Kategorie: Nuus

VN reël droogtekonferensie in Windhoek

Meer as 600 deelnemers word by die eerste Afrika Droogtekonferensie verwag wat vanaf 15 tot 19 Augustus in Windhoek sal plaasvind.

Die konferensie sal ’n tegniese sessie insluit waaraan kenners sal deelneem, gevolg deur ’n hoëvlaksessie waartydens ministers in Afrika en verteenwoordigers van VN-agentskappe teenwoordig sal wees.

Die tema is “Die verbetering van veerkragtigheid teen droogte op die Afrika-vasteland”

Die kerndoelwitte van die konferensie is om ’n strategiese raamwerk vir droogtebestuur op te stel wat die veerkragtigheid teen droogtes vir die hele Afrika-vasteland sal verbeter; om streeks- en internasionale aandag op die kwessie te fokus om veerkragtigheid te kan verbeter; behoeftes en tekortkominge sowel as goeie praktyke te identifiseer en vennootskappe en samewerking tussen lande te versterk.

Die projekkoördineerder het tydens die bekendstelling gesê Afrika is kwesbaar vir die impak van droogtes, wat na verwagting as gevolg van klimaatveranderinge meer dikwels gaan voorkom.

Suider-Afrika is juis kwesbaar vir droogte weens die totale gebrek aan staatshulp vir sukkelende boere, ‘n nuwe verwikkeling onder die ANC wat eerder op “rassisme” fokus. Na verwagting gaan voedselpryse met ten minste 25% styg en 5 miljoen ton mielies sal ingevoer moet word.

“Die kwesbaarheid is beklemtoon deur die voortdurende El Niño-weerverskynsel. Oos-Afrika ervaar die ernstigste droogte in 60 jaar en die Verenigde Nasies (VN) het hongersnood in Somalië verklaar. Suider-Afrika word ook ernstig geraak en die droogte is in Maart vanjaar as ’n streekramp verklaar,” het Kauna ­Schrö­der gesê.

“Die groot verwagte uitkoms van die konferensie is ’n strategiese raamwerk om Afrika se veerkragtigheid teen droogtes te verbeter. Dit geniet reeds die volle steun van die Afrika-unie (AU). Ons kan nie resultate hê as ons nie al die feite bymekaar het nie,” het Schröder gesê.

Terselfdertyd soek die ministerie na borgskappe van en vennootskappe met die private sektor ten einde die droogte te verlig.

Schröder het gesê langtermynvennootskappe is ook moontlik op gebiede soos die verbetering van vroeë waarskuwingstelsels vir droogtes in Namibië, die ontwikkeling van versekeringsmeganismes teen droogtes asook water- en energiebesparingstegnologie.

Die Landbounavorsingsraad (LNR) van Suid-Afrika, het op die LNR se voorlegging oor sy strategiese plan tot 2020 aan die Parlement se portefeuljekomitee vir landbou, bosbou en visserye verslag gedoen oor 10 000 pakkies witmieliebaster sade wat in 2014/’15 gratis aan kleinboere in Limpopo, Mpumalanga, Noordwes, die Vrystaat en KwaZulu-Natal uitgedeel is om te toets.

Die twee sade WE3127 en WE3128 is nie geneties gemodifiseer nie en word onder die handelsnaam DroughtTEGO verkoop. Die eerste droogteverdraagsame witmieliebastersaad wat deur die LNR se Wema-projek (Waterdoeltreffende mielies vir Afrika) ontwikkel is, is in 2014 bekend gestel.

Nege kleinboere van die boerevereniging Mokaba in Mokopane, Limpopo, het te midde van die ergste droogte in 20 jaar hul opbrengs tot 1,14 t/ha van die vorige seisoen se 0,6 t/ha (toe hulle ander mieliekultivars geplant het) verhoog.

VK-gesant na Namibië

Die Verenigde Koninkryk se minister belas met Afrika, James Duddridge, het dié week besoek aan Namibië gebring.

Duddridge is die ondersekretaris van buitelandse sake in die buitelandse sake en Statebondkantoor.

Voor hy in 2005 tot die politiek toegetree het, was hy onder meer tien jaar lank in die bankwese in Afrika en Londen waar hy op finansiële sake van nywerhede gefokus het.

