Veteraanmotorskou aanstons in George

Veteraan en klassieke motors wat vanuit alle uithoeke van die land kom, gaan kliphard meeding om die kalklig by die George Oumotorskou op 14 en 15 Februarie by PW Botha Kollege te steel.

Verlede jaar het 11 000 entoesiaste vanoor die streek deur die hekke gestroom om deel te hê aan die skouspel, maar die verwagting is dat daar vanjaar heelwat meer besoekers gaan wees. Die organiseerders beplan om vanjaar ‘n groter verskeidenheid vermaak en syvertonings aan te bied om in almal se smaak te pas. So sal die kinders en dames ook heelwat meer hê om hulle mee besig te hou terwyl die mans die voertuie bewonder.

Volgens die voorsitter van die George Oumotorklub, Karen van der Merwe, word voertuie wat voor 1975 vervaardig is, as ou motors beskou en maak die skou spesifiek vir hierdie voertuie voorsiening.

Daar sal egter ook heelwat jonger modelle wees wat deur motorhandelaars en klubs uitgestal word.
Soos verlede jaar sal daar ook duisende mo-delmotortjies uitgestal word en te koop wees. Die veiling van veteraan en klassieke voertuie sal op die Saterdag ook weer ‘n trekpleister soos in die verlede wees.

Dan is daar ook heelwat trekkers en landbou-implemente wat ten toon gestel sal word.

Onder die vermaak tel ‘n snuffelmark, speelpark vir kinders, eetplakke en biertuine asook verskeie ander aantreklikhede.

Die skou, wat vanjaar 19 jaar oud is, skenk ook jaarliks etlike duisende rande aan liefdadigheidsorganisasies wat op ‘n meriete-basis geidentifiseer word.

Volgens Van der Merwe is een van hul grootste uitdagings die sekuriteit tydens die skou, veral snags. Stropers en vandale het al vir groot skade tydens skoue gesorg wanneer onderdele gesteel of gebreek word.

Dit is juis hierdie realiteit wat Kobus Halliday, een van die grootste versamelaars van ou motors wat naby Groot-Brakrivier woon, laat besluit het om nie sy voertuie te skou nie.

Tydens die bekendstelling van die Oumotorskou by sy perseel het hy vertel van skades wat hy al in die verlede gely het. Sy permanente uitstalling is egter oop vir belangstellendes wat dit op afspraak wil besigtig. Hy verwelkom ook groepe.

Halliday het in 1980 sy eerste motor, ‘n 1932 Chev, gerestoureer en vandag besit hy 103 veteraan- en klassieke motors, 22 trekkers en verskeie ou motorfietse.

Hy glo dat die motors die beste belegging is wat hy kan maak.

Bron: George Herald

Twee van polisie vas vir gewapende roof

Twee polisiebeamptes, wat Woensdag in hegtenis geneem is vir gewapende roof sal na verwagting binnekort in die Sasolburgse landroshof verskyn.

Polisiewoordvoerder, Sellwane Mapamela, sê in ‘n verklaring die 30-jarige en 38-jarige verdagtes word daarvan beskuldig dat hulle deel was van ‘n gewapende roof by Zamdela op 18 Desember verlede jaar.

Volgens die 25-jarige klaer was sy, haar man en ‘n vriendin, van Johannesburg na Heilbron op pad toe hulle by ‘n kruising in Zamdela deur ‘n gemerkte polisie voertuig afgetrek is.

Hulle is deursoek en toe vertel dat hulle onder arres is. Op pad na die polisiestasie het die polisievoertuig onder ‘n brug gestop waar nog twee mans opgedaag het en geld vir hulle vrylating geëis het.

Almal is saam na ‘n winkelsentrum in Gauteng waar die vrou kontant uit haar bankrekening onttrek het.

Die verdagtes het die klaer en haar man by die winkelsentrum gelos nadat hulle die geld gekry het.

Volgens Mapamela is een van die mans ‘n sersant by die Vaal Rand honde-eenheid en die ander ‘n konstabel in die blitspatrollie.

Mangaung Metro ontken dat water besmet is

Die Mangaung Metro het ontken dat water in Bloemfontein met, onder meer, padavissies en bakterieë besmet is.

OFM Nuus is oorval deur navrae oor ‘n moontlike problem met die water soos wat beweer word in ‘n Whats App-boodskap wat die rondte doen.

Volgens ‘n luisteraar, Hester Taljaard, word die boodskap onder Bloemfonteiners versprei met die waarskuwing dat daar paddavisse en allerlei ander goed in die water is wat mense baie siek maak.

Nog ‘n luisteraar het gesê sy is baie bekommerd oor dié bewerings aangesien sy ‘n drie maande-oue baba het en wou weet of sy eerder gebottelde water moet koop.

