Kategorie: Nuus

Werkers by Delareyville-meul maak amok

Die N14-roete tussen Delareyville en Vryburg in Noordwes is weer oop vir verkeer nadat dit Dinsdagaand weens oproer moes sluit.

Polisiewoordvoerder, Sabata Mokgwabone, sê die situasie is vanoggend kalm nadat die pad Dinsdag omstreeks 19:00 gesluit is weens stakende werknemers van Botselo Milling.

Die meule in Delareyville behoort glo aan ‘n familie.

Die betogers het die pad met brandende bande versper sodat verkeer van alternatiewe roetes moes gebruik maak.

Hy sê die groep werknemers neem al die afgelope drie weke aan ‘n beskermde staking deel.

Die openbare orde polisie het die situasie gemonitor.

Volgens Mokgwabone is ‘n vragmotor teen middernag aan die brand gesteek deur die betogers. Niemand is beseer nie.

Mokgwabone sê meer inligting sal later oor die voorval bekend gemaak word.

Voormalige Britse soldaat vir wapens en ‘Nazi-simbole’ voor

‘n Sewentig-jarige man van Kaapstad, wat van die besit van onwettige wapens en “Nazi-simbole” aangekla word, sal in Mei weer in die hof verskyn, het RSG berig.

Keith Conroy het Dinsdag in die Goodwood Landdroshof verskyn.

Die polisie het in Desember sy huis in Bothasig tydens ‘n klopjag deurgesoek nadat ‘n wenk ontvang is. Conroy was toe nie tuis nie.

Hy het later vrywillig by die polisie aangemeld nadat hy gehoor het van die klopjag.

‘n Aantal berigte beweer dat Conroy, wat voorheen ‘n Britse soldaat was, in 1993 betrokke was by die bestorming van die Wêreldhandelsentrum in Kempton Park deur die AWB.

Die staat het om uitstel gevra, aangesien daar steeds op ballistieke verslae oor die wapens gewag word. Conroy is uit op borgtog van R3000.

Selfmoordbommer laat vlug land

Die Egiptiese lugredery het vanoggend bevestig daar is een selfmoordbomaanvaller aan boord van ‘n vlug van Egyptair wat noodgedwonge moes land.

Vroue en kinders is glo besig om vrygelaat te word waar die vliegtuig in Siprus geland het met die vlugnommer MS181.

Egyptair se binnelandse vlug van Alexandrië na Kaïro is Dinsdagoggend gekaap, sê Egiptiese amptenare.

Die vlieënier van die vliegtuig is deur ‘n passasier met ‘n plofstofgordel afgedreig, het die Egiptiese lugvaartowerheid bevestig.

Die Siprus Uitsaaikorporasie sê 55 passasiers was aan boord en ‘n bemanning van sewe. Die kaping het plaasgevind binne Siprus se vluginligtingsgebied en die vliegtuig is afgelei na Larnaca.

Die vliegtuig is ‘n Airbus 320, het Egipte se lugvaartministerie gesê. Klaarblyklik raak die Airbus nou oorverteenwoordig in sulke lugvaartinsidente.

Israel het vegvliegtuie in sy lugruim laat opstyg as ‘n voorsorgmaatreël in reaksie op die vliegtuigkaping, volgens ‘n Israeliese militêre bron.

Die Sowjetopsie: nuwe SA wet stuur Steve dalk tronk toe as hy ‘Die Stem’ sing

In die ou Sowjetunie kon jy weens slegs ‘n mening tot “vyand van die staat” verklaar word en gevangenisstraf ontvang. Die ANC en SA Kommunisteparty neig nou terug na hul vorige Sowjetmeesters toe want die nuwe wetsontwerp gaan inwoners van Suid-Afrika tronkstraf oplê vir polities onkorrekte taalgebruik of die verkeerde menings. Volgens die adjunkminister van justisie, John Jeffery, is die nuwe “Wetsontwerp op die voorkoming en bestryding van haatmisdade en haatspraak” reeds opgetrek en sal “binne weke” aan die kabinet vir goedkeuring voorgelê word.

Terwyl swartes vrylik haatmisdade in die vorm van plaasmoorde op Afrikanerboere pleeg, is die verwagting dat swartes van die nuwe wet kwytgeskeld sal wees en dat slegs blankes dit sal ontgeld. Die nuwe wet wil uitlatings soos dié deur Penny Sparrow oor swartes se geneigdheid om strande met rommel te bestrooi of die ekonoom Chris Hart s’n oor swart eiegeregtigheid met aanhouding in die gevangenis straf.

