Zille oorweeg koalisie met ANC

Zille se ondersteuners in Bekkersdal
Zille se ondersteuners in Bekkersdal

Aangesien daar van Helen Zille se beloftes om Gauteng oor te neem dadels gaan kom volgens die jongste syfers, oorweeg die DA ‘n koalisie met die ANC, het die DA-leier Donderdag gesê.

Helen Zille sal die wedloop vir Suid-Afrika se rykste provinsie na verwagting ver verloor, maar sy oorweeg tans ‘n koalisie met die regerende party in die provinsie.

Die DA wil duidelik die opkoms van die EFF gebruik om vir hulself posisies en portefeuljes in die ANC te beding. Dit is nie meer duidelik hoe die party die ANC sogenaamd gaan teenstaan oor beweerde korrupsie met hul jongste koalisievoorstelle nie.

Daar heers groot druk op die DA om hul beloftes van posisies aan swart lede op die kandidatelys na te kom en Zille sien samewerking waarskynlik as ‘n manier op dié kopseer op te los.

‘n Lae stempersentasie in Gauteng sou die DA effens bevoordeel het, maar dit blyk dat die kiesers in groot getalle gaan stem het, wat die ANC sal help om hul meerderheid te behou.

Pansy Tlakula, die voorsitter van die Onafhanklike Verkiesingskommissie het bevestig dat die uiters hoë opkoms in stedelike gebiede ‘n “dringende uitdaging” vir die OVK inhou.

“Dit moet onthou word dat ons die hoogste aantal geregistreerde kiesers van 25,3 miljoen in Suid-Afrika se geskiedenis het,” het Tlakula in Pretoria gesê.

Onder diegene wat as kiesers geregistreer het, was 634.000 sogenaamde “born frees”, kinders wat gebore is na die einde van apartheid.

Kommentators het voorspel dat ‘n hoë opkoms kiesers die ANC sal bevoordeel.

Zille het samewerking tussen die DA en ANC in Gauteng in die vooruitsig gestel “om die EFF uit die regering te hou”.

Die nuutste Sunday Times Ipsos-opname het aangedui dat die EFF waarskynlik die derde meeste stemme sal kry in Gauteng.

Die ANC het Gauteng gemaklik in die 2009-verkiesing ingepalm met 64,76 % van die provinsiale stemme teenoor die DA se 21,27 %.

Die ANC sal na verwagting 60% van die stemme of meer in Gauteng kry, volgens ‘n Ipsos-opname van vroeg in April. Slegs 29,2% het aangedui dat hulle vir die DA in Gauteng sal stem.

Desnieteenstaande het die DA aan kiesers vertel dat hulle ‘n goeie kans staan om in Gauteng te wen.

Die ANC-woordvoerder en Nasionale Uitvoerende Komiteelid Jackson Mthembu het gesê daar is tans geen sprake van ‘n koalisie nie.

Die EFF-leiers het Woensdag ook gesê hulle sal nie oorweeg om ‘n koalisie in Gauteng aan te gaan nie.

Hoewel stem glad verloop het in die belangrikste gebiede, was die verkiesing nie sonder voorvalle nie. Die OVK het gesê dat 97 mense, insluitende verkiesingsbeamptes, in hegtenis geneem is vir ongerymdhede.

Zindzi Mandela se man, voormalige MK-soldaat Molapo Motlhajwa, is in hegtenis geneem nadat hy na bewering probeer het om die polisie te dwing om hom in ‘n operasionele kiessentrum in Noordwes toe te laat.

‘n Woordvoerder van die polisie, brigadier Thulane Ngubane het gesê die verdagte wat gewapen was, het daar opgedaag in ‘n SANW-voertuig.

In Bekkersdal aan die Wes- Rand, het betogers klippe na die polisievoertuie gegooi en OVK-tente op die vooraand van die verkiesing aan die brand gesteek.

Meer as 40 mense is in hegtenis geneem in verband met ‘n brand by ‘n stemlokaal in die Mandlazini-gebied naby Richardsbaai aan die KwaZulu-Natalse noordkus.

