Kategorie: Nuus

SA wag steeds vir kerkramp-oorskot

Suid-Afrikaners wag steeds dat die liggame van diegene wat in die kerkgebouramp in Lagos in Nigerië dood is, na Suid-Afrika teruggebring word.

Daar het glo 85 Suid-Afrikaners omgekom in die ramp by die Synagogue Church of All Nations toe ‘n multi-verdieping gastehuis verbonde aan die kerk, van die Nigeriese prediker TB Joshua, ineengestort het in Lagos op 12 September.

Daar is toenemende diplomatieke spanning tussen Suid-Afrika en Nigerië oor die kwessie.

Daar is bewerings dat Nigerië die proses dalk doelbewus vertraag.

TB Joshua het onlangs geld aan die slagoffers belowe.

Die minister in die Presidensie Jeff Radebe het intussen aangekondig dat DNS-monsters van die 116 slagoffers by ‘n laboratorium in Suid-Afrika vir ontleding aangekom het.

Die DNS-proses is in die hande van die Nigeriese owerhede, wat ‘n laboratorium in Stellenbosch, Wes-Kaap aangestel het om die ontleding te doen.

Die hoof mediese ondersoeker van Lagosstaat het verlede week gesê die nadoodse ondersoek toon dat ‘n ontploffing nie die oorsaak van dood kan wees nie.

Die verminkte liggame toon eerder tekens van ‘n gebou wat ineengestort het.

“Liggame is vermink, met kopbeserings, gebreekte bene, gebreekte ribbes,” sê professor Obafunwa wat die geregtelike doodsondersoek behartig het.

Die “Profeet” TB Joshua het beweer dat sabotasie, moontlik ‘n vliegtuig wat laag oor die gastehuis gevlieg het, die oorsaak van die ongeluk was.

‘n Oorlewende van die ramp, Anthony van der Byl, het gesê hy is egter oortuig dat die ineenstorting geen ongeluk was nie en maar ‘n terreur-aanval.

“Daar was ‘n groot vliegtuig wat oor die gebou ‘n paar keer gevlieg het voor die voorval en is na die ineenstorting nie weer gesien nie. Ek is in die konstruksiebedryf en as ‘n iets padgee, dan sal die gebou nie so in duie stort op die manier waarop dit gebeur het nie. Op sommige video-opnames kan jy ‘n ontploffing voor die ineenstorting sien.”

Maar bou-inspekteurs in Nigerië het gesê die mees waarskynlike oorsaak van die tragedie is die toevoeging van ekstra verdiepings sonder om die fondamente te versterk.

Die Minister vir Vroue en Kinders in die Presidensie, Susan Shabangu, sê hulle wag nog dat Abuja toestemming gee om die liggame terug te bring.

Ekonoom waarsku dat beurtkrag ekonomie kan knou

Die ekonoom Mike Schüssler sê die huidige ronde van beurtkrag sal ‘n ernstige uitwerking op die Suid-Afrikaanse ekonomie hê.

Eskom het aangekondig dat beurtkrag regdeur die land hierdie week sal geld.

Dié stap is geneem nadat ‘n silo wat tonne steenkool bevat, gekraak het en voorrade aan al ses eenhede van die Majuba-kragstasie in Mpumalanga geraak is.

Die kragstasie voorsien 10% van elektrisiteitkapasiteit.

Schüssler sê terwyl huishoudings ook verontrief sal word, gaan swaar nywerhede en klein besighede die hardste getref wees.

Hy sê hulle vra elke besigheid om terug te sny op hul kragverbruik wat weer in die vervaardigingsuitset weerspieël sal word.

Dit sal matriekeksamens waarskynlik raak sowel as verkeersvloei met baie verkeersligte wat buite werking sal wees.

“Dit kom op die ergste tyd vir ons net wanneer ons pas opgetel het vir ‘n herstel,” het hy bygevoeg.

Intussen het Andrew Etzinger, Eskom se woordvoerder verwys na die beurtkrag-skedule sodat inwoners hul beplanning kan aanpas.

Die skedule is beskikbaar by loadshedding.eskom.co.za. Mense kan ook die oproepsentrum by 0860037566 skakel.

Taakspan sal glo onderwyspos-bedrog oopvlek

Die Departement van Basiese Onderwys het bekend gemaak dat ‘n taakspan begin het om die beweerde verkoop van onderwysposte te ondersoek.

