Kategorie: Nuus

Spanning in Kaapstad laai op oor Gasa

Pro-Palestynse betogers in Kaapstad het die SAPD daarvan beskuldig dat hulle partydig optree en kant kies vir Israel. Twee stelle pro-Palestynse betogers is in hegtenis geneem Sondag om te verhoed dat hulle naby ‘n pro-Israel saamtrek kom.

Kaapstad se Joodse gemeenskap het ‘n saamtrek gehou by die Joodse Museum Sondag ter ondersteuning van Israel.

Sekuriteit by die byeenkoms was besonder streng.

Shaheed Mohammed, van die Aksie Forum ter ondersteuning van Palestina, het bevestig dat die groep in hegtenis geneem is toe hulle dit naby die gebied gewaag het.

Vyf mense is in hegtenis geneem omdat hulle glo saamgesweer het om ’n misdaad te pleeg, het die Wes-Kaapse polisie Maandag bekend gemaak.

Kol. Tembinkosi Kinana het in verklaring gesê dat sowat 200 mense die naweek by Seepunt vergader het en toe na die Pavilion-winkelsentrum geloop het met plakkate en luidsprekers.

Die groep, wat betoog het ten gunste van die Palestyne in Gasa, is meegedeel dat hul optog onwettig is.

Hulle het aanbeweeg en op pad na Buitekant-straat is hul weer deur die polisie gewaarsku. Hulle is daarna deur die polisie in hegtenis geneem.

Hulle sal na verwagting Maandag in die landdroshof verskyn.

Ben Levitas, voorsitter van die Sioniste Federasie van die Kaap, het gesê as die Suid-Afrikaanse regering bande met Israel verbreek, “sal dit ‘n ramp wees”.

Pastoor Barry Isaacs, die bruin stigter van Transformation Africa, het gesê Christene ondersteun almal vir Israel.

Hy het nogtans Suid-Afrikaanse Christene gekritiseer dat hul leiers nie oproepe doen vir die beskerming van Christene in Nigerië nie.

“Ons leiers het nie gepraat toe Boko Haram 200 Nigeriese Christenmeisies ontvoer het nie, om op te staan ​​vir hulself nie, maar as Israel opstaan, dan praat hulle. Die stilte is heeltemal gebreek. God se doel is om die wêreld te seën deur Israel,” het Barry gesê.

Intussen het pro-Palestina ondersteuners in Seepunt ‘n motoris wat moedswillig ‘n Israeliese vlag vir hulle gewaai het, se vlag uit protes gegeryp.

Polisie het ingegryp om die vlag aan die motoris terug te besorg.

Een van die leiers van die protes het gesê “Dit is ‘n duidelike taktiek van die SAPD om ons te ondermyn. As jy in hegtenis geneem wil word, moet jy hier bly. Hulle steun die Sioniste.”

Pallo Jordan is soek

Pallo Jordan is skoonveld. Die ANC kon nie onmiddellik bevestig waar Jordan is nie.

Die ANC-LP is uitgevang dat hy sy akademiese kwalifikasies versin het.

‘n Engelstalige Sondagkoerant het verlede week berig dat geen bewyse gevind kon word van Jordan se doktorsgraad nie.

Jordan het geen grade of diplomas aan die Universiteit van Wisconsin-Madison of die London School of Economics (LSE), behaal nie, maar gee voor dat hy het.

Hy het geen formele tersiêre akademiese kwalifikasies hoegenaamd nie, het die koerant berig. Hy beskik ook nie oor ‘n ere-doktorsgraad nie.

Volgens die koerant is Jordan hierdie week as ‘n Business Day rubriekskrywer afgedank omdat hy versuim het om sy weeklikse rubriek vir publikasie voor te lê.

Goeie vriende, kamerade en die bure het ook na bewering nie gesien of gehoor van die bedrieër nie. Sommige het gesê hulle is bekommerd.

‘n Verslaggewer wat sy huis besoek het, sê dit lyk asof dit leegstaan.

Intussen het die Daily Maverick se ‘intelligensia’ dit op hulleself geneem om Jordan se reputasie te verdedig. Hulle sê ‘n gebrek aan ‘n graad neem nie weg van sy breinkrag nie.

Prof. Steven Friedman het Jordan beskryf as “een van ons uitnemende intellektuele”.

