Etiket: ebola

Ebola: Botswana sluit grense terwyl Kubane instroom

Die Afrika-Unie het sy kommer uitgespreek nadat Botswana nie reismaatreëls teen burgers van lande wat deur die ebolavirus getref is, wou ophef nie.

Die Unie sê die weiering om reisbeperkings op alle burgers van die betrokke lande te lig, het die ekonomiese las op die lande, Liberië, Guinee en Sierra Leone verhoog.

Botswana het die AU se versoeke om alle reisbeperkings op te hef, summier geïgnoreer.

‘n Woordvoerder van die AU Kommissie, Sissy Potgieter, sê in die betrokke drie lande waar sakelui se reise beperk word, sal die ekonomie ‘n knou kry.

Potgieter sê die lande wat nie wil gehoor gee nie, sal oortuig moet word om saam te werk.

Die ministerie van Gesondheid in Botswana sal voortgaan om alle ebolabesmette lande te monitor voordat besluite rakende reisbeperkings oorweeg sal word.

‘n Woordvoerder van die ministerie, Shinaaz Halabi, het bevestig dat die huidige reisbeperkings steeds geld.

Groot moondhede soos China en Brasilië, en voormalige koloniale magte soos Frankryk en die Verenigde Koninkryk, is byna heeltemal afwesig in die bekamping van die siekte.

Die grootste enkele mediese sending na Afrika teen ebola, in die voorste linie, is Kuba.

Terwyl daar hulpgeld beskikbaar is uit die VSA, is daar ‘n nypende tekort aan personeel wat dié klein eilandjie klaarblyklik sal voorsien.

In die sewentigerjare toe Afrika se nuwe onafhanklike lande geflankeer het met sosialisme, het onderwysers, dokters en soldate uit Kuba na 17 Afrika-lande gstroom, maar van Spaans het net salsa-musiek in Wes-Afrika oorgebly.

Intussen het die Johannesburgse Nooddienste verklaar dat sy personeel op hulle poste is.

‘n Woordvoerder van die Johannesburgse Nooddienste, Robert Mulaudzi, sê al die stasies binne die stad Johannesburg is operasioneel en alle paramedici is ook op volle sterkte.

Die staking in Gauteng se nooddienstesektor raak dus nie Johannesburg nie.

Die staking raak glo slegs sekere dele van die Tshwane Metroraad waar baie pasiënte by klinieke nie mediese dienste kry nie.

Van die gebiede wat geraak word sluit in Soshanguve, Hammanskraal, Temba en die Pretoriase middestad in.

Geleentheidsvenster om ebola te stuit krimp

Met die oog op bekamping van die wêreldwye dodelike ebola-virussiekte, het Nasionale Hawe-owerheid van Suid-Afrika verklaar dat hulle veiligheidsmaatreëls verskerp het.

Dié stap is geneem om personeellede by agt hawens te beskerm teen die virus wat deur inkomende vaartuie en hulle bemanning die land mag binnekom.

Die Hoof Hawemeester, Rufus Lekala, sê hulle werk saam met ander wetstoepassingsagentskappe.

Lekala sê hulle is nie bewus van enige vaartuie wat uit die besmette gebiede soos Liberië of Guinee gekom het nie, maar hulle hanteer hulle elke geval met omsigtigheid.

Die Veiligheidsraad het in September ‘n resolusie aanvaar wat verklaar dat ebola ‘n bedreiging vir internasionale vrede en veiligheid inhou.

Die geleentheidsvenster voor die uitbreking tot vlakke uitbrei waar dit nie meer beheer kan word nie, is stadig maar seker besig om te sluit.

Die Wêreldgesondheidsorganisasie sê bykans 4500 mens het reeds weens die ebolavirus omgekom.

Volgens die WGO sal die aantal mense wat na verwagting met die siekte besmet is, die week tot meer as negeduisend styg.

Die organisasie se assistent direkteur-generaal, Bruce Ailwood, sê hy is bekommerd dat die siekte na nuwe gebiede naby die grense van Liberië en Guinee met die Ivoorkus kan versprei.

