Kategorie: Internasionale nuus

Nuus oor die wêreld buite Suider-Afrika

Etiese debat woed oor Ebola

Agt Chinese mediese werkers wat ebola-pasiënte behandel het, is onder kwarantyn in Sierra Leone geplaas.

Eksperimentele medikasie kan glo gebruik word om die virus te bestry.

Verskeie entstowwe word tans getoets, en “belowende resultate” is glo verkry, maar die gebruik van die eksperimentele middel het aanleiding gegee tot ‘n etiese debat oor of dit regverdigbaar is om ongetoetsde middels te gebruik, en indien wel, wie behandel moet word.

Intussen sal die Wêreldgesondheidsorganisasie die riglyne opstel vir die gebruik van eksperimentele medikasie wat hulle meen teen 2015 beskikbaar sal wees. Die WGO het reeds die ebola-uitbreking in Wes-Afrika as ’n internasionale openbare gesondheidsnoodtoestand bestempel.

Die WGO het kritiek gekry vir die wyse waarop hulle tydens die H1N1-pandemie in 2009, “behulpsaam” was om haastig ‘n entstof te bemark. Dit het tot aansienlike winste vir farmaseutiese maatskappye gelei.

Die ebola-epidemie het net meer as 1 000 lewens geëis.

Liberië het intussen ʼn eksperimentele serum aangevra van die VSA. Daar is drie laboratoriums wat sulke middels vervaardig met befondsing van die Amerikaanse Departement van Verdediging.

Dis nie bekend of die Chinese dokters en een verpleegster wat onder kwarantyn geplaas is, wel ebola onder lede het nie.

Nog 24 verpleegsters, die meeste van hulle werksaam in ʼn militêre hospitaal, is ook onder kwarantyn geplaas.

Suid-Afrika kort dringend ’n praktykkode vir gesondheidsbeamptes om enige moontlike uitbreking van die ebola-virus te hanteer, het die DA Maandag gesê.

“Sonder ’n praktykkode sal gesondheidsbeamptes landwyd nie nasionale riglyne hê om ’n moontlike mediese noodgeval wat met ebola verband hou te bedwing nie,” het Wilmot James, DA-LP, in ’n verklaring gesê.

Hy het ’n beroep op dr. Aaron Motsoaledi, minister van gesondheid, gedoen om dringend só ’n kode in die Staatskoerant te publiseer.

Volgens James moet die kode onder meer insluit hoe ebola-lyke hanteer moet word en hoe hospitaalsale onder kwarantyn geplaas moet word.

VN sal oorlogsmisdade in Gasa ondersoek

Die VN het drie kenners aangestel op ‘n internasionale kommissie van ondersoek na moontlike menseregteskendings en oorlogsmisdade in Gasa.

Dié stap volg nadat Israel van oorlogsmisdade teen die Palestyne beskuldig is. Die kommissie sal egter vergrype van albei kante ondersoek.

‘n Professor van internasionale reg, William Schabas, van die Middelsex Universiteit in Londen, sal die ondersoek lei.

Die ander lede is Doudou Diene van Senegal en Amal Alamuddin, ‘n Brits-Libanese regsverteenwoordiger wat verloof is aan die akteur George Clooney.

Bykans twee duisend Palestynse inwoners en 67 Israeli’s is in die maandlange konflik dood, wat gekenmerk is deur Israelse lugaanvalle en die honderde vuurpyle wat deur Hamas na Israel gevuur is.

Die paneel sal teen Maart aanstaande jaar aan die VN Veiligheidsraad verslag doen.

Tot 60 000 betoog in Kaapstad teen Israel-geweld

Terwyl die Joodse gemeenskap in Johannesburg in die South African Jewish Report spog oor die 10 000 mense wat hy verlede Saterdag ten gunste van Israel kon mobiliseer, het waarskynlik die grootste optog nóg in Suid-Afrika gister in Kaapstad plaasgevind toe tussen 30 000 en 60 000 mense na die parlementsgebou opgeruk het om steun aan Palestina te betoon.

Die reuseskare het liedere gesing en plakkate geswaai om te eis dat die geweld in die Gasastrook gestaak moet word.

“Ons skat dat daar meer as 30 000 mense is wat aan die optog deelneem, maar dit kan soveel as 50 000 wees,” het Richard Bosman, hoof van veiligheid en sekuriteit aan die Kaapse munisipaliteit, aan Sapa gesê. Volgens sommige beramings was daar egter 60 000 mense.