African Bank kos belastingbetaler miljarde

Gill Marcus, president van die Reserwebank, sê ‘n konsortium wat die groter banke in Suid-Afrika insluit sal ‘n reddingsboei van R10 miljard aan die beleërde African Bank voorsien.

Die bank sal oopbly vir sake.

Die Reserwebank sal R7 miljard se slegte skuld van die R17 miljard onderskryf.

Dit beteken in wese dat die belastingbetalers sal moet opdok vir swartmense se skuld.

Marcus sê die “invordering van lenings sal voortgaan om enige koste vir die belastingbetaler te vermy”.

Die konsortium bestaan uit Absa, Capitec, FirstRand, Nedbank en Standard banke en sluit ook die Openbare Beleggingskorporasie in. Die banke het ingespring om die beeld van Suid-Afrika se sterk banksektor in ere te hou.

Vroeër het Marcus aangekondig dat die African Bank onder onmiddelike kuratorskap geplaas word. Die besluit is geneem na samesprekings met die Minister van Finansies.

African Bank se “goeie bank” wat alle deposito’s en invorderbare lenings insluit, sal herkapitaliseer word met ’n regte-uitgifte van R10 miljard wat gesamentlik deur Suid-Afrika se grootste banke onderskryf gaan word. African Bank het ’n leningsboek van R26 miljard as die swak skuld uitgesluit word.

Die Reserwebank het tot dusver agter die skerms probeer om African Bank Investements Limited (Abil) om te keer.

Abil se blootstelling aan Ellerine Holdings word uitgesonder as ’n faktor wat die bank blootstel aan miljarde se slegte skuld.

“Die probleme wat African Bank teister, kan, na ons mening, grootliks aan hul huidige sakemodel toegeskryf word, wat nie ’n gediversifiseerde stel produkte en inkomstestrome insluit nie, en ook nie transaksionele bankdienste insluit nie. Dit het African Bank en Abil as geheel uniek kwesbaar gemaak vir ’n veranderende of uitdagende sake-omgewing, soos wat tans heers.”

Die Reserwebank plaas African Bank in kuratorskap, wat onmiddellik van krag is. Die direksie van Abil het dit nie teengestaan nie, sê Marcus.

’n Hulplyn gaan geskep word vir kliënte met navrae.

Die kuratorskap gaan probeer verseker dat African Bank se bedrywighede voortgaan en dat die invorderbare lenings en bates in ’n “goeie bank” volgehou word.

Wat die herkapitalisering van R10 miljard betref, gaan bestaande aandeelhouers die kans kry om daarin te deel.

“Die maatstawwe wat geneem is, is, na ons mening, in die beste belang van alle belanghebbendes, insluitend deposante, aandeelhouers, krediteure en kliënte,” sê Marcus.

Marcus lê klem daarop dat African Bank se bedrywighede sal voortduur.

Marcus sê dat spaargeld by African Bank veilig is. Kleinhandeldeposante verteenwoordig minder as 1% van African Bank se krediteure.

Die geld gaan nié gevries word nie en sal ook nie verlore gaan nie en mense sal steeds rente daarop verdien. Hulle het volle toegang tot hul geld “in die gewone gang van sake”.

Die plan is dat die houermaatskappy van die goeie bank mettertyd op die JSE genoteer word.

Die kurator gaan na verwagting die betaling van alle rente opskort, met die uitsondering van gewone deposante.

Marcus sê die Reserwebank is “geweldig bemoedig deur die aktiewe en toegewyde reaksie van die private sektor om ons vennote te word in ’n soeke na ’n oplossing vir African Bank”.

“Die rol van die banktoesighouers is om alles moontlik te doen om te verseker dat Suid-Afrika se banke voldoende kapitaal, likiditeit en hefboomkoerse het, sowel as gesonde beheer en toepaslike beleid.”

Duidelik het die ideologiese projek wat African Bank is tot hier gevorder sonder die Reserwebank se toesig.

Kwak se dieet glo teen Afrikaners gemik

Die Malema van medisyne se nuwe kwakdieet is klaarblyklik ontwerp om Afrikaners te teiken.

