
Gray is die eerste buitelander wat in die anti-regeringsopstand dood is, terwyl die onluste wat sedert November 2015 heers, reeds die lewens van honderde geëis het.
Vredestroepe van Ethiopië wat onder die Verenigde Nasies se sending in Suid-Soedan (UNMISS) ontplooi is, patrolleer intussen te voet buite die VN se beskermingsgebied vir burgerlikes in Juba.
Die VN het aangekondig dat, vanweë ’n toename in seksuele geweld buite die beskermingsgebied, UNMISS sy patrollies in en om die gebied verskerp het en vroue en jong meisies vergesel wanneer hulle in die wyer Juba-stadsgebied beweeg.
Die visekanselier van die Universiteit van Kaapstad, Max Price het studente intussen gewaarsku dat daar tugstappe teen hulle gedoen sal word indien hulle nie die gedragskode tydens hulle protesoptrede nakom nie.
Honderde betogende swart studente het Maandagoggend beloof om die kampus tot stilstand te dwing.
Price sê in ‘n verklaring daar sal nie opgetree word teen studente wat aan wettige protesoptrede deelneem nie.
Hy sê egter die ontwrigting van klasse sowel as die versperring van ingange en paaie, is onwettige optrede.
Price sê in sulke gevalle sal studente gevra word om die universiteit te verlaat en dit sal by die polisie aangemeld word.
Hy sê die akademiese program moet voortgaan sodat studente hulle studiejaar suksesvol kan voltooi.
Die UK was die afgelope weke gesluit was maar die universiteit het aangekondig dat klasse Maandag sal heropen.
Die ingange na die UK se hoofkampus is vroeg Maandagoggend egter reeds deur betogers versper.
‘n Groep betogers wat vanaf die M3-pad na die kampus opgeruk het, het die onluste laat opvlam en vullisblikke is op die kampus omgekeer.
Die betogers het beloof om van gebou tot gebou te beweeg om die kampus te sluit sodat klasse nie voortgaan nie.
Chaos het uitgebreek by die hoofkampus van die Universiteit van die Witwatersrand in Johannesburg.
Die polisie moes skokgranate gebruik om oproeriges uiteen te jaag nadat betogers ‘n polisievoertuig omgekeer het terwyl veiligheidswagte massabetogings uiteen probeer dryf het.
Minstens twee studente is in hegtenis geneem weens aanhitsing van geweld, insluitend die aktivis, Busisiwe Seabe.
Die belhamels is na die Hillbrow-polisiestasie geneem waar hulle aangekla sal word.
Die probleme het begin toe sowat 100 swart studente by die universiteit se Groot Saal begin betoog het teen die hervatting van akademiese bedrywighede.
Die polisie is in groot getalle op die kampus ontplooi en volgens RSG is die polisie vasbeslote om betogings in die kiem te smoor.
‘n Polisielid het ‘n kopwond opgedoen tydens ‘n onderonsie met oproeriges buite Wits se Hoofsaal, maar die nasionale voorsitter van die EFF, Dali Mpofu het op die kampus verklaar daar kan nie onnodige lewensverlies van studente moet wees weens die polisie se teenwoordigheid nie.
Die visekanselier van die Universiteit van die Witwatersrand, Adam Habib het vroeër gesê veiligheidswagte en die polisie sal op alle kampusse ontplooi word ná voorvalle van intimidasie Maandag.
Habib sê geen massavergaderings sal by Solomon Mahlangu Huis toegelaat word nie en daar sal onmiddellik opgetree word teen oproeriges.
Vakbonde gaan na verwagting aansluit by swart studente se betogings oor gratis tersiêre onderrig. Ten minste 52 arbeidersvakbonde is genader om deel te neem.
Die studente-aktivis en leier van die “FeesMustFall”-veldtog, Mcebo Dlamini, het Maandag honderde studente by die Universiteit van die Witwatersrand in Johannesburg opgeroep om aan ‘n betoging Woensdag deel te neem.
Hy het beklemtoon dat vakbonde se deelname hulle veldtog sal verskerp.
