Owerhede in Afganistan sê minstens 20 mense is dood tydens ‘n selfmoordbomaanval op ‘n mark in dié land se Oeroezganprovinsie.
Die goewerneur vir dié provinsie, Juma Gul Himat, sê die selfmoordbomaanvaller het homself in ‘n besige deel van ’n mark in Dihawud opgeblaas.
Volgens Himat is minstens 20 mense dood en 13 ander beseer.
President Jacob Zuma is as nuusmaker van 2009 aangewys.
Hy is dus nou voor in die wedren teen Julius Malema, ANC-Jeugliga president, die atleet Caster Semenya asook Joost van der Westhuizen, voormalige Springbok rugbykaptein, het die Nasionale Persklub Donderdag aangekondig.
“President Zuma was gedurende 2009 vir verskeie redes in die nuus. Hy het koerantspasie sowel as elektroniese nuus oorheers,” het Yusuf Abramjee, voorsitter van die Persklub gesê.
Die verkiesingsveldtog, die terugtrekking van die korrupsie-aanklagtes teen Zuma asook sy verkiesing tot president het hom gereeld in die kollig geplaas.
Ander kwessies sluit in die stigting van die presidensiële inbellyn, Zuma se keuses vir die aanwysings van ‘n nuwe hoof van justisie, nuwe nasionale direkteur van publieke vervolging asook ‘n nuwe nasionale polisiekommissaris.
Die toekenning gaan aan hom oorhandig word, maar daar moet nog op ‘n datum besluit word.
Zuma het in 2005 ook hierdie toekenning gewen as gevolg van sy hofsake. In 2008 was hy wel vir die toekenning genomineer, maar die Congress of the People (Cope) en Eskom was as die wenners aangewys.
Die omstrede naamsveranderingsproses van Louis Trichardt na Makhado sal weer van vooraf begin, het die Geografiesenaamraad Donderdag gesê.
“Ons het vandag aansoeke ontvang waarna ons sal kyk. Ons sal dit ook aan die minister van kuns en kultuur voorlê,” het Tommy Ntsewa, voorsitter van die raad, gesê.
Louis Trichardt se naam is in 2002 na Makhado verander, maar in 2005 het die hooggeregshof besluit dat dit weer terug moet verander omdat die regte prosesse nie gevolg is nie.
“Die hof het besluit dat die regte stappe nie gevolg is toe die proses die eerste keer plaasgevind het nie. Vandag het ons nuwe aansoeke. Ons sal dit nagaan om te verseker dat konsultasie plaasgevind het,” het Ntsewa gesê.
Hy het ook gesê dat die naam van die nuwe lughawe in La Mercy naby Durban bespreek sal word. Die regering het voorgestel dat die lughawe King Shaka-lughawe heet.
“Ons het min tyd oor om te besluit op ‘n naam vir die nuwe lughawe. As die kwessie nie opgelos word nie sal dit bekendstaan as X-lughawe,” het Ntsewa gesê.
Die kantoor van die ANC-hoofsweep het Donderdag gesê hulle sal die voorgestelde wetgewing op presidensiële kwytskelding, wat deur die Demokratiese Alliansie voorgestel is, “verwerp”
Die DA het die wetsontwerp Woensdag ingedien nadat die presidensie bevestig het dat ‘n versoek om kwytskelding van Schabir Shaik ontvang is.
Shaik is president Jacob Zuma se voormalige finansiële raadgewer, en is in 2005 skuldig bevind op aanklagte van bedrog en korrupsie.
“Die wetsontwerp van die Demokratiese Alliansie het geen wetlike of feitelike basis nie, en grens aan ‘n voorgestelde hersiening van die Grondwet,” het ‘n vrystelling van die ANC-hoofsweep se kantoor Donderdag gesê.
“Die voorstel is dus óf ‘n produk van powere regsadvies, óf die werk van ‘n onkundige, publisiteitshonger parlementslid.”
Die wetsontwerp stel onder andere voor dat strenger maatreëls ingestel behoort te word om die redelike toekenning van presidensiële kwytskeldings te verseker.
Pierre de Vos, ‘n kenner in Grondwetlike Reg, sê dié kwytskeldings is volgens die huidige Grondwet slegs onderhewig aan die prerogatiewe mag van die president, en is slegs beperk deur die bepaling dat dit in goedertrou toegeken sal word.
