Kategorie: Suider-Afrika

‘n Top ANC-LP is aangerand en bewusteloos gelaat in ‘n wrede huisaanval in Kaapstad, het die polisie gister gesê. Sue van der Merwe is gered deur haar seun wat die twee indringers by haar Rondebosch huis onderbreek het.

Sy is Vrydagaand net voor 21:00 aangeval , het die polisiewoordvoerder kapt. Frederick van Wyk gesê.

“Twee mans het haar aangerand en verwurg totdat sy haar bewussyn verloor het. Die verdagtes het gevlug toe haar seun by die huis kom.”

Van Wyk het gesê die boewe het in ‘n silwer Hyundai gevlug. Bankkaarte word uit die huis vermis. Hy kon nie sê hoe ernstig Van der Merwe beseer is nie.

Die 58-jarige LP het vir die Black Sash in Kaapstad tussen 1988-1991 gewerk. Sy het ‘n LP in 1996 geword en het gedien as adjunk-minister van buitelandse sake tussen 2004-2009. Sy was ‘n parlementêre raadgewer vir die president tussen 2001-2004. Volgens die nuutste polisiemisdaadstatistieke, is huisbrake en diefstal die mees algemene misdaad in die woonbuurt.

Tussen April 2011 en Maart 2012, is daar 350 inbrake, 321 diefstalle van motors en 429 ander diefstalle by die Rondebosch-polisiekantoor aangemeld.

“Ek wens Madiba sterf nou.” Blykbaar het prof. Jonathan Jansen, rektor van die Universiteit van die Vrystaat (UV), genoeg gehad van die swart leier.

“Wens julle nie ook hy wil nou doodgaan nie?” het Jansen gesê. Hy het sowat 250 leerlinge by ‘n leiersberaad op die kampus toegespreek, het Volksblad berig.

Sy gehoor het glo geskok na hom gestaar. Jansen se oproep dat Mandela die tydelike met die ewige moet verwissel, was blykbaar nie weens enige ideologiese verskille wat Jansen koester nie, maar bloot ‘n skerp aanval op ouderdom. Hy was later nie vir kommentaar beskikbaar nie.

“Elke keer hoor ons hy is in die hospitaal en almal dink hy gaan dié keer sterf. ‘Big’ Mac (Mac Maharaj, die presidensiële woordvoerder) lieg as hy sê Madiba gaan vir roetine-ondersoeke.

“As jy 94 is, gaan jy hospitaal toe om dood te gaan; nie vir roetinetoetse nie,” het Jansen gesê.

Jansen het weereens verdere bewys gelewer van waarom hy nie by ‘n opvoedkundige instelling hoort nie. Hy het ook uitgevaar teen Qamran Tabo, studente-joernalis aan die Universiteit van Kaapstad (UK), wat ‘n meningspeiling oor die aantreklikste ras gedoen het.

“Wat de fok het die student gedink? Oh, my God! As sy een van mý studente was, het sy baie groot moeilikheid gehad.”

Hy het ook gesê hy verstaan nie waarom het die UK-bestuur verskoning gemaak nie.

“Hoekom verskoning vra omdat swart studente gesê het wit studente is aantrekliker?”

Jansen het die algehele gebrek aan leierskap in Suid-Afrika gekritiseer. “In die Katolieke Kerk word honderde seuns elke week gemolesteer deur priesters; daar is ‘n tekort aan leierskap in die kerk.”

Volgens die rektor is die slagting by Marikana en in die Sentraal-Afrikaanse Republiek die skuld van politici.

Al meer boodskappe van ondersteuning vir oudpres. Nelson Mandela was teen Sondag by sy huis in Houghton te sien.

Meer klippe met boodskappe van ondersteuning is voor die huis gepak waar Mandela aansterk ná hy uit ‘n hospitaal in Pretoria ontslaan is. Al die boodskappe was in Engels.

“As dit van ons afgehang het, sou ons jou vir altyd wou hou,” het ene Mally Mokoena geskryf.

“Jy is ons inspirasie,” het ‘n boodskap op ‘n ander klip gelui.

Mandela is Saterdag ontslaan ná hy nege dae behandel is vir ‘n longinfeksie.

‘n Wag op die straathoek het sake dopgehou terwyl joernaliste, kameramanne en fotograwe in die gebied rondgestaan het.

‘n Groep joernaliste het ‘n tent opgeslaan, met kameras reeds op die huis se oprit gerig.

‘n Paar motors was buite die Mandela-woning geparkeer, een van hulle met ‘n militêre nommerplaat.

Lede van die publiek het stadiger gery en foto’s geneem.

Mandela se kleinseun, Mandla, het gesê die familie is diep geraak deur die gebare van ondersteuning.