Prof. Tim Noakes se dieet-aanbevelings lyk byna asof dit met opset geneties verfyn is, want dis veral gevaarlik vir Afrikaners, onder wie daar ’n hoë voorkoms van “slegte” cholesterol is, en hulle word ernstig deur dokters gewaarsku teen Noakes.

Die probleem met Noakes se nuwe “ondersoek” is dat dit heel onwetenskaplik ‘n studie van een omskryf: Hyself is die onderwerp van navorsing, sowel as die persoon wat dit beheer, terwyl hy geen beheer oor die placebo-effek het nie, sê een dokter.

Sy Damaskuservaring is ook uiters vreemd, aangesien hy “resultate” ontdek het wat volgens sy eie beskrywing nie meetbaar is nie.

Sy omstrede “laekoolhidraat-, hoë-vet” (LKHV)-dieet word trouens tans deur ’n kardioloog as “krimineel” beskryf.

Beeld berig dat medici en veral spesialiste Noakes se dieet verwerp en dat die “sportwetenskaplike aan die Universiteit van Kaapstad” se bewerings dat sy hoëvet-dieet alle risikofaktore vir hartsiekte kan omkeer, gevaarlik is.

Verskeie pasiënte met hoë cholesterol het hul statienmedikasie verruil vir die LKHV-dieet, met skadelike nagevolge.

Sy boek, The Real Meal Revolution, het vroeër vanjaar verskyn. Daar is ‘n doelbewuste poging om die verkope aan te wakker en sy boek word ook nou in Afrikaans vertaal.

Die publiek is glo aangemoedig om by boekwinkels wat die boek aanhou te kla en te eis dat dit dadelik van die rakke verwyder word eerder as om die boek te vandaliseer en te bekrap met waarskuwings soos talle voorgestel het.

Prof. Tessa van der Merwe, sê Noakes se aanbevelings kan hartsiekte, diabetes en osteoporose vererger en gal- en nierstene veroorsaak.

Van der Merwe is ’n ereprofessor in endokrinologie aan die Universiteit van Pretoria en stigter van die Netcare Bariatriese Sentrum by die Unitas-hospitaal.

“As jy familiale hipercholesterolemie (FH of oorerflike hoë cholesterol) het, is daar ’n werklike gevaar dat jy ’n ongunstige cholesterolprofiel sal ontwikkel,” sê sy.

FH word deur ’n genetiese faktor veroorsaak wat lei tot ’n hoë (“slegte”) cholesterolvlak. Dit is veral algemeen onder Afrikaners, waar daar ’n 1:70 voorkoms is teenoor ’n 1:500 voorkoms in die wyer gemeenskap.

Een pasiënt se totale bloedcholesterolvlakke het meer as verdubbel (van 5,1 tot 12,9) nadat sy haar statien verruil het vir Noakes se dieet.

Maar toe die 39-jarige vrou teruggekeer het na ’n normale dieet en weer haar medisyne begin gebruik het, het haar cholesterolvlak gedaal tot 7,3.

Afrikaners word dus gewaarsku teen Noakes se dieet. ​Statien is besonder belangrik vir genetiese FH.

“Statien maak ’n geweldige verskil in die risiko vir hartsiekte in diegene met FH aangesien hulle nie hul cholesterolvlakke deur leefstyl kan beheer nie,” sê prof. David Marais, hoof van lipidologie aan die Universiteit van Kaapstad.

“Navorsing toon dat mans met onbehandelde FH op gemiddeld 43 sterf en 85% van hulle nie 60 haal nie.”

Noakes erken dat die LKHV-dieet cholesterolvlakke in ongeveer een uit elke drie mense opjaag, maar meen dit nie as ’n gesondheidsrisiko nie.

In plaas van cholesterol blameer Noakes insulienweerstandigheid (IW) vir hartsiekte.

Noakes glo dat die meeste mense vandag aan IW ly en dat dit hulle sal baat om koolhidrate te vervang deur versadigde diervette.

Noakes se teorie oor cholesterol is teenstrydig met huidige mediese sienings oor koronêre hartsiekte wat onderskryf word deur internasionale gesondheidsliggame soos die Wêreldgesondheidsorganisasie en die Hart- en Beroertestigting.

“Die hele konsep van insulien-weerstandigheid wat die wortel van alle kwaad is, spruit uit swak insig in metaboliese en biochemiese bane,” sê Van der Merwe.

