Stanley Uys skryf in sy rubriek op Politicsweb dat Afrikaners aan die ontwaak is. Hy sê voorts dat ‘n moontlike belastingboikot en teenstand die ANC behoort te bekommer.
Lees die volledige artikel.
Skrywer: Dan Roodt
VF+ verwelkom nasionale taalwet
“Die Vryheidsfront Plus verwelkom die uitspraak van die Pretoria Hooggeregshof waarin die regering gelas word om binne twee jaar sy grondwetlike plig na te kom in terme van die daarstelling van regulasies wat die gebruik van amptelike tale vasstel. Dit dien as baken vir die bevordering van die regverdige hantering van amptelike tale in Suid-Afrika,” het adv. Anton Alberts, VF Plus-parlementêre woordvoerder oor Kuns en Kultuur, gesê in reaksie op die uitspraak van regter Du Plessis.
“Die party wens mnr. Cerneels Lourens geluk met sy aansoek waarin hy die hof versoek het om die regering te dwing om ‘n nasionale taalwet op te stel. Die party vind dit egter jammerlik dat die hof nie die regering gelas het om ‘n nasionale taalwet op te stel nie, maar slegs bepaal het dat die regering sy grondwetlike plig moet nakom en reëls vasstel wat die gebruik van tale reguleer en monitor. Die verpligting wat die hof op die regering plaas is egter ‘n groot stap om te verseker dat alle tale gelyke behandeling kry,” het adv. Alberts bygevoeg.
“Die VF Plus gaan die regering monitor om te verseker dat die regering sy verpligting soos vervat in art. 6(4) van die Grondwet, wat die regering tot op hede geïgnoreer het, voortaan na te kom. Die party sal die regering voortdurend herinner om die nodige stappe te neem in terme van die hofbevel om veeltaligheid in die staatsdiens te verseker. Die party sal ook sy veldtog deur middel van parlementêre vrae en gesprekke met die ANC-regering voortsit om die regering te dwing om ‘n nasionale taalwet op te stel.”
Sasco val in by ‘Skiet die boere’
Die VF Plus-jeug het Woensdag, 17 Maart 2010, ‘n kriminele klagte amptelik by die Potchefstroom Polisiestasie teen SASCO se voorsitter op die Puk-kampus, Shimone Ramathosa, gelê vir haatspraak. Dit volg nadat Ramathosa in sy toespraak voor honderde studente gesê het “Skiet die boere”.
Die VF Plus-jeugleier, Jan van Niekerk, het die gebruik van die slagspreuk ten sterkste veroordeel aangesien dit baie duidelik rassehaat aanblaas en polarisasie veroorsaak. Die VF Plus-jeug doen ‘n beroep op die ANC om sy jeugleiers in die bek te ruk nadat die VF Plus verplig was om die afgelope week 2 klagte van haatspraak teen ANC-jeugleiers in te dien.
Die ander klagte hou verband met dieselfde haatspraak-slagspreuk wat Julius Malema by die Universiteit van Johannesburg gebruik het waarna dr. Pieter Mulder, VF Plus-leier, ‘n kriminele klag teen hom ingedien het.
Fourie du Preez Japan toe
Die Bulle se skrumskakel, Fourie du Preez, het Woensdag ‘n kontrak met sy span tot 2011 gesluit, waarna hy klubrugby in Japan gaan speel.
Du Preez, wat volgende week 28 word, sal tot die einde van die Super 15 vir die Bulls beskikbaar wees.
Die speler het ook ‘n kontrak met die Springbokke geteken wat hom tot die einde van die Wêreldbeker-rugbytoernooi volgende jaar in Nieu-Seeland in die nasionale kleure sal hou.
Daarna sal hy by ‘n klub in Japan aansluit.
“Hierdie was die beste rugbyjare van my lewe, en ek sou dit saam met geen ander span wou gespeel het nie,” het Du Preez gesê.
Hy het bygevoeg dat hy die Bulls vroegtydig van sy planne in kennis stel sodat hulle genoeg tyd het om die toekoms te beplan.
“Daar is reeds uitstekende spelers soos Francois Hougaard wat aan die deur klop, so dis tyd om aan te beweeg.”
‘SA is teelaarde vir mensehandel’
Suid-Afrika se oop, kosmopolitiese samelewing is ‘n teelaarde vir mensehandel, het die Verenigde Nasies (VN) Woensdag gesê.
“Suid-Afrika word vir mensehandel gebruik weens die land se (tegniese en reis-) infrastruktuur.
“Die land se kosmopolitiese samelewing word gebruik om misdaad te fasiliteer,” het Johan Kruger, die VN se kantoor oor dwelms en misdaad (UNODC) se nasionale projekkoördineerder, gesê.
Volgens Kruger word Suid-Afrika se liberale, demokratiese omgewing en ekonomiese mag gebruik om winsgewende mensehandelprojekte te ondersteun.
Kruger het dié opmerkings by ‘n werkswinkel oor internasionale samewerking in mensehandel en -smokkelary in Johannesburg gemaak.