Mangaung Metro-woordvoerder Qondile Khedama het egter vanoggend by navraag gesê die bewerings is onwaar.

China wil Afrika moderniseer

China het onderneem om infrastruktuur op die Afrika-vasteland te moderniseer.

Die Volksrepubliek van China het ‘n Memorandum van Verstandhouding met die Afrika Unie onderteken vir die bou van moderne hoofweë, lughawens en treinspoorverbindings regdeur die vasteland.

Die moderniseringsplan sal 54 lande in Afrika raak.

Die voorsitter van die Afrika Unie Kommissie, Nkosazana Dlamini-Zuma sê dié ontwikkeling sal daartoe lei om die broodnodige streeksintegrasie te bespoedig.

Vrou in Botaniese Tuine aangeval

Vyf swartes is in hegtenis geneem nadat hulle Dinsdag glo ‘n 26-jarige vrou beroof het terwyl sy met haar honde in die Johannesburgse Botaniese Tuin in Emmarentia gestap het.

“Die polisie het vyf verdagtes, tussen 23 en 33 jaar oud, in hegtenis geneem in verband met die rooftog,” het sers. Lloyd Ramovha, woordvoerder van die polisie, gesê.

Die vrou is met messe gedreig en haar waardevolle besittings is gesteel.

Veiligheidswagte het die polisie ontbied en het die vrou se selfoon en ander items in die verdagtes se besit gevind. Hulle het ook messe by hulle gehad.

Die groep sal binnekort in die Hillbrowse landdroshof verskyn op aanklag van gewapende roof en die besit van gevaarlike wapens.

Die polisie het ‘n beroep gedoen op stappers wat onlangs in die Botaniese Tuin aangeval is om onverwyld na vore te kom om ‘n uitkenningsparade by te woon aangesien die verdagtes moontlik aan vorige misdade verbind kan word.

Twee vermeende rowers in Randburg geskiet

Twee vermeende rowers is Dinsdag in Randburg, Johannesburg deur die polisie geskiet.

“Een is in sy arm en been beseer en die ander een in sy boud,” het lt.kol. Katlego Mogale, woordvoerder van die polisie, gesê.

Die vier, tussen 27 en 33 jaar oud, het in Bram Fischerrylaan gery toe die polisie opgemerk het dat hul motor ‘n spoorsein gee.

Die polisie het die boewe agternagesit, maar hulle het weggejaag. “Daar was ʼn hoëspoedjaagtog in Bram Fischerrylaan totdat die verdagtes uiteindelik by Randburg Square-winkelsentrum tot stilstand gekom het.”

Een van verdagtes het dadelik op die polisie begin skiet toe hy uitklim en die polisie het teruggeskiet. Twee van die verdagtes is gewond. Die ander twee is in hegtenis geneem. Die polisie het beslag gelê op twee vuurwapens.

Die motor is Woensdag in Olifantsfontein as gesteel aangemeld.

Internasionale sakeman en gesinslede in Stellenbosch vermoor

Die polisie kon nie berigte bevestig dat die drie lede van een gesin wat gister in die De Zalze landgoed in Stellenbosch in die Wes-Kaap vermoor is, met ‘n byl aangeval is nie.

Internasionale sakeman Martin van Breda, 54, sy vrou Teresa, 55, en hul 22-jarige seun, Rudi, is Dinsdagoggend in hul huis in die luukse gholflandgoed De Zalze buite Stellenbosch in die Wes-Kaap vermoor.

Lt.kol. Andrè Traut, woordvoerder van die polisie, het die moorde bevestig.

Volgens Traut is die ouerpaar se ander twee kinders, ‘n 16-jarige dogter en 20-jarige seun, glo tydens die aanval beseer en is hulle na ‘n nabygeleë hospitaal geneem vir verdere behandeling.

Traut het gesê die polisie ondersoek ‘n saak van moord en dat niemand nog in hegtenis geneem is in verband met die voorval nie.

Die polisie het ook berigte ontken dat ‘n jong man in sy vroeë twintiger-jare vir ondervraging ingeneem is.

Die polisiewoordvoerder, André Traut sê die ondersoek na die drie-dubbele moord gaan voort en dat hulle nie oor die motief kan bespiegel nie.

Die 20-jaar-oue seun, Henri, is glo deur die polisie vir ondervraging ingeneem het ‘n bediende wat by die bure werk, gesê.

“[Henri] kon nie ernstig beseer gewees het nie omdat hy kon loop. Ek het dit self gesien,” het Eben Potgieter, voorsitter van die landgoed se huiseienaarsvereniging gesê.

