Nuus Archives - Page 116 of 1583

Franse media kondig byna totale sensuur aan teen ISIS-dekking

Verskeie Franse nuusorganisasies het gesê hulle sal nie meer foto’s plaas van mense wat verantwoordelik is vir terreur nie, om te verhoed dat diesulkes “postuum verheerlik” word.

In ‘n stap wat kennelik die Moslembevolking sal beskerm teen ‘n stygende woede deur wit Franse, is allerlei ander mooiklinkende frases afgestof om die sensuur te regverdig.

Le Monde het in ‘n hoofartikel na die jongste aanval, die moord op ‘n bejaarde priester in ‘n kerk naby Rouen deur twee ISIS-terroriste, verklaar dat hulle sensuur sal toepas.

Onder die opskrif “Verset teen die strategie van haat”, het Le Monde aangevoer dat al die elemente van die samelewing betrokke moet wees in die stryd teen terrorisme, en dat media-organisasies ‘n “spesiale rol” het om te speel.

“Die webwerwe en koerante wat hierdie inligting produseer kan hulself nie verskoon van selfondersoek op verskeie fronte nie. Sedert ISIS-terrorisme die eerste keer sy verskyning gemaak het, het Le Monde sy praktyke ‘n paar keer verander,” het die koerant gesê.

Hulle het reeds nie meer propagandadokumente van Moslemterreur gepubliseer nie.

Ná die aanval in Nice op 14 Julie, toe ‘n vragmotor ingery het in die skare op die openbare vakansiedag Bastilledag, het Le Monde gesê hulle sal “nie meer foto’s van die vermeende moordenaars publiseer nie, om die potensiële uitwerking van postume verheerliking te vermy”.

Gewelddadige aanvalle in Frankryk en nou Duitsland het vreesvlakke en die gevare van ‘n anti-migrante teenreaksie verhoog. Europa, wat eers een van die veiligste dele van die wêreld was, is dit nie meer nie.

Die koerant het gesê hulle sal “voortdurend debatteer” oor ander praktyke met betrekking tot die dekking van terrorisme.

Dit is egter nie duidelik waaroor die debat sal handel as hulle dit reeds sensureer nie.

Die TV-stasie BFM-TV en die Katolieke koerant La Croix gesê hulle sal dieselfde plan van aksie volg.

Die Europe1 radiostasie het gesê hulle sal nie foto’s van oortreders van terroristemoorde op hul webwerf reproduseer nie en ook nie hul name uitsaai nie.

Die France24 televisiekanaal sal na verwagting dieselfde aankondiging maak om nie meer sulke beeldmateriaal in sy uitsendings te vertoon nie.

Die inligtingsverduistering is nou byna totaal in Frankryk.

Michel Field, die uitvoerende direkteur van nuus by die staatsbeheerde Franse televisie, het egter in ‘n verklaring uitgereik en gesê: “Ons plig is om in te lig, dit is die reg van burgers om in kennis gestel te word. En ons moet hierdie wedloop teen self-sensuur en grootse verklarings van voorneme weerstaan.”

ISIS stel video vry na gru-aanval op Franse priester

Die Islamitiese Staat-militantegroep het ‘n video vrygestel van die twee terroriste wat ‘n bejaarde Franse priester tydens ‘n gyselaarsdrama by sy kerk in Normandië keelaf gesny het.

Die video wys die twee aanvallers wat in Arabies hulle steun aan die terreurgroep toesê.

Die twee ISIS-aanvallers het vader Jacques Hamel (84), suster Danielle, nog ‘n non en twee kerkgangers langer as ‘n uur as gyselaars aangehou.

Die onbekende non wat die gru-aanval oorleef het, veg steeds in ‘n hospitaal om haar lewe. Een van die kerkgangers is ook beseer.

Die video is deur ISIS se nuusagentskap vrygestel, maar dit is nog nie deur Franse owerhede geverifieer nie.

Die aanvallers het Dinsdag menslike skilde voor die ingang geplaas om te verhoed dat die polisie die kerk binnestorm.

Een van die aanvallers is geïdentifiseer as die 19-jarige Adel Kermiche, wat twee keer probeer het om na Sirië te reis om by ISIS aan te sluit. Kermiche was op parool.

Skoolvriende sê Kermiche was ‘n stillerige kind en het eers geradikaliseer geraak na die Charlie Hebdo-aanval.

Die twee het ‘n rugsak gehad wat gevul was met iets wat soos plofstof gelyk het, maar die polisie sê dit was nie skadelik nie. Dit het egter ure geneem om die inhoud na te gaan.

