Pres. Zuma was nie by die geleentheid met 'n Arabiese tema nie. Die gaste het glo Arabiese tunieks as geskenke ontvang.
Pres. Zuma was nie by die geleentheid met 'n Arabiese tema nie. Die gaste het glo Arabiese tunieks as geskenke ontvang.
Rusland bekou kernkrag deesdae weer as 'n lewensvatbare opsie nadat die land 20 jaar lank onder die gevolge, psigies en ander, van Tsjernobil moes ly. Benewens die 26 nuwe reaktors in beplanning, wil die Russe ook 20 reaktors elders bou.
Russiese kerningenieurs is tans in Indië en Bulgarye waar hulle turbines en reaktordoppe oprig en daar is planne om dieselfde in China, die Midde-Ooste, Suidoos-Asië en Noord-Afrika te doen. Rusland beplan eweneens 'n reeks drywende kragsentrales wat seewater kan ontsout in verafgeleë plekke om die aardbol.
Die Russiese maatskappy Rosatom sal saamwerk met Siemens. Die voorsitter, Sergei Kiriyenko, een van Boris Jeltsin se staatmakers, het $4.6 miljard tot sy beskikking vir die oprigting van nuwe kernkragsentrales. Daar word beplan om ongeveer $47 miljard te investeer en die Russiese regring sal 40% bydrae.
Vladimir Poetin het aangekondig dat 25 tot 30% van Rusland se energie deur kernkrag voorsien sal word binne 20 jaar. Siemens en Rosatom glo daar sal 'n aanvraag vir ongeveer 400 reaktors wees teen 2030 wêreldwyd.
Die Russe hoop om deur Siemens die Latyns-Amerikaanse mark, 'n tradisionele Siemensmark, ook te betree. Rusland beskik oor meer as 40% van die wêreld se uraanverrykingskapasiteit.
Ingenieurs is tot dusver beïndruk met die tegnologie wat in die nuwe projekte aangewend sal word en beskryf dit selfs as uitstekend.
"Daar was 'n oproep wat ontvang is [by die hotel] teen 6:10vm wat gevra het dat hulle ontruim," het kaptein Bernadine Steyn gesê.
Sy sê hulle het die hotel, die Holiday Inn Express in Kerkstraat, ontruim en as 'n "voorkomende maatreël" polisiehonde ingestuur.
"Niks is gevind nie," het Steyn gesê.
'n Diensbestuurder van die Holiday Inn, wat nie haar naam wou gee nie, het ontken dat daar 'n bomdreigement was.
Sy sê die brandalarm het om 6:00vm afgegaan wat gaste wakker gemaak het.
"Soos jy weet, kan die ding enige tyd gebeur," het sy gesê.
Dr Pieter Mulder verklaar dat hy wyd geskakel het met instansies soos die FAK, AgriSA, Solidariteit en die Afrikanerbond voordat hy pres. Zuma se aanbod aanvaar het. Verder word verklaar dat verskeie boere die VF+ geskakel het om hulle met dr Mulder se aanstelling geluk te wens.
Mens wonder terloops hoeveel van daardie organisasies se lede vir die VF+ gestem het? Die organisasies wat geraadpleeg is, het waarskynlik 'n lang lys geldige redes waarom positiewe samewerking tussen die ANC en die VF+ wenslik is. Hulle sien waarskynlik ook baie voordele daarin om by beleidformulering vir die landbou betrokke te kan raak en dat 'n nuwe omgewing van ontspanningspolitiek aangebreek het.
ANC-woordvoerders beweer dat die aanstelling gesien moet word teen die agtergrond van Zuma se beleid om voedselsekuriteit te verseker en dat hy uitreik na die Afrikaanse minderheidsgroep om breër versoening in die land te bewerkstellig. Daarmee is weinig fout mee te vind, maar is die uitvoering van die plan nie verdag nie? Het ons nie hier te make met 'n veel fyner strategie nie?
Sou dit primêr oor voedselsekuriteit gegaan het, sou mens verwag het dat Zuma 'n gesoute landbouman met onkreukbare politieke getuigskrifte uitgekies het, iemand gelykstaande aan byvoorbeeld wyle Dries Bruwer of 'n Piet Gouws.
Maar deur die leier van 'n opposisieparty uit te kies, iemand wat weinig van die landbou af weet, koöpteer hy nie net die man nie, maar ook die hele party, of hy dit nou wil erken of nie. Hy kies sy man dus nie as landbouman nie, maar as 'n leier van 'n politieke party waarmee hy om strategiese redes nouer samewerking soek.
