korrupsie – Bladsy 3

Verslete ou ANC-gevegte oor wie die beursie hou

Die gewone vervelige ou faksiegevegte binne die ANC wat gereeld as “nuus” in Suid-Afrika aangebied word, is weer opgediep deur wit ANC-lede in Gauteng wat van die etniese Zoeloes in die party ontslae wil raak.

Die “elite” in die ANC veg verbete om posisies en gebruik staatsmiddele daarvoor omdat hulle slegs deur politieke intriges verryk word weens ‘n gebrek aan kundigheid. Die media dink persoonlikhede in die ANC is nuuswaardig want hulle sal dit nie waag om die hele korrupte nes van ‘n bestel te ontbloot nie.

Gauteng-marionet, Pravin Gordhan, en minister van finansies, beweer “verdagte transaksies” van R6,8 miljard is met die Guptas gesluit. Geen “verdagte transaksie” deur die ANC se Gauteng-faksie is nog opgediep nie en aangesien die media Gordhan se sy trawante heelhartig steun, sal dit ook nie gou gebeur nie.

Die anti-Zuma-faksie in die ANC hoop die nuwe intrige sal Zuma by die party se verkiesingskonferensie in Desember volgende jaar in die verleentheid stel.

Dit is dus geen verrassing dat Cyril Ramaphosa ook sy “morele en politieke steun” aan Gordhan toegesê het nie.

“Voorvalle die laaste paar dae wat verband hou met minister Gordhan is ‘n groot bron van kommer vir alle Suid-Afrikaners in alle sektore van ons samelewing. Ek bied my ondersteuning aan minister Gordhan in die klagte wat die nasionale vervolgingsgesag (NVG) teen hom ingedien het,” het Ramaphosa gesê.

Dit kan egter die meeste Suid-Afrikaners nie skeel wat van Gorhan en sy trawante word nie, want die media kan dit nie waag om hulle buitenissige voorregte te verdedig nie. Die ANC-vetkatte het hul posbeskrywings te danke aan ‘n ideologiese windeier.

Die swart politieke stemme toon te min variasie as hulle begin kerm dat hulle nie kan saam baljaar op die staat se onkoste nie. Ebrahim Patel, minister van ekonomiese ontwikkeling, en Derek Hanekom, minister van toerisme, is die ander kabinetslede wat Gordhan glo steun. Nie een van die drie het enige invloed nie en werk saam met die EFF.

Die EFF het Sondag klagtes ingedien teen die Guptas en Duduzane Zuma, Zuma se seun.

Floyd Shivambu, onderleier van die EFF, het by die Rosebank-polisiekantoor gedreig om die “Guptas en hul hanteerder, Jacob Zuma, op hul knieë te dwing” omdat hulle glo genoeg bewyse by die polisie ingedien het. Dit sluit glo geldwassery, afpersing, bedrog en diefstal in.

Ondersoek na bouwerk van tien skole in Vrystaat gelas

Multimiljoenrandse projekte van die Vrystaatse Onderwysdepartment en die nasionale Departement van Basiese Onderwys – waaronder die nuut geboude Heide Primêre Skool in Heidedal, Bloemfontein – word nou ondersoek.

Die ondersoek is geloods deur die Spesiale Ondersoekeenheid (SOE). Dié skool vorm deel van ‘n lys van tien skole in die Vrystaat wat deel uitmaak van die proklamasie vir die ondersoek wat in die Staatskoerant gepubliseer is.

Die proklamasie lees dat ‘n ondersoek gelas word nadat daar “verskeie bewerings” in verband met die aangeleenthede van die Onafhanklike Ontwikkelingsraad (OO), die Departement van Basiese Onderwys en die Departement van Onderwys in die Vrystaat gemaak is.

Die Heide Primêre Skool (foto) was sedert die begin van bouwerk aan die nuwe skoolgebou in omstredenheid gedompel. Die bou van die skool, wat aanvanklik net nege maande sou duur, is ná drie jaar eers voltooi.

Bouwerk is verkeie kere tot stilstand geruk deur protesoptogte van die gemeenskap en/of die nie-betaling van kontrakteurs.

Leerlinge het uiteindelik aan die begin van die vorige kwartaal die nuwe skoolgebou betrek.