Verskeie universiteite moes reeds lesings opskort na studente-onluste en intimidasie.
Studente van die Universiteit van die Vrystaat sê die voorgestelde verhoging van tot agt persent in klasgeld vir 2017 is onaanvaarbaar vir arm studente.
Hulle het gesê hulle sal nie ophou om aktiwiteite op die kampus te ontwrig nie.
Die swart studente by die universiteit is steeds besig met protesaksies sedert die FeesMustFall-veldtog begin het.
Oproeriges het Dinsdag toetslokale binnegestorm en studente uitgejaag as eis dat geen verhogings ingestel word nie.
Volgens hulle sal `n verhoging van agt persent beteken dat hul registrasiegeld R14 000 beloop. Swart amokmakers het gisteraand ‘n nagwaak op kampus gehou en daarna lesingslokale beset.
Die Universiteit van die Witwatersrand het die hulp van die Verkiesingskommissie ingeroep om die uitslag van ‘n meningspeiling oor die hervatting van lesings te verifieer.
Die Universiteit doen blykbaar die peiling onder dosente en studente sodat hulle ‘n getallemeerderheid kan monster om die betogers te keer.
Die woordvoerder van die Universiteit, Sherona Patel sê honderde e-posse is ontvang waarin gevra word dat die akademiese program hervat word.
Sy sê die universiteit is van menig dat die stemme van die “meerderheid” gehoor moet word.
Die universiteit het ook die hulp van die polisie ingeroep soos in ‘n anonieme brief aan alumni uiteengesit.
By die Universiteit van die Witwatersrand het die leier van die veldtog oor universiteitsgeld, Mcebo Dlamini gesê meer as 50 vakbonde gaan hulle more by ‘n optog aansluit om gratis hoër onderwys te eis.
Intussen is verskeie kampusse landwyd gesluit weens voortslepende protesoptrede. Swart betogers het gedreig dat al die tersiêre instellings in Gauteng vandeesweek gesluit sal word.
By die Universiteit van Pretoria is die Oktoberreses vervroeg en die Universiteit bly gesluit tot die negende van aanstaande maand.
Twee motors van personeellede is Maandag op die kampus aan die brand gesteek.
Lesings by verskeie kampusse van die Tshwane Universiteit van Tegnologie is opgeskort en by die Universiteit van Johannesburg is lesings opgeskort en die biblioteek is gesluit.
Lesings by die Universiteit van KwaZulu-Natal se kampus in Pietermaritzburg is ook steeds opgeskort. ‘n Koshuis se ingang is vroeër aan die brand gesteek.
Betogers het aangedui dat hulle hul oproer gaan voortsit ten spyte van elf studente wat verlede week weens die onrus op die kampus in hegtenis geneem is.
Die Universiteit van Kaapstad moes sy somergradeplegtigheid tot Junie aanstaande jaar uitstel weens die voortslepende onluste oor universiteitsgeld. Klasse is ook vir nog ‘n week opgeskort en sal na verwagting aanstaande week hervat word.
‘n Woordvoerder vir die universiteit, Elijah Moholola sê hulle sal ook die oproeriges raadpleeg.
Dit behels die jaareind-eksamen wat moontlik geraak kan word indien akademiese bedrywighede nie komende Maandag, soos beplan, hervat word nie.
Oproeriges versprei boodskappe op sosiale media wat studente waarsku dat hulle hul akademiese loopbane vir ‘n jaar sal moet uitstel.
Wits het die sekuriteitsmaatskappy wat met swart studente gebots het, vervang, het ‘n woordvoerder Woensdag gesê.
“Ons het die sekuriteitsmaatskappy vervang, maar voel nie ‘n behoefte om personeel te verhoog nie, want daar is minder studente op die kampus,” het Shirona Patel gesê.
Die gedrag van die sekuriteitswagte wat Dinsdag met betogende studente gebots het, is in ‘n verslag vervat en sal oorhandig word aan die bestuur voor die einde van die dag.