Die prys van sjokelade kan negatief geraak word omdat een van die hoofprodusente, die Ivoorkus, op werkers uit besmette lande staatmaak om die bone te pluk.

Skole is intussen gesluit, verkiesings uitgestel, mynboumaatskappye het onttrek, en bestaansboere het hul lappies grond versaak.

Die virus teister Wes-Afrika met ‘n hernude risiko van politieke onstabiliteit in ‘n streek skaars herstel het van burgeroorlog.

Die WGO berig dat 10.000 nuwe gevalle per week teen Desember waarskynlik is, 10 keer die huidige koers.

Die Nasionale verpleegstersunie in die VSA het Dinsdag tydens ‘n perskonferensie verklaar dat verpleegpersoneel wat ebola-pasiënte behandel die deur hospitale beskerm word nie.

Roseann DeMoro, direkteur van die unie sê in hospitale se reaksie op die ebola-krisis word aanbevole veiligheidsprotokolle nie gevolg nie.

Die Dallas hospitaal waar Thomas Eric Duncan, die eerste persoon gediagnoseer met Ebola in die Verenigde State van Amerika, verlede week dood is, het geen van dié protokolle nagekom nie.

DeMoro het gesê as verpleegsters nie beskerm word nie, is hulle nie bereid om ebola of enige ander pandemie te hanteer nie.

“Die protokolle wat in die plek in Dallas moes gewees het, was nie in plek nie en is nie in plek op enige plek in die Verenigde State van Amerika nie,” het sy gesê.

Brit sterf vermoedelik van ebola in Masedonië

‘n Britse man, wat vermoedelik die ebola-virus onder lede gehad het, is in Masedonië oorlede.

Die sewe-en-vyftigjarige het saam met ‘n twee-en-sewentigjarige gereis, maar was klaarblyklik nie in Wes-Afrika nie.

‘n Senior regeringsamptenaar sê die tweede Brit, sy reisgenoot, in Masedonië toon ook simptome van die virus. Die twee mans het in ‘n hotel in die hoofstad, Skopje tuisgegaan.

Die hotelwerknemers en ambulanspersoneel wat met hulle in kontak was, is in afsondering geplaas.

Openbare gesondheidsowerhede in Brittanje sal voortaan saam met doeanebeamptes werk om reisigers wat koors onderlede het uit te sif by grensposte.

Nommer 10 was nie in staat om te sê of die stelsel reisigers van Wes-Afrika wat vlugte na ander stede neem, ook sal teiken nie.

Die skynbare ommekeer kom nadat oorlogsoefeninge vir hierdie naweek beplan word om Brittanje se vermoë te toets om op te tree teen die siekte, het die Departement van Gesondheid aangekondig.

Dokters, die ambulansdiens, plaaslike owerhede en die polisie sal deelneem in ‘n werklike tydsimulasie van ‘n ebola-uitbreking in twee of meer hospitale in die noorde en die suide van die land.

Intussen het die gesondheid van ‘n Spaanse verpleegster, wat ook die virus vermoedelik buite Wes-Afrika opgedoen het, verder versleg.

In Madrid is sewe mense in afsondering geplaas.

Potchefstroom-geval is nie ebola nie, sê departement

Die Nasionale Departement van Gesondheid het berigte ontken dat ‘n ebola-geval in Suid-Afrika aangemeld is.

Die woordvoerder van die departement, Joe Maila sê ‘n 72-jarige man met ‘n hoë koors is in die hospitaal opgeneem.

Volgens mediaberigte is die pasiënt in die Potchefstroom hospitaal in Noordwes opgeneem in isolasie.

Hy is glo slegs as voorkomingsmaatreël in afsondering geplaas.

Maila sê dit is algemene praktyk om ‘n pasiënt in isolasie te plaas as ‘n hoë koors voorkom en is nié ‘n aanduiding van ebola nie.

Volgens Maila het die pasiënt nie ‘n buitelandse besoek onderneem nie.