Griekse vegvliegtuig ploeg in ander vliegtuie in

‘n Vegvliegtuig van die Griekse lugmag het neergestort tydens ’n oefening­ van die Noord-Atlantiese­ Verdragsorganisasie (Navo) in die suidooste van Spanje waarin minstens 10 mense omgekom het.

Twee Griekse F-16’s het aan dié oefening deelgeneem waarby Brittanje­, die VSA, België, Spanje, Italië en Duitsland­ ook betrokke was.

Die vliegtuig in ander vliegtuie wat gereed gemaak het om op te styg, ingeploeg wat tot verskeie ontploffings gelei het en vegvliegtuie op die grond in vlamme gehul het.

Die ongeluk het naby die stad Albacete­ gebeur en na wat berig word, is 20 ander mense in die voorval beseer.
Twee Griekse vlieëniers en agt Franse soldate het omgekom. Die beseerdes is hoofsaaklik Franse en Italiaanse­ soldate.

Genl. Jens Stoltenberg, sekretaris-generaal­ van Navo, het die ongeluk in ’n verklaring as ’n “tragedie wat die hele Navo-familie raak” beskryf.

NY lamgelê na burgemeester paniek saai oor weer

‘n Hewige sneeustorm het miljoene mense in die noordooste­ van die VSA geraak en ‘n noodtoestand­ is onder­ meer in New Jersey, Connecticut­, Massachusetts­ and dele van die staat New York afgekondig­.

Bill de Blasio, die omstrede burgemeester van New York, het inwoners vroeër gewaarsku om gereed te maak “vir iets wat erger is as wat hulle nog ooit beleef het”.

“Hierdie kan die grootste sneeustorm wees wat New York tot nog toe beleef het,” het De Blasio gewaarsku voordat hy die hele stad met drakoniese maatreëls lamgelê het.

Die Amerikaanse Nasionale Weerdiens (NWS) het intussen erken dat sy voorspellings verkeerd was, na die voorspelling van ‘n “potensieel historiese sneeustorm”.

Die storm het diep sneeu in Connecticut en Massachusetts veroorsaak, maar New York City is grootliks gespaar.

De Blasio, het die paniek wat hy gesaai het, verdedig en gesê dat hy te midde van waarskuwings nie oorgereageer het nie.

Hy beweer hy het net op die beskikbare inligting gereageer. Sneeu van tot 75 cm diep is voorspel. Hy het die strate laat sluit sowel as die ondergrondse openbare vervoer.

Dit is die eerste keer in die stad se geskiedenis dat sulke drastiese stappe geneem is. Inwoners het hul burgemeester se swak oordeelsvermoeë bevraagteken en gesê hulle is gewoond aan dié soort weer en dat die storm niks uitsonderliks was nie.

New York se strate was verlate nadat alle trein- en busdienste voorlopig opgeskor­t is.

PUK: Huiskomiteelede van Hombré-manskoshuis ‘van hul pligte onthef’

Sewe huiskomiteelede van Hombré-manskoshuis is voorlopig van pligte onthef, berig die NWU-PUKKE se Facebookblad. Voortspruitend uit die ondersoek wat van stapel gestuur is ná die insident waartydens eerstejaarstudente van die Hombré Manskoshuis na bewering betrokke was in ʼn onderonsie met ʼn senior personeellid, is sewe lede van die huiskomitee laat gistermiddag voorlopig van hul pligte onthef, en moes hulle die betrokke koshuis ontruim. Die primarius van die koshuis is nie een van die bogenoemde sewe HK-lede nie, en twee ander HK-lede (o.a. die onderprimarius) het self besluit om te bedank.

Alternatiewe verblyfreëlings op die universiteit se onkoste is vir dié studente getref.

Die rede vir dié stappe is om seker te maak dat die ondersoek behoorlik gedoen kan word en om enige moontlike intimidasie vanuit welke oord of inmenging met die ondersoek te voorkom. Die integriteit van die ondersoek moet ten alle koste beskerm word, en studente wat nié by die beweerde insident betrokke was nie, moet geïdentifiseer en beskerm word. Die ondersoek na beweerde wangedrag deur eerstejaarstudente gaan ook steeds voort.
Reëlings sal getref word om ʼn tussentydse leierskapstruktuur in die koshuis te vestig.

Die insident het op 21 Januarie teen ongeveer 07:30 voor die Institusionele Kantoor plaasgevind toe die 53 jaar oue personeellid probeer het om tussen die groep studente deur te beweeg. Hulle het na bewering probeer keer dat hy tussen hulle deurloop, en in die proses het hy ʼn rugbesering opgedoen. Lede van die huiskomitee was teenwoordig ten tyde van die voorval.