Opposisiepartye, waaronder die DA en die Vryheidsfront, het hulle insgelyks “teen rassisme” uitgespreek, maar tog gewonder of Suid-Afrika nie te vinnig teen die helling op die glybaan na totalitarisme voortsnel nie. Die leier van dié party het volgens die dagblad Beeld gesê:

“Natuurlik is ons gekant teen rassisme, maar die werklike probleem is mense se houding. Geen wet gaan mense se houding verander nie.

“Ek is bevrees dit is moeilik om die ANC se integriteit te vertrou. Dit is my gevoel dat hulle besig is om van rassisme ’n politieke kwessie te maak en dit is hoekom hulle dit voor die verkiesing na die parlement bring.”

Blykbaar is die wet ook daarop gemik om geskiedskrywers wat nie die ANC en veral SAKP se marxistiese sienings van ons verlede deel nie, aan bande te lê. Historici soos prof. Hermann Giliomee wat redelik onlangs bewys het dat Bantoe-onderwys nie bedoel was om swartes te benadeel nie, sal ook tronkstraf ontvang.

Oral ter wêreld, ook in die VSA, bestaan daar ‘n akademiese “prestasiegaping” tussen blanke en swart leerlinge of studente. Navorsers in Suid-Afrika wat dit sou wou ondersoek, kan ook van “rassisme” aangekla en in die tronk gesmyt word. Sielkundiges wat rasverskille in IK sou wou ondersoek, soos wat die Kanadees J. Philippe Rushton in sy boeke en artikels gedoen het, sal tronk toe gestuur word. Toe hy nog gelewe het, is Rushton deur linkses in die provinsie Ontario van rassisme aangekla wat geëis het dat hy deur die Universiteit van Wes-Ontario afgedank word. Ná vier jaar van hofsake het die hof egter bevind dat hy oor die akademiese vryheid beskik om sy navorsing oor rasverskille in IK voort te sit.

Weens die ANC se nuwe wetsontwerp sal die sluier oor swart en bruin misdaadgeneigdheid, die wiskundeprestasie in Soweto-skole en ander onderwerpe, vir altyd dig getrek word. Diegene wat in die verkeer op minibustaxibestuurders swets, mag ook afgeluister, aangekla en tronk toe gestuur word. Indien die Nobelpryswenner J.M. Coetzee nie reeds na Australië geëmigreer het nie, sou hy weens sy uitbeelding van ‘n bendeverkragting deur swartes op ‘n blanke vrou in Disgrace insgelyks gevangenissraf opgelê word.

Aangesien linkses in Suid-Afrika meen dat dit “rassisties” is om Die Stem te sing, mag Steve Hofmeyr ook dalk in die tronk beland as die wet eers op die boeke is. Of dalk gaan hy net op Brandfort in die Vrystaat moet bly. Toe Winnie Mandela weens haar moord en terreur deur die NP-regering op Brandfort ingeperk is, het sy dit as “haar Siberië” beskryf.

 

Derde Brusselbomverdagte vasgevat

Belgiese staatsaanklaers het ‘n verdagte wat in hegtenis geneem is in verband met die terreuraanvalle in Brussel verlede week, aangekla van terreurmoord, poging tot terreurmoord en deelname aan aktiwiteite van ’n terreurgroep.

Twee ander mense word ook aan­gekla vir dieselfde terreurmisdade, maar daar is glo geen regstreekse verband tussen hulle en die aanvalle in Brussel nie.

Die Belgiese media berig dat Faycal Cheffou die verdagte is, maar die staatsuitsaaier RTDF het berig dat die polisie nog wag op DNS-uitslae om dit te staaf.

Die koerant Le Soir het slegs verwys na Faycal C. wat waarskynlik die derde ­aanvaller is wat verbind word met die bomaanslag op die Zaventemlughawe.

Faycal C. is glo deur ‘n taxibestuurder uitgeken wat die aanvallers by die lughawe afgelaai het.

Faycal C. is een van die verdagtes wat Donderdagaand in hegtenis geneem is ná klopjagte in Brussel se Schaerbeek- en Jette-woonbuurt.

Staatsaanklaers het gesê Faycal C. se huis is deursoek, maar daar is geen wapens of ploftoestelle gevind nie.