Intussen het die Spaanse verpleegster wat met die ebolavirus besmet is, aan ‘n koerant gesê sy het die korrekte prosedures gevolg terwyl sy pasiënte met die siekte behandel het.

Sy sê sy het geen benul hoe sy kon aangesteek het nie. Nog vier mense is in die hospitaal opgeneem vir waarneming nadat hulle met die verpleegster in aanraking was.

Kritici sê Spanje se ebola-protokol laat veel te wense oor. Die Spaanse eerste minister, Mariano Rajoy, het egter die land tot kalmte gemaan.

Die Amerikaanse owerheid sê mense wat in die land opdaag van dele van Afrika wat die ergste geraak word deur ebola, sal nie sondermeer die land mag binnekom nie.

Passasiers van Liberië, Sierra Leone en Guinee se temperatuur sal geneem word en hulle sal by vyf van die besigste internasionale lughawens eers ondervra word.

Die Liberiese man wat die eerste ebolapasiënt was wat in Amerika gediagnoseer is, is dood.

Die Amerikaanse minister van buitelandse sake, John Kerry, het gevra vir ongeëwenaarde internasionale ingryping.

Europa kan nog ebola-gevalle kry

Die Wêreldgesondheidsorganisasie (WGO) het gister gewaarsku Europa kan ongetwyfeld nog gevalle van ebola kan verwag nadat ’n Spaanse verpleegster die eerste persoon geword het wat Ebola buite Afrika opgedoen het.

Daar is wêreldwyd groot kommer dat Ebola kan versprei buite die grense van Wes-Afrika, waar meer as 3 400 reeds vanjaar dood is, het Reuters berig.

Spaanse amptenare het die publiek gerusgestel dat hulle die bedreiging onder beheer het, en gesondheidskenners meen die kans op ’n uitbreking buite Afrika is baie skraal.

Rafael Perez-Santamaria, hoof van die Carlos III-hospitaal waar die verpleegster twee sendelinge behandel het wat die virus in Wes-Afrika opgedoen het, het gesê hulle pas hul protokol aan. Vier mense is vir waarneming opgeneem.

Hoewel Europese hospitale meestal die geriewe het om ’n pa­siënt met die virus genoegsaam te isoleer, het die direkteur van die WGO in Europa, Zsuzsanna Jakab, gesê dit is “onafwendbaar . . . dat so iets weer gaan gebeur omdat so baie mense na en van die geaffekteerde gebiede reis”.

Amerikaanse kameraman in Liberië het ook Ebola

‘n Amerikaanse vryskutkameraman wat namens NBC-nuus die Ebola-uitbraak in Liberië dek, het positief vir die virus getoets en sal terug na die Verenigde State gevlieg word vir behandeling.Die hoof van NBC-nuus, Deborah Turness, het gister gesê dat die res van die NBC-nuusspan, waaronder die mediese korrespondent dr. Nancy Snyderman insgelyks terug na die VS gevlag sal word en vir 21 dae onder kwarantyn geplaas sal word “in ‘n gebaar van uiterste versigtigheid”.

Die kameraman werk reeds drie jaar lank in Liberië en dek onder andere die Ebola-epidemie. Hy het Dinsdag begin om videomateriaal vir die TV-netwerk te skiet.

Teen Woensdag het hy egter moeg en lyfseer begin voel en ontdek dat hy ‘n effense koors onder lede het. Donderdag het hy na ‘n behandelingsentrum gegaan om getoets te word.

Volgens Turness vertoon geen ander NBC-werknemers enige simptome of tekens van Ebolabesmetting nie.

Amerikaanse ebola-pasiënt was met honderde in kontak

United Airlines het honderde passasiers wat in kontak was met ‘n Ebola-pasiënt gewaarsku.

Bekommerde ouers het hul kinders uit ‘n skool gehaal in Dallas nadat hulle agtergekom het vyf leerlinge het kontak met die pasiënt gehad.

Thomas Eric Duncan het van Liberië na Brussel gevlieg aan boord van United Airlines Vlug 951 na Washington Dulles Internasionale Lughawe voordat hy na Dallas vetrek het.