‘n Woordvoerder van die Departement, Elijah Mhlanga, sê verskeie onderhoude is reeds gevoer, het RSG berig.

Minister Angie Motshekga het die span op die been gebring na talle gerugte dat amptenare, insluitende van vakbonde, poste verkoop.

Die span se opdrag is in Junie gefinaliseer. Die duur van die ondersoek sal bepaal word nadat die omvang van die probleem vasgestel is. ‘n Verslag sal daarna aan die Minister voorgelê word.

Vroeër vanjaar het gerugte die ronde gedoen dat lede van die vakbond SADOU poste vir hoofde- en adjunkhoofde vir soveel as R30 000 elk verkoop het.

SADOU het herhaaldelik enige betrokkenheid daarby ontken.

Die vakbond se sekretaris-generaal, Mugwena Maluleke, het gesê individue wat SADOU se naam misbruik, was betrokke by die bedrogspul.

Die Nasionale Kongres van Skoolbestuursliggame het in Mei vanjaar gesê hy is van mening dat verskeie vakbonde by die beweerde poste-bedrogspul betrokke kan wees.

Doodsdreigemente en laster teen Steve Hofmeyr

Steve Hofmeyr het verlede week, voor sy optrede Saterdag by Afriforum se gratis musiekfees by die Voortrekkermonument, teenoor praag vermeld dat hy tans ‘n ongekende aantal doodsdreigemente ontvang. Vanoggend berig die media dat daar Saterdag spesiale veiligheidsmaatreëls vir die sanger en Afrikaanse aktivis getref is.

Die Johannesburgse dagblad Beeld, wat vroeër met ‘n veldtog teen die laaste Afrikaanse kampus op Potchefstroom begin het deur studente van “Nazi-rituele” te beskuldig, verkeer op die voorpunt van die aksie teen Hofmeyr omdat hy dit durf waag het om enkele weke gelede Die Stem te sing. Die ekstreemlinkse redakteur van Beeld, Adriaan Basson, neem Hofmeyr ook kwalik omdat hy onlangs beklemtoon het dat swartes weens hul deelname aan die stelsel en verskeie ander faktore mede-argitekte van apartheid was.

Tesame met Adriaan Basson, is die buikspreker Conrad Koch wat “namens” sy pop Chester Missing vir 144 000 volgelinge twiet, besig om mense teen Hofmeyr en Afrikaners in die algemeen op Twitter te probeer opsweep. Koch huiwer nie om vloekwoorde en lasterlike taal te gebruik nie en tipeer Hofmeyr om die beurt as “moroon”, “idioot” en “rassis”. Hier is ‘n voorbeeld van een van sy twiets waarin hy openlik dreig dat hy Hofmeyr gaan vernietig.

praag het vanoggend boodskappe met Hofmeyr uitgeruil waarin hy Koch daarvan beskuldig dat hy “regter, jurie en laksman speel”.

“Conrad Koch is besig om die swart publiek met sy verdraaiings, asook borge soos Williams Hunt en Pick n Pay, teen my af te speel,” meen Steve Hofmeyr.

Conrad Koch en sy mede-Boerehater, Zapiro
Conrad Koch en sy mede-Boerehater, Zapiro

Williams Hunt op Port Elizabeth het ‘n week gelede hul borgvoertuig ‘n dag vroeë van Hofmeyr teruggevra nadat Koch hul telefoonnommer op Twitter gepubliseer het en sy volgelinge aangemoedig het om by die motorhandelaar beswaar teen Hofmeyr te maak. Tans spits Koch hom daarop toe om die Afrikaans is Groot-musiekfees, waar Steve Hofmeyr een van die genooide kunstenaars is, se borgskappe insgelyks te laat terugtrek. Hy plaas veral druk op Pick n Pay om sy borgskap aan dié Afrikaanse musiekfees te onttrek.

Op sy beurt het Steve Hofmeyr gewaarsku dat daar “vele afleggings kan geskied as gevolg van Conrad Koch se veldtog. Sowel Links as Regs kan die maatskappye begin boikot. Williams Hunt het in ‘n benoude twiet hul houding verander deur skielik te verkondig dat hulle “Steve weer sal borg” nadat inwoners van PE en boere in omliggende streke te kenne gegee het dat hulle eenvoudig hul voertuie sal teruggee en daardie takke sal boikot oor hul ondeurdagte boikot teen my.”