Die begoging is deur die National Coalition for Palestine (NC4P) georganiseer. Die koalisie bestaan uit meer as 30 godsdiensorganisasies, burgerlike instellings, vakbonde en politieke partye.

Boikot teen Woolworths

NC4P het vroeër vandeesweek in ‘n verklaring “beslissende optrede van die Suid-Afrikaanse regering geëis teen die Israeliese aanvalle, moorde, verdrywings en die vernietiging van die Gasastrook”. In ‘n ander mediavrystelling sê die beweging sy steun aan die BDS-boikot van Woolworths toe.

'n Deel van die skare in Kaapstad tydens gister se betoging
‘n Deel van die skare in Kaapstad tydens gister se betoging

“Ons ondersteun die oproep van die Boycott, Divestment and Sanctions-beweging (BDS) om alle maatskappye wat met die staat van Israel handel dryf, te boikot. Die Nasionale Koalisie vir Palestina het daarom ‘n landwyde aanbeveling uitgereik dat alle Woolworths-winkels in Suid-Afrika onmiddellik geboikot moet word. Die oproep om ‘n boikot geskied vanweë Woolworths se standvastige ondersteuning vir die Israel-apartheidstaat en kom ná diepgaande navorsing en ondersoek na die stand van handelsbedrywighede tussen die kettingwinkel en die Israelse staat. Inkomste uit die verkoop van Israelse goedere befonds oorlogsmisdade teen Palestyne. NC4P doen ‘n beroep op alle Suid-Afrikaners om vreedsame betogings voor alle Woolworths-winkels in Suid-Afrika te hou.

Die koalisie het ook ‘n beroep gedoen vir ‘n internasionale ondersoek na die optrede van die Israelse weermag in die Palestynse gebiede.

Volgens berigte is meer as 1 900 mense reeds dood sedert Israel verlede maand met Operasie “Protective Edge” begin het in ‘n poging om Hamas vir die afvuur van vuurpyle te straf en om die infrastruktuur van die Gasastrook te vernietig.

Die Verenigde Nasies sê nagenoeg 1 350 van die oorledenes was burgerlikes, waaronder honderde vroue en kinders.

Kanada isoleer moontlike ebola-pasiënt

‘n Pasiënt wat van Nigerië in Kanada aangekom het is in ‘n hospitaal in Ontario in afsonderling geplaas omdat hy moontlik met die ebola-virus besmet is, het RSG berig.

‘n Dokter wat hom behandel sê dit is ‘n voorkomende maatreël omdat hy simptome van ebola het, maar dit is nog nie gediagnoseer nie.

Die Nigeriese president, Goodluck Jonathan het vroeër die uitbreking van ebola in sy land tot ‘n nasionale krisis verklaar. Hy het meer as 110-miljoen rand beskikbaar gestel om die verspreiding van die siekte te keer.

Die Wêreldgesondheidsorganisasie beraam dat sowat 960 mense in Guinee, Sierra Leone, Liberië en Nigerië aan die siekte dood is. Die WGO het die uitbreking as ‘n internasionale gesondheidskrisis verklaar.

Hulp aan Irak in die vorm van bomme

Hulp in die vorm van bomme na Irak is oppad. Enkele dae nadat die VSA Rusland gekritiseer het dat hulle onder die dekmantel van “humanitêre hulp” militêre doelwitte stel, het pres. Barack Obama van die VSA Donderdagaand Amerikaanse lugaanvalle in Irak om “humanitêre” redes goedgekeur.

Die VSA wil klaarblyklik hulle totale mislukking en gru-nalatenskap in Irak met kinetiese humanitêre hulp probeer toesmeer.

Ten einde ‘n “volksmoord” deur Islamitiese ekstremiste op etniese en godsdiensminderhede te voorkom, gaan die VSA Irak verder onder bomme steek. Weens die Amerikaanse inval van 20 Maart 2003 om olie te buit, is die eens florerende land die afgelope 10 jaar in chaos gedompel.

Kospakkies en ander voorrade gaan uit die lug glo nou op ‘n klein groepie Irakkese van die Yazidi-minderheidsgroep neerreën in die jongste reklamepoging om Amerika se verslete beeld te poets.