Van Dulles, het hy met vlug-822 na Dallas/Fort Worth gevlieg.

Amerikaanse amptenare het geweier om Duncan se vlugbesonderhede vry te stel, maar United Airlines het verkies om sy roete openbaar te maak.

Gesondheidsamptenare beweer daar is geen risiko vir Duncan se mede-passasiers van United Airlines nie.

Duncan, ‘n Liberiese burger, het in die VSA by Washington Dulles Internasionale Lughawe geland met vlug-951 op 20 September, het die lugredery vandag onthul.

Hy het op 19 September van Monrovia, Liberië, gevlieg na Brussel. Van Brussel, het hy ‘n United Airlines-vlug na die VSA geneem.

Dit wys net hoe vinnig die siekte kan versprei as besmette pasiënte nie gestop word by die grens nie.

Tog, sê openbare gesondheidsamptenare die kanse op ‘n uitbraak in die Verenigde State van Amerika is laag.

Maar wanneer reisigers van Liberië, Sierra Leone of Guinee, verby ‘n paar hindernisse in hul eie lande se lughawens beweeg, is die virus uit die wegspringblokke om baie vinnig oor die hele wêreld te versprei.

Aandele van lugrederye het Woensdag in die meeste gevalle met meer as drie persent gedaal.

Eerste geval van ebola in VSA

Die eerste geval van ebola is in Amerika gediagnoseer, het RSG berig.

Amerikaanse gesondheidsowerhede sê ‘n man wat in Liberië die siekte opgedoen het, is in ‘n hospitaal in Dallas opgeneem, ses dae nadat hy in die land aangekom het.

Die Amerikaanse sentrum vir die beheer en voorkoming van siektes sê familielede van die man sal ook ondersoek word, terwyl nooddienstewerkers wat die man opgeneem het in kwarantyn geplaas is.

Bykans 3100 mense is reeds in Wes-Afrika aan die siekte dood, met meer as 6500 gevalle wat gediagnoseer is.

Intussen het ‘n Duitse nuusdiens berig dat ‘n vermoedelike ebola-pasiënt by Schönefeldlughawe in Berlyn geland het.

Dit is glo deur die owerhede bevestig. Die privaatstraler van ‘n werknemer van die Liberiese ambassade is nie toegelaat om in Israel te land nie. Hy word in ‘n spesiale Brandenburgse isoleringsvoertuig gehou.
 
‘n Regeringswoordvoerder het gesê die “veiligheid van burgers sal gewaarborg word”.
 
Na wat verneem word, wou ‘n werknemer van die ambassade in Monrovia, Liberië se hoofstad, in Israel land. Dit is geweier.

Omstreeks 17.28 op 26 September het die man in ‘n Learjet met Israeliese registrasietekens op Schönefeld geland.

Die man moes in die vliegtuig wag sodat paramedici kan regmaak om hom te vervoer na die hospitaal.

Amerikaanse dokter vir ebola behandel

‘n Amerikaanse dokter wat aan die ebola-virus in Sierra Leone blootgestel was, is Sondag opgeneem in ‘n kliniek van die nasionale gesondheidsinstituut buite Washington.

Die man se identiteit is nie bekend nie. Hy het as medikus vrywillige werk gedoen in ‘n eenheid waar ebola-lyers behandel word.

Hy is tans in die hospitaal opgeneem as voorsorgmaatreël.

‘n Woordvoerder van die hospitaal het dit benadruk dat sy behandeling daar “minimale risiko” inhou vir die ander pasiënte.

Australië stuur nie dokters na ebola-gebied nie

Die Australiese regering sal nie dokters na Wes-Afrika stuur om hulp met die ebola-epidemie te verleen nie.

Die organisasie Dokters Sonder Grense en die Australiese opposisieparty het versoek dat die regering ‘n mediese span stuur om die nypende tekort aan dokters aan te spreek.

Meer as 3 000 mense is reeds in Nigerië, Liberië, Sierra Leone en Guinee dood weens die ebola-virus en die dokters wat hulp kan verleen, raak yl gesaai.