Die VF Plus-stadsraadslid, mnr. Cornelius Jansen van Rensburg, het vandag in ʼn verklaring gesê dat geen voorstel vir die verandering van die Blou Bulle se kleure nog ooit voor die Tshwane metroraad gedien nie. “Geen aankondiging oor ʼn proses of voorstelle vir enige wysiging is ooit deur die stadsraad ontvang of bespreek nie.”
Uit die aard van onlangse berigte word daar voorgegee dat daar al reeds ʼn politieke proses verloop het en asof ’n besluit geneem is om die Blou Bulle se kleure te verander.
Jansen van Rensburg het gesê dat dit onder die party se aandag gekom het dat daar amptenare in die Tshwane metroraad is, spesifiek in die Sport- en Rekreasie-departement, wat betrokke is by hierdie onwettige poging. Die VF Plus het geëis dat daar tugstappe geneem moet word teen amptenare van die Tshwane metroraad wat betrokke is by die sogenaamde “Tshwane-Sportraad”. “Die feit dat amptenare voorgee dat die Tshwane-Sportraad ʼn mandaat van die metroraad het, is niks ander as bedrog nie,” het Jansen van Rensburg gesê.
“Die Tshwane metroraad se Burgemeester moet kennis neem van die passievolle ondersteuning wat daar in Pretoria bestaan vir die Blou Bulle Rugbyspan, hul embleem en hul kleure. Enige poging om hiermee te torring sal groot reaksie uitlok.”
Vir ingenieurs en ander kundiges wat die streng boureëls in Kalifornië, Japan en ander aardbewinggebiede begryp, is die natuurramp se dodelike gevolge wat Haïti getref het, kwalik ‘n verrassing.
Die buitensporige aantal sterftes is die uitsluitlike gevolg van swak beplanning en gebrekkige boukonstruksie, asook ongebreidelde stedelike groei.
Vóór 1950 sou dieselfde aardbewing dieselfde skade aangerig het in die ontwikkelende sowel as die ontwikkelde wêreld, sê Ross Stein, ‘n geofisikus van die Amerikaanse Geological Survey in Menlo Park, Kalifornië.
Lewensverlies is tipies tans 10 keer hoër in ontwikkelende lande en die skade soveel as 100 keer meer, sê hy.
Die aarbewing in die Sijuanprovinsie in China in 2008 wat tot die dood van ongeveer 87 000 mense gelei het, het die Chinese regering genoop om strenger boumaatreéls in te stel. Nagenoeg 5 000 kinders het omgekom agv swak boukonstruksie.
Dis dieselfde nagmerrie oor en oor, sê die president van die Earthquake Engineering Research Institute in die VSA.
Boureëls wat tans standaard is in alle nuwe konstruksie in Kalifornië, is danksy groot vordering in aardbewingnavorsing ingebring.
Turkye, wat in 1999 deur ‘n groot aardbewing getref is, het streng boureëls op papier, maar ongelukkig nie streng toepassing daarvan nie.
Brian Tucker van GeoHazards International, in palo Alto, sê mense in ontwikkelende lande steur hulle nie aan waarskuwings dat geboue in aarbewinggebiede aan sekere standaarde moet voldoen nie.
Mense weier om te glo dat die noodlot wat aardbewings betref, in hul eie hande is sê hy, en dat dit nie “die hand van God” is nie.
Sowat 60 miljoen mense is die afgelope 10 jaar direk deur aardbewings bedreig.
Maar in ontwikkelende lande luister regerings nie graag na sulke waarskuwings nie.
Zimbabwe se kragvoorsiener is beveel om die uitvoer van elektrisiteit na Namibië te staak en eers in sy eie behoeftes te voorsien, is Woensdag in die land se staatskoerant berig.
Volgens die Herald het Elia Mudzuri, Zimbabwe se minister van energie, gesê dié land se kragstasies kan nie voortgaan om elektrisiteit na Namibië uit te voer, soos wat daar in ‘n ooreenkoms in 2007 bepaal is nie.
Zimbabwe moet tans self elektrisiteit invoer weens sy kragtekort, het Mudzuri gesê.