Die twee groepe het mekaar met klippe en stukke beton gegooi buite die Grootsaal op die Oos-kampus. Studente was kwaad omdat hulle nie toegelaat is om na Senaathuis te gaan waar hulle ‘n vergadering wou hou nie.
Hulle het daarna die veiligheidswagte se optrede as verskoning gebruik om die Grootsaal te vandaliseer.
Gerugte dat wit studente (foto) ook weer geteiken is, is ook ontvang.
Woensdagmiddag het die polisie pogings van die swart oproeriges gefnuik om Braamfontein binne te vaar. Dit volg nadat die studente probeer het om in die strate ‘n optog te hou om studente van nabygeleë kampusse te mobiliseer.
‘n Groep oproeriges wou buite die kampus gaan betoog maar is aangesê om terug te draai omdat hulle nie toestemming gehad het om ‘n optog te hou nie.
Skermutselings het uitgebreek nadat die polisie probeer het om die studente na die Wits Braamfonteinkampus terug te dryf.
Twee studente is in hegtenis geneem en vier beseer tydens onderonsies tussen betogende studente en die polisie in die Johannesburgse middestad.
Die polisie het skokgranate gebruik, en sommige studente het die polisie met klippe bestook. Volgens die polisie sal diegene wat in hegtenis geneem is, aangekla word van openbare geweld.
Tydens gister se onluste deur swart studente aan die Universiteit van die Witwatersrand is simbole van “witheid” soos die Grootsaal met sy nieuklassieke pilare aangeval. Vir die eerste keer in die geskiedenis is die ruite van die ingang tot die Grootsaal waar geslagte Engelse studente hul graaddiplomas onder begeleiding van “Gaudeamus igitur” ontvang het, stukkend gegooi.
Die ingang van die Grootsaal by Wits nadat dit deur klipgooiende studente beskadig is.
Onlustonele soos laas in die tagtigerjare gesien is toe die Skandinawiese lande, die Anglikaanse Kerk en Oos-Duitsland tienmiljoene dollar bestee het om oproer in Suid-Afrika aan te blaas, het hul gister op die kampus van dié links-liberale universiteit afgespeel. Aanvanklik het privaatveiligheidspersoneel die Grootsaal teen klipgooiers probeer beskerm en selfs van die klippe teruggegooi, waarna polisie-ondersteuning bygekom het. Van die akademiese personeel wat gewoonlik hul studente in polities korrekte ideologie soos “witheidstudies”, feminisme, marxisme, rassisme en gay studies onderrig, was nêrens te sien nie.
Een van die groot opstokers op die kampus is ‘n Indiërstudente wat ook sekretaris-generaal van die verteenwoordigende studenteraad is, Fasiha Hassan. Sy het die polisie en privaatveiligheidsbeamptes op die kampus as “misdadigers” beskryf.
Fasiha Hassan
“Ná wat ons van die polisie en privaatveiligheid gesien het, is dit duidelik dat hulle nie hier is om ons te beskerm nie… trouens, hulle is almal misdadigers op ons kampus,” het Fasiha Hassan aan die oproerige studente gesê.
Die polisie moes van skokgranate gebruik maak om die klipgooiende swart studente in bedwang te bring. Op ‘n stadium was ‘n groot skare op die plein reg voor die historiese “sentrale blok” met die Grootsaal gegroepeer en het die gebou met groot klippe en bakstene bestook.
Een-en-dertig studente is gister vir oproerige gedrag en saakbeskadiging in hegtenis geneem, maar is gistermiddag weer onvoorwaardelik vrygelaat.
Swart studente, wat reeds NSFAS-lenings van die staat ontvang wat hulle agterna nie terugbetaal nie, betoog vir “gratis opvoeding vir almal”. ‘n Opgeruide swart studente het op die liberale dekaan vir studentesake, Rob Sharman, tydens ‘n SAUK-TV-onderhoud begin skree en hom daarvan beskuldig dat hy twee koshuise laat afbreek om parkeerplek vir studente van die sakeskool “wat kan betaal” te bou. Die hele onderhoud is hier op die SAUK se YouTube te siene, maar hier volg die laaste 44 sekondes waartydens Sharman verneder word nadat hy minute lank sprakeloos teenoor haar tirade gelaat is.