Julie Bishop, Australië se minister van buitelandse sake, sê dat die departemente van gesondheid en verdediging albei van mening is dat gesondheidswerkers nie betyds ontruim kan word nie.

Sy sê dat die regering nie bereid is om die gesondheid van sy mense in die weegskaal te plaas omdat daar nie voldoende ontruimingsplanne is nie.

Wêreld moet ‘saamstaan’ teen 3 probleme wat VSA geskep het

Die Amerikaanse president, Barack Obama, het Woensdag by die VN se Algemene Vergadering in New York gesê die wêreld moet saamstaan teen terreur in Irak en Sirië, Russiese “aggressie” in Europa en ebola in Wes-Afrika.

Al drie probleme is vermoedelik deur die VSA self geskep.

“Ons kan die internasionale stelsel wat soveel vooruitgang geskep het hernu, of ons kan toelaat dat ons teruggetrek word deur ’n onderstroom van onstabiliteit,” het Obama gesê.

“Ons kan ons kollektiewe verantwoordelikheid om wêreldwye probleme te konfronteer herbevestig, of ons kan oorval word deur toenemende manifestasies van onstabiliteit.”

Hy het ’n beroep op die VN gedoen om saam te staan om die “kanker van gewelddadige ekstremisme te verwerp”.

David Cameron, die Britse premier, het Woensdag verklaar dat hy die Britse parlement gaan versoek om aan te sluit by die Amerikaanse lugaanvalle teen die Islamitiese Staat in Irak.

Cameron het dié besluit aangekondig in sy toespraak tydens die algemene vergadering van die Verenigde Nasies.

Dit is steeds nie duidelik of Brittanje gaan aansluit by die Amerikaanse lugaanvalle teen ISIS in Sirië nie.

Die hantering van ISIS het die VN-vergadering wat tans in sitting is, oorheers.

Hulpgeld en troepe teen ebola-virus ontplooi

Die Australiese regering het aangekondig dat hy onmiddellik nog geldelike hulp van sowat R60 miljoen gaan stuur vir die internasionale aksieprogram om die ebola-epidemie in Wes-Afrika te stuit.

Australië het voorheen R10 miljoen geskenk.

Julie Bishop, die minister van buitelandse sake, het Woensdag in ‘n verklaring gesê die geld sluit die R20 miljoen in wat Brittanje versoek het om mediese dienste in Sierre Leone te verskaf.

President Barack Obama het Dinsdag aangekondig dat die VSA troepe teen die ebola-virus in Wes-Afrika sal ontplooi.

Om die epidemie te stuit sal 3 000 Amerikaanse weermagpersoneel soontoe gestuur word om ‘n gesondheidsprogram te begin.

Dit sal ‘n gedwonge inentingsveldtog insluit met middels wat glo nog nie voorheen getoets is nie.

UNMIL, die VN se militêre ontplooiing na Liberië is in 2003 op die been gebring om ‘n skietstilstandooreenkoms te versterk na ‘n burgeroorlog wat byna 150,000 Liberiërs – meestal burgerlikes – uitgewis het en nog 850 000 gedwing het om te vlug na naburige lande.

Die missie hou tans 4619 militêre personeel in Liberië. Die Veiligheidsraad het pas ingestem om die sending te verleng tot Desember deser.

Obama gaan na Atlanta reis waar hy die Amerikaanse gesondheidshoofde sal ontmoet. Dit is deel van ‘n wêreldpoging om die epidemie, wat reeds 2 400 lewens geëis het, die hoof te bied.

Dit word beskou as die ergste ebola-epidemie nóg en dit het reeds versprei deur Liberië, Sierra Leon, Nigerië en die Demokratiese Republiek van Kongo.

Die Amerikaanse hulp sal hoofsaaklik gefokus word op Liberië, wat sover die ergste getref is.

Die Verenigde Nasies het Woensdag gesê dat byna $1 miljard vir ‘n uitsonderlike, internasionale reaksie op die ebola-epidemie in Wes-Afrika nodig is.

Die Sekretaris-generaal Ban Ki-moon het verklaar: “Elke dag wat ons terughou, sal die koste en die lyding eksponensieel groei.”