“Ons kan nie ‘n situasie hê waar ons moet invoer om te kan uitvoer nie,” het Mudzuri aan die koerant gesê.
“In die verlede het ons nooit opgehou om krag aan (Namibië) te voorsien nie, selfs toe die Hwange-kragstasie foutief was.
“Dit het beteken dat ons ingevoer het en dan weer moes uitvoer. Dis net nie reg nie,” het hy gesê.
Zimbabwe ervaar gereelde kragonderbrekings wat by tye tot 15 ure duur.
In 2007 het Zimbabwe en Namibië ‘n ooreenkoms onderteken waarvolgens Namibië ‘n lening van R40 miljoen toegestaan het aan Zimbabwe om te help met herstelwerk aan sy kragstasies.
Zimbabwe sou dan dié lening in die vorm van elektrisiteit aan Namibië terugbetaal.
Mario Balotelli, die negentienjarige sokkerspeler van Inter Milaan, sê hy is siek en sat vir wit rassitiese sokkerondersteuners.
Die Italiaanse liga het hom egter pas beboet met $10 000 omdat hy die toeskouers terugkoggel.
Balotelli, word gereeld uitgejou omdat hy swart is en in sy kleedkamer by die San Siro-stadion pryk ‘n slagspreuk wat hom daaraan herinner dat hy nie ‘n ware Italianer is nie, maar “‘n swart Afrikaan”. “Non sei un vero Italiano, sei un Africano nero.”
Die kwessie is ‘n sensitiewe een. ‘n Kroegeienaar het onlangs die polisie gebel omdat iemand ‘n tros piesangs na Balotelli geslinger het terwyl hy besig was om by die eienaar se toonbank ‘n drankie te geniet.
Balotelli is naamlik die gesig van die suksesvolle swarte in Italië en by elke rassevoorval word hy opgehaal om Italianers daaraan te herinner dat swartes nie dom, agterlik en ‘n las op die staat is nie.
Tydens die rasseonluste wat verlede week in die suide van Italië tussen swart seisoenwerkers en plaaslike inwoners uitgebreek het, is sy naam weer eens gebruik om anti-swart gevoelens te besweer. Dosyne mense is in die onluste beseer.
Swart sokkerspelers word gereeld in Italië beledig. Brasilië se Luciano moes ook onlangs deurloop
In 2001, toe die 18-jarige Nigeriese speler Schengun Omolade vir Treviso uitgedraf het, het ondersteuners ‘n banier opgehou wat lees, “Ons wil nie ‘n swart speler in die span hê nie” en daarna die stadion verlaat.
Balotelli oorweeg dit om te skuif na die Engelse Premierliga, na ‘n klub soos Arsenal of Chelsea, waar daar volgens hom nie rassisme is nie.
Nicolas Sarkozy, die president van Frankryk, het Woensdag oupa geword toe sy skoondogter sy eerste kleinseun in die wêreld gebring het.
’n Presidensiële vertroueling het bevestig dat Sarkozy oupa geword het, maar hy het geen verdere besonderhede gegee nie.
Hy het wel bygevoeg dat sy kleinseun ‘n “baie vreemde naam” gekry het.
Sarkozy se seun Jean (23) het in September 2008 met Jessica Sebaoun, die erfgenaam van die Joodse elektroniese onderneming, Darty getroud.
Die paartjie het verlede jaar haar swangerskap aangekondig.
Sarkozy (55) het twee seuns uit sy eerste huwelik asook ‘n derde seun, Louis (12) by sy vorige eggenoot.
Hy is tans met sy derde vrou, Carla Bruni-Sarkozy, getroud.
Die eerste minister van Haïti het aan die media gesê dat die dodetal na gister se 7.0 aardbewing “maklik bo 100 000” kan styg.
“Ek hoop dit is nie so nie, want ek hoop die mense het tyd gehad om uit te kom,” het minister Jean-Max Bellerive bygevoeg.
“Op die oomblik is daar so baie mense wat op straat woon, dat dit moeilik is om te bepaal waar almal was toe die aardbewing getref het.
“Maar so baie geboue, so baie woonbuurte, is geheel en al verwoes.
“In party woonbuurte sien ons nie eers mense nie, so ek weet glad nie waar hulle is nie,” het die minister gesê.