Tydens sy besoek het hy die premier, die adjunkpremier en minister van internasionale betrekkinge en samewerking, die minister van werke en vervoer asook die minister van finansies ontmoet.

Luidens ‘n verklaring deur die Britse hoë kommissariaat in Windhoek, is Duddridge gretig om die Namibiese regering se agenda vir ekonomiese groei en armoedevermindering te ondersteun.

Hy het ook Britse en Namibiese sakeleiers ontmoet vermoedelik om oor Britse belastingvrye beleggings te gesels.

Voor sy besoek het Duddridge gesê: “Die Verenigde Koninkryk is gereed om meer in Afrika te belê en ek hoop my besoek sal help dat dit gebeur.”

Oorsese gebiede van Haar Majesteit val nie onder die Britse reg wat vereis dat maatskappye geregistreer word nie.

Daar is ook geen vereiste vir ‘n openbare toeganklike databasis van eienaarskap nie, maar na die onthullings van die Panama Papers, is die Verenigde Koninkryk onder druk om amptenare in staat te stel om die inligting van diensverskaffers te inspekteer.

Duddridge is direk gemoeid met sulke pogings nadat die Britse premier, sy baas, geïmpliseer is in belastingontduiking.

Die Suid-Afrikaanse Reserwebank het verlede week die nuutste verwikkelinge oor die Suid-Afrikaanse owerhede se ondersoek na die Panama Papers bekend gemaak.

Die bank het saam met die tesourie en die Suid-Afrikaanse Inkomstediens (SAID) in die parlement se portefeuljekomitees oor die onwettige finansiële uitvloei toegespreek.

Volgens SAID is daar ongeveer 1 700 individuele Suid-Afrikaners, 56 Suid-Afrikaanse tussengangers en 79 oorsese entiteite wat bande met 81 Suid-Afrikaners het, wat uit beskikbare data geïdentifiseer is.

Hillary preek oor ‘ongelykheid’ in R200 000-baadjie van Armani

Hillary Clinton het gister onder skoot gekom nadat berig is dat die presidensiële kandidaat ‘n Giorgio Armani-baadjie wat net duskant R200 000 kos tydens haar toespraak in April oor “ongelykheid” gedra het. Die pryskaartjie van die baadjie is blykbaar

Clinton, wat bekend is vir haar groot versameling broekpakke, het blykbaar haar klerekas verder verbeter tydens haar onlangse veldtog om die Demokratiese Party se presidensiële kandidaat te word, volgens die koerant The New York Post. Die Armani-baadjie se pryskaartjie is $12,495 (ongeveer R187 000). Op sosiale media soos Twitter is Clinton weens die teenstrydigheid tussen haar “gelykheidsdiskoers” en haar koninklike spandabelheid as dit by kleding kom, gekritiseer.

Blykbaar het Hillary Clinton “meer as een miljoen dollar” (oftewel R15 miljoen) aan klere bestee, volgens die politieke beeldpoetser in Los Angeles, Patsy Cisneros.

Clinton is egter nie die enigste politikus wat haar klerekas vir die veldtog opgekikker het nie. Sarah Palin het $150 000 (R2,2 miljoen) se klere van die Republikeinse Nasionale Komitee as geskenk ontvang tydens haar veldtog vir die visepresidentskap in 2008, volgens die New York Post.

Net so word die Republikeinse kandidaat Donald Trump dikwels in Brioni-pakke gesien, wat $7000 (R104 000) elk kos.

Bekende akteur Schalk Jacobsz oorlede

Die bekende akteur, Schalk Jacobsz is vroeg vanoggend in sy slaap oorlede by sy huis in Westdene in Johannesburg.

Volgens sy vrou, die aktrise Elma Potgieter is hy aan ‘n hartkwaal oorlede nadat hy die afgelope tyd ongesteld was.

Hy was 80.

Jacobsz was bekend vir sy rolle in televisiereekse soos Die Siel van die Mier; rolprente soos Die Bankrower en verhoogproduksies soos Boesman en Lena en Nag van Legio.

Tydens verlede jaar se RSG Kunstefees het Jacobz en Potgieter die produksie Reis sonder Einde – Uys Krige en Federico Lorca opgevoer.

Jacobz word oorleef deur sy vrou Elma en drie kinders.

