Afrikaanse nuus Archives - Page 76 of 166

Babaverkragtingsvraag in eindeksamen is ‘siek’

Ontsteltenis heers dwarsoor die land by leerlinge in Dramatiese Kunste wat Maandag tydens hul matriekeindeksamen ‘n vraag oor ‘n toneel met ‘n babaverkragting moes beantwoord. Volgens ‘n berig van Sapa, gaan ouers en leerlinge die departement van basiese onderwys versoek om die 15 punte aan alle leerlinge wat die eksamen moes aflê, toe te ken.

Die vraag in afdeling C van die vraestel, wat volledige hier onder weergegee word, was verpligtend. Daarin moet leerlinge kommentaar lewer op die simboliese uitbeelding van ‘n babaverkragting deur middel van ‘n brood en ‘n besemstok. Die toneel is afkomstig uit die stuk Tshepang deur Lara Foot Newton.

Omdat die vraag 15 punte uit ‘n totaal van 150 tel, verteenwoordig dit tien persent van die hele vraestel en sou dus die verskil tussen ‘n druip en ‘n slaag of ‘n onderskeiding en ‘n nie-onderskeiding kon bepaal.

“Ek kon amper nie verder skryf nie,” het een meisie in Johannesburg gesê. “Dit het my naar gemaak en ek moes net die trane wegsluk. Hoe kan hulle vir ons so iets in die eindeksamen gee? Ek weet daar is iets soos verkragting en daar gebeur vreeslike goed in ons land, maar hierdie is te erg! Ek het amper die vraag heeltemal uitgelos, maar ek het heel jaar nog onderskeidings vir Drama gehad en daarom moes ek dit maar beantwoord, teen my sin.”

Blykbaar word die memorandum vir die vraestel vandag in Pretoria bespreek.

Hier is die gewraakte vrraag 11 uit die vraestel:

Dramatiese Kunste DBE/November 2013

AFDELING C: PAS PERSOONLIKE HULPBRONNE TOE EN BESIN EN EVALUEER

AFDELING C is VERPLIGTEND.

VRAAG 11

Lees die uittreksel uit Tshepang deur Lara Foot Newton en beantwoord die vrae wat volg. Die toneelstuk is geïnspireer deur die brutale verkragting van die nege-maande-oue baba, Tshepang. Daar is twee akteurs in die produksie. Simon vertel die storie en vertolk verskeie karakters. Ruth is op die verhoog, maar praat nie.

SIMON: Sy het die heeltyd geweet.
Sy was te bang om hulle te vertel, want sy was sy houvrou.
Nou praat die dorp! Waarom het sy dit geheim gehou? Waarom het sy nie enigiets gesê nie? …
Alfred was dronk. Hy wou seks gehad het. Ruth wou gaan drink en het nie
belanggestel nie. Sy het haar baba op die bed gelos en tavern toe gegaan.
Ruth plaas die brood op die klein bedjie.
Dit het gou donker geword. Die son het ondergegaan.
Hy beeld die verkragting uit deur die besemstok en dië brood te gebruik.
Later het Sarah, die een met die goue tand, na die_huis toe gekom om vir Ruth te soek. Sy het ingeloop, Siesie gehoor skree en ‘n vuurhoutjie getrek. Alfred het vir ‘n oomblik gestop. Sarah het na hom gekyk, na die baba, en toe die kamer verlaat … en niks gedoen nie. Toe het Alfred voortgegaan. Hy het later haar liggaam in die veld gaan gooi … waar Dewaal haar gekry het.