Bron: OFM

‘Groot humanitêre toestand’ na orkaan Haïti tref

Die orkaan Matthew het groot skade aan Jamaika en Haïti Maandag aangerig. Swaar reën het die eilande deurdrenk, strate in riviere omskep en baie mense na noodskuilings laat vlug.

Twee mense is reeds in Haïti dood wat die totale sterftes vanweë die storm op vier te staan bring.

Die suidelike deel van die eiland is tans afgesny nadat die brug na die hoofstad, Port-au-Prince, in duie gestort het.

Die VN het gesê dat die land sal nou die “grootste humanitêre toestand” in die gesig staar sedert die groot aardbewing in 2010.

Ten minste 10.000 mense het skuilings opgesoek en daar was verslae van oorvol hospitale en tekorte aan vars water, het Mourad Wahba, die spesiale verteenwoordiger van die VN vir Haïti, gesê.

Meer as 4 miljoen kinders kan blootgestel wees aan orkaanskade, volgens Unicef. Hulle het gewaarsku teen die verspreiding van siekte.

Matthew is een van die kragtigste Atlantiese orkane in die onlangse geskiedenis.

Matthew gaan gepaard met winde van tot 230 kilometer per uur. Die oog van die orkaan sou na verwagting Dinsdag net oos van Jamaika en naby of oor die suidwestelike punt van Haïti beweeg het voordat dit na die ooste van Kuba trek.

Die Clinton-veldtog raak toenemend senuagtig dat ‘n gebrek aan entoesiasme in die swart gemeenskap van die deelstaat Florida hulle die staat kan kos na die orkaan.

Groeiende skeptisisme teenoor die Demokratiese presidensiële kandidaat binne Haïtiaans-Amerikaanse gemeenskap dreig om die probleem te vererger.

Onder Haïtiane het Clinton het ten minste twee struikelblokke om te oorkom: die korrupsie van die Clinton Foundation ná ‘n verwoestende aardbewing daar in 2010, volgens onderhoude met gemeenskapsleiers.

Die tweede probleem vir Clinton, is dat die Obama-administrasie verlede maand skielik ‘n sesjaar-pouse op deportasies na Haïti gelig het. Die pouse was in die nasleep van die aardbewing in 2010 in werking gestel.

Vrystaatse ANC-kabinet bly onveranderd

Die Vrystaatse premier Ace Magashule (foto) het nie soos verwag enige van sy LUR’e afgedank nie.

Magashule het eerder een nuweling, Limakatso Mahasa verwelkom laat Maandag tydens ‘n kabinetskommeling-aangekondiging.

Nuweling Mahasa is die LUR vir Welsynsontwikkeling.

Ander skuiwe sluit in die LUR vir Gesonheid, Benny Malakoane, LUR vir Polisie, Paaie en Vervoer – Butana Komphela, LUR Toerisme, Ekonomiese Sake en Klein Sake Ontwikkeling – Sam Mahinini en Welsynsontwikkeling LUR Sis Ntombela.

Malakoane skuif in Mashinini se plek in terwyl Mahinini Komphela se portefeulje oorneem.

Komphela is nou politieke hoof van gesondheid en Ntombela is die LUR vir Samewerkende Regering.

Die LUR’e vir onderwys en die departement van finansies bly.

Vermeende korrupte Lesotho-immigrasiebeamptes voor

Vier-en-twintig swart verdagtes wat immigrasiebeamptes insluit, het in die landdroshof in Ladybrand in die Vrystaat verskyn op aanklagte van bedrog en korrupsie.

Die polisie sê nog twee verdagtes is Maandag in hegtenis geneem.

Die inhegtenisnemings volg na ‘n ondersoek deur die Valke en die departement van Binnelandse Sake wat twee jaar geduur het.

Die verdagtes het glo omkoopgeld aanvaar in ruil vir vervalste dokumente by die Maseru-grenspos. Ses van die hulle is glo Lesotho-burgers.

Die verdagtes is tussen 28 en 41 jaar oud en is in hegtenis geneem met die beëindiging van Projek Cone.

Die saak is uitgestel tot 10 en 11 Oktober vir formele borgtogaansoeke. Die verdagtes sal in aanhouding bly.