Pick n Pay is insgelyks huiwerig om die hele Afrikaanse publiek te vervreem deur die sensuurveldtog deur Beeld en Conrad Koch teen Steve Hofmeyr te steun. Steve Hofmeyr sê: “Pick n Pay, een van die borge van Afrikaans is Groot het laat weet dat hy nie met individuele kunstenaars onderhandel nie maar alleen met ‘n agentskap.”

By Saterdag se musiekfees by die Voortrekkermonument het Steve Hofmeyr, tesame met ‘n skare van 20 000 mense, weereens Die Stem gesing, ondanks die heftige kritiek wat Beeld en ander linkse media reeds weke lank teen Hofmeyr en die meer patriotiese Afrikaners monster.

Nadat Hofmeyr aanvanklik Die Stem by die Innibos-kunstefees op Nelspruit gesing het, het Vodacom intussen laat weet dat hy voortaan van die organiseerders sal verwag dat hulle in die konktrakte van kunsternaars die sing van Die Stem sal verbied.

Intussen het Conrad Koch vanoggend op Cape Talk verskyn waar hy gesê het:

“Steve Hofmeyr het die grens oorgesteek en verdien daarom om geöstrajeer te word toe hy gesê het dat swartmense self die argitekte van apartheid was. Ek kan nie met Steve Hofmeyr argumenteer nie, want ek het ‘n meestersgraad in antropologie. Die rede waarom Hofmeyr geloofwaardigheid het, is omdat groot maatskappye hom daardie geloofwaardigheid gee. Hofmeyr sê dat swartes nie ontwikkel genoeg was om aan ons samelewing deel te neem nie.”

Koch het op sy woernaal in nog ‘n aanval op Steve Hofmeyr geskryf:

Steve said: “If the world doesn’t buy into African systems, mentality and reputation, it isn’t always their fault”. Let’s start with the awkward fact that he stole his entire language from black people. Afrikaans was first written in Arabic by an Iman translating the Koran. Salaam alaikum, Oom Steve. [beklemtoning bygevoeg – red.]

Dit wil voorkom asof Koch ‘n voorstander is van Afrosentrisme, ‘n Amerikaanse doktrine wat deur Martin Bernal verwoord is. Daarvolgens het Europeërs en blankes hul kennis, wetenskap en tegnologie oor die eeue heen van swartmense in Afrika “gesteel”, net soos blanke boere hul grond “gesteel” het.

Volgens Koch tydens sy CapeTalk-onderhoud, sou Steve Hofmeyr se optredes lankal verbied gewees het indien hy gesê het “dat Jode die argitekte van apartheid was of dat ons seks met bokke in die openbaar moet hê. Wat Steve Hofmeyr sê, is absoluut weersinwekkend, hy ondersteun die stereotipes van kolonialisme en is besig met volledige (full-blown) rassisme.”

Koch se veldtog word ook deur bekende lede van staatsveiligheid en veral die misdaadintelligensie-eenheid ondersteun. ‘n Polisieman op Stellenbosch wat gereeld smeerveldtogte teen Afrikaanse openbare figure het verwoed saam met Conrad Koch begin twiet, asook die name van dr. Dan Roodt se kinders op Twitter vrygestel in ‘n sinistere poging om hom te intimideer weens die steun wat hy tot dusver aan Hofmeyr op Twitter en elders gebied het.

In sy kommentaar het dr. Dan Roodt gesê: “Pleks daarvan dat die misdaadintelligensie-eenheid plaas- en ander moorde probeer oplos, is hulle besig met lasterveldtogte en intimidasie van Afrikaanse skrywers en kunstenaars.”

Vrese dat hospitale, lughawens sonder krag sit

Suid-Afrikaners staal hulself vir landwye kragonderbrekings.

Die uitvoerende hoof van Eskom, Tshediso Matona, het egter vrese oor beurtkrag by lughawens en hospitale probeer besweer.

Hy het gesê sulke sleutelinstellings sal nie by die kragvoorsiener se voorgestelde beurtkragskedule ingesluit word nie.

Matona het die media by die Eskomhoofkantoor in Megawattpark in Johannesburg toegespreek om verbruikers te maan dat beurtkrag vir minstens nog ‘n week sal voortduur.