Hulle is tans deur Isil (Islamitiese Staat in Irak en die Levant) vasgekeer. “Ons kan versigtig en verantwoordelik optree om ‘n moontlike volksmoord te voorkom,” het Obama gesê wat pas wapens aan Israel voorsien het om Palestynse burgerlikes uit te wis.

Die Veiligheidsraad van die Verenigde Nasies het intussen ‘n noodvergadering oor die krisis in Irak belê en die olieprys het op markte in Asië begin styg nadat dit bekend geword het dat Obama lugaanvalle op Isil goedgekeur het.​

“Daarom het ek gelas dat, indien nodig, lugaanvalle op spesifieke teikens uitgevoer word om magte in Irak te help om die beleg te beëindig en die landsburgers wat vasgekeer is, te beskerm.”

Obama het ook gewaarsku dat Amerikaanse vegvliegtuie Isil sal aanval as hulle dit naby die stad Irbil waag waar ‘n Amerikaanse militêre raadgewers die Irakse weermag oplei.

Amnestie Internasionaal vra ondersoek na Kiëf-wetgewer

Amnestie Internasionaal (AI) het ‘n ondersoek gevra na die misbruik van mag deur pro-Kiëf vigilantes soos die Oekraïense ultra-radikale LP Oleg Lyashko. Die organisasie het getuienis van gevalle van ontvoering en fisiese geweld teen slagoffers.

Lyashko se sogenaamde “ondervragings” is op sy amptelike YouTube bladsy te siene. Die menseregtewaghond het ‘n verslag uitgereik wat eis dat die wetgewer aanspreeklik vir sy dade gehou moet word.

Amnesty International het sy kommer met die Oekraïense owerhede gedeel oor die ontvoerings en mishandeling van individue in die hele streek, luidens ‘n verklaring.

Lyashenko is ‘n voormalige presidensiële kandidaat wat berug is vir sy anti-Russiese uitsprake.

“Oleg Lyashko is veronderstel om ‘n wetgewer te wees, maar hy het die wet in sy eie hande geneem,” het die verklaring gesê. “Eer aan die Oekraïne, dood aan die teenstanders is sy strydkreet.”

Die wetgewer word altyd vergesel deur gewapende jong mans in militêre klere as hy reis en rekords van sy ontvoerings en mishandeling opneem vir Facebook om daarmee te spog.

Die video’s wys mishandeling wat in stryd is met “die reg op ‘n billike verhoor, vryheid en veiligheid van die persoon, en die reg om nie aan marteling of ander soort mishandeling onderwerp te word nie,” sê AI.

VSA, NAVO verhoog magsopbou teen Rusland

Die VSA het in ‘n verdere magsopbou teen Rusland, die missielkruisboot die Vella Gulf na die Swart See gestuur om “vrede en stabiliteit” in die streek te beskerm, het die Amerikaanse vloot in ‘n persverklaring gesê.

Net in Julie, het NAVO nege oorlogskepe na die Swart See gestuur, die grootste aantal NAVO-skepe in die streek die afgelope 10 jaar.

Die VSA se korporatiewe elite probeer met die hulp van NAVO die Koue Oorlog te herloods as ‘n voorwendsel om Oos-Europa se energiebronne te monopoliseer.

“Die Vella Gulf se missie is om interoperasievaardighede te verbeter en te werk na gemeenskaplike doelwitte, om die verbintenis van die Verenigde State tot die bevordering van die gesamentlike veiligheid van NAVO-bondgenote en vennote in die streek te toon,” het die persverklaring gesê.

Die Ticonderoga-klasvaartuig het aangekom in die Swart See om by te dra tot “die maritieme veiligheid van die streek, opleidingsmissies uit te voer en NAVO bedrywighede te ondersteun”. Vella Gulf se tuishawe is Norfolk, Virginia.

Die hoof van NAVO, Anders Fogh Rasmussen, sal Donderdag die Oekraïne besoek te midde van die volgehoue Amerikaanse militêre opbou in die streek.

Rusland het ontken dat hulle ‘n inval op die Oekraïne beplan en sê daar is satellietbeelde wat as getuienis kan dien dat Rusland nie besig is om sy soldate op sy grens met die Oekraïne te groepeer nie.

Ten spyte daarvan sê NAVO Rusland het sy magte op die grens “vermeerder”.

Rusland het aangebied om direkte internetkommunikasie met Amerikaanse verdedigingspersoneel op te stel om hulle van die nodige data te voorsien.