Voormalige Valke-hoof veg terug teen Indiër-sakeman

Die voormalige hoof van die Valke in KwaZulu-Natal, Johan Booysen, sê hy is van mening dat die Nasionale Vervolgingsgesag gemanipuleer word.

Booysen sê die aanklagte dat hy en 30 lede van die Valke se Cato Manor-eenheid soos ‘n moordbende gefunksioneer het, is die funksie van politiekery.

Hy hou reeds jare lank vol dat hy van rampokkery aangekla word om die Toshan Panday-ondersoek te stop.

Hy het ‘n boek oor sy wedervaringe bekendgestel, waarin hy sê dat die doel van die aanklagte teen hom is om hom te keer om hoëvlakkorrupsie te ondersoek.

Die Nasionale Vervolgingsgesag het intussen besluit om die aanklagte teen die Durbanse sakeman, Panday (foto), weer in te stel.

Sedert 2010 het Panday vier afsonderlike aanklagte gesystap.

Sy verhouding met lede van die Zuma-familie, onder meer Jacob Zuma se seun Edward en die president se neef Deebo Mzobe, het vermoedelik gehelp daartoe.

Panday is vir die eerste ondersoek saam met ene Madhoe, ‘n aankoopbeampte by die polisie se hoofkantoor in Durban, omdat hulle saamgesweer het om die Suid-Afrikaanse Polisiediens te bedrieg oor ‘n R60-miljoen kontrak om tydelike verblyf vir die polisie te verskaf in KwaZulu-Natal tydens die 2010 FIFA Wêreldbeker.

Panday is later in hegtenis geneem nadat hy na bewering Booysen met R2-miljoen wou omkoop om ‘n verslagdatum te vervals.

Panday en die senior polisie-offisier, Navin Madhoe, sal op aanklagte van korrupsie in die Durban-streekhof verskyn.

Gaboen se opposisie soek steeds bloed

Ontevredenes in Afrika sowel as Europa het op ‘n internasionale ondersoek na beweerde “massamoorde” deur soldate en lede van die polisiemag aangedring in Gaboen.

Hulle beweer dat gebeure gedurende die land se presidentsverkiesing wat naelskraap deur die dienende staatshoof, Ali Bongo gewen is, ondersoek moet word.

Aktiviste van “Tournons La Page” (Slaan ‘n nuwe blaadjie om), het in ’n verklaring gesê “baie slagoffers” is dood toe die weermag die “populistiese opstand ná die verkiesingoorname” onderdruk het.

Die swart Chinese opposisieleier, Jean Ping (foto), het verlede week die verkiesing by die land se hoogste hof uitgedaag, met Bongo wat hom daarvan beskuldig dat hy die opstand aangemoedig het.

Dit volg ná die bekendmaking van die verkiesingsuitslae wat met ’n skrale 6 000 stemme gewen is.

“Baie families soek nog na hul lede wat sedert 31 Augustus verdwyn het,” het Tournons La Page in ’n verklaring gesê.

Bongo en sy familie swat edert 1967 aan bewind is, ontken enige aandeel in die geweldpleging en gee vir Ping die skuld.

Ping se ondersteuners sê minstens 17 mense het slegs by die party se hoofkantoor omgekom, maar die minister van binnelandse sake ontken dit en sê net drie mense het in die geweldpleging gesterf.

Vrystaatse munisipaliteite het meeste uitstaande skuld

Munisipaliteite in die Vrystaat het die meeste uitstaande skuld in vergelyking met ander provinsies.

Dit is volgens ‘n finansiële verslag, wat die stand van munisipaliteite landswyd soos op 30 Junie 2016, vergelyk. Die verslag dui daarop dat 73.7% van munisipaliteite in die provinsie se skuld aan diensleweraars al vir meer as 90 dae agterstallig is.

Die provinsie met die tweede meeste uitstaande skuld is Mpumalanga met 69.4% en die Noord-Kaap met 66.9%. Die totale uitstaande skuld van munisipaliteite aan diensleweraars het op 30 Junie vanjaar op R38.9 miljard rand gestaan.

Hierteenoor het munisipaliteite in die Vrystaat egter 100% van hulle Landelike Huishoudelike Infrastruktuurtoekenning bestee.