Die Gambetta-kerk verskyn op ‘n lys van teikens wat verlede jaar by ‘n ISIS-lid gevind is.

‘n 17-jarige seun, bekend as HB, ‘n familielid van Kermiche, is ook Dinsdag by sy huis in Saint-Étienne-du-Rouvray deur die Franse owerhede in hegtenis geneem.

Die aanvallers is deur skerpskutters doodgeskiet toe hulle uit die gebou gestap het en “Allah Akbar” (God is groot) geskreeu het.

Die priester, vader Hamel, was afgetree en het ingestaan vir die dienende swart priester van die kerk, vader Auguste Moanda-Phuati.

Suster Danielle (foto bo), wat die aanval oorleef het nadat sy in die chaos ontsnap het, hetaan die BBC gesê sy het geweet die twee gaan hulle doodmaak toe sy hulle die kerk sien binnekom.

“Hulle was so gemotiveerd,” het sy gesê. Hulle het op die lidmate geskree en gesê “Julle Christene, julle maak ons dood!”

SA studente uit Turkye teruggeroep

Die Vrystaatse provinsiale regering het 52 studente wat in Turkye studeer, teruggeroep.

Die besluit volg ná die mislukte staatsgreep in dié land wat gelei het tot die sluiting van universiteite.

Die groep studente uit die Vrystaat is in Meimaand na Turkye om hul studies in ingenieurswese, ekonomie, bestuur en sielkunde voort te sit.

Hulle is egter nou terug in Suid-Afrika. ‘n Verdere 37 studente, wat ook in Turkye studeer, was in Suid-Afrika met vakansie toe die geweld uitgebreek het.

‘n Woordvoerder van die Vrystaatse premier, Setjaba Maphalla, sê die studente se veiligheid was die dryfveer vir die besluit om hulle terug te bring.

“Wanneer daar ‘n poging is om ‘n staatsgreep teen ‘n regering uit te voer, is selfs ‘n man op straat altyd in gevaar. In terme van direkte gevaar, was hulle nie blootgestel nie. Ons het aan die studente gedink voor enigiets kon gebeur. Ons wag vir die situasie om te normaliseer. Oor waar die studente geplaas sal word, is die prerogatief van die uitvoerende raad, hulle kan selfs terug na Turkye gaan,” het Maphalla gesê.

Die owerhede in Turkye het intussen lasbriewe uitgereik vir die inhegtenisneming van 42 joernaliste, as deel van die ondersoek na ‘n mislukte staatsgreep op 15 Julie.

Duisende soldate, regters en staatsdienswerkers en selfs skoolkinders is reeds sedert die mislukte staatsgreep in hegtenis geneem (foto hierbo). Die regering van president Erdogan het ook van 87 generaals ontslae geraak.

Sowat 45 koerante en 16 TV-stasies is gesluit in die dae na die staatsgreep, en indiwiduele joernaliste is die week vir die eerste keer geïdentifiseer.

Ten minste 130 mediamaatskappye is gesluit en owerhede teiken enige persone wat beweerde bande het met die Moslem-godsdienstige, Fethullah Gulen, wat in Amerika woon.

Die regering beskuldig Gulen daarvan dat hy die staatsgreep beplan het.

Die regering het verlede week ‘n noodtoestand afgekondig

Ommekeer deur SAUK: 7 uit 8 joernaliste heraangestel

Die Suid-Afrikaanse Uitsaaikorporasie (SAUK) het aangekondig dat hy sewe uit die agt afgedankte joernaliste gaan heraanstel. Die joernaliste is oorspronklik afgedank omdat hulle intern beswaar gemaak het teen die verbod op beriggewing oor onluste en openbare geweld in Suid-Afrika.

Die amptelike woordvoerder van die SAUK, Kaiser Kganyago, het gistermiddag ‘n verklaring uitgereik waarin dit gestel word:

“Die Suid-Afrikaanse Uitsaarkorporasie (SAUK) se bestuur het sy regspan opdrag gegee om nie voort te gaan met regstappe nie en dat die SAUK die sewe afgedankte nuuswerknemers in hul poste sal herbevestig… Die SAUK bly daartoe verbind om sy openbarediensmandaat uit te voer.”

