Prof. Fatima Meer, oud-ANC-styder met hegte bande ondermeer met Winnie Madikizela-Mandela, het gister haar steun toegesê aan die Volkskongres, wat onlangs uit die ANC weggebreek het.
Sy het aan lede van die kongres gesê dat sy nie meer vertroue in die ANC het nie. Lekota het gesê dat hy nie verbaas was deur die aankondiging nie en dat hy Meer in kongres verwelkom.
Meer is een van verskeie ANC-lede wat in die onlangse tyd uit die regeringsparty bedank en hulle by die Volkskongres aangesluit het.
Twee polisiemanne het saam met ses ander mans in die hof verskyn op aanklagte dat hulle ‘n OTM by Leslie in Mpumalanga opgeblaas het, het die polisie gesê.
Kaptein Leonard Hlati het gesê die twee polisiebeamptes wat by die Leslie polisiestasie gestasioneer was, was inspekteur Sipho Nkosi, (39) en konstabel William Smith (24).
Hulle is positief verbind met die opblaas van die OTM by die Caltex-garage in Leslie op 28 September.
Die georganiseerdemisdaadeenheid het Smith gearresteer nadat hulle ‘n leë magasyn op die toneel gevind het. Ondersoeke het getoon dat Smith na bewering sy wapen afgevuur het op die toneel en die magasyn daar gelaat het.
Smith het klaarblyklik daarna na die stoorklerk toe gegaan en haar R500,00 aangebied om ‘n nuwe magasyn aan hom te gee.
Toe polisie hom ondervra het, het hy onthul dat hy nie ‘n magasyn vir sy vuurwapen het nie, en dat die wapen by die perseel waar die roof plaasgevind het gebruik is.
Hy het erken dat inspekteur Nkosi een van die medepligtiges was.
Nkosi is gearresteer, en twee vuurwapens en sy dienspistool is gekonfiskeer. ‘n Groot bedrag geld, wat waarskynlik gesteel is na die opblaas van die OTM is ook na bewering in sy besit gevind.
Nog ses medepligtiges is op 2 Oktober gearresteer.
Hulle is Petrus Mbonani (45), Nimrod Mabasha (46), Patrick Nkonde (46), Ben Malaza (35), Moses Ledwaba (47) en Makhosini Hlope, ouderdom onbekend.
Die twee beamptes is geskors uit die polisiediens.
Die agt mans het op Dinsdag in die landdroshof op Leslie verskyn.
Hulle is borgtog van R10 000,00 toegestaan en moet weer op 11en 12 Februarie 2009 in die streekhof in Evander verskyn, het Hlati gesê.
Prof. Jonathan Jansen dink nie meer rasse-integrasie in skole ’n goeie ding is nie. In Jansen se rubriek in The Times sê hy hy het te veel skole gesien waar rasse-integrasie die skool se etos vernietig.
Dié leerlinge sou nooit in wit of swart middeklasskole toegelaat gewees het nie vanweë hulle swak akademiese prestasie en wanfunksionele gedrag . As wit werkersklasskole swartes inneem, vlug die wit leerlinge na ander wit skole en die voorheen wit skool word dan ’n arm swart skool.
08:32:48 Die Europese Unie gaan Vrydag vergader om humanitêre hulp en meer vredesmagsoldate na die DRK te stuur, het die Franse minister van buitelandse sake, Bernard Kouchner, gesê.
In Brussel gaan die 27 EU-lande Vrydag moet besluit om baie vinnig ‘n humanitêre sending aanmekaar te sit om die 250 000 mense in die ooste van dié land te help, nadat hulle ontwortel is deur aanvalle van rebellesoldate, het Kouchner gesê.
EU-lande sal ook moet besluit oor hoe die VN-vredesmagte, wat op 17 000 die grootste vredesmag ter wêreld is, verder versterk kan word.
Soldate wat deur die wegbreek Toetsi-generaal, Laurent Nkunda, gelei word, het Donderdag die buitewyke van die dorp Kanyabayonga, in die noord-Kivuprovinsie bereik. Honderde regeringstroepe en vredesmagtelede is in die dorpie ingegrawe.
Nkunda se troepe het ook Goma, die streekshoofstad van die Kivuprovinsie, vir die afgelope twee weke omsingel. Dié aksie het die VN geforseer om nog vredesmagsoldate daarheen te stuur om te help met die verdediging van die stad en sy ongeveer halfmiljoen burgerlike inwoners.