11.1 Verduidelik tot watter mate die karakter Simon ‘n verteller genoem kan word (2)

11.2 As die enigste praatrol in die toneelstuk is Simon se stemvertoning noodsaaklik vir die sukses van die toneelstuk. Beskryf hoe jy toon, tempo en volume in reël 1-8 sou gebruik om tot die hoogtepunt (klimaks) op te bou in hierdie uittreksel. (6)

11.3 Die verhoogaanwysings in reël 9 sê: ‘Hy beeld die verkragting uit deur die besemstok en die brood te gebruik.’

11.3.1 Waarom het die dramaturg gekies om die simbool van ‘n brood te gebruik om die baba uit te beeld en die besemstok as die verkragterr? (3)

11.3.2 Beskryf hoe jy die akteur wat Simon vertolk, reël 9 sou laat opvoer om die aakligheid van die verkragting vir die gehoor te vergroot. (4)

[15]

DA sal op benadeling van net een rassegroep fokus

Leiers van die Demokratiese Alliansie het Sondag na sy beleidskonferensie die noodsaaklikheid vir rasbeleid beklemtoon ten einde die “nalatenskap van apartheid” reg te stel.

By ‘n perskonferensie in Kaapstad, het die DA -leier, Helen Zille gesê die party erken dat daar “beduidende korrelasie tussen ras en benadeling” is, en dat haar party “onomwonde” die behoefte aan “regstelling” ondersteun.

Zille en ander partyleiers, het gesê die beleidskonferensie die naweek het beklemtoon dat “ras ‘n grondige rede” vir benadeling is. Dit beteken die ras van die benadeeldes – waarvan almal swart is – kan vrylik erken word.

Die party het voorgestel dat die groeiende rassedruk van binne die party duidelik geïdentifiseer word en verteenwoordig word in beleid. Maar Zille het ontken dat die debat “rasgedrewe” was.

“Daar was nie onmin of rassepolarisasie oor die kwessies nie,” het sy gesê. Daarmee het Zille te kenne gegee dat wit DA-leiers nie beswaar gemaak het teen die swart rassebeleid wat die party tans omhels nie.

Die DA het tradisioneel staatgemaak op ‘n rasblinde benadering tot ontwikkeling, waar die regering se doeltreffendheid en ‘n kultuur van vrye onderneming benadruk is, en sou lei tot die opheffing van armes.

Terwyl Zille die dramatiese ommeswaai in die party se beleidsrigting probeer onderspeel het, het die parlementêre leier, Lindiwe Mazibuko haar kans waargeneem om die belang daarvan te beklemtoon.

Sy het gesê die erkenning van “ras” as ‘n belangrike filter in die DA se benadering tot regstelling sal voortaan hul beleid bepaal.

“Ek dink die groot ding wat uit die Federale Raad gekom het het in terme van leierskap was die vraag of die DA ras as ‘n wettige plaasvervanger vir benadeling aanvaar … en die antwoord was ‘ja’.”

Daar was berigte in die aanloop tot die konferensie dat swart lede van die Swart Koukus ‘n rassebeleid voorstaan.

Dit is na dese nie meer duidelik waar die party se benadering verskil van die ANC s’n nie.

“Ons uitdaging is om die balans tussen die behoefte aan rasseregstelling en ons verbintenis tot nie-rassigheid te behou,” het Zille erken.

Was sluipmoorde op JFK en Verwoerd werk van dieselfde skadu-groep?

Verskeie meningsopnames wat vrygestel is hierdie week met die 50ste herdenking van die sluipmoord op president John F. Kennedy, toon dat die meerderheid Amerikaners nog steeds nie glo dat Lee Harvey Oswald die enigste sluipmoordenaar was nie en dat daar ‘n wyer sameswering was.

Byna tweederdes glo dat Oswald nie alleen opgetree het nie, en minder as ‘n derde glo dat hy wel het. Die res is onseker. Die Amerikaanse regering se amptelike Warren-kommissie van destyds, het Oswald as die enigste skuldige aangewys.

Amerikaners onder die ouderdom van 30, die internetgenerasie, is meer geneig as enige ander ouderdomsgroep om te sê dat Kennedy se sluipmoord ‘n sameswering was. Byna ‘n driekwart glo dit.