SA se kredietgradering onveranderd

Die kredietgraderingsagentskap, Standard and Poor’s het Suid-Afrika se kredietgradering onveranderd gelaat. Die huidige gradering is BBB-minus met ‘n negatiewe vooruitsig.

Die agentskap het nogtans gewaarsku dat enige tekens van politieke omwenteling wat die ekonomiese beleid kan ondermyn, daartoe kan lei dat ‘n afgradering later vanjaar gedoen kan word.

Nog ‘n agentskap, Fitch se gradering word dié week verwag.

Die minister van finansies, Pravin Gordhan het die besluit verwelkom en gesê die besluit toon dat die land se ekonomie veerkragtig is.

Gordhan sê ekonomiese groei moet in die volgende paar maande uitgebrei word om te verseker dat die krediet nie in Desember afgegradeer word nie.

S&P se besluit is soortgelyk aan die van Moody’s wat die land se gradering op ‘n kerf bo rommelstatus met ‘n negatiewe vooruitskatting gelaat het.

Moody’s het Suid-Afrika se gradering verlede maand dieselfde gehou, maar die ekonomiese vooruitskatting na negatief verander.

Die Rand het kort na die aankondiging teen die dollar gestyg wat op ‘n stadium meer as twee persent beter was as die dag tevore se verhandeling.

Ekonome meen die land huiwer op die rand van ‘n resessie en dat ‘n afgradering die ekonomie in ‘n resessie sal indwing.

Die Bankvereniging van Suid-Afrika (Basa) het gesê Standard en Poor’s se besluit is ‘n mylpaal op die weg na sterker ekonomiese groei.

Basa het in ‘n verklaring gesê daar moet nog harder gewerk word om volhoubare groei te verseker en dat fiskale dissipline en beleidsekerheid kritieke voorvereistes vir groei is.

President Jacob Zuma het ook Standard en Poor’s se besluit verwelkom en het in ‘n verklaring die regering, sakelui en georganiseerde arbeid geloof en sê die afgelope maande se samewerking het daarin geslaag om die ekonomie op ‘n herstelpad te plaas.

Zuma sê deur samewerking kan ekonomiese groei aangewakker word, beleggings gelok word en werkskepping verbeter.

Die Kamer van Mynwese het ook die graderingsbesluit verwelkom en sê dit gee die land ses maande grasie om die situasie te verbeter.

Vloede teister Frankryk

Frankryk en Duitsland gaan gebuk onder oorstromings en riviere wat hul walle oorstroom, het Reuters berig.

Sentraal-Europa ly al die ­afgelope week onder hael, sterk winde en deurdringende reën.

Die suide van Duitsland en Sentraal-Frankryk is die jongste gebiede wat getref is.

Die Seine in Parys is op die vloedvlak en het op plekke sy walle oorstroom. Kunswerke moes inderhaas uit die Louvre Museum verwyder word.

Sowat 20 km suid het die Yvetterivier sy walle oorstroom en die Paryse voorstad Longjumeau is kniediep in die water.

In Nemours, nog verder suid, moes mense per boot gered word nadat die Loingrivier ver bo sy vloedvlak gestyg het.

Nog oorstromings en stormskade is moontlik.

Die Duitse dorp Simbach am Inn in Beiere, op die grens met Oostenryk, is swaar getref toe water in die strate afgestroom het.

Die water het modder, bome en motors meegesleur.

Braunsbach, in die suide van Duitsland, is nou vol klippe en verwoeste voertuie.

Die water in Triftern, ook in Beiere, is diep genoeg om voertuie te laat verdwyn.

Frankryk, Oostenryk en Duitsland is in onmiddellike gevaar, maar die Alpe en die suidooste van Europa kan ook bedreig word.

Trump: Hillary moet agter tralies wees

Donald Trump het verlede week uitgevaar teen Hillary se gebruik van ‘n private bediener vir haar werk se epos terwyl sy die minister van buitelandse sake was.

“Mense, eerlikwaar, sy is so skuldig as wat jy maar kan kry. Hillary Clinton moet tronk toe gaan.”

Clinton het intussen erken dit was ‘n fout. Haar ongeoorloofde optrede sal deur die FBI ondersoek word.