Ironies genoeg kritiseer Rob Sharman in die voorafgaande gedeelte van die onderhoud die polisie dat hulle ‘n skokgranaat na die swart studente gewerp het, wat agterna “paniek” veroorsaak het.
Voor die klipgooiery het ‘n groot skare van ongeveer 500 swart studente van die Parktown-kampus (voormalige JCE of Johannesburg College of Education) na die hoofkampus op Braamfontein in Empireweg gestap sodat verkeer heeltemal tot stilstand gebring is.
Volgens ‘n persverklaring van die universiteit gaan Wits na afloop van gister se klipgooiery en onluste vir die res van die week gesluit wees. Tuks, wat ook gister onder geringe brandstigting en betogings deurgeloop het, gaan egter vandag normaalweg voort en studente is gevra om klasse by te woon. Toetse aan die Universiteit van Pretoria wat gister weens oproerige swart studente afgestel is, sal aanstaande week geskryf word.
Die Universiteit van Kaapstad is insgelyks vir die res van die week gesluit verklaar.
Swart studente van die Universiteit van die Vrystaat (foto) het besluit op ‘n aggressiewe plan van aksie om die regering te dwing om aan hul eise vir gratis hoër onderwys te voldoen.
Na ‘n vergadering op die Bloemfontein-kampus van die UV, is ook besluit om die UV-bestuur te dwing om alle dissiplinêre optrede teen diegene wat betrokke was by oproer vroeër vanjaar, onmiddellik te staak.
Hulle wil ook die universiteit dwing om nie verhogings in klasgelde aan te kondig nie.
Volgens Tumelo Rapitsi, Sasco se UV-takvoorsitter, wil swart studente nie meer besin oor verhogings nie maar gratis onderwys eis.
Studente sê hulle sal onbepaald die kampus ontwrig as daar nie aan hul eise voldoen word nie.
By die Universiteit van Kaapstad is lesings steeds opgeskort.
Swart studente het Dinsdag voortgegaan met hulle betogings na die aankondiging deur die Minister van Hoër Onderwys, Blade Nzimande, dat die klasgeldverhoging vir 2017 nie meer as agt persent sal wees nie.
Studente het die ingange na die universiteit versper om nie-betogende studente toegang te weier.
Volgens ‘n lid van die Studenteraad, Mickey Moyo, het stryd om gratis onderwys nie in 2015 tot ‘n einde gekom nie.
Geen besluit is nog geneem in verband met die opskorting van klasse en administrasie by die Noordwes-Universiteit (NWU) se Mafikengkampus nie.
Dit volg na protes deur ‘n klein groepie ontevrede swart studente Dinsdag.
NWU-woordvoerder, Louis Jacobs, sê ‘n groep studente wat ontevrede is met Nzimande se aanbeveling het kantore en lesinglokale binnegestorm en probeer om personeel en studente Dinsdag te intimideer.
Hulle het buite die kampus brande probeer stig. Hulle is daarna deur die polisie verwilder maar het weer op die kampus met die polisie gebots. Die onrus het voortgeduur tot 20:00.
Jacobs sê vier studente is in hegtenis geneem vir openbare geweld.
Die situasie is kalm vanoggend, maar word gemonitor deur die polisie, sê Jacobs. Hy sê net ‘n klein groepie studente is betrokke.
Jacobs sê daar was geen ontwrigting op die NWU se Potchefstroomkampus en Vaaldriehoekkampus nie. Aktiwiteite sal soos normaal voortgaan op hierdie kampusse vandag.
‘n Groot groep swart oproeriges versper die hoofingang na die Universiteit van die Witwatersrand se kampus in Braamfontein in Johannesburg.
Witsstudente (foto) het Maandag by ‘n massavergadering besluit om vanoggend met protesoptrede voort te gaan.