Die SAUK het drie Afrikaanse joernaliste by RSG, Foeta Krige, Suna Venter en Jacques Steenkamp, asook ‘n Indiër van die sakenuusafdeling, Krivani Pillay, summier afgedank soos voorheen berig is. Die rede vir die afdanking wat deur die SAUK aangevoer is, is die “verbreking van hul dienskontrakte”, maar die Arbeidshof het Dinsdag bevind dat dié rede ongeldig is en beveel dat hulle heraangestel word.

Tot dusver het die SAUK egter gedreig dat hy teen die Arbeidshofbeslissing gaan appelleer, maar kragtens die jongste verklaring het hy van dié besluit afgesien.

Gister het die drie Afrikaanse joernaliste in die voorportaal van die SAUK gewag om vir diens aan te meld, maar is nie in die gebou toegelaat nie (foto hier bo).

Die ommekeer van die SAUK volg nadat die joernaliste se regspan gedreig het om ‘n dringende hofbevel aan te vra dat dié liggaam die Arbeidshof se bevel van Dinsdag moet nakom.

Die agste afgedankte joernalis, Vuyo Mvoko, wat blykbaar op ‘n vryskutbasis aangestel is, se dienskontrak is nie deur die SAUK heringestel nie.

Oud-LP in selfmoordbom-aanslag

‘n Voormalige Somaliese parlementslid wat in 2010 by al-Sjabaab aangesluit het, was een van twee selfmoordbomaanvallers wat die lewe van 13 mense naby ‘n basis van die Verenigde Nasies (VN) en die Afrika-unie (AU) geëis het.

Die motorbomme in voertuie wat deur die selfmoordaanvallers bestuur is, het Dinsdagoggend naby Mogadisjoe se lughawe ontplof.

Een van die voertuie het skaars 200 meter van die basis ontplof en meestal die lewe van veiligheidspersoneel geëis.

Salah Badbado (53) het vanaf 2004 tot 2010 in Somalië se parlement gedien.

Hy het in 2010 tydens ‘n mediakonferensie aangekondig dat hy die politiek verlaat om hom by die Somaliese filiaal van al-Kaïda aan te sluit.

Djihadis wat priester keelaf sny het elektroniese armband gedra

Een van die twee ISIS-aanvallers wat ‘n Franse klooster bestorm het en ‘n bejaarde priester (85) vroeg Dinsdagoggend onthoof het, was goed bekend aan Franse teenterrorisme-amptenare.

Hy is as ‘n bedreiging vir veiligheid beskou en het selfs onder huisarres geleef. Hy het sy elektroniese armband gedra ten tyde van die aanval, volgens Franse amptenare.

Geïdentifiseer in Franse nuusberigte as “A.K.”, het die 19-jarige Franse burger na bewering ‘n “fiche S” oftewel “S-kaart”.

Dit is ‘n kategorie wat gebruik word deur die Franse wetstoepassing om gevaarlike individue wat ernstige bedreigings vir nasionale veiligheid inhou, te merk.

Adel Kermiche, A.K., het twee keer probeer om Sirië te bereik in 2015, eers via München en een keer via Genève.

Terwyl hy nog minderjarig was, het hy in Maart 2015 ‘n eerste reis na Sirië onderneem.

Dit het vinnig geëindig toe hy in hegtenis geneem is in München, Duitsland, voordat hy teruggestuur is Frankryk toe.

Hy is onder huisarres geplaas in sy ouerhuis in Saint-Etienne-du Rouvray.

‘n Paar maande later, nadat hy 18 jaar oud geword het, het hy weer probeer om na Sirië te reis, hierdie keer vergesel van ‘n jeugvriend.

Die twee mans het deur Switserland gereis, maar Adel Kermiche is in hegtenis geneem op die lughawe van Genève op 14 Mei en is daarna op ‘n Europese terroristelys geplaas.

Hy was kortliks in die tronk in Switserland voordat hy uitgelewer is aan Frankryk, waar hy in hegtenis geneem is en aangekla is van kriminele assosiasie en bande met ‘n terroriste-onderneming.

Hy is vrygelaat op 22 Maart vanjaar met ‘n elektroniese moniteringsband, ten spyte van ‘n appèl deur ‘n anti-terreuraanklaer in Parys. Sedertdien was die djihadis onder huisarres.

Ten spyte van die elektroniese monitering, was hy geregtig om uit die huis te wees tussen 8:30-12:30 nm, volgens die weeklikse Franse nuustydskrif Le nouvel observateur.

Die kerk waar vader Jacques Hamel vermoor is, was op ‘n “treflys” van Sid Ahmed Ghlam – nog ‘n vermeende djihadis wat saamgesweer het om aanvalle op twee kerke in ‘n voorstad van Parys in April 2015 uit te voer.