Sedert Donderdag is nege mense in België in hegtenis geneem asook twee in Duitsland.

Staatsaanklaers het gesê die hoofverdagtes van die aanvalle in Brussel het die owerhede ontglip deur skuil te hou in ‘n gebou wat gerestoureer word.

Hulle het daar glo die spykerbomme vir die aanslag vervaardig.

Doodslag op die paaie verwag, maar ambulanse staan

Die LUR vir Gesondheid in Limpopo, Phophi Ramathuba, verwag doodslag op die paaie oor die Paasnaweek.

Phophi sê mediese personeel behoort op bystand te wees in die geval van enige padongelukke in die provinsie, maar sy het ontdek die ambulanse staan.

Die LUR het die mediese nooddiensstasie op Louis Trichardt besoek, waar sy vasgestel het dat slegs vier van die nege ambulanse die naweek gebruik sal kan word.

Die ambulanse kon glo weens ‘n gebrek aan die nodige magtiging nie gediens word nie.

Daar is splinternuwe ambulanse wat slegs 15 000 kilometer afgelê het, maar al vir meer as twee weke staan omdat hulle wag dat iemand die voertuigdiens moet magtig.

Die Departement van Vervoer sal glo dringend versoek word om die saak reg te stel.

Sy het ook die bestuur van die Louis Trichardt Gedenkhospitaal opdrag gegee om bykomende dokters te ontplooi om noodgevalle tydens die Paasnaweek te hanteer.

Phophi het ‘n verrassingsbesoek aan die hospitaal gebring om ondersoek in te stel na die gereedheid van die nooddienste en geriewe daar.

Swaar verkeersopeenhopings van sowat 20 kilometer lank kom tans by die Kranskop-tolhek op die N1 tussen Pretoria en Polokwane voor.

Die alternatiewe roete op die R101 na Polokwane dra ook swaar verkeer.

Die ZCC-saamtrek by Moria in Polokwane en ander kerkdienste wat gehou word, trek duisende swart kerkgangers.

Die president van die Nasionale Geloofsraad van Suid-Afrika, Biskop Daniel Matebesi, sê dit is belangrik dat “rassisme” op die paaie uitgeroei word omdat almal die reg het om hul godsdiens te beoefen.

Twee mense is intussen dood en nog 12 beseer in ‘n ongeluk tussen ses voertuie op die N1 buite Polokwane in Limpopo.

Die ongeluk het by die Solomondale-afrit gebeur toe ‘n voertuig op ‘n sperstreep verbygesteek en teen ‘n ander voertuig gebots het.

Nog vier voertuie het daarna in die twee voertuie vasgery.

Die Nasionale Seereddingsinstituut het intussen die publiek gewaarsku teen sterk trekstrome langs die land se kuslyn die naweek.

‘n Woordvoerder, Craig Lambinon, sê die strome sal deur die volmaan se springgety veroorsaak word.

Terroriste teiken Belgiese kernsentrales

‘n Belgiese koerant La Dernière Heure beweer dat Dinsdag se terreuraanvalle oorspronklik by ‘n kernaanleg beplan is.

Dit blyk dat 11 werkers by die Tihange-kernkragsentrale, 40 myl suidoos van Brussel, se toegangskaarte gekanselleer is.

Dit het gelei tot spekulasie dat die selfmoordbommers besig was om werknemers binne die sentrale te probeer werf.

Sewe van die toegangspasse is verlede week teruggetrek, en verlede Vrydag is bykomende soldate ontplooi om die aanleg, wat drie reaktors het, te beskerm.

‘n Terreuraanval sou ‘n katastrofe veroorsaak het want dit is geleë in ‘n dig bevolkte gebied binne bereik van Duitsland, Frankryk, Nederland en Luxemburg.

Claude Moniquet, wat bedreigings ondersoek in die kernsektor in Europa, het aan NBC News gesê: “Die terroristesel het naïef geglo hulle kan iemand gebruik om ‘n laboratorium binne te dring om kernmateriaal te bekom om ‘n vuilbom te maak.”

Die DH sê ook die teikens is moontlik verander ná inhegtenisnemings in Brussel verlede week.

Bewyse bestaan dat ISIS ‘n senior Belgiese kernwerknemer reeds geruime tyd dopgehou het.

