Suider-Afrika Archives - Page 88 of 888

Vrystaatse skole wag steeds op departement se subsidies

Die Federasie van Beheerliggame van Suid-Afrikaanse Skole (Fedsas) gaan die Vrystaatse onderwysdepartement hof toe sleep weens derduisende rande se uitstaande skoolsubsidies.

Adjunkhoof van Fedsas, Jaco Deacon, sê die organisasie wil die departement verplig om uitstaande subsidies aan skole in die provinsie te betaal. Hy sê die departement het versuim om die uitstaande geld aan die einde van Januarie te betaal, soos aanvanklik aangedui is.

Volgens hom het spesiale skole in die provinsie wel hul subsidies verlede jaar in die laaste skoolkwartaal ontvang. Altesaam 1 260 openbare skole en 72 private skole het slegs tussen 10% en 15% van hul skoolsubsidies ontvang.

Hy sê skole maak staat op die geld om hul uitgawes in Januarie en Februarie te dek. Die uitgawes sluit onder meer elektrisiteit- en waterrekeninge in. Volgens Deacon moet die departement al volgende maand weer die volgende subsidie aan skole betaal.

Skole gebruik verlede jaar se skoolsubsidies vir uitgawes omdat kinders se skoolgeld eers later in Februarie inkom. Die onderwysdepartement betaal subsidies jaarliks in vier paaiemente.

Deacon sê meer as 650 000 kinders in die Vrystaat word geraak deur die uitstaande geld wat nie deur die departement betaal word nie.

Menigitis trek 38 plat in Mosselbaai

‘n Uitbreking van virale meningitis is in Mosselbaai in die Suid-Kaap aangemeld.

Dié soort meningitis word deur ontlasting versprei en die simptome sluit koors, hoofpyne, maagpyn, braking, ‘n stywe nek en diarree in.

Die 38 gevalle tussen 1 Desember 2015 en 1 Februarie is almal gehospitaliseer.

Wes-Kaapse departement van gesondheid het bevestig dat 37 is kinders onder tien jaar oud die siekte onderlede het terwyl ‘n 37-jarige man ook ongesteld is.

Dit is glo volgens die departement ‘n minder gevaarlike vorm van breinvliesontsteking.

Inwoners word aangemoedig om hul higiëne te verbeter en gereeld hande te was, veral na ablusiebesoeke.

Ondersoek kom na seiljagongeluk op Weskus

Die Suid-Afrikaanse Maritieme Veiligheidsowerheid sal die seiljagongeluk aan die Weskus ondersoek.

Drie mense was aan boord van die seiljag, wat glo van Langebaan na Kaapstad op pad was.

‘n Ierse burger wat in die Wes-Kaap woonagtig is, het oorleef en is nie beseer nie.

Hy kon daarin slaag om die owerhede van die ongeluk in kennis te stel.

Craig Lambinon, woordvoerder van die Nasionale Seereddingsinstituut (NSRI), het gesê die NSRI is Maandagoggend vroeg ontbied om bystand te verleen.

Die seiljag het tussen Melkbosstrand en Yzerfontein omgeslaan.

Lambinon het gesê die lyke van twee Wes-Kaapse inwoners, onderskeidelik ‘n Skot en ‘n Ier, is op die toneel gevind.

Die polisie het intussen ‘n dossier vir ‘n geregtelike doodsondersoek geopen om die oorsaak van die dood van die twee seiljagvaarders te bepaal.

“Met die NSRI se aankoms is die seiljag Tara aan stukke op die rotse aan die kus gevind,” het Lambinon gesê.

Dit is nog onbekend wat die ongeluk veroorsaak het aangesien dit nie duidelik is of die seiljag omgeslaan het voordat dit die rotse getref het nie.

Vyf vas na Britse vlieënier se dood

Pres. John Magufuli van Tanzanië het die dood van die Britse bewaringskundige wie se helikopter afgeskiet is toe hy vermeende stropers agtervolg het, veroordeel, en gesê vyf mense is in hegtenis geneem, het AFP berig.

Die Brit Roger Gower (37) het gesterf toe sy helikopter Vrydag tydens ’n patrollievlug oor die Maswa Natuurreservaat naby die wêreldbekende Serengeti Nasionale Park afgeskiet is.

Hy het vir die Friedkin Bewaringsfonds gewerk en was besig om vermeende stropers te agtervolg nadat hy die vars karkasse van olifante opgemerk het.

“Dit is ’n hartseer voorval en moet ten sterkste veroordeel word,” het Magufuli gesê.