“Die afgelope paar dae, sedert Madiba in die hospitaal opgeneem is, is die familie diep geraak deur die uitstorting van gebede en die oorweldigende boodskappe van goeie wense van alle Suid-Afrikaners en ons internasionale vriende,” het hy in ‘n verklaring gesê.

‘n Ondersoek is van stapel gestuur ná sewe mense beseer is toe ‘n hysbak by ‘n parlementsgebou onklaar geraak het, het die departement van arbeid gesê.

“Ondersoekbeamptes van die [departement van] arbeid het met ‘n ondersoek begin na die ongeluk en sal binnekort aan die minister, Mildred Oliphant, verslag doen,” het Musa Zondi in ‘n verklaring gesê.

Sewe skoonmakers is beseer weens ‘n probleem met die hysbak Vrydagaand.

Luzuko Jacobs, woordvoerder vir die parlement, het aan die SABC gesê die kontrakwerkers is na ‘n hospitaal geneem ná die ongeluk in die Marks-gebou.

Die gebou, wat die SABC se ateljees en kantore vir opposisiepartye huisves, is afgekordon tot ingenieurs kon vasstel of die hysbakke veilig is vir gebruik.

Dit is steeds nie duidelik presies hoe die werkers beseer is nie.

Die Suid-Afrikaanse Nasionale Weermag (SANW) sal troepe na die Demokratiese Republiek van die Kongo stuur as deel van ‘n mag van die Verenigde Nasies, het die weermag Sondag bevestig.

“Ja, die Suid-Afrikaanse regering sal soldate stuur of sal soldate bydra tot die Verenigde Nasies se ingrypingsmag in die oostelike DRK,” het bgir.genl. Xolani Mabanga gesê.

“Die VN se Veiligheidsraad het verlede week ‘n resolusie aanvaar wat die ontplooiing van ‘n ingrypingsmag in die ooste van die DRK goedkeur. En die regering van Suid-Afrika het beloof om soldate vir daardie mag by te dra,” het hy gesê.

Mabanga het gesê daar is nog nie besonderhede oor wanneer en hoeveel soldate na die DRK gestuur sal word nie.

“Dit sal alles gesien word in die Verenigde Nasies se magstruktuur,” het hy gesê.

City Press en Rapport het Sondag berig dat Suid-Afrikaanse soldate in die ooste van die DRK ontplooi sal word, waar hulle teen die M23-rebellegroep sal veg.

Die Minister van Landelike Ontwikkeling en Grondhervorming, Gugile Nkwinti, sê van die meer as 81000 grondeise wat landwyd ingedien is, is slegs 8 700 nog uitstaande.

Nkwinti sê hoewel die oorblywende eise ingewikkeld is, is die gebrek aan vaardighede by staatsamptenare ook ‘n bydraende faktor tot die vertraging om die eise af te handel.

Nkwinti het ook gesê die indiening van grondeise sal in Junie heropen word, wanneer dit die 100 jarige herdenking is van die wet op Naturellegrond, wat mense hulle grond ontneem het.

Die ANC het op sy konferensie in Mangaung besluit dat die indiening van grondeise heropen sal word vir diegene wat die spertyd in 1998 misgeloop het.

Die Grondwethof het beslis dat Robert McBride wel ‘n moordenaar en misdadiger genoem mag word. Dit is ‘n slag vir nasionale eenheid, het die ANC in reaksie gesê.

“Die beslissing deur die Grondwethof heropen die wonde van so baie mense wat hul families verloor het, verhoor, verban, aangehou, vermink en doodgemaak is,” het mnr. Gwede Mantashe, sekretaris-generaal van die ANC, in ‘n verklaring gesê.

Die hof het beslis dat The Citizen McBride ‘n moordenaar en misdadiger mag noem, ten spyte daarvan dat die Waarheid-en-versoeningskommissie (WVK) aan McBride amnestie vir die Magoo’s Bar-bomontploffing in Durban gegee het.

Mantashe het gesê: “Die spraakvryheid-oorwinning waarop The Citizen aanspraak maak, is van verbygaande aard, wat nie die saak van versoening en nasionale eenheid bevorder wat die Waarheid-en-versoeningskommissie wou teweegbring nie.”

Mantashe het gesê die verlede kan nie ongedaan gemaak word nie, en die kommissie het mense hoop gegee.

“In die geval van kameraad McBride het hy voor die WVK verskyn, ‘n volle blootlegging gedoen en om verskoning gevra en amnestie is vir hom aangebied.

“Die besluit van die konstitusionele hof suggereer die edele proses het tragies verlore gegaan wat ons land deur die WVK aan individue soos kameraad Mc­Bride, asook mense wat apartheidgruwels gepleeg het, gebied het.”

Die ANC het ‘n beroep op Suid-Afrikaners gedoen om die bevindings van die hof te respekteer en in gelyke mate die “traumatiese WVK-proses” waarin amnestie aan McBride en ander toegestaan is, te respekteer.