Die Belgiese sekuriteitsdienste het in 2009 na agtergrondondersoek voltooi vir ‘n nuwe inspekteur by die Doel-kernkragsentrale, sowat ‘n uur se ry van Brussel.

Soos ander inspekteurs, het Ilyass Boughalab toegang tot die aanleg se sensitiewe areas gehad. Hy het vir drie jaar as ‘n kerntegnikus gewerk voordat hy na Sirië vertrek het in 2012 om by die terroriste-groep van die Islamitiese staat aan te sluit.

Hy is twee jaar later dood in gevegte daar om die wettige regering omver te werp.

Polisielede het kort voor die jongste aanvalle in Brussel tydens ‘n klopjag op gewapende mans in ‘n woonstel afgekom wat in verband met die ondersoek na die Parys-aanvalle deursoek is.

Een van die mans, ‘n Algerynse burger, is in ‘n skietery met die polisie dood.

Dit het ook daartoe gelei dat die hoofverdagte in die Parys-aanvalle, Salah Abdesalam, en nog ‘n vermeende militant vasgetrek is.

Die Belgiese polisie het intussen ses mense in hegtenis geneem in verband met die gekoördineerde terreuraanvalle in Brussel waarin 31 mense dood is.

Die inhegtenisnemings volg na polisie-klopjagte in drie woonbuurte in die Belgiese hoofstad.

Sowat 270 mense is beseer in die aanvalle op die Brussel lughawe en treinstasie, waarvoor ISIS verantwoordelikheid aanvaar het.

In Frankryk is ‘n man ook in hegtenis geneem, wie volgens die polisie ‘n komplot beplan het wat reeds in ‘n gevorderde stadium was.

Die Franse minister van binnelandse sake, Bernard Cazeneuve, sê ‘n Franse burger, wat aan ‘n militante netwerk behoort, is in hegtenis geneem vir ‘n beplande aanval in die land.

Hy sê die inhegtenisname het die komplot gefnuik.

Franse polisie sê ‘n klopjag is na die man se inhegtenisneming op ‘n woonstelgebou in die Argenteuil-woonbuurt in Parys uitgevoer, waar plofstof onder meer gevind is.

Vyf beseer in Upington-ongeluk

Vyf mense is beseer in ‘n motorongeluk op die N14 by Upington waarin vier motors betrokke was.

ER24-woordvoerder, Russel Meiring, sê vier mans en ‘n vrou is beseer op die toneel gevind. Hulle het minder ernstige beserings opgedoen.

Nadat paramedici die beseerdes op die toneel behandel het is hulle afgevoer na die Upington-hospitaal vir verdere behandeling.

Die polisie ondersoek die ongeluk.

PRAAG ontvang antwoord van UNESCO oor vernietiging van Afrikanererfenis

PRAAG het so pas ‘n antwoord van die Verenigde Nasies se kultuurliggaam, UNESCO in Parys, ontvang. Die Pro-Afrikaanse Aksiegroep het weereens ‘n klag by UNESCO aanhanging gemaak ná die jongste vlaag aanvalle op Afrikanerstandbeelde op kampusse.

“Die ANC-bewind, asook die radikale groepe in die land wat ons standbeelde en ander erfstukke aanval, is besig om strydig met plaaslike en internasionale wetgewing op te tree,” sê dr. Dan Roodt. “PRAAG is ook bekommerd oor versamelings van boeke en skilderye wat in biblioteke en museums gehou word en wat insgelyks die prooi van marxistiese revolusionêre bendes soos dié van die EFF kan word. Ook dít is aan UNESCO oorgedra.”

cr_swart
‘n Standbeeld van oudpres. CR Swart word op die kampus van die Vrystaatse Universiteit gevandaliseer terwyl die polisie passief toekyk

UNESCO het die wens uitgespreek dat ‘n “oplossing op nasionale vlak deur dialoog tussen gemeenskappe gevind kan word”. PRAAG se klag is aan Suid-Afrika se permanente verteenwoordiger by UNESCO oorgedra.

Die aksiegroep het reeds verlede jaar ‘n klag by UNESCO teen die ANC-bewind aanhangig gemaak op die stadium toe die Krugerstandbeeld in Pretoria gevandaliseer is. Die organisasie sukkel egter al ‘n jaar lank om met die departement van omgewingsake, wat met UNESCO skakel, te kommunikeer aangesien die departement weier om Afrikaans te gebruik. PRAAG sal egter binnekort ‘n dringende hofaansoek bring om die departement te dwing om erkenning aan Afrikaans as amptelike taal te verleen.