Die groep van 300 het Dinsdag saam oproerig geraak en die gemeenskapsaal, wat as stemlokaal gebruik sou word, aan die brand gesteek.

Kiesers moes onder polisietoesig hul kruisies trek en die wat nie wou stem nie, het buite die stemlokaal die stemmers gekoggel.

Die stemtellery by al agt stempunte in Lorraine en omliggende gebiede buite Tzaneen in Limpopo is afgehandel nadat die stemmery meer as vier ure vertraag is toe die polisie en die OVK-beamptes nie die stemlokale weens oproer kon bereik nie.

Min kiesers het op stemdag opgedaag. Die situasie in die gebied het Donderdag na kalm teruggekeer.

Wenners en verloorders

Die DA pluk die vrugte van onrus in De Doorns
Die DA pluk die vrugte van onrus in De Doorns

Cope sal as die grootste verloorder in Dinsdag se verkiesings uittree. Dit lyk asof die party ‘n aansienlike aantal setels in die parlement en verskeie provinsiale wetgewers gaan verloor.

Nog syfers wat ingekom het toon dat die EFF die derde grootste party nasionaal gaan wees. In Noordwes lyk dit tot dusver of die EFF die amptelike opposisie sal wees.

Na die verkiesings in 2009 was Cope die derde grootste party in die parlement met 30 setels. Indien die huidige neiging voortduur, sal Cope se steun van sewe komma vier twee persent in die vorige verkiesing daal tot minder as ‘n persent in vanjaar se verkiesing.

As die stemtellery korrek is, lyk dit asof die DA steeds die amptelike opposisie in al die provinsies sal wees, behalwe in die Wes-Kaap.

Na oproer deur seisoenale werkers van De Doorns in die provinsie in 2012 – wat voor die deur van die ANC gelê is – het kiesers teen die regerende party gestem.

Dit wil dus voorkom asof die onrus die DA in die Wes-Kaap bevoordeel het.

Volgens die stempatroon tans sal die ANC die hoofopposisie in dié provinsie bly.

Die ANC loop tans nasionaal voor met ‘n derde van die stemme wat getel is. Nege-en-twintig politieke partye het aan vanjaar se verkiesing deelgeneem.

Provinsiale uitslae van die verkiesing begin nou instroom en in Gauteng is 15 persent van die stemme getel. ‘n Kort rukkie gelede het die ANC ver voorgeloop, gevolg deur die DA en dan die EFF in die derde plek.

Daar is tans sowat 1% van die stembriewe wat bederf is.

Die ANC kan setels in Mpumalanga verloor maar sal volgens aanduidings steeds ‘n tweederde meerderheid behou in die provinsie.

Die ANC het in die 2009 verkiesing 27 van die 30 setels in die provinsie bekleë, maar nog nooit minder as 80-persent van die stem gehad nie. Die stempersentasie in die provinsie is tot dusver net meer as 73 persent.

 

Organiseerder van oproer in Wes-Kaap is DA-lid

Wie het Poni se kaartjie betaal na Londen?
Wie het Poni se kaartjie betaal na Londen?

Nege jaar gelede het Mzonke Poni die Wes-Kaap se eerste opstande georganiseer, oop stukke grond beset, en paaie met klippe en brandende bande versper. Vandag is hy ‘n lid van die DA.

Poni was ook op die voorpunt van die gewelddadige oproer en plundery in Kaapstad.

Hy het Londen besoek waar hy insgelyks op die voorpunt van die Occupy-beweging was. Poni word onder Brittanje se ver-linkses as ‘n leidende figuur in die organisering van opstand, weerstand en grondbesetting beskou.

“Dit is ‘n besluit wat ek geneem het op ‘n persoonlike vlak. Die besluit om by die Demokratiese Alliansie te sluit, is ‘n besluit wat kom uit my hart,” sê Poni.