Daar is niks fout te vind met politieke partye wat saamwerk om 'n gemeenskaplike doel te bereik nie. Dit gebeur daagliks in elke land op aarde. Maar daardie spel het bepaalde reëls.
Die belangrikste reël is dat daar reëls moet wees wat in 'n wettige ooreenkoms vervat is. Dit verskaf nie net die morele grondslag vir individuele lede se optrede nie, maar stel ook perk en paal aan hul politieke uitsprake. Die reëls bepaal verder op welke ander vlakke en terreine daar saamgewerk sal word, byvoorbeeld op provinsiale en derdevlakregerings, poste wat vir die minderheidsparty gereserveer sal word in byvoorbeeld portefeuljekomitees, as burgemeesters, as speakers, en so meer.
Geen politieke party kan sonder so 'n ooreenkoms met 'n ander politieke party saamwerk nie en dit sou uiters naïef wees om te verwag dat die VF+ dit kon doen. Sonder 'n ooreenkoms word 'n party ontman.
Sou daar dus nie 'n samewerkingooreenkoms tussen die VF+ en die ANC bestaan nie, kan Pieter Mulder hoogstens die aanstelling as adjunkminister aanvaar op voorwaarde dat so 'n ooreenkoms binne 'n maand gesluit sal word.
Daarsonder word hy bloot gekoöpteer en versmelt die VF+ met die ANC sonder enige voorbehoude of politieke gewin vir sy kiesers. Dit sal ook die gewisse einde van die VF+ beteken en bestaande LP's en stadsraadslede sal voor die volgende verkiesing by die ANC moet aansluit om hul werk te kan behou.
Mens kan dus verstaan waarom sommige VF+-lede ongemaklik voel, maar verkies om om den brode by die besluit van die leierskap in te val.
'n Gekoöpteerde VF+ sonder 'n formele ooreenkoms sal nooit as te nimmer die Pretoriase stadsraadsverkiesing kan wen nie, want die DA sal hulle van die tafel vee. Darenteen, sou die VF+ en die ANC formeel saamwerk, kan hulle by die adjunkministerskap begin en nou reeds bepaal hoe munisipale verkiesings gehanteer sal word sodat goeie dienslewering verseker sal word – weliswaar ook moontlike roterende burgemeesters.
In die sakewêreld bestaan die begrip van "deal creeping". Dit is wanneer een party by 'n ooreenkoms algaande sy voordele verbeter, veral by mondelingse transaksies of swak omskrewe verpligtings. Om deal creeping te vermy, word goed geformuleerde samewerkingsooreenkomste dus opgestel. By die politiek is dit presies dieselfde.
Mens kan nou reeds voorspel dat, sou 'n VF+ raadslid hom te buite gaan oor een of ander ANC-sotheid, die ANC-leierskap vir dr Mulder tot orde sal roep. Dit kan hom sy werk kos.
Daar is mos niks wat hulle verhoed om dit te doen nie. Om bloot op Zuma se woord te gaan deur die pos te aanvaar is om vir die ANC 'n blanko tjek te gee.
Ek het nog nooit 'n wit politikus vertrou nie, waarom sou mens nou skielik 'n swart politikus vertrou?
Die ANC se Robbeneilandmuseum kan in sy vorige "wanfunksionele toestand" verval as 'n klein groepie werknemers daarin slaag om die herstrukturering te keer, het die museum se tussentydse uitvoerende hoof Donderdag gesê.
"REM is op die spel as die herstruktureringsproses nie voltooi word nie en as die instelling in die verkeerde hande val," het Seelan Naidoo in 'n desperate epos aan alle "belanghebbendes", waaronder 'n aantal bekende Suid-Afrikaners, gesê.
Hy het gesê die herstrukturering is op 'n sensitiewe stadium onderbreek deur 'n klein groepie werknemers wat verdeeldheid saai.
Die vooruitgang in organisasie wat met groot moeite oor die afgelope agt tot nege maande gemaak is, kan nou in 'n baie korter tyd verlore gaan," het hy gesê.
"Indien die herstruktureringsproses nie voltooi word nie, loop REM die gevaar om in sy vorige wanfunksionele staat te verval."
Sy boodskap volg na 'n betoging deur 'n groep werknemers by die museum se veerbootterminaal in die Kaapse hawe. Dertig mense uit 'n totaal van 210 personeellede het aan die betoging deelgeneem. Hulle is lede van die Nasionale Onderwys-, Gesondheid en Verwante Werkersvakbond en eis dat Naidoo afgedank word.
Volgens Naidoo is die werkers bang om hul werk te verloor en dat hul vaardighede onder die soeklig kom as 'n nuwe organisasiestruktuur ingestel word.