Die departement van buitelandse sake het verlede week in ‘n verslag verklaar dat streng veiligheidsmaatreëls ootree is.

“Die feit dat hulle haar eens toelaat om aan hierdie wedloop deel te neem, is ‘n skande,” het Trump gesê.

Sy uitlatings is van die skerpste in die bekgeveg tussen Trump, die waarskynlike Republikeinse presidentskandidaat, en Clinton, die moontlike Demokratiese kandidaat.

Anti-Trump aktiviste het hul haatveldtog voortgesit. Beeldmateriaal wys hoe honderde oproermalers ­Mexikaanse vlae swaai, slagspreuke teen Trump dreunsing en Trump-hoede en ‘n Amerikaanse vlag aan die brand steek.

Binne die konferensiesentrum het Trump weer belowe om onwettige oorgrensdwelmhandel na die VSA te stop deur ‘n muur te bou en die rekening aan Mexiko te stuur.

Trump se verkiesingsaamtrekke word klokslag deur voorstanders van onwettige immigrasie ontwrig.

Paul Ryan, speaker van die huis van verteenwoordigers, het intussen sy deuntjie verander en sy steun aan Trump toegesê nadat hy eers teen die Republikeinse voorloper uitgevaar het.

Ryan se gewildheid het na sy negatiewe uitltings oor die miljardêr verdamp.

“Dit is geen geheim dat ek en hy verskille het nie . . . maar ons het meer in gemeen as wat ons verskil,” het Ryan in ‘n meningstuk vir die Janesville Gazette in Wisconsin geskryf om sy kanse op ‘n pos in die nuwe administrasie te red.

Intussen is in ’n Reuters/Ipsos-meningspeiling bevind dat Clinton en Trump die voorlopers is binne hulle onderskeie partye.

Die tipiese Amerikaner wat baie van Clinton hou en nie van Trump nie is swart, Spaans of Indiër, vroulik, buite die grense van ‘n tradisionele huwelik en ‘n ateïs, het ‘n Gallup-opnbame bevind.

Die tipiese Amerikaner wat baie van Trump hou en nie van Clinton nie, is ‘n wit man wat tradisioneel getroud, godsdienstig en Protestants is.

Clinton, wat persoonlik toegesien het dat Amerika onsuksesvolle en moorddadige invalle in die Midde-Ooste voer wat daarna boonop tot ‘n immigrasiekrisis gelei het, het Trump probeer voorhou as “gevaarlik” vir die VSA se buitelandse beleid.

Die bejaarde eggenoot van die vroetelaar Bill Clinton het haarself probeer voorhou as “vars” en “nuut” omdat sy die eerste vrou in die Withuis sal wees.

Clinton het die Demokratiese presidentsbenoemings in Puerto Rico gewen en nog `n stappie nader beweeg aan `n oorwinning oor haar teenstander, Bernie Sanders in die stryd om as die party se kandidaat benoem te word.

Dit is ‘n gunstige oorwinning vir Clinton in die aanloop tot Dinsdag se benoemings in ses state, wat New Jersey en Kalifornië insluit.

Sy hoop om more die mikpunt van 2382 benoemings te haal om vir die verkiesing op 8 November benoem te word.

Clinton steun daarop dat die benoemings in New Jersey haar verby die teiken sal neem, aangesien sy en Sanders ewe veel steun in Kalifornië geniet.

Groot swaargewigkampioen groet

Die voormalige swaargewig bokser Muhammad Ali het in die ouderdom van 74 aan longkomplikasies gesterf in die VSA.

Ali het vroeër in ‘n onderhoud gesê integrasie beteken dat verskillende rasse met mekaar moet trou, maar dit moet verhoed word omdat dit nie natuurlik is nie.

Hy het aan die BBC gesê geen witte “by sy volle verstand” wil toesien dat sy kinders met swartes trou nie. Daaruit word kleinkinders voortgebring met kroeshare, het hy gesê.

Hy het die linkse BBC-onderhoudvoerder ook van skynheiligheid oor die kwessie beskuldig en gesê swart en wit is verskillend omdat God dit so bepaal het en nie die gemeenskap nie.

Gebore Cassius Marcellus Clay, het Ali se roem begin toe hy onverwags in 1960 die liggewig-titel gewen het tydens die Olimpiese spele in Rome.