Hierdie toekenning word meestal bestee vir die uitwissing van sanitasie agterstand in gebiede waar grootmaat sanitasiedienste nie beskikbaar is nie.

Bron: OFM

‘n Miljard se vrugtelose uitgawes in Noordwes

Die Staande Komitee oor Openbare Rekeninge in Noordwes is bekommerd oor die stand van die provinsie se finansiële sake.

Dit, volgens komiteevoorsitter, Mahlakeng Mahlakeng. Dit blyk uit die jongste verslag van die ouditeur-generaal dat daar R2 miljard se onreëlmatige uitgawes in die 2014/15-boekjaar was.

Noordwes is, na wat berig word, die provinsie met die meeste onreëlmatige uitgawes in die land.

Volgens Mahlakeng is daar reeds aanduidings dat daar ’n verdere R1 miljard se vrugtelose uitgawes vir die 2015/16-boekjaar gaan wees.

Mahlakeng sê alle plaaslike regeringsdepartemente sal eersdaags voor die komitee verskyn om rekenskap van hul finansies te gee.

Valke oorhandig Gordhan-dossier aan NGV

Die Nasionale Vervolgingsgesag het bevestig dat ‘n dossier van die Valke ontvang is oor Pravin Gordhan, minister van finansies, se moontlike vervolging.

Die saak teen Gordhan is dus in die hande van adv. Shaun Abrahams, die nasionale vervolgingshoof, nadat die dossier Vrydag aan hom oorhandig is.

Die NVG het gesê dat staatsaanklaers nog besig is om deur dokumente te sif om vas te stel of hul bewyse sterk genoeg is, het ‘n woordvoerder, Luvuyo Mfaku gesê.

Maar ingeligte bronne binne die NVG, die Valke en die SAID sê die minister gaan beslis aangekla word. Dagvaardings of lasbriewe sal glo binne die volgende twee weke uitgereik word.

Gordhan staan onder verdenking dat hy ‘n sogenaamde geheime spioenasie-eenheid binne die Suid-Afrikaanse Inkomstediens op die been gebring het wat met die buiteland geskakel het.

Die Valke het Gordhan verlede week ontbied, maar die voormalige minister het die versoek geïgnoreer. Na wat berig word was lt.genl. Mthandazo Ntlemeza, die Valke se hoof, glo woedend omdat Gordhan geweier het om ook by die kantoor aan te meld.

Daar heers groot kommer by Zuma se vyande dat ‘n groep binne die ANC wat hom simpatiek gesind is, beheer oor die Nasionale Tesourie sal verkry as hulle van Gordhan ontslae raak.

Die sekretaris-generaal van die Suid-Afrikaanse Kommunisteparty, Blade Nzimande het vir Gordhan in die bres getree en gesê dit is duidelik dat die bewerings rondom die minister van finansies “polities gemotiveerd” is.

Nzimande het tydens ‘n nuuskonferensie in Kempton Park aan die Oos-Rand gepraat. Nzimande sê dit waaraan Pravin Gordhan tans onderwerp word, grens aan “teistering”.

Wat Blade versuim het om te noem is dat die daling van die Rand eweneens polities gemotiveerd is om Gordhan se posisie te probeer red.

Met meer as 30 getuies wat gereed staan om teen Gordhan te getuig, asook drie voormalige amptenare van die Inkomstediens (SAID), sal die Suid-Afrikaanse geldeenheid wipplank ry.

Hulle het almal reeds beëdigde verklarings afgelê wat in die dossier vervat is.

Die amptenare is Ivan Pillay, gewese adjunkkommissaris van die SAID, Oupa Magashula, kommissaris van die SAID, en Johann van Loggerenberg, gewese uitvoerende groephoof vir ondersoeke.

Nog ‘n amptenaar, Helgard Lombaard, wat meeluisteringstoerusting by die NVG-hoofkantoor geïnstalleer het, is nou ‘n staatsgetuie in ruil vir vrywaring teen vervolging.

Die getuies sluit ondermeer ook die Chinese ANC-skenker Jen-Chih Huang in. Jen-Chih se bates is twee jaar gelede bevries gedurende ‘n saak oor belasting waar ten minste R541 miljoen ter sprake is.