“Ons moet ons daarvan weerhou om die uitkoms van die WVK-proses te ontken deur dié wat daarvoor verskyn en kwytskelding gekry het, moordenaars te noem sonder rede of besorgdheid oor nasionale eenheid en nasiebou.

“Laat ons nie die proses van vrede en versoening wat aan ons gegun is, ondermyn nie,” het Mantashe gesê.

Die hof het verlede week beslis dat die Versoeningswet nie die feit dat McBride moord gepleeg het, onwaar maak nie. Die wet verbied nie openlike openbare bespreking van sy daad nie en keer ook nie dat hy as ‘n “misdadiger” beskryf kan word nie.

Die Universiteit van Kaapstad se studentekoerant, Varsity News, is in die sop oor ‘n grafiek wat die “aantreklikste ras” as wit aandui.

Die sirkeldiagram getiteld “UCT stem vir die aantreklikste ras”, gee ‘n keuse van wit, Indiër, bruin, Afrikaan, Asiaties en gemengde herkoms.

Volgens die peiling dink die meeste studente (38%) dat wittes die mooiste is, terwyl die minderheid (8%) vir swartes gestem het.

Die grafiek verskyn saam met ‘n artikel deur ‘n student, Oamran Tabo, wat onderhoude met sestig mense (tien uit elke rassegroep), gevoer het.

Volgens die Varsity News-redakteur, Alex Nagel, het die artikel die invloed van ras op sosiale strukture in die era ná apartheid blootgelê.

Nagel het die besluit om die artikel te publiseer, verdedig: “Dit was ‘n opiniestuk wat uit konteks gehaal is.Varsity News is ‘n platform vir mense om kwessies en die gemeenskap te bespreek,” het sy aan News24 gesê.

“Baie studente by die universiteit het egter negatief gereageer oor die artikel en voel aangeval en beledig,” het Nagel bygevoeg.

Die koerant het Donderdag ‘n verskoning uitgereik.

Pretorianers moet self die grafte van hul afgestorwenes grawe, aangesien ‘n kontrak met die Tshwane-metroraad se grafgrawers verstrek het.

Begrafnisondernemers het ontdek dat grafgrawers by al die Tshwane-metroraad se begraafplase reeds aan die einde van Maart hul gereedskap neergelê het, het The Times Donderdag berig.

Dit beteken dat die begrafnisondernemers en die familie en vriende van afgestorwenes self grafte moet grawe en toegooi.

Elsabe Basilio, die voorsitter van die nasionale begrafnisdirektoraat, het gesê die situasie is ontstellend.

“Begrafnisse kan nie uitgestel word nie. Ek het onlangs ‘n begrafnis gehad waar ek en my personeel spesiaal vroeër moes opdaag om ‘n graf te grawe,” het sy gesê.

Basilio het gesê in sommige gevalle moet familielede die grafte grawe, omdat daar niemand anders is om dit te doen nie.

Sy het gesê een begrafnisondernemer het Woensdag ‘n liggaam in ‘n oop graf net so gelaat en gesê die metroraad moet hul eie probleme uitsorteer.

Volgens Basilio het die Tshwane-metroraad se kontrak met die kontrakteur Desember geëindig.

“Die kontrakteurs het intussen ooreengekom om uit te help terwyl die metro besig was met ‘n nuwe tenderproses. Die kontrakteur is egter vir die afgelope drie maande nie betaal nie en weier om verder te help,” het sy gesê.

Basilio se organisasie gaan Donderdag ‘n dringende aansoek by die Pretoriase hooggeregshof indien om die munisipaliteit te dwing om grafgrawers te huur.

‘n Woordvoerder van die Tshwane-metroraad, Nomasonto Ndlovu, het gesê die raad is nie bewus van die situasie nie.

Ongeveer 60 mense het Donderdag buite die Hillbrowse landdroshof betoog voor die verskyning van ‘n man wat daarvan beskuldig word dat hy ‘n skildery gevandaliseer het.

Die groep eis dat Louis Mabokela, wat aangekla is nadat hy verlede jaar die omstrede skildery The Spear in die Goodman-galery in Johannesburg beskadig het, vrygelaat word.

“Louis yo hana molato. Molokolleng [Die Louis is nie skuldig nie. Laat hom vry],” het die groep buite die hof geskree.

Die meeste van hulle het geel ANC-T-hemde gedra.

Volgens ‘n woordvoerder vir Mabokela se familie het sowat 200 ondersteuners in 15 minibusse vanaf Limpopo na Johannesburg gereis.

Die ondersteuners het in motors geslaap om Donderdag betyds te wees vir die saak.

Mabokela het Woensdag onskuldig gepleit op aanklag van saakbeskadiging.