Die museum, wat Nelson Mandela se tronksel bevat waar hy die grootste deel van sy tyd agter tralies geslyt het, word reeds jare lank deur binnegevegte, omstredenheid en bewerings van wanbestuur geteister.
Naidoo is deur die museumraad, wat bekende ANC-politici insluit, gevra om die museum "grondig te herorganiseer". Hy is 'n vorige hoof van die Nasionale Kunsteraad en was betrokke by die herstrukturering van die Mark- en Windybrow-teaters in Johannesburg.
Die ANC het besluit om nie die Demokratiese Alliansie toe te laat om enige voorsitters vir parlementêre portefeuljekomitees te benoem nie as straf vir die partyleier Helen Zille se beledigings teenoor president Jacob Zuma.
"Dis 'n kwessie van verhoudinge wat in ag geneem word. Daar moet wedersydse respek tussen die partye wees," het die ANC se sekretarisgeneraal Gwede Mantashe gesê toe hy die party se nominasies vir die posisies aangekondig het.
"Hulle het 'n posisie ingeneem wat vyandig is. 'n Mens moet eers die vyandigheid bestuur en dan 'n verhouding bou."
Hy het Zille van 'n "totale minagting teenoor die amp van die president van die republiek" beskuldig en bygevoeg: "Ons moet baie dunvellig daarteenoor wees. Dit kan nie toegelaat word om aan te hou nie."
Die kommentaar het gevolg op 'n rusie wat tussen die regerende party en die opposisieleier uitgebreek het nadat sy slegs mans in haar uitvoerende span in die Wes-Kaap aangestel het.
Die geskil het versleg tot Zille in antwoord gesê het dat Zuma 'n selferkende rokjagter is wat tydens sy verkragtingverhoor in 2007 erken het dat hy met 'n MIV-positiewe vrou sonder 'n kondoom verkeer het en sodoende sy vroue aan die virus blootgestel het.
Mantashe is gedwing om die ANC van die lasterlike opmerkings van sy jeugliga te distansieer wat agterna teenoor Zille geuiter is maar het Donderdag die gedagte van dissiplinêre stappe teen die jeugliga verwerp.
"Ek dink die fokus is op die verkeerde area. Ons moet besin oor die werklike kwessie van die ANC se gedrag in die Wes-Kaap."
"Rassisme gaan nie net oor vooroordeel nie, dit behels ook stereotipering wat die gevaarlikste is aangesien dit onbewus in die verstand is."
Mantashe het gesê die Kongres van die Mense, die derde grootste party in die parlement met 30 setels in die nasionale vergadering, sal ook nie die geleentheid kry om enige voorsitters te benoem nie, "aangesien dit 'n nuwe dier is".
Volgens die Demokratiese Alliansie is die stygings te wyte aan die stadsraad se onvermoë om alle verbruikers korrek te faktureer en daarin te slaag om sy inkomste van hulle te verhaal.
In sy reaksie het die lid van die burgemeesterskomitee vir finansies en ekonomiese ontwikkeling, Parks Tau, gesê: "Die huidige tariefverhogings is ingestel weens die enorme druk van die internasionale ekonomiese insinking en die stygende vraag na snel verminderende hulpbronne."
Hy het gesê die stad gebruik tariewe as 'n ekonomiese instrument om verbruikersgedrag in alle verbruikskategorieë te verander. "Hoe meer jy verbruik, hoe meer gaan jy betaal," het Tau gewaarsku.
In die praktyk beteken dit dat voormalige blanke woonbuurte meer as die lokasies gaan betaal.
Tau het ook gesê dat die stad sy belastingverhaling van 87 na 90 persent gaan opstoot en raadpleeg tans sy prokureurs oor hoe om mense wat onwettig aan dienste verbind te hanteer.
Hy het voorts gesê dat die stadsraad ook dienste vir armes bekostigbaar wil maak. "Die eerste R150 000 van die waarde van alle woonhuise word van erfbelasting vrygestel en die stad voorsien gratis vullisverwydering aan woonhuise met 'n waarde van minder as R150 000.
Die nuwe minister van internasionale betrekkinge en samewerking het Woensdagaand gesê, sekere globale magstrukture moet hervorm word. Die wêreldwye finansiële krisis het die noodsaak daarvoor belig.
Maite Nkoana-Mashabane het by 'n galadinee van die diplomatieke korps by Emperors' Place in Kempton Park gepraat.