‘n Privaat veiligheidsdiens is aangestel om te verhoed dat die oproeriges motors aanval wat by die universiteit wil ingaan. Die polisie is ook in groot getalle op die kampus ontplooi.
Dit volg na die minister van Hoër Onderwys, Blade Nzimande se aankondiging Maandag dat universiteite self mag besluit oor ‘n verhoging in klasgelde.
Nzimande het ook aangekondig dat klasgelde nie verhoog sal word vir studente wat onder die NSFAS-hulpplan studeer nie.
Die verhoging vir betalende studente mag egter nie agt persent oorskry nie.
Die president van die studenteraad op die Noordwes Universiteit se Mahikeng kampus, Dikago Pule sê hulle verwerp Nzimande se aankondiging. Pule sê hulle vergader vandag en sal daarna besluit of hulle gaan betoog of nie.
Studente by die Universiteit van Kaapstad het Maandag by die Jameson-gedenksaal byeengekom, en sê hulle verwerp ook enige verhoging in klasgelde.
Studente-organisasies by die Universiteit van Pretoria maak ook reg om geweld te pleeg en die instelling te ontwrig.
Swart oproeriges het Maandag op die banke van ‘n lesingsaal in die Thuto-gebou gedans en gedreunsing en wit en swart studente uit die lokaal verjaag waar hulle moes toets skryf.
Hulle eis dat die universiteit gesluit moet word na Nzimande se aankondiging.
‘n Lid van die EFF se studente-organsisasie, Kabelo Mahlobogwane kla dat swart studente verdeeld is oor die kwessie.
‘n Groep studente aan die Universiteit van die Vrystaat (UV) gaan nie terugstaan en toelaat dat hulle eise vir gratis onderrig ondermyn word nie.
Dieselfde groep beskou Blade Nzimande se aankondiging van ‘n 8% verhoging op aanstaande jaar se studiegeld as ‘n belediging van die #FeesMustFall inisiatief verlede jaar.
Die leiers van die protesaksie aan die UV sê studente het onderneem om deel te neem aan ‘n “vreedsame” opskorting van alle bedrywighede aan die UV en om geen eiendom te beskadig nie.
Die voormalige Openbare Beskermer, Thuli Madonsela hits die onlusmakers intussen aan. Haar dogter is ‘n lid van die EFF.
Sy sê tersiêre instellings word steeds aan “maatskaplike ongeregtighede” blootgestel.
Madonsela het by `n lesing op die Mahikeng-kampus van die Universiteit van Noordwes op Nzimande se aankondiging oor die verhoging in klasgelde reageer. Sy sê die regering het nie in die land se onderwysstelsel “belê” nie.
Swart studente aan die Universiteit van Pretoria het gisteraand ‘n belangrike semestertoets in die Thuto-gebou op die kampus ontwrig en sodoende die blanke studente gedwing om die lokaal te verlaat. Dit is deel van die reeks onluste en betogings wat kampusse regoor die land teister, met ruggraatlose akademici en universiteitsbestuurders wat aanhoudend aan intimidasie deur radikale swart studente toegee. Hier onder is ‘n selfoonvideo daarvan.
Nog ‘n swart hoërskool in Limpopo is afgebrand in voortslepende etniese onrus. Die ANC wil nie toegee dat die twee taalgemeenskappe geskei moet word nie.
Tsonga-inwoners se ontevredenheid oor munisipale grense in die Vuwani-gebied wat Vendas bevoordeel, het tot onluste gelei.
Die brand het die naweek by die Humula-hoërskool buite Malamulele in Limpopo groot skade aangerig. Dit is die tweede voorval van brandstigting by dié skool vanjaar.
Drie klaskamers en ‘n administrasiekantoor van in die Mukhomi-gemeenskap is opsetlik aan die brand gesteek.
Bykans 30 skole is vroeër vanjaar tydens onluste oor munisipale afbakening by Vuwani en Malamulele aan die brand gesteek.
‘n Woordvoerder van die departement, Naledzani Rasila sê dokumente, toerusting en meubels is in die brand vernietig.