Maar die 24-jarige Algeriër, wat ook bekend is aan veiligheidsdienste, is in hegtenis geneem voordat hy dit kon doen.

Hy het homself beseer toe hy homself per ongeluk raakgeskiet het en moes ‘n ambulans ontbied, waarna die veiligheidsdiens hom opgespoor het en hy in hegtenis geneem is.

Die twee terroriste van Dinsdag is deur die polisie doodgeskiet toe hulle die kerk uitgekom het met hulle gyselaars.

Een oorlewende, ‘n non by name Suster Danielle, het vertel hoe vader Hamel gedwing is om op sy knieë te staan sodat hulle sy keel kan afsny.

“Hulle het dit afgeneem,” het sy aan BFM televisie gesê. “Hulle het ‘n soort van preek rondom die altaar in Arabies gegee. Dit was ‘n gruwel.”

Suster Danielle kon ontsnap in die verwarring en het ‘n verbygaande motoris voorgekeer wat die polisie gebel het.

SAUK-joernaliste mag nie terug werk toe, ten spyte van hofbevel

Die SAUK het by wyse van ‘n brief van sy prokureurs (sien hier onder) aangedui dat hy teen gister se bevinding van die Arbeidshof gaan appelleer en dat die uitsaaier dus nie gaan toelaat dat Foeta Krige, Suna Venter, Krivani Pillay en Jacques Steenkamp weer vir diens aanmeld nie.

Regter Robert Lagrange van die Arbeidshof het gister in die guns van die vier afgedankte joernaliste bevind en beveel dat hulle heraangestel word. Deel van die hofbevel het behels dat hulle terugkeer werk toe en nie verder aan tugmaatreëls onderwerp moet word nie.

Enkele minute gelede het hulle egter in die voorportaal van die SAUK-gebou in Johannesburg gewag dat ‘n beampte van menslike hulpbronne hulle te woord staan (foto hier bo).

Die prokureursbrief hier onder is deur Dirk Hermann van Solidariteit getwiet.

FBI gaan Demokrate se epos-fiasko ondersoek

Die Amerikaanse Federale Speurdiens (FBI) het Maandag aangekondig dat ondersoek ingestel word na die kuberkrakery van e-posse wat vir ‘n groot verleentheid vir die Demokratiese nasionale komitee gesorg het.

Die Clinton-veldtog beskuldig Rusland van aandadigheid en sê Moskou probeer die Amerikaanse presidentsverkiesing beïnvloed.

Die e-posse wat deur WikiLeaks uitgelek is, het onthul dat partyleiers probeer het om die veldtog van Hillary Clinton se teenstander, Bernie Sanders, te ondermyn.

Dit het die Demokrate se nasionale konvensie )DNC) op die eerste dag in chaos begin het en die partyleier genoop om te bedank.

“Dit is kommerwekkend dat sommige deskundiges sê dit is deur die Russe gedoen met die doel om Donald Trump te help,” het die bestuurder van Clinton se verkiesingsveldtog, Robby Mook, aan ABC gesê.

Terwyl sommige deskundiges die vinger na Moskou wys, het ander tot versigtigheid gemaan. Rusland het enige betrokkenheid ontken en die bewerings as “absurd” afgemaak.

Russiese minister van buitelandse sake Sergei Lawrof, het nalv die beskuldigings deur die Clinton-veldtog net voor sy vergadering van die Amerikaanse minister van buitelandse sake John Kerry in Laos gesê: “Ek wil nie vier-letter woorde gebruik nie.”

Trump het voorheen gesê die VSA behoort saam te werk met die Russiese president, Wladimir Poetin.

Die stigter van die Wikileakswebwerf Julian Assange, het aan NBC News gesê daar is geen bewyse dat die e-pos deur die Russiese intelligensie-agentskappe gesteel is nie.

Bill Clinton sal een van die toesprake lewer by die DNC. Hy word steeds van verkragting beskuldig.

Die konvensie het vroeër gedreunsing “Black Lives Matter” toe die “Moeders van die Beweging” die DNC toegespreek het.

Ondersteuners van die Demokrate het die Amerikaanse vlag buite die saal aan die brand gesteek.

Tot dusver het nie een van die deelnemers ‘n woord gerep oor terreur nie.

Hillary is amptelik verkies tot die Amerikaanse Demokratiese Party se presidentskandidaat vir die verkiesing in November.

