Nuus oor die wêreld buite Suider-Afrika
Die Europese Unie sal nagenoeg R10 miljard aan Haïti in die volgende paar jaar skenk om te help met ontwikkeling.
Catherine Ashton, die EU se hoof van buitelandse sake, sê sy sal hierdie bedrag namens die EU volgende week by ‘n konferensie in New York, oorhandig.
Volgens Ashton benodig dié land langtermyn hulp vir ontwikkeling. Die EU se departement van buitelandse sake het Maandag tydens ‘n vergadering besluit op dié bedrag.
Die Britse minister van buitelandse sake, David Milliband, glo dat Israel Britse paspoorte misbruik het in die sluipmoord op ‘n Hamas-amptenaar in Doebai .
“In die lig daarvan dat hierdie ‘n baie gesofistikeerde operasie was waarin hoë-kwaliteit vervalsings gemaak is, sien die regering dit as baie waarskynlik dat die vervalsings deur ‘n staatsintelligensiediens gemaak is,” het Miliband aan parlementslede gesê.
“Hierdie, tesame met ander ondersoeke met ‘n verbintenis met Israel wat deur die Britse agentskap teen ernstige georganiseerde misdaad (Soca) gedoen is, het ons by die slotsom gebring dat daar oortuigende redes is om te glo dat Israel verantwoordelik was vir die misbruik van die Britse paspoorte.”
Miliband het ook bevestig dat ‘n Israelse diplomaat op sy versoek onttrek is. Hy is twee weke gegee om Brittanje te verlaat. ‘n Segsman het namens Gordon Brown gesê die premier ondersteun die besluit.
Die Mossad, Israel se geheime diens, word allerweë vir die sluipmoord op Mahmoed al Mabhoeg op 20 Januarie in ‘n luukse hotel verantwoordelik gehou.
Ander identiteite wat in die sluipmoordaanval gebruik is, is na bewering Iers, Frans en Australies, volgens die Doebaaise polisie.
Interpol het lasbriewe vir die inhegtenisname van 27 verdagtes in verband met die moord uitgereik.
Nicolas Sarkozy is pas ‘n vernederende nederlaag toegedien. Hy het tydens die afgelope plaaslike verkiesings in Frankryk die slegste uitslag vir sy party in meer as ‘n half-eeu behaal.
Die UMP kon net 36% van die stemme trek, terwyl die Sosialiste 54% op nasionale vlak gekry het.
Dié plaaslike verkiesingsuitslag is die finale groot toets vir Sarkozy en die middelregse UMP-party voor 2012 se presidensiële verkiesings.
Slegs in een van Frankryk se 22 hoofstreke kon die UMP wen.
Francois Fillon, Franse premier, sal vandag met Sarkozy vergader om die swaar verliese wat hulle gelei het, te bespreek. Alhoewel daar nie verwag word dat Fillon sal bedank nie, sal sekere ministers in die pad gesteek word.
‘n Sukkelende ekonomie, groeiende werkloosheid en dikwels onsamehangende beleidsformulerings het volgens Fillon die beroerde uitslag bepaal.
‘n Groot verrassing was die vertoon van die verregse Front National wat met mening ten koste van die UMP terug is. Hulle het nasionaal 9,4% behaal maar in kernstreke meer as 22%.
Nadat Sarkozy president geword het op die rug van ‘n verkiesingsveldtog wat baie by die FN geleen het, het kommentators die party van Jean-Marie Le Pen afgeskryf.
Martine Aubry was nie openlik triomfantelik oor haar party se goeie vertoning nie, maar haar posisie as leier van die Sosialistiese Party is na dese aansienlik gesterk.
Vraag nommer 9 op die jongste Amerikaanse sensusvorm het Latyns-Amerikaanse burgers aan die kopkrap.
Jessica Valenzuela, ‘n onderwyseres van Avondale, is maar een geval. “Ek weet nie wat om te antwoord nie,” sê sy.
Die vraag is aan watter ras die invullers van die huishouding behoort. Die keuses is wit, swart, Indiaans, Alaskaboorling, verskeie Asiese groepe, Hawaii-boorling, Suid-See eilander asook “‘n ander soort ras”.
Valenzuela, soos baie mense, weet nie mooi waar sy inpas nie.