Talle dele van die land is steeds sonder krag.

Uitgebreide beurtkrag het in die land se groot stede het voorgekom nadat ‘n steenkoolsilo by die Majubakragstasie in Mpumalanga ineengestort het.

Beurtkrag is Sondag in Johannesburg, Pretoria, Kaapstad en Port Elizabeth toegepas.

WGO-liggaam wil ebola-entstowwe vir SA bespoedig

Die organisasie African Vaccine Regulatory Forum (AVAREF) het in Pretoria vergader in ‘n poging om wyses te bespreek waarop entstowwe asook die behandeling vir die ebolavirus so gou moontlik deur Suid-Afrikaanse owerhede goedgekeur kan word.

Die eerste twee dae van die vergadering sal gewy word aan die nood wat die ebola-virussiekte (EVD) veroorsaak en die potensiële behandeling rakende entstowwe, medisyne en bloedprodukte.

Die forum sal veral op GlaxoSmithKline se GSK ChAd3 en Newlink/NIH VSV fokus as voorkeurkandidaat-ebola-entstowwe.

AVAREF is ‘n onderdeel van die Wêreldgesondheidsorganisasie. Dit is die negenede vergadering in die land.

Verlede week het die organisasie bevestig dat daar 13 567 gevalle van ebola in ses lande is.

Die WGO se verteenwoordiger in Afrika, Dicky Akanmori, sê navorsing word binne en buite Afrika gedoen.

Dit sluit Guinee, Liberië, Mali, Sierra Leone, Spanje en Amerika in.

Die pandemie het uitgebreek nadat Amerikaanse navorsingsinstellings met ‘n BSL-4-klaring (Bio Safety Lab Level-4) klaarblyklik entstowwe teen die siekte getoets het.

Daar is drie Amerikaanse laboratoriums wat spesialiseer in biologiese wapennavorsing in Wes-Afrika.

Twee van die lande waar die aanvanklike gevalle van ebola aangeteken is, naamlik Guinee en Liberië het nie die Internasionale Konvensie teen Biologiese Wapens onderteken nie.

Die derde, Sierra Leone, is ‘n voormalige Britse kolonie wat dit wel onderteken het.

Die vergadering sal openbare gesondheidsamptenare en regulatoriese en industriële kundiges bymekaar bring in ‘n poging om die lewering van nuwe entstowwe te bespoedig asook regulatoriese hersiening ander behandelings teen “EVD” te hersien.

Barbaarse boosaards slaan toe in jongste plaasmoord

Die tragiese, sinnelose en barbaarse moord op die bejaarde mnr. Janse van Vuuren is die jongste op die telbord teen diegene wat ‘n nuwe, verbeterde Suid-Afrika aan Afrikaners probeer smous.

Die plaasaanval Donderdagaand om ongeveer 23:00 op die plaas Nuwejaarsbos, het die groter gemeenskap weer geruk. Die plaas is tussen Odendaalsrus en Kroonstad.

Vyf swart plaasaanvallers het mnr. Janse van Vuuren oorval toe hy masjiene by sy melkstal gaan afskakel het. Hulle het sy vuurwapen van hom afgeneem en hom daarmee doodgeskiet.

Die boosaards is na sy huis waar hulle sy 16-jarige kleindogter voor haar ma en sussie verkrag het. Die aanvallers het met mnr. Janse van Vuuren se bakkie, selfone, kontant en vuurwapens gevlug.

Die bakkie is verlate langs die pad gevind en die aanvallers is nog op vrye voet.

Terwyl die land in rep en roer is oor die moord op die kaptein van Bafana Bafana, Senzo Meyiwa, sal hierdie gruweldaad weereens ongesiens verbygaan in die oë van die owerhede.

Hierdie moorde is weereens ʼn bewys dat kriminele boosaards, onder aanmoediging van buitelandse NGO’s, geen respek vir Afrikaners se mees basiese reg op lewe het nie.

Ook die strawwe wat swart moordenaars opgelê word, dien klaarblyklik nie meer as afskrikmiddel nie, maar as aanmoediging vir ‘n etniese suiweringstog.

Daar sal geen beloning vir die inhegtenisneming van hierdie barbaarse moordenaars uitgereik word nie, en owerhede sal nie aan hul grondwetlike verantwoordelikhede herinner word nie, selfs nie deur ‘n media-instelling wat feitlik oor ‘n totale nuusmonopolie beskik nie, naamlik Media24.