Na die moord, het 40 getuies beweer hulle het skote of rook van die berugte graskoppie in die noordwestelike hoek van Dealey Plaza gesien, wat beteken dat Oswald nie die enigste skieter kon gewees het nie.

Soos uiteengesit in Richard Belzar se boek Hit List, is 15 sulke getuies voortydig dood tussen die jare 1963 en 1967. Die kans dat dit weens natuurlike oorsake kon gewees het is dus honderdduisendtriljoen tot een.

Vyftig jaar later, is duisende JFK-sluipmoorddokumente nog steeds verseël, en sal die getuienis eers in 2017 beskikbaar gestel word, tensy die federale regering dit as ‘n potensiële veiligheidsrisiko beskou, en anders besluit.

Baie navorsers meen dit was die werk van ‘n skadu-regering wat Kennedy uit die pad wou hê omdat hy fel gekant was teen die toenemende mag van die Federale Reserwebank asook Israel se begeerte om ‘n kernarsenaal te bou.

Om daardie rede is sy broer Robert ook vermoor deur die “Palestynse” sluipmoordenaar Sirhan Sirhan, glo hulle.

Dr. HF Verwoerd se dood kon bes moontlik die werk van dieselfde skadu-groep gewees het wat twee sluipmoordenaars “geprogrammeer” het om die premier uit die pad te kry, te wete David Pratt en Tsafendas.

Dr. Verwoerd is geskiet tydens die Randse Paasskou in April 1960 deur David Pratt, maar die aanslag op sy lewe was onsuksesvol. Die tweede aanslag was egter geslaagd. Die twee moordenaars het toevallig “behandeling” ontvang van dieselfde Britse psigiater.

As Jy Sing: Afrikaanse lokettreffer

Die Afrikaanse rolprent, As Jy Sing, het die suksesvolste Afrikaanse rolprent vanjaar geword en het die beste openingsnaweek van enige Afrikaanse titel gehad.

Die nuwe musiekfilm met Bobby van Jaarsveld en Leah in die hoofrolle het vroeg beloof om een van die jaar se groot films te wees.

Die Suid-Afrikaanse verspreider van As Jy Sing en Khumba sê die rolprente het die naweek gesorg vir 27 persent van die verdienste van die top 10 rolprente.

Die rolprente was onderskeidelik tweede en derde by die plaaslike loketkantoor, net na Thor: The Dark World en net voor Tom Hanks se Captain Phillips.

As Jy Sing het sewe persent meer in sy openingsnaweek gemaak as verlede jaar se Afrikaanse treffer, Semi-Soet.

Massiewe kuberaanval op PRAAG-webblaaie

Oor die afgelope paar dae vanaf Dinsdagoggend is ‘n massiewe kuberaanval teen die webwerwe en bedieners van PRAAG geloods. Die sogenaamde verspreide-diensweerhoudingsaanval (Engels DDOS) waarby potensieel tienduisende rekenaars betrokke was, het as oogmerk gehad om PRAAG en sy diensverskaffer bankrot te maak deur die verbruik van bandwydte en skade aan netwerkinfrastruktuur.

By tye het die verspreide-diensweerhoudingsaanval die PRAAG-bedieners buite werking gestel maar tans is beide die Afrikaans webwerf by praag.co.za en die Engelse blad by praag.org aanlyn.

Dr. Dan Roodt, direkteur van die Pro-Afrikaanse Aksiegroep (PRAAG) ‘n gemeenskapsnuusdiens en kultuurorganisasie, het in ‘n verklaring gesê: “Ons is heeltemal verbyster deur die vlak van kuberaktiwiteit wat daar tans deur ekstremistiese anti-Afrikaanse groepe in die land teen ons gemonster word. Daar bestaan ook verskeie Facebook-blaaie wat deur mense onder vals identiteite bedryf word wat ons wil vernietig, oënskynlik omdat ons betogings teen misdaad ondersteun, asook veeltaligheid in Suid-Afrika goedgesind is.”