Met sy bynaam ‘The Greatest’, het die Amerikaner Sonny Liston in 1964 geklop om sy eerste wereldtitel te wen.

Hy het die eerste swaargewig bokser geword om drie wereldtitels in die kategorie te wen.

Hy het in 1981 afgetree met ‘n rekord van 56 oorwinnings in 61 professionele boksgevegte agter sy naam.

‘Die kopdoek is ons kroon’

Die ANC se Vroueliga het die dra van kopdoeke vanaf Vrydag tot Sondag aangemoedig, het die leierskap van die organisasie Sondag gesê.

“Ek dra die kopdoek al vir ‘n lang tyd, so ek is bly dat ek nou meer geselskap sal hê wat dit sal dra. Dit is belangrik om te demonstreer, uiterlik dra ons kopdoeke, omdat ons dit nou doen vir die ANC,” het die Afrika-Unie voorsitter Nkosazana Dlamini-Zuma gesê aan honderde vroueliga-lojaliste met die afskop van die “Kopdoekveldtog”.

Die vroueliga in KwaZulu-Natal het ter herdenking van die Soweto-opstand 40 jaar gelede asook die Vroue-optog 60 jaar gelede die Kopdoekveldtog by die Durbanse stadsaal geloods.

Dlamini-Zuma het gesê dit is hul verantwoordelikheid om kopdoeke oor naweke te dra ter ondersteuning van die regerende party en die Vroueliga.

Sy het bygevoeg dat sy bly is dat baie ander vroue “die kopdoek gaan dra”.

Verlede maand het ‘n eNCA-verslaggewer ‘n uitval met haar werkgewer gehad oor ‘n kopdoek. Haar video-insetsel is glo onttrek omdat sy ‘n Afro-hooftooisel gedra het.

Nontobeko Sibisi beweer in ‘n e-pos aan haar kollegas dat haar insetsel van die lug gehaal is sonder haar medewete want “vir nege sekondes uit ‘n stuk van ‘n sowat drie minute, verskyn ek geklee in ‘n doek”.

In reaksie hierop het eNCA se redakteur Anton Harber teruggekrabbel oor die kopdoek.

Hy het verklaar dat daar ‘n beleid is “oor hoe verslaggewers en ankers moet kyk op die lug en dit sluit allerlei haarversierings in”.

‘n Bespreking is inderhaas geïnisieer oor die sogenaamde riglyne het Harber bygevoeg, kennelik om swart gemoedere te kalmeer.

Sondag het Fikile Masiko, sameroeper vir die Young Women’s Desk, beklemtoon dat sy trots is op die kopdoek: “Ons wil hê eTV moet weet dit is nie iets wat ‘n onderdrukking of onprofessioneel vir ons is nie.”

“Dit is ons kroon.”

Welkom-polisie lê beslag op kos vir onwettige myners

Welkom se polisie het ‘n groot hoeveelheid voedselpakkette en sigarette ter waarde van sowat R500 000 wat bestem is vir onwettige mynwerkers wat ondergronds werk in beslag geneem, het die Vrystaatse polisie Saterdag gesê.

Katlego Sekuriteit se beamptes wat die St Helena-myn se perseel in Welkom oppas, het Saterdagoggend vroeg ‘n wit bakkie opgemerk wat mense aflaai.

Die bakkie het weggery en ‘n kort rukkie later het ‘n groot wit vragmotor aangekom en geparkeer langs die St Helena-myn se Skag 10, ‘n ventilasieskag.

Netjies verpakte kos vir die onwettige mynwerkers ondergronds is met die vragmotor vervoer.

Die bestuurder het te voet gevlug en verdwyn in die donker nadat hy opgemerk is deur die sekuriteitsbeamptes.

Die kospakkies is meestal gemerk vir ‘n “Themba Kaba”.

Welkom se polisiebeamptes is na die toneel ontbied en die pakkette is gekonfiskeer.

Die pakkette bevat, onder andere, pakkies grondboontjies, 500ml bottels Coca-Cola en Stoney-gemmerbier, 1kg pakkies mieliepap, aarbeiroomkoekies, Bull Brand se gepekelde vleis, en sigarette, met ‘n straatwaarde van sowat R500 000.