Adv. Gerrie Nel van die NVG het Lombaard na bewering destyds R1,1 miljoen betaal om die toerusting in die NVG se kantore te installeer.

Indien Gordhan aangekla word, waarsku sy ondersteuners dat Suid-Afrika se kredietgradering spoedig tot rommelstatus verlaag sal word omdat sukkelende staatsondernemings nie meer toepaslik is binne die ontwikkelingsagenda nie.

Dit is die mening van ‘n aantal ekonome wat deur Reuters genader is oor Gordhan se toekoms.

Ontleders het toegee dat dit nie alleen langtermyn ekonomiese oorwegings is wat ‘n rol sal speel by die land se kredietgradering nie. Die inmenging deur die staatshoof “kan tot disinvestering van kapitaal lei” meen hulle.

Die rand het die afgelope week met byna 6% teenoor die dollar verswak. Engelse koerantopskrifte vanoggend het ‘n verdere skerp daling voorspel om druk op Zuma te plaas, maar die geldeenheid was vanoggend bestendig.

Die daling in die Rand kan ook wees omdat Janet Yellen, voorsitter van die Amerikaanse Federale Reserweraad gesê het dat rentekoerse in die VSA binnekort sal begin styg.

Die Suid-Afrikaanse Reserwebank sal daardeur dalk genoop word die plaaslike rentekoers ook op te skuif omdat die wisselkoers ‘n risiko vir inflasie inhou.

Die Rand het vroeër herstel van die vorige skerp daling toe Zuma sy minister van finansies, Nhlanhla Nene, met Des van Rooyen vervang het.

Gordhan se heraanstelling in Van Rooyen se plek, het egter tot die versterking in die Rand gelei.

Filippynse president roer dwelmnes, VN

Altesaam 1 800 mense is in die Filippyne dood in dwelmverwante optrede, sedert pres. Rodrigo Duterte sewe weke gelede aan bewind gekom en ’n oorlog teen dwelms verklaar het.

Die hoof van die polisie, Ronald Dela Rosa, het gister ’n senaatkomitee meegedeel dat 712 dwelmhandelaars en gebruikers sedert 1 Julie in polisieoperasies dood is.

Die polisie ondersoek ook 1 067 ander dwelmverwante sterftes, het Dela Rosa gesê.

Die opmerkings kom ’n dag nadat Duterte die Verenigde Nasies (VN) aangeval het na hul kritiek oor die vlaag sterftes.

Duterte het Sondag op ’n laatnag mediakonferensie gesê die Filippyne kan die VN verlaat.

Hy het China en ander lande genooi om saam ’n nuwe globale forum te vorm omdat die VN nie geslaag het om sy mandaat uit te voer nie.

Duterte het ook die afdanking elke lid van sy administrasie wat aangestel is deur ‘n vorige president aangekondig.

Die skuif is die jongste in watter Duterte ‘n veldtog teen korrupsie noem.

Meer as 70 Metro-amptenare geskors te midde van koalisie-gesprekke

Meer as sewentig amptenare is tans in die agt Metro’s geskors. Dit is deur die Minister van Samewerkende Regering, Des van Rooyen bekend gemaak in `n geskrewe antwoord op `n parlementêre vraag.

Dit kom te midde van vier Metro’s wat moontlik deur koalisies beheer sal word, het RSG berig.

Die amptenare wat geskors is, sluit in stadsklerke, `n munisipale bestuurder, brandweerpersoneel, bou-inspekteurs, metropolisiebeamptes en `n opsigter by `n swembad.

Van die klagtes teen hulle is seksuele teistering, bedrog, ‘n onregmagtige mediakonferensie en die gebruik van munisipale eiendom om perlemoen te smokkel.

Die skorsings is in Buffalo City, Ethekwini, Mangaung, Nelson Mandelabaai, Ekhuruleni, Johannesburg, Tshwane en Kaapstad.

Die Suid-Afrikaanse Kommunisteparty het onderneem om ondersteuners teen ‘n DA-EFF-koalisie te mobiliseer in Gautengse metro’s waar die ANC nie ‘n volstrekte meerderheid behaal het nie.

Die DA is in koalisiegesprekke met die EFF oor die metro’s van Johannesburg, Tshwane, Ekurhuleni en Mogale City.