Een kardioloog wat nie sy naam genoem wou hê nie, het gesê hy voel jammer vir Noakes wat homself duidelik in ‘n hoek geverf het met sy kwaksalwery.

Tot 60 000 betoog in Kaapstad teen Israel-geweld

Terwyl die Joodse gemeenskap in Johannesburg in die South African Jewish Report spog oor die 10 000 mense wat hy verlede Saterdag ten gunste van Israel kon mobiliseer, het waarskynlik die grootste optog nóg in Suid-Afrika gister in Kaapstad plaasgevind toe tussen 30 000 en 60 000 mense na die parlementsgebou opgeruk het om steun aan Palestina te betoon.

Die reuseskare het liedere gesing en plakkate geswaai om te eis dat die geweld in die Gasastrook gestaak moet word.

“Ons skat dat daar meer as 30 000 mense is wat aan die optog deelneem, maar dit kan soveel as 50 000 wees,” het Richard Bosman, hoof van veiligheid en sekuriteit aan die Kaapse munisipaliteit, aan Sapa gesê. Volgens sommige beramings was daar egter 60 000 mense.

Die begoging is deur die National Coalition for Palestine (NC4P) georganiseer. Die koalisie bestaan uit meer as 30 godsdiensorganisasies, burgerlike instellings, vakbonde en politieke partye.

Boikot teen Woolworths

NC4P het vroeër vandeesweek in ‘n verklaring “beslissende optrede van die Suid-Afrikaanse regering geëis teen die Israeliese aanvalle, moorde, verdrywings en die vernietiging van die Gasastrook”. In ‘n ander mediavrystelling sê die beweging sy steun aan die BDS-boikot van Woolworths toe.

'n Deel van die skare in Kaapstad tydens gister se betoging
‘n Deel van die skare in Kaapstad tydens gister se betoging

“Ons ondersteun die oproep van die Boycott, Divestment and Sanctions-beweging (BDS) om alle maatskappye wat met die staat van Israel handel dryf, te boikot. Die Nasionale Koalisie vir Palestina het daarom ‘n landwyde aanbeveling uitgereik dat alle Woolworths-winkels in Suid-Afrika onmiddellik geboikot moet word. Die oproep om ‘n boikot geskied vanweë Woolworths se standvastige ondersteuning vir die Israel-apartheidstaat en kom ná diepgaande navorsing en ondersoek na die stand van handelsbedrywighede tussen die kettingwinkel en die Israelse staat. Inkomste uit die verkoop van Israelse goedere befonds oorlogsmisdade teen Palestyne. NC4P doen ‘n beroep op alle Suid-Afrikaners om vreedsame betogings voor alle Woolworths-winkels in Suid-Afrika te hou.

Die koalisie het ook ‘n beroep gedoen vir ‘n internasionale ondersoek na die optrede van die Israelse weermag in die Palestynse gebiede.

Volgens berigte is meer as 1 900 mense reeds dood sedert Israel verlede maand met Operasie “Protective Edge” begin het in ‘n poging om Hamas vir die afvuur van vuurpyle te straf en om die infrastruktuur van die Gasastrook te vernietig.

Die Verenigde Nasies sê nagenoeg 1 350 van die oorledenes was burgerlikes, waaronder honderde vroue en kinders.

SA en Chile verdiep handel en belegging

Suid-Afrika en Chile het ooreengekom oor ‘n reeks nuwe maatreëls om handels- en beleggingsbande tussen dié twee lande te verbeter, het RSG berig.

President Jacob Zuma en sy Chileense ampsgenoot, Michelle Bachelet het samesprekings by die Uniegebou gehou. Suid-Afrika en Chile wil in sektore inbeweeg soos energie, verdediging, wetenskap en tegnologie en minerale hulpbronne om die handels-en beleggingsgeleenthede te verbreed.

Zuma sê Suid-Afrika is gretig om met Chile saam te werk in ruil vir kundigheid oor maritieme veiligheid en die benutting van hernubare energiebronne.

Hy sê hulle voorsien ook samewerking tussen die twee lande se Vlote in die lig van die uitgebreide kuslyne en uitdagings soos seerowery en dwelm-en mensehandel.

Suid-Afrika is ‘n groot belegger in Chile se mynsektor en daar is groot moontlikhede vir die uitruil van tegnologie om ‘n veiliger myn-omgewing te bevorder.