Produktiewe landbougrond in die ANC se visier
Sogenaamde grondhervorming wat gelei het tot die ineenstorting van Zimbabwe, is besig om vorm aan te neem in die nuutste verklarings van die ANC.
Dr. Joe Phaahla, adjunkminister van landelike ontwikkeling en grondhervorming, en Thozi Gwanya, direkteur-generaal, het Woensdag gesê dit is immoreel dat mense wat grondloos is moet toekyk hoe sommiges met duisende hektaar sit.
Phaahla meen die regering moet toegang tot grond met eiendomsreg versoen. Daar word volgens hom reeds te veel klem gelê word op eiendomsreg. Daarom sal art. 25 aangepas moet word, het hy gesê.
Dit is duidelik dat die ANC eiendomsreg in die visier het eerder as voedselsekuriteit. Die fokus van die regering is uitsluitlik op produktiewe landbougrond en nie op die mislukte landboubedrywighede van swart grondeienaars nie.
Die ANC wil grond glo “optimaal” benut deur dit aan grondhonger mense te oorhandig omdat só ‘n stap volgens Phaala “moreel” regverdigbaar is.
Phaala het aan Beeld gesê ’n presedent oor die voogdyskap van natuurlike hulpbronne is met die wet op ontwikkeling van minerale en petroleum-hulpbronne geskep waarvolgens die staat sy regte op hulpbronne behou het. Hy het gesê dit het mynhuise nie afgeskrik nie.
Mulder praat oor koringprys, Afrikaans en landbouhervorming
Enkele uittreksels uit dr. Pieter Mulder, adjunkminister van Landbou, Bosbou en Visserye en VF Plus-leier, se toespraak by die Malmesbury-Landbouvereniging, Dinsdagaand, 16 Maart 2010.
Koringtarief
“Regerings in ontwikkelde lande soos Amerika en in Europa betaal groot subsidies aan hulle koringboere. Dit maak vrye handel, soos die Wêreld Handelsorganisasie dit voorstaan, onmoontlik. Daarom ondersteun ek ‘n verhoging van die koringtarief ten einde Suid-Afrikaanse boere teen onbillike mededinging uit die buiteland te beskerm. Volgens my inligting is alle voorleggings aan ITAC by die Departement van Handel en Nywerheid voltooi en wag ons vir die betrokke minister om ‘n besluit oor die saak te neem. Dit is belangrik dat so ‘n besluit so gou as moontlik geneem word ten einde dit vir koringboere moontlik te maak om te besluit of hulle wil voortgaan om koring vir die nuwe seisoen te plant of nie.”
Stellenbosch en Afrikaans
Voedselsekerheid is tans ‘n prioriteit by internasionale organisasies soos die G20 asook by die regering in Suid-Afrika. Die uitdaging is om tot 50% meer voedsel op dieselfde grond te produseer teen 2030.
Dit kan slegs gedoen word met meer navorsing en meer opleiding. As Suid-Afrika akademies op landbou-terrein agter raak, sal ons dit baie moeilik weer kan inhaal.
In hierdie verband is landboudepartemente aan Suid-Afrikaanse Universiteite belangrik. Omdat die meerderheid van Suid-Afrikaanse kommersiële landbouers en die grootste hoeveelheid plaaswerkers in die Wes-Kaap Afrikaanssprekend is, is dit belangrik dat ‘n Universiteit soos Stellenbosch steeds in Afrikaans moet doseer. Hierdie is nie ‘n politieke argument nie, maar ‘n bemagtigings- en opvoedkundige argument.
Suid-Afrika het tans 23 Universiteite met 36 kampusse. Dit is ‘n noodsaaklikheid vir die groot Afrikaanssprekende gemeenskap in Suid-Afrika dat ten minste twee of drie van hierdie kampusse steeds in Afrikaans sal doseer. Met die Wes-Kaapse bevolking 60% Afrikaanssprekend, behoort daar geen argument te wees waarom Stellenbosch Universiteit onder druk moet kom, omdat die Universiteit steeds in Afrikaans wil doseer nie.
Landbougrond
Volgens media-verslae is een van die opsies wat die ANC vir die groenskrif op grondhervorming oorweeg, ’n voorstel dat alle landbougrond voortaan aan die staat behoort en bestaande eienaars se eiendomsreg in ’n erfpagstelsel omskep word.
Daar kan geen twyfel wees dat as alle produktiewe grond in Suid-Afrika op hierdie wyse in ’n nasionale bate omskep word, dit die nasionalisering van grond beteken nie.
As so ’n voorstel regeringsbeleid sou word, sal dit teen die grondwet wees, sal dit alle beleggers in Suid-Afrika permanent afskrik en sal dit groot onsekerheid op die platteland veroorsaak wat weer voedselsekerheid sal vernietig.
Wat sê die regering?
Die ontwikkeling van die platteland is tans een van die prioriteite van die ANC.