Die kuberaanval het aansienlike skade aangerig, nie net aan PRAAG nie, maar ook aan sy diensverskaffers en hul netwerke, iets wat kragtens Suid-Afrikaanse wetgewing strafregtelike aanspreeklikheid skep. Hierby kan ook gronde vir ‘n siviele eis gevoeg word, indien die oortreders opgespoor word.

“Ons gaan klagtes by die SA Polisiediens indien kragtens die Wet op elektroniese kommunikasie en transaksies nr. 25 van 2002 rakende die verspreide-diensweerhoudingsaanval teen ons, asook daardie naamlose individue wat aanhou om ons op Facebook, sosiale media en teenoor potensiële adverteerders op ons blad belaster,” meen Roodt.

“Ons gaan beslis nie hierdie soort aanvalle met gelatenheid verduur nie,” sê Roodt. “Ons lesers en ondersteuners staan by ons en honderde het reeds as vrywilligers aangemeld om dié pogings om ons monddood te maak, te beveg. Ons sal egter nie van die onsmaaklike en onderduimse metodes van ons teenstanders gebruik maak nie, maar ons op ‘n oop, deursigtige en wettige manier verdedig.”

André Visagie skuldig aan onwettige besit van wapens

Die konserrwatiewe leier André Visagie is skuldig bevind aan die onwettige besit van wapens en ammunisie, het Beeld Saterdag berig.

Sy seun, Jan, 18, wat sy mede-aangeklaagde was, is in die Kimberleyse landdroshof vrygespreek.

Landdros Vernon Smith het gesê Visagie, leier van die Geloftevolk-Republikeine, het “geen vertroue” in die polisie nie en is ook bekommerd oor plaasaanvalle wat hom laat glo dat mense in staat moet wees om hulself te beskerm.

Visagie het vroeër aan die hof gesê dat ‘n trommel wapens wat in sy seun se kamer ontdek iss, daar geplant is.

Smith het Visagie skuldig bevind maar gesê dat daar geen getuienis is dat sy seun van die wapens in die instapkas in sy kamer bewus was nie.

‘n Vonnisdatum moet nog bepaal word. – Sapa

Die geskiedenis: Douglas Gibson se moses

Douglas Gibson, voormalige DA-politikus en ambassadeur na Thailand het ‘n kwalik bedekte aanval op Afrikaners geloods deur lesers van The Citizen te vertel hoe “verregses” se versugting om Steve Hofmeyr as die nuwe Moses te sien, niks sal oplewer nie.

Volgens Gibson sal geen nuwe charismatiese leier Afrikaners kan lei na die nuwe beloofde land nie, aangesien selfbeskikking binne ‘n Konfederasie nie haalbaar is nie.

In sy pleidooi om Steve Hofmeyr af te kraak en die Vryheidsfront Plus se beeld as ‘n sterwende party wat bestaan uit ‘n paar professionele politici, te red, sê Gibson Hofmeyr se Rooi Oktober-beweging sal niks oplewer nie, ten spyte van baie wye mediadekking.

Hofmeyr, sê Gibson, het ‘n interessante geskiedenis. Hy was op skool saam met sy pa, ook Steve, en saam met sy oom, Danny de Waal. Generaal Louis Botha, die eerste Eerste Minister van die Unie van Suid-Afrika, was hul grootoupa, en Helen de Waal, Louis Botha se dogter, was hul ouma .

Sy was ‘n merkwaardige matriarg en die Verenigde Party se staatmaker. Die Suid-Afrikaanse Party van destyds onder Botha wou Afrikaners en Engelssprekende wit Suid- Afrikaners saamsnoer teen die Nasionale Party.

Gibson ken nie sy geskiedenis nie. Hy vergeet gerieflikheidshalwe dat Hofmeyr se gelyknamige voorsaat ook die Ossewabrandwag se Stormjaers onder Britse invloed uitgelei het. Wat as ‘n “uitlaatklep” moes dien vir anti-Britse sentiment, het vinnig onder Hofmeyr se leierskap tot ‘n gedugte nasionalistiese voorhoede gelei.