Die departement van Onderwys in Limpopo sê hulle moet nog bepaal wat die omvang van die skade is.
Rasila sê die polisie ondersoek die oorsaak van die brand.
Die minister van basiese onderwys, Angie Motshekga, het intussen die jongste aanval op ‘n skool in Malalulele veroordeel.
Sy sê die vernietiging van infrastruktuur ondermyn die vordering wat in skole gemaak word.
Motshekga het na afloop van ‘n vergadering van die Raad van Onderwysministers in Pretoria gesê vordering is gemaak om skoolinfrastruktuur regoor die land met meer as 170 van 510 geoormerkte skole wat op standaard gebring is.
Meer as 60 gestremde vrouestudente moes Dinsdagaand uit hul koshuis op die kampus van die Universiteit van Kwa Zulu-Natal verwyder word nadat ‘n brand uitgebreek het.
Die universiteit het intussen klasse vir die volgende twee weke weens die onluste opgeskort.
‘n Matras is blykbaar na agtuur in die koshuis, Charles James Hall, aan die brand gesteek.
Dit is die jongste in ‘n reeks voorvalle by die kampusse van die universiteit.
Studente het verlede week met oproer begin om te eis dat klasgeld nie verhoog word nie.
Niemand is in die voorval beseer nie.
Die president van die Howard College, Bandile Majola, sê voorvalle soos dié brandstigting is tot nadeel van die studente. Hy sê dit lei ook die aandag af van dit waarna die studente streef.
Oproepe om kalmte is gedoen nadat die universiteit se bestuur besluit het om die universiteit te sluit weens geweld op verskeie van sy kampusse.
Die bestuur het vroeër aangekondig dat hulle die Septembervakansie vervroeg en die instelling onmiddellik sluit. Die universiteit het ook alle akademiese programme weens die betogings opgeskort.
Ses voertuie is vroeër aan die brand gesteek, terwyl studente probeer het om die Senaatgebou op die universiteit se Westville-kampus aan die brand te steek.
Die polisie het 22 studente in hegtenis geneem. Die onrus hou na bewering verband met die studente se eis dat klasgelde nie volgende jaar verhoog sal word nie.
Hulle eis ook verteenwoordiging op die universiteit se bestuursraad. Klasse sal weer op 20 September hervat.
Traangasdampe hang steeds in die lug op die Howard-kampus van die Universiteit van KwaZulu-Natal nadat onluspolisie se Dinsdagmiddag gebots het met betogers.
Polisie het traangas en rubberkoeëls afgevuur op studente wat gevlug na veiligheid. Betogers het ‘n spoor van verwoesting op die kampus gelaat.
Een vrou is geskiet in die linkerknie en gerugte het daarna die ronde gedoen dat die polisie skerppuntammunisie gebruik. Maar die polisie op die toneel, het ontken dat hulle op studente geskiet het.
Studente is uit die Pius Langa-koshuis uitgeboender en daar is op hulle geskiet nadat hulle uit die koshuisvensters gehang het en die polisie getart het om hulle te kom kry.
Studente pleeg glo onluste oor ‘n voorgestelde 8% verhoging in fooie.
Die studenteleierskap was nie op die kampus nie. Hulle het glo borgtog gaan betaal vir 13 studente wat Maandag in hegtenis geneem is in verband met vorige oproer op die kampus.
Die senaatgebou en ses voertuie buite die Westville-kampus is aan die brand gesteek omstreeks middernag.
‘n Universiteitwoordvoerder, Lesiba Seshoka het gesê studente is in hegtenis geneem ná die brand.
“Die skade loop in ‘n hele paar miljoen rand.”
Studente-oproer het gewelddadig geraak by die Howard-kampus asook Pietermaritzburg-kampus met klipgooiery, saakbeskadiging en versperring van paaie.
Die brandstigting en onrus kom presies ‘n jaar nadat oproer in September verlede jaar uitgebreek het, wat ‘n geraamde R80 miljoen se skade veroorsaak het.