Die DA hoop dat met Poni se werwing die party vordering sal maak in Kaapstad se swart lokasies, veral in Khayelitsha, waar die ANC tot 95 % van die stemme kry.

Tot ‘n paar maande gelede Poni was ‘n lid van Julius Malema se EFF

Poni het gesê hy het besluit om by die DA aan te sluit omdat hy glo dat hy beleidmakers kan beïnvloed om die opstande uit te brei.

Abahlali baseMjondolo (ABM) se voorsitter Sbu Zikode was ook op die gesamentlike nuuskonferensie met Poni se oorlopery na die DA, ‘n besluit wat hy as “dapper” beskryf.

Die konsensus in die ABM-beweging wat op grondgryp, ongelykheid en armoede fokus, is om die DA te ondersteun.

Zikode het gesê: “Hierdie besluit kom nadat Abahlali die Demokratiese Alliansie noukeurig bekyk en met ander politieke partye vergelyk het.”

Die burgemeester van Kaapstad, Patricia de Lille het gesê die stad sal die beskikbaarheid van grond vir armes met ABM bespreek .

“Ons sal ook kommunikeer met Abahlali oor die planne wat ons het vir informele nedersettings, sodat hulle ons kan help om die ontwikkelingsplanne aan hul lede te kommunikeer, en ons sal ook die Marikanagrondbesetting bespreek. Dit sal ons doen na die verkiesing,” het De Lille gesê.

Onrus in Limpopo en Oos-Kaap dag voor verkiesing

sterkspruit2Diegene wat vir spesiale stemme geregistreer is, sal vandag landwyd voortgaan om te stem.

Die Onafhanklike Verkiesingskommissie sê die proses het to dusver hoofsaaklik sonder probleme verloop ten spyte van onrus op Lorainne en Malamulele in Limpopo en Sterkspruit in die Oos-Kaap.

In die Wes-Kaap het bykans 34.000 mense vir spesiale stemme geregistreer.

Die provinsiale kiesbeampte, Courtney Sampson, sê hulle maak gereed vir verkiesingsdag Woensdag.

Die Oos-Kaapse LUR vir plaaslike regering, Mlibo Qhoboshiyane, het sy kommer oor die hoë vlakke van intimidasie op Sterkspruit uitgespreek.

Inwoners, veral UDM-lede, eis ‘n alleenstaande munisipaliteit omdat hulle nie die Senqu Plaaslike Munisipaliteit bedien wil word nie.

‘n Skoolbiblioteek wat as stemlokaal gebruik sou word, is vroeër aan die brand gesteek terwyl winkels en banke in die sentrale sakegebied gesluit is. Die gebied het 76 stemlokale.

Qhoboshiyane het kiesers gevra om kalm te bly.

 

Swart aanvallers slaan witte in Levubu dood

Levubu’n Wit inwoner van Levubu in Limpopo, Hannes Kelly (52) is dood nadat drie swart mans hom glo met ’n hamer en stokke aangeval het.

Kelly is ná die aanval vir dood agtergelaat. Hy het die Beauford-winkel, wat onder meer meel verkoop, besit.

Hy het twee dae lank met ernstige beserings in sy huis gelê sonder hulp. ’n Vriend het eers Saterdag op hom afgekom.

Kol. Ronel Otto, provinsiale polisiewoordvoerder, het gesê die drie swartes het gevlug met R20 000 wat hulle uit die kluis gesteel het.

Die erg beseerde Kelly se selfoon is glo ook gesteel sodat hy nie hulp kon ontbied nie.

Kelly het een van die aanvallers herken en beskryf voor hy dood is. Die swarte werk glo in die omgewing.

Kerlly is weens inwendige bloeding en bloeding op die brein gehad Sondag oorlede.

Boere in die omgewing het gesê hy het nie aan ’n plaaswag behoort nie.

Otto het gesê ’n polisietaakspan ondersoek die aanval. Niemand is in hegtenis geneem nie.