Die Vaderland se eerste sportredakteur was sekerlik een van die merkwaardigste.

Nie net het hy die Universiteit van Oxford in 1930 in die Intervarsity teen Cambridge op die rugbyveld aangevoer nie, hy was ook die owerste van die Ossewa-Brandwag se paramilitêre elitekorps, die Stormjaers, wat sabotasie tydens die Tweede Wêreldoorlog uitgevoer het.

Met sy Oxfordse agtergrond sou niemand dit kon dink nie. Hy het die perfekte dubbele lewe gelei deur vryelik in hoëre Engels-sprekende kringe te beweeg, terwyl hy terselfdertyd die bedrywighede van die Stormjaers gekoördineer het

Volgens Gibson slaag Hofmeyr nie soos Louis Botha daarin om dit te vermag nie, omdat hy “verhuis het na ‘n posisie aan die regterkant van ons politiek, tot so ‘n mate dat hy deur baie, regverdig of onregverdig, as ‘n rassis afgemaak word”.

Nietemin glo Gibson dat alhoewel jonger Afrikaners politiek verwerp as irrelevant, en belowe om weg te bly van die stembus, hulle waarskynlik vir die “rassis” Steve Hofmeyr sal stem, as hy staan.

Sal die VF + probeer om hom op hul verkiesingslys te sit en hom gebruik om hulself te red? Gibson dink nie Hofmeyr sal dit oorweeg nie aangesien Pieter Mulder se omhelsing van President Zuma noodlottig was.

Volgens Gibson is daar geen politieke voertuig meer vir die ondersteuners van Rooi Oktober nie.

‘n Konfederale staat is nie haalbaar nie, weens die tweederdemeerderheid wat ‘n wysiging van die Grondwet vereis in die parlement, en is wat Gibson betref onoorkombaar. Dit is des te meer onhaalbaar as regse kiesers die politieke proses boikot en wegbly van die stembus, sê hy.

Gibson troos homself dat die ondersteuning vir só ‘n siening klein is en die oorweldigende meerderheid van Afrikaanse kiesers sal voortgaan om vir die Demokratiese Alliansie te stem in plaas daarvan om “onbereikbare nonsens” na te jaag.

‘n President Steve Hofmeyr sal daar nie wees nie, belowe Gibson.

ANC gaan by Amerikaanse Kongres kla oor terreurlys

Suid-Afrika se ambassadeur in Amerika, Ehrahim Rasool, sê hy werk daaraan om die Amerikaanse Kongres te oorreed om die kwessie van Suid-Afrikaners – wat steeds op die Amerikaanse terreurlys is – omvattend te bespreek.

Tot 1989 is die ANC deur die Pentagon en die CIA gelys as ‘n terroristeorganisasie. In 2002 is ‘n Amerikaanse visum aan Tokyo Sexwale geweier as gevolg daarvan, ‘n “fout” wat toe glo reggestel is.

In werklikheid is hy destyds ‘n visum geweier na die Verenigde State van Amerika omdat hy, saam met baie bekende Suid-Afrikaanse anti-apartheidsterroriste soos Nelson Mandela en voormalige Suid-Afrikaanse minister Sidney Mufamadi, steeds op dié land se lys van globale terreur verskyn het.

Na die inisiëring van regstappe teen die US Department of State en die persoonlike ingryping deur Condoleezza Rice, het Sexwale en die ander in 2002 tien jaar kwytskelding van die Amerikaanse Departement van Binnelandse Veiligheid ontvang.

Die VSA het het aangedui dat om Sexwale permanent van die lys te verwyder sal beteken dat die wet verander sal moet word, wat ‘n tydsame proses mag wees.

Die kwytskelding is opgehef in 2008 en al die ANC-lede wat ook Nelson Mandela insluit, is verwyder van die lys van terroriste in die VSA.