Clinton het by die Demokrate se Nasionale Konvensie in Philadelphia die nodige aantal stemme van die onderskeie state op haar verenig en so die eerste vrou in Amerika geword wat aan die stuur van ‘n groot politieke party staan.

Clinton sal Vrydagoggend Suid-Afrikaanse tyd die benoeming amptelik aanvaar.

Haar teenstaander en slagoffer van die epos-debakel in die wedloop om die benoeming, Bernie Sanders, het sy steun aan Clinton toegesê in ‘n poging om die verdeeldheid binne die party toe te smeer.

Brittanje bly in Afrika na Brexit sê nuwe minister

Tobias Ellwood is pas aangestel as die nuwe minister belas met Afrika in die Verenigde Koninkryk se kantoor vir buitelandse en statebondsaangeleenthede.

Ná sy aanstelling het Ellwood gesê Brittanje se werk in Afrika is nie afgehandel nie, en Brexit sal nie daaraan verander nie.

“Die Verenigde Koninkryk het sterk bande met Afrika en ek wil verseker dat die mense van Afrika weet dat die internasionale samewerking en ons betrokkenheid op die vasteland sal voortgaan, al is Brittanje buite die Europese Unie,” het Ellwood gesê.

“Die ekonomiese potensiaal van Afrika is groot met een derde van alle Afrika-ekonomieë wat vanjaar na verwagting met vyf persent of meer sal groei. Met ons diplomatieke netwerk in 36 lande, 19 kantore van die Britse Raad en 16 sogenaamde DFID-kantore, is Brittanje goed geposisioneer om met Afrika saam te werk om hierdie ekonomiese potensiaal vir uitnemendheid te ontwikkel.

“Gegewe dat een in elke drie mense in Afrika tussen die ouderdom van 10 en 24 jaar oud is, is dit belangrik om te verseker dat hulle hoop vir die toekoms het.

“Ten einde Afrika-ekonomieë ’n hupstoot te gee, is dit ook belangrik om stabiliteit en veiligheid in die vasteland, en in die besonder in Oos-Afrika, te verbeter.

“Ons wil voortgaan om met die Afrika-unie, en deur middel van ons rol op die Veiligheidsraad van die Verenigde Nasies, aan hierdie belangrike kwessies aandag te gee,” het Ellwood gesê.

Hy het die stryd teen Boko Haram in Nigerië, die Ebola-kwessie en veiligheidsbestuur in Somalië uitgesonder.

Ellwood was verlede jaar in die nuus nadat hy weer probeer het om buitensporige vermorsing van openbare geld, wat ministers veral verkwis, te verdedig.

Hy het voorheen gesê sy astronomiese salaris en byvoordele is nie genoeg nie.

Hy het onlangs die regering se wynkelder verdedig, nadat dit aan die lig gekom dat grootkoppe weekliks oesjaarbottels van £500 elk wegslaan wat hulle verwag vervang moet word.

Ellwood het verlede week ‘korreksies’ uitgereik oor humanitêre skendings in Jemen waar Saoedi-Arabië Britse wapentuig teen burgelikes aanwend.

20 beseer, winkelsentrum beskadig toe tornado Tembisa tref (met video)

Volgens die jongste syfers is 20 mense beseer toe ‘n tornado die swart lokasie Tembisa, noordoos van Johannesburg, getref het (sien foto’s en video hier onder). Die Oos-Randse metro, Ekurhuleni, het ‘n hele noodoperasie aangekondig en daar gaan aan minstens 400 dakloses hulp verskaf word.

Sommige beserings is veroorsaak toe die dak van ‘n winkelsentrum, die Phumulani Mall, ineengestort het. Reddingswerkers moes 11 mense uit die puin red.

Ook die plaaslike hospitaal, die enigste openbare hospitaal in die hele omgewing, is deur die werwelstorm beskadig. ‘n Deel van die dak het meegegee en bome is ontwortel, volgens ‘n woordvoerder van die hospitaal, Steve Mabona.

Die 20 beseerdes is vanaf die winkelsentrum na die hospitaal gebring, waar die werwelstorm ook die heining, motorafdakke en 20 voertuie beskadig het.

“Gelukkig is geen pasiënt of werknemer beseer as gevolg daarvan nie,” sê Mabona. “Die hospitaal kyk reeds na die mense wat beseer is toe die Phumlani Mall in Tembisa verwoes is, en omtrent 20 mense is na die hospitaal oorgeplaas.”

‘n Hewige haelstorm het ook tydens die tornado gewoed.