Onsekerheid is die belangrikste rede waarom kommersiële boere in die platteland nie tans hulle boerderye uitbrei of meer werksgeleenthede skep nie. As ’n sogenaamde gronderfpagstelsel regeringsbeleid word, sal dit totale onsekerheid oor grond op die platteland skep. Enige regeringsamptenaar wat dink dat die ontwikkeling van die platteland moontlik is sonder die samewerking van die kommersiële boere, ontken die werklikhede van Suid-Afrika.
In belang van Suid-Afrika en van landbou sal hierdie voorstel met alle moontlike middele en deur alle belanghebbendes beveg moet word.
Westinghouse wil korrelbed ondersteun
Westinghouse Electric, wat grotendeels deur Japan se Toshiba besit word, maar in die VSA gesetel is, gaan moontlik ’n bykomende investering in die tegnologie van die korrelbedkernreaktormaatskappy PBMR maak, het ’n werknemer Woensdag gesê.
Die regering het verlede maand gesê hy gaan finansiële ondersteuning vir die projek staak nadat die PBMR nie daarin kon slaag om beleggings van buite te kry nie, ondanks ’n aangepaste produkmodel.
Robert Pearce, direkteur vir ontwikkelingstrategie en sakebeplanning by Westinghouse, het gesê die regering se onttrekking van die projek was moontlik nodig aangesien hy finansieringsvoorkeure moes kies, maar dat sy maatskappy verdere steun oorweeg. Hy het gesê huidige finansiering sal die projek vir ’n verdere 12 tot 15 maande laat voortgaan.
“Die punt sal dan bereik word waar verdere investering benodig sal word. Westinghouse is besig om die investering te evalueer. Ons gaan heel moontlik investeer en sal ook investering van andere soek,” het hy gesê tydens ’n Afrika-kragkonferensie in Johannesburg.
Die PBMR het in Februarie gesê hy gaan tot 600 poste besnoei om koste te bespaar, en sy nabye en mediumtermyn-toekoms hang af van gesprekke met investeerders.
Westinghouse, Eskom en die Nywerheidsontwikkelingskorporasie (NOK) het tot dusver sowat R8 miljoen sedert 1999 investeer vir die PBMR-tegnologie.
Die wêreldwye finansiële krisis en finansieringsprobleme by Eksom het egter die ontwikkeling van die tegnologie ’n knou toegedien.
Taxigeweld ruk heeltemal hand uit
Taxigeweld in Johannesburg is besig om heeltemal hand uit te ruk, het die Suid-Afrikaanse Nasionale Taxiraad, Santaco, Woensdag gesê.
PhilipTaaibosch, die sekretaris-generaal van Santaco, het Woensdag gedurende ’n nuuskonferensie gesê die geweld spruit uit frustrasie dat die regering die rol van die industrie in die land verontagsaam.
Sowat 60 taxi-operateurs is sedert die naweek weens openbare geweld in hegtenis geneem.
“Terwyl die hele Suid-Afrika se aandag nou op Johannesburg gevestig is en verdere kommer voor die 2010 Wêreldbeker die lig gesien het, doen ons ’n beroep op die stad Johannesburg om terug te staan want die gevolge van hulle aksies is besig om uit te kring na ander dele van die land.”
Taaibosch het gesê die regering wat voortdurend versuim om saam te werk, gee aanleiding tot ‘n nasionale staking wat dreig om uit te breek.
“2010 word nie as ‘n platform gebruik nie. Ons ondersteun dit en sien uit daarna, maar indien dit gebeur dat die staking tot die Wêreldbeker voortduur, is dit nou maar so, maar dit word nie beplan nie.”
Taaibosch het gesê die taxi-operateurs is baie bekommerd oor voortdurende intimidasie en ongelukkig met al die “razzmatazz” ly die pendelaars daaronder.
“Dit is onregverdig. Dit is nie ’n polisiestaat nie. Dit lyk egter of ons een word,” het Santaco se uitvoerende lid in Johannesburg, Frans Mashishi gesê.
Mashishi het gesê lede is ook ongelukkig oor die feit dat hulle nie by enige vervoerreëlings van die Wêreldbeker ingesluit is nie.
‘Nigerië moet verdeel word’
Daar is niks wat die etniese geweld in Nigerië sal kan stop nie, behalwe as die bevolking in Christen- en Moslemstate verdeel word, het Libië se leier gesê.
Moeammar Gaddafi het aan ‘n groep Afrika-studenteleiers in Triplo gesê dat die geweld in Nigerië van ‘n godsdienstige aard is en dat dit ‘n radikale oplossing vereis.
Nigerië moes hierdie jaar twee uitbarstings van geweld tussen Moslems en Christene trotseer, toe mans en vroue vermoor is. Die geweld word vermoedelik meestal uit wraak gepleeg, maar groeiende godsdienshaat en politieke en etniese mededinging vuur die aanvalle nog verder aan.
Nigerië, ‘n land met ongeveer 150 miljoen mense, het net soveel Moslems in die noorde as Christene in die suide.
Volgens Gaddafi sal dié uitweg pynlik wees, maar dit moet bereik word deur ‘n ooreenkoms, en níé deur nog gevegte of bloedvrgieting nie.