Die voormalige Minister van Behuising, Tokyo Sexwale, is egter verlede week weer op New York se JFK-lughawe in hegtenis geneem is nadat beamptes sy naam op die lys gekry het.

Sexwale was lid van Umkhonto we Sizwe wat verskeie terreuraanslae teen onskuldige burgerlikes en kinders geloods het.

Rasool sê sy ambassade het geen toegang tot die lys wat in die besit is van die Departement van Binnelandse Veiligheid nie en kan dus slegs bespiegel wie op die lys is.

Die ANC het intussen gesê Sexwale se aanhouding noodsaak ‘n onvoorwaardelike verskoning van die Amerikaanse regering.

Boeremaglede vandag gevonnis

Die 20 veroordeelde mans in die dekadelange Boeremagverhoor sal vandag weet wat hulle lot gaan wees wanneer regter Eben Jordaan sy vonnisoplegging voortsit.

Die regter het gister sy vonnisoplegging in die Noord-Gautengse Hooggeregshof in Pretoria opgeskort, nadat hy eers die getuienis ter versagting en verswaring van vonnis opgesom het.

Die Boeremaglede is reeds skuldig bevind aan hoogverraad nadat hulle beplan het om die regering met geweld omver te werp.

Vyf van hulle staan ook tereg op aanklagte van strafbare manslag. Een van die mans, Lets Pretorius, sê hulle weet nie wat om te verwag nie.

Ander Boeremaglede het egter gesê dat die regter hulle reeds gewaarsku het dat hulle baie swaar vonnisse kan verwag want hy wil graag ‘n “voorbeeld” van hulle maak sodat ander Afrikaners dit nie waag om in opstand te kom teen die regering nie.

Wat het Jaco Mulder op Daspoort gesê?

“Ek gun dit nie vir Steve Hofmeyr om in die politiek te wees nie.” Só het mnr. Jaco Mulder, Gautengse leier van die Vryheidsfront Plus op Saterdag 26 Oktober 2013 in die AGS-kerk op Daspoort, Pretoria gesê.

In kommentaar wat gister op PRAAG se kommentaarafdeling geplaas is, skryf Mulder:

Ek stel dit sonder vrees vir teenspraak reguit aan Dan Roodt dat hy ‘n leuen verkondig op Praag, ek het dit nie gese nie. Ek het wel gese dat die volk dikwels van sterk leiersfigure soos Steve Hofmeyr en Louis Luyt verwag om die partypolitiek te betree om ‘n verskil te maak en dat mense soos Steve Hofmeyr en Louis Luyt eintlik ‘n ander nering het omdat deelname aan die Suid Afrikaanse partypolitiekestelsel ook behels dat jy jou dae in vervelige debatte moet deurbring wat nie noodwendig handel oor dit waaroor jy oorspronklik betrokke geraak het nie. Louis Luyt het na die ontnugtering wel na 1999 die parlement verlaat. Hierdie leiers kan ander mediums meer effektief gebruik soos byvoorbeeld Praag, Afriforum en ander.

Tydens Jaco Mulder se toespraak het ons notas bygehou; vandaar bogaande verbatim-aanhaling uit sy rede. Net voor die gedeelte waar Mulder na Steve Hofmeyr en Louis Luyt se deelname aan politiek verwys het, het hy gesê: “Sommige mense betree die politiek terwille van hul ego’s.” Binne die konteks van sy daaropvolgende kommentaar oor Hofmeyr en Luyt, moet dit dus as verdere sydelingse kommentaar op nie-beroepspolitici soos sangers of sakemanne gelees word. Hy het ook beklemtoon dat mnr. Louis Luyt “net drie maande in die parlement gehou het”, waarna sy setel aan iemand anders oorhandig is.

Sodat lesers self ‘n oordeel oor Jaco Mulder se toespraak kan vel, gee ons die res van die toespraak so volledig as moontlik hier weer.