Intussen het Admiraal John Kirby aan die media by ‘n DoD-inligtingsessie gesê hulle het nie werklik inligting oor wat aangaan op die grens tussen Rusland en die Oekraïene nie. Die inligting waaroor hulle beskik, is “onbetroubaar” het Kirby gesê. Hy weet nie of daar “swaar militêre toerusting” oor die grens geskuif word nie. Voorheen het die VSA beweer sulke toerusting word verskuif.

Rasmussen beweer daar is vrese dat Rusland op militêre gebied kan probeer ingryp onder die voorwendsel van ‘n “humanitêre of vredesoperasie” soos wat Amerika graag doen.

Daar is reeds meer as ‘n duidend mense dood in Kiëf se aanvalle op selfverdedigingsgroepe en talle soldate het gedros na Rusland omdat hulle nie meer kans sien om hul eie mense dood te maak nie, ten spyte daarvan dat die junta verpligte diensplig ingestel het.

Amerikaanse hoofstroommedia is genooi om eerstehands te berig oor die drosters, maar wou nie die nuus dek nie. Daar word vermoed dat die Amerikaanse vise-president Joe Biden – wie se seun Hunter by die oorlog vir gas in die Oekraïne betrokke is – die sensuur rig.

Die Amerikaanse Minister van Verdediging, Chuck Hagel, het verder die oorlogskoors probeer aanwakker deur te gewaarsku dat “die risiko van ‘n Russiese inval aan die toeneem is”.

Die Oekraïense weermag is tans besig om na Donetsk op te ruk, die grootste stad wat deur selfverdedigingsgroepe beset word.

Amerikaanse vise-president dink Afrika is een land

Vise-president Joe Biden het tydens sy toespraak by die Verenigde State-Afrika-beraad Dinsdag, verwys na Afrika as ‘n “nasie”.

Afrika is, natuurlik, ‘n kontinent met 54 lande. Met verwysing na Afrika en die mees winsgewende nasies in die wêreld, het vise-president Biden gesê: “Daar is geen rede hoekom die nasie van Afrika nie kan behoort tot die geledere van die wêreld se mees welvarende lande in die nabye toekoms nie, in die dekades wat voorlê.”

Gaste by die beraad het president Zuma vroeër staande toegejuig.

Biden se seun Hunter het ook reeds vir groot omstredenheid gesorg. Hy is op die direksie van Burisma aangestel, ‘n gasmaatskappy in die Oekraïene wat nie deel van Rusland wil wees nie en vermoedelik agter die onrus sit.

Zuma kry staande applous in Washington

President Jacob Zuma het ‘n staande applous in Washington ontvang nadat hy voorgestel het dat Israel en Palestina Suid-Afrika se voorbeeld moet volg om hul gewelddadige geskille op te los.

Zuma het by die Nasionale Persklub in die stad gepraat, waar die VSA-Afrika Leiersberaad aan die gang is.

Hy het gesê dat Suid-Afrika nie van Israel se ambassadeur Arthur Lenk ontslae sal raak nie, ten spyte van die aandrang daarop.

Zuma het gesê hy glo Suid-Afrika is ‘n voorbeeld van hoe om versoening na te streef.

Hy het gesê: “Ons kom van ‘n konflik wat niemand gedink het ooit opgelos sou word nie, [naamlik] geïnstitusionaliseerde rassisme in Suid-Afrika.”

Zuma het ook die US Chamber of Commerce toegespreek tydens ‘n ontbytsessie.

Zuma het in beide toesprake gevra dat die Africa Growth and Opportunity Act (Agoa) verleng word vir nog 15 jaar.

Sommige lede van die Amerikaanse Kongres sê Suid-Afrika as ‘n middel-inkomste land en behoort uit die vrye-handelsooreenkoms uitgesluit te word.

Intussen het Israel en Hamas ingestem tot `n nuwe skietstilstand van 72 uur. Die skietstilstand het Dinsdagoggend om 7:00 Suid-Afrikaanse tyd begin. Dit is die jongste van vele vrugtelose pogings om die geweld in Gasa te beëindig.

Samesprekings in Kaïro in Egipte het tot die deurbraak gelei. Die samesprekings is deur Hamas en verskeie ander groepe van Palestina bygewoon, maar nie deur Israel nie.

Die Egiptiese regering het die Palestynse eise Maandagaand aan Israel voorgelê. Byna 2000 Palestyne is reeds in die geweld dood.