Volgens hom is vyf verdagtes in hegtenis geneem en deur die polisie ondervra.

Gower se Suid-Afrikaanse vennoot, die safarigids Nicky Bester, was ook in die helikopter en het die ongeluk oorleef.

Pascal Shelutete, woordvoerder van nasionale parke in Tanzanië, sê die stropers “kan swaar gewapen wees met gesofistikeerde militêre wapentuig”.

Aanvalle op vragmotors in Karoo ‘n kopseer

Aanvalle op vragmotorbestuurders in die Karoo raak ‘n kopseer sê bestuurders.

As die polisie nie optree teen aanvallers nie, sal bestuurders genoop word om die reg in eie hande te neem, sê hulle.

‘n Vragmotorbestuurder van Kaapstad is verlede week buite Beaufort-Wes aangeval.

Netwerk24 het berig dat Pierre Momberg (40) in die oggend omstreeks 03:30 net ná die verkeerslig aan die Kaapse kant van Beaufort-Wes stilgehou het om sy vragmotor te inspekteer.

Die aanvallers, vermoedelik swart of bruin, het met messe en ysterpype gewapen op hom toegesak.

Volgens Beaufort-Wes se polisiewoordvoerder is nie een van die betrokke polisiekantore – Beaufort-Wes en Leeu-Gamka – ingelig oor die voorval nie.

Die parlement sal glo vandag polisielede wat by misdaad betrek word onder die loep neem.

‘n Verslag van die Onafhanklike Polisie Ondersoekdirektoraat toon dat meer as 2700 sake teen die polisie in die ses maande tussen April en September verlede jaar by OPOD aangemeld is.

Volgens die verslag was daar 103 sterftes in polisie-aanhouding, terwyl 159 mense weens polisie-optrede dood is.

Daar is 61 verkragtings deur polisielede aangemeld en 50 mense is tydens polisie-aanhouding verkrag.

Sowat 73 gevalle van marteling is aangemeld.

Die syfers toon dat die polisie 1745 mense aangerand het. Altesaam 44 polisielede word van korrupsie aangekla.

Britse vlieënier deur stropers doodgeskiet

Drie mense is in hegtenis geneem oor die moord op ‘n Britse helikoptervlieënier deur olifantstropers in Tanzanië. Die voorval het in die Maswa-wildreservaat gebeur.

Die mans is Sondag deur die polisie aangekeer weens die moord op Roger Gower, het die Agence France Presse (AFP) nuusagentskap berig.

‘n Suid-Afrikaner is ook in die aanval gewond.

Gower, 37, het owerhede in Tanzanië bygestaan om stropers waan te keer toe hulle Vrydag op sy heli losgebrand het, het die Friedkin Conservation Fund (FCF) gesê.

Hy het daarin geslaag om die helikopter in die Maswa-reservaat naby Serengeti Nasionale Park te laat land, maar het aan sy wonde beswyk voor hy kon gered word.

Die polisie in Tanzanië ondersoek ‘n moordsaak teen drie mans wat in hegtenis geneem is nadat die Britse vlieënier vermoor en ‘n Suid-Afrikaanse safarigids gewond is.

Die polisie sê die gewapende aanvallers het op die mans se helikopter geskiet waar hulle op soek was na olifantstropers.

Gower se Suid-Afrikaanse kollega, Nicky Bester kon daarin slaag om betyds uit die helikopter te spring.

‘n Woordvoerder van Tanzanië se Nasionale Parke sê nóg stropers kan binnekort aangekeer word.

Tanzanië is in ‘n bitter stryd gewikkel om ivoorstropers te stop. In ‘n verslag verlede jaar is geraam dat 60% van die land se olifantbevolking in die vorige vyf jaar uitgeroei is.

China is die wêreld se grootste mark vir onwettige ivoor, wat onder die dekmantel van wettige ivoorverkope floreer.

Tanzanië het ook verlede jaar ‘n Chinese vrou, Yang Feng Clan, 66, wat 1,9 ton se smokkelivoor geskuif het, veroordeel.

Gower was ‘n voormalige rekenmeester wat as ‘n vlieënier gekwalifiseer het in 2004 en verhuis het na Afrika ongeveer twee jaar later, volgens ‘n profiel van sy voormalige werkgewer Tropic Air Kenia.

Hy het vroeër die Britse leër met die oefeninge in die land bygestaan.

ANC sleep DA se Trollip voor MRK

Die ANC gaan ‘n klagte by die Menseregtekommissie indien teen die familie van die DA se burgemeesterskandidaat vir die Nelson Mandelabaai Metropool, Athol Trollip, het RSG berig.