Bachelet het toegegee dat baie nog gedoen moet word om handels-en beleggingsbetrekkinge tussen die twee lande te versterk. Sy het gesê haar besoek is deel van die pogings om sterker momentum aan die talle ooreenkomste te gee wat onderteken is.

Daar is ook ooreengekom om ‘n gesamentlike kommissie op die been te bring om die proses te bespoedig.

Kanada isoleer moontlike ebola-pasiënt

‘n Pasiënt wat van Nigerië in Kanada aangekom het is in ‘n hospitaal in Ontario in afsonderling geplaas omdat hy moontlik met die ebola-virus besmet is, het RSG berig.

‘n Dokter wat hom behandel sê dit is ‘n voorkomende maatreël omdat hy simptome van ebola het, maar dit is nog nie gediagnoseer nie.

Die Nigeriese president, Goodluck Jonathan het vroeër die uitbreking van ebola in sy land tot ‘n nasionale krisis verklaar. Hy het meer as 110-miljoen rand beskikbaar gestel om die verspreiding van die siekte te keer.

Die Wêreldgesondheidsorganisasie beraam dat sowat 960 mense in Guinee, Sierra Leone, Liberië en Nigerië aan die siekte dood is. Die WGO het die uitbreking as ‘n internasionale gesondheidskrisis verklaar.

Hulp aan Irak in die vorm van bomme

Hulp in die vorm van bomme na Irak is oppad. Enkele dae nadat die VSA Rusland gekritiseer het dat hulle onder die dekmantel van “humanitêre hulp” militêre doelwitte stel, het pres. Barack Obama van die VSA Donderdagaand Amerikaanse lugaanvalle in Irak om “humanitêre” redes goedgekeur.

Die VSA wil klaarblyklik hulle totale mislukking en gru-nalatenskap in Irak met kinetiese humanitêre hulp probeer toesmeer.

Ten einde ‘n “volksmoord” deur Islamitiese ekstremiste op etniese en godsdiensminderhede te voorkom, gaan die VSA Irak verder onder bomme steek. Weens die Amerikaanse inval van 20 Maart 2003 om olie te buit, is die eens florerende land die afgelope 10 jaar in chaos gedompel.

Kospakkies en ander voorrade gaan uit die lug glo nou op ‘n klein groepie Irakkese van die Yazidi-minderheidsgroep neerreën in die jongste reklamepoging om Amerika se verslete beeld te poets.

Hulle is tans deur Isil (Islamitiese Staat in Irak en die Levant) vasgekeer. “Ons kan versigtig en verantwoordelik optree om ‘n moontlike volksmoord te voorkom,” het Obama gesê wat pas wapens aan Israel voorsien het om Palestynse burgerlikes uit te wis.

Die Veiligheidsraad van die Verenigde Nasies het intussen ‘n noodvergadering oor die krisis in Irak belê en die olieprys het op markte in Asië begin styg nadat dit bekend geword het dat Obama lugaanvalle op Isil goedgekeur het.​

“Daarom het ek gelas dat, indien nodig, lugaanvalle op spesifieke teikens uitgevoer word om magte in Irak te help om die beleg te beëindig en die landsburgers wat vasgekeer is, te beskerm.”

Obama het ook gewaarsku dat Amerikaanse vegvliegtuie Isil sal aanval as hulle dit naby die stad Irbil waag waar ‘n Amerikaanse militêre raadgewers die Irakse weermag oplei.

Amnestie Internasionaal vra ondersoek na Kiëf-wetgewer

Amnestie Internasionaal (AI) het ‘n ondersoek gevra na die misbruik van mag deur pro-Kiëf vigilantes soos die Oekraïense ultra-radikale LP Oleg Lyashko. Die organisasie het getuienis van gevalle van ontvoering en fisiese geweld teen slagoffers.

Lyashko se sogenaamde “ondervragings” is op sy amptelike YouTube bladsy te siene. Die menseregtewaghond het ‘n verslag uitgereik wat eis dat die wetgewer aanspreeklik vir sy dade gehou moet word.

Amnesty International het sy kommer met die Oekraïense owerhede gedeel oor die ontvoerings en mishandeling van individue in die hele streek, luidens ‘n verklaring.