"Ons glo die huidige finansiële krisis is 'n geleentheid vir die internasionale gemeenskap om die politieke wil te wys om die nodige hervormings aan die globale finansiële argitektuur uit voer… hervorming is in ons kollektiewe belang want dit sal verseker dat hierdie instellings hulle werk beter doen, breër verteenwoordiging nastreef in besluitneming en dit sal ook hulle legitimiteit verhoog."
Sy het gesê gedurende Suid-Afrika se tweejaar tydperk as nie-permanente lid van die Veiligheidsraad, "het ons die gevolgtrekking gemaak dat dit tyd geraak het om daardie belangrike orgaan van die VN te hervorm".
Samesprekinge binne die regering vir die oprigting van 'n ontwikkelingsagentskap is reeds aan die gang. Die staat hoop om die doeltreffendheid van ontwikkelingsamewerking te verhoog deur die stigting van só 'n agentskap.
Die dekaan van die diplomatieke korps, Bene Mpoko, het gesê Suid-Afrika moet aanhou om op die kontinent te werk en het Madagaskar uitgesonder. Hy het gesê Suid-Afrika huisves tans 117 diplomatieke missies, die grootste aantal in die wêreld ná Washington.
"Dit is 'n mag tot ons beskikking," het hy gesê.
Die trefafstand van die grond-tot-grond-missiel die Sejil is byna dieselfde as ’n ander Iranse missiel, Sjahab 3.
Ontleders sê dié wapen is binne trefafstand van Amerikaanse en Israelse basisse in die Persiese Golf.
Die Iranse staatstelevisiediens het beeldmateriaal uitgesaai van ’n missiel wat in die lug beweeg en ’n rookwolk agterlaat.
Ahmadinedjad het die lansering aangekondig op dieselfde dag as wat ’n invloedryke geestelike outoriteit die begin van ’n veldtog vir aanstaande maand se presidentsverkiesing aangekondig het. Die outoriteit het Ahmadinedjad en drie teenstanders as kandidate goedgekeur.
Die geharde Ahmadinedjad se hoofteenstanders in die verkiesing op 12 Junie is gematigdes wat die gespanne betrekkinge met die Weste wil aanspreek.
Ahmadinedjad het by ’n saamtrek in die provinsie Semnan, waar die lansering glo plaasgevind het, gesê Iran het die vermoë om enige militêre basis van waar ’n “koeël” op dié land gevuur word “hel toe te stuur”.
Hy het Israel uitgesonder. “Die Sioniste-regime bedreig Iran militêr met sy vals dreigemente.”
Die Israelse adjunkminister van buitelandse sake, mnr. Danny Ayalon, sê Iran is in staat om Europa asook sy land te tref.
’n Militêre kenner in Londen het die missiellansering beskryf as Iran se reaksie op die Israelse premier, Benyamin Netanyahu, se huidige besoek aan Washington, Netanyahu het die Joodse staat se bekommernisse oor Iran benadruk. “Elke keer wanneer hulle (Iran) dit doen (’n lansering), is dit in reaksie op ’n bepaalde gebeurtenis,” het mnr. Andrew Brookes van die Internasionale Instituut van Strategiese Studies gesê.
Lonhro is die brein agter die Fly 540-diens wat uit die olieryke Kabinda sal opereer met aansluitings na Luanda, Huambo, Benguela, Soyo en Lubango.
Lonhro se Angolese bestuurder Luiz da Silva het aan AFP gesê hulle hoop om so gou moontlik te begin, "binne 'n maand of so".
Hulle wag net om die finale ooreenkomste in plek te hê. "Ons het vier splinternuwe vliegtuie in Toulouse wat gereed is om hierheen te vlieg."
Fly 540, wat reeds in Kenia, Oeganda, Tanzanië en Suid-Afrika opereer, sal hoofsaaklik gebruik maak van nie-Angolese loodse en tegnici omdat buitelanders in Angola dikwels deur hulle werkgewers verbied word om met plaaslike lugdienste te vlieg vanweë hulle swak veiligheidsrekord.
"Ons sal volgens internasionale standaarde handel en ons hoop om te skakel met internasionale lugdienste soos British Airways, Lufthansa en Air France," het Da Silva verduidelik.
"Daarom sal mense wat van Europa na Angola vlieg ons diens kan gebruik om 'n direkte aansluiting na hulle finale bestemming te neem." Die diens sal ook van hulp wees tydens die Afrikanasiessokkertoernooi in 2010 wat in Angola gehou sal word.
Angola se nasionale lugdiens TAAG is deur die EU in 2007 verbied om daarheen te vlieg. Verlede jaar is al die lugdienste in Angola op die EU se swartlys geplaas.
Die gebrek aan paaie en die groot afstande maak lugvervoer in Angola aanneemlik.