Naspers-subkontrakteur doodgeskiet

Aliwalstraat, Bloemfontein
Aliwalstraat, Bloemfontein

’n Subkontrakteur van Naspers is gister in ’n rooftog in ’n parkie in Bloemfontein doodgeskiet.

Die park is naby die kruising van Harry Smith- en Aliwalstraat.

Johannes Rondganger (54) was in sy bakkie besig was om geld te tel voordat hy straatverkopers sou betaal.

Volgens die Volksblad vir wie Rondganger gewerk het, kon die rowers enige bedrag tussen R5.000 en R10.000 by Rondganger geroof het.

Lt.kol. Annelie Wrensch, polisiewoordvoerder, sê Rondganger wou die koerantverkopers betaal toe vier gewapende swart mans op hom toegeslaan het.

Hy is na bewering geskiet nadat hy die buit aan hulle oorhandig het, sê sy.

Die vermoede bestaan dat die aanvallers Rondganger dopgehou het uit ‘n voertuig in die parkie. Rondganger is na bewering voorheen gewaarsku om nie met geld na die parkie te gaan nie.

Die aanvallers het Rondganger in die bors geskiet.

Niemand is nog in hegtenis geneem nie en klagtes van moord en gewapende roof word ondersoek.

Uitspraak oor Limpopo-handboeke verwag

handboeke2Die hooggeregshof in Pretoria sal na verwagting Dinsdag uitspraak lewer oor die handboekfiasko in Limpopo.

‘n Aansoek om die onderwysdepartement in Limpopo te dwing om uitstaande handboeke af te lewer, is by die hof ingedien.

Die gemeenskapsorganisasie Basic Education for All (Befa) het die aansoek gebring nadat die departement van onderwys erken het dat honderdduisende handboeke eers laat bestel is weens begrotingsbeperkings.

Die bestellings is eers in April ingedien. Volgens die departement wag hulle steeds vir die aflewering van 158 000 handboeke.

Befa het aansoek gedoen vir ʼn hofbevel om die departement te dwing om te hou by sy spertyd van 6 Junie om alle uitstaande handboeke af te lewer.

Hulle eis dat die departement in die toekoms soortgelyke situasies sal vermy deur die opstel van ‘n noodplan.

Die Departement se regspan het aangevoer dat net meer as twee persent van die sewe miljoen handboeke nie afgelewer is nie. Die skole het na bewering nagelaat om tekorte aan te meld.

Internasionale waarnemers ontplooi

Die (Engels-eentalige) embleem van die OVK
Die (Engels-eentalige) embleem van die OVK

Internasionale verkiesingswaarnemers in die land aangekom op die vooraand van die algemene verkiesing.

Die waarnemers sal diens doen in al nege provinsies om te bepaal of die stemmery aan internasionale standaarde voldoen.

‘n Woordvoerder van die Departement van Internasionale Betrekkinge, Clayson Monyela, sê waarnemers van die Statebond, die SAOG en die Afrika Unie is ontplooi.

Die VN en ambassadeurs wat in Suid-Afrika geakkrediteer is, is deur die OVK genooi om stemlokale te besoek.

President Jacob Zuma het die Nobelvredespryswenner, Desmond Tutu geroskam oor sy kritiek teen die ANC. Die Anglikaanse biskop het gesê hy sal nie vir die ANC stem nie weens korrupsie en swak regering.

Zuma sê biskoppe en pastore se taak is om te bid vir diegene wat die pad byster raak en hulle behoort nie by partypolitiek betrokke te raak nie.

Ronnie Kasrils, ‘n voormalige minister van intelligensie lei ‘n groep afvallige partyveterane wat kiesers gevra het om nie te stem nie.

 

Stembriewe glo by DA-agent se huis gekonfiskeer

iecda2Verkiesingsamptenare is van hulle stemlokaal op Nigel aan die Oos-Rand verwyder nadat stemmateriaal by die huis van ‘n party-agent gehou is.