‘n Woordvoerder, Zizi Kodwa beweer die familie het plaaswerkers se regte geskend toe hulle in Bedford in die Oos-Kaap vir hulle gewerk het.

Kodwa sê die werkers het geskrewe verklarings ingedien oor hoe hulle tussen 2005 en 2010 behandel is.

Kodwa sê Trollip was bewus van die gebeure, maar het glo niks daaraan gedoen nie.

Intussen het Trollip in reaksie die raadslid Lawrence Troon vir naamskending gedagvaar.

Volgens Trollip het ‘n joernalis die verklarings wat glo nie onderteken is nie, aan hom gewys. Hy beweer dat die joernalis die verklarings van Troon gekry het.

Trollip sê sommige van die plaaswerkers het nog nooit vir sy familie gewerk nie.

Mugabe se aanvalle op wittes raak feller

Die uittredende AU-voorsitter, Robert Mugabe het die VN by die Afrika-beraad gekritiseer en gesê die Veiligheidsraad stel slegs daarin belang om witmense in sleutelposisies aan te stel.

Die Zimbabwiese president het Saterdag ‘n staande ovasie deur sy swart eweknieë in Addis Abeba, Ethiopië, ontvang vir sy jongste aanval op wittes.

Hy het afgesluit met meer as net sy gewone skeltaal teen voormalige koloniste, imperialiste, Westerlinge, die Amerikaanse president Barack Obama, die Verenigde Nasies en blankes oor die algemeen.

VN Sekretaris-generaal Ban Ki-moon het ineengekrimp op sy sitplek op die podium gelyk toe die 91-jarige Mugabe gedreig het dat Afrika uit die VN stap tensy die vasteland permanente verteenwoordiging op die Veiligheidsraad kry.

“Ons Afrikane is moeg vir hol toesprake by die VN met geen resultate nie,” het hy gesê.

Hy het gesê die VN se hoofkwartier in New York is misplaas en behoort in ‘n meer bevolkte land, soos China, Indië, of in Afrika te wees.

Gerugte dat Mugabe sterwend is, is ook die nekslag toegedien met die ou swart staatshoof wat vol veglus was.

President Jacob Zuma het ter ondersteuning van Mugabe gesê Afrika behoort nie die blaam te kry vir die gebrek aan hervorming van die VN se Veiligheidsraad nie.

Zuma sê dit is nie Afrika se keuse om geen permanente plek op die Veiligheidsraad te hê nie.

Zuma se opmerkings kom nadat die sekretaris-generaal van die VN, Ban Ki Moon vroeër by die Afrika-beraad in Addis Abeba gereageer het op Mugabe se aantygings en gesê het verdeeldheid verhoed die hervorming wat Afrika-lande eis.

Ban sê sekere lande jaag slegs hul eie belange na.

Die Afrika-vasteland het twee roterende plekke op die Veiligheidsraad.

Suid-Afrika kan binnekort ook onttrek uit die Internasionale Strafhof (ICC), het Zuma Sondag verklaar.

Hy het opgemerk dat hy en sy mede-leiers van Afrika groeiende kommer ervaar oor die wyse waarop die ICC teenoor die vasteland optree.

Zuma het gesê Suid-Afrika se bekragtiging van die Statuut van Rome is problematies.

“Suid-Afrika is ernstig om sy deelname aan die Statuut van Rome te hersien en sal mettertyd sy besluit aankondig,” het hy by die beraad gesê.

Die sekretaris van die parlement, Gengezi Mgidlana het intussen bekend gemaak dat die media toesgepreek sal word oor die voorbereidings vir President Jacob Zuma se staatsrede op 11 Februarie.

Hy sal na verwagting benadruk hoe Parlementslede hulle behoort te gedra.

Verlede jaar is EFF-LP’s uit die Nasionale Vergadering verwyder omdat hulle die President se toespraak onderbreek het. Die DA het in reaksie daarop uitgestap.

Die media sal na verwagting meer duidelikheid kry oor die Parlement se nuwe reëls en ander prosedures.

Gareth Cliff wen dringende hofsaak teen Naspers se M-Net, bly Idols-beoordelaar

M-Net, die televisiefiliaal van die magtige Naspersgroep, het hul dringende hofgeding met die aanbieder Gareth Cliff verloor en moet sy regskoste betaal, asook hom heraanstel as “Idols”-beoordelaar.