“Dit is nie net ‘n gesondheidskrisis nie, maar dit het ernstige humanitêre, ekonomiese en maatskaplike gevolge wat ver buite die betrokke lande kan versprei,” het die sekretaris-generaal gesê op ‘n perskonferensie by die VN se hoofkwartier.

Kaapse vrou vir ebola getoets

‘n Kaapse vrou word tans in Lagos vir ebola getoets nadat sy glo simptome van die siekte getoon het, het die Nigeriese gesondheidsowerhede Donderdag gesê.

Die vrou, wie se naam nie bekend gemaak is nie, is van Marokko via Lagos op pad huis toe en het in Guinee en Sierra Leone gewerk. Sy het op ’n gesondheidsvraelys wat sy op die Lagos-lughawe ingevul het, aangedui sy ly tans aan diarree en braking wat albei simptome van ebola is.

Sy is na die Ebola-sentrum in Lagos geneem vir toetse om te bepaal of sy wel die virus het. Dit sal ’n paar dae neem om die uitslag te bepaal.

“Sy was sedert April in Guinee en Sierra Leone . . . en sy het simptome,” het dr. Morenike Alex-Okoh, direkteur van gesondheid by die lughawe, gesê.

Sowat 2 300 mense is reeds aan die siekte dood. Die meeste gevalle kom voor in Liberië, Sierra Leone en Guinee, maar siek reisigers het die virus laat versprei na Nigerië en Senegal.

“Nigerië kan nie bekostig om nog ’n ‘ingevoerde’ Ebola-geval te hê nie,” het dr. Aileen Marty, ’n professor van die Florida International University College of Medicine, gesê.

Sy help die Nigeriese owerhede om mense wat die land binnekom vir die virus te ondersoek. Sy het gesê die Suid-Afrikaanse vrou se simptome is erg en sy het die gevaargebiede besoek.

Die simptome kan ook weens cholera of malaria wees.

Werktuigkundige terug uit ebola-gebied danksy weldoeners

Gerhard Van Zyl wat in Wes-Afrika vasgekeer is, is tuis sonder ebola.

Van Zyl het as ’n werktuigkundige by ’n diamantmyn in Sierra Leone gewerk, maar weens die epidemie is alle vlugte opgeskort. Weldoeners het hulle oor Van Zyl ontferm en hom ‘n gratis vliegtuigkaartjie aangebied, het Netwerk24 berig.

Hy het Dinsdagaand saam met nog sowat 80 Suid-Afrikaners uit Sierra Leone gevlieg. By O.R. Tambo-lughawe is hul temperatuur eers gemeet voordat hulle deurgelaat is.

Sy gesin was erg aangedaan om hom weer te sien.

Van Zyl het gesê drie mense in Koidu Town, slegs 40 km van die myn waar hy werk, is weens Ebola dood, terwyl nog 200 inwoners van die dorp in kwarantyn geplaas is.

Hy sê hulle was baie bewus van die epidemie: “Jy was jou hande seker 20 keer ’n dag.”

Die direkteur van ‘n onderneming – ook ‘n Bloemfonteiner – wat ystererts in Sierra Leone myn, het reëlings getref dat ’n huurvliegtuig elke tweede week werknemers na en van Suid-Afrika vlieg.

Die weldoener Joe Scheepers en sy vrou Heloïse, van African Mining and Crushing (AMC) wat ’n kontrakteur van African Mineral Limited (AML) is, het aan Van Zyl ‘n gratis kaartjie aangebied.

“Ek kan net vir hulle sê baie dankie. Ek het nooit gedink iemand sal my so help nie,” het Van Zyl gesê.

Van Zyl het ’n jaar en ’n half in Sierra Leone gewerk. Hy werk drie maande op ’n slag voordat hy vir drie weke huis toe kom.

Van Zyl het intussen sy werk in Wes-Afrika bedank en gaan nou as ’n werktuigkundige in Bloemfontein werk.

“Ek sal nie weer teruggaan nie,” het hy gesê.