Na afloop van die eerste dag van spesiale stemme, het die joernalis Aldrin Sampear getwiet dat die stemmateriaal wat gekonfiskeer is deur die SAPD deur ‘n vrou by name “Swazi” gehou is.

Die Onafhanklike Verkiesingskommissie sê personeel in wyk 77 het die verkiesingsprotokol oortree.

Twiets van Radio 702 het “Swazi” as ‘n ANC-agent voorgehou.

Die OVK-materiaal is glo by ‘n huis van ‘n DA-agent in Wyk 77 gekry volgens bronne op Twitter.

Die OVK het nie genoem van watter party die agent was nie, maar het bevestig dat personeel in Wyk 77 verkiesingsprotokol oortree het deur die gebruik van die huis van ‘n party-agent om stemmateriaal oornag tussen spesiale stemdae te hou.

Die OVK het gesê die stemmateriaal is van die perseel verwyder en na ‘n nabygeleë polisiestasie vir bewaring geneem.

Suid-Afrika se vyfde nasionale en provinsiale verkiesing sal gehou word op 7 Mei en die OVK verwag dat 25.390.000 geregistreerde kiesers hul stemme in 22 263 stemlokale in die land sal uitbring.

 

ANC, DA se verkiesingsbeloftes presies dieselfde

Lucas Moripe propvol Effers
Lucas Moripe propvol Effers

President Jacob Zuma het 90.000 juigende ondersteuners by die ANC se Siyanqoba-saamtrek in Soweto Sondag toegespreek.

Die ANC se DA se verkiesingsbeloftes was heeltemal ononderskeibaar.

Zuma het presies soos die DA belowe: “Ons sal die toepassing van die bepalings van die nuwe gewysigde Wet op Gelyke Indiensneming en die Wet op Breedgebaseerde Swart Ekonomiese Bemagtiging versterk vir suksesvolle implementering van meer oop geleenthede vir swart-, Indiër en bruin mense , asook vroue, die jeug en persone met gestremdheid, soos ons die apartheiderfenis omkeer.”

Hy het ook die ANC se aanspraak op ‘n nie-rassige beleid herbevestig.

“Ons is een nasie, uit die as van rasse-onderdrukking gebore. Ons is besig om ‘n gemeenskaplike identiteit te vorm. Ons sing een volkslied, hys ‘n nasionale vlag en omhels ons kulturele diversiteit ,” het hy gesê.

Hy het ook soos die DA 6 miljoen werksgeleenthede en meer huise belowe.

Sy ontvangs was baie anders as die vorige twee kere wat hy gepraat het by FNB-stadion en het sy gewildheid beklemtoon.

By Nelson Mandela se roudiens in Desember en by die eindstryd van die Afrika Nasies se sokkerkampioenskap in Maart is hy uitgejou deur ‘n deel van die skare, maar Sondag het hy ‘n helde-ontvangs geniet.

Malema, die EFF-leier is deur ‘n kapasiteitskare van byna 30.000 by die Lucas Moripe-stadion in Atteridgeville, Pretoria, verwelkom.

“As mens na hierdie massas kyk, is my plek in die parlement gewaarborg,” het Malema gesê.

Applous het gevolg toe Malema sy ondersteuners belowe het dat die EFF Zuma se multimiljoen-rand Nkandlahuis sal verkoop en die geld aan die armes sal gee. Hy het gesê die EFF sal die aankoop van motors en huise deur ministers stop en hul kredietkaarte wegneem.

Malema het sy party se beleid van nasionalisering van grond en natuurlike hulpbronne herbevestig.

“Ons gaan die waardigheid van plaaswerkers herstel. Na die verkiesing gaan ons die plase oorneem en dit aan werkers gee,” het hy gesê.

“Niks [van die myne] sal gaan na Engeland nie. Ons is nie bang vir wit mense soos die ander nie.”

Malema het die moontlikheid van die vorming van ‘n koalisie met die ANC of die DA verwerp.

Volgens ‘n peiling deur Ipsos namens die Sunday Times, sal die ANC 63,9% van die stemme kry.