In die Kannaland-munisipaliteit in die Klein-Karoo sal die DA en ANC glo saamwerk. Die twee partye het elkeen twee raadslede, terwyl ICOSA die ander drie raadslede het.

Die DA en ANC hou vol dat hulle nie `n koalisie gevorm het nie, maar net gaan “saamwerk”.

Die nuwe burgemeester is Magdalene Berry van die ANC, terwyl Aletta Theron van die DA die speaker is.

Ses in hinderlaag in Mosambiek dood

Ses mense is gedood in ‘n aanval deur Renamo-rebelle in Mosambiek, het die polisie in ‘n verklaring gesê.

Dit is die jongste in ‘n reeks gewelddadige skermutselings tussen gewapende opposisielede en regeringsmagte.

“Gewapende mans van Renamo het Vrydag ‘n voertuig in ’n hinderlaag gelei en daarop geskiet totdat die voertuig aan die brand geslaan het,” het ‘n polisiewoordvoerder gesê.

Ses insittendes het doodgebrand. Die slagoffers was burgerlikes, maar hul name is nog nie bekend gemaak nie. Die polisie is nog op soek na moontlike oorlewendes wat dalk ontsnap het.

Renamo, wat ‘n 16 jaar lange burgeroorlog gevoer het wat in 1992 ten einde geloop het, weier om die uitslae van die 2014-verkiesing te aanvaar.

Die regerende Frelimo-party het weereens ‘n oorwinning behaal en is reeds sedert onafhanklikwording, 40 jaar gelede, aan bewind.

Die spanning is sedert 2013 aan die oplaai en Renamo-rebelle het weer die wapen opgeneem in wat hulle bestempel as ‘n geveg teen ’n Frelimo-elite wat hulself ten koste van land verryk het.

Vredesonderhandelinge word in die vooruitsig gestel, maar die owerheid beskuldig Renamo intussen vir die toename in gewelddadige aanvalle in die noorde en sentrale dele van Mosambiek.

In Mei is op die oorskot van 13 mense in die onstabiele sentrale deel van die land afgekom, waar veiligheidsmagte en Renamo-rebelle gereeld slaags raak.

Mosambiek se menseregte-organisasie voer aan dat minstens 83 summiere teregstellings sedert die begin van die jaar voorgekom het.

Kortlys vir nuwe Openbare Beskermer bekend

Parlementslede het ‘n lys van 14 kandidate genomineer vir die kortlys waaruit Suid-Afrika se nuwe Openbare Beskermer gekies moet word.

Mense wat die lys gehaal het, is die Adjunk- Openbare Beskermer, Kevin Malunga, die Wes-Kaapse Regte, Siraj Desai, en die Adjunk-Nasionale Direkteur van Openbare Vervolging, Willie Hofmeyer.

Die uittredende Openbare Beskermer, Thuli Madonsela, se termyn eindig die einde van Oktober.

‘n Spesiale Parlementêre komitee het meer as 60 nominasies vir die kortlys ontvang.

Agt vroue het die kortlys gehaal.

Onderhoude sal op 11 Augustus met die kandidate op die kortlys gevoer word.

Elke kandidaat sal ‘n uur kry om te sê waarom hy of sy die pos moet kry.

Die komitee sal na die volgende eienskappe soek wanneer hulle die kandidate oorweeg: Karakter, ondervinding, kennis en vaardighede.

Die komitee het ook bygevoeg dat hulle die kandidate verder sal toets op bestuursvaardighede, hul begrip van ‘n ontwikkelende staat, hul begrip van die drie vlakke van regering en hul verhoudings, finansiële bestuur, leierskapvaardighede en menslike hulpbronvaardighede.

Die 14 kandidate op die kortlys is:

Regter Sharise Weiner, Regter Sirajudien Desai, Kevin Malunga, Nonkosi Cetywayo, Mhlaliseni Mthembu, Madibeng Mokoditwa, Mamiki Goodman, prof. Narnia Bohler-Muller, prof. Bongani Majola, me. Busisiwe Mkhwebane, me. Jill Oliphant, me. Muvhango Lukhaimane, me. Kaajal Ramjathan-Keogh en mnr. Willie Hofmeyer.