Sy swart advokaat, Dali Mpofu, het in die hof aangevoer dat Cliff “afgedank is omdat hy ‘n blanke is”. Hiermee het Mpofu M-Net se beskuldigings van “rassisme” jeens Cliff in eie munt terugbetaal.

Regter Caroline Nicholls het bevind dat daar ‘n ooreenkoms tussen Cliff en M-Net bestaan en dat die ooreenkoms eerbiedig moet word.

‘n Ontspanne Gareth Cliff het vandag by die Hooggeregshof in Johannesburg opgedaag om die uitspraak aan te hoor. Hy is agterna tesame met sy blanke vroueprokureur en Dali Mpofu gefotografeer, terwyl hy breed glimlag.

Cliff sou vanjaar mede-aanbieder van die twaalfde seisoen van die Suid-Afrikaanse werklikheidstalentprogram wees, maar in die naloop van die Penny Sparrow-debakel is hy afgedank omdat hy ‘n “rassistiese uitspraak” sou gemaak het. Hy het egter bloot met betrekking tot Penny Sparrow gesê: “Mense verstaan hoegenaamd nie spraakvryheid nie.”

Die aanbieder het Dinsdag ‘n dringende aansoek teen M-Net geloods waarin hy die hof versoek om hom her- aan te stel of aan hom R25 miljoen aan skadevergoeding vir laster en die beëindiging van sy kontrak te betaal.

Die eerste Idols-oudisies begin reeds môre in Durban. Cliff sal egter eers vanaf 3 Februarie by die hoofoudisies teenwoordig wees.

M-Net is deur die liberale blanke advokaat, Wim Trengove, verteenwoordig. Hy het in die hof gesê: “M-Net meen dat hulle nie iemand wil hê wat Penny Sparrow verdedig nie.”

Oxfordse universiteit kapituleer nie oor Rhodesstandbeeld nie

In skrille kontras met die Universiteit van Kaapstad, het die Oxfordse universiteit besluit om hom nie aan agitasie teen die Rhodesstandbeeld op sy kampus te steur nie. Oriel-kollege, waar Rhodes se standbeeld staan, het aangekondig dat dit nie van plan is dit te verwyder nie aangesien die kollege skenkings van tot £100m (R2,3 miljard) mag verloor indien hy daarmee sou voortgaan.

Volgens ‘n berig in die Londense Daily Telegraph, het die kollege verklaar: “Ná versigtige oorweging het die kollege se beheerliggaam besluit dat die standbeeld moet bly staan.”

‘n Swart Suid-Afrikaanse student, Ntokozo Qwabe, wat self met ‘n Rhodesbeurs aan die Universiteit van Oxford studeer, het heftig teen die standbeeld beswaar gemaak. Hy het ook gekla dat daar “te min swart professore aan Oxford is”.

Maar die Engelse in Engeland was nie heeltemal so ontvanklik vir swart voorskrifte soos die Engelse van Kaapstad nie. Volgens die Telegraph het Oriel-kollege reeds kansellasies van £1,5m ervaar met sommige alumni wat ook laat weet het dat hulle die kollege uit hul testamente sal weglaat.

“Die oorweldigende boodskap wat ons gekry het, is ten gunste van die behoud van die standbeeld,” sê Oriel. “Die kollege glo dat die onlangse debat juis beklemtoon het dat die voortdurende teenwoordigheid van historiese beelde ‘n belangrike herinnering verteenwoordig aan die ingewikkeldheid van die geskiedenis en die erfenis van kolonialisme wat vandag nog voelbaar is.”

Rhodes het die De Beers-mynmaatskappy gestig, terwyl teenswoordige Zimbabwe en Zambië insgelyks na hom vernoem is as Suid- en Noord-Rhodesië. Rhodes het geld geskenk aan Oriel-kollege, een van die 38 kolleges waaruit die Oxfordse Universiteit saamgestel is, en het insgelyks die Rhodesbeursfonds opgerig wat nie-Britse studente gehelp het om aan die universiteit te kan studeer. Onder hulle tel die voormalige Amerikaanse president Bill Clinton, asook die oudpremier van Australië, Tony Abbott.

“Om iemand so letterlik op ‘n voetstuk te plaas, bied implisiete steun aan sy erfenis,” het Daisy Chandley, een van die kampvegters vir die verwydering van die standbeeld, verlede maand gesê.

Die kanselier van Oxford, Chris Patten, het vandeesmaand in ‘n toespraak na die onderonsie rondom die standbeeld verwys deur te sê: “Ons geskiedenis is nie ‘n blanko vel waarop ons ons eie weergawe kan skryf van wat moes gebeur het nie.”