Lyashenko is ‘n voormalige presidensiële kandidaat wat berug is vir sy anti-Russiese uitsprake.

“Oleg Lyashko is veronderstel om ‘n wetgewer te wees, maar hy het die wet in sy eie hande geneem,” het die verklaring gesê. “Eer aan die Oekraïne, dood aan die teenstanders is sy strydkreet.”

Die wetgewer word altyd vergesel deur gewapende jong mans in militêre klere as hy reis en rekords van sy ontvoerings en mishandeling opneem vir Facebook om daarmee te spog.

Die video’s wys mishandeling wat in stryd is met “die reg op ‘n billike verhoor, vryheid en veiligheid van die persoon, en die reg om nie aan marteling of ander soort mishandeling onderwerp te word nie,” sê AI.

VSA, NAVO verhoog magsopbou teen Rusland

Die VSA het in ‘n verdere magsopbou teen Rusland, die missielkruisboot die Vella Gulf na die Swart See gestuur om “vrede en stabiliteit” in die streek te beskerm, het die Amerikaanse vloot in ‘n persverklaring gesê.

Net in Julie, het NAVO nege oorlogskepe na die Swart See gestuur, die grootste aantal NAVO-skepe in die streek die afgelope 10 jaar.

Die VSA se korporatiewe elite probeer met die hulp van NAVO die Koue Oorlog te herloods as ‘n voorwendsel om Oos-Europa se energiebronne te monopoliseer.

“Die Vella Gulf se missie is om interoperasievaardighede te verbeter en te werk na gemeenskaplike doelwitte, om die verbintenis van die Verenigde State tot die bevordering van die gesamentlike veiligheid van NAVO-bondgenote en vennote in die streek te toon,” het die persverklaring gesê.

Die Ticonderoga-klasvaartuig het aangekom in die Swart See om by te dra tot “die maritieme veiligheid van die streek, opleidingsmissies uit te voer en NAVO bedrywighede te ondersteun”. Vella Gulf se tuishawe is Norfolk, Virginia.

Die hoof van NAVO, Anders Fogh Rasmussen, sal Donderdag die Oekraïne besoek te midde van die volgehoue Amerikaanse militêre opbou in die streek.

Rusland het ontken dat hulle ‘n inval op die Oekraïne beplan en sê daar is satellietbeelde wat as getuienis kan dien dat Rusland nie besig is om sy soldate op sy grens met die Oekraïne te groepeer nie.

Ten spyte daarvan sê NAVO Rusland het sy magte op die grens “vermeerder”.

Rusland het aangebied om direkte internetkommunikasie met Amerikaanse verdedigingspersoneel op te stel om hulle van die nodige data te voorsien.

Intussen het Admiraal John Kirby aan die media by ‘n DoD-inligtingsessie gesê hulle het nie werklik inligting oor wat aangaan op die grens tussen Rusland en die Oekraïene nie. Die inligting waaroor hulle beskik, is “onbetroubaar” het Kirby gesê. Hy weet nie of daar “swaar militêre toerusting” oor die grens geskuif word nie. Voorheen het die VSA beweer sulke toerusting word verskuif.

Rasmussen beweer daar is vrese dat Rusland op militêre gebied kan probeer ingryp onder die voorwendsel van ‘n “humanitêre of vredesoperasie” soos wat Amerika graag doen.

Daar is reeds meer as ‘n duidend mense dood in Kiëf se aanvalle op selfverdedigingsgroepe en talle soldate het gedros na Rusland omdat hulle nie meer kans sien om hul eie mense dood te maak nie, ten spyte daarvan dat die junta verpligte diensplig ingestel het.

Amerikaanse hoofstroommedia is genooi om eerstehands te berig oor die drosters, maar wou nie die nuus dek nie. Daar word vermoed dat die Amerikaanse vise-president Joe Biden – wie se seun Hunter by die oorlog vir gas in die Oekraïne betrokke is – die sensuur rig.

Die Amerikaanse Minister van Verdediging, Chuck Hagel, het verder die oorlogskoors probeer aanwakker deur te gewaarsku dat “die risiko van ‘n Russiese inval aan die toeneem is”.

Die Oekraïense weermag is tans besig om na Donetsk op te ruk, die grootste stad wat deur selfverdedigingsgroepe beset word.