“Afrikaners is plesierig… en dan maak hulle só. Soms stem hulle ook vir die DA. Hulle verkeer gesellig, hou van sport, die natuur, jag en kunstefeeste. Ons ontwikkel tegnologie: die eerste hartoorplanting is deur Chris Barnard, ‘n Afrikaner, gedoen.

“Ons maak geskiedenis, soos die republiek wat in 1961 tot stand gekom het. Sedertdien was daar egter ‘n totale magsoorgawe. Ons situasie is een van Afrikaner-onmag.

“Ons werk hard, maar brand uit.

“Op bladsy drie van Beeld verskyn daar ‘n berig oor ‘n Amerikaner wat oor Pretoria se standbeelde praat. Standbeelde van Paul Kruger moet afgebreek word.

“‘Net so sê prof. Makgoba (van die universiteit van Kwazulu-Natal): “Afrikaans is ‘n kanker.” Ook Jonathan Jansen is anti-Afrikaans. Die Vryheidsfront doen nie net dinge wat ‘n politieke party doen nie, hy moet ook ‘n stryd stry rondom taal en kultuur.

“Ek het nou na Deon Oppperman se reeks Donkerland (op KykNET) gekyk. Ek wil sê: Deon, jy is soos Malema. Dis ‘n skewe beeld van die Afrikaner wat jy oordra.

“Party van ons mense emigreer en doen afstand van hul identiteit. Party van ons verengels en stuur ons kinders na Engelse skole.

“Die DA is besig om te afrikaniseer. Hul party het ons stemme nie meer nodig nie. Ek noem die DA ‘n ‘liberaal-Afrikanistiese party’.

“Die Afrikaner het in 1994 sy politieke vryheid verloor.

“Ek wil ons leiers kritiseer: hulle moet om ‘n ronde tafel sit en vergader, hul verskille uit die weg ruim.

“Dit is noodsaaklik dat daar in elke stadsraad ‘n Vryheidsfrontlid moet wees.

“Ons is Euro-Afrikane. Ons woon in Afrika, maar het ‘n Westerse kultuur. Ons staan vir minderheidsregte, taal en kultuur. Die Vryheidsfront Plus is die laaste bastion van Westerse Christelike waardes in Suid-Afrika. Indien ons nie herkies word nie, sal ons uit die openbare lewe verdwyn. Daarmee saam sal die finansies verlore gaan (wat ons stryd aan die gang hou).

“Daar is mense wat by die politiek betrokke raak vir hulle ego’s.

“Mense kom na my toe en sê: Steve (Hofmeyr) moet parlement toe gaan. (Maar) ek gun hom nie om in die politiek te wees nie. Ek hou van Steve, maar neem nou maar die voobeeld van Louis Luyt. Min mense weet dat hy ‘n stigterslid van die DA was. Toe hy sien waarheen die DA op pad is, het hy en die Federale Alliansie na die Vryheidsfront Plus toe oorgeloop. Om in die politiek te wees, beteken dat jy jou dae in vervelige debatte moet deurbring wat nie noodwendig handel oor dít waaroor jy oorspronklik betrokke geraak het nie.

“Louis Luyt het net drie maande in die parlement gehou, toe sien hy nie meer daarvoor kans nie. Dit is toe aan iemand anders oorgegee wat sy termyn voltooi het.

“Ons beskik oor ‘n vyfpunt-aksieplan wat ons verkiesingsplan uitmaak.

“Mense besef nie watter rol ons agter die skerms speel om Afrikanerbelange te beskerm nie. Sonder ons sou Kleinfontein lankal in die moeilikheid gewees het. Op 30 Oktober gaan die portefeuljekomitee (van die provinsie Gauteng) weer Kleinfontein besoek.

“Mense is onbetrokke. Hulle wil liewer ander dinge doen.

“Die Vryheidsfront moet deel word van die hoofstroomdebat in die land.”