“Die kommunikasieprobleem met omgewingsake belemmer ons aksie om Afrikanererfenis van vandalisme en vernietiging te red,” sê dr. Dan Roodt van PRAAG. “In teenstelling met die ANC-bewind, kan mens gemaklik met internasionale organisasies kommunikeer aangesien hulle streng by hul taalbeleid hou en veeltaligheid handhaaf. Tot dusver het ons alle briewe aan UNESCO in Frans gerig, aangesien dit een van die amptelike tale van dié liggaam is en dit boonop in Parys gesetel is. Die ANC-bewind regeer vanuit Pretoria, ‘n Afrikanerstad, maar ken blykbaar geen woord Afrikaans nie. Vreemd. Ek is egter vol vertroue dat die howe ons gelyk sal gee dat Afrikaans nie in 1994 opgehou het om ‘n amptelike taal van Suid-Afrika te wees nie.”

PRAAG skakel met verskeie buitelandse regerings in ‘n poging om hulle by die reddingsaksie vir Afrikaanse erfenis te betrek, maar ook om tussen Afrikaners en die ANC-maghebber te bemiddel. “Ons bekyk tans die idee dat aspekte van Afrikanererfenis ook gedeelde erfenis met Europese lande kan wees,” het Roodt verklaar. “Die revolusionêre afro-marxistiese bendes is dus nie net besig om óns erfenis te vernietig nie, maar ook dié van Europa. Ons doen ‘n beroep op alle pro-Westerse groepe wêreldwyd om ons in ons stryd te ondersteun.”

Die aksiegroep is veral optimisties dat die veranderende politieke klimaat in Europa en die VSA pogings om Afrikanererfenis te red ten goede sal strek. “Mnr. Trump se gewildheid in die VSA, asook nuwe regse regerings in Oos-Europa, toon dat die tydvak van Westerse dekadensie ten einde loop,” sê Roodt. “Binnekort gaan die swartman in Suid-Afrika nie meer oor ‘n vrypas beskik om vanweë sy rassehaat vir die blanke ons standbeelde aan te val, of boeke en skilderye te verbrand nie.”

PRAAG blameer ook die hoofstroommedia vir die klimaat van onverdraagsaamheid wat daar teen Afrikanerkultuur en -erfenis geskep is. “Joernaliste in die HSM blaas die haat aan en juig as Afrikanererfenis gevandaliseer word. Ook word streng sensuur gehandhaaf oor enige pogings tot die teendeel: om Afrikanererfenis te red of te bewaar. Die alternatiewe media sal egter oor die beweging teen vandalisme en afro-marxistiese vernietiging berig. En iewers in die toekoms moet vandag se meelopers wat soveel haat en vernietiging teen ons aanblaas weens hul misdade teregstaan. Hulle gaan nog boet,” sê Roodt.

 

 

Vyftien vir Moslemaanval in Ivoorkus vas

Owerhede in die Ivoorkus het 15 mense in hegtenis geneem na aanleiding van ’n aanval vroeër die maand waarin 19 mense dood is en waarvoor Al-Kaïda verantwoordelikheid aanvaar het.

Die polisie is steeds op soek na die vermeende voorbok, wat deur die aanklaer, Richard Adou, as Kounta Dallah geïdentifiseer is, het Reuters berig.

Gewapende mans het op 13 Maart op­ ­swemmers en sonbaaiers gevuur voordat hulle in ­verskeie hotelle op die strandfront in die dorp Grand Bassam, 40 kilometer van die ­kommersiële ­hoofstad, Abidjan, ingestorm het.

“Getuienis is op die toneel gevind wat ons in staat gestel het om sekere individue te identifiseer wat aan die aanval deelgeneem het,” het Adou op ’n mediakonferensie gesê.

Beslag is gelê op wapens, ammunisie, ­klapmusse en voertuie wat vermoedelik in die aanvalle gebruik is. Dit is ondersoek en ’n regter het sowel plaaslike as internasio­nale inhegtenisbevele voorberei, het hy gesê.

Elf inwoners van die Ivoorkus, insluitende drie ­spesiale mag-soldate is in die wilde skietery dood.

Vier Franse burgers is ook noodlottig in die voorval gewond en ander buitelandse ­slagoffers was van Duitsland, Libanon, Masedonië en Nigerië afkomstig.