“Heel duidelik is ek nie wit nie,” sê Valenzuela, 37. “Ek is Latyns-Amerikaans of Meksikaans, maar vir seker nie wit nie.”
Die sensus tel wel Latynse Amerikaners. In vraag 8 moet invullers aantoon of hulle “Latyns, Meksikaans of Spaans van oorsprong” is. Federale amptenare beskou glo Meksikaans as ‘n etniese kategorie eerder as ‘n ras.
Maar diegene wat “ja” antwoord in vraag 8, weet nie hoe om vraag 9 te benader nie.
Sensusraadgewer en sosiologie leerkrag aan die Universiteit van Californië-Riverside, Prof. Swanson sê die kwessie is al lank reeds ‘n probleem.
“In 1930 se sensus het Meksikane hulleself as ‘n afsonderlike ras beskou,” sê Swanson. In die 2000-sensus het 48% van Meksikane hulleself as wit verklaar terwyl 42% gedink het hulle behoort aan “‘n ander soort ras”
Latynse en Meksikaanse inwoners beskou hulleself toenemend egter as slegs Latyns-Amerikaans. ‘n Uitsondering is diegene wat as “Chicano’s” wil bekendstaan.
Dikwels neem Latynse Amerikaners die Sensuskantoor kwalik omdat hulle nie tussen bruin en wit onderskei nie. Hulle wil baie gevalle liewer bruin wees en identifiseer nie met wit nie.
Duisende betogers het na Washington opgeruk en daarop aangedring dat die regering Amerikaanse troepe in Irak en Afganistan onttrek.
Die betogers se woede was meestal op Pres. Barack Obama gerig.
Ten minste agt mense is na die afloop van die betoging in hegtenis geneem.
“Arresteer die krimineel!”, het Cindy Sheehan, ‘n aktivis wat deelgeneem het aan die betoging, geskree.
Sy is een van die agt mense wat in hegtenis geneem is.
Sheehan het tydens ‘n saamtrek voor die optog aan die skare gevra of die “wittebrood nou verby is vir die oorlogmisdadiger in die Withuis”.
Haar uitlating het matige applous uitgelok.
Ander betogers was effens meer goedgesind teenoor die president.
“Ons is lief vir jou Obama, maar jy kry bloed op jou hande”, was op een betoger se plakaat geskryf.
Ralph Nader, ook ‘n aktivis, het aan die skare gesê dat Obama in werklikheid ‘n voortsetting van die Bush-administrasie is en dat enige ander siening onnosel is.
Obama se gewildheid is die laagste wat dit nog ooit was sedert hy die Withuis betree het.
Tony Blair, eertydse Britse premier, is twee jaar lank al in ‘n stryd gewikkel om sy geheime olie-ooreenkoms ‘n geheim te probeer hou.
Blair het ‘n uiters lukratiewe sake-ooreenkoms met ‘n multinasionale oliereus gesluit met uitgebreide belange in Irak.
Die voormalige Arbeidersregeringleier het probeer om sy ooreenkoms met die UI Energy Corporation van Suid-Korea, waarmee hy intussen sowat R220 miljoen verdien het, nie te laat uitlek nie deur oproepe van ‘n regeringswaghond te ignoreer.
Hy het ook gepoog om ‘n ooreenkoms met Koeweit waarin hy as adviseur vir die koninklike gesin opgetree het en ongeveer R11 miljoen ontvang het, uit die nuus te hou.
Blair se geldmakery het nou op die lappe gekom nadat die komitee wat sake oorsien, die Advisory Committee on Business Appointments geduld met hom verloor het.
Die voormalige eerste minister misbruik kennelik sy rol as Westerse gesant in die Midde-Ooste vir sy eie gewin, word beweer.
Kenners wat oor Blair se sakebelange spekuleer, meen dit is slegs die puntjie van die ysberg, Hy het glo sy reuse inkomste wat hy uit allerlei verdien, goed verskans met skadumaatskappye en vennootskappe.
Sodoende kon hy tot op hede verhoed dat die volle prentjie van sy rykdom openbaar gemaak word.
Kritici wys ook daarop dat ‘n groot deel van sy inkomste uit die VSA en die Midde-Ooste kom. Dit is ‘n duidelike bewys dat Blair gebaat het by die Amerikaanse inval in Irak en sy “noue bande” met George Bush.
‘n Britse parlementslid het Donderdag gesê, die kwessie “lyk nie net sleg nie, dit stink”.
“Dit blyk dat die voormalige premier van Brittanje op die betaalstaat van ‘n baie groot buitelandse oliemaatskappy is en ons word in die duister gehou daaroor,” het hy gesê.
Nog ‘n parlementslid het uitgewys dat Blair “te koop” is.
Die Suid-Koreaanse UI Energy is een van die grootste investeerders in Irak se olieryke en semi-outonome Koerdistan.
Blair wou nie Donderdag kommentaar lewer oor die aangeleentheid nie.
Daar is niks wat die etniese geweld in Nigerië sal kan stop nie, behalwe as die bevolking in Christen- en Moslemstate verdeel word, het Libië se leier gesê.
Moeammar Gaddafi het aan ‘n groep Afrika-studenteleiers in Triplo gesê dat die geweld in Nigerië van ‘n godsdienstige aard is en dat dit ‘n radikale oplossing vereis.
Nigerië moes hierdie jaar twee uitbarstings van geweld tussen Moslems en Christene trotseer, toe mans en vroue vermoor is. Die geweld word vermoedelik meestal uit wraak gepleeg, maar groeiende godsdienshaat en politieke en etniese mededinging vuur die aanvalle nog verder aan.
Nigerië, ‘n land met ongeveer 150 miljoen mense, het net soveel Moslems in die noorde as Christene in die suide.
Volgens Gaddafi sal dié uitweg pynlik wees, maar dit moet bereik word deur ‘n ooreenkoms, en níé deur nog gevegte of bloedvrgieting nie.
‘n Berig wat Sondag in die Herald of Scotland verskyn het, kan beteken dat ‘n Amerikaanse aanval teen Iran net om die draai lê.
Veiligheidskenners meen die feit dat die skepe vol wapentuig na die VSA se basis Diego Garcia oppad is, ‘n sterk aanduiding gee van ‘n komende oorlog.
Dit mag ook die oplaaiende spanning tussen die VSA en Israel verklaar, in die sin dat só ‘n aanval nie moet lyk asof die VSA dit namens Israel voer nie.
Vanweë Israel se hantering van die Palestynese kwessie, het Amerika talle vyande in die Midde-Ooste gemaak, waaronder veral Iran, het Genl. David Petraeus onlangs gesê.
Lees die volledige berig hier.
Die bevelvoerder van Amerikaanse en NAVO-troepe in Afghanistan het nuwe reëls bekendgemaak nadat spesmagte in ‘n reeks mislukte operasies die lewens van talle burgerlikes geëis het.
Twee verwagtende vroue en ‘n tienermeisie is onlangs in ‘n nagaanval gedood deur Amerikaanse spesiale magte.
Generaal Stanley McChrystal het toegegee dat troepe wat aan verskillende bevelstukture onderworpe is, soms in mekaar se pad kom.
Hy het aan The New York Times gesê almal probeer hul bes, maar dikwels is die uitkoms nie die gewensde een nie.
Die meeste spesiale troepe sal voortaan onder dieselfde beheer staan. Hy sal ook die verantwoordelikheid aanvaar vir missies wat tot burgerlike sterftes lei.
NAVO meen Generaal McChrystal se inisiatief sal tot beter koördinasie lei.
Generaal David Petraeus was tot op hede die bevelvoerder van die spesmagte wat hulle skuldig gemaak het aan die ergste vergrype.
Die nuwe reëls sal slegs op militêre personeel van toepassing wees.
Die CIA sal, soos voorheen, direk aan Langley in Virginia, die VSA-hoofkantoor van die organisasie, rapporteer.
Intelligensie amptenare in Pakistan het gesê dat ‘n vermeende Amerikaanse missielaanval die lewens van minstens ses mense in noordwes Pakistan geëis het.
Volgens amptenare is ‘n onbekende hoeveelheid mense ook in Dinsdag se aanval in die noordelike deel van die Waziristanprovinsie beseer.
Die CIA het millitêre dele in Pakistan herhaaldelik sedert Desember geteiken nadat ‘n selfmoordbomaanvaller sewe CIA-lede in Afganistan vermoor het.
Die amptenare het op voorwaarde van anonimiteit gepraat, aangesien hulle nie toegelaat word om met die media te praat nie.