Die Onafhanklike Verkiesingskommissie (OVK) het gister op ’n mediakonferensie in Pretoria gesê dat meer as 3,6 miljoen Suid-Afrikaners geregistreer, herregistreer of aangedui het hul besonderhede op die kieserslys is korrek. Altesame 'n rekordgetal van 1,6 miljoen nuwe kiesers het die afgelope naweek vir aanstaande jaar se verkiesing geregistreer.
Dr. Brigalia Bam, OVK-voorsitter, het gesê die naweek se registrasieveldtog was die suksesvolste ooit en kan hoofsaaklik aan die “huidige opwindende politieke omgewing” toegeskryf word.
Dit het meegebring dat die kieserslys met 7,61% tot 21 661 171 geregistreerdes gegroei het en baie jongmense het landwyd na die meer as 19 000 registrasiepunte gestroom.
Altesame 77,9% van die mense wat aangemeld het, was tussen 16 en 29 jaar. Daar was veral baie nuwe registrasies (835 447) van kiesers tussen 20 en 29 jaar.
KwaZulu-Natal het die meeste nuwelinge verwelkom op die kieserlys (451 030) gevolg deur Gauteng en die Oos-Kaap met onderskeidelik 369 623 en 193 444.
Die jongste senior bedanking uit die ANC is mnr. Smuts Ngonyama.
Ngonyama, 'n oudwoordvoerder van die presidensie, gaan ook sy gewig ingooi by die nuwe party van oudminister Terror Lekota, die Volkskongres oftewel die Congres of the People (Cope) soos dit in Engels bekendstaan.
Dit is nog nie bekend watter posisie hy in die party sal bekleë nie.
Die sperdatum vir die indiening van belastingopgawes is tot 5 Desember verleng.
Belastingbetalers het dus twee weke ekstra gekry om hul opgagewes in te dien, is Donderdagmiddag bekend gemaak.
Die belasting inkomstediens se kommissaris, Pravin Gordhan, het gesê een van die redes vir die verlenging is omdat Suid-Afrikaners geneig is om sake tot op die nippertjie uit te stel.
Aanvanklik moes belastingopgawes teen 21 November ingedien gewees het.
Eskom het Donderdag gesê dat die land nie kragonderbrekings in Januarie en Februarie volgende jaar sal ondervind nie. Algemene bestuurder van die aanvraagkant, Andrew Etzinger, het bevestig dat e-posse die rondte doen waarin beweer word dat die land se netwerk gaan ingee, maar hy het gesê dat die kragstelsel in 'n baie beter toestand is as 'n jaar gelede.
Terwyl Etzinger sê dat Suid-Afrika se reserwemarge nie veel verbeter het nie omdat dit nou op 6% staan en nog nie by 15% soos beoog nie, het Eskom sedert April afgesien van beurtkrag en die moratorium om nuwe aansluitings afgeskaf.
Steenkoolvoorsiening by Eskom se kragstasies wat op 'n stadium af was na 5 dae se voorraad of minder, is nou gemiddeld op na 35 dae en geen stasie het minder as 20 dae se voorraad nie.
Almal is bekommerd oor Eskom se vermoë om die ligte te laat aanhou brand, veral met die nuwe jaar wat voorlê, sê Etzinger. Maar Eskom het "redelik vertroue" dat hulle die paal sal haal.
Die ANC het Donderdag gesê dat hulle mnr. Smuts Ngoyama se bedanking verwelkom.
"Ek bedank vandag [Donderdag]" het hy gesê. "Ek het met die sekretaris-generaal, mnr. Gwede Mantashe gepraat en hom van my besluit ingelig."
Ngoyama sal later vandag die redes vir sy bedanking by 'n perskonferensie wat deur die Volkskongres van Terror Lekota en Mbhazima Shilowa gereël word, bekendmaak.
Zuma sal verskeie gemeenskappe rondom Kimberley besoek en toesprake hou. Zuma het Woensdag die Upington gebied besoek.
By die Mayibuye Sentrum het honderde ANC lede met geel T-hemde singend en dansend vir Zuma gewag. Die ANC president sou na verwagting met alliansievennote soos Cosatu, in die Noord-Kaap vergader.
Hy gaan ook 'n besoek bring aan Platfontein, buite Kimberley, die tuiste van die inheemse Khoe- en Kwe-gemeenskappe in die Noord-Kaap.