 

 

 

Slegs 57% van mense in Suid-Afrika werk

Die statistikus-generaal Pail Lohohla, het gister Suid-Afrika se droewige indiensnemingsyfers bekendgemaak. Nie net is werkloosheid hoog nie, maar vele mense is ook al baie lank sonder werk, wat van strukturele werkloosheid getuig.

“Die verhaal in Suid-Afrika is dat ons in ‘n hoëwerkloosheidstoestand verkeer, oor ‘n baie lang tydperk, vanaf 2008, maar dit strek tot 2001 terug,” het hy tydens die vrystelling van Statistiek Suid-Afrika se kwartaallikse indiensnemingsopname in Pretoria gesê.

“Hierdie toestand duur reeds vir geruime tyd. Diegene wat in nie-permanente werke verkeer, is regtig kwesbaar… As jy nie werk nie, verloor jy jou vaardighede en jy verloor jou vermoë om te presteer, en dan raak jy minder diensbaar.”

Diegene wat nie werk nie bevind hulle in ‘n afwaartse siklus en as gevolg daarvan voel hulle die naderende uitwerking van armoede.

Lehohla sê dat langtermynwerkloosheid ‘n probleem is wat beleidmakers in die gesig staar as hulle sou poog om werkloosheid op te los.

“Ons sien dat 1,4 miljoen mense reeds langer as vyf jaar sonder werk sit. Die vraag is: kan sulke mense gerehabiliteer word?” het Lehohla tydens sy aanbieding gevra.

“Beleid behoort nou te fokus op diegene wat reeds langer as vyf jaar geen werk het nie. Is daar ‘n klein tree’tjie na redding of is jy (tot werkloosheid) gevonnis?”

‘n Totaal van 1,1m mense is reeds vir een tot drie jaar sonder werk, 1m vir drie tot vyf jaar, 739 000 vir ses maande tot ‘n jaar, en 737 000 vir minder as ses maande.

“Wat behoort ons te prioritiseer? Plaas ‘n mens die klem op diegene wat oor die kort termyn werkloos is of op diegene wat reeds oor die lang termyn geen werk het nie?” vra Lehohla.

Wat werklose swartmense betref, bevind 67,3% hulle in langtermynwerkloosheid, asook 64,8% van werklose Indiërs en Asiërs, 59,9% van werklose kleurlinge en 50,1% van werklose blankes.

Wat provinsies betref, beskik die Vrystaat oor die hoogste werkloosheidsyfer, op 34,6%, gevolg deur die Noord-Kaap (29,7), Oos-Kaap (29,5), Mpumalanga (29,3), Noordwes (26,8), Gauteng (24,6), Kwazulu-Natal (24,1), Wes-Kaap (23,6) en Limpopo (15,9).

Hoe lyk Suid-Afrika se arbeidsmag?

Die potensiële arbeidsmag van Suid-Afrika bestaan uit 35,5 miljoen mense wat tussen die ouderdom van 15 en 64 verkeer. ‘n Kleiner totaal van 20,3m maak egter volgens Statistiek Suid-Afrika die werklike arbeidsmag uit. In totaal het 15,1m mense tydens die derde kwartaal van 2014 oor werk in Suid-Afrika beskik, terwyl 5,2m werkloos was.

Uit die 15,1m wat in diens was, het 10,8m in die formele sektor gewerk en 2,4m in die informele sektor. ‘n Totaal van 670 000 was in die landbousektor in diens terwyl 1,29m in privaat huishoudings gewerk het.

Die arbeidsmagdeelnamekoers, wat uit die totale arbeidsmag gedeel deur die bevolking van werkende ouderdom bestaan, was 57,1%, wat ‘n daling van 0,2% vanaf die tweede kwartaal verteenwoordig.

Die opnamekoers, wat die aantal werkers gedeel deur die bevolking van werkende ouderdom verteenwoordig, was 42,6%, wat ‘n daling van 0,1% vanaf die tweede kwartaal verteenwoordig.

Nog indiensnemingstatistieke

Só lyk die persentasies werknemers in verskillende sektore:

Gemeenskaps- en maatskaplike dienste: 23,2%

Handel: 21,1%

Finansiële dienste: 13,4%

Vervaardiging: 11,5%

Boubedryf: 8,5%

Privaat huishoudings: 7,8%

Vervoer: 6,2%

Landbou: 4,5%

Mynbou: 2,9%

Nutsmaatskappye: 0,8%

Uit die bevolking op werkende ouderdom, was 27,8% van vroue amptelik werkloos, wat ‘n daling van 0,3% vanaf die tweede kwartaal verteenwoordig, terwyl 23,4% van mans werkloos was.

Die definisie van ‘n werklose is diegene tussen 15 en 64 jaar wat aktief na werk op soek is of wat gepoog het om ‘n onderneming in die weke voor Statistiek SA se opname te begin.

As die uitgebreide definisie van werkloosheid gebruik word, is 39,9% van vroue en 32,3% van mans werkloos.

Twee stropers doodgeskiet

Twee renosterstropers is doodgeskiet en ses is in hegtenis geneem, het RSG berig.

SanParke sê in die eerste voorval het veldwagters van Krokodilbrug op drie vermeende renosterstropers afgekom.

Hulle is agterna gesit en twee is noodlottig gewond, terwyl die derde oor die grens na Mosambiek gevlug het.

‘n Jaggeweer, ammunisie en ander toerusting is gekry.

In die tweede operasie is ses verdagtes buite die westelike grens van die Nasionale Krugerwildtuin deur SanParke se Omgewingsmisdaad-ondersoekeenheid in hegtenis geneem.

Daar is beslag gelê op ‘n jaggeweer, ammunisie en twee motors.

Die inhegtenisnemings is die jongste in twee weke van suksesvolle operasies, waartydens 35 vermeende renosterstropers aangekeer is.

Louis Trichardt: Hoes en betaal is die wet van Transvaal

Die voorsitter van die Louis Trichardt-voorsittersvereniging (VV), André Naudé het die skikking verwelkom om die dorp se naam in ere te herstel.

Hy sê inwoners sal nou daarop fokus om die erfenis van die dorp te bewaar.

Volgens die skikking sal Makhado in Limpopo weer as Louis Trichardt bekendstaan.

Die minister van kuns en kultuur en die Geografiese Pleknaamraad het gister buite die hof met die vereniging geskik.

Die Hooggeregshof in Pretoria het daarna die besluit om die dorp se naam na Makhado te verander, ter syde gestel.

Die skikking volg nadat die Pleknaamkomitee nie ‘n rekord van voldoende konsultasie oor die naamsverandering kon verskaf nie.

Naudé sê die komitee het dit nie in ag geneem dat die dorpsnaam reeds meer as 110 jaar oud is nie.

Die minister (eerste respondent), die voorsitter van die Suid-Afrikaanse Geografiese Nameraad (tweede respondent) en die Makhado Munisipaliteit (derde respondent) het die stryd om Louis Trichardt se naam na Makhado te verander, Donderdagoggend gewonne gegee.

Die naam Louis Trichardt is in die Staatskoerant van 14 Oktober 2011 (Staatskoerant 34670, Kennisgewing 851) as Makhado gepubliseer.

Ná aanleiding hiervan het die Voorsittersvereniging (VV) ‘n hersieningsaansoek gebring om dié publikasie tersyde te stel.

Ná maande se gespook om dokumentasie uit die respondente te kry oor die Minister van Kuns en Kultuur se besluit om die naam te verander, het die VV ‘n aansoek gebring om die drie respondente te verplig om op 30 Oktober 2014 die nodige dokumentasie te verskaf.

“Ons het hulle verplig om die dokumentasie beskikbaar te stel waarvolgens die Minister se besluit geneem het om die naam te verander. Hulle kon dit nie beskikbaar stel nie. Hulle het geweet ons gaan die bevel kry en het besluit om die handdoek in te gooi. Hulle het besef hulle kan nie met die saak voortgaan nie, want hulle het nie die dokumentasie gehad waarop die minister se besluit gebaseer was nie,” het Naudé gesê.

Die drie respondente het by wyse van ‘n ooreenkoms die handdoek ingegooi en die publikasie van die naam Makhado in die Staatskoerant is deur regter Da Silva tersyde gestel.

Die drie respondente het ook aangebied om al die verspilde koste van die applikante (VV) te betaal. Dit is ook